Интихоботи вакилони даъвати 8-уми порлумони Қирғизистон моҳи октябри соли оянда баргузор мешавад. Дар ин бора раиси Комисияи марказии интихоботии Қирғизистон Нурҷон Шайлдабекова хабар дод.

Ба гуфтаи вай, дар ду соли оянда дар Қирғизистон интихоботҳои маҳалливу шаҳрӣ ва ҷумҳуриявӣ баргузор мешавад.

Пештар аз ин бархе аз расонаҳо ва вакилон гуфта буданд, ки эҳтимол дорад, тирамоҳи соли ҷорӣ порлумон пароканда ва интихоботи ғайринавбатӣ баргузор шавад.

"Гуфтугӯҳо дар бораи пароканда кардани порлумон дар долонҳои "Кохи сафед" идома дорад, аммо ман бар ин назарам, ки амалӣ кардани ин тарҳ ба кишвар чизе намедиҳад, танҳо манфиатҳои афроди алоҳидаро бароварда мекунад", - навишта буд вакили порлумони Қирғизистон Достон Бекешев, рӯзи 20 сентябр дар шабакаҳои иҷтимоӣ.

Аида Қосималиева, ноиб-раиси порлумон низ овозаҳои парокандашавии порлумонро тасдиқ кард.

"Баргузории интихобот дар баҳор ё тирамоҳи соли 2020 фарқи зиёде нахоҳад дошт. Ҳарчанд ин аз омилҳои зиёде вобаста аст, вақт нишон медиҳад. Ҳарчанд интихоботи пеш аз муҳлат "орзу"-и бархе аз масъулон аст. Аз ҳамон оғози порлумони кунунӣ дар ташвишанд", - навишт Аида Қосималиева дар саҳифаи Твиттер.

Муҳлати эътибори порлумони кунунии Қирғизистон тирамоҳи соли оянда ба поён мерасад.

Ваколатдор оид ба ҳуқуқи инсон ё Омбудсмен дар гузориши солонааш чанд мушкили асосии паноҳҷӯёнро дар Тоҷикистон зикр карда, хоҳони ҳалли онҳо шудааст.

Ба гузориши Ваколатдор, "ба даст овардани мақоми гуреза, гузаштан аз бақайдгирии муваққатӣ, ҳамгироии маҳаллӣ, шуғл, таҳсил ва гирифтани маълумотнома аз ҷойи зист" аз мушкилиҳои аслии паноҳҷӯён дар Тоҷикистон аст.

"Механизми амалисозии ҳамгироии гурезаҳо, гирифтани ёрдампулӣ ва дигар навъи кумак, иҷрои принсипи берун накардан, пешниҳоди муроҷиат оид ба гирифтани паноҳгоҳ дар сарҳад... таҳия ва роҳандозӣ нашудааст", - омадааст дар гузориши Ваколатдор.

Мақомот ба гузориши Ваколатдор оид ба ҳуқуқи инсон вокуниш накардаанд. Дар як соли ахир, бахусус моҳи июли имсол чандин мавриди ихроҷи омавии паноҳҷӯёни афғонистонӣ аз Тоҷикистон расонаӣ шуд. Хадамоти марзбонии Тоҷикистон 19-уми июл бо пахши изҳороте ихроҷи муҳоҷирони афғонро аз Тоҷикистон тасдиқ кард ва сабабҳои онро шарҳ дод. Идораи марзбонӣ бидуни овардани омори дақиқ танҳо гуфт, бархе аз ин паноҳҷӯён "ғайриқонунӣ" вориди Тоҷикистон шудааанд ва шуморе аз онҳо "низоми муқарраргаштаи будубошро дағалона вайрон мекунанд".

Изҳорот дар ҳоле пахш шуд, ки муҳоҷирони афғонистонӣ гуфтанд, аз роҳҳои қонунӣ вориди Тоҷикистон шуда, бархеашон корти гурезагӣ ҳам доштанд.

Омбудсмен ба ихроҷи густурдаи муҳоҷирони афғонистонӣ аз Тоҷикистон ишорае накарда танҳо гуфтааст, соли 2024 "мақоми гурезагии 4 нафар бинобар сабаби пешниҳод намудани маълумотҳои беасос ва бардурӯғ рад карда шудааст". Аммо дар ин бора шарҳи бештар дода нашудааст.

Тибқи омори ахири мақомоти Тоҷикистон "соли 2024 ба 2 280 нафар шаҳодатномаи гуреза ва ба 2 591 нафар шаҳодатномаи муваққатӣ дода шудааст".

Ваколатдор оид ба ҳуқуқи инсон ба мақомоти Тоҷикистон пешниҳод кардааст, ки қонунгузорӣ оид ба гурезаҳо такмил карда, барномаи давлатии ҳамгироии паноҳандаҳо қабул карда шавад.

Дар гузашта Комиссариати олии Созмони Милали Муттаҳид дар умури паноҳандагон борҳо аз мақомоти Тоҷикистон хоста буд, ки паноҳҷӯёни афғонистониро ихроҷ накунанд, зеро эҳтимол дорад дар кишварашон бо озору азият рӯбарӯ шаванд.

Бино ба иттилои расмӣ, дар Тоҷикистон 9 ҳазор шаҳрванди Афғонистон зиндагӣ мекунанд. Аксари онҳо мегӯянд, ки аз тарси "Толибон" ба Тоҷикистон фирор кардаанд.

Дар давоми шаш моҳи аввали соли ҷорӣ додгоҳҳои ҳарбию баҳрии Русия аз рӯи моддаи “терроризм” нисбати 659 нафар дастикам 597 ҳукм (моддаҳои 205 то 205.5 КҶ Русия) содир кардаанд. Дар ин бора як таҳқиқи созмони ҳомии ҳуқуқи "Первый отдел" хабар додааст.

Ба ҳисоби миёна, дар Русия дар ҳар рӯзи кории ҳафта панҷ қарор бароварда шудааст. Вусъати саркӯбҳо дар Русия бесобиқа боло рафта, инчунин парвандаҳо зидди ноболиғон ҳам хеле зиёд шудааст.

Бисёр вақт маҳкумшудаҳо аз рӯи парвандаҳои терроризмро ба мӯҳлатҳои беш аз 20-солӣ равонаи зиндон мекунанд. Баъди соли 2023 дар баробари иттиҳоми «терроризм» инчунин «хиёнат ба давлат» ҳам илова шудааст ва агар соли аввал чунин иттиҳомҳо зидди 12 кас содир шуда буд, дар ним соли аввали соли ҷорӣ зидди 83 нафар будааст.

Муҳаққиқон мегӯянд, аксари ин парвандаҳо ба ҷанги дар Украина рабт доранд. Инҳо – оташ задани комиссариатҳои ҳарбӣ, дастгоҳҳои электронии танзими ҳаракати қаторҳо, мошинҳои ҳарбӣ, интиқоли пул барои воҳидҳои ҳарбии украинӣ, инчунин моддаҳои “сафед кардани терроризм” мебошанд.

Ба ҳисоби созмони "Первый отдел", аз замони оғози ҷанг дар Украина дар феврали соли 2022 дар Русия зидди 2901 нафар 2590 ҳукм аз рӯи моддаи «терроризм» содир шудааст.

Раиси ҷумҳури Амрико ва дигар миёнҷиҳои гуфтугӯҳои сулҳ дар Ғазза, 13-уми октябр дар Миср санади оташбас миёни Исроил ва гуруҳи “Ҳамос” -ро имзо карданд.

Доналд Трамп ва роҳбарони Миср, Қатар ва Туркия дар шаҳри Шарм-уш-Шайх баёнияи муштаракеро имзо карданд, ки ҳадафи он татбиқи оташбас ва поён додан ба ҷанг дар Навори Ғазза аст.

Дар ин маросим ҳамчунин роҳбарони Урдун, Олмон, Фаронса, Бритониё, Озарбойҷон, Арманистон, Маҷористон ва Дабири кулли СММ ҳузур доштанд. Намояндагони Исроил ва “Ҳамос” дар ин нишаст набуданд.

Доналд Трамп дар оғози ҳамоиш гуфт, “имрӯз рӯзи бузурге барои ҷаҳон аст, рӯзи фавқулода барои Ховари Миёна.” Трамп бидуни шарҳи ҷузъиёти созишнома танҳо гуфт, ки ин санад бисёр фарогир аст.

Нишасти Миср дар рӯзе баргузор шуд, ки гуруҳи “Ҳамос” гаравгонҳои боқимондаи исроилиро озод кард ва дар иваз Исроил низ садҳо зиндонии фаластиниро раҳо намуд. “Ҳамос” аз сӯи Амрико ва Иттиҳоди Аврупо ба унвони гуруҳи террористӣ шинохта шудааст.

Бар асоси бахши аввали созиши сулҳ, Исроил артишашро аз Ғазза берунтар кард ва наздики ду ҳазор зиндонии фаластиниро, ки 250 нафарашон ҳукми абад гирифта буданд, озод кардааст.

Дар марҳилаи дуюм бояд идораи Ғазза ба дасти намояндаҳои чанд кишвар гузашта, «Ҳамос» бесилоҳ шавад. Пештар «Ҳамос» шарти халъи силоҳ шуданро рад карда буд.

Вазорати мудофиаи Тоҷикистон аз иҷрои 78 дарсади нақшаи даъвати тирамоҳии ҷавонон ба артиш хабар додааст.

Ба иттилои вазорат, давоми даҳ рӯзи аввали даъват қариб 30 шаҳру ноҳияро нақшаро пурра иҷро кардаанд.

Тибқи иттилои расмӣ, аз миёни минтақаҳои Тоҷикистон ВМКБ 100, Хатлон 91, ноҳияҳои тобеи марказ 72, Суғд 64 ва Душанбе 71 дарсади нақшаи даъватро иҷро карданд.

Дар ҳоле, ки Вазорати дифоъ аз зиёд шудани сафи ҷавононе, ки ихтиёран ба артиш мераванд тавсиф кардааст, аммо сокинони баъзе минтақаҳои кишвар аз фишори мақомот шикоят доранд. Аз ҷумла моҳи сентябри имсол сокинони баъзе ҷамоатҳои шаҳри Исфара шикоят карданд, ки мақомот барқи чанд деҳаро пурра қатъ карда талаб намуданд, ки фарзандони худро ба артиш фиристанд. Мақомот ин шикоятро рад карданд.

Дар иттилои расмии Вазорати дифоъ дар бораи ҷалби маҷбурии ҷавонон ба хидмат чизе гуфта намешавад, вале давоми як моҳи охир чандин ҳодисаи бо зӯр ва маҷбурӣ ба хидмат бурдани ҷавонон дар шабакаҳо роҳ ёфт. Намунаи ахираш садамае бо иштироки корманди комиссариати ноҳияи Восеъ мебошад, ки 22 сентябри имсол сар зад.

Фоҷеа ҳангоме рух дод, ки корманди Комиссариати ҳарбӣ як ҷавони синни даъватро бо зур ба мошин савор карда, бо суръат ронд ва ба мошини самти муқобил бархурд. Дар ин садама се нафарро ҳалок ва чор кас маҷруҳ шуданд.

Додгоҳе дар вилояти Самарқанди Узбекистон марди 27-солаеро барои иштирокаш дар сафи нирӯҳои мусаллаҳи Русия дар ҷанги зидди Украина ба се соли зиндон маҳкум намуд. Дар ин бора сомонаи Uznews.uz хабар медиҳад. Додгоҳи ноҳияи Пахтачини вилояти Самарқанд гуфт, сокини маҳаллӣ А.Х. соли 2019 барои муҳоҷирати корӣ ба Русия рафт ва ду сол баъдаш ӯро бо гуноҳи қочоқи маводи мухаддир ба як зиндони низомаш сангини вилояти Челябинск барои адои ҷазо фиристоданд.

Соли 2024 ӯ пешниҳоди намояндагони сохторҳои ҳифзи қонуни Русияро дар бораи иштирок дар ҷанги зидди Украина пазируфт. Ба ин мард ваъда додаанд, ки баъди ширкаташ дар ҷанг ӯро аз адои ҷазо озод намуда, барояш шаҳрвандии Русия ва ҳам ҷоизаи пулӣ тақдим мекунанд. Ӯ ин пешниҳодро қабул кардааст.

Додгоҳ гуфтааст, А.Х. дар ҳудуди Луҳанск омодагии ҳарбӣ гузашта баъдан дар қаламрави минтақаҳои Луҳанск, Запорожйе, Херсон ва Курск дар амалиёти ҷангӣ иштирок кардааст. Баъди маҷрӯҳ шудан ӯро ба як беморхонаи ҳарбии шаҳри Маскав интиқол доданд.

Моҳи марти соли 2025 ин мард баъди анҷоми табобат барои гирифтани санадҳои нав ба хотири бозгашт ба ватан ба сафорати Узбекистон муроҷиат кардааст. 28 март ба Узбекистон расида ихтиёран худро ба дасти сохторҳои ҳифзи қонуни кишвараш супурдааст. Додгоҳ ҳангоми содир кардани ҳукм аз рӯи моддаи “Зархаридӣ” ҳамаи ҳолатҳои сабуккунандаро ба инобат гирифтааст, аз ҷумла ин ки ин мард ихтиёрӣ омада дар бораи иштирокаш дар ҷанг хабар дода ва ҳам изҳори пушаймонӣ кардааст.

Додгоҳ надоштани доғи судӣ ва вазъи молии сангини ӯро ҳам ба инобат гирифта, ӯро ба се соли маҳрумият аз озодӣ дар зиндони низомаш умумӣ маҳкум намуд. Ҳодисаҳои ба зиндон маҳкум кардани дигар шаҳрвандони Узбекистон, ки дар ҷанги зидди Украина иштирок кардаанд, дар гузашта ҳам расонаӣ шудааст. Аз ҷумла, барои ширкат дар ин ҷанг як сокини 55-солаи Намангон ба ду сол ва сокини 32-солаи вилояти Бухоро ба панҷ соли ҳабс маҳкум шудаанд.

Чин ваъда додааст, ки ба тасмими Иёлоти Муттаҳида дар бораи ҷорӣ кардани таърифа ё боҷи гумрукӣ посухи ҳамсон медиҳад.

Як намояндаи Вазорати тиҷорати Чин 12-уми октябр гуфт, аз замони музокироти ахири Пекин ва Вашингтон дар моҳи сентябри имсол Амрико "пайваста алайҳи Чин маҳдудиятҳои нав ҷорӣ мекунад".

Мақомдори Чин афзуд, “таҳдид ба ҷорӣ кардани таърифаҳои баланд шеваи нодурусти ҳамкорӣ Пекин аст”.

“Мавқеи мо дар масъалаи ҷанги таърифаҳо бетағйир мемонад, мо таърифаҳоро намехоҳем, вале аз он ҳам наметарсем,”- гуфтааст намояндаи Вазорати тиҷорати Чин.

Пештар президенти Амрико Доналд Трамп эълон кард, ки аз 1-уми ноябр ба молу маҳсулоте, ки аз Чин ворид мешаванд, 100 дарсад боҷ мебандад. Трамп дар саҳифаи иҷтимоии худ Truth Social навишт, "Иёлоти Муттаҳида ба молҳои Чин боҷҳои 100 дарсадӣ ҷорӣ хоҳад кард, бар иловаи ҳар гуна таърифаҳое, ки ҳоло пардохт мекунад".

Тасмими Кохи Сафед пас аз он эълон шуд, ки Чин барои содироти металҳои нодир назорати сахт ҷорӣ кард.

Украина давоми чанд моҳи ахир барои зарба задан ба иншоотҳои энергетикии Русия аз маълумотҳои истихборотии ИМА истифода мекунад. Дар ин бора нашрияи Financial Times бо такя ба манобеаш дар мақомоти Украина ва Амрико гузориш додааст.

Ба гуфтаи мусоҳибони нашрия, сиёсати Кохи Сафед баъди як суҳбати Доналд Трамп ва Владимир Зеленский дар моҳи июл тағйир ёфт.

Яке аз ҳамсуҳбатони FT гуфтааст, Украина ҳадафи ҳамларо мустақилона мушаххас мекунад ва ИМА дар пайдо кардани паҳлуҳои заифи ин маконҳо кумак мерасонад. Дигар манбаъҳои нашрия иддао кардаанд, ки Амрико феҳристи ҳадафҳои муҳимро муайян месозад.

Ба гуфтаи мусоҳибони нашрия, Вашингтон ҳамла ба корхонаҳои коркарди нафт ва дигар иншооти энергетикии Русияро як воситаи фишор барои овардани Кремл ба мизи музокирот медонад.

Усома Ҳамдон, як мақоми баландпояи гуруҳи фаластинии "Ҳамос" гуфтааст, ин гуруҳ субҳи душанбеи 13-уми октябр раванди озод кардани гаравгонҳои исроилиро оғоз мекунад. ИМА ва Иттиҳоди Аврупо гуруҳи "Ҳамос"-ро созмони террористӣ медонанд.

Ҳамдон 11-уми октябр ба хабаргузории "Фаронса" гуфт, "бар асоси тавофуқи имзошуда табодули зиндониён субҳи душанбе оғоз мешавад".

Бар асоси созише, ки 9-уми октябр дар Миср ҳосил шуд, дар марҳилаи аввал "Ҳамос" бар ивази раҳоии ду ҳазор зиндонии фаластинӣ тамоми гаравгонҳоро раҳо мекунад.

Исроил бовар дорад бист тан аз гаравгонҳо ҳанӯз зинда ҳастанд.

Неруҳои "Ҳамос" 7-уми октябри соли 2023 ба Исроил ҳамла карда, 1200 нафарро куштанд ва беш аз 250 тани дигарро асир гирифтанд. Дар пайи тавофуқҳои қаблӣ як қисм гаравгонҳо озод шуданд. Дар пайи ҳамлаҳои ду соли Исроил ба Ғазза, 67 ҳазор фаластинӣ кушта шудаанд, ки аксари онҳо занон ва кӯдакон мебошанд.

Давоми панҷ соли ахир 295 кӯдак аз минтақаҳои ҷангзадаи Ироқ ва Сурия ба Тоҷикистон баргардонда шудаанд. Дар ин бора Раҳим Саидзода, вазири маориф ва илми Тоҷикистон 8-уми октябр дар назди вакилони порлумон ҳисобот додааст.

Маҷлиси намояндагон, палатаи поёнии порлумон ин ҳафта тағйирот ба қонун дар бораи ҳифзи ҳуқуқҳои кӯдакро тасвиб кард, ки тартиби баргардондани кӯдакон аз хориҷи кишварро пешбинӣ мекунад. Мақомоти Тоҷикистон ин санад нашр накарда танҳо гуфтанд, тартиби нав салоҳияти ҳукумат барои бозгардонии кӯдакон аз хориҷро мушаххас мекунад.

Вазири маориф дар ҳузури вакилон гуфтааст, "қонунгузории мавҷуда тартиби дақиқ ва мушаххаси баргардондани чунин кӯдакон ва расонидани хизматрасониҳои иҷтимоӣ ва тиббӣ ба онҳоро пешбинӣ накардааст".

Бозгардондании кӯдакон ва занони тоҷик аз минтақаҳои ҷангзадаи Ховари Миёна солҳои 2019-2024 анҷом шуд.

Аз замони зуҳури ДОИШ дар соли 2013 зиёда аз 2000 шаҳрванди Тоҷикистон ба Сурияву Ироқ рафта, аксари онҳо зану фарзандонашонро ҳам бо худ бурданд ва ё дар он ҷо оила сохтанд.

Президенти Амрико Доналд Трамп эълон кард, ки аз 1-уми ноябр ба молу маҳсулоте, ки аз Чин ворид мешаванд, 100 дарсад боҷ мебандад. Ин тасмим пас аз он эълон шуд, ки Чин барои содироти металҳои нодир назорати сахт ҷорӣ кард.

Доналд Трамп дар саҳифаи иҷтимоии худ Truth Social навишт, "Иёлоти Муттаҳида ба молҳои Чин боҷҳои 100 дарсадӣ ҷорӣ хоҳад кард, бар иловаи ҳар гуна таърифаҳое, ки ҳоло пардохт мекунад".

Трамп ҳушдор додааст, ки бо назардошти амалкарди Чин дар ин замина метавонанд таърифаҳо барвақтар аз санаи 1-уми ноябр иҷро шаванд.

ИМА ҳамчунин нақша дорад, ки шуруъ аз 1-уми ноябр ба содироти нармафзорҳои муҳим назорат ҷорӣ кунад.

Рӯзи 9-уми октябр ҳукумати Чин эълон кард, ки назорат ба содиротҳои металҳои нодир сахттар мешавад.

Баъд аз зуҳри 11 октябр дар қаҳвахонаи туркии "Читир уста" воқеъ дар наздикии Театри опера ва балети шаҳри Душанбе, сӯхтор сар задааст.

Дар наворҳои видеоие, ки ба дасти Радиои Озодӣ расид, дида мешавад, ки кормандони хадамоти оташнишонӣ дар талоши хомӯш кардани сӯхтор ҳастанд.

Дар навор дида мешавад, ки кормандони тарабхона дар берун қарор доранд ва як нафар садо мезанад, ки "дар ошёнаи дувум одамҳо монданд".

Ҳанӯз маълум нест, ки оташсӯзӣ талафоте дар пай доштааст ё на.

Мақомот сабаби ин оташсӯзӣ ва ҳаҷми хисоротро эълон накардаанд.

Аз ин қабл, дар таърихи 12 октябри соли 2018 даромадгоҳи як биное, ки дар он тарабхонаи "Citir Usta" низ ҷойгир шудааст, оташ гирифта буд. Тарабхона баъди ин ҳодиса барои чанд муддат таътил шуд.

Мария Корина Мачадо, фаъоли мухолифи ҳукумати Венесуэла, ки аз чеҳраҳои саршиноси ҷунбиши тарафдори демократия дар ин кишвар ва аз мухолифони президенти он кишвар Николас Мадуро аст, барандаи Ҷоизаи сулҳи Нобел дар соли 2025 эълон шуд.

Мария Кориа Мачадо 7 октябри соли 1968 дар Каракас дар як хонаводаи сарватманд ба дунё омадааст. Ӯ сиёсатмадор, муҳандиси саноат ва аз барҷастатарин чеҳраҳои мухолифони Венесуэла аст, ки ҳукумати он кишвар ӯро мамнуъулхуруҷ кардааст.

Мачадо дар соли 2002 яке аз бунёдгузорони як ниҳоди ғайридавлатӣ буд, ки барои шаффофият ва назорат бар интихобот фаъолият мекард ва нақши муҳиме дар ҳамапурсии соли 2004 алайҳи Ҳюго Чавез дошт.

Ӯ дар соли 2010 ба порлумони Венесуэла роҳ ёфт ва ба яке аз садоҳои аслии мухолифони ҳукумати Чавез ва сипас Мадуро табдил шуд.

Дар соли 2014 бинобар иштирок дар эътирозҳои саросарӣ ва интиқодҳои сахт аз ҳукумат, аз порлумон ихроҷ ва сипас аз ҳаққи номзадии сиёсӣ маҳрум шуд.

Бо ин ҳол, ӯ ба фаъолиятҳои худ идом дода ва дар солҳои ахир ба раҳбари ҷунбиши мухолифони табдил шудааст. Мачадо аз мудофеони иқтисоди озод, ҳуқуқи башар ва робитаҳои наздиктар бо Ғарб аст.

Эъломи баранда Ҷоизаи Нобел шудани Мачадо дар ҳоле аст, ки дар рӯзҳои ахир ва дар миёни гумонзаниҳои бисёр, номи Доналд Трамп, раисҷумҳури Амрико низ ҳамчун баранда ёд шуда буд. Ба вижа, ки эълони номи барандаи Ҷоизаи сулҳи Нобел ҳамзамон шуд бо созише, ки бар асоси тарҳи Доналд Трамп ва бо фишори ӯ байни Исроил ва гурӯҳи "Ҳамос" барои оташбас дар Ғазза, ба даст омад.

Кохи Сафед рӯзи 10 октябр эълон кард, ки раванди ихроҷи густурдаи кормандон дар саросари Иёлоти Муттаҳидаи Амрико оғоз шудааст.

Дар пайи таътил шудани ҳукумати Амрико бинобар қабул нашудани будҷаи соли 2026 дар Конгресс, Доналд Трамп, президенти Амрико эълон карда буд, шумори нерӯҳои кории федеролиро коҳиш хоҳад дод.

Сухангӯёни чанд вазорат, аз ҷумла, вазорати хазонадорӣ (молия), тандурустӣ, маориф, тиҷорат ва бахши амнияти кибернетикии Вазорати амнияти дохилии Амрико тасдиқ кардаанд, ки берун карданҳо оғоз шудааст. Аммо шумори дақиқи ин барканориҳо маълум нест.

Тибқи гузоришҳо, ҳудуди 300 ҳазор корманди ғайринизомии ҳукумати федероль дар соли ҷорӣ дар чорчӯби тарҳи хурдсозии ҳукумат, ки Трамп дар аввалҳои соли ҷорӣ оғоз карда буд, шуғли худро аз даст хоҳанд дод.

Трамп борҳо дар ҷараёни бунбасти таътили давлат, ки рӯзи ҷумъа вориди даҳумин рӯзи худ шуд, таҳдид карда буд, ки кормандони федеролиро ихроҷ хоҳад кард.

Ҷумҳурихоҳон дар ҳар ду палатаи Конгресс аксариятро ташкил медиҳанд, аммо барои қабули тарҳи будҷа дар Сенат ба дастикам ҳафт раъйи демократҳо ниёз доранд.

Ҳазорон фаластинии овора рӯзи ҷумъа, 10 октябр пас аз барқарории оташбас байни Исроил ва "Ҳамос" ва оғози ақибнишинии сарбозони исроилӣ аз бахшҳое аз Навори Ғазза, ба тарафи хонаҳои вайроншудаи худ рафтаанд.

Аксҳо ва наворҳои нашршуда нишон медиҳад, ки ҳазорон овора дар миёни гарду ғубор ба тарафи шимоли Ғазза дар ҳаракатанд. Ин шаҳр чанд рӯз пеш шоҳиди яке аз калонтарин ҳамлаҳои Исроил дар тӯли ҷанги дусола буд.

Артиши Исроил эълон кард, ки созиши оташбас аз зӯҳри ҷумъа ба вақти маҳаллӣ, ба ҳолати иҷро даромад. Кобинаи ҳукумати Исроил бомдоди ҷумъа оташбас бо "Ҳамос"-ро қабул кард ва роҳро барои ақибнишинии нисбии нерӯҳо дар 24 соат, ҳамвор намуд.

Интизор меравад, ки "Ҳамос" 20 гаравгони зиндаи исроилиро давоми 72 соат озод кунад ва пас аз он Исроил 250 фаластиниро, ки дар Исроил ба ҳабси тӯлонӣ маҳкум шудаанд ва 1700 нафари дигарро, ки дар тӯли ҷанг дар Ғазза боздошт шудаанд, озод кунад.

Стив Виткофф, фиристодаи вижаи ИМА барои Ховари Миёна гуфт, ки артиши Исроил марҳилаи аввали ақибнишинӣ аз Ғаззаро такмил карда, давраи озодии гаравгонҳо оғоз шудааст.

Пас аз амалӣ шудани созиш, мошинҳои борбари ҳомили кӯмакҳои ғизоӣ ва доруворӣ барои кӯмак ба ғайринизомиёни Ғазза, ки садҳо ҳазор нафар аз онҳо пас аз вайрон шудани хонаҳояшон аз сӯи артиши Исроил ва тахриб шудани ҳама шаҳрҳо дар хаймаҳо ба сар мебаранд, вориди минтақа хоҳанд шуд.

Марҳилаи аввали тарҳи Доналд Трамп, раисҷумҳури Амрико барои поён додан ба ҷанги дусолаи Ғазза, шомили хуруҷи нерӯҳои исроилӣ аз бархе минтақаҳои Ғазза аст, агарчи онҳо ҳамчунон тақрибан ниме аз ин минтақаи муҳосирашударо назорат хоҳанд кард.

Бенямин Нетаняҳу, нахуствазири Исроил зимни суханронии телевизионӣ гуфт, ки нерӯҳои исроилӣ дар Ғазза хоҳанд монд, то аз ғайринизомӣ шудани ин минтақа ва халъи силоҳи "Ҳамос" дар марҳилаҳои баъдии тарҳи Трамп, боварӣ ҳосил шавад.

Ба гуфтаи сокинони Хон Юнус дар ҷануби Навори Ғазза, бархе нерӯҳои исроилӣ аз минтақаи шарқӣ дар наздикии марз ақибнишинӣ карданд, аммо садои тирандозӣ аз тонкҳо шунида мешавад.

Маҳдӣ Сақло, як сокини ин минтақа гуфт, "ҳамин ки хабари оташбасро шунидам, бисёр хушҳол шудем ва омода шудем, то ба шаҳри Ғазза, ба хонаҳоямон баргардем. Албатта хонае вуҷуд надорад, онҳо вайрон шудаанд".

Ҷанги навбатӣ миёни Исроил ва фаластиниҳо 7-уми октябри соли 2023 бо ҳамлаи гурӯҳи "Ҳамос" ба Исроил оғоз шуд. Дар ин рӯз "Ҳамос" 1200 исроилиро кушт ва беш аз 250 тани дигарро ба гарав бурд. Дар пайи ҳамлаҳои наздик ба ду соли Исроил ба Ғазза, 67 ҳазор фаластинӣ кушта шудаанд, ки аксари онҳо занон ва кӯдакон мебошанд.

Вазири молияи Тоҷикистон ҷузъиёти созишномаи қарзӣ бо Қатарро дар порлумон шарҳ додааст. Тибқи созишномае, ки моҳи августи имсол имзо шуд, Тоҷикистон барои сохтмони неругоҳи "Роғун" аз Бунёд ё Хазинаи Қатар дар мавриди рушд 50 миллион доллар қарз мегирад. Аммо шарту шароити ин созишнома маълум набуд.

Файзиддин Қаҳҳорзода, вазири молияи Тоҷикистон 1-уми октябр дар ҷаласаи Маҷлиси намояндагон гуфтааст, ин маблағ ба муддати 12 сол ба Тоҷикистон дода мешавад. Ба гузориши рӯзномаи порлумонии "Садои мардум", Тоҷикистон давоми 12 сол ба барои пардохти хароҷоти қарз ба Бунёди Қатар 15 миллион доллар медиҳад. Ба гуфтаи вазири молия, 50 миллион доллар қарзи Бунёд ё Хазинаи Қатар барои бунёди сарбанди асосии неругоҳи "Роғун" сарф мешавад.

Ҳукумати Тоҷикистон талош дорад барои то охир сохтани нерӯгоҳи "Роғун" аз хориҷ сармоя дарёфт кунад. То ин вақт Бонки Ҷаҳонӣ, Бонки исломии рушд ва баъзе кишварҳо аз сармоягузорӣ ба сохтмони "Роғун" хабар доданд. Ахиран мақомоти Тоҷикистон гуфтанд, ки Бонки Осиёии Сармоягузори Зербунёдҳо барои идомаи сохтмони нерӯгоҳи "Роғун" 500 миллион доллар ҷудо мекунад.

Моҳи августи имсол "Независимая Газета", яке аз нашрияҳои Русия, навишт, ки ояндаи нерӯгоҳи азими "Роғун" таҳти суол қарор гирифтааст. Ба навиштаи муаллифи мақола, баъзе аз сармоягузорони асосии нерӯгоҳ, аз ҷумла Бонки Ҷаҳонӣ ба сабаби иҷро нашудани бархе талабот ҷудо кардани пулро ба таъхир андохтанд. Мақомоти Тоҷикистон дар ин бора чизе нагуфтаанд.