Нуралӣ Алиев, набераи президенти пешини Қазоқистон Нурсултон Назарбоев ва "дигар ҷавобгарон" аз Оҷонсии миллии Бритониё дар умури мубориза бо ҷинояткорӣ ҳамчун ҷуброни зарар 1,5 миллион фунт стерлинг (наздики 1,85 миллион доллар) талаб доранд.

Ин талаб бо пирӯзии Нуралӣ Алиев ва модараш Дариға Назарбоева дар додгоҳ рабт дорад. 8 апрели соли равон Додгоҳи олии Лондон "дастури ҳабси дороиҳои аз роҳи номаълум бадастомада"-ро содир кард. Дастури додгоҳ ҳабси се амволи ғайриманқулро дар шаҳри Лондон дар бар мегирифт, ки соҳибони ин амвол Алиев ва Назарбоева унвон мешаванд. 17 июн додгоҳи зинаи болои дастури ҳабсро бекор кард.

"Соҳибони амвол ва бунёде, ки ҳамчун ҷавобгар унвон мешавад, 1,5 миллион фунт ҷуброн талаб доранд", - менависад хабаргузории Reuters. "Ҳамаи арқому далели Оҷонсии миллии Бритониё дар умури мубориза аз тахмину гумон иборат аст", - гуфт намояндаи Алиев дар суҳбат бо хабаргузорӣ.

Нуралӣ Алиев - писари Дариға Назарбоева ва Роҳат Алиев аст. Роҳат Алиевро соли 2015 дар зиндони Австрия овехта дарёфтанд. Алиев бо гумони куштори ду бонкдори қазоқистонӣ боздошт шуда буд.

"Ҳабси дороиҳои манбаи даромадашон номаълум" - абзори наве дар қонунгузории Бритониё аст, ки соли 2018 ворид гардидааст. Ин абзор зидди пулшӯӣ равона шудааст. Мақомоти ҳифзи ҳуқуқи Бритониё бо ин роҳ талош доранд, ки шахсияти соҳибони аслии амволи дар ҳудуди ин кишвар ҷойгирбударо ошкор кунанд. Дар сурате, ки агар соҳибони аслии амвол манбаи даромади худро натавонанд, исбот кунанд, он амвол мусодира мешавад.

Оҷонсии ҳавошиносии Тоҷикистон аз эҳтимоли боронҳои сахт ва омадани сел дар минтақаи кишвар хабар додааст.

Ин ниҳод дар хабарномае навишт, аз 21 то 25 май боронҳои сахт ва омадани сел "дар баъзе минтақаҳои ноҳияҳои тобеи ҷумҳурӣ, вилоятҳои Хатлону Суғд ва ғарби Вилояти Мухтори Кӯҳистони Бадахшон" пешгӯӣ мешавад.

Мутахассисон мегӯянд, дар дарёҳои Исфара, Зарафшон, Обихингоб, Вахш, Панҷ, Ёхсӯ, Қизилсӯ ва дарёҳои аз қаторкӯҳҳои Ҳисор ҷоришаванда "баландшавии сатҳи об аз эҳтимол дур нест".

Дар пайи ин ҳушдори ҳавошиносон, Кумитаи ҳолатҳои фавқулода ба шаҳрвандон тавсия додааст, ки "аз сафарҳои безарурат ба минтақаҳои кӯҳӣ худдорӣ намоянд". Ҳамчунин аз сокинон дархост шудааст, ки давоми панҷ рӯзи оянда "аз сафар ба минтақаҳои хатар, ҷамъоварии ҳезум, хӯроки чорво, гиёҳҳои шифобахш ва моҳидорӣ худдорӣ намоянд".

Аз оғози моҳи май гирифта Тоҷикистон шоҳиди офатҳои табии маргбор шуд. Аз ҷумла рӯзҳои 1-4 май дар пайи омадани сел ҳадди ақал 4 нафар дар шаҳрҳои Кӯлоб ва Турсунзода ба ҳалокат расида, панҷ каси дигар бистарӣ шудаанд. Садҳо хонавода дар саросари кишвар зиёни моддӣ диданд.

Дар ҳоле, ки сокинони Тоҷикистон аз якбора боло рафтан ва камчин шудани семент дар кишвар шикоят доранд, мақомот аз зиёд шудани истеҳсоли ин навъ маҳсулот хабар доданд.

Тибқи иттилои Оҷонсии омор, дар се моҳи аввали имсол дар Тоҷикистон 1 миллиону 546 ҳазор тонна семент тавлид шудааст, ки дар қиёс ба ҳамин давраи соли гузашта 9,4 дарсад бештар аст.

Дар ду ҳафтаи ахир нархи семент дар Тоҷикистон якбора боло рафт. Сокинон мегӯянд, ҳар халта семент аз 56 сомонӣ то 90-110 сомонӣ гарон шуд. Мақомот сабаби боло рафтани нархи сементро шарҳ надодаанд.

Дар ҳамин ҳол, Оҷонсии омор аз зиёд шудани истеҳсоли дигар намуд маҳсулоти сохтмонӣ хабар шудааст. Ба иттилои ин манбаъ, дар се моҳ истеҳсоли хишт қариб 1,8, бетон 29 ва арматура, 9,7 дарсад афзоиш ёфтааст.

Мақомот зиёд шудани истеҳсоли ин навъ маҳсулотро нишони рушди сохтмон дар кишвар мегӯянд. Сокинон мегӯянд, бо вуҷуди зиёд шудани сохтмонҳо, нархи хона ҳам ба таври чашмрас боло рафтааст.

Русия ва Чин дар як баёнияи муштарак, терроризмро таҳдиди ҷидӣ барои амнияти Афғонистон, минтақа ва ҷаҳон дониста ва аз кишварҳо хостанд, ҳамкориҳои зиддитерроризми худро бо Афғонистон тақвият кунанд.

Ин баёния пас аз дидори Владимир Путин, раисҷумҳури Русия ва Си Ҷинпин, президенти Чин, дар Пекин, нашр шуд.

Дар эъломия омадааст, ки ду кишвар аз талошҳои Афғонистон барои нобудии терроризм ва пешгирӣ аз истифода аз хоки ин кишвар алайҳи амнияти ҳамсоягон ва минтақа ҳимоят мекунанд.

Ин дар ҳоле аст, ки мақомоти Покистон ҳукумати Толибон дар Афғонистонро ба нокомӣ дар пешгирӣ аз истифодаи Таҳрики Толибони Покистон аз Афғонистон барои анҷоми ҳамлаҳои дар он кишвар муттаҳам мекунад.

Ҳукумати Толибон дар Афғонистон ин иттиҳомро рад мекунад.

Русия ва Чин ҳамчунин эълон кардаанд, ки ҳамкориҳои дуҷониба ва чандҷонибаи худро дар бораи Афғонистон густариш хоҳанд дод ва аз субот ва амнияти пойдор дар ин кишвар ҳимоят мекунанд.

Дар се моҳи аввали соли равон бақайдгирии никоҳ ва талоқ дар Тоҷикистон кам шудааст.

Тибқи иттилои Оҷонси омори Тоҷикистон, дар моҳҳои январ-марти имсол дар кишвар 14 ҳазору 913 ақди никоҳ сабт шудааст, ки дар қиёс ба ҳамин давраи соли гузашта 18,5 дарсад кам мебошад.

Оҷонсӣ мегӯяд, нишодиҳанда ё коэффитсиенти умумии никоҳ имсол ба ҳар 1000 нафар аҳолӣ 5,6 ададро ташкил намуд.

Аз рӯи минтақаҳо сатҳи баландтарини никоҳ дар вилояти Суғд ва камтарин дар Вилояти Мухтори Кӯҳистони Бадахшон сабт шудааст.

Манбаъ мегӯяд, дар се моҳи аввали имсол 1 ҳазору 893 оила ҷудо шудаанд, ки назар ба ҳамин давраи соли гузашта 8,6 дарсад камтар аст.

Ба иттилои расмӣ, баландтарин нишондиҳанда ё коэффитсиенти азҳампошии оилаҳо дар вилояти Суғд ва камтаринаш дар Хатлон будааст.

Ҷудошавии оилаҳо ва ҳамин тавр "нимаятим" мондани фарзандони хурдсол аз масъалаҳои нигаронкунанда дар Тоҷикистон аст.

Муҳаққиқони тоҷик ахиран маълум карданд, ки омода набудан ба издивоҷ, надоштани хонаи хусусӣ, ҷангу даъво миёни зану шавҳар ва дахолати волидайн ба зиндагии оилаҳои ҷавон, аз сабабҳои асосии талоқ дар Тоҷикистон аст.

Михаил Галузин, муовини вазири умури хориҷии Русия дар суҳбат бо нашрияи «Известия» гуфтааст, ки Маскав аз талошҳои Амрико ва Иттиҳоди Аврупо барои дастёбӣ ба фулузоти нодир ва маъданҳои гаронбаҳо дар Осиёи Марказӣ нигарон аст.

Кишварҳои узви Гурӯҳи ҳафт (G7), аз ҷумла Амрикову Иттиҳоди Аврупо, талош доранд вобастагии худро аз Чин, тавлидкунандаи асосии фулузоти нодиру гаронбаҳо кам кунанд. Чин ҳоло бозори фурӯши фулуззоти нодирро зери назорат дорад, ки барои тавлиди фанновариҳои муосир, аз ҷумла мошинҳои барқӣ, батареяҳои хуршедӣ ва системаҳои пешрафтаи дифоӣ заруранд. Аз ин рӯ, ин кишварҳои ҷаҳон дар ҷустӯҷуи бозорҳои алтернативӣ ҳастанд.

Русия кишварҳои Осиёи Марказӣ яъне Тоҷикистону Қазоқистон, Қирғизистону Туркманистон ва Узбекистонро, ки сарватҳои зеризаминӣ зиёд доранд, ҳавзаи нуфузи худ медонад. Айни замон Чин низ ба ин минтақа таваҷҷуҳи зиёд дорад.

Михаил Галузин дар мусоҳибае, ки рӯзи 20-уми май дар нашрияи «Известия» чоп шуд, гуфтааст: «Мо аз он нигаронем, ки Амрико барои имзои қарордодҳо дар бораи маъданҳои нодир ва фулуззоти гаронбаҳо босуръат ва сахт пофишорӣ дорад».

Ӯ афзуд: «Ин танҳо як рақобати оддии иқтисодӣ, балки талошест барои берун кардани Русия ва офаридани як зербунёди таҳти назорати Ғарб дар наздикии марзҳои мост».

Доналд Трамп, раиси ҷумҳури Амрико моҳи ноябр бо мизбонии раҳбарони панҷ кишвари Осиёи Марказӣ дар Кохи Сафед, маъданҳои нодирро як авлавияти асосӣ дар ҳамкориҳо хонд ва ба талошҳои ҳукумати худ барои амнияти занҷираи таъминоти Амрико аз ҳисоби қарордодҳои нав таъкид кард.

Шӯрои уламои Тоҷикистон рӯзи таҷлили иди Қурбонро муайян кард. Тибқи ҳисоби ин Шӯро, имсол иди Қурбон 27-уми май фаро мерасад.

Намози ид соати 6:00 дар масҷидҳои кишвар хонда мешавад.

Мутобиқи таълимоти дини Ислом, иди Қурбон ҳамасола санаи 10-уми моҳи Зулҳиҷҷаи солшумории ҳиҷри қамарӣ фаро мерасад.

Иди Қурбон дар Тоҷикистон як иди расмӣ аст ва ба ин муносибат мардум истироҳат мекунанд. Ба муносибати ид бархе хонаводаҳо чорво забҳ мекунанд. Зиёрати қабри гузаштагон ва аёдати хешовандону наздикон яке дигар аз одатҳои ид дониста мешавад.

Чин ба Тоҷикистон таҷҳизоти зиддитеррористӣ медиҳад. Бар асоси тафоҳумнома миёни ду кишвар, ки Радиои Озодӣ 20-уми май бо он шинос шуд, ин кӯмакҳо бо дархости ҳукумати Тоҷикистон ба кишвар дода мешаванд.

Дар санад омадааст, Чин ба Вазорати корҳои дохилии Тоҷикистон "як миқдор таҷҳизоти зиддитеррористӣ, аз ҷумла 34 таҷҳизоти разведкавӣ, мавод ва лавозимоти полисро пешниҳод кунад".

Арзиши ин таҷҳизот 52 миллион юан ё 7,6 миллион долларро ташкил медиҳад ва ройгон ба Тоҷикистон дода мешаванд. Дар санад омадааст, ки Чин ҳамчунин ҳашт мутахассисро барои насбу танзими ин таҷҳизот ба Тоҷикистон мефиристад ва онҳо 45 рӯз дар кишвар хоҳанд монд.

Тоҷикистон аз таҷҳизоти мазкур боҷи гумрукӣ ва андоз намеситонад ва хароҷоти минбаъдаи нигаҳдории дастгоҳҳоро ба ӯҳда мегирад. Мақомоти Тоҷикистон ҳамчунин ӯҳдадор шудаанд, ки барои мутахассисони чинӣ шароити корӣ фароҳам ва амнияти онҳоро таъмин мекунанд.

Ҳамкориҳои низомӣ миёни Тоҷикистон ва Чин мавзуи нав нест. Дар тирамоҳи соли 2021 порлумони Тоҷикистон аз нияти Чин барои таъсиси як қарогоҳи низомии 10-миллиондолларӣ барои нерӯҳои қудратии Тоҷикистон дар водии Вахон хабар дода буд. Абдураҳмон Аламшозода, муовини аввали вазири корҳои дохилии Тоҷикистон, он замон дар ҷаласаи порлумон гуфт, бинои нав махсус барои гуруҳи зудамал (ОМОН), ки тобеи Раёсати мубориза бо ҷиноятҳои муташаккил мебошад, сохта мешавад.

Чин ҳамчунин қарздиҳандаи калонтарини Тоҷикистон буда, тақрибан сеяки қарзи берунаи Тоҷикистон ба ин кишвар рабт дорад. Дар ҷараёни сафири ахири президенти Эмомалӣ Раҳмон ба Чин миёни ду кишвар даҳҳо санади нав имзо шуд.

Ба ҳайси шарики тиҷоратии азимтарини Тоҷикистон, аз чор як қисмати муомилаҳои берунии Тоҷикистон ҳам ба Чин марбут аст. Сармоягузориҳои ҳангуфти Чин нигарониҳоро дар бораи вобастагии Душанбе аз Пекин бештар кардааст.

Муовини раисиҷумҳури Амрико мегӯяд, Иёлоти Муттаҳида ва Эрон дар музокироти худ "пешрафти зиёде" доштаанд ва ҳеҷ яке аз ду тараф хоҳони азсаргирии ҳамлаҳои низомӣ нестанд.

Ҷей Ди Венс 19-уми май дар Кохи Сафед ба хабарнигорон гуфт, мо ба пешрафти зиёде даст ёфтем ва "мо фикр мекунем эрониҳо мехоҳанд ба тавофуқ бирасанд".

Венс ҳамчунин ба ихтилоф дар дохили ҳукуматдорони Ҷумҳурии исломӣ ишора кард ва гуфт, "шояд худи эрониҳо ҳам дақиқан равшан накардаанд, ки мехоҳанд ба кадом самт бираванд".

Соате пеш аз ин, Доналд Трамп ба хабарнигорон гуфт, ба мақомоти Ҷумҳурии Исломӣ чанд рӯзи дигар барои расидан ба тавофуқ муҳлат медиҳад. Трамп ҳушдор дод, ки мукин аст Амрико маҷбур шавад як "зарбаи бузурги дигар" ба Эрон бизанад.

Дар ҳамин ҳол, муовини раиси ҷумҳури Амрико мегӯяд, масъалаи аслӣ барои Вашингтон ин аст, ки Эрон ҳаргиз набояд ба силоҳи ҳастаӣ даст пайдо кунад.

Ҷе Ди Венс ёдоварӣ кард, ки агар чунин иттифоқ биафтад, кишварҳои дигари Халиҷи Форс низ ба дунболи силоҳи ҳастаӣ хоҳанд рафт ва сипас кишварҳои дигари ҷаҳон ҳам ҳамин масирро дунбол хоҳанд кард.

Додгоҳе дар вилояти Хатлон як мардро барои латукӯб ва ба марг расондани ҳамсараш ба 16,6 сол зиндон маҳкум кардааст.

Дар қарори додгоҳ омадааст, Абдумасад Нуралиев, сокини ноҳияи Ҳамадонӣ моҳи декабри соли гузашта "бинобар сабаби вазъи оилавӣ" бо ҳамсараш ҷанҷол карда, бо мушт ва тахтачӯб ҳамсарашро задааст. Ҳамсари ин мард як рӯз баъд ҷон бохтааст.

Назари мард ба қазия ва ҳукми додгоҳ маълум нест.

Додгоҳи ноҳияи Ҳамадонӣ дар хабарномае навиштааст, ин мард дар мурофиаи сайёр "аз аҳли деҳа ва намояндагони ҷабрдидаи марҳум узрхоҳӣ карда", сидқан пушаймон шуд.

Додгоҳ бидуни овардани ҷузъиёти бештар гуфтааст, қаблан ҳам зиндонӣ шуда буд.

Хушунати хонаводагӣ аз масъалаҳои нигаронкунанда дар Тоҷикистон гуфта мешавад.

Ба иттилои расмӣ, соли 2025 беш аз 3600 шикоят аз хушунат дар хонаводаҳо сабт гаштааст. Ин 403 маврид зиёдтар назар ба соли 2024 мебошад.

Дар сохтори ҳукумати Тоҷикистон ниҳоди нав, Кумитаи саноати мудофиавӣ таъсис дода шуд. Қарори ҳукумат аввали ин моҳ содир шуда, Радиои Озодӣ 19-уми май бо матни он шинос шуд.

Дар санад омадааст, дастгоҳи марказии Кумитаи саноати мудофиавӣ аз 38 корманд иборат хоҳад буд, ки 8 нафари онҳо низомӣ ҳастанд.

Барои сохтори нав, 4 мошини хизматӣ ҷудо кардаанд ва хароҷоти он аз ҳисоби буҷети ҷумҳуриявӣ ва маблағҳои махсус пешбинӣ шудааст.

Бахши саноати мудофиавии Тоҷикистон то ин вақт дар тобеияти Вазорати саноат ва технологияҳои нав буд.

Тибқи маълумот аз манобеи боз, Тоҷикистон дар дар бахши саноати мудофиавӣ корхонаҳои калон надорад. Ду сол пеш дар шаҳри Турсунзода бо ҳузури раиси ҷумҳур Эмомалӣ Раҳмон корхонаи «Сипар гурӯҳ» ифтитоҳ шуд, ки ба ҷамъу васлсозии мошинҳои махсуси ҳарбӣ ва шаҳрвандӣ машғул аст.

Субҳи 19-уми май аз оромгоҳи Донскойи шаҳри Маскав аз маҳалли дафни қаҳрамонони Тоҷикистон хоки Нусратулло Махсум, Шириншоҳ Шоҳтемур ва Нисор Муҳаммадро аз Русия ба Тоҷикистон оварданд.

Хабарнигори Радиои Озодӣ мегӯяд, раиси ҷумҳур Эмомалӣ Раҳмон, мақомот ва горди фахрӣ барои қабули хок аз маҳалли дафни ин қаҳрамонони Тоҷикистон ба фурудгоҳ омаданд.

Бар сари турбати се шахсияти шинохтаи Тоҷикистон дар Масҷиди калони Душанбе маъруф ба Масҷиди Қатар намози ҷаноза хонданд ва сипас дар оромгоҳи Лучоб ба хок супурданд.

Нусратулло Махсум, Шириншоҳ Шоҳтемур ва Нисор Муҳаммад аз бузургтарин ва таъсиргузортарин чеҳраҳои таърихи муосири Тоҷикистон ба ҳисоб мераванд, ки дар соли 1937 қурбонии туҳматҳои беасоси низоми Иосиф Сталин шуданд. Онҳоро беасос душмани халқ номида ва бераҳмона куштанд ва дар гӯри дастаҷамъӣ хок карданд. Ин се шахсияти барӯманди Тоҷикистон танҳо баъди марги Сталин, дар солҳои 1950-ум расман бегуноҳ эълон карданд.

Нусратулло Махсум

Нусратулло Махсум, сиёсатмадори барҷаста ва аввалин раҳбари давлати Тоҷикистон буд ва ӯро "меъмори аввалини Тоҷикистони соҳибистиқлол" меноманд. Тоҷикистон дар солҳои 20-уми асри гузашта як ҷумҳурии мухтор дар қаламрави Узбекистон буд, бо талошҳои Нусратулло Махсум ба ҷумҳурии алоҳидаи мустақил дар таркиби Шӯравии он замон табдил ёфт. Ӯро соли 1933 бо фишори Маскав ва туҳматҳои сиёсӣ аз мақомаш барканор карда ба Маскав бурданд. Дар авҷи таъқибҳои сталинӣ дар соли 1937 бо иттиҳоми сохтаи "миллатгароӣ" ва "зиддиинқилобӣ" боздошт карданд ва рӯзи 1-уми ноябри соли 1937 дар Маскав бо тирандозӣ ба қатл расонданд. Соли 2006 ба ӯ унвони олии «Қаҳрамони Тоҷикистон» дода шуд.

Шириншоҳ Шотемур

Шириншоҳ Шоҳтемур, намояндаи давлатӣ ва сиёсӣ ва аз ҳамсафони наздики Нусратулло Махсум буд. Саҳми ӯро дар муттаҳид кардани заминҳои парокандаи тоҷикон ва исботи ҳуввияти таърихии мардум бисёр зиёд медонанд. Баъд аз Нусратулло Махсум, раиси Кумитаи марказии Ҳизби коммунисти Тоҷикистон буд. Ӯ ҳам қурбонии репрессияҳои сталинӣ шуд. Шириншоҳ Шотемурро соли 1937 дар Маскав дастгир карданд ва пас аз шиканҷаҳои зиёд, рӯзи 27-уми октябри соли 1937 ба қатл расониданд. Соли 2006 ба ӯ низ унвони олии «Қаҳрамони Тоҷикистон» дода шуд.

Нисор Муҳаммад

Нисор Муҳаммад, яке аз рӯшанфикрон ва сиёсатмадорони аҳли Афғонистон буд, ки ба Осиёи Марказӣ омад ва тақдирашро бо Тоҷикистон пайваст. Аввалин вазири маорифи Тоҷикистон буд ва аз ин рӯ саҳми Нисор Муҳаммадро дар бунёди аввалин мактабҳои муосири тоҷикӣ, ҷалби мардум ба мактабу таҳсил, чопи китобҳои дарсӣ ба забони тоҷикӣ ва ҷалби зиёиёни бузурге чун Садриддин Айнӣ ва Абулқосим Лоҳутӣ ба корҳои давлатӣ фавқуллода зиёд медонанд.

Нисор Муҳаммадро ҳам мисли Нусратулло Махсум ва Шириншоҳ Шотемур, соли 1937 бо иттиҳоми сохтаи "ҷосусӣ ба фоидаи Афғонистон ва Инглистон" ва "мавзеъгирии зиддишӯравӣ" дар Маскав боздошт ва ҳамон сол бо тирандозӣ куштанд. Яке аз кӯчаҳои марказии шаҳри Душанбе ҳоло ба номи ӯст.

Соли 2025 Тоҷикистон ва Русия дар ҳаҷми 2,4 миллиард доллар додугирифт кардаанд. Ин омор 15-уми май дар нишасти байниҳукуматии ду кишвар садо дод.

Ба иттилои расмӣ, дар се моҳи аввали имсол додугирифти ду кишвар ба 641,3 миллион доллар расидааст, ки назар ба ҳамин давраи соли гузашта 2,2 дарсад бештар аст.

Намояндагони Тоҷикистон ва Русия гуфтаанд, талош доранд додугирифтро бештар кунанд.

Ҷузъиёти бештар аз нишасти комиссияи байниҳукуматии Тоҷикистон ва Русия, ки зери роҳбарии нахуствазири Тоҷикистон ва муовини раиси ҳукумати Русия баргузор шуд, дастрас нест.

Соли гузашта се бонки Тоҷикистон барои кӯмак ба Русия аз сӯи Иттиҳоди Аврупо таҳрим шуданд.

Моҳи апрели имсол Иттиҳоди Аврупо таҳримҳоро алайҳи ин се бонки Тоҷикистон бекор кард.

Русия дар гузашта шарики асосии иқтисодии Тоҷикистон буд, вале дар солҳои ахир ҷойи онро Чин гирифт.

Бар асари ҳамлаҳои Украина ба вилояти Маскав дар рӯзи 17 май, се нафар ҷон бохтанд. Ин бузургтарин ҳамлаи Украина ба вилояти Маскав дар як соли ахир гуфта мешавад. Тибқи гузоришҳо, бар асари ҳамлаҳои Украина як нафар дигар дар минтақаи Белгород, ҳаммарз бо Украина, ҷон бохтааст.

Вазорати дифои Русия рӯзи якшанбе эълон кард, ки аз шаби пеш то кунун беш аз ҳазор паҳпод дар дастикам 12 минтақаи ин кишвар сарнагун шудаанд.

Андрей Воробёв, губернатори вилояти Маскав ин талафотро тасдиқ кард ва афзуд, ки тимҳои имдодрасон дар ҳоли ҳозир машғули ҷустуҷӯи як нафари дигар дар зери вайронаҳо ҳастанд. Ба гуфтаи ӯ, чандин хонаи истиқоматӣ ва зербиноҳо дар ин ҳамлаҳо осеб дидаанд.

Хабаргузории ТАСС ба нақл аз Сергей Собянин, шаҳрдори Маскав гузориш дод, ки системаи дифои ҳавоии Русия аз нимашаб то зуҳри якшанбе 81 паҳподро, ки ба тарафи Маскав дар ҳаракат буданд, аз байн бурд.

Собянин ҳамчунин гуфт, 12 нафар захмӣ шудаанд, ки бештари онҳо дар наздикии дарвозаи вурудии яке аз полоишгоҳҳои нафти Маскав будаанд. Ӯ иддао кард, ки ҳеч бахше аз таҷҳизоти полоишгоҳ осеб надидааст.

Фурудгоҳи Шереметево, калонтарин фурудгоҳи Русия дар Маскав низ эълон кард, пораҳои паҳподҳо дар атрофи фурудгоҳ суқут кард, аммо хисороте дар пай надошт.

Паҳбодҳои украинӣ ҳамчунин дар минтақаҳои Калуга, Брянск, Смоленск, Псков ва дар Қрим -- ҷазирае, ки Русия дар соли 2014 ба таври ғайриқонунӣ онро ба қаламрави худ ҳамроҳ кард, сарнагун шудаанд.

Ин ҳамлаҳо танҳо ду рӯз пас аз он рух дод, ки як мушаки партобшуда аз Русия ба як муҷтамаи истиқоматӣ дар Киев, пойтахти Украина бархӯрд ва 24 нафар, аз ҷумла, се кӯдакро ба ҳалокат расонд. Ин пурталафоттарин ҳамлаи Русия ба Киев дар соли ҷорӣ ба шумор меравад.

Президенти Украина Владимир Зеленский ҳамлаи паҳподҳои украинӣ ба Маскав ва вилояти ҳамноми онро дар шаби 17-уми май шарҳ дод.

Владимир Зеленский, раисҷумҳури Украина, дар паёме дар шабакаи Х гуфт, "мо ошкор ба русҳо мегӯем, "ҳукумати онҳо бояд ба ҷанги худ поён диҳад".

Ба гузориши Ситоди кулли Қувваҳои мусаллаҳи Украина, дар ин ҳамлаҳо як қатор иншооти марбут ба энержӣ ва саноати ҳарбӣ ҳадаф қарор гирифтанд. Ҳамчунин хонаҳои истиқоматӣ низ осеб диданд.

Владимир Зеленский дар муроҷиати видеоӣ гуфт, қувваҳои мудофиа, Хадамоти амният ва истихбороти Украина дар минтақаи Маскав амалиёти хеле густарда анҷом доданд.

Зеленский қайд кард, ки минтақаи Маскав бештар аз ҳама бо низомҳои дифои ҳавоӣ таъмин шудааст, аммо ба гуфтаи президент, паҳподҳои украинӣ аллакай аз ин монеаҳо убур мекунанд.

Раиси ҷумҳури Украина ин зарбаҳоро "ҷавоби комилан одилона" ба ҳамлаҳои Русия ба шаҳрҳои Украина номид.

Ҳамлаҳои густурдаи Русия ва Украина ба якдигар андаке пас аз поёни оташбаси серӯза рух дод, ки дар остонаи гузашт ё парад ба муносибати "Рӯзи Ғалаба" дар 9 май, барқарор шуда буд.

Оташбасе, ки Зеленский иддао дорад Маскав дар хати пеши ҷабҳаи шарқии Украина ба он пойбанд набудааст.

Ба навиштаи рӯзнома, ёварони наздики президенти ИМА Доналд Трамп нақшаи зарбаҳои навро ба Эрон барои он эҳтимол таҳия кардаанд, ки агар Вашингтон тасмим гирад, тавассути шиддат бахшидани таниш аз бунбасти мавҷуд дар низоъ бо Эрон берун шавад.

Миёни гузинаҳои баррасишаванда – бомбборони густурдатари зерсохтор ва иншооти низомии Эрон, инчунин амалиёти заминии эҳтимолӣ бо иштироки неруҳои махсус барои ёфтани захираҳои урани ғанишуда дар иншооти ҳастаии зеризаминӣ ҳастанд. Барои чунин амалиёт, ба навиштаи NYT, ҳазорон низомӣ зарур мешавад.

Рӯзнома менависад, чандсад неруи низомии таъйиноти махсуси ИМА ҳанӯз моҳи март ба Ховари Миёна интиқол дода шуда буд. Дар минтақа ҳамчунин бештар аз 50 ҳазор низомии амрикоӣ, ду киштии ҳавопаймобар, як новшикан ва даҳҳо ҳавопаймои ҷангӣ мавҷуд аст.

Худи Трамп ҳанӯз тасмими ниҳоие нагирифтааст, аммо баъди баргаштан аз Чин вай дар ҳузури рӯзноманигорон гуфт, пешниҳоди ахири Эрон дар мавриди ҳалли низоъ ӯро қонеъ накардааст.

“Ё онҳо созиш мекунанд, ё тору мор мешаванд”, - гуфт президенти ИМА.

Дар Теҳрон гуфтанд, омодаанд “ба ҳар гуна хушунат посух диҳанд”. Раиси порлумони Эрон Муҳаммад Қолибоф навишт, Эрон “ба ҳама гуна гузинаҳо омода аст”.

Ба иттилои NYT, ҳоло миёнаравҳо талош доранд, созише ба даст оранд, ки имкони бозкушоии тангаи Ҳурмузро фароҳам оварад ва аз таниш пешгирӣ кунад.

ИМА ва Исроил 28 феврал ҳамла ба Эронро шуруъ карданд ва ҳадафи асосии ин амалиётро зарфияти ҳастаӣ ва мушакии Эрон номиданд. Роҳбар ва чандин мақомдори Эрон кушта шуд. Эрон дар навбати худ ба кишварҳои Халиҷи Форс зарба зад ва ҳамчунин тангаи Ҳурмузро баст, ки барои иқтисоди ҷаҳонӣ аҳамияти вижае дорад. Ин иқдоми Эрон боиси гаронии қимати нафту газ дар бозори ҷаҳонӣ шуд.

Як арзёбии амниятии расмӣ дар Иттиҳоди Аврупо аз "афзоиши нигаронӣ" аз эҳтимоли рух додани ҳамлаҳои интиқомҷӯёна дар Аврупо дар пайи ҷанги Амрико ва Исроил бо Эрон, ҳушдор медиҳад.

Ин арзёбии амниятӣ, ки нусхаи он дастраси Радиои Аврупои Озод/Радиои Озодӣ шуд, бо ишора ба афзоиши хатар аз ҷониби Афғонистон ва Эрон ҳушдор медиҳад, ки терроризм ва ифротгароии хушунатомез "таҳдиде барои Иттиҳоди Аврупо" аст.

Дар ин санади 22-сафҳаӣ, ки онро Шӯрои Иттиҳоди Аврупо таҳия кардаст, бештар ахбор ва гузоришҳо дар соли 2025-ро мавриди баррасӣ қарор дода шудааст, на таҳдиҳои вобаста ба ҷанги Эрон.

Тибқи ин санад, ин ҳушдор бештар ба кишварҳое дуруст меояд, ки шумораи мусалмонон ё яҳудиҳо дар онҳо зиёд аст.

Арзёбии амниятии Иттиҳоди Аврупо дар бораи Афғонистон, аз таҳдиди "Шохаи Хуросон"- ДОИШ ҳушдор додааст.

Тибқи ин арзёбӣ, "Шохаи Хуросон"-и ДОИШ ҳанӯз дар Афғонистон фаъол аст ва "яке аз таҳдидҳои хориҷии умда" барои Аврупо ба шумор меравад.