Сӯҳроб Зафар (Тӯраев) барои чаҳор соли оянда раҳбари созмони “Гурӯҳи 24” интихоб шудааст. Фаъолияти созмон аз соли 2014 боз дар Тоҷикистон мамнуъст ва то кунун даҳҳо узви он боздошту зиндонӣ шудаанд.

Сомонаи расмии “Гуруҳи 24” хабар дод, ки интихоби раҳбари созмон рӯзи 3-юми январ баргузор шуд ва Сӯҳроб Зафар беш аз 55 дарсади раъйро ба даст овард. Нуриддин Ризоӣ, узви дигари "Гуруҳи 24" беш аз 44 дарсади овозро соҳиб шудааст.

Сӯҳроб Зафари 42-сола хоҳарзодаи генерали зиндонӣ Ғаффор Мирзоев аст. Вай бори аввал охири соли 2015 ва баъд аз марги раҳбари пешини он Умаралӣ Қувватов раҳбарии “Гуруҳи 24”-ро ба уҳда гирифт.

Суҳроб Зафар бори аввал соли 2014 дар эътирозҳои созмондодаи ин гурӯҳ дар шаҳрҳои Русия пайдо шуд ва баъдан раҳбари гуруҳ Умаралӣ Қувватовро дар Туркия ҳамроҳӣ мекард.

Қувватов – соҳибкори норозӣ аз ҳукумати Тоҷикистон, баъди тарк кардани кишвар дар хориҷа дар бораи ташкили созмони “Гурӯҳи 24” хабар дод. Ӯ моҳи марти соли 2015 дар шаҳри Истанбули Туркия кушта шуд. Ҳомиёни ҳуқуқ қатли ӯро дорои ангезаҳои сиёсӣ номиданд.

Созмони “Гурӯҳи 24” соли 2014 бо қарори Додгоҳи олии Тоҷикистон як созмони экстремистӣ ва мамнӯъ эълон шуд, вале созмонҳои байналмилалӣ онро як созмони сиёсии мухолиф меҳисобанд.

То кунун даҳҳо нафар дар Тоҷикистону Русия ва кишварҳои дигари пасошӯравӣ бо иттиҳоми узвият ва тарафдорӣ аз “Гурӯҳи 24” боздошт ва баъзеи онҳо зиндонӣ шудаанд.

Як гуруҳ аз аъзои пешини ин гуруҳ баъди бозгашт ба Тоҷикистон афв шудаанд ва соли гузашта дар номае аз Додгоҳи олӣ хостанд, ки фаъолияти созмонро иҷоза бидиҳад, аммо дархости онҳо рад шуд.

Солҳои охир раҳбарони “Гурӯҳи 24” бештар тавассути интернет ва шабакаҳои иҷтимоӣ ба фаъолияти худ идома медиҳанд.

Шоҳиди ҳодисае шудед, ё аксе видеое доред, лутфан, ба ин шумораҳо ва ба воситаи Вотсап, Вайбер, Телеграм ва ё ИМО бифристед: (+420) 607 900 808; (+420) 724 056 681; (+420) 724 053 959; (+992) 980 15 10 10

Мақомоти Русия расман тасдиқ карданд, ки рӯзи 9-уми май дастрасӣ ба интернети мобилӣ дар шаҳри Маскав пурра маҳдуд карда мешавад.

Вазорати рушди рақамии Русия дар хабарномае навишт, бо мақсади таъмини амнияти чорабиниҳои идона, дастрасӣ ба интернети мобилӣ ва ирсоли паёмак ё SMS дар Маскав муваққатан маҳдуд карда мешавад.

Дар иттилоияи расмӣ ҳамчунин таъкид шудааст, ки дар сурати пайдо шудани таҳдидҳо дар пойтахти Русия, рӯзҳои 7 ва 8-уми май низ мумкин аст интернет "ба таври фаврӣ" маҳдуд карда шавад.

Ширкатҳои мухобиротӣ ҳанӯз аз 4 май ба муштариён дар шаҳрҳои Маскав ва Санкт-Петербург ҳушдор дода буданд, ки аз 5 то 9-уми май мумкин аст иртиботи мобилӣ маҳдуд шавад.

Вазорати дифои Русия рӯзи 4-уми май аз оташбаси якҷониба барои рӯзҳои 8–9 май хабар дод. Президенти Украина Владимир Зеленский муҳлати оташбасро 6-уми май таъйин кард, ки ба гуфтаи Киев, аз ҷониби Русия нақз шуд.

Шаби 7-уми май Русия мавриди ҳамлаи густурдаи паҳподҳо қарор гирифт. Вазорати дифои Русия хабар дод, ки 347 паҳподи украинӣ нобуд карда шудаанд.

Ба гуфтаи шаҳрдори Маскав Сергей Собянин, нерӯҳои мудофиаи ҳавоӣ дар болои Маскав беш аз 20 паҳподро сарнагун кардаанд.

Дар се моҳи аввали имсол 6236 соҳибкор аз фаъолият даст кашидаанд ва ё ба кори дигаре машғул шудаанд. Дар ин бора Оҷонсии омор хабар додааст.

Ба иттилои манбаъ, аз шумори умумии соҳибкороне, ки корашонро бас карданд, 5400 нафарашон соҳибкорони инфиродӣ ва 800 каси дигар соҳибони хоҷагиҳои деҳқонӣ буданд.

Мақомот дар бораи сабабҳои қатъи кори беш аз 6200 соҳибкор дар се моҳ чизе нагуфтаанд.

Баъзе соҳибкорон пештар тафтишҳои зиёд ва баланд будани сатҳи молиёт ё андозро аз сабабҳои асосии қатъи фаъолият медонанд.

Мақомот, аз ҷумла намояндагони Кумитаҳои андоз ва сармоягузорӣ мегӯянд, аксари ин гуна соҳибкорон шева ё тарзи кори худро дигар карданд.

Дар ҳамин ҳол, Оҷонсии омор гузориш додааст, ки дар моҳҳои январ-марти имсол зиёда аз 11 ҳазор "соҳибкори инфиродии навтаъсис бақайд гирифта шудааст".

Фазои номусоиди соҳибкорӣ ва мизони баланди андозҳо аз мушкилиҳоеянд, ки пайваста дар доираи тоҷирону коршиносон садо медиҳад.

Як зани 37-солаи сокини ҷамоати Ворухи Исфараро барои ба худкушӣ расондани ҳамсари бародараш ба чор сол зиндон маҳкум кардаанд.

Дар қарори додгоҳ омадааст, ин зан нисбати ҳамсари бародараш "муносибати дағалона нишон дода, ӯро мунтазам таҳқир мекард ва шаъну эътиборашро дар назди дигар аъзои оила паст мезад".

Зани маҳкумшуда иттиҳоми эълоншударо дар додгоҳ рад карда, худро бегуноҳ гуфтааст.

Аммо Додгоҳи шаҳри Исфара мегӯяд, санҷиши телефони зани фавтида нишон дод, ки ӯ аз муносибати бади хоҳаршӯй ба шавҳараш шикоят кардааст.

Бар асоси қарори додгоҳ, зани маҳкумшуда чор соли зиндонро дар зиндони низомаш умумӣ мегузаронад.

Ин бори аввал нест, ки занҳо дар пайи муносибати бади хушдоман ё дигар аъзои оилаи шавҳар қасди ҷони худ мекунанд.

Тибқи омори расмӣ, соли 2025 беш аз дусад зан дар Тоҷикистон қасд ба ҷони худ карда, бархе аз ҳаёт маҳрум ва чанде аз сӯйи наздикон наҷот дода шудаанд.

Ба иттилои расмӣ, соли гузашта беш аз 3600 шикоят аз хушунат дар хонаводаҳо сабт гаштааст. Ин 403 маврид зиёдтар назар ба соли 2024 мебошад.

Маҷлиси намояндагон, палатаи поёнии порлумони Тоҷикистон қонун "Дар бораи таъмини ҳуқуқ ва ҳифзи иҷтимоии шахсони маъюбиятдошта"-ро қабул кард. Ин қонун 6-уми май тасвиб шуд.

Таҳияи лоиҳаи қонун чанд сол аст, ки аз сӯи Вазорати тандурустӣ ва ҳифзи иҷтимоии аҳолӣ ва намояндагони ҷомеаи шаҳрвандӣ идома дошт.

Ҳадаф аз таҳияи ин санад, таъмини дастрасии баробар ба таълим, тандурустӣ ва ҷойи кор барои маъюбон гуфта шудааст.

Лоиҳаи ниҳоии ин қонун, ки аз сӯи вакилон тасдиқ шуд, ҳанӯз расман нашр нашудааст.

Қабули қонун дар бораи ҳуқуқи шахсони маъюб дар ҳолест, ки Тоҷикистон то ҳол Конвенсия оид ба ҳуқуқи маъюбонро тасвиб накардааст.

Конвенсия оид ба ҳуқуқи маъюбон ҳанӯз соли 2018 аз сӯйи раиси ҷумҳур Эмомалӣ Раҳмон имзо шуда, вале Тоҷикистон то ҳол онро пурра тасвиб накардааст.

Санади мазкур ҳамаи масоили марбут ба ҳуқуқи маъюбонро дар бар мегирад ва декабри соли 2006 аз тарафи Маҷмаи умуми СММ қабул шуд.

Баъди тасвиби Конвенсия оид ба ҳуқуқи маъюбон, кишварҳо муваззаф мешаванд барои ашхоси имконияти ҷисмониашон маҳдуд шароити хуб фароҳам кунанд.

Дар Тоҷикистон ҳудуди 170 ҳазор шахсони маъюб зиндагӣ мекунанд.

Вазорати корҳои дохилии Тоҷикистон аз як ҷинояти ғайриоддӣ дар вилояти Суғд хабар додааст ва дар бораи талоши фурӯши ғайриқонунии ду хирсбачаи малламӯи тиёншонӣ.

Вазорат имрӯз дар як баёнияи расмӣ гуфт, кормандони милиса як сокини 28-солаи ноҳияи Ҷаббор Расуловро дастгир карда ва ба зидди ӯ бо гумони шикори ғайриқонунӣ парвандаи ҷиноӣ боз кардаанд.

Номи ин ҷавони 28-соларо набурдаанд, вале гуфтаанд, ки ӯ охири моҳи марти имсол дар минтақаи "Қизилтайгӣ" воқеъ дар ҷангалзори Кӯҳсовлисои ноҳияи Шаҳристон ду хирсабачаро гирифта ва бо ҳадафи фурӯш дар хонааш нигаҳ доштааст.

Хирси малламӯй аз ҷонварҳои нодири Тоҷикистон ба шумор меравад ва дар Китоби сурхи кишвар ворид шудааст.

Дар баёния омадааст, ки шикорчиро ҳангоми фурӯши хирсбачаҳо дастгир кардаанд. Маълум нест, муштариёни ин ҷонварони зебо кӣ будаанд ва оё нисбат ба онҳо низ чорае андешида мешавад, ё на.

Ба қавли вазорати корҳои дохилии Тоҷикистон, гумонбар ба ҷиноят бо ин кори худ ба давлат 85 ҳазор сомонӣ зиён расонидааст ва акнун бояд барои ин кораш посух бигӯяд.

Бар асоси Кодекси ҷиноӣ дар Тоҷикистон барои шикори ғайриқонунӣ ҷаримаи бузург ва зиндони шартӣ пешбинӣ шудааст

Ҷасади Шаҳбоз Ҷонмаҳмадзода, як сарбози Вазорати мудофеаи Тоҷикистон, ки 10 рӯз пеш худро ба дарёи Кофарниҳон партофта буд, аз марзи Узбекистон пайдо шудааст.

Яке аз наздикони ин хонавода рӯзи 6 май ба Радиои Озодӣ гуфт, ки ҷасади Шаҳбоз имрӯз дар марзи Регар бо вилояти Сурхондарёи кишвари ҳамсоя пайдо шуд.

Ба гуфта ӯ, тобути Шаҳбозро падараш тавассути қаламрави Узбекистон ба Тоҷикистон овард. Ҷасадро имрӯз дар шаҳраки Файзободи ноҳияи Файзобод, ба хок супурдаанд.

Ин сарбози 23-сола рӯзи 27-уми апрел худро ба дарё партофт. Қурбонгул Ашурова, модари Шаҳбоз Ҷонмаҳмадзода рӯзи 29-уми апрел дар суҳбат бо Радиои Озодӣ гуфт, писараш пеш аз оне, ки худро ба об афканад, ба ӯ занг зада буд. Ӯ ба модараш гуфтааст, агар хатое карда бошад, узр мехоҳад.

Ҳанӯз сабабҳои марги ӯ маълум нест. Як манбаи огоҳ аз тафтишот ба Радиои Озодӣ гуфт, ду фарзия; бадрафторӣ дар қисми ҳарбӣ ва мушкили хонаводагӣ ҳамчун сабабҳои эҳтимолии даст ба худкушӣ задани сарбоз таҳқиқ мешаванд.

Ба гуфтаи наздиконаш, Шаҳбоз Ҷонмаҳмадзода дар яке аз қисмҳои ҳарбии Вазорати мудофиа дар канори Душанбе хизмат мекард ва барои даҳ рӯз рухсатӣ гирифта, ба хонаашон дар ноҳияи Файзобод рафта буд.

Ин сарбоз 28-уми апрел мебоист ба маҳалли хидматаш бармегашт, аммо як рӯз пеш бо баҳонаи ороиши мӯйи сар аз хона баромада ба шаҳри Ваҳдат омад ва худро ба рӯдхона партофт.

Шаҳбоз Ҷонмаҳмадзода соле пеш издивоҷ карда, як тифли панҷмоҳа дорад.

Маргумири сарбозон дар қисмҳои ҳарбии Тоҷикистон моҳи апрел доғ шуд. Дар як моҳи ахир ҳадди ақал марги се сарбоз расонаӣ шуд.

Ба дунболи ин, Эмомалӣ Раҳмон, раиси ҷумҳури Тоҷикистон аз мақомоти интизомӣ ва бахусус фармондеҳони нерӯҳои мусаллаҳ, хост, масъалаи тартибу низом дар воҳидҳои низомиро бисёр ҷиддӣ бигиранд.

Дафтари матбуоти раёсати ҷумҳурӣ рӯзи 4-уми май гуфт, дар ҷаласаи Шӯрои амнияти миллии Тоҷикистон, дар баробари дигар масъалаҳо, ҳамчунин "рафти даъвати баҳорӣ ба хизмати ҳарбӣ, риояи тартиботи ҳуқуқӣ ва оинномаҳои низомӣ дар ҷузъу томҳои Қувваҳои Мусаллаҳ ва дигар воҳидҳои ҳарбӣ" баррасӣ шудааст.

Ҷузъиёти дигареро аз нишаст нагуфтаанд, вале зоҳиран марги пурсарусадои се сарбоз дар моҳи апрел сабаби матраҳ шудани масъалаи бадрафторӣ дар ҷаласаи Шӯрои амнияти миллии Тоҷикистон шудааст.

Наздикони бархе аз ин сарбозон аз шароити нохуб дар қисмҳои ҳарбӣ ва озори сарбозон шикоят карданд. Мақомот мегӯянд, вазъ дар қиёс ба солҳои пеш беҳтар шудааст, аммо хабарҳои ахир ин иддаоро зери суол мебаранд.

Аббос Ароқчӣ, вазири корҳои хориҷии Эрон ва ҳамтои чиниааш Ванг И, рӯзи чоршанбе, 6 май дар Пекин мулоқот карданд.

Дар баёнияе, ки Вазорати корҳои хориҷии Чин аз музокироти ин ду дипломати баландпоя нашр кард, гуфта шудааст, вазири корҳои хориҷии Чин хостори поёни танишҳо дар Ховари Миёна ва бозкушоии тангаи Ҳурмуз "дар зудтари вақт" аз сӯи Эрон ва Амрико шуд.

Дар баёния аз ҷумла омадааст, "Чин ба ин бовар аст, ки даргириҳо бояд бе таъхир ва ба сурати комил қатъ ёбад. Оғози дигарбораи таниш ғайри қобили қабул аст ва идомаи музокирот ҳамчунон зарурӣ мебошад".

Дар ин баёния ҳамчунин омадааст, ки Чин аз "ҳаққи машруъ"-и Эрон барои "истифодаи сулҳомез аз энержии ҳастаӣ", дифоъ мекунад.

Шаби гузашта Марко Рубио, вазири корҳои хориҷии Амрико дар вокуниш ба сафари Аббос Ароқчӣ ибрози умедворӣ карда буд, ки Пекин мустақиман ба Теҳрон бигӯяд, ки иқдомоти Эрон дар тангаи Ҳурмуз боиси дар инзивои ҷаҳонӣ қарор гирифтани ин кишвар мешавад.

Вазири корҳои хориҷии Амрико ҳамчунин ҳушдор дод, агар ширкатҳо ё ниҳодҳои чинӣ таҳримҳои Амрико алайҳи Эронро нодида бигиранд, мумкин аст бо таҳримҳо рӯбарӯ шаванд.

Дар пайи ҳамлаи Русия ба шаҳри Запорожеи Украина 12 нафар ҳалок шудаанд. Волии вилоят ҳамчунин аз захмӣ шудани 40 каси дигар хабар дод. Ин ҳамла сешанбеи 5-уми май анҷом шудааст.

Иван Федоров, волии Запороже дар шабакаҳои иҷтимоӣ навишт, Русия бо бомбҳои ҳавоӣ ба ин минтақа ҳамла кардааст.

Хадамоти ҳолатҳои фавқулодаи Украина хабар дод, ки равоншиносон ба 40 нафар, аз ҷумла 6 кӯдак кумак мерасонанд. Ин ниҳод ҳамчунин аз идомаи амалиёти наҷот хабар додааст.

Рӯзи 5-уми май неруҳои Русия ҳамчунин ба шаҳри Краматорск ҳамла кардаанд, ки дар натиҷа дастикам 6 кас кушта шудааст. Волии вилояти Донетск аз захмӣ шудани панҷ каси дигар хабар додааст.

Ҳамчунин дар ҳамлаи неруҳои Русия ба шаҳри Днепр 4 кас кушта ва 16 нафари дигар захмӣ шудаанд.

Ба ин тартиб, дар шабонарӯзи ахир дар пайи ҳамлаҳои артиши Русия зиёда аз 20 шаҳрванди одӣ дар Украина кушта шудаанд.

Мақомоти Тоҷикистон таъйини атташе ё шахси масъул оид ба масъалаҳои муҳоҷиратро дар сафоратхона ва консулгариҳои кишвар баррасӣ доранд.

Ин нукта дар стратегия ё барномаи роҳбурдии ҳукумат барои танзими муҳоҷират омадааст.

Бар асоси ин санад, атташе оид ба масъалаи муҳоҷират дар сафорат ва консулгариҳои Тоҷикистон дар давлатҳое таъйин мешавад, ки муҳоҷирони тоҷикистонӣ зиёд ҳастанд.

Мақомоти тоҷик пешбинӣ кардаанд, ки бо таъйини шахси масъули вобаста ба масъалаи муҳоҷирон дар сафоратхонаҳои кишвар, "механизми ҳимояи ҳифзи ҳуқуқ ва манфиатҳои муҳоҷирони Тоҷикистон дар хориҷи кишвар таҳким бахшида мешавад".

Атташе ё шахси масъул дар сафоратхонаҳои кишвар кай ба кор оғоз мекунад, маълум нест. Мақомот бояд то ду соли оянда ин мавзӯъро омӯхта, ба ҳукумат гузориш диҳанд.

Муҳоҷирони тоҷик дар Русия борҳо аз камтар фаъол будани Сафорати Тоҷикистон ва консулгариҳои кишвар дар ҳимоят аз муҳоҷирон, шикоят кардаанд.

Муҳоҷирон мегӯянд, дар ҳолатҳои зарурӣ сафорат ба доди онҳо намерасад ва аз ҳуқуқҳои онҳо ҳимоят намекунад.

Назаре, ки мақомоти Тоҷикистон рад карда гуфтаанд, Сафорати Тоҷикистон дар Русия ба муҳоҷирони дармонда ёрӣ мерасонад.

Додгоҳи Исфара як сокини ин шаҳрро барои фиристодани ҳазор рубл ба "Гуруҳи 24", ба панҷ сол зиндон маҳкум кардааст. Нусхаи ҳукм аввали моҳи май дар сомонаи додгоҳ нашр шудааст.

Дар қарор омадааст, ин марди 49-сола соли 2021 ҳангоми дар Русия буданаш наворҳои "Гуруҳи 24"-ро тамошо карда, барояшон ҳазор рубл равон кардааст.

Вокуниши ин мард ва наздиконаш ба ҳукм маълум нест. Додгоҳ мегӯяд, ин мард ба гуноҳаш иқрор шудааст ва панҷ сол зиндонро дар маҳбаси низомаш пурзӯр адо мекунад.

Созмони "Гурӯҳи 24", ки соҳибкори норозӣ Умаралӣ Қувватов бунёд гузоштааст, бо қарори Додгоҳи олӣ дар Тоҷикистон "ифротгаро" ва "мамнуъ" аст.

То ин дам даҳҳо нафарро ба гуноҳи пайравӣ аз он дар Тоҷикистону Русия дастгир ва бархеро ба муддати дароз зиндонӣ кардаанд. Намояндагони созмон фаъолияти худро дурусту сиёсӣ меноманд.

Дар ҳафтаҳои ахир ин ягона мавриди маҳкум шудани сокинон барои фиристодани маблағ ба мухолифон нест.

Охири моҳи апрел Додгоҳи шаҳри Ваҳдат ҳам як нафарро бо иттиҳоми фиристодани 17 ҳазор рубл ба Муҳаммадиқболи Садриддин, аз мухолифони тундлаҳни ҳукумат, ба 13 сол зиндон маҳкум кард.

Консерти Юлдуз Усмонова, ҳунарманди шинохтаи Узекистон, ки бояд рӯзи 9-уми май дар Ню-Йорки Амрико баргузор мешуд, бо даъвои ҷомеаи яҳудиёни бухороӣ бекор шудааст.

Ин ҳунарманд бояд дар театри “Oceana”-и минтақаи Бруклини Ню-Йорк, ки сокинонаш аксаран аз кишварҳои собиқ шӯравӣ ҳастанд, ҳунарнамоӣ мекард.

Ҷомеаи яҳудиёни бухороии Бруклин Юлдуз Усмоноваро “яҳудиситез” номида гуфтаанд, ки ӯ соли 2021 аз мардуми Фаластин пуштибонӣ карда буд.

Дар чанд рӯзи гузашта ҷомеаи яҳудиён дар Ню-Йорк бо талаби бекор кардани консерт ва ба Амрико роҳ надодани овозхони маъруфи Узбекистон изҳороти зиёде нашр карданд.

Дар ҷавоб Юлдуз Усмонова як муроҷиати видеоиеро дар саҳифааш дар Instagram нашр кард ва гуфт, “узрхоҳӣ намекунад”, “ӯ зидди хушунат аст” ва “Фаластин бояд озод бошад”.

Ӯ изҳори умедворӣ кард, ки консерт як вақти дигар барпо мешавад.

Дар пайи ҳалокати се сарбози тоҷик дар як моҳи гузашта, Эмомалӣ Раҳмон, раиси ҷумҳури Тоҷикистон аз мақомоти интизомӣ ва бахусус фармондеҳони нерӯҳои мусаллаҳ, хостааст, масъалаи тартибу низом дар воҳидҳои низомиро бисёр ҷиддӣ бигиранд.

Дафтари матбуоти раёсати ҷумҳурӣ рӯзи 4-уми май гуфт, дар ҷаласаи Шӯрои амнияти миллии Тоҷикистон, дар баробари масъалаи рафъи оқибатҳои фалокатҳои табиӣ, ҳамчунин “рафти даъвати баҳорӣ ба хизмати ҳарбӣ, риояи тартиботи ҳуқуқӣ ва оинномаҳои низомӣ дар ҷузъу томҳои Қувваҳои Мусаллаҳ ва дигар воҳидҳои ҳарбӣ” баррасӣ шудааст.

Ҷузъиёти дигареро аз нишаст нагуфтаанд, вале зоҳиран марги пурсарусадои се сарбоз дар моҳи апрел сабаби матраҳ шудани масъалаи бадрафторӣ дар ҷаласаи Шӯрои амнияти миллии Тоҷикистон шудааст.

Исрофил Азимзодаи 25-сола аз Рӯдакӣ, Ғолибҷон Иброҳимов - сарбози 23-сола аз ноҳияи Ҳамадонӣ ва Шаҳбоз Ҷонмаҳмадзодаи 23-сола дар зарфи ду ҳафтаи охири моҳи апрел ҳалок шуданд. Мақомот гуфтанд, сабаби марги онҳоро таҳқиқ мекунанд, аммо ҳомиёни ҳуқуқ бадрафторӣ дар сафи нерӯҳои мусаллаҳи Тоҷикистонро яке аз сабабҳои қасди ҷони худ кардани сарбозон ва ё ҳалок шудани онҳо медонанд.

ИНЧУНИН, БИХОНЕД:

Чаро Исрофил баъди ду ҳафтаи хидмат ҷон дод?

ИНЧУНИН, БИХОНЕД:

“Очаҷон, устухон хӯрдам”. Паёми сарбоз ба модараш пеш аз марг

ИНЧУНИН, БИХОНЕД:

"Очаҷон, маро бубахш". Охирин суханони сарбоз пеш аз ҷаҳидан ба дарё

Дар шаҳри Лейпсиги Олмон ронандаи як мошини "Волсваген" ба анбӯҳи роҳгузарон ҳамла ва даҳҳо нафарро пахш кардааст.

Пулиси Олмон гуфтааст, ки дар ҳодисаи рӯзи 4-уми май ду нафар кушта ва беш аз 20 нафар захмӣ шудаанд. Аҳволи ду тан аз захмишудаҳоро вазнин гуфтаанд.

Ба гуфтаи мақомоти Олмон, ҳамлагар аз ҷойи ҳодиса фирор кард, вале пулис ӯро боздошт кард.

Расонаҳои олмонӣ навиштаанд, ки ҳангоми боздошт ҳолати рӯҳии гумонбар дар ҷиноят мисли одами солим ба назар намерасид.

Мақомоти Олмон гуфтаанд, ки боздоштшуда 33 сол дорад ва шаҳрванди Олмон аст.

Ба иттилои расонаҳои Афғонистон, мақомоти тоҷик даҳҳо паноҳҷӯи афғонро аз ноҳияи Ҷаббор Расулов берун кардаанд.

Шабакаи "Афғонистон интернешнл" 4-уми май бо нашри навори ихроҷи муҳоҷирон гуфт, ҳудуди 250 муҳоҷири афғонистониро аз вилояти Суғд ба шаҳри Душанбе интиқол додаанд ва онҳо ба хатари ихроҷ ба Афғонистон рубарӯ ҳастанд.

Ба қавли манбаъ, ин муҳоҷирон корти паноҳандагии Созмони Милали Муттаҳидро доштанд.

Муҳоҷирони афғонистонӣ дар наворе мегӯянд, мақомоти Тоҷикистон симкортҳои онҳоро гирифтаанд.

Мақомоти Тоҷикистон ва намояндагии Созмони Милал то кунун вазъиятро шарҳ надодаанд.

Шикоят аз ихроҷи муҳоҷирони афғонистонӣ дар ҳолест, ки охири ҳафтаи гузашта Вазорати корҳои дохилӣ аз боздошти як ҷавони афғонистонӣ бо иттиҳоми куштор хабар дод.

Ба иттилои расмӣ, ин ҷавони 22-сола ба он муттаҳам мешавад, ки як зани 29-соларо дар шаҳри Хуҷанд ба қатл расондааст.

Назари пайвандони ҷавон ба ин иттиҳоми маълум нест.

Ва низ маълум нест, ки ихроҷи паноҳандагони афғон дар вилояти Суғд ба ин ҳодиса рабт дорад ё не?

Соли гузашта мақомоти тоҷик чанд дафъа паноҳандагони афғонистониро аз қаламрави кишвар ихроҷ карда буданд.

Мақомот дар шарҳи ин тасмими худ аз ҷумла, гуфта буданд, ки муҳоҷирати шаҳрвандони хориҷӣ ба Тоҷикистон афзоиш ёфтааст ва бархе аз онҳо "ғайриқонунӣ" вориди кишвар шудааанд ва шуморе аз онҳо "низоми муқарраргаштаи будубошро дағалона вайрон мекунанд".

Дар гузашта Комиссариати олии Созмони Милали Муттаҳид дар умури паноҳандагон борҳо аз мақомоти Тоҷикистон хоста буд, ки паноҳҷӯёни афғонистониро ихроҷ накунанд, зеро эҳтимол дорад дар кишварашон бо озору азият рӯбарӯ шаванд.

Дар Тоҷикистон ҳудуди 9 ҳазор паноҳҷӯи афғонистонӣ ба сар мебаранд, ки аксарашон дар шаҳри Ваҳдат ва ноҳияи Рӯдакӣ зиндагӣ мекунанд.

Дафтари расонаҳои Дубай рӯзи 4 май эълон кард, ки дар пайи ҳамлаҳои Эрон ба Имороти Муттаҳидаи Араб дар ҷараёни даргириҳо дар Ховари Миёна, шумори мусофирони Фурудгоҳи байнулмилалии Дубай дар моҳи март 66 дарсад коҳиш ёфта, ба 2,5 миллион нафар расидааст.

Ба гуфтаи мақомҳо, ин коҳиш натиҷаи халалдор шудани парвозҳо дар ҳарими ҳавоии минтақа ва маҳдуд шудани барномаи парвозҳо будааст.

Фурудгоҳи байналмилалии Дубай, ки аз сериздиҳомтарин фурудгоҳҳои ҷаҳон аст, дар ҷараёни ҷанги Амрико ва Исроил алайҳи Теҳрон, чандин бор ҳадафи ҳамлаҳои паҳбодӣ ва мушакӣ қарор гирифт.

Дар се моҳи нахусти соли 2026 низ равуои мусофирон аз ин фурудгоҳ 21 дарсад коҳиш ёфтааст.

Рӯзи 28 феврали имсол Амрико ва Исроил ба Эрон ҳамла карданд. Эрон дар муқобил ба Исроил ва кишварҳои арабии ҳошияи Халиҷи Форс, аз ҷумла, Имороти Муттаҳидаи Араб, ки мизбони пойгоҳҳои низомии Амрико мебошанд, ҳамлаҳои паҳбодӣ ва мушакӣ анҷом дод.