Муҳаммадҷавод Зариф, вазири умури хориҷии Эрон рӯзи сешанбеи 8-уми октябр аз тамоюли кишвараш ба музокира бо Арабистони Саудӣ барои ҳаллу фасли масоили минтақаӣ сухан гуфт, аммо айни ҳол таъкид намуд, ки Риёз бояд "куштани мардум"-ро қатъ кунад.
Арабистони Саудӣ, ки дар Яман бо шиаиёни гурӯҳи Ҳусӣ даргири ҷанг аст, Эронро масъули ҳамлаҳои моҳҳои гузашта ба муассисаҳои нафтии ин кишвар медонад. Аммо Эрон ҳамеша ин иттиҳомотро радд мекунад.
Дар ҳамин ҳол, Арабистони Саудӣ эълом кардааст, ки роҳи ҳалли сиёсиро бар рӯёрӯии низомӣ бо Эрон, тарҷеҳ медиҳад. Муҳаммадҷавод Зариф дар вокуниш ба ин тамоюли Риёз изҳор дошт, ки "вазорати умури хориҷии Эрон ҳамеша омодаи ҳамкорӣ бо ҳамсоягони худ барои амнияти минтақа аст ва ин мавзеъро ба таври расмӣ низ эълом кардаем".
Як мақоми ҳукумати Арабистони Саудӣ ҳафтаи гузашта ин гуфтаи мақомоти эрониро, ки Риёз паёмҳое аз тариқи раҳбарони дигари кишварҳо барои Ҳасани Рӯҳонӣ, раиси ҷумҳури Эрон фиристодааст, рад кард ва онро "ғайри дақиқ" хонд.
Одил Ал-Ҷубайр, вазири мушовир дар умури хориҷии Арабистони Саудӣ гуфт, "бояд он кишваре ба коҳиши танишҳо дар минтақа оғоз кунад, ки танишҳоро афзоиш медиҳад".
Ҳусиҳои Яман, ки гуфта мешавад аз ҳимояти Эрон бархӯрдоранд, масъулияти ҳамла ба муассисаҳои нафтии Арабистони Саудиро пазируфтанд. Аммо Риёз ин иддаоро радд мекунад ва мегӯяд, ки ин кори дасти Эрон аст.
Ҳусиҳо моҳи гузашта пешниҳод карданд, ки агар Арабистони Саудӣ ва муттаҳидонаш ҳамлаҳои низомии худро поён диҳанд, онҳо низ ҳамлаҳои мушакии худро ба шаҳрҳои Арабистон қатъ хоҳанд кард. Валиаҳди Арабистони Саудӣ эълом кардааст, ки ба ин пешниҳод бо нигоҳи мусбат менигарад.
Қаблан нахуствазири Покистон Имрон Хон гуфта буд, ки валиаҳди Арабистони Саудӣ Муҳаммад бин Салмон аз ӯ хостааст, ки барои коҳиши таниш бо Эрон, миёнҷигарӣ кунад. Гузоришҳое ҳам ба нашр расида буд, ки нахуствазири Ироқ Одил Абдулмаҳдӣ барои миёнҷигарӣ миёни ин ду кишвар даст ба кор шудааст.
Эрон ва Арабистони Саудӣ, ки ду рақиби суннатӣ дар минтақаи Ховари Миёна ба шумор мераванд, аз январи соли 2017 бо ҳам робитаҳои дипломатӣ надоранд. Танишҳои миёни ду кишвар моҳҳои ахир дар пайи ҳамла ба муассисаҳои нафтӣ дар Арабистони Саудӣ, боз ҳам боло гирифтааст.