Вазорати корҳои дохилии Тоҷикистон навори зоҳиран бозпурсии яке аз шоҳидони садамаеро нашр кард, ки дар он Дамирбек Олимов, ҳунарманди шинохта дар ҳудуди ноҳияи Бобоҷон Ғафуров ба ҳалокат расида буд.

Дар ин навор Муқимҷон Юсупов, ки шаби ҳодиса ҳамроҳи Дамирбек Олимов қарор доштааст, дар посух ба суоли корманди БДА мегӯяд, “онҳо нушидагӣ набуданд” ва замони ҳодиса овозхон аз телефони мобилиаш мусиқӣ гуш мекард. Ба гуфтаи ӯ, онҳо аз шабнишиние аз самти шаҳри Гулистон ба Хуҷанд меомаданд.

“Суръати ҳаракат тақрибан 100 буд”,--гуфт ӯ дар посух ба суоли корманди БДА.

Ин садама соати 01:00-и шаби 5-уми феврал дар роҳи мошингарди “Хуҷанд-Сомғор” ба вуҷуъ пайваст, ки ҳунарманди 33-сола ҳалок ва ду ҳамроҳаш ҷароҳат бардоштанд. Вазорати корҳои дохилии Тоҷикистон мегӯяд, ронанда Дамирбек Олимов “бехатарии ҳаракати роҳро таъмин карда натавониста, аз роҳи мошингард ба қисмати шағалпӯши ҳамшафати роҳ ва баъдан ба саҳрои пайваста ба роҳи мошингард баромада, якчанд маротиба чаппа шудааст.”

Гузориши видеоӣ дар бораи Дамирбек Олимовро инҷо тамошо кунед:

Embed ба дигарон фиристед

Марги Дамирбек. Шарҳи ВКД ва хотираи дӯстон

Embed ба дигарон фиристед

Нусхабардорӣ шуд

---

бар px баландӣ px

---

URL нусхабардорӣ шуд

Феълан кор намекунад

0:00 0:07:39 0:00

Дамирбек Олимов, овозхони 33-солаи тоҷик соли 2011 бо таронаи "Зулфони майда дорӣ" рӯйи саҳна омад ва дертар бо таронаи "Дунё" машҳур шуд.

Дамирбек Олимов ба ҷуз аз таронаҳои муосир, шашмақом низ мехонд ва узви гуруҳи шашмақомхонҳои "Нури Хуҷанд" буд. Ӯ бо таронаҳои якҷояаш (Мавригӣ) бо овозхон Нигина Амонқулова ба саҳнаҳои калон роҳ ёфт. Чанде пеш ҷоизаи "Тарона", тарҳи мусиқии "Азия-Плюс"-ро соҳиб шуда буд.

Ӯ зодаи ноҳияи Деваштичи вилояти Суғд ва фарзанди Ботурбек Олимов, ҳунарманди шинохта дар минтақа аст. Дамирбек Олимов аз худ се фарзанду даҳҳо суруд гузошт. Охиринаш "Бачагӣ" буд, ки бар матни шоири шинохта, Толиб Озарахш, омода шудааст.

Мушаки баллистикие, ки аз Яман партоб шуда буд, субҳи якшанбеи 4-уми май ба фурудгоҳи Бен-Гуриони Исроил афтид. Ба гузориши расонаҳои исроилӣ, дастикам як кас маҷруҳ шуда, роҳи мошингузар хароб шудааст.

Расонаҳои Исроил навори лаҳзаи таркишро пахш карданд.

Артиши Исроил аз талошҳо барои безарар кардани мушак хабар дода, дар айни замон тасдиқ кардааст, ки афтидани мушак дар маҳалли фурудгоҳ сабт шудааст. Дар хабари расмӣ омадааст ҳодиса таҳқиқ мешавад. Фурудгоҳи байнулмилалии Бен-Гурион муваққатан корашро қатъ кардааст.

Ҳусиҳои Яман, ки аз сӯи Эрон пуштибонӣ мешаванд, бо талаби поёни ҷанг дар Ғазза, борҳо ба самти Исроил мушак партоб кардаанд. Исроил ҳам чанд маротиба ба макони Ҳусиҳо дар Яман ҳамла кардааст. Ахиран неруҳои ИМА ҳам ба Ҳусиҳо ҳамла карданд.

Тарҳи "Зистан мехоҳам" (Хочу жит) номи 170 шаҳрванди Туркманистонро муайян кардааст, ки аз тарафи Русия алайҳи Украина меҷанганд. Тибқи рӯйхат 27 нафари онҳо кушта шудаанд.

Тарҳи “Зистан мехоҳам” (Хочу жит), ки тарҳи давлатии Украина аст, пештар номи шаҳрвандони чор кишвари дигари Осиёи Марказиро нашр карда буд, ки зидди Украина ҷангидаанд. Дар рӯйхат номи 931 шаҳрванди Тоҷикистон, 1110 узбекистонӣ, 661 қазоқистонӣ ва 360 табааи Қирғизистон зикр шудаанд.

Дар умум, тибқи омори тарҳи “Зистан мехоҳам” 3232 шаҳрванди кишварҳои Осиёи Марказӣ аз тарафи Русия ба ҷанги зидди Украина фиристода шудаанд. Ба навиштаи ин тарҳ, зодагони Осиёи Марказӣ асосан бо ваъдаҳои маоши баланд ё таҳдид ба артиши Русия ҷалб карда мешаванд.

Тарзи ҷалби муҳоҷирон аз Осиёи Марказӣ ҳам нав нест. Онҳоро дар ҷараёни амалиёт боздошт карда, бо таҳдиди рондан аз Русия ба бастани қарордод маҷбур мекунанд.

Рӯзи 23-юми апрел тарҳи “Зистан мехоҳам” омори зархаридони тоҷикро дар сафи нерӯҳои мусаллаҳи Русия нашр карда буд. Ба ҳисоби ин тарҳ, 931 зодаи Тоҷикистон аз соли 2022 то моҳи январи соли 2025 ба таври қарордодӣ аз тарафи Русия ба зидди Украина ҷангидаанд.

Бар асоси феҳраст, аз 931 зодаи Тоҷикистон то моҳи январи соли 2025-ум 196 нафар кушта шудаанд.

Вазорати дифои Украина аз сарнагун кардани як ҳавопаймои тирандози Су-30-и Русия хабар додааст. Ба гуфтаи ин ниҳод, ин ҳавопаймо наздики 50 миллион доллар арзиш дорад.

Ҳавопаймои русӣ шаби 3-юми май бар фарози Баҳри Сиёҳ нобуд шудааст. Ба хабари идораи истихборотии Вазорати дифои Украина, ҳавопаймои Су-30 тариқи мушаке сарнагун шуд, ки аз киштии ҳарбии "Магура" шиллик шуда буд.

Вазорати дифои Русия ҳанӯз ба ин хабар вокуниш накардааст. Аммо телеграм-каналҳои наздик ба мақомоти Русия сарнагун шудани ҳавопаймои Су-30-ро тасдиқ кардаанд. Азҷумла телегр-канали "Рибар" навиштааст, ин ҳавопаймо аз сӯи неруҳои Украина нобуд шудааст.

Дар ҳамин ҳол Владимир Зеленский, раиси ҷумҳури Украина 3-юми май дар муроҷиати видеоӣ гуфт, дар вақти ҳуҷум ба нимҷазираи ишғолии Қрим, боз як ҳавопаймои Русия нобуд шудааст. Тасдиқи дурустии ин маълумот феълан дар даст нест.

Нахуствазири Исроил Бенямин Нетаняҳу сафарашро ба Озарбойҷон ба таъхир гузошт. Қарор буд Нетаняҳу 7-уми май ба Озарбойҷон рафта, чор рӯз онҷо монад. Аммо дар пасманзари омодагӣ ба ҳуҷуми нави Исроил ба Навори Ғазза ва бад шудани робита бо Туркия, сафари Нетаняҳу ба қафо афтид.

Дафтари нахуствазири Исроил бегоҳи 3-юми май дар хабарномае навишт, "бо таваҷҷуҳ ба рӯйдодҳои навори Ғазза ва Сурия" ва "ба далели чорабиниҳои сиёсӣ" ин сафар ба вақти баъдтар гузошта шуд. Аммо санаи дақиқи сафари Нетаняҳу ба Озарбойҷон хабар дода нашудааст.

Шаби 3-юми май артиши Исроил ба чанд мавқеъ дар Сурия зарба задааст. Рӯзномаи The Times of Israel навишт, артиш ба иншоотҳои низомӣ, анбор ва маҷмааҳои мушакӣ ҳамла кардааст.

Дидбони ҳуқуқи башари Сурия мустақар дар Лондон хабар додааст, ки артиши Исроил ба 20 мавқеъ дар Сурия зарба задааст. Ин бузургтарин ҳамлаи Исроил ба Сурия дар соли 2025 гуфта мешавад.

Бошгоҳи футболи "Ал-Аҳлӣ"-и шаҳри Ҷиддаи Арабистони Саудӣ бори аввал дар таърихи худ ғолиби Лигаи қаҳрамонҳои Осиё гардид.

Дастаи "Ал-Аҳлӣ" дар бозии ниҳоии мусобиқа, ки 3-юми май дар вазишгоҳи "Шоҳ Абдуллоҳ Спортс Сити"-и Ҷидда доир гардид, бар тими "Кавасаки Фронтале"-и Ҷопон бо ҳисоби 2:0 ғалаба кард.

Ҳарду гол дар нимаи аввали дидор зада шуд. Ҳамлагари бразилӣ Вендерсон Галено дар дақиқаи 35-ум ҳисобро кушод. Голи дуюми арабҳоро нимҳимоятгари африқоӣ аз Кот-д'Ивуар Франк Кессиэ баъди ҳафт дақиқа ба самар расонд. Дар ҳарду ҳолат ҳам голҳо бо кӯмаки собиқ бозигари бошгоҳи "Ливерпул"-и Англия Роберто Фирмино зада шуд.

Бояд зикр намуд, дар даври ниманиҳоӣ "Ал-Аҳлӣ" бар тими "Ал-Ҳилол"-и Арабистони Саудӣ бо ҳисоби 3:1 ва "Кавасаки Фронтале" бар дастаи «Ал-Наср»-и Арабистони Саудӣ бо ҳисоби 3:2 пирӯз шуда буданд.

Бошгоҳи "Ал-Аҳлӣ", ки соли 1937 таъсис ёфтааст, дар ҳамин ҳол зери раҳбарии сармураббӣ Маттиас Яйссле, мутахассиси 37-солаи олмонӣ, дар ҷадвали Лигаи бартари Арабистони Саудӣ бо 58 имтиёз аз 29 бозӣ зинаи панҷумро касб кардааст.

“Ал-Иттиҳод” бо 68 имтиёз дар ҷойи аввал, “Ал-Ҳилол” бо 62 имтиёз дар ҷойи дуюм ва “Ал-Наср” (дар ҳайаташ Криштиану Роналду бозӣ мекунад) бо 60 имтиёз дар ҷойи сеюм қарор доранд.

Дар пайи офатҳои табии рӯзи 2-юми май дар Тоҷикистон, ду нафар ба ҳалокат расида, чанд роҳ ва хонаҳо осеб дидаанд.

Ба иттилои Кумитаи ҳолатҳои фавқуллода, як сокини 25-солаи ноҳияи Деваштич ҳангоми чарондани чорво "бар асари ҳавои номусоид ва раъду барқ аз расиши барқ ба ҳалокат расидааст." Ҳодиса соати 3-и шаб рух додааст.

Манбаъ мегӯяд, фавтидаи дуюм Ҷалолиддини Акбаралӣ, сокини 12-солаи ноҳияи Ёвон мебошад. Ин наврасро ҳангоми чарондани чорво сел бурдааст. Мақомот мегӯянд, ҷасади ӯро то ҳол пайдо накардаанд.

Рӯзи 2-юми май ҳамчунин як духтари 18-сола ҳангоми аксгирӣ ба дарёи Сир афтидааст. Намояндагони Кумитаи ҳолатҳои фавқуллода ин духтарро аз об зинда берун овардаанд.

Ба гуфтаи мақомот, дар пайи боридани борони зиёд ва омадани сел чанд роҳ ва хонаҳои сокинон ҳам зарар дидааст. Азҷумла дар роҳи Айнӣ-Панҷакент сел ва сангреза фаромада, роҳ муваққатан баста шудааст. Мақомот мегӯянд, роҳро кушодаанд.

“Ҳамчунин дар деҳаи Хушекати ҷамоати деҳоти Айнӣ, сел ба заминҳои наздиҳавлигӣ, ҷуйборҳои оби полезӣ, роҳои дохилӣ ва иншооти ёрирасон ворид гардида, зарар расонд,”-омадааст дар хабарномаи расмӣ.

Дафтари матбуоти Кумитаи ҳолатҳои фавқуллода мегӯяд, дар пайи омадани сел дар километри 290-и роҳи Душанбе-Хоруғ, ин масир муваққатан баста шуд. Ин роҳ барои баъзе намуд нақлиётҳо боз шудааст.

Дар ҷамоатҳои Чоргул ва Даҳанаи ноҳияи Ёвон низ сел ба хонаҳо даромадааст.

Дар наворҳое, ки сокинон ба Радиои Озодӣ фиристоданд дида мешавад, ки дар чанд минтақаи дигар, азҷумла вилояти Хатлон ва ноҳияи Куҳистони Мастчоҳи вилояти Суғд низ сел омадааст. Баъзе сокинон шикоят доранд, ки аз мақомот кӯмаки зарурӣ дарёфт накардаанд.

Аксҳоро корбарони Радиои Озодӣ аз деҳаи Хушекати ноҳияи Айнӣ фиристодаанд:

Раисҷумҳури Амрико ҳушдор дод, ҳар кишваре ё шахсе аз Эрон нафт бихарад, таҳрим хоҳад шуд ва наметавонад бо Иёлоти Муттаҳида тиҷорат кунад. Ҳушдори Доналд Трамп пас аз он нашр шуд, ки музокироти барномарезишуда барои ҳаллу фасли барномаи ҳастаии Эрон дар рӯзи шанбе, ба таъхир афтод.

Президенти Трамп рӯзи ҷумъа дар "Truth Social"-и худ навишт, "ҳама хариди нафт ё маҳсулоти петрохимиявии Эрон бояд ҳамин ҳоло қатъ шавад". Ӯ афзуд, "ҳар кишваре ё шахсе, ки ҳар миқдор нафт ё маҳсулоти петрохимиявӣ аз Эрон харидорӣ кунад, фавран шомили таҳримҳо хоҳад шуд ва ба ҳеч ваҷҳ ва ҳеч шакле наметавонад бо ИМА тиҷорат кунад".

Ба гузориши хабаргузории "Ассошиэйтед пресс", маълум нест президенти Амрико қарор аст чигуна ин мамнуиятро амалӣ кунад. Ӯ пештар низ таҳдид карда буд, ки алайҳи кишварҳое, ки аз Эрон нафт ворид кунанд, таҳримҳои дигар ҷорӣ хоҳад кард.

Ҳушдори Трамп хатари афзоиши танишҳо бо Чинро дар пай дорад, ки муштарии асосии нафти Эрон аст. Он ҳам дар замоне, ки робитаҳои ду кишвар бинобар ҷанги таърифаҳои дуҷониба, печидатар шудааст.

Раисҷумҳури Амрико таърифа ё боҷи гумрукии 145-дарсадӣ бар молу колоҳои Чин ҷорӣ кардааст, то ҳам даромадҳои Амрикоро афзоиш диҳад ва ҳам сатҳи тиҷорат бо Чинро кам кунад.

Таҳдиди Трамп соате пас аз он сурат гирифт, ки кишвари арабии Умон эълон кард, музокироти ҳастаии барномарезишуда барои 3 май байни Эрон ва Амрико, ба таъхир афтодааст.

Бадр Ал-Бусаъийдӣ, вазири корҳои хориҷии Умон бо нашри ин матлаб дар шабакаи Х навишт, "мо бинобар сабабҳои логистикӣ дар ҳоли барномарезии нишасти Амрико ва Эрон ҳастем. Замони нав дар сурати созиши дуҷониба, эълон хоҳад шуд".

Вазири корҳои хориҷии Умон, ки то кунун се давр аз гуфтугӯҳоро миёнаравӣ кардааст, ҷузъиёти бештаре ироа накард.

Аббос Ароқчӣ, вазири корҳои хориҷии Эрон низ, сабаби ба таъхир афтодани ин музокиротро "фаннӣ" гуфт.

Гуфтугӯҳо байни ду кишвар аввали моҳи апрел оғоз шуд ва ҳайати Эронро дар ин музокирот вазири хориҷии Ҷумҳурии исломӣ Аббос Ароқчӣ ва ҷониби Амрикоро фиристодаи вижаи он кишвар дар умури Ховари Миёна Стив Виткофф, раҳбарӣ мекунанд.

Раисҷумҳури Амрико борҳо таҳдид кардааст, ки дар сурати даст наёфтан ба созиш, Эрон бамборон хоҳад шуд. Аммо ҳамчунин ишора кардааст, ки созиш бе бамборон ба даст хоҳад омад.

Замир Кобулов, намояндаи вижаи Русия барои Афғонистон мегӯяд, Маскав омодааст, ки дар мубориза алайҳи гурӯҳи "Давлати исломӣ" ё ДОИШ, бо ҳукумати Толибон ҳамкорӣ кунад. Ӯ ба хабаргузории русии РИА Новости гуфтааст, ки ДОИШ душмани муштараки Кобул ва Маскав аст.

Замир Кобул афзуд, ки Русия аз муборизаи ҳукумати Толибон алайҳи "Шохаи Хуросон"-и ДОИШ, ситоиш мекунад. Намояндаи вижаи Русия дар умури Афғонистон бидуни додани ҷузъиёти бештар гуфт, ки Русия аз роҳҳои махсус бо мақомоти Толибон дар ин замина кӯмак ва ҳамкорӣ хоҳад кард.

Владимир Путин, раисҷумҳури Русия низ дар изҳороти соли гузаштаи худ ҳукумати Толибонро шарик ва муттаҳиди Русия дар мубориза алайҳи терроризм хонда буд.

Ҳанӯз ҳеч кишвари ҷаҳон ҳукумати Толибонро ба расмият нашнохтааст, вале Маскав бо доштани робитаҳои наздиктар бо Толибон, моҳи гузашта номи ин гурӯҳро аз феҳрасти созмонҳои террористӣ берун кард.

Замир Кобулов дар ин мусоҳиба ба хабаргузории РИА Новости гуфтааст, ки Маскав ва Кобул талош доранд, робитаҳои худро дар арсаҳои гуногун беҳбуд бахшанд ва Русия ба Толибон пешниҳод кардааст, ки сафири худро ба Маскав бифиристанд ва мунтазири посухи Толибон ба ин пешниҳод аст.

Аз замони ба сари қудрати омадани Толибон дар августи соли 2021, то кунун ҳеҷ кишвари ҷаҳон ҳукумати ин гурӯҳро ба расмият нашинохтааст. Толибон аз сӯи ҷомеаи ҷаҳонӣ барои нақзи ҳуқуқи башар, маҳдуд кардани озодии баён ва манъи занону духтарон аз кору таҳсил, танқид мешаванд.

Раисҷумҳури Амрико фармони қатъи буҷаи Радиои миллии Амрико (NPR) ва Телевизиони оммаи Амрикоро (PBS) имзо кард.

Доналд Трамп бо имзои як фармони иҷроӣ, ба Ширкати нашароти умумӣ(CPB), ки буҷаи ин расонаҳоро таъмин мекунад, дастур дод, ки буҷаи ин расонаҳои давлатиро қатъ кунад.

Ба гузориши хабаргузории "Ассошиэйтед пресс", ин фармон ба Ширкати нашароти умумӣ(CPB) ва дигар идораҳои федеролӣ дастур медиҳад, ки буҷаи федерол барои Радиои миллии Амрико (NPR) ва Телевизиони оммаи Амрико (PBS)-ро мутаваққиф кунад.

Фармони иҷроии раисҷумҳур Трамп ҳамчунин ин идораҳоро вазифадор мекунад, ки барои решакан кардани манбаъҳои ғайримустақими таъмини молии умумӣ барои расонаҳои хабарӣ, талош кунанд.

Раисҷумҳури Амрико сабаби ин иқдоми худро гузоришҳои якҷонибаи ин расонаҳо хондааст.

Буҷаи ин ду расонаи давлатии Амрико ҳудуди ним миллиард доллар гуфта шудааст.

Мурофиаи додгоҳии ниҳоии Алишер Махсудов рӯзи 29 апрел дар додгоҳи Исмоили Сомонии пойтахт сурат гирифт. Додгоҳ бар асоси даъвои айбдоркунандаи давлатӣ ӯро бар асоси моддаҳои 307, қисми 1 ва қисми 2 (тундгароӣ) ва моддаи 401 (зархаридӣ) гунаҳгор эълон кард.
Талоши Радиои Озодӣ барои гирифтани шарҳи масъулин дар додгоҳ, додситонӣ ва сохторҳои умури дохилӣ бенатиҷа буд. Касе ба зангҳои хабарнигор ҷавоб надод.

Дар ҳамин ҳол, волидон Махсудов мегӯянд, онҳоро ба мурофиаи ниҳоӣ, ки қарори додгоҳ он ҷо эълон шуд, роҳ надоданд ва шоҳидони онҳоро бо сабаби ин ки гӯё дар ноҳияҳои дурдаст зиндагӣ мекунанд, ба мурофиа даъват накарданд.

Саидаҳмади Бобоҷон, яке аз наздикони Алишер Мақсудов дар Аврупо рӯзи 30-уми апрел дар сӯҳбат бо Радиои Озодӣ ҳукми додгоҳро “ноодилона” хонд ва гуфт, ҳатман ба зинаи болоии додгоҳ шикоят хоҳанд бурд.

Вай мегӯяд, Алишер ба ҳарфҳои Раёсати мубориза бо ҷиноятҳои созмонёфтаи (УБОП) ВКД бовар карду бо пешниҳоди ин ниҳод ариза навишта аз Узбекистон ба Тоҷикистон омад. Нусхаи аризаи ӯ дар ихтиёри Радиои Озодӣ ҳаст.

Ба нақли пайвандони Алишер Махсудов, дар ибтидо вай бар асоси моддаи 307 иловаи 3 қисми 2 «Иштирок дар фаъолияти ҳизбҳои сиёсие, фаъолияташ дар Тоҷикистон манъ карда шудааст» гумонбар буд, вале вақте ба Тоҷикистон омад, боз як банди дигари «тундгароӣ» изофа карда шуд. Онҳо мегӯянд, замоне, ки тафтиши қазияашро мақомоти амниятӣ идома дод. боз моддаи 401 қисми 1 «зархаридӣ» изофа карда шуд.

Саидаҳмади Бобоҷон мегӯяд, муфаттишони амният ӯро гӯё дар узвият дар созмони мамнӯи “Салафия” ва ширкат дар ҷанги Сурия гумонбар намуданд, дар ҳоле, ки, ба бовари Бобоев, ҳеҷ гоҳ ба онҷо нарафатааст ва солеро, ки мақомот чун дар Сурия будани ӯ ишора кардаанд, дар Тоҷикистон зистааст.

Ба нақли Бобоҷон, Махсудов дар ибтидо ба Русия рафт ва аз он ҷо соли 2021 ба Лаҳистон, баъдан ба Олмон рафт. Вақте дархости паноҳандагиаш пазируфта нашуд, ба Тоҷикистон баргашт ва аз он ҷо боз ба Русия рафта ба Тошканд сафар кард.

Вай мегӯяд, замоне, ки Алишер дар Русия буд, мақомоти интизомии Тоҷикистон чанд нафар аз ҳамхонаҳояшро бо ҷурми салафӣ боздошт намуда ба Тоҷикистон истирдод ва онҳо дар баёноти худ номи ӯро зикр намуданд. Мақомот бо такя ба ин маълумот ба вай пешинҳод кардаанд, ки баргардаду бегуноҳияшро собит кунад ва бар асоси он бахшида хоҳад шуд.

Саидаҳмади Бобоҷон мегӯяд, аз болои ин ҳукм шикоят хоҳанд бурд.

Алишер Махсудов фарзанди панҷуми хонавода аст ва, ба қавли наздиконаш, дар Русия дар бозори “Садовод” бо савдо машғул шудааст.

Рӯзи 2 май бо як фармони президенти Тоҷикистон Директори генералии ҶСК “Фурудгоҳи байналмилалии Душанбе” Исматулло Абдуллозода ва муовинони ӯ дар робита ба санҷиши молиявӣ ва ошкор шудани камбудиҳои ҷиддӣ дар фаъолияташон аз вазифаҳо озод карда шуданд. Дар ин бора сомонаи президенти Тоҷикистон хабар додааст.

Вале хабари расмӣ ба ҷуз ин ҷумла, ҷузъиёти бештаре пешниҳод намекунад ва маълум нест, ки манзур аз “камбудиҳои ҷиддӣ” чӣ аст.

Абдуллозода январи соли 2016 бо фармони президент Эмомалӣ Раҳмон ба вазифаи раиси фурудгоҳи пойтахт таъин шуда буд. Феълан маълум нест, ки сарнавишти баъдии ӯ ва муовинони барканоршудааш чӣ мешавад ва то куҷо санҷиши молӣ роҳро барои таҳқиқи ҷиноии парванда боз мекунад.

Бо қарори президент, ба ҷои ӯ ба мақоми директори генералии ҶСК «Фурудгоҳи байналмилалии Душанбе» Зайнулло Шарифзода таъин карда шуд. Шарифзода як соли охир дар мақоми мудири Оҷонси хариди давлатии мол, кор ва хидматрасонии Тоҷикистон кор мекард. Вале исми ӯ бештар бо сабаби хешовандони президент буданаш маъруф аст.

Зайнулло Шарифзода аз хонаводаи Соҳибовҳо аст, ки бо президенти Тоҷикистон Эмомалӣ Раҳмон риштаи хешутаборӣ доранд. Амаки Зайнулло - Маҳмадзоир Соҳибов бо духтари калонии президент - Фирӯза Раҳмонова ва бародари Зайнулло - Шамсулло Соҳибов бо духтари панҷуми Эмомалӣ Раҳмон - Рухшона Раҳмонова издивоҷ кардаанд.

Бародарзодаи президент, бародари Раҳимзода ва таъиноти дигар

Дар ҳамин рӯз президент инчунин чандин тағйироти дигареро дар вазифаҳои раҳбарии сохторҳои мисли Вазорати дифоъ, вазорати меҳнат ва муҳоҷират, Бонки миллӣ ва дигар сохторҳо анҷом дод.

Аз ҷумла, Исломиддин Раҳмони 41-сола Директори Агентии стандартизатсия, метрология, сертификатсия ва нозироти савдо таъин шудааст. Ӯ бародарзодаи президент Эмомалӣ Раҳмон буда, апрели соли 2024 раиси Хадамоти зиддиинҳисорӣ (зиддимонополӣ)-и Тоҷикистон таъйин шуда буд. То он замон дар мақоми раиси ноҳияи Данғара ҳам кор кардааст.

Инчунин бо фармони президент аз 2 май, Раҳмоналӣ Раҳимзода бо сабаби ба нафақа баромадан аз вазифаи муовини якуми директори Агентии назорати маводи нашъаовари назди президенти Тоҷикистон озод гардид. Раҳимзода, ки бародари вазири корҳои дохилии Тоҷикистон Рамазон Раҳимзода мебошад, дар ин вазифа як сол кор кардааст.

Ба навиштаи сомонаи президенти Тоҷикистон, Муҳиддин Каримзода фармондеҳи Қӯшунҳои хушкигарди Қувваҳои мусаллаҳи Тоҷикистон, Далер Муродализода - муовини раиси Бонки миллии Тоҷикистон, Иноятулло Абдурраҳмонзода - муовини вазири мудофиа оид ба ақибгоҳ, Ҳайдаралӣ Раҷабзода - сардори Хадамоти зиддиинҳисорӣ, Насимҷон Каримзода - муовини якуми вазири меҳнат, Зоҳир Олимзода - муовини якуми раиси Кумитаи телевизион ва радио таъин шуданд.

Сомонаи президент рӯзи 2 май навишт, "дар мувофиқа бо президенти Тоҷикистон ба вазифаҳои роҳбарӣ ва фармондеҳӣ дар сохторҳои Вазорати мудофиа ва Қӯшунҳои сарҳадӣ кадрҳои ҷавону варзидаи соҳибтахассуси ин соҳаҳо таъин гардиданд."

Вале сиёсати таъиноти кадрӣ дар ҳукумати Тоҷикистон аз назари набуди шаффофият, шеваи интихоби кадрҳо, собиқаи кориву касбияти шахсиятҳо, наздикии онҳо ба хонаводаи президент ва афроди бонуфуз мавриди танқид мебошад.

Мухолифон ҳамеша тағйироти кадриро дар идораҳои давлатии Тоҷикистон танқид карда, мегӯянд, он бештар аз ҷойивазкунии кадрҳои куҳна иборат аст.

Аз 1-уми май фурудгоҳи "Внуково"-и Маскав ба ҷамъоварии маълумоти биометрии муҳоҷирон шурӯъ намуд. Дар ин бора Ирина Волк, сухангӯи ВКД-и Русия, дар саҳифаи Телеграммаш хабар додааст.

Ба таъкиди Ирина Волк, моҳияти озмоиш аз он иборат аст, ки шаҳрвандони хориҷӣ ва шахсони бешаҳрвандӣ ҳангоми убури марзи Русия тавассути фурудгоҳҳои байналмилалии минтақаи Маскав ва гузаргоҳи автомобилии Маштаковои вилояти Оренбург бояд акс ва изи ангуштонашонро супоранд.

Ин таҷриба моҳи декабри соли гузашта бо ибтикори Вазорати умури дохилии Русия оғоз ёфта, ҳадаф ҷилавгирӣ аз вуруди шахсони хатарнок ба Русия унвон мешавад. Ирина Волк мегӯяд, дар ҷараёни роҳандозии ин озмоиш аллакай 2 миллиону 700 нафар аз расмиёти биометрӣ гузашта ҳудуди 21 ҳазор муҳоҷиреро, ки барои вуруд ба Русия маҳдудият доранд ва ё дар ҷустуҷӯ қарор доштанд, шиносоӣ намуданд.

Аксар муҳоҷирони тоҷик низ ҳангоми сафар аз фурудгоҳи "Внуково" истифода мекунанд. Ҳафтаи ҷорӣ корбарони Радиои Озодӣ хабар доданд, ки тақрибан 20 муҳоҷири тоҷикро аз ин фурдгоҳ ба ватан бозпас фиристоданд.

Мақомоти ИМА 131 шаҳрванди Узбекистон, Қазоқистон ва Қирғизистонро ба Тошканд ихроҷ карданд. Мақомоти Узбекистон инро аз иқдомҳое барои таъмини ҳуқуқи шаҳрвандонашон ном бурдаанд, ки дар "вазъияти мушкил дар хориҷа" қарор доранд.

Парвоз аз Ню-Йорк ба Тошканд рӯзи 30-юми апрел тавассути ширкати ҳавопаймоии Узбекистон сурат гирифтааст.

Дар изҳороти Вазорати амнияти дохилии Амрико гуфта мешавад, ки парвози мазкур пурра аз ҳисоби Узбекистон анҷом шудааст. Чунин ба назар мерасад, ки ихроҷҳо аввалин чунин тавофуқ байни Иёлоти Муттаҳида ва ҳукумати хориҷӣ пас аз ба қудрат расидани президент Доналд Трамп дар моҳи январ мебошад.

Котиби матбуотии Вазорати корҳои хориҷии Ӯзбекистон Аҳрор Бурхонов дар шабакаи иҷтимоӣ навишт,"сухан дар бораи шаҳрвандоне меравад, ки низоми раводидро вайрон кардаанд ё мӯҳлати будубоши қонунии онҳо дар ИМА ба охир расидаанд".

Ҳарчанд ин мақомдори узбек мушаххс нагуфт, ки чӣ теъдоде аз ихроҷшудаҳоро шаҳрвандони Узбекистон ташкил медиҳанд, аммо афзуд, раванди бозгашт ба ватан “бар асоси унсурҳои башардӯстона ва ҳуқуқӣ, ки бозгашти шоиста ва бехатари шаҳрвандонро таъмин мекунад, ба роҳ монда мешавад".

Пас аз ба кор пардохтани Трамп дар рӯзи 20 январ, алайҳи муҳоҷирати ғайриқонунӣ муборизаи сахте ба роҳ монд. Баъди ин дар шаҳрҳои гуногун садҳо рейд анҷом дода, ҳазорон муҳоҷир боздошт шуданд. То кунун исми 149 шаҳрванди Тоҷикистон ҳам ба рӯйхати онҳое ворид шудааст, ки бояд аз Иёлоти Муттаҳидаи Амрико ихроҷ ё депорт шаванд.

Мақомоти маҳаллӣ дар Украина мегӯянд, ки дар ҳамлаи як ҳавопаймои бесарнишини Русия дар шоми 1 май, як нафар дар шаҳри Запороже кушта ва дастикам 14 нафар захмӣ шуданд.

Иван Фёдоров, раиси ин вилоят дар "Телеграм" навишт, нерӯҳои русӣ дастикам даҳ ҳамла ба Запороже анҷом доданд.

Ба гуфтаи ӯ, дар ин ҳамлаҳо, хонаҳои шахсӣ, биноҳои баландошёна, ниҳодҳои омӯзишӣ ва зерсохтҳо, ҳадаф қарор дода шуданд.

Дар наворҳое, ки дар шабакаҳои иҷтимоӣ нашр шудааст, оташсӯзӣ дар як бинои истиқоматӣ дида мешавад.

Русия пеш аз ин ҳамлаи густурдаеро ба паҳбод ё ҳавопаймоҳои бесарнишин анҷом дода буд.

Дар ҳамлаи Русия дар рӯзи 30 апрел, дастикам ду нафар дар Одесса, кушта шуданд.

Як мақоми баландпояи Эрон рӯзи 1 май ба хабаргузории "Рейтерз" гуфт, ки даври чаҳоруми гуфтугӯҳо миёни Амрико ва Эрон, ки қарор буд 3 май дар шаҳри Рим, пойтахти Италия баргузор шавад, ба таъхир афтодааст. Ин манбаъ, ки аз ӯ ном бурда нашудааст, гуфта, ки таърихи нави баргузории ин гуфтугӯҳо аз "амалкарди Амрико", вобаста аст.

Ӯ ҳамчуни гуфтааст, ки таҳримҳои Амрико бар Эрон дар ҷараёни музокироти ҳастаӣ, ба тарафҳо кӯмак намекунад танишро аз тариқи дипломатӣ ҳал кунанд.

Кишвари арабии Умон, ки дар гуфтугӯҳои қаблӣ байни Эрон ва Амрико нақши миёнаравро иҷро кардааст, рӯзи 1 май гуфт, даври баъдии гуфтугӯҳои ҳастаӣ, ки барои 3 май барномарезӣ шуда буд, ба "сабабҳои логистикӣ", дубора барномарезӣ хоҳад шуд.

Дар ҳамин ҳол, як манбаи огоҳ ба хабаргузории "Рейтерз" гуфтааст, ки Амрико иштирокашро дар даври чаҳоруми музокирот дар Рим тасдиқ накардааст.

Манбаъ афзудааст, ки замон ва макони баргузории даври баъдии музокирот ҳанӯз тасдиқ нашудааст, аммо интизор меравад, ки дар ояндаи наздик ин кор сурат бигирад.