Раиси Иттиҳоди адвокатҳои Тоҷикистон аз қарори Додситонии кули Тоҷикистон, ки даъвои шиканҷа шудани як вакили ҷавонро рад кард, ба додгоҳ шикоят бурдааст.

Эътилофи ҷомеаи шаҳрвандӣ зидди шиканҷа ва беҷазоӣ хабар дод, ки Саидбек Нуриддинов, раиси Иттиҳоди адвокатҳои Тоҷикистон аризаи худро ба додгоҳи ноҳияи Синои шаҳри Душанбе супурд.

Иттиҳоди адвокатҳои Тоҷикистон аз Додситонии кулли Тоҷикистон хоста буд, ки нисбат ба кормандони Оҷонсии зидди фасод, ки вакили ҷавонро шиканҷа кардаанд, парванда боз кунад.

Рӯзи 29-уми сентябр Додситонии кули Тоҷикистон аз боз кардани парвандаи ҷиноятӣ нисбат ба шиканҷа шудани Абдулазиз Абдураҳмонзода, вакили ҷавон худдорӣ кард.

Иттифоқи адвокатҳои Тоҷикистон мегӯяд, Абдулазиз Абдураҳмонзода барои он ки гӯиё талаби кормандони Оҷонси зиддифасодро дар бораи "пора" додан ба як додрас рад кард, шиканҷа шудааст. Иддаое, ки масъулони Оҷонсӣ рад ва баръакс вакили дифоъро ба қаллобӣ муттаҳам мекунанд.

Абдулазиз Абдураҳмонзода 27 сол дошта, чаҳор сол боз ба ҳайси вакили дифоъ кор мекунад. Парвандаи ӯ бо иттиҳоми қаллобӣ, ки аз ҷониби Оҷонсии зидди фасод боз шудааст, баррасӣ мешавад.

Созмонҳои ҳомии ҳуқуқи инсон мегӯянд, солҳои охир дар Тоҷикистон фаъолияти вакилони мудофеъ мушкил шудааст. Ду соли пеш баъд аз имтиҳони Вазорати адлияи Тоҷикистон тақрибан якуним ҳазор вакили дифоъ ҳаққи фаъолиятро аз даст доданд. Ҳоло 800 нафар мақоми вакили мудофеъро соҳиб шудаанд.

Владимир Путин, президенти Русия рӯзи 3-юми сентябр гуфта буд, ки омода аст бо раисҷумҳури Украина мулоқот ва гуфтугӯ кунад, дар сурате, ки ба Маскав биояд, аммо гуфт, ҳанӯз маълум нест, ки оё чунин дидоре арзиш дорад ё не.

Дар посух Зеленский гуфт, дар шароите, ки кишвараш шабонарӯз зери мушакборон қарор дорад, наметавонад ба Маскав биравад.

Президенти Украина дар суҳбат бо телевизиони амрикоии ABC News гуфт, ки Путин бо чунин баҳона танҳо оғози музокирот барои сулҳро ба ақиб меандозад. Ба гуфтаи ӯ, Путин бо Амрико бозӣ мекунад.

Путин дар чанд суҳбаташ бо Доналд Трамп, президенти ИМА гуфта буд, ки омодааст, барои расидан ба сулҳ музокира кунад, вале ба ваъдаҳояш амал накард.

Доналд Трамп рӯзи 2-юми сентяр дар як мусоҳибаи радиоӣ гуфт, "ман аз президент Путин бисёр ноумед шудам”.

Бо гузашти беш аз се сол аз оғози ҷанги Русия алайҳи Украина ва талошҳои зиёд ҳанӯз ҳеч нишонае аз поён ёфтани ин ҷанг дида намешавад.

Виталий Кличко, шаҳрдори Киев хабар дод, ки дронҳои русӣ ба баландошёнаҳо бархурданд ва кушташудаҳо ду зан ва тифли яксола ҳастанд.

Русия шаби гузашта бо 800 дрон ё бесарнишин ба Украина ҳамла кардааст. Дар яке аз ин ҳамла бинои ҳукумати Украина дар Киев оташ гирифтааст.

Русия се сол пеш бе далел ҷанг бар зидди Украинаро оғоз кард. Ҳамарӯза Русия аз замину осмон ва баҳр ба хоки Укарина ҳамла мекунад. Дар бештар аз се соли ҷанг даҳҳо ҳазор нафар кушта ва миллионҳо нафар аз кишварашон фирор кардаанд.

Талошҳо барои сулҳ ҳанӯз натиҷае надодаанд. Мақомоти Украина мегӯянд, Русия майле барои поён додани ҷанг надорад.

Морхӯр, аз нодиртарин ва гаронтарин ҷонвари шикорӣ дар Тоҷикистон аст, ки барои шикори як сари он наздик ба 400 ҳазор сомонӣ ё 40 ҳазор доллари амрикоӣ пардохт мешавад. Соли гузашта танҳо иҷозаи шикори 16 сар аз ин бузи нодир дода шуда буд.

Ҳукумати Тоҷикистон бо тасвиби санаде мавсими шикори тирамоҳӣ дар Тоҷикистонро аз 1-уми сентябр эълон кард, ки бар асоси он шикори 20 сар Морхӯр, 132 гусфанди кӯҳии архар ё “Марко Поло”, 18 гусфанди бухороӣ ва 10 хирси нохунсафед иҷоза дода шудааст.

Дар санад дида мешавад, ки иҷозаи шикори аксар ҳайвоноти нодир бештар шудааст. Соли гузашта танҳо шикори 110 гусфанди кӯҳии “Марко Поло” иҷоза дода шуда буд, вале имсол 22 сар бештар шудааст. Нархи шикори гусфанди “Марко Поло” наздики 60 ҳазор сомонӣ ва гусфанди бухороӣ беш аз сӣ ҳазор сомонӣ муқаррар шудааст.

Иҷозаи шикори бештари ҷонварони нодирро мақомоти тоҷик ба афзоиши саршумори он рабт медиҳанд.

Бузи Морхӯр танҳо дар ноҳияи Шамсиддин Шоҳин, Шӯроободи пешин ва ноҳияи Дарвоз дида мешавад. Ватани гусфанди архар ё “Марко Поло” ноҳияи дурдасти Мурғоб дар вилояти Мухтори Кӯҳистони Бадахшон аст.

Ҳамроҳ Аҳруллозода, як масъули Кумитаи ҳифзи муҳити зисти Тоҷикистон соли гузашта гуфта буд, ки ҷонварони нодирро “сад дар сад хориҷиён шикор мекунанд.”

Маҷаллаи илмии “Оryx”-и Бритониё соли 2023 хабар дод, ки як гурӯҳ пажӯҳишгарон дар Тоҷикистон ҷонварони нодирро ҳисоб карданд. Ба навиштаи ин маҷалла, бузи Морхӯр аз 500 сари чанд соли пеш ба 5 ҳазор сар дар Тоҷикистон афзоиш ёфтааст.

Раисҷумҳури Амрико рӯзи 5 сентябр фармонеро алайҳи кишварҳо ва ниҳодҳое имзо кард, ки шаҳрвандони ИМА-ро ноодилона дар хориҷ аз ин кишвар боздошт мекунанд.

Тибқи ин қонун, Вазорати корҳои хориҷии Амрико метавонад кишварҳоеро, ки дар боздошти бесабаб ва ғайриқонунии шаҳрвандони амрикоӣ даст доранд ё аз он ҳимоят мекунанд, ҳамчун "пуштибони боздошти ноодилона", муаррифӣ кунад.

Кишварҳое, ки дар ин феҳрист қарор мегиранд, бо паёмадҳое чун таҳрими иқтисодӣ, маҳдудият дар додани раводид, қатъ ё маҳдуд кардани кӯмакҳои хориҷӣ ва ҳамчунин манъи сафари шаҳрвандони амрикоӣ ба он кишвар, рӯбарӯ хоҳанд шуд.

Ин тарҳ, ки аз системаи "кишварҳои ҳомии терроризм" нусхабардорӣ шудааст, абзорҳои наве ба Вазорати корҳои хориҷии Амрико медиҳад, то кишварҳоеро, ки аз амрикоиҳои боздоштуда ба унвои фишанги сиёсӣ истифода мекунанд, муҷозот кунад.

Ҳукумати Амрико шумори дақиқи шаҳрвандони боздоштшуда дар хориҷро ошкор намекунад. Бар асоси гузориши шабакаи хабарии CBS, дастикам 54 амрикоӣ дар соли 2024 дар 17 кишвар ба таври ноодилона зиндонӣ шуда, ё гаравгон гирифта шудаанд.

Вазорати корҳои хориҷии Амрико дар ҳоли ҳозир 21 кишварро дар болотарин сатҳи ҳушдори сафар (сатҳи чаҳор -- "Сафар накунед") қарор додааст, ки Эрон, Афғонистон, Русия, Венесуэла ва Кореяи шимолӣ, ба он шомил мешаванд.

Марко Рубио, вазири корҳои хориҷии Амрико дар баёнияе гуфт, "ҳамаи кишварҳо бояд аз ин феҳрист дурӣ кунанд. Касоне, ки аз амрикоиҳо ҳамчун гаравгони сиёсӣ истифода мекунанд, баҳои онро хоҳанд пардохт".

Ҳукумати Трамп дар матни ин фармон таъкид кардааст, ки "ҳеҷ амрикоӣ набояд дар ҳарос аз табдил шудан ба як мӯҳраи бозии сиёсии давлатҳои саркаш зиндагӣ кунад" ва ҳушдор додааст, ки Вашингтон бо истифода аз ҳама абзорҳои мавҷуд, бо ин падида муқобила хоҳад кард.

Владимир Путин, раисҷумҳури Русия дар бораи фиристодани ҳар гуна нерӯи хориҷӣ ба Украина ҳушдор дод ва эълон кард, ки онҳо "ҳадафи машрӯъ" хоҳанд буд.

Раисҷумҳури Русия рӯзи 5 сентябр дар як ҳамоиши иқтисодӣ дар шаҳри Владивосток гуфт, "агар ҳар нерӯе дар онҷо зоҳир шавад, ба вижа дар ҳоле, ки ҷанг ҷараён дорад, мо фарз мекунем, ки онҳо ҳадафи машрӯъ хоҳанд буд".

Ин изҳорот чанд соат баъд аз он сурат гирифт, ки раҳбарони кишварҳои аврупоӣ ҳамроҳ бо Канада, Ҷопон ва Австралия, бо андешаи фиристодани нерӯҳои сулҳбон ба Украина, бо ҳам мулоқот карданд.

Раҳбарони ин эътилоф рӯзи 4 сентябр бо Владимир Зеленский, раисҷумҳури Украина дар Порис дидор намуданд.

Эммануэл Макрон, раисҷумҳури Фаронса, ки мизбони ин музокирот буд, гуфт, ки 26 кишвар ваъдаи фиристодани "як нерӯи боварибахш ба Украина ва ё ҳузур дар замин, баҳр ё ҳаво"-ро додаанд.

Радослав Дарски, муовини мудири раёсати сиёсати аврупоии Вазорати корҳои хориҷии Лаҳистонро, Сафири нави Иттиҳоди Аврупо дар Тоҷикистон таъйин кардаанд.

Аз соли 2022 дар ин мақом дилпомат аз Литва Раймундас Кароблис кор мекард. Ӯ раиси Дафтари намояндагии Иттиҳоди Аврупо дар Покистон таъйин шудааст.

Сафири навтаъйини Иттиҳоди Аврупо дар Тоҷикистон, хатмкардаи бахши равобити байналмилалӣ аз Донишгоҳи Вротслави Лаҳистон буда, забонҳои русӣ, англисӣ ва лаҳистониро медонад.

Ӯ дар гузашта дар вазифаҳои роҳбарикунанда дар намояндагиҳои Иттиҳоди Аврупо дар Узбекистон, Гурҷистон ва Белорус, кор кардааст.

Вазорати корҳои хориҷии Тоҷикистон хабар дод, ки муовини аввали ин вазоратхона рӯи 5 сентябр нусхаи эътимодномаи раҳбари навтаъйини намояндагии Иттиҳоди Аврупо дар Тоҷикистонро қабул кардааст.

Иттиҳоди Аврупо яке аз шарикони муҳими Тоҷикистон ба шумор меравад ва солона ба бахшҳои гуногуни иқтисоди ин кишвар миллионҳо доллар кӯмак мекунад.

Ҷонибҳо дар масоили мубориза бо терроризм ва ифротгароӣ, идоракунии марз ва қочоқи маводи мухаддир, инчунин идоракунии об низ, ҳамкориҳо доранд.

Мухолифин ва созмонҳои ҳомии ҳуқуқи инсон солҳои охир Иттиҳоди Аврупоро ба "чашмпӯшӣ" ба поймолшавии ҳуқуқи одамону озодиҳои бунёдӣ дар Тоҷикистону кишварҳои дигари минтақа танқид мекунанд.

Иттиҳоди Аврупо дар моҳи июли соли 2024 аз вазъи ҳомиёни ҳуқуқ, рӯзноманигорон ва блогерони зиндонӣ дар Тоҷикистон нигаронӣ карда, аз Душанбе хоста буд, ки нақзи ҳуқуқи инсонро дар Вилояти Мухтори Кӯҳистони Бадахшон таҳқиқ кунад.

Доналд Трамп, раисҷумҳури Амрико мегӯяд, ӯ бовар дорад, ки Белорус бисёре аз зиндониёни сиёсиро озод хоҳад кард.

Ба гуфтаи ҳомиёни ҳуқуқи башари Белорус, дар панҷ соли гузашта дар ин кишвар 8532 тан ба иттиҳомҳои ҷиноӣ бо ангезаҳои сиёсӣ, рӯбарӯ шуда, 7299 нафар ҷазо гирифтаанд.

Трамп рӯзи 5 август ба хабарнигорон гуфт, ӯ бовар дорад Белорус шумори зиёде аз 1400 зиндониро озод хоҳад кард ва мумкин аст ин кор дар ояндаи наздик сурат бигирад.

Трамп дар ин бора ҷузъияти бештар надод.

Раисҷумҳур Трамп ҳамчунин гуфт, ӯ рӯзи 15 август фақат чанд соат қабл аз мулоқот бо Владимир Путин, раисҷумҳури Русия дар Аляска, бо президенти Белорус телефонӣ тамос гирифтааст. Лукашенко бо Путин робитаҳои наздик дорад.

Трамп он замон дар расонаҳои иҷтимоӣ, Лукашенкоро ҳамчун "раисҷумҳури бисёр муҳтарам" ситоиш кард ва навишт, ки мавзуи асосии ин гуфтугӯ, озодии зиндониёни сиёсӣ будааст.

Ҳомиёни ҳуқуқи башар мегӯянд, ки раҳоии садҳо зиндонии сиёсӣ мавриди истиқбол қарор хоҳад гирифт, аммо таъкид мекунанд, ки беҳтар аст ба саркӯбҳои густурда дар ин кишвар поён дода шавад.

Рӯзи 5-уми сентябр дар фосилаи 12 соат заминларза манотиқи шарқии Афғонистонро такон дода, заминларзаҳои маргбори ҳафтаи пешро ба ёд оварданд. Идораи зилзиласанҷии Олмон гуфт, таконҳо дар ҳамон манотиқе ба вуқӯъ пайвастаанд, ки заминларза дар чанд рӯзи пеш камаш 2200 нафарро кушт.

Созмони Милали Муттаҳид талош дорад, барои кӯмак ба мардуми манотиқи офатзада ҳадди ақалл 4 миллион доллар пайдо кунад. Хабаргузории Рейтерс имкон ёфтааст бо сокинони деҳоти вилояти Кунари Афғонистон ҳамсуҳбат шавад. Содиқи 12-сола ҳангоми заминларза дар хона зери хок мондааст. Ӯ мегӯяд, соатҳои дароз фарёд кашид, ки касе ӯро аз зери овор берун кашад. Содиқ: "Фикр кардам, ки касе зинда намондааст ва ин рӯзи қиёмат аст. Беист дод задам, ки касе маро наҷот диҳад. Вагарна мемурдам."

Зилзилаи 31-уми август яке аз маргбортарин заминларзаҳои Афғонистон шуд. Маркази он дар умқи даҳ километр дар марзи вилоятҳои Кунар ва Нангарҳори Афғонистон будааст. Такони дуюми замин 2 -уми сентябр ба вуқӯъ пайвста, боиси воҳимаи зиёд ва таваққуфи амалиёти наҷот гардида буд. Хавф зиёд буд, ки дар деҳоти дурдаст мардуми бештаре талаф хоҳад ёфт. Ҷомеаи ҷаҳонӣ аз марги садҳо нафар дар ин фоҷиа изҳори ҳамдардӣ кард. Вазорати корҳои хориҷии Тоҷикистон низ гуфт бо мардуми осебдида ғамшарик аст.

Созмони Амният ва Ҳамкории Аврупо эълон кард, ки як намояндаи хоси ин созмон ба зудӣ ба кишварҳои Осиёи Марказӣ аз ҷумла Тоҷикистон сафар мекунад.

Дар баёнияи расмии созмон аз рӯзи 5-уми сентябр омадааст, ки боздили Терҳи Ҳакала, намояндаи вижаи раиси созмон дар кишварҳои минтақа, Тоҷикистон, Туркманистон ва Қирғизистон аз рӯзи 8 то 16-уми сентябр идома мекунад.

Дар баёния омадааст, ҳадаф аз сафар тақвияти ҳамкориҳои Созмони Амният ва Ҳамкории Аврупо бо кишварҳои Осиёи Марказӣ аст. Ҳангоми сафар, Терҳи Ҳакала, бо кормандони дафтарҳои созмон дар минтақа, намояндагони ҷомеаи маданӣ мулоқот мекунад ва бо ду тарҳи муҳими созмон ошно мешавад, ки яке ҳам Коллеҷи мудирияти марзҳо дар шаҳри Душанбе аст.

Тоҷикистон, ки дар гузашта бо Созмони Амният ва Ҳамкории Аврупо ҳамкориҳои наздик дошт, моҳи марти имсол ба нозирони ин созмон иҷоза надод, ба кишвар биёянд ва ҷараёни интихоботи вакилони Маҷлиси намояндагонро назорат кунанд, ки то куҷо шаффофу одилона ва мутобиқ ба меъёрҳои демократӣ сурат мегирад.

Дар остонаи таҷлил аз 34-солагии истиқлолияти Тоҷикистон дар шаҳри Душанбе имрӯз як раҳпаймоии низомӣ дар ҳузури раиси ҷумҳур Эмомалӣ Раҳмон баргузор шуд. Паради ҳарбӣ ба муносибати 30-солагии таъсиси Горди миллии Тоҷикистон дар шаҳри Душанбе бо иштироки 5 ҳазор сарбози нерӯҳои мусаллаҳ, сохторҳои қудратӣ сурат гирифт.

Дар раҳпаймоӣ зиреҳпӯшҳо ва дигар техникаи ба намоиш гузошта шуд. Горди миллӣ соли 1995 дар заминаи як бригадаи зудамал бо номи Гвардияи президентӣ таъсис дода шуд. Президент Эмомалӣ Раҳмон ҳангоми суханронӣ дар раҳпаймоӣ гуфт, "дар шароити бисёр мураккабу ҳассоси ҷаҳони муосир, аз ҷумла шиддат гирифтани яроқнокшавии бошитоб, «ҷанги сард», амалҳои террористиву экстремистӣ, ҷиноятҳои киберӣ, қочоқи маводи мухаддир ва дигар ҷиноятҳои муташаккилонаи фаромиллӣ масъулияти ҳайати шахсии Гвардияи миллӣ, дигар сохторҳои низомӣ ва мақомоти ҳифзи ҳуқуқ торафт зиёд мегардад”.

Президент аз низомиён хост, дар роҳи “устувории пояҳои давлатдорӣ” саҳмгузор бошад ва аз худ “хизмати содиқона” нишон бидиҳанд. Зимнан, аввалин фармондеҳи Горди президентӣ генерал Ғаффор Мирзоев буд, ки нӯҳ сол дар ин вазифа хидмат кард ва соли 2006 аз ҷумла бо гуноҳи хиёнат ба давлат, ба зиндони якумрӣ маҳкум шуд.

Доналд Трамп, раисҷумҳури Амрико рӯзи 4 сентябр фармонеро имзо кард, ки тибқи он боҷ ё таърифаи воридоти мошинҳо ва дигар маҳсулот аз Ҷопон, ки дар моҳи июл эълон шуда буд, поин оварда мешавад.

Таърифаҳои поинтар ба мошинҳои ҷопонӣ, қарор аст ҳафт рӯз баъд аз нашри ин фармон, амалӣ шавад.

Хабаргузории "Рейтерз" қаблан аз қавли як манбаъ дар ҳукумати Ҷопон гузориш дода буд, ки фармони Трамп ҳамчунон ба маънои коҳиши таърифаҳо ба мошинҳои ҷопонӣ аз 27,5 дарсади феълӣ ба 15 дарсад мебошад.

Моҳи август ширкати "Тойота" гуфта буд, ки интизор дорад бинобар таърифаҳои Трамп бар мошинҳои воридшуда ба Амрико, ҳудуди 10 миллиард доллар зарар бинад.

Созмони имдодрасони "Islamic Relief" мегӯяд, ки зилзилаи маргбор дар вилояти Кунари Афғонистон ҳудуди 97 дарсади биноҳоро комилан вайрон ё тахриб кардааст.

Ин созмон дар гузорише, ки рӯзи 4 сентябр нашр кард, гуфтааст, 65 дарсади биноҳо ба таври комил вайрон шуда, 33 дарсад осеб дидаанд ва танҳо 2 дарсад солим боқӣ мондааст.

Дар гузориш ҳамчунин омадааст, ки бар асоси арзёбиҳои анҷомшуда, дар ҳар хонавода ба таври миёна ду нафар ҷон бохта, се тани дигар захмӣ шудаанд.

Зилзилаи шашдараҷаии рӯзи 31 август дар вилоятҳои шарқии Афғонистон, аз ҷумла, Кунар, Нангарҳор ва Лағмон талафоти вазнини ҷонӣ ва молӣ ба бор овард.

Ин ҳодиса яке аз маргбортарин зилзилаҳои солҳои ахир дар Афғонистон гуфта мешавад.

Мақомоти ҳукумати Толибон рӯзи 4 сентябр шумори қурбониёни ин ҳодисаро беш аз 2200 нафар эълон карданд.

Муфаттишони Оҷонсии мубориза бо коррупсия Абдуғаффор Ҳикматуллозода, раиси ноҳияи Рӯдакиро дар робита ба боздошти Рустам Раҳмонзода, сармеъмори ин ноҳия бозпурсӣ кардаанд. Чанд манбаи Радиои Озодӣ хабар доданд, ки Рустам Раҳмонзода нимаи моҳи август бо иттиҳоми гирифтани 2 миллион сомонӣ пора аз як соҳибкор боздошт шудааст.

Абдуғаффор Ҳикматуллозода соли 2023 муовини аввали додситони кулли Тоҷикистон буд ва дар як тасмими камсобиқа раиси ноҳия Рӯдакӣ таъйин шуда буд. Чанд манбаи ба Радиои Озодӣ гуфтанд, ки сармеъмор аз як соҳибкор барои додани қитъаи замин барои бунёди манзили баландошёна ду миллион сомонӣ пора гирифтааст.

Ҳамсуҳбатони Радиои Озодӣ гуфтанд, ки ин соҳибкор ду соли ахир талош доштааст, ки аз заминҳои ноҳияи Рӯдакӣ ва наздик ба шаҳри Душанбе замин бигирад, вале гуё ӯро борҳо “фиреб” додаанд. Назари ин соҳибкор ва афроди боздоштшуда маълум нест. Дар ҳукумати ноҳияи Рӯдакӣ нахостанд бо Радиои Озодӣ суҳбат кунанд. Вале ба гуфтаи манбаҳои Радиои Озодӣ, сармеъмор Рустам Раҳмонзода замоне боздошт шудааст, ки дар утоқи кориаш 500 ҳазор сомониро аз дасти соҳибкор гирифтааст. Якуним миллион сомониро чанд рӯз пеш аз боздошт гирифта будааст.

Ҳамсуҳбатони Озодӣ гуфтанд, ки далели мустақими даст доштани Абдуғаффор Ҳикматуллозода дар гирифтани пора нест, вале рӯзи гирифтани пора раиси ноҳияи шахсан ба он қитъаи замине, ки бояд ба соҳибкор медоданд, рафта барои ҷудо кардани замин ризоият додааст.

Дақиқан, соли 2023 Абдуғаффор Ҳикматуллозода замоне раиси ноҳияи Рӯдакӣ таъин шуда буд, ки се мақоми баландпояи ҳукумати ноҳия, аз ҷумла як корманди додситонӣ, ба гумони заминфурӯшӣ ва гирифтани беш аз сад ҳазор доллар ришва дастгир шуда буданд. Он замон манбаъҳои Радиои Озодӣ гуфта буданд, ки Эмомалӣ Раҳмон муовини аввали додситони куллро барои раиси ин ноҳия таъин кардааст, ки ба “дарди бедаво”-и заминфурӯшӣ хотима диҳанд.

Масъуд Пизишкиён, раисҷумҳури Эрон мегӯяд, ки дар ҳошияи нишасти сарони кишварҳои узви Созмони ҳамкориҳои Шанхай бо Владимир Путин, ҳамтои руси худ мулоқоти чаҳорсоата доштааст.

Нишасти СҲШ рӯзҳои 31 август ва 1 сентябр дар шаҳри Тянзини Чин баргузор шуд. Баъдан сарони кишварҳо рӯзи 3 сентябр дар паради низомӣ ба муносибати 80-умин солгарди поёни Ҷанги Дувуми Чаҳонӣ, ки дар Пекин доир шуд, ширкат карданд.

Пизишкиён рӯзи 3 сентябр пас аз бозгашт аз Чин гуфт, ки дар ин мулоқот дар бораи масъалаҳои илмӣ, минтақаӣ ва иқтисодӣ бо ҳамтои русаш гуфтугӯ кардааст.

Ӯ ҳамчунин гуфт, ки дар мулоқот бо ҳамтоёни худ аз Чин ва Туркия тасмимҳои бисёр муҳим, ҳаётӣ ва стратегӣ гирифта шуд, аммо дар ин бора ҷузъиёти бештар надод.

Тибқи гузориши хабаргузории Олмон, раҳбарони Эрон умедворанд, ки робитаҳо бо Русия ва Чин вобастагии Теҳрон ба Ғарбро коҳиш дода, таъсири таҳримҳоро коҳиш диҳад ва фурсатҳои навро барои ҳамкорӣ дар бахши дифоии ин кишвар боз кунад.

Ҷасади Муҳаммадазизи 17-сола, як навҷавони тоҷикро, ки дар натиҷаи занозание дар аёлати Пенсилванияи Амрико даргузашт, дар шаҳри Филаделфия ба хок супурданд.

Блогерони тоҷики муқими Амрико бо гузаштани аксу навор дар шабакаҳои иҷтимоӣ дар ин бора хабар додаанд.

Қаблан барои маросими ҷаноза ва дафни ӯ дар вебсайти хайрияи "Gofundme" саҳифае боз карда ва аз мардуми муқими Амрико хостаанд, ки ба қадри тавонашон ба волидайни Муҳаммадазиз Раҳматзода кӯмак кунанд.

Навҷавони тоҷик шаби 14-уми август дар як занозании гурӯҳӣ дар ноҳияи Монтгомерии аёлати Пенсилвания аз сараш сахт осеб дид. Дар бораи чӣ гуна сурат гирифтани занозанӣ маълумоте нест ва таҳқиқи қазия идома доштааст.

Дар Иёлоти Муттаҳидаи Амрико, бино бар маълумоти гуногун, аз 10 то 16 ҳазор зодаи Тоҷикистон зиндагӣ карда, асосан дар бахши тиҷорату нақлиёт ва хидматрасонӣ фаъоланд.

Набиҷон Раҳматзода ва аъзои оилааш аз ҷумлаи онҳо ҳастанд, ки тақрибан ду сол пеш ба Амрико рафта, дар канори шаҳри Филаделфия зиндагӣ мекарданд.