Абдукарим Мирзоев, рӯзноманигор ва коргардони узбекистонӣ, ки аз сӯи пулиси Туркия боздошт шуда буд, рӯзи 12-уми январ аз Маркази ихроҷи шаҳрвандони хориҷии Хадамоти муҳоҷирати Истанбул раҳо карда шуд.

"Ҳоло Абдукарим Мирзоев дар манзилаш, ҳамроҳ бо хонаводааш аст. Дар фурсатҳои наздик вай ният дорад, моҷароро нақл кунад", - хабар дод телевизиони онлайнии RegistonTV.

Иттилоъ дар бораи боздошти Абдукарим Мирзоев ҳанӯз 11-уми декабри соли 2020 расонаӣ шуда буд.

Додситонии кулли Узбекистон гуфт, нисбати Абдукарим Мирзоев парвандае боз нашуда ва вай дар кофтуков қарор надошт. Ба иттилои додситонии Узбекистон, Тошканди расмӣ дар боздошти Мирзоев дар Туркия нақше надорад.

Абдукарим Мирзоеви 38-сола ҳамчун рӯзноманигор, коргардони синамо ва блогнавис шинохта шудааст. Вай дар гузашта дар расонаҳои мухталиф, аз ҷумла телевизионҳои "Ёшлар" ва "Узбекистон" фаъолият кардааст.

Ин рӯзноманигор ахиран дар Туркия зиндагӣ ихтиёр карда, блогнависӣ мекунад.

Кремл рӯзи 12-уми феврал эълом кард, ки WhatsApp-ро дар Русия пурра баста, дастрасиро ба маъмултарин барномаи паёмнависии ин кишвар барои миллионҳо корбар қатъ кардааст.

Сухангӯи Кремл Дмитрий Песков гуфт, барномаи паёмнависии амрикоӣ, ки ба ширкати Meta тааллуқ дорад, намехоҳад қонунҳои Русияро риоя кунад ва ба сокинони Русия пешниҳод кард, ки аз паёмрасони давлатии ин кишвар бо номи “МАX” истифода баранд. Мунтақидон ин паёмрасонро як воситаи назорат ном мебаранд. Мақомоти Русия инро рад мекунанд.

Бастани WhatsApp авҷи фишори шашмоҳа ба Мета аст, ки аллакай дар Русия созмони ифротӣ эълон шудааст. Ин кӯшиши густардаи Кремл барои эҷод ва назорати зерсохтори мухобиротиро нишон медиҳад, ки дар он ширкатҳои хориҷӣ ба қонунҳои маҳаллӣ итоат мекунанд ё аз байн бурда мешаванд.

Мета дар изҳороте гуфтааст, ки дар Русия 100 миллион корбар дорад. Ширкат ин иқдомро "қадаме ба ақиб" номид, ки "ба амнияти мардуми Русия зарба мезанад”.

Як сокини Маскав гуфт, ки онҳо аллакай ба паёмрасони давлатӣ гузаштанд.

Баъзеи дигар изҳори ноумедӣ карданд. Як зан бе зикри номаш гуфт: "Ман ба ин масъала муносибати комилан манфӣ дорам ва инро поймоли ҳуқуқи бунёдӣ мешуморам.”

Баъзе доменҳои марбут ба WhatsApp аз феҳристи миллии Русия бароварда шуданд. Акнун корбарон дар дохили Русия метавонанд танҳо бо истифода аз барномаҳои филтршикан ё VPN ба WhatsApp дастрасӣ ёбанд.

Мақомоти давлатии танзими мухобирот дар Русия мавзуъро шарҳ надод.

Ин иқдом чанд рӯз пас аз он сурат гирифт, ки Русия эълон намуд, дар барномаи паёмнависии Telegram маҳдудиятҳои бештар ҷорӣ хоҳад кард. Дар ин паёмрасон зангҳои садоӣ ва видеоӣ аз моҳи август баста шуда, дар авоили ҳамин ҳафта корбарон аз тамоман суст шудани кори Телеграм шикоят карданд.

Додгоҳи олии Чеченистон аризаи Зарема Мусоева, модари мухолифони ҳукумат – бародарон Абубакр ва Иброҳим Янгулбоевҳоро дар бораи бозбинии ҳукмаш қонеъ кард.

Дар ин бора “Гурӯҳи зидди шиканҷа”, як созмони ҳомии ҳуқуқи инсон, хабар дод. Додситон ҳам дархости вакилони мудофеъро барои бекор кардани ҳукм ҷонибдорӣ намудааст. То мурофиаи нави додгоҳӣ Мусоева дар боздоштгоҳ мемонад.

Ин зани 55-соларо моҳи августи соли 2025 бо иттиҳоми ҳамла ба корманди зиндонҳо ба 3 солу 11 моҳ маҳбаси сукунатӣ маҳкум карданд. Ӯ гуё ба рӯйи корманди зиндон шаппотӣ зада, рутбаашро кандааст.

Ҳомиёни ҳуқуқ мегӯянд, ҳеч шоҳид ин саҳнаро надида ва худи зан ҳам ҳодисаро пурра рад кардаву ғайривоқеӣ номидааст.

Зарема Мусоева ҳамсари собиқ додраси додгоҳи федеролӣ Сайдӣ Янгулбоев ва модари бародарон Янгулбоевҳо ҳаст, ки солҳои дароз ҳукумати Рамазон Қодировро интиқод мекунанд.

Мусоева моҳи январи соли 2022 зӯран аз Нижний Новгород ба Чеченистон бурда шуд. Вайро соли 2023 дар шаҳри Грозний барои хушунат алайҳи ходими полис ва тақаллуб ба панҷуним сол зиндон маҳкум карданд. Дертар ҳукмро кам карданд ва аз рӯи парвандаи аввал ӯ моҳи марти соли 2025 озод мешуд.

Зарема Мусоева аз бемории қанд, дарди чашм ва касалиҳои дигар азият мешавад. Дар маҳбас аҳволи ӯ бисёр бад шуда, ҳоло бо асо ҳам басахтӣ роҳ меравад.

Сардор Бердимуҳаммадов, раисҷумҳури Туркманистон, дар як тағйироти калони кадрӣ дар ҳукумат ва ниҳодҳои қудратии кишвараш шахсони навро таъйин намудааст.

Ба навиштаи Бахши туркмании Радиои Озодӣ, рӯзи 13-уми феврал ба ҷойи вазири амнияти миллии Туркманистон Назар Отагараев генерал-майор Давлатгелдӣ Мередов таъйин шуд.

Ба иттилои манбаъ, мушовир дар бахши нафту газ Ашӯрқулӣ Беглиев, муовинони нахуствазир Ботир Амонов ва Байрамгул Ораздурдиева ва вазири тандурустӣ Мурод Мамедов аз мақомҳояшон гирифта шуданд.

Ҷудо аз ин, дар ҳукумати Туркманистон сохтори нав – Вазорати роҳҳои мошингард таъсис гардид.

Бахши туркмании Радиои Озодӣ мегӯяд, ин тағйироти кадрӣ дар ҳолест, ки дар Туркманистон соли 2025 маоши кормандони буҷавӣ тағйир наёфт ва ҳатто афзоиши ҳарсолаи 10-дарсадии даромад ҳам сурат нагирифт.

Таъкид мешавад, шахсоне, ки ба ҷойи мақомдорони барканоршуда соҳиби вазифа шуданд, барои ҷомеа чандон ошно нестанд ва собиқаи кории онҳо ҳам барои бисёриҳо номаълум мемонад.

Додгоҳи ҳарбӣ дар шаҳри Боку Рубен Варданян, соҳибкор ва вазири собиқи Қаробоғи Кӯҳиро ба 20 сол зиндон маҳкум кард. Дар ин бора хабаргузории давлатии Озарбойҷон хабар дод.

Варданянро аз рӯи 40 иттиҳом, аз ҷумла маблағгузории терроризм, ташкили гурӯҳҳои мусаллаҳ, ғайриқонунӣ гузаштан аз сарҳад ва куштору ғасби пурхушунати қудрат гунаҳкор кардаанд. Худи Варданян ин иттиҳомҳоро намепазирад.

Додситон пештар хоста буд, ӯ ба ҳабси абад маҳкум шавад.

Рубен Варданянро рӯзи 27-уми сентябри соли 2023, ҳангоми талоши баромадан аз Қаробоғи Кӯҳӣ, дар сарҳади Арманистон боздошт карданд. Он замон ин минтақа пурра зери назари Озарбойҷон будНерӯҳои Озарбойҷон дар ҷанги соли 2020 як бахше аз Қаробоғи Кӯҳиро зери назорат гирифтанд. Ин минтақа дар даргирии соли 2023 пурра таҳти итоати Озарбойҷон даромад..

Мурофиаи додгоҳӣ алайҳи раҳбарияти минтақаи ҷудоиталаби Қаробоғи Кӯҳӣ моҳи январи соли 2025 шуруъ шуд. Варданян чанд бор гуфт, ки тафтиш ва мурофиа бо мавридҳои фаровони поймоли қонун ҷараён дорад. Ӯ дар боздоштгоҳ ду дафъа гуруснанишинӣ кард.

Ҷониби Озарбойҷон мегуфт, ҳуқуқи айбдоршаванда ва забоне, ки ӯ ба он гап мезанад, риоя шудааст.

Рубен Варданян муассиси ширкати брокерии "Тройка Диалог" ва мактаби тиҷоратии "Сколково" як замоне ба феҳристи шахсони сарватмандтарини Русия ворид буд. Вай соли 2022 аз шаҳрвандии Русия даст кашида, ба Қаробоғи Кӯҳӣ кӯчид.

Мақомоти Озарбойҷон инро ба шиддат танқид карда, гуфтанд, ки Варданян ба гуфтугӯи сулҳи миёни Арманистону Озарбойҷон, ки бо миёнравии Маскав соли 2020 ба даст омада буд, халал мерасонад.

Додситони минтақаи Кӯлоб дар як нишасти матбуотӣ гуфт, ки танҳо дар соли 2025 садҳо қарори раисони шаҳру ноҳияҳоро дар бораи тақсими замин нодуруст бароварданд.

“Дар соли 2025 ба 416 қарори замин ва дар соли 2024 ба 318 қарори ғайриқонунӣ дар бораи ҷудо кардани қитъаи замин эътироз оварда шуд,” – гуфт Ҳамзаалӣ Музофиров.

Ин қарорҳоро раисони шаҳру ноҳияҳо имзо кардаанд, вале маълум нест, ки оё касе ҷазо гирифтааст ё не.

Намояндагони додситонӣ дар минтақаи Кӯлоб гуфтанд, баъзе аз қазияҳо солҳо боз давом доранд.

“Аксари эътирозҳо дар ноҳияи Муъминобод ҳаст. Баҳси хоҷагиҳои деҳқонӣ, ки муддати чанд сол давом доранд. Эътирозҳо вобаста ба роҳу қитъаи замин ҳам ҳаст,” – шарҳ дод Шавкат Мадохиров, намояндаи Додситонии минтақаи Кӯлоб.

Чунин баҳс дар кӯчаи Фирдавсии ноҳияи Фархор ҳам вуҷуд доштааст. Дар ин кӯча хонаи нимсохти баъзе аз сокинонро аз байн бурда, парвандаи чандеро ба додгоҳ фиристодаанд.

Давлаталӣ Амирзода, додситони ноҳияи Фархор, гуфт, "мо ба қарори раиси ноҳия 14 эътироз овардем. Ҳамаашон бекор шуданд. Манзилҳои истиқоматӣ, ки то ба охир расонда нашуда буд, бартараф карда шуданд. Ҳамагӣ се ё чаҳор манзили дигар, ки нотамом аст, дар ҳоли баррасӣ ҳаст."

Омори Идораи замини минтақаи Кӯлоб аз маълумоти додситонӣ фарқ дорад. Юсуф Саидзода, раиси Идораи замин дар минтақаи Кӯлоб гуфт, “тибқи маълумот, 267 эътироз шудааст ва аз ин миқдор 38-тояш ба қонун мутобиқ карда шудааст.”

Замин дар Тоҷикистон моликияти давлат аст ва тақсими онро ниҳодҳои давлатӣ ба дӯш доранд. Бо сабаби кам будани замин ва зиёд будани довталабони он ҷараёни тақсими замин бо мушкилот, аз ҷумла гоҳо олуда бо фасод пеш меравад.

Дар гузашта ҳам даҳҳо мансабдор барои тақсими нодурусти замин аз вазифа барканор шудаанд.

Додситони кулли Тоҷикистон мегӯяд, дар соли 2025-ум 405 нафар дар зери маводи мамнӯъ дар шабакаҳои иҷтимоӣ ишораи писанд ё "лайк" гузоштанд, аммо бар асоси қонуни нав аз ҷавобгарии ҷиноӣ озод шуданд.

Ҳабибулло Воҳидзода, додситони кул, 13-уми феврал дар нишасти хабарӣ гуфт, нисбат ба ин афрод эзоҳи моддаҳои дахлдори Кодекси ҷиноӣ татбиқ ва "онҳо аз ҷавобгарии ҷиноӣ озод карда шуданд".

Моҳи майи соли 2025 ҷазои ҷиноӣ барои "лайк"-гузорӣ дар шабакаҳои иҷтимоӣ бекор шуд. Ангушт задан ба аломати "писанд" ё "лайк" дар зери матлабҳои интернетӣ қаблан садҳо касро ба зиндон бурда буд.

Додситони кулли Тоҷикистон 13-уми феврал гуфт, дар пайи бекор шудани ҷазо барои гузоштани “лайк” дар шабакаҳои иҷтимоӣ, содиршавии ҷиноятҳои марбут ба ифротгароӣ назар ба як соли пеш 314 адад ё 23 дарсад кам шудааст.

Ба иттилои расмӣ, дар Тоҷикистон беш аз якуним ҳазор кас барои гузоштани "лайк" ва навиштани шарҳ дар зери матлабҳои, ба гуфтаи мақомот, "дорои хусусияти ифротӣ", ҷазо гирифтаанд.

Вакилони порлумони Тоҷикистон дар моҳи июни соли 2018 дар пайи ислоҳи Кодекси ҷиноии кишвар дар қонунгузорӣ "сафедкунии оммавии терроризм тариқи шабакаи Интернет"-ро ҷурм шинохтанд ва ин меъёр дар миёни мардум бо моддаи ҷазо барои "лайк" маъруф аст.

Вазорати корҳои хориҷии Қазоқистон мегӯяд, ки дар нишасти фавқулодаи Гурӯҳи тамоси намояндагони вижаи Осиёи Миёна дар бораи Афғонистон, роҷеъ ба вазъияти кунунии ин кишвар ва густариши робитаҳои тиҷоратӣ ва иқтисодӣ гуфтугӯ шудааст.

Ин нишаст рӯзи 16-уми феврал дар шаҳри Остона, пойтахти Қазоқистон баргузор шуд. Ҳеч намояндае аз Афғонистон дар он ҳузур надошт.

Дар эъломияи Вазорати корҳои хориҷии Қазоқистон омадааст, ки дар нишаст роҷеъ ба ҳамкориҳо дар бахши нақлиёт ва боркашонӣ аз тариқи Афғонистон ва низ амнияти минтақаӣ баҳсҳо сурат гирифтааст.

Эркин Тукумов, намояндаи вижаи Қазоқистон барои Афғонистон гуфтааст, ки дар ин нишаст дар бораи роҳҳои муҳими ҳамкорӣ бо Кобул табодули назар сурат гирифт.

Дар ин нишаст намояндагони вижаи Қазоқистон, Қирғизистон, Тоҷикистон ва Узбекистон барои Афғонистон, ҳузур доштаанд.

Ин гурӯҳи тамос дар соли 2025 бо ибтикори Узбекистон таъсис ёфт ва нахустин нишасти он 26 августи ҳамон сол дар шаҳри Тошканд баргузор шуд.

Кишварҳои Осиёи Марказӣ ҳукумати Толибонро ба расмият намешиносанд, аммо аксари онҳо бо ин низом робитаҳои наздики сиёсӣ ва иқтисодӣ доранд.

Блогерони тоҷик дар соли 2025-ум 12,8 миллион сомонӣ ё 1,3 миллион доллар даромад гирифтаанд.

Намояндагони Кумитаи андози Тоҷикистон рӯзи 13-уми феврал дар нишасти хабарӣ гуфтанд, блогерон соли гузашта ба давлат 2,4 миллион сомонӣ ё 257 ҳазор доллар молиёт супориданд.

Молиёти супоридаи блогерон назар ба як соли пеш 97,3 ҳазор сомонӣ ё 10 ҳазор доллар камтар будааст.

Тасдиқи ин рақамҳо аз манобеи мустақил имконпазир нест.

Бино ба омори расмӣ, феълан 119 нафар ҳамчун блогер дар Кумитаи андоз сабт шудаанд.

Сабтиноми блогерҳо дар Тоҷикистон соли 2020 сар шуд.

Мақомот ба ин бахш замоне таваҷҷуҳ карданд, ки сафи блогерон барои гирифтани даромад афзуд.

Ҷоизаи имсолаи "Қанди порсӣ", ки барои талошҳо дар роҳи посдорӣ ва густариши забони порсӣ дода мешавад, имсол насиби овозхони маъруфи Тоҷикистон Нигина Амонқулова, устоди Донишгоҳи Принстони Амрико Майкл Берӣ ва адабиётшинос аз Афғонистон Латиф Нозимӣ гаштааст.

Тақдими ҷоиза рӯзи 15-уми феврал дар ҳамоиши Конуни фаромарзии ҳамёрии порсизабонон дар Донишгоҳи Вестминистери Бритониё баргузор шуд.

Исфандиёри Одина, рӯзноманигори тоҷик дар Лондон, рӯзи 16-уми феврал ба Радиои Озодӣ гуфт, Нигина Амонқулова барои таронаҳояш, ки дар густариши забони форсӣ саҳмгузор аст, барандаи ҷоиза шуд.

“Аз ҷумла, масъулони Конун иҷрои таронаҳои Мавлавиро дар ҳамоиши ЮНЕСКО, ки бо хонандаҳои эронӣ дар гурӯҳи ҳунарии Фулодванд иҷро карда буд, қадр карданд,” – афзуд ӯ.

Ҳамоиши Конуни фаромарзии ҳамёрии порсизабонон аз соли 2014 дар маркази Бритониё баргузор мешавад ва ҷоизааш 500 фунт стерлинг, муодили тақрибан ҳафтсад доллар, аст.

Ин ҷоизаро соли 2024 ба Гулрухсори Сафӣ (Гулрухсор Сафиева), шоири саршинос аз Тоҷикистон ва Аминаи Шарофиддин (Амина Шарофиддинова), фаъоли тоҷик аз Самарқанд, доданд.

Пештар Дориюши Раҷабиён, рӯзноманигори маъруф ва муҷрии барномаҳои радио ва телевизиюни форсии Би-би-сӣ, барандаи ин ҷоиза шуда буд.

Вакили ҷабрдидагони ҳамла ба толори "Крокус Сити Ҳол"-и Маскав гуфтааст, дар мурофиаи навбатӣ аз додрас талаб хоҳанд кард, ки ба ҳамаи муттаҳамон "ҷазои сангинтарин" дода шавад.

Людмила Айвар дар ин бора рӯзи 16-уми феврал ба хабаргузории расмии ТАСС мусоҳиба додааст. Аз рӯйи қонунҳои Русия ҳукми сангинтарин ҳабси абад аст.

Дар ҳамлаи террористӣ ба "Крокус" дар канори Маскав дар рӯзи 22-юми марти соли 2024-ум 149 нафар нафар кушта ва 609 кас маҷруҳ шуданд.

Муҳокимаи гумонбарон аз моҳи августи 2025 дар Додгоҳи дуюми ҳавзаи ғарбии низомӣ дар Маскав ҷараён дорад.

Дар курсии айбдорӣ 19 нафар нишастаанд, ки аксарашон зодагони Тоҷикистон ҳастанд. Онҳо ба тарҳрезиву мусоидат ва анҷоми ҳамлаи террористӣ муттаҳам мешаванд.

Мурофиа паси дарҳои баста мегузарад ва маълум нест, то куҷо ҳуқуқи гумонбаршудагони ҳамла ба “Крокус” риоя мешавад.

Нерӯҳои қудратии Русия ҳангоми боздошти гумонбарон даст ба азияту шиканҷаи бераҳмонаи онҳо заданд ва созмонҳои ҳомии ҳуқуқ ба мисли Human Rights Watch гуфтанд, ба эътирофи гумонбарон бовар кардан душвор аст.

Танҳо дар як шуъбаи Бозрасии Давлатии Автомобилӣ дар Тоҷикистон беш аз 240 миллион сомонӣ, баробар ба 25 миллион доллар, зарари молӣ ошкор шудааст.

Ин рақамро намояндагони Оҷонси мубориза бо коррупсия рӯзи 13-уми феврал дар ҳузури хабарнигорон эълон карданд.

Фирӯз Камолзода, муовини раиси Оҷонси мубориза бо фасод, гуфт: "Нисбат ба масъулони шуъбаи бақайдгирии имтиҳоноти БДА-и Вазорати корҳои дохилии Тоҷикистон парвандаи ҷиноӣ оғоз карда шуд. Барои бе расмиятдарории гумрукӣ ба қайд гирифтан ва додани рақами воситаҳои нақлиёт."

Дар ҷараёни таҳқиқ, ба гуфтаи ӯ, "зиёда аз 253 миллион сомоние, ки барои надодани пардохтҳои гумрукӣ ба миён омада буданд, аз ҳисоби кормандони БДА ва соҳибкорони дигар пурра ба буҷа ворид карда шуд. Парванда нисбат ба онҳо ба суд (додгоҳ) фиристода шуд.”

Дар Оҷонсӣ ҷузъиёти дигар надоданд.

Тамосҳои батакрори мо ба Бозрасии Давлатии Автомобилӣ (ГАИ) бенатиҷа монд ва маълум нест вокуниши онҳо ба чунин иттиҳомот чист.

Навор дар Ютуб:

Зулфиқори Исмоилиён, коршиноси иқтисодӣ, шарҳ дод, ки садҳо миллион сомонӣ зиёни молӣ дар як шуъбаи Бозрасии Давлатии Автомобилӣ бозгӯйи чист.

“Ин нишондиҳандаи фасоди густурда аст дар Тоҷикистон. Ҳамин фасод дар тамоми соҳаҳои Тоҷикистон вуҷуд дорад. Тасаввур кун, ту меравӣ пеши духтур, пул надиҳӣ ягон кас туро нигоҳ намекунад. Дар кӯча агар милиса туро дошт, ронанда бошӣ, ҳатман пул медиҳӣ, дорӣ ё надорӣ,” – афзуд ӯ.

Ба иттилои расмӣ, соли 2025 дар Тоҷикистон зиёда аз 1900 ҷинояти коррупсионӣ ва иқтисодӣ ошкор карда шудааст. Як бахши он ба кори Бозрасии Давлатии Автомобилӣ бармегардад.

Дар гузашта интиқод аз ҳукумати Тоҷикистон бисёр зиёд буд, ки ба кормандони Бозрасии Давлатии Автомобилӣ дасти боз додааст, ки ҳарчӣ хоҳанд мекунанд ва аз ронандагон ҳар вақт хостанд, ришва мегиранд.

Эмомалӣ Раҳмон, раисҷумҳури Тоҷикистон, ду сол пеш фармон дода буд, то теъдоди нозирони роҳ ва ё кормандони Бозрасии Давлатии Автомобилиро 30 дар сад кам кунанд.

Гузориши видеоиро дар инҷо бинед:

Embed ба дигарон фиристед

Дар як шуъбаи БДА 240 млн. сомонӣ зарар ошкор шудааст

Аз ҷониби Радиои Озодӣ

Embed ба дигарон фиристед

Нусхабардорӣ шуд

---

бар px баландӣ px

---

URL нусхабардорӣ шуд

Феълан кор намекунад

0:00 0:03:10 0:00

Линки мустақим

• 240p | 8,1MB
• 360p | 11,9MB
• 480p | 19,4MB
• 720p | 46,2MB

Ҷонибдорони Ҷунбиши инсофи Покистон (PTI) се рӯз боз роҳҳоро миёни Пешовар ва вилояти Панҷоб баста, ҳазорон мошини боркаш ва сабукрав дар нимароҳ мондаанд.

Аъзои ин ҳизб аз ҳукумати Покистон хостаанд, ки Имрон Хон, нахуствазири пешин ва бунёдгузори ин ҳизбро, ки дар зиндон бемор аст, ба шифохона интиқол диҳанд.

Тибқи гузоришҳо, биноии чашми рости Имрон Хон бинобар бемориаш 85 дарсад кам шудааст.

Тибқи гузоришҳо, гурӯҳе аз табибон барои дармони чашми Имрон Хон ба зиндон рафтаанд.

Ин дар ҳоле аст, ки 12-уми феврал Додгоҳи олии Покистон ба ҳукумати ин кишвар дастур дод, то пеш аз 16-уми феврал заминаи мулоқоти Имрон Хонро бо пизишкони чашм ва низ тамоси телефонии ӯро бо фарзандонаш фароҳам кунад.

Имрон Хон аз соли 2023 ба ин тараф дар зиндоне дар шаҳри Равалпиндӣ ба сар мебарад. Вай ба чанд иттиҳом, аз ҷумла, фасоди молӣ гумонзад аст. Имрон Хон худро бегуноҳ шумурда, ин иттиҳомотро дорои ангезаи сиёсӣ медонад.

Додситони кулли Тоҷикистон мегӯяд, баъзе аз гурӯҳҳо дар Афғонистон мехоҳанд, бо ҳамла ба коргарони чинӣ муносибати Душанбе ва Пекинро вайрон кунанд.

Ҳабибулло Воҳидзода 13-уми феврал дар нишасти хабарӣ гуфт, "баъзе шаҳрвандон ва гурӯҳҳои ҷинояткор ҳастанд, ки тинҷию оромиро намехоҳанд ё мехоҳанд муносибати моро бо давлати Чин вайрон кунанд, вагарна роҳсоз чаро дар вақти корӣ паронда мешавад, махсусан, мардуми Чин?"

Додситони кулли Тоҷикистон аз ягон гурӯҳи мушаххас ном набурд ва танҳо гуфт, "ин куштор аз ҷониби шаҳрвандони Тоҷикистон амалӣ карда нашудааст".

Ба гуфтаи Ҳабибулло Воҳидзода, таҳқиқи ҳамла ба коргарони чинӣ дар марзи Тоҷикистон ва Афғонистон идома дорад.

Дар моҳҳои ноябр ва декабри соли гузашта дар пайи ҳамла аз хоки Афғонистон панҷ коргари чинӣ дар ноҳияҳои Шамсиддин Шоҳин ва Дарвози Тоҷикистон кушта шуданд.

Дар пайи ин ҳамлаҳо коргарони чинӣ аз минтақаҳои марзии Тоҷикистону Афғонистон хориҷ шуданд.

Ҳукумати Русия ба муҳоҷирони тоҷик иҷозат додааст, ки ташхиси тиббиро дар Тоҷикистон супорида, санадҳои зарурии пизишкиро ҳаминҷо бигиранд.

Ин санад 9-уми октябри соли 2025 дар Душанбе имзо шуда, ҳафтаи гузашта ҳукумати Русия онро барои тасдиқ ба Думаи давлатӣ (порлумон) фиристод.

Баъзе аз расонаҳои русӣ бо такя ба Вазорати тандурустии Русия навиштанд, ташхиси тиббии муҳоҷирони тоҷик дар нуқтаи махсусе дар яке аз марказҳои тиббии Душанбе анҷом мешавад. Бо супоридани ташхис дар ватан, муҳоҷирони тоҷик дар Русия ташхиси такрорӣ намесупоранд.

Манбаъ мегӯяд, ин нуқтаи тиббӣ дар асоси қонунгузории Русия кор мекунад ва Тоҷикистон ин марказро аз супоридани андоз озод ва дигар пардохтҳои ҳатмӣ озод мекунад.

Ҳамчунин кормандони ин марказ ба махзани маълумот дар бораи гирифторони бемориҳои ВИЧ, гепатит, сил ва бемориҳои сироятии Тоҷикистон дастрасӣ пайдо мекунанд.

Ҳанӯз маълум нест, ки ин ташхиси тиббии муҳоҷирони тоҷик дар ватан дар кадом марказии тиббии Душанбе анҷом мешавад. Мақомоти Тоҷикистон дар ин бора шарҳе надодаанд.

Супоридани ташхиси тиббӣ барои гирифтани иҷозаи кор ё патент дар Русия ҳатмӣ аст.

Владимир Путин, раиси ҷумҳури Русия тирамоҳи соли гузашта эълон кард, ки беш аз як миллион муҳоҷири тоҷик дар он кишвар кор мекунанд.

Гузоришҳо дар бораи таҳқиру бадрафторӣ бо ин муҳоҷирон ва зери по кардани ҳуқуқи онҳо зиёд нашр мешаванд.

Мақомоти панҷ кишвари аврупоӣ мегӯянд, Алексей Навалний, пешвои мухолифони Русия, ки рӯзи 16-уми феврали соли 2024 дар маҳбас даргузашт, бо моддае бо номи "эпибатидин" заҳролуд шудааст.

Сухан дар бораи як заҳри қотиле меравад, ки аз пӯсти қурбоққаи сокин дар Амрикои Ҷанубӣ ба даст меояд. Рӯзи 14-уми феврал вазоратҳои корҳои хориҷии панҷ кишвар Бритониё, Шветсия, Фаронса, Олмон ва Ҳолланд дар ин бора як изҳороти расмӣ нашр карданд.

Дар баёнияи ин кишварҳо омадааст, ки Навалний бо "токсини марговар" кушта шудааст ва ин хулоса бар асоси ташхисест, ки баъди марги Навалниё дар хориҷ анҷом додаанд. Дар ҳоле ки мақомоти Русия сабаби марги ӯро "табиӣ" мехонанд, кишварҳои Аврупо мегӯянд, Маскав васоил, ҳам ангеза ва ҳам имкони заҳролуд кардани ин сиёсатмадорро дошт.

Эпибатидин як навъи заҳрест, ки тамоми аъзои баданро аз кор меандозад ва инсон қобилияти нафасгириро ҳам аз даст медиҳад. Алексей Навалний рӯзи 16-уми феврали соли 2024 дар зиндони "Полярний волк" дар минтақаи Ямало-Ненетс даргузашт.

Мақомоти зиндон иддао карданд, ки ӯ "баъди сайругашт худро бад ҳис кард ва аз ҳуш рафт". Муфаттишон ҷасади Навалнийро танҳо пас аз ҳашт рӯзи исрори модараш ба пайвандонаш доданд. Ӯро рӯзи 1-уми марти соли 2024 дар оромгоҳи Борисови шаҳри Маскав ба хок супурданд.