Дар чанд ҷумла
Вазири корҳои хориҷии Бритониё ҳушдор дод, ки ҳамла ба Украина "фоҷеабор" хоҳад буд
Вазири корҳои хориҷии Бритониё Лиз Трусс дар Маскав ба ҳамтои русаш Сергей Лавров ҳушдор дод, ки ҳамла ба Украина "фоҷеабор" хоҳад буд.
Бритониё охирин кишварест, ки дар авҷи танишҳо бар сари таҷаммӯи нерӯҳои Русия дар наздикии марзи Украина, ба ҳадафи коҳиши танишҳо, ба талошҳои дипломатӣ пайваст.
"Асосан, ҷанг дар Украина барои мардуми Русия ва Украина ва барои амнияти Аврупо фоҷеабор хоҳад буд. НАТО ҳам ба таври ошкор эълон кардааст, ки ҳар гуна ҳамла ба Украина пайомадҳои бузурге хоҳад дошт," -- афзуд вазири корҳои хориҷии Бритониё рӯзи 10-уми феврал дар нишасти хабарии муштарак бо Сергей Лавров.
Дар ҳоле ки раҳбарони аврупоӣ ва дипломатҳои баландпоя дар саросари Аврупо талош доранд, то роҳи ҳалле барои ин бӯҳрон пайдо кунанд, Русия ва Беларус тамринҳои низомии муштаракеро оғоз кардаанд. Тахмин зада мешавад, ки 30 ҳазор сарбози русӣ ба ин кишвари ҳамсоя фиристода шудаанд.
Сергей Лавров дар ҳамон нишасти хабарӣ дар посух ба изҳороти вазири корҳои хориҷии Бритониё ҳушдор дод, ки таҳдидҳои Ғарб алайҳи Маскав танҳо танишҳоро афзоиш медиҳад.
Вазири корҳои хориҷии Русия дар идома гуфт, чунин таҳдидҳо ба куҷое намебарад ва афзуд, "мо танҳо тавассути муколамаи муҳтарамона муносибатҳоро ба эътидол оварда метавонем".
Дар як талоши ҳамоҳангшуда, нахуствазири Бритониё Борис Ҷонсон барои машварат бо дабири кулли НАТО, ба Брюссел сафар кард. Баъдан ӯ ба Варшава меравад, то бо раиси ҷумҳури Лаҳистон мулоқот кунад. Ҳамзамон интизор меравад, вазири дифои Бритониё рӯзи 11-уми феврал ба Маскав сафар кунад.
Ҳамаи хабарҳои имрӯзро дар инҷо бихонед
Вазир тамбашавии роҳҳоро яке аз мушкилиҳои асосии соҳа номид
Вазири нақлиёти Тоҷикистон роҳбандӣ ё тамбашавӣ дар ҷодаҳо, ба вижа дар пойтахтро яке аз мушкилиҳои асосии ин соҳа номидааст. Моҳҳои ахир сокинони зиёде дар Душанбе аз тамбашавии роҳҳо шикоят мекунанд.
Азим Иброҳим, вазири нақлиёт рӯзи 17 октябр дар ҷаласаи ҷамъбастии ин ниҳод аз вазъ нигаронӣ кардааст. Ӯ гуфтааст, тамбашавӣ сабаби дер мондани одамон ба кор, асабонияти ронандагону мусофирон ва садамаҳо шуда, ба кори хадамоти фаврӣ мисли "Ёрии таъҷилӣ", халал ворид мекунад.
Вазири нақлиёти Тоҷикистон сабабҳои асосии тамбашавии мошинҳоро ба афзоиши аҳолӣ ва шумори воситаҳои нақлиёт, рабт додааст.
Дар зимн, ин мушкилро муовини раиси шаҳри Душанбе Раҳмиддин Салимзода ҳам ба таҳлил кашида, гуфтааст, ки аз соли 2021 то 2024 шумори мошинҳои шахсӣ дар шаҳр қариб 66 дарсад зиёд шудааст. Вай дар мақолае, ки дар "Паёми Душанбе" нашр шуд, гуфтааст, ки теъдоди мошинҳо дар пойтахт қариб ба 145 ҳазор баробар аст.
Ба гуфтаи ин мақомдори тоҷик, сабаби аслии тамбашавӣ, ворид шудани шумораи зиёди мошинҳо аз берун ба пойтахт аст. Ба гуфтаи Раҳмиддин Салимзода, дар як шабонарӯз аз шаҳру ноҳияҳои дигар беш аз 44 ҳазор мошин ба Душанбе ворид мешавад.
Зиёд шудани шумораи таксиҳо дар пойтахро ҳам муовини раиси шаҳри Душанбе яке аз сабабҳои дигари эҷоди тамбашавӣ дар роҳҳо номидааст. Ҳоло ба навиштаи ин мақомдор, теъдоди таксиҳо дар пойтахт ба 12 000 адад расидааст.
Ба пешниҳоди Муовини раиси шаҳр, бунёди пулҳои болои роҳ ва ҷудо кардани хатти нақлиёти мусофирбар мисли кишварҳои дигар, метавонад вазъро беҳтар кунад.
Мардум дар пойтахт мегӯянд, тамбашавӣ ягона мушкили онҳо дар роҳҳо нест. Камбуди нақлиёти калони мусофирбар дар ҷодаҳои шаҳр ва беназм будани кори онҳову нархи роҳкироро сокинон аз мушкилиҳои асосии дигар дар роҳҳо меноманд.
Ихроҷи 135 муҳоҷир аз Русия дар пайи амалиёти "Нелегал-2025"
Дар Русия марҳилаи дуввуми амалиёти "Нелегал-2025" идома дорад ва нерӯҳои амниятӣ муҳоҷиронро дар сохтмону бозор ва ҷойи хобу автобусҳо ҷустуҷӯву тафтиш ва боздошт мекунанд.
Маъмурини чанд ниҳод -- пулису, амният ва ОМОН ё гурӯҳи таъиноти махсус ба яке аз сохтмонҳо дар маркази Хабаровск ворид шуда, даҳҳо муҳоҷирро барои тафтиши ҳуҷҷатҳо ба идораи муҳоҷират бурданд.
Онҳо се нафарро барои нақзи қоидаҳои муҳоҷират хориҷ намуданд ва ду нафарро таҳдид ба зиндон кардаанд. Ба иттилои кормандони интизомӣ, ин муҳоҷирон пас аз гирифтани шаҳрвандӣ, қисми ҳарбиро тарк кардаанд.
Дар Барнаул дар пайи амалиёти пулис дар дохили автобус 33 муҳоҷир боздошт ва аз Русия ихроҷ шудаанд.
Дар Челябинск ҳам амалиёти ҷустуҷӯву тафтиши муҳоҷирон дар қаҳвахонаву сохтмонҳо идома дорад.
Дар амалиёти "Нелегал–2025" мақомоти рус аз дрон истифода мебаранд.
Ба иттилои расмӣ, дар 4 рӯзи амалиёт 17 ҳолати ҳуқуқвайронкунии маъмурӣ ва 19 ҷиноят дар самти муҳоҷират ошкор шуда, 135 нафарро аз Русия рондаанд. Амалиёти мазкур то 22 юми октябр идома мекунад.
Солҳои ахир махсусан пас аз ҳамла ба толори консертии "Крокус", шикори муҳоҷирон дар Русия шиддат гирифта, дар бисёре аз мавридҳо бо таҳқиру латтукӯби муҳоҷирон ҳамроҳ будааст.
Арабистони Саудӣ барои зоирон қоидаи нав ҷорӣ кард
Арабистони Саудӣ барои қабули зоирон қоидаи навро ҷорӣ кард. Аз ин ба баъд барои гирифтани виза ё раводид кас бояд аз ташхиси тиббӣ гузарад.
Санади тандурустӣ тавассути пойгоҳи "Nusuk" таҳия карда мешавад. Шарти нав барои сафар ба ҳаҷро Вазорати тандурустии Арабистони Саудӣ эълон кард.
Рӯйхати бемориҳое, ки монеи сафари одамон ба ҳаҷ мешавад, дароз аст. Бар асоси ин феҳраст, афроде, ки ба шаклҳои вазнини бемории гурда, бемории қалб, бемориҳои музмини шуш гирифторанд ё аз бемориҳои асаб азият мекашанд, наметавонанд ҳаҷ кунанд.
Гирифторӣ ба бемориҳои сироятӣ ва саратону ҳомиладорӣ дар моҳҳои ахир ҳам ба кас имкон намедиҳад, ки сафари ҳаҷ кунад.
Ба таъкиди мақомоти Арабистони Саудӣ, маҳдудиятҳои нав барои ҳифзи бехатарӣ ва сиҳатии зоирон гирифта шудааст.
Бо назардошти фавти зоирони зиёд дар солҳои пеш, Арабистони Саудӣ имсол тадобири амниятиро сахттар кардааст, то аз маргумири зиёд дар маъракаи ҳаҷ пешгирӣ шавад.
Соли 2024 ба сабаби гармои сахт ва ҳарорати 51 дараҷаӣ, бештар аз 1300 зоир дар Арабистони Саудӣ ҷон доданд.
Ҳар сол беш аз шаш ҳазор сокини Тоҷикистон барои адои ҳаҷҷи фарзӣ мераванд.
Қазоқистон сафири худро дар ИМА нав мекунад
Як моҳ баъди барканории сафири Қазоқистон дар ИМА бо амри президент Қосимҷомарт Тоқаев Магжан Илёсов раҳбари нави намояндагии дипломатии Остона дар Вашингтон таъин шуд.
Фармони таъини сафири нави Қазоқистон дар ИМА рӯзи 20 октябр дар сомонаи Оқорда - қасри президент ба нашр расид. Илёсов дар ин мақом Ержан Ошиқбоевро иваз кард, ки давоми шаш соли гузашта дар ин мақом кор кардааст. Ошиқбоев ҳамроҳ бо вазири корҳои хориҷии Қазоқистон Мурат Нуртлеу поёни моҳи сентябр баъди бозгашти Тоқаев аз Ню Йорк аз вазифа маҳрум шуда буд.
Он замон бархе тахмин карданд, ки барканориҳо ба интиқодҳои Тоқаев аз дипломатҳои калони кишвараш ва нотавонии ташкили гуфтугӯи ӯ бо президенти ИМА Доналд Трамп рабт дорад, дар ҳоле, ки президенти Узбекистон Шавкат Мирзиёев тавонист давоми панҷ дақиқа бо Трамп мулоқоти ҳузурие дошта бошад. Айни замон, дар ин сафар ба Амрико дар чаҳорчӯби мубоҳисаҳои Маҷмаи кулли СММ дар Ню Йорк, ҳайатҳои Узбекистон ва Қазоқистон бо ширкатҳои ИМА ба маблағи умумии 12 миллиард доллар созишномаҳо дар заминаи хариди ҳавопаймоҳову локомотивҳо имзо карданд.
Дафтари президенти Қазоқистон он замон сабаби ин барканориҳоро нашр накард.
Илёсов 51 сол дошта, хатмкардаи Донишгоҳи давлатии забонҳои ҷаҳон ва равобити байналмилалии Қазоқистон мебошад. Ӯ инчунин дар Донишгоҳи Ҳарвард таҳсил кардааст.
Аз соли 2000 ба ин сӯ дар сохторҳои ВКХ ба кор шурӯъ кардааст. Дар мақомҳои сафири Қазоқистон дар Нидерланди, Бритониё, Ирландия ва Исландия кор кардааст.
Дар Ереван ҷасади Оиша Боймуродова - духтари Чеченистонро тарккарда пайдо шуд
Дар шаҳри Ереван ҷасади Айшат (Оиша) Боймуродова - духтаре аз Чеченистонро пайдо кардаанд, ки дар паи хушунати хонаводагӣ Русияро тарк карда буд. Дар ин бора полиси Арманистон хабар дод.
Чанде пеш як фаъоли ҳуқуқ гуфт, ки Айшат баъди он ки барои мулоқот бо як дугонааш берун рафт, нопадид шуд. Бархе тахмин карданд, ки шояд духтари фирориро гашта ба Чеченистон бурдаанд.
Полиси Арманистон навишт: “19 октябр ба идораи полиси ВКД Арманистон як шаҳрванд занг зада хабар дод, ки дар як хонаи иҷора дар кӯчаи Демирчяни шаҳри Ереван ҷасади зане пайдо шудааст. Ходимони полис ба ҷои ҳодиса рафтанд. Маълум шуд, ки он ҷасади Айшат Боймуродоваи 23-сола аст, ки аз 17 октябр нопадид шуда буд”. Тафтиш шурӯъ шуда, сабабҳои марги ӯ санҷида мешавад.
Боймуродова бо ёрии як созмони ҳомии ҳуқуқ, ки ба духтарону занони Қафқози Шимолӣ дасти ёрӣ дароз мекунад, Чеченистонро тарк карда буд. Рӯзи 17 октябр фаъоли ҳуқуқ Даниил Чебикин гуфт, ки Айшат нопадид шудааст.
Ӯ гуфт, дӯстони Айшат Боймуродова, ки бо ӯ дар як манзил зиндагӣ мекунанд, хабар додаанд, ки ӯ шоми 15 октябр аз сайругашт барнагашт. Чебикин навишт: “Вай барои мулоқот бо як дугонааш рафта буд, ки бо ӯ тавассути Инстаграм шинос шуда буд. Каме дертар маълум шуд, ки дар миёни обуначиёни дугонааш афроде ҳастанд, ки ба атрофиёни Қодиров рабт доранд”.
Чебикин навишт, ки ба Айшат бозгашти маҷбурӣ ба Чеченистон таҳдид мекунад. “Дар гузашта чунин ҳодисаҳо дар Аврупо, Гурҷистон ва минтақаҳои дигари Русия ҳам сабт шудааст, - навишт Чебикин. – Як чунин ҳодисае дар Ереван ҳам метавонист рух бидиҳад”.
Соли 2023 аз Петербург ба Чеченистон духтари дигари фирорӣ Седа Сулаймонова ҳам баргардонида шуд. Ду сол шуд ҳеҷ хабаре дар бораи ӯ нест ва ҳомиёни ҳуқуқ мегӯянд, ки эҳтимолан хешовандонаш ӯро кушта бошанд.
Дуздон аз осорхонаи "Лувр" ҷавоҳироти Наполеонро бо худ бурданд
Дар Фаронса гурӯҳи иборат аз 60 муфаттиш дар пайи боздошти гурӯҳи дуздони ҷавоҳироти беназири таърихӣ аз осорхонаи маъруфи “Лувр” мебошанд.
Ба қавли вазорати фарҳанги Фаронса, субҳи 19-уми октябр дар рӯзи рӯшан гурӯҳи муташаккилонаи дуздон худро усто вонамуд карда, тавассути зинапояи барқӣ дохили бино шуда, аз гӯшаи “Аполло” - макони нигаҳдошти ҷавоҳироти салтанатии Фаронса ҳашт нигораи бебаҳо ва аз ҷумла тоҷи ҳамсари Наполеон -маликаи Фаронса - Мария Луизаро ба яғмо бурданд.
Шоҳидони ин ҳодиса мегӯянд, ки аснои фирор дуздон тоҷро, ки аз пораҳои алмос ва дигар сангҳои гаронбаҳо оро дода шудааст, афтониданд ва эҳтимол он зиён дида бошад.
Хабаргузории Рейтерс аз корбаронаш навори ин ҷавоҳиротро дастрас намудааст. Дуздӣ боиси вокунишҳои ғазаболуд дар ҷомеаи Фаронса гардида, масъалаи амнияти муассисаҳои фарҳангиро дар маркази таваҷҷӯҳ қарор додааст.
Дар осорхонаи Лувр соли 1911-ум наққошии «Мона Лиза» ҳам рабуда шуда буд. Баъд аз ду соли тафтишот маълум шуд, ки дуздиро яке аз кормандони музей ташкил кардааст. Дузд боздошт ва наққошии бебаҳо ба ҷояш баргардонида шуд.
Роҳи Душанбе-Хуҷандро барои мусобиқаи Асҳаб Тамаев бастанд
Рӯзи 19-уми октябр мақомот барои гузарондани мусобиқаи мошинронии Асҳаб Тамаев, як блогери чечентабор як қисмати роҳи Душанбе-Чаноқро бастанд.
Хабаргузории "Азия-Плюс" аз қавли ширкати IRS навиштааст, беш аз 5 километр роҳи Душанбе-Чаноқ дар ҳудуди "Кӯли Душанбе" барои мусобиқаи мошинронии Асҳаб Тамаев баста шуд. Навори ин мусобиқа ба шабакаҳои иҷтимоӣ роҳ ёфт ва дида мешавад, ки одамони зиёде ҷамъ шудаанд.
Чанд корбари шабакаҳои иҷтимоӣ навиштанд, шоми 19-уми октябр беш аз як соат дар роҳи Душанбе-Хуҷанд дармонданд.
Дар ҳоле, ки мақомоти Тоҷикистон қаблан чандин нафарро барои ташкили пойга ё мусобиқаи мошинронӣ боздошту ҷарима кардаанд, маълум нест, ки ҳадаф аз баргузории ин гуна мусобиқа бо ҳузури Тамаев чист?
Ҳамчунин наворҳое ба шабакаҳои иҷтимоӣ роҳ ёфт, ки дар он дида мешавад, дар вақти намоиши мошинронии Асҳаб Тамаев дар як майдон курсиҳои барои мухлисон омодашуда чаппа шуда, чанд нафар аз баландӣ ба замин меафтанд. Маълум нест, ки дар ин ҳодиса чанд кас зарар дидааст.
Асҳаб Тамаев блогери шинохтаи чечентабор аст, ки қаблан низ дар чанд кишвари Осиёи Марказӣ ва Русия сабқатҳои мошинронӣ ташкил кардааст.
Шарҳи расмӣ дар бораи оташ гирифтани як коргоҳ дар Душанбе
Мақомоти Тоҷикистон сӯхтор дар як корхонаи наздик ба Фурудгоҳи Душанберо шарҳ доданд.
Шоми 19-уми октябр дуди сиёҳе аз наздикии фурудгоҳ ба фазо печид ва баъзе сокинони пойтахтро нигарон кард. Хадамоти сӯхторнишонӣ дар шарҳи расмии ҳодиса гуфт, сӯхтор соати 16:11 дар коргоҳи истеҳсоли пластикаи ширкати "Созмон" дар кӯчаи Аҳмади Дониш рух додааст.
Ба қавли манбаъ, ба ҷойи ҳодиса 11 мошини сӯхторнишонӣ ва 3 нақлиёти обкаш сафарбар шуда, оташ соати 17:44 хомӯш карда шуд.
Мақомот сабабҳои сар задани сӯхтор дар ин коргоҳро нагуфтанд ва ҳаҷми зарар ҳам маълум нест.
Солона бар асари сар задани сӯхтор ба шаҳрвандон ва корхонаҳои кишвар миллионҳо сомонӣ зарар мерасад.
Даргузашти Кароматуллоҳи Мирзо, нависандаи халқии Тоҷикистон
Кароматуллоҳи Мирзо, нависандаи халқии Тоҷикистон шоми 19-уми октябр дар 83 – солагӣ даргузашт.
Ҳамкоронаш дар Фейсбук ин хабарро нашр карда, аммо дар бора сабабҳои марги Кароматуллоҳи Мирзо чизе нагуфтаанд.
Ба гуфтаи наздиконаш, маросими видоъ бо нависанда дар зодгоҳаш деҳаи Нилкони ноҳияи Рӯдакӣ баргузор мешавад.
Кароматуллоҳи Мирзо барандаи Ҷоизаи давлатии ба номи Рӯдакӣ буд ва асарҳои зиёде иншо кардааст.
Маъруфтарин осори ӯ китобҳои "Дар орзуи падар" ва "Марги бегуноҳ" аст, ки аз рӯи ҳардуи онҳо филм таҳия шудааст.
"На бар подшоҳ". Эътирози мухолифони Трамп дар 50 аёлат
Мухолифон ва афроди норозӣ аз сиёсатҳои Доналд Трамп, раиси ҷумҳури Амрико дар 50 аёлати ИМА бо шиори "на ба подшоҳ" ба хиёбонҳо омаданд. Ҷумҳурихоҳон ин эътирозҳоро "намоиши нафрат аз Амрико" хонданд.
Хабаргузориҳои байнулмилалӣ рӯзи шанбеи 18-уми октябр шумораи муътаризонро ҳудуди ҳафт миллион нафар эълом карданд. Муътаризон аз Ню-Йорк то Лос-Анҷелес ва ҳатто дар наздикии маҳалли иқомати Трамп дар аёлати Флоридо ҷамъ шуданд.
Мақомоти аёлати Ню-Йорк шумораи ширкаткунандагон дар тазоҳуротро "беш аз 100 ҳазор нафар" ва дар Вашингтон "8 то 10 ҳазор нафар" гуфтанд. Ҳамла ба расонаҳо, мухолифони сиёсӣ ва муҳоҷирони беҳуҷҷат аз ҷумлаи интиқодҳое буд, ки аз сӯи муътаризон садо дод.
Вокуниши Трамп
Доналд Трамп мисли ҳамеша вокуниши тунде нишон дод ва чанд видеои омодашуда бо ҳуши маснуиро дар шабакаи иҷтимоии худ Truth Social пахш кард, ки ӯро дар нақши як подшоҳ нишон медод.
Дар яке аз ин наворҳо Трамп бо тоҷ бар сар ҷангандаеро идора мекунад, зоҳиран маводи нопокро бар сари муътаризон мерезад.
Ҳампаймонҳои сиёсии Доналд Трамп аз ҳизби ҷумҳурихоҳ низ муътаризонро барои ин корашон танқид карданд.
Тазоҳуроти мухолифони Доналд Трамп дар ҳоле баргузор шуд, ки давлати федероли Амрико ба далели тасвиб нашудани будҷаи Иёлоти Муттаҳида аз кор мондааст. Талошҳо барои эҷоди тафоҳум миёни ҷумҳурихоҳон ва демократҳо дар ин бора ҳанӯз ба натиҷае нарасидааст.
Толибон ва Покистон созиши оташбас имзо карданд
Ҳукумати Толибон мегӯяд, ҳайатҳои Афғонистон ва Покистон дар Қатар бар сари оташбаси комил ва маънодор ба тавофуқ расиданд.
Забеҳуллоҳ Муҷоҳид, сухангӯи ҳукумати Толибон дар шабакаи X аз талошҳои Қатар ва Туркия барои миёнҷигӣ дар ин гуфтугӯ сипосгузорӣ кард.
Муҷоҳид навишт, Афғонистон ва Покистон санадеро имзо карданд, ки бар асоси он ду кишвар ба эҳтироми тарафайн ва робитаи неки ҳамсоягӣ таъкид кардаанд.
Дар музокираи Қатар, раёсати ҳайатҳои ду кишварро вазирони дифоъ ба уҳда доштанд.
Забеҳулло Муҷоҳид гуфтааст, ду тараф тавофуқ карданд, ки ҳеч гуна иқдоми душманона алайҳи якдигар анҷом надиҳанд ва аз гуруҳҳои мухолифи ҳукумати Покистон ҳимоят накунанд.
Вазорати корҳои хориҷии Қатар низ субҳи 19-уми октябр эълон кард, ки ҳайатҳои Афғонистон ва Покистон рӯзи шанбе барои оташбаси фаврӣ тавофуқ карданд.
Таниш миёни Покистон ва Афғонистон пас аз он боло гирифт, ки нерӯҳои покистонӣ рузи 9-уми октябр бо ҳадафи нобуд кардани аъзои баландпояи толибони Покистон ба Кобул ҳамлаи ҳавои анҷом доданд.
Баъди ин чанд рӯз неруҳои марзбонии Толибон ва Покистон бо ҳам даргир шуданд. Ду тараф аз даҳҳо кушта хабар доданд.
Як дипломати пешини Русия дар Амрико зиндонӣ шуд
Додгоҳе дар Амрико як дипломати пешини Шӯравӣ ва Русияро ба дуюним соли зиндон ва пардохти 100 доллар ҷарима маҳкум кард.
Серей Шестаков ба додани маълумоти бардуруғ дар парвандаи собиқ маъмури ФБР Чарлз Макгонигал ва тоҷири рус Олег Дерипаска гунаҳкор шудааст ва иҷрои ҷазои аз моҳи феврали соли 2026 оғоз мешавад.
Ба гуфтаи мақомоти тафтишотии Амрико, Сергей Шестаков соли 2013 шаҳрвандии Амрикоро гирифта ва ба ҳайси тарҷумони расмӣ дар додгоҳҳои Амрико кор мекард. Шестаков медонист, ки додани маълумоти бардуруғ ба маъмурони Бюрои федеролии таҳқиқотии ИМА (ФБР) ҷиноят аст.
Чарлз Макгонигал, собиқ маъмури ФБР ва Сергей Шестаков ба он гунаҳкор шудаанд, ки барои кумак дар давр задани таҳримҳо ба Олег Дерипаска, сарватманди русиягӣ кумак кардаанд. Таҳримҳо алайҳи Дерипаска соли 2018 ҷорӣ шуда буд.
Соли 2023 додгоҳ Макгонигалро дар доираи парванда ба чор солу ду моҳ зиндон маҳкум карда буд.
Сергей Шестаков моҳи июни имсол ба гуноҳаш иқрор шуд ва баъди он айбномаи ӯро бекор карданд.
Исроил эълон кард, ки гузаргоҳи Рафаҳ баста мемонад
Дафтари нахуствазири Исроил рӯзи шанбеи 18-уми октябр эълом кард, ки гузаргоҳи марзии Рафаҳ миёни Навори Ғазза ва Миср то иттилои баъдӣ баста хоҳад монд.
Дар баёнияи дафтари Бенямин Нетаняҳу омадааст, "бозкушоии гузаргоҳ баъди амали "Ҳамос" дар бозгардонии ҷасади гаравгонҳои фавтида дар доираи созиши ҳосилшуда мавриди баррасӣ қарор хоҳад гирифт".
Ин хабар дар ҳоле нашр мешавад, ки Сафорати Фаластин дар Миср 18-уми октябр эълом карда буд, ки гузаргоҳи Рафаҳ рӯзи душанбеи 20-уми октябр кушода мешавад.
Ба гуфтаи Сафорат, ин гузаргоҳ ба фаластиниҳои муқими Миср иҷозаи бозгашт ба Ғаззаро хоҳад дод. Дар баёнияи ишора нашудааст ки оё кумакҳои башардӯстона низ иҷозаи убур аз ин гузаргоҳро хоҳад дошт ё на.
Аз замони тавофуқи оташбас дар Ғазза, ки 13-уми октябр бо миёнҷигии Амрико, Миср ва Қатар ҳосил шуд, рӯзона ба ҳисоби миёна 560 тонна маводи ғизоӣ вориди Ғазза шудааст. Барномаҳои ҷаҳонии ғизо эълом кардааст, ки ин кумакҳо камтар аз талаботи мавриди ниёз дар минтақа аст.
Гузаргоҳи Рафаҳ моҳи майи соли 2024 пас аз онки неруҳои исроилӣ назорати шимоли Ғаззаро ба даст гирифтанд, барои убури кумакҳо баста шуд. Ин гузаргоҳ соли 2025 дар ҷараёни як оташбаси кутоҳмуддат ба таври муваққат бозкушоӣ шуда буд.
Духтарони футболбози тоҷик ба қисми ниҳоии Ҷоми Осиё роҳ наёфтанд
Дастаи мунтахаби футболи Тоҷикистон (U-17) зери раҳбарии сармураббӣ Фарҳодҷон Холбеков дар сеюмин бозиаш дар марҳилаи интихобии Ҷоми Осиё-2026 миёни духтарони то 17-сола аз тими Сурия бо ҳисоби 0:1 мағлуб шуд.
Ин бозии даври охирини мусобиқот дар гурӯҳи “А” шоми ҷумъаи 17-уми октябр дар Варзишгоҳи марказии ҷумҳуриявии шаҳри Душанбе доир гардид. Голи ягонаро ҳамлагари суриягиҳо Нивин Боддур дар дақиқаи 47-ум ба самар расонд.
Дар бозии дигари даври сеюм дар гурӯҳи “А” дастаи мунтахаби Филиппин (U-17) бар тими Малайзия (U-17) бо ҳисоби 4:0 пирӯз гардид.
Дар марҳилаи интихобии Ҷоми Осиё-2026 миёни духтарони то 17-сола дар гурӯҳи «А» дастаҳои наврасони Тоҷикистон, Филиппин, Малайзия ва Сурия барои роҳхат ба қисми ниҳоии Ҷоми Осиё-2026 мубориза бурданд. Ҳамаи бозиҳои марҳилаи интихобӣ аз 13-ум то 17-уми октябр дар Варзишгоҳи марказии ҷумҳуриявии шаҳри Душанбе доир шуданд.
Дастаи мунтахаби Тоҷикистон (U-17) қаблан дар ду бозиаш дар марҳилаи интихобии Ҷоми Осиё-2026 аз тимҳои Малайзия ва Филиппин бо ҳисоби якхелаи 0:2 шикаст хӯрда буд.
Баъди натиҷагирии даври сеюми мусобиқот дар гурӯҳи “А” Филиппин бо 9 имтиёз ғолиб шуда, ба қисми ниҳоии Ҷоми Осиё-2026 миёни духтарони то 17-сола роҳхат гирифт.
Малайзия бо 6 имтиёз ҷойи дуюм, Сурия бо 3 имтиёз ҷойи сеюм ва Тоҷикистон бидуни имтиёз ҷойи чорумро ишғол карданд. Ҳарсе даста аз ҳаққи ширкат дар қисми ниҳоии мусобиқот маҳрум шуданд.
Марҳилаи интихобии Ҷоми Осиё-2026 миёни духтарони то 17-сола
Гурӯҳи «А»
Даври 1-ум
13-уми октябр (душанбе)
Филиппин – Сурия – 5:0
Малайзия – Тоҷикистон – 2:0
Дври 2-юм
15-уми октябр (чоршанбе)
Сурия – Малайзия – 0:1
Тоҷикистон – Филиппин – 0:2
Даври 3-юм
17-уми октябр (ҷумъа)
Филиппин – Малайзия – 4:0
Тоҷикистон – Сурия – 0:1
Мавқеи астаҳо дар ҷадвали гурӯҳи “А”
Ҷ ДАСТАҲО Б Ғ М Б Т/Т И
1 Филиппин 3 3 0 0 11-0 9
2 Малайзия 3 2 0 1 3-4 6
3 Сурия 3 1 0 2 1-6 3
4 Тоҷикистон 3 0 0 3 0-5 0
Дар марҳилаи интихобии Ҷоми Осиё-2026 миёни духтарони то 17-сола 27 даста ширкат варзид. Бар асоси қуръакашӣ ҳашт гурӯҳ ташкил шуда буд: се гурӯҳ аз чаҳор даста ва панҷ гурӯҳ аз седастаӣ иборат буданд.
Ғолибони ҳашт гурӯҳи интихобӣ – Филиппин (гурӯҳи “А”), Лубнон (гурӯҳи “В”), Мянмар (гурӯҳи “С”), Ветнам (гурӯҳи “D”), Австралия (гурӯҳи “Е”), Тайланд (гурӯҳи “F”), Ҳиндустон (гурӯҳи “G”), Тайпейи Чин (гурӯҳи “Н”) - ба қисми ниҳоии Ҷоми Осиё миёни духтарони то 17-сола, ки аз 30-юми апрел то 17-уми майи соли 2026-ум дар Чин доир мегардад, роҳ ёфтанд.
"Бо пули роҳрӯбӣ скутер харидам, ки харҷ кам шавад, аммо он ҳам манъ шуд"
Қарори манъи истифодаи скутер ё дучархаҳои барқӣ то соли 2030 дар Душанбе, соҳибони ин навъи нақлиётро нигарон кардааст. Онҳо таъкид мекунанд, ки скутерҳо ба муҳити зист зарар надорад ва дар шароити тамбашавии зиёду камбуди нақлиёти мусофирбар дар пойтахт корашонро осон карда буд.
Мақомот мегӯянд, ин тасмим барои кам кардани тасодуф дар роҳҳо муҳим буд.
Моҳсафар, сокини ноҳияи Рӯдакӣ, чанд моҳ пеш бо пули роҳрубии худ барои писараш скутери барқӣ харид. Мехост харҷи оилааш барои роҳкиро кам шавад. Писари 27 солаи ин зан бо дучарха ва бе ягон харҷи зиёдатӣ ба Душанбе равуо мекард “Бачаи ман англисӣ мехонад, роҳамон дароз аст, маблағи зиёд надорем, ки ҳар рӯз ба ӯ пул диҳам, то рафта биёяд. Инро харидам, ки аз дасти норасӣ, ҳаминро ҳай карда раваду ягон камбудиро буд кунад. Масалан вақте дору даркор аст ё бозор бояд равад, зарур аст ин.” – мегӯяд, Моҳсафар Сафарова.
Чандест писари Моҳсафар наметавонад бо скутер ба шаҳр ворид шавад. Ба ӯ гуфтаанд, бидуни қайди давлатӣ ва рақами махсус аз он истифода набарад. Мегӯяд, ҳанӯз онро ба қайд нагирифта буданд, ки истифодааш пурра манъ шуд.
Моҳсафар Сафарова афзуд: “Гуфтанд, дигар намемонанд, намедонам ҳоли зиндагии мо чӣ мешавад.”
Истифодаи "скутер" ва "самокат"-и барқӣ дар роҳҳои мошингард ва пиёдагарди шаҳри Душанбе то 5 соли оянда манъ шуд. Сабаб ҳам танзими фаъолияти бенизоми онҳо, коҳиши садамаҳо ва пешгирии халал ба ҳаракати мошинҳову пиёдагардон гуфта шудааст. Ин қарор шумори дучархаҳои барқиро дар роҳҳои пойтахт ангуштшумор ва харидори онро ҳам кам кардааст.
Абдуқаҳор Розиқов, соҳибкори бозори Корвон дар сӯҳбат бо мо гуфт, чанд рӯз боз касе ба суроғи скутерҳо намеояд: “Савдо чанд рӯз шуд нест. 20 дона оварда будем, яктояшро фурухтем ин қадараш мондагӣ аст. Харидор буд якта нимта мефурӯхтем, се чор рӯз шуд савдо нест. На харидор аст на ҳичӣ. Кадоме бинад? мегӯяд, манъ шудааст, намегирем.”
Аз ин пеш мақомот соҳибони скутерҳоро маҷбур карданд, ки нақлиёти худро аз қайд гузаронанд ва рақами давлатӣ бигиранд. Зоҳиран ин қарор натавонист ҳаракати скутерҳоро дар шаҳр ба назм орад. Тасмими манъи ҳаракати скутерҳо дар роҳу пиёдаравҳои шаҳр пас аз он гирифта шуд, ки ба иттилои мақомот садамаҳои маргбор бо ширкати чунин навъи нақлиёт зиёд шуд. Мақомот мегӯянд, аз аввали сол бо скутеру самокатҳо 26 садамаи нақлиётӣ ба қайд гирифта шудааст, ки дар натиҷа, 3 нафар ҷон бохта, 24 нафари дигар ҷароҳатҳои гуногуни ҷисмонӣ бардоштаанд. Фақат дар як ҳафтаи аввали моҳи октябр мақомот аз марги ду ронандаи скутерҳои барқӣ хабар доданд.
Коршинсон мегӯянд, роҳҳои кишвар барои ҳаракати ин навъи нақлиёт мувофиқ нестанд ва мақомотро зарур аст, то аввал барои ин шароит фароҳам оварда баъдан иҷоза диҳанд.
Абдурақиб Қодиров, коршиноси масоили роҳу нақлиёт гуфт: “Ҳанӯз масалан ба баъзе асноди ҳуқуқӣ, хусусан қоидаҳои ҳаракат дар роҳ бояд баъзе мушаххасот ворид шавад, ки ҳамин скутерҳо чӣ намуд нақлиёт ҳастанд. Аз нигоҳи меъёрҳои техникӣ. Бояд мушаххас шавад, ки роҳи ҳаракати онҳо куҷост. Роҳи пиёдагард, автомобилгар ё роҳи махсус? Ин самти масъала ҳал нашудааст. Соҳибони ин намуди воситаҳои нақлиёт синну соли гуногун доранд, ҳатто талабаҳои мактаб ҳам ҳастанд.Ҳатто дар дохили боғҳои фарҳангиву фароғатӣ ҳам истифода мекунанд.”
Таҳлилгар мегӯяд, скутерҳои барқӣ зуд суръат мегиранду, на ҳамеша имкони сари вақт боздоштани онҳ мавҷуд аст. Касе, ки қобилияти вокуниши сареъ надорад, метавонад ба хатар рӯ ба рӯ шавад.
Шафқат Аҳмадов, ки чанд сол боз дар шабакаҳои иҷтимоӣ ба фурӯшу иҷораи скутерҳо машғул буд, мегӯяд, беҳтар буд, истифодаи ин навъи нақлиётро фақат барои афроди то 18 сола манъ мекарданд.
“Кори бисёр одамонро осон мекард, баъзеҳо барои мағоза рафтан истифода мебурданд. Ҳастанд онҳое, ки хонаҳояшон аз мағоза дур аст. Скутерҳои калон барои мардум дар хоҷагии деҳқонӣ кӯмаки беандоза мерасонад. Баъзеҳо ба кор мераванд.”- Шафқат Аҳмадов, скутерфурӯш
Манъи истифодаи скутерҳо дар Тоҷикистон дар ҳолест, ки сокинон, аз танбашавӣ дар роҳҳо ва камбуди нақлиёту гаронии роҳкиро шикоят мекунанд. Чанде аз ҳамсуҳбатони мо гуфтанд, хуб аст, агар қарори пурра манъ кардани ин навъи нақлиёт бознигарӣ шавад.
Гуфтугӯ