Вазорати корҳои хориҷии Тоҷикистон аз шаҳрвандони кишвар дар Украина дархост кардааст, то талаботи мақомоти ин кишварро дар шароити ҷангӣ “қатъиян риоя намоянд.”

Субҳи 24-уми феврал нерӯҳои Русия бо фармони президент Владимир Путин ба Украина ҳамла карданд. Бо фармони раисиҷумҳур Владимир Зеленский дар тамоми қаламрави Украина вазъияти ҷангӣ эълон шудааст.

ИНЧУНИН, БИХОНЕД:

Ҳамлаи Русия ба Украина. Киев "вазъияти ҷангӣ" эълон кард

Дар баёнияи Вазорати корҳои хориҷӣ, ки рӯзи 24-уми феврал нашр шуд, омадааст, шаҳрвандони Тоҷикистон дар Украина “дастуру ҳидоятҳои ҷоригардидаи ситодҳои оперативиро қатъиян риоя намоянд, ботаҳаммул бошанд ва то ҳадди имкон манзилашонро тарк накунанд.”

ВКХ ҳамчунин гуфтааст, шаҳрвандон метавонанд, дар сурати пайдо шудани ягон мушкил ба сафорати Тоҷикистон дар Киев аз рӯи хатти алоқаи доимии рақами +380933361040 муроҷиат кунанд.

Субҳи барвақти 24-уми феврал Владимир Путин, раиси ҷумҳури Русия, эълон кард, ки ба “амалиёти махсуси ҷангӣ” дар Украина оғоз мекунад, ки нигарониро аз оғози ҷанги васеъ дар Аврупо барангехт. Бо баланд шудани садои таркиши мушакҳои Русия дар чанде аз шаҳрҳои Украина раиси ҷумҳури Украина Владимир Зеленский дар кишвараш вазъи ҷангӣ эълон кард.

Украина тамоми қаламрави ҳавоиашро барои парвозҳои ҳавопаймоҳои ғайринизомӣ баст.

Мақомот дар Вилояти Мухтори Кӯҳистони Бадахшон эълон карданд, ки ба хонаводаи Зиреҳбон Наврӯзбеков, як афсари Нерӯҳои марзбонии Кумитаи давлатии амнияти миллии Тоҷикистон, ки ҳафтаи гузашта дар даргирӣ бо афроди мусаллаҳ дар марз бо Афғонистон кушта шуд, хона тақдим кардаанд.

Тибқи хабаре, ки дар сафҳаи фейсбуки мақомоти иҷроияи Вилояти Мухтори Кӯҳистони Бадахшон нашр шуд, ба хонаводаи ин афсари кушташуда дар шаҳри Хоруғ хонаи дуҳуҷрагӣ дода шудааст. Дар хабар омадааст, ки мақомот дар оянда ба хонаводаи афсари кушташуда кӯмак хоҳанд кард.

Зиреҳбон Наврӯзбеков ва Исматулло Қурбонов, ду афсари Нерӯҳои марзбонии Кумитаи давлатии амниятӣ миллӣ рӯзи 24 декабр дар даргирӣ бо афроди мусаллаҳ дар наздикии мавзеи Қавоқ дар ноҳияи Шамсиддин кушта шудаанд. Мақомоти тоҷик ҳамлаваронро "гурӯҳи террористӣ" ном бурданд.

Бар пояи иттилои манбаъҳои Радиои Озодӣ, Зиреҳбон Наврӯзбекови 33-сола бо зарби шаш тир ба ҳалокат расидааст. Ӯ зодаи ноҳияи Шуғнони Вилояти Мухтори Кӯҳистони Бадахшон аст ва пайкарашро баъди ташхису шиносоӣ ба зодгоҳаш фиристоданд.

Исматулло Қурбонови 28-сола дар ин ҳодиса ба ҷуқурии 200-метрии яке аз ғорҳои минтақа афтода буд ва як рӯз баъд ҷасади ӯро берун оварданд ва дар зодгоҳаш ноҳияи Ҳамадонии вилояти Хатлон ба хок супурданд.

Ҳардуи ин афсарон дар қисми марзбонии "Саричашма" адои хидмат мекарданд.

Ҳукумати Толибон дар Афғонистон гуфтааст, ки дар соли 2025 шумори нерӯҳои амниятӣ ва дифоии омӯзишдидаашон дастикам ба 300 ҳазор тан расидааст.

Забеҳуллоҳ Муҷоҳид, сухангӯи ҳукумати Толибон рӯзи 31 декабр дар гузориши солона дар бораи амалкардҳои ин ҳукумат дар соли 2025, ки дар сафҳаи Х-и худ нашр кард, навиштааст, ки дар соли гузашта Вазорати дифои онҳо шумори нерӯҳои омӯзишдидаи амниятиро ба 181 ҳазору 84 тан расондааст.

Ба гуфтаи ӯ, ҳамчунон дар ҷараёни як сол 100 ҳазору 300 пулис дар бахшҳои амниятӣ, ҷиноӣ, марзӣ ва дигар бахшҳо омӯзиш дида ва фориғутаҳсил шуданд.

Бо ин ҳол, ӯ мушаххас накардааст, ки дар ҳоли ҳозир шумори умумии нерӯҳои мусаллаҳи ҳукумати Толибон ба чӣ теъдод мерасад, аммо дар баҳори соли 2024 Фасеҳудин Фитрат, сардори Ситоди кулли нерӯҳои мусаллаҳи ҳукумати Толибон дар як гуфтугӯ бо телевизиони "Тулӯъ" иддао карда буд, ки шумори нерӯҳои мусаллаҳи онҳо ба 500 ҳазор тан мерасад.

Ҳамчунин Кумитаи назорат бар таҳримҳои Шӯрои амнияти СММ дар навтарин гузориши худ, ки дар нимаи моҳи декабр нашр шуд, эълон кард, ки дастгоҳи амнияти Толибон байни 380 то 450 ҳазор фард дорад, ки ҳудуди 150 ҳазор тани он нерӯҳои дифоӣ ва наздик ба 200 ҳазор тани дигар пулис ва нерӯҳои истихборотӣ мебошанд.

Дар ин гузориш омада буд, ки дар нимаи нахусти соли молии 2025, хароҷоти Толибон дар бахши амниятӣ ба 55,2 миллиард афғонӣ (беш аз 830 миллион доллар) расидааст, дар ҳоле, ки 64,2 миллиард афғонӣ дар дигар бахшҳо харҷ шудааст.

Дар ҳамин ҳол, шуморе аз таҳлилгарон ва сокинони ин кишвар мегӯянд, дар шароите, ки фақр, тангдастӣ ва бекорӣ дар Афғонистон рӯз ба рӯз афзоиш меёбад, бештар кардани нерӯҳои амниятии Толибон авлавият нест, балки ба гуфтаи онҳо, бояд барои беҳбуди вазъияти мардум кор сурат бигирад.

Мақомҳои маҳаллӣ дар Украина рӯзи 31 декабр эълон карданд, ки дар пайи ҳамлаҳои Русия чаҳор нафар, аз ҷумла, се кӯдак дар шаҳри Одесса захмӣ шуданд.

Раиси Идораи низомӣ дар минтақаи Одесса дар Телеграм навишт, "ҳавопаймоҳои бесарнишин ба зерсохтҳои истиқоматӣ ва энержии минтақа ҳамла карданд".

Ин ҳамлаҳо пас аз он рух дод, ки Украина ҳамлаи ҳавопаймоҳои бесарнишин ба яке аз иқоматгоҳҳои президент Путинро рад кард ва Маскавро ба пахши маълумоти нодуруст барои халалдор кардани гуфтугӯҳои поёни ҷанг муттаҳам намуд.

Раисҷумҳури Украина Владимир Зеленский иддаои Русияро "комилан бофта" хонд ва гуфт, ният дорад шашуми январ бо раҳбарони кишварҳои муттаҳиди Киев дар Фаронса мулоқот кунад.

Кремл рӯзи 30 декабр нерӯҳои Украинаро муттаҳам кард, ки гӯё шаби 29-уми декабр ба қароргоҳи Владимир Путин дар вилояти Новгород бо паҳпод ҳамла кардаанд.

Доналд Трамп, раисҷумҳури Амрико охири ҳафтаи гузашта гуфт, ки созиш барои поёни ҳамлаи Русия ба Украина аз ҳамеша наздиктар аст, аммо ҳеч пешрафти мушаххасе дар бораи масъалаи пуртаниши қаламрав пас аз гуфтугӯҳои нав бо раҳбарони кишварҳои даргир гузориш нашуд.

Дар ҳоле ки мақомоти Украина хабари ҳамла бо ҳавопаймоҳои бесарнишинро ба қароргоҳи президенти Русия дар вилояти Новгород напазируфтанд, раисҷумҳури Тоҷикистон ин ҳодисаро маҳкум кардааст. Вокуниши Эмомалӣ Раҳмон рӯзи 31-уми декабр дар гуфтугӯйи телефонӣ бо Владимир Путин садо додааст.

Ба навиштаи дафтари матбуоти президенти Тоҷикистон, “чунин амалҳои таҳдидкунанда ба иншооти давлатӣ ва амнияти роҳбарияти кишвар (Русия) ғайри қобили қабул аст ва онҳо ба раванди музокирот барои ноил шудан ба сулҳу субот монеа эҷод менамоянд.”

Вазири корҳои хориҷии Русия нерӯҳои Украинаро муттаҳам кард, ки гуё шаби 29-уми декабр ба қароргоҳи Владимир Путин дар вилояти Новгород бо паҳпод ҳамла кардаанд. Сергей Лавров гуфт, дар ин ҳамла 91 паҳпод истифода шуд, аммо ягон талафот ва зараре дар пай надошт.

Президенти Украина Владимир Зеленский изҳороти вазири корҳои хориҷии Русияро “дурӯғи навбатии Маскав” хонд. Ба гуфтаи Зеленский, Русия талош дорад ба раванди музокироти сулҳ халал расонда, барои ҳамла ба биноҳои ҳукуматӣ дар Киев баҳонае омода кунад.

Дар ҳамин ҳол, вазири корҳои хориҷии Русия таҳдид кардааст, ки артиши Русия макон ва замони ҳамлаи ҷавобиро дақиқ кардааст. Сергей Лавров гуфтааст, Маскав аз раванди музокирот бо Амрико бар сари поёни ҷанг дар Украина берун намешавад, аммо мавқеи худро бозбинӣ хоҳад кард.

Юрий Ушаков, ёвари раисҷумҳури Русия гуфтааст, дар гуфтугӯи охири телефонии Владимир Путин ва Доналд Трамп, раисҷумҳури Амрико, мавзӯи ҳамла ба қароргоҳи президентӣ дар Новгород баррасӣ шуд.

Дар ҳоле ки Кохи Сафед дар ин бора чизе нагуфтааст, ёвари президенти Русия мегӯяд, Трамп аз хабари ин ҳамла ҳайратзада шудааст. Ба гуфтаи Ушаков, Владимир Путин ба Трамп гуфтааст, ҳамла бепосух намемонад ва Русия мавқеи худро бозбинӣ хоҳад кард.

Сухангӯи Кохи Сафед дар шабакаи X навишт, Доналд Трамп бо Путин дар бораи Украина “суҳбати муфид” дошт, аммо ҷузъиёт надод. Худи Трамп дар суҳбат ба хабарнигорон гуфт, аз талоши ҳамла ба қароргоҳи Путин “хашмгин” шудааст, чун “феълан замони муносибе барои чунин кор нест”.

Хадамоти алоқаи Тоҷикистон ҳамкориро бо як ширкати чинӣ дар бахши мухобирот оғоз кардааст, ки солҳо боз барои суръати сусти интернет танқид мешавад. Ёддошти тафоҳум дар ин бора 29-уми декабр имзо шуд.

Дар хабарномаи Хадамоти алоқа омадааст, ки ҳадаф аз имзои санад бо ширкати Jinda Anbang (Beijing) Technology Development, ҳамкорӣ "дар соҳаи технологияҳои иттилоотӣ ва коммуникатсионӣ, навсозии инфрасохтори рақамӣ ва пешбурди иқтисоди рақамӣ" дар Тоҷикистон аст.

Ҷузъиёти бештари ёддошти тафоҳум ва шарту шароити ҳамкории Тоҷикистон бо ин ширкати чинӣ маълум нест.

Намояндагони Хадамоти алоқа пештар гуфта буданд, барои беҳтар кардани сифат ва суръати интернет аз Чин таҷҳизот ворид мекунанд.

Ҳомиёни ҳуқуқ аз эҳтимоли такрори таҷрибаи Чин дар мавриди маҳудияти сокинон дар дастраси ба интернет нигаронанд.

Тибқи эълони намояндагони Хадамоти алоқа, қарор аст то соли 2028 дар тамоми кишвар 7600 пойгоҳҳои чинӣ насб шавад.

Тоҷикистон ба гурӯҳи кишварҳое бо заифтарин суръат ва хадамоти интернетӣ дохил мешавад.

Вазири корҳои дохилии Туркия эълон кард, ки пулиси ин кишвар рӯзи 30 декабр дар амалиёти сартосарӣ алайҳи гурӯҳи "Давлати исломӣ" ё ДОИШ, 357 гумонбарро боздошт кардааст.

Ин амалиёт як рӯз пас аз он анҷом шуд, ки дар ҷараёни як даргирии мусаллаҳона дар шимол-ғарби Туркия, се афсари пулис ва шаш фарди мусаллаҳ кушта шуданд.

Алӣ Ерликая, вазири корҳои дохилии Туркия гуфт, ки нерӯҳои амниятӣ дар 21 вилояти ин кишвар амалиёт анҷом додаанд.

Пеш аз ин, дафтари Додситонии Истанбул эълон карда буд, ки пулис ба 114 мавқеъ дар Истанбул ва ду вилояти дигар юриш бурда, миқдори зиёде санад ва маводҳои дигиталиро мусодира кардааст.

Як ҳафта пеш низ беш аз 100 гумонбар ба узвият дар ДОИШ бинобар тарҳрезии эҳтимолии Крисмас ва Соли Нав, боздошт шуда буданд.

Холида Зиё, нахустин сарвазири зан дар таърихи Бангладеш ва рақиби аслии Шайх Ҳасина, раҳбари барканоршудаи ин кишвар, пас аз бемории тӯлонӣ дар сини 80-солагӣ даргузашт.

Ҳизби миллигарои Бангладеш (BNP) ба раҳбарии Холида Зиё рӯзи 30 декабр эълон кард, ки ӯ соати шаши субҳ даргузаштааст.

Холида Зиё қасд дошт дар моҳи феврали оянда барои савумин бор низ ба унвони нахуствазир номзад шавад.

Ин интихобот нахустин интихобот пас аз он хоҳад буд, ки дар натиҷаи инқилоби мардумӣ дар соли 2024, Шайх Ҳасина аз қудрат барканор шуд.

Холида Зиё пас аз он дар соли 1991 ба мақоми нахуствазирии Бангладеш расид, ки шавҳараш Зиёурраҳмон, раисҷумҳури вақти он кишвар, ба қатл расид.

Ӯ давраҳоеро дар зиндон ва низ дар ҳабси хонагӣ сипарӣ карда буд. Пас аз барканории Шайх Ҳасина аз қудрат, Холида Зиё аз иттиҳомоти фасод сафед шуд ва иҷоза ёфт барои табобат ба Лондон сафар кунад.

Як маркази имдодии Арабистони Саудӣ барои ҳафт ҳазор оилаи камбизоат дар Тоҷикистон ёрии башардӯстона медиҳад.

Намояндагони Маркази имдоди Шоҳ Салмон 30-юми декабр зимни ҳамоише дар Душанбе гуфтанд, ба 35 ҳазор кас 7060 сабади хӯрока тақсим карда мешавад.

Дар хабарномаи расмӣ омадааст, маблағи кӯмакҳо 350 ҳазор доллари амрикоиро ташкил медиҳад. Қарор аст ин ёриҳо дар арафаи моҳи Рамазон аз тариқи Ҷамъияти Ҳилоли Аҳмар ба камбизоатон тақсим карда шавад.

Моҳи Рамазон дар нимаи дуюми моҳи феврали соли 2026 фаро мерасад.

Маркази имдоди Шоҳ Салмон аввали соли 2025 ҳам ба 7 ҳазор хонаводаи камбизоати Тоҷикистон 490 тонна ёрии башардӯстона дода буд. Ба ҳар хонавода қариб 70 кило орду равған ва лубиёву макарону шакар.

Аммо сифати ин маҳсулот интиқоди баъзе хабарнигоронро ба миён овард, ҳарчанд намояндагони Сафорати Арабистон гуфтанд, онҳо пул медиҳанд ва маҳсулотро ширкатҳои тоҷикистонӣ интихоб мекунанд.

Шариф Назаров, мураббии шинохтаи футболи тоҷик, пас аз бемории вазнину тӯлонӣ рӯзи 30-юми декабр дар шаҳри Душанбе аз олам даргузашт. Ӯ 80 сол дошт.

Ин зодаи ноҳияи Рӯдакӣ (собиқ Ленин) дар солҳои 60-70-уми садаи гузашта дар дастаҳои “Пахтакор”-и Қӯрғонтеппа ва “Помир”-и Душанбе ҳимоятгар буд.

Ӯ аслан ба ҳайси мураббии футбол машҳур шуд. Хидмати Шариф Назаров дар дастовардҳои “Помир”-и Душанбе беназир мебошад. Маҳз таҳти раҳбарии вай “Помир” ба лигаи олии қаҳрамонии СССР (1988) роҳхат гирифта, сипас то фурӯпошии Иттиҳоди Шӯравӣ дар лигаи олӣ муваффақона бозӣ кардааст.

Таҳти раҳбарии Шариф Назаров “Помир” ду бор қаҳрамони Тоҷикистон (1992 ва 1995) ва барандаи Ҷоми кишвар (1992) гардид. Вай дар солҳои 1994-1995 сармураббии дастаи “Навбаҳор” дар Намангони Узбекистон буд.

Назаров соли 1997 боз ба Тоҷикистон баргашт ва сармураббии “Помир” таъйин шуд. Ӯ, ҳамчунин, дастаи “Варзоб”-и Душанберо ду бор (1999 ва 2000) қаҳрамони Тоҷикистон ва як бор (1999) барандаи Ҷоми кишвар кардааст.

Солҳои 2001-2002 сармураббии дастаи “Фаррух”-и Ҳисор, солҳои 2003-2005 сармураббии “Авиатор” (баъдан “Парвоз”)-и ноҳияи Бобоҷон Ғафуров, солҳои 2006-2007 сармураббии “Хима”-и Душанбе буд.

“Авиатор” бо роҳбарии ин мураббии пуртаҷриба ду бор (2003, 2004) соҳиби медали биринҷӣ шуда, як дафъа (2004) Ҷоми Тоҷикистонро ба даст овардааст.

Шариф Назаров хатмкардаи Донишкадаи тарбияи ҷисмонии Тоҷикистон (1974) ва мактаби олии мураббиёни шаҳри Маскав (1983), мураббии шоистаи Тоҷикистон (1977) солҳои 1986-88,1989-95,1997-98 сармураббии “Помир”, солҳои 1992-95, 1999, 2003, 2005-2006 сармураббии дастаи мунтахаби миллии Тоҷикистон буд.

Бо раҳбарии Шариф Назаров дастаи мунтахаби миллии Тоҷикистон соли 2006 барандаи Ҷоми даъвати AFC (Конфедератсияи футболи Осиё) гардидааст.

Шариф Назаров аз моҳи июни соли 2009 раиси бошгоҳи футболи “Регар-ТадАЗ”-и Турсунзода буд. Баъдан дар Душанбе мактаби футболи Шариф Назаров таъсис ёфт, ки ӯ ҳамроҳи шогирдонаш ба тарбияи футболбозони наврас машғул буд.

Шариф Назаров ягона намояндаи ҷамоҳири Осиёи Марказӣ мебошад, ки ба дарёфти унвони баландтарину фахрии “Мураббии шоистаи СССР” (1991) муваффақ гардидааст.

Владимир Путин, раисҷумҳури Русия, рӯзи 29-уми декабр фармонеро имзо гузошт, ки маъракаи даъват ба артишро дар ин кишвар тамоми сол иҷоза медиҳад.

Мақомоти Русия нақша доранд, аз 1-уми январ то 31-уми декабри соли 2026-ум 261 ҳазор ҷавони аз ҳаждаҳ то сисоларо ба хидмати сарбозӣ баранд.

Дар даъвати тирамоҳии имсола 135 ҳазор кас дар Русия ба хидмат ҷалб шудаанд. Ин омори калонтарин аз соли 2016 аст.

Думаи давлатӣ ё порлумони Русия моҳи октябри имсол дигаргуниро ба қонун дар бораи даъват ба артиш пазируфт. Бар асоси он, кумисюнҳои даъват тамоми сол кор мекунанд.

Ҳомиёни ҳуқуқ мегӯянд, Русия дар ҷанги зидди Украина, ки қариб чор сол боз идома дорад, сарбозони зиёдеро аз даст додааст ва аз ин роҳ мехоҳад мушкилашро ҳал кунад.

Дар пайи боло рафтани нархи пули хориҷӣ ва арзиши тило дар Эрон, эътирозҳо дар чанд шаҳри ин кишвар ҷараён дорад.

Гирдиҳамоии норозиён рӯзи 28-уми декабр дар чанд бозори Теҳрон оғоз шуда, сипас ба гӯшаҳои дигари Эрон кӯчид.

Муътаризон дар бораи вазъи иқтисодии Эрон ва алайҳи ҳукумат шиор медиҳанд.

Дар яке аз ин гирдиҳамоиҳо шиори “Ризошоҳ рӯҳат шод” низ садо дод. Ризошоҳи Паҳлавӣ, шоҳи Эрон, соли 1979 дар пайи пирӯзии инқилоби исломӣ аз Эрон рафт ва дур аз кишвараш фавтид.

Эътирозҳои охир дар Эрон ба дунболи афзоиши якбораи нархи пули хориҷӣ ва баҳои тило сурат мегирад. Дар пайи ин таҳаввулот Маҳдӣ Таботабоӣ, муовини раисҷумҳури Эрон эълом кард, ки Муҳаммадризо Фарзин аз мақоми раиси Бонки марказии Эрон канор рафта ва Абдулносир Ҳимматӣ ҷойгузини ӯ хоҳад шуд.

Бино ба гузоришҳо чанд бозори калон дар Эрон, аз ҷумла бозори Байнулҳарамайн рӯзи 29-уми декабр таътил шудаанд. Дар наворҳо дида мешвад, ки муътаризон бо маъмурони ҳукуматӣ даргир шудаанд.

Тибқи иттилои дарёфтии Радиои Озодӣ, як кӯдаки 3-сола эҳтимолан дар пайи латукӯби модарандараш дар ноҳияи Файзобод ҷон бохтааст. Ҳодиса 26-уми декабр дар деҳаи Шерамон рух додааст.

Як манбаъ дар ҳукумати Файзобод ба Радиои Озодӣ гуфт, барои латукӯб ва ба марг расондани Юсуфҷони хурдсол модарандараш гумонзад аст.

Назари ин зани 31-сола ба қазия маълум нест.

Манбаъ дар ҳукумати Файзобод гуфт, модарандари тифл ба ҳабси пешакӣ гирифта нашуд, чун кӯдаки якунимоҳа дорад. Мақомот ӯро бозпурсӣ доранд.

Ҷузъиёти бештар дар бораи марги мармузи ин кӯдак барои мо феълан маълум нест ва мақомот ҳам расман чизе нагуфтаанд.

Ҳамсӯҳбати Радиои Озодӣ дар ҳукумати Файзобод гуфт, модарандари Юсуфҷон ба он муттаҳам мешавад, ки ин тифли 3-соларо задааст ва кӯдак баъди як рӯз дар роҳ ба бемористон даргузашт.

Таҳқиқи аввалия нишон додааст, ки зан мушкили равонӣ надорад, аммо бо хушдоманаш ҷанҷол мекардааст.

Мақомот ҳам аз мушкили оилавии ин зан бохабар буда, як маротиба бо онҳо сӯҳбат кардаанд.

Марги тифлон баъди шиканҷа дар Тоҷикистон ҳодисаи нав нест. Дар соли 2022 низ як сокини шаҳри Истаравшан барои латукӯб ва то дами марг азоб додани тифли сесола боздошт шуда буд.

Дар соли 2025 барои кори Маҷлиси намояндагон, палатаи поёнии порлумонии Тоҷикистон, 48 миллион сомонӣ ё 5,2 миллион доллар харҷ шудааст. Ин нукта дар гузориши роҳбари дастгоҳи Маҷлиси намояндагон садо дод.

Дар ин гузориш, ки нашрияи порлумонии "Садои мардум" чоп кард, омадааст, барои Маҷлиси намояндагон 4 миллион сомонӣ бештар аз нақшаи пешбинишуда маблағ сарф шуд.

Ба иттилои манбаъ, танҳо барои маоши вакилон ва кормандони Маҷлиси намояндагон беш аз 18 миллион сомонӣ харҷ шуд. Аммо роҳбари дастгоҳи Маҷлиси намояндагон маоши вакилони порлумонро фош накардааст.

Ҳаҷми маблағи пешбинишуда барои кори Маҷлиси намояндагон дар соли 2026 маълум нест. Дар гузориши расмӣ танҳо омадааст, соли оянда фақат барои маоши ҳармоҳаи вакилон ва кормандони маъмурии Маҷлиси намояндагон 1,6 миллион сомонӣ пешбинӣ шудааст.

Палатаи поёнии порлумони Тоҷикистон 63 вакил ва 232 корманди техникӣ ва ёрирасон дорад. Тибқи Қонуни асосии Тоҷикистон, тамоми қонун ва созишномаҳои байнулмилалӣ танҳо баъди тасвиб дар Маҷлиси намояндагон иҷроӣ мешаванд.

Мунтақидон порлумони Тоҷикистонро барои хомӯшӣ дар баробари мушкилиҳои ҷомеа ва бидуни баҳсу баррасӣ қабул кардани қонунҳо танқид мекунанд.

Бештари курсиҳои Маҷлиси намояндагон дар ихтиёри Ҳизби ҳокими халқии демократӣ ва аҳзоби тарафдори ҳукумат ҳастанд. Ҳизби сотсиал-демократ, ки ягона ҳизби мухолиф дар кишвар гуфта мешавад, дар порлумон намоянда надорад.

Як ширкати арабистонӣ мехоҳад дар Тоҷикистон истгоҳҳои тавлиди барқи офтобӣ ва бодӣ роҳандозӣ кунад.

Валид Абдурраҳмон ар-Рушайдон, Сафири Арабистони Саудӣ дар Тоҷикистон ҳафтаи гузашта дар сӯҳбат ба хабарнигорон гуфт, ширкати ACWA Power музокирот бо Вазорати энержӣ ва захираҳои оби Тоҷикистонро оғоз кардааст.

Сафир умедворӣ кард, ки ин ширкати арабистонӣ дар ояндаи наздик барои насби истгоҳҳои барқии офтобӣ ва бодӣ ба Тоҷикистон кӯмак мекунад.

Ҷузъиёти бештар дар бораи музокироти ширкати ACWA Power бо мақомоти Тоҷикистон феълан маълум нест.

ACWA Power яке аз ширкатҳои бузургтарини тавлиди нерӯи барқ дар Арабистони Саудӣ аст, ки дар бархе аз кишварҳои ҳамсояи Тоҷикистон, аз ҷумла Узбекистон кор мекунад.

Дар пайи камбуди шадиди нерӯи барқ дар Тоҷикистон мақомот талош доранд тавлиди барқро аз дастгоҳҳои офтобӣ ва бодӣ роҳандозӣ кунанд. Феълан бахши асосии барқи Тоҷикистон дар неругоҳҳои обӣ тавлид мешавад.

Дар давраи тирамоҳ ва зимистон беш аз 70 дарсади аҳолии Тоҷикистон ба камбуди шадиди барқ рубарӯ мешаванд ва сабабаш ба гуфтаи мақомот кам шудани воридоти об ба обанборҳо аст. Бархеҳо ба ин ҳарфҳо шубҳа доранд.

Дар Русия издивоҷи дурӯғини як зани тоҷикистониро бо марди рус бекор кардаанд.

Додгоҳи шаҳри Артёмовски вилояти Свердловск рӯзи 29-уми декабр дар Телеграм навишт, зани 34-сола аз Тоҷикистон соли 2022 барои дарёфти осони шаҳрвандии Русия бо марди 39-солаи рус ақди никоҳ баст.

Таҳқиқ маълум кардааст, ки ин ду нафар ҳеч гоҳ ҳамзистӣ надоштанд ва издивоҷи онҳо бо қарори додгоҳ бекор карда шуд. Исми мард ва зан нашр намешавад.

Додгоҳ мегӯяд, аз қазия замоне огоҳ шуд, ки ҳамсари пешинаи мард ва модари фарзанди ӯ аз ин издивоҷи сохта ба додситонӣ шикоят кард. На марди рус ва на зани тоҷик дар мурофиаҳо иштирок накардаанд.

"Мард ҳоло дар ҷанги зидди Украина иштирок мекунад ва зан даъвати додгоҳро нодида гирифт," -- омадааст дар изҳороти додгоҳ.

Хоҳари мард гуфтааст, бародараш аз зани тоҷик 30 ҳазор рубл гирифта, ба ақди шашмоҳа розигӣ дода, вале баъди ин бо кадом сабабе ҷудо нашуд. Бо қарори додгоҳ, марду зан ба фоидаи давлат бояд 1500 рубл ҷарима супоранд.

Дар гузашта бештар дар бораи издивоҷи сохтаи мардони тоҷик бо занҳои рус бар ивази пул ва бо умеди таҳияи қонунии санадҳо ё дарёфти осони шаҳрвандии Русия хабарҳо нашр шудааст.