Журналист ва узви ҷомеаи шаҳрвандии Бадахшон Улфатхоним Мамадшоева ва шавҳари собиқаш, генерал Холбаш Холбашов, ки ҳарду дар боздоштанд, дар як наворе, ки тавассути мақомот нашру паҳн шуд, ба даст доштани худ дар нооромиҳои Хоруғу Рӯшон таъкид карданд. Дар тазоҳуроти мардум ва амалиёти мақомот дар онҷо, аз 16 то 18-уми май, даҳҳо нафар куштаву захмӣ ва беш аз сад кас дастгир шуданд. Дар навор ба як кишвари ғарбӣ ҳам ишора шуд, аммо аз ягон давлате ном набурданд.

Ҳарчанд Холбашов гуфт, изҳороти онҳо бидуни ҳеч таҳқиру зӯроварӣ ба даст омадааст, маълум нест, зери чӣ шароите сабт шуда. Видеоро шоми 24-уми май бо рамзи "Телевизиони Тоҷикистон" нашр карданд. Қаблан Улфатхоним Мамадшоева дар суҳбат бо хабарнигорон даст доштани худро дар нооромиҳои Бадахшон рад карда буд.

Муаллифони навор иддао карданд, ки тарҳи нооромиҳои охирро дар Бадахшон 26-уми марти имсол Мамадбоқир Мамадбоқиров, Холбаш Холбашов, Улфатхоним Мамадшоева ҳузурӣ дар Хоруғ ва Алим Шерзамонов маҷозӣ аз Аврупо рехтаанд.

Мамадшоева ва Холбашов дар баёноти видеоии худ гуфтанд, он замон ташкили тазоҳурот дар Хоруғ ба дӯши Мамадбоқир Мамадбоқиров ва дар Рӯшон бар уҳдаи Холбаш Холбашов гузошта шуд.

Алим Шерзмонов, муовини раиси Паймони миллӣ, созмони фаъолияташ мамнуъ дар Тоҷикистон, ки дар Аврупо қарор дорад, шоми 24-уми май ба Радиои Озодӣ гуфт, чунин ҷаласае баргузор нашудааст.

"Касе Мамадбоқирро як ҳафта ё ақаллан се рӯз шинохта бошад, хуб медонад, ки ӯ дар ҳаёташ дар чунин ҷаласае ширкат намекард. Холбаш Холбашов марди ғаюре аст. Ӯро бо чӣ коре маҷбур кардаанд, ки ба худ туҳмат кунад," – афзуд ӯ.

Муаллифони филм мегӯянд, Алим Шерзамонов дар умум барои ташкили бетартибиҳо дар Хоруғу Рӯшон 13 ҳазор доллар фиристодааст. Ба иддаои онҳо, ҳафт ҳазори он ба Хоруғ ва шаш ҳазори дигар ба Рӯшон равона шудааст, аммо нагуфтанд, ки ин миқдор пул чӣ гуна аз хориҷ дарёфту дастрас шудааст.

Шерзамонов мегӯяд, ӯ як паноҳандаи сиёсӣ дар Аврупост ва ин мидқор пул надошту надорад: "Гузашта аз ин, ин миқдор маблағро фиристодан имкон надорад. Дар Аврупо ҳам мепурсанд, ки онро аз куҷо ёфтаам. Ман дар таъминоти давлат ҳастам. Ману Мамадбоқир бародар будем, аммо агар пул ҳам медоштам ва аз номи як ташкилоти ғайрибадахшонӣ мефиристодам, як пайсаашро намегирифт. Яъне як пайсаи Паймони миллиро намегирифт."

Мамадбоқир Мамадбоқиров, яке аз раҳбарони ғайрирасмӣ дар Бадахшон, рӯзи 22-юми май дар шароити мармуз дар Хоруғ кушта шуд. Шахсони наздик ба ӯ мегӯянд, дар ин кор мақомот даст доранд, аммо Вазорати корҳои дохилӣ гуфт, ӯ дар як даргирии дохилӣ бо ҳамсафонаш кушта шудааст.

Улфатхоним Мамадшоева ва Холбаш Холбашов, ки аз 18-уми май ба ин тараф дар боздошт ҳастанд, дар навори мақомот гуфтанд, “пушаймонанд ва аз мардуми Хоруғу Рӯшон ва Роштқалъа маъзарат мехоҳанд”. Аммо маълум нест, ин ҳарфҳоро кай ва таҳти чӣ шароите гуфтаанд.

Муаллифони навор ҳамзамон Мамадшоеваро ба ҳамкорӣ бо созмонҳои ба гуфтаи мақомот, “шубҳаовари хориҷӣ” ва “пешниҳоди иттилоъ ба намояндагони хадамоти махсуси хориҷӣ” муттаҳам карданд. Онҳо дар ин маврид аз “ду корманди сафорати як кишвари ғарбӣ” ҳам гуфтанд, вале номи касеву кишвареро ошкор накарданд.

Улфатхоним Мамадшоева 65-сола ва ҳомии ҳуқуқу журналисти мустақил аст. Бахши забон ва адабиёти руси Донишгоҳи миллии Тоҷикистонро хатм ва дар телевизиону радиои Бадахшон кор кардааст. Муассиси созмони “Номус ва инсоф”. Аз соли 2003 то 2014 дар Донишгоҳи славянии Тоҷикистону Русия дарс додааст. Дар солҳои 90-ум узви “Нерӯҳои худмуҳофизатии Бадахшон” буд.

Аз 16-уми май ба ин тараф вазъ дар шаҳри Хоруғ ва ноҳияи Рӯшони ВМКБ печида аст. Дар ҷараёни даргирии сокинони норозӣ ва нерӯҳои давлатӣ дар Хоруғу Рӯшон, ба иттилои расмӣ, аз ду ҷониб 10 кас кушта ва 27 нафар захмӣ шудаанд. Сокинони Рӯшон мегӯянд, ҷасади 21 нафарро гирифтанд.

Мақомот мардуми норозиро ба “узвият дар гуруҳҳои ҷиноӣ” ва “муборизаи мусаллаҳона” айбдор карданд. Сокинон мегӯянд, танҳо барои ҳимояти ҳуқуқи худ ба кӯчаҳо баромаданд, чун моҳҳо боз зери фишору таъқиб ҳастанд.

Додгоҳе дар Узбекистон як шаҳрванди ин кишварро барои ширкат дар ҷанги Русия алайҳи Украина ба 3 сол зиндон маҳкум кард.

Расонаҳои маҳаллӣ гузориш доданд, ки ин муҳоҷири 33-сола аз Марғелон ҳангоми дар зиндони Русия буданаш бо Вазорати дифои он кишвар шартнома баста, моҳи сентябри соли 2025 ба ҷанги зидди Украина фиристода шудааст.

Ин муҳоҷир дар додгоҳ гуфтааст, ҳамагӣ чор рӯз дар даргириҳо ширкат дошт ва баъд захмӣ шудан ба Узбекистон баргаштааст, аммо ӯро дар ватанаш бо иттиҳоми зархаридӣ боздошт карданд.

Дар ҳоле, ки назари ин муҳоҷир ва наздикон ба иттиҳом ва ҳукми додгоҳ маълум нест, расонаҳои маҳаллии Узбекистон навиштаанд, ки мард гуноҳи худро дар додгоҳ пурра эътироф кардааст. Ин муҳоҷир гуфтааст, зери фишори кормандони зиндон шартнома бо Вазорати дифои Русияро имзо кардааст.

Дар як моҳи ахир ин аллакай сеюмин мавриди ба ҷавобгарӣ кашидани шаҳрвандони Узбекистон барои ширкат дар ҷанги Русия алайҳи Украина аст.

Дар оғози моҳи феврал Додгоҳи вилояти Андиҷон як ҷавони 24-соларо бо гуноҳи ширкат дар ҷанги Украина ба 3 сол зиндон маҳкум карда буд.

Ба гузориши тарҳи давлатии "Зистан мехоҳам" феълан ҳазорон зодаи Осиёи Марказӣ дар ҳайати артиши Русия зидди Украина меҷанганд. Онҳоро бо ваъдаи додани шаҳрвандӣ, маблағи зиёд ва ё озодӣ аз зиндон ба ҷанг фиристодаанд.

Оҷонсии назорати давлатии молиявӣ ва мубориза бо коррусияи Тоҷикистон мегӯяд, парвандаи собиқ раиси дастгоҳи ҳукумати шаҳри Левакантро ба додгоҳ фиристодааст.

Оҷонсӣ 27-уми феврал дар хабарномае навишт, Сайфиддинзода А, аз мансабаш сӯистифода карда, барои пуштибонӣ аз номзадии як нафар ба мансаби мудири мактаб, аз ӯ 10 ҳазор сомонӣ талаб карда гирифтааст.

Назари Сайфиддинзода ва наздиконаш ба иттиҳом маълум нест.

Оҷонсӣ мегӯяд, алайҳи ин мақомдор бар асоси моддаи 314-и Кодекси ҷиноӣ ё сӯистифода аз мансаб парванда боз шуд.

Ин банди қонун то 42 ҳазор сомонӣ ҷарима ва ё то се сол зиндонро пешбинӣ мекунад.

Маълум нест, ки додгоҳ дар ин бора чӣ ҳукм содир кардааст.

Фасод дар идораҳои давлатӣ аз мушкилиҳои асосии Тоҷикистон гуфта мешавад.

Ба иттилои расмӣ, соли 2025 дар Тоҷикистон зиёда аз 1900 ҷинояти коррупсионӣ ва иқтисодӣ ошкор карда шудааст.

Бино ба маълумоти тасдиқшуда, дар ҷанги Русия алайҳи Украина наздики 1400 "зархарид" аз Осиёи Марказӣ кушта шудаанд. Афроде, ки аз тарафи Русия зидди Украина меҷангиданд. Маълумотро тарҳи давлатии "Зистан мехоҳам" дар Украина рӯзи 24-уми феврал нашр кард.

Ба гуфтаи манбаъ, аз ҳама зиёд 481 зодаи Узбекистон ва сипас 466 зодаи Тоҷикистон дар ҷанг кушта шудаанд. Аз Қазоқистон 270, Қирғизистон 143 ва аз Туркманистон 27 кас ҷонашонро аз даст доданд. Ин омори тасдиқшуда аст ва шумораи кушташудаҳо метавонад хеле бештар аз ин бошад.

Ба гузориши тарҳи “Зистан мехоҳам” феълан ҳазорон зодаи Осиёи Марказӣ дар ҳайати артиши Русия зидди Украина меҷанганд. Манбаъ мегӯяд, онҳоро бо роҳҳои гуногун, аз ҷумла додани шаҳрвандии Русия ва гирифтани миллионҳо рубл ба ҷанг мефиристанд.

Гурӯҳи дигар зиндониён ҳастанд, ки дар ивази ҷангидан ваъдаи озодӣ гирифтаанд. Ҳамчунин муҳоҷирон борҳо шикоят кардаанд, ки бо таҳдиди оғози парванда ё ихроҷ онҳоро маҷбур мекунанд бо Вазорати дифои Русия шартнома банданд.

Рӯзи 24-уми феврал ба шурӯи ҷанги Русия алайҳи Украина чор сол пур шуд.

Бо вуҷуди гузоришҳои батакрор дар бораи ҳузури зодагони Тоҷикистон дар ҷанги Украина ва куштаву захмӣ шудан ва асир уфтодани теъдоде аз онҳо, мақомот дар Душанбе ин падидаро шарҳ намедиҳанд ва мегӯянд, алайҳи ягон кас барои ширкат дар ин ҷанг парванда боз нашудааст.

Гузоришҳои нашршуда аз Эрон нишон медиҳанд, ки эътирози донишҷӯён дар чанд донишгоҳи Теҳрон ҳамчунон идома дорад.

Телеграм-канали "Донишҷӯёни муттаҳид" навори эътирози донишҷӯёнро нашр кардааст, ки дар он донишҷӯёни донишгоҳҳои Ал-Заҳро, Шариф, Хоҷа Насир, Донишгоҳи ҳунар, улум ва санъат ва Донишгоҳи Теҳрон ширкат доранд.

Наворҳои пахшуда дар шабакаҳои иҷтимоӣ нишон медиҳанд, ки донишҷӯёни ин донишгоҳҳо алайҳи ҳукумат ва роҳбари низом шиор медиҳанд.

Дар наворҳо дида мешавад, ки дар дасти баъзе эътирозгарон парчами шер ва хуршед дида мешавад, ки дар Ҷумҳурии исломӣ манъ аст.

Бар асоси гузоришҳо, миёни донишҷӯёни норозӣ ва нерӯҳои низомӣ занозанӣ ва муноқиша шудааст. "Телеграм"-каналҳои донишҷӯёни эронӣ гузориш доданд, ки дар ҷараёни даргирӣ бо неруҳои басиҷӣ чанд донишҷӯи Донишгоҳи Биҳиштӣ захмӣ шудаанд.

Ин телеграм-каналҳо гузориш доданд, ки баъди бархӯрди нерӯҳои амниятӣ, баъзе донишҷӯён аксҳои роҳбари Ҷумҳурии исломии Эронро оташ задаанд.

Бонки миллии Тоҷикистон меъёри баҳра ё фоизи қарзҳо дар моҳи январи имсолро нашр кардааст.

Тибқи иттилои ин ниҳод, меъёри миёнаи қарзҳо бо пули миллӣ феълан 23,87 дарсад аст. Баҳраи қарзҳои истеъмолӣ каме болотар ва 24,39 дарсад будааст.

Фоизи солонаи қарзҳои ипотекӣ барои хариди манзил 19,69 дарсад нишон дода шудааст. Ҳамчунин Бонки миллӣ мегӯяд, баҳраи миёнаи пасандоз дар бонкҳои кишвар каме бештар аз 12 дарсад аст.

Фирдавс Толибзода, раиси Бонки миллии Тоҷикистон аввали моҳи феврали имсол аз коҳиши баҳра ё фоизи қарзҳои бонкӣ хабар дода буд. Толибзода гуфта буд, "фоизи миёнаи қарзҳо аз 28 то 22 дарсад поин омад."

Аммо омори ахири Бонки миллӣ нишон медиҳад, ки баҳраи миёнаи қарзҳо қариб 24 дарсад аст. Зиёд будани баҳраи қарзҳои бонкӣ ва мушкили дастрасӣ ба онҳо ҳамеша мояи нигаронии муштариёну корбарони шабакаҳои иҷтимоӣ будааст.

Тибқи омори расмӣ, бонкҳои Тоҷикистон дар соли 2024 тақрибан 25 миллиард сомонӣ қарз додаанд. Тақрибан 30 дарсад ё 5,6 миллиард сомонӣ бештар нисбат ба як соли пеш.

Додситонҳои ҳашт шаҳру ноҳияро дар Тоҷикистон дигар карданд.

Ин тағйирот рӯзи 25-уми феврал бо ризояти раисҷумҳур Эмомалӣ Раҳмон сурат гирифтааст.

Сабаби дигаргунӣ дар додситониҳои Ванҷу Мурғоб, Ҳамадонӣ, Ховалинг, Бӯстон, Бобоҷон Ғафуров, Ҷаббор Расулов ва Кӯҳистони Мастчоҳ маълум нест.

Дафтари матбуоти раисҷумҳур навишт, дар ҳамин рӯз сардорони Идораи амният “дар як қатор шаҳру ноҳияҳо” ва сардорони Идораи мубориза бо фасод дар шаҳру ноҳияҳои минтақаи Кӯлоб ва Рашт низ иваз карда шуданд.

Дар ҳоле ки баъзе аз сокинон аз тарзи рафтори мақомоти интизомӣ шикоят доранд, Эмомалӣ Раҳмон аз шахсони навтаъйин хостааст, аз хурофоту фасоди молӣ ва қочоқи маводи мухаддир пешгирӣ, адолатро таъмин ва бо мардум муомилаи хуб кунанд.

Ҳукумати Тоҷикистон пайваста аз таъйини кадрҳои ба гуфтааш болаёқат ситоиш мекунад. Намояндагони мухолифон дар хориҷа мегӯянд, ин таъйинот на аз нигоҳи шоистасолорӣ, балки бештар бар асоси хидмату садоқат ба режим сурат мегирад.

Тибқи гузоришҳо, нимаи дувуми 24-уми феврал миёни нерӯҳои Покистон ва низомиёни ҳукумати "Толибон" дар Афғонистон даргирӣ сурат гирифтааст. Ҷонибҳо якдигарро ба оғози даргирӣ муттаҳам мекунанд.

Як манбаъ дар ҳукумати "Толибон" ба бахши афғонистонии Радиои Озодӣ тасдиқ кард, ки даргирӣ дар минтақаи Шоҳкути ноҳияи Нозиёни вилояти Нангарҳор сурат гирифт.

Ин манбаъ ба Радиои Аврупои Озод/Радиои Озодӣ гуфт, "даргирӣ аз сӯи ҷониби покистонӣ оғоз шуд ва бо посух аз сӯи нерӯҳои "Толибон" рӯбарӯ шуд". Ба гуфтаи манбаъ, даргирӣ поён ёфта, талафоти ҷонӣ нест.

Аз сӯи дигар, як сухангӯи ҳукумати Покистон гуфт, ки нерӯҳои марзии "Толибон" дар ду минтақа ба сӯи сарбозони покистонӣ тирандозӣ карданд. Мушарраф Зайдӣ, сухангӯи нахуствазири Покистон, дар шабакаи Х навишт, "Толибон дар Афғонистон дар минтақаҳои Турхам ва Тира бе ҳеч сабаб ба нерӯҳои амниятии Покистон тирандозӣ карданд ва нерӯҳои амниятӣ посухи муносибе доданд".

Сокинони минтақаҳои наздик ба даргирӣ дар паёмҳое ба Радиои Озодӣ гуфтанд, ки мардум пас аз даргирӣ тарсиданд ва хонаҳои худро тарк карданд.

Ин даргирӣ миёни марзбонони Покистон ва низомиёни "Толибон" пас аз он рух дод, ки шаби якшанбе ҳавопаймоҳои ҷангии Покистон дар вилоятҳои Нангарҳор ва Пактикои Афғонистон ҳамлаҳо анҷом доданд.

Ба гуфтаи масъулони ҳукумати "Толибон", дар ин ҳамлаҳо 18 нафар дар вилояти Нангарҳор кушта шуданд. Аз миёни кушташудаҳо ҷасади 4 кас ҳанӯз пайдо нашудааст.

Теъдоди корхонаҳо бо сармояи соҳибкорони тоҷик дар Узбекистон давоми се моҳи охир 53 адад зиёд шудааст.

Тибқи иттилои Оҷонси омори Узбекистон, ҳоло дар ин кишвар 410 корхона бо сармояи соҳибкорони тоҷикистонӣ кор мекунанд. Моҳи ноябри соли гузашта теъдоди ин корхонаҳо 357 адад буд.

Омори расмии Узбекистон нишон медиҳад, ки баъд аз соли 2024 ҳузури соҳибкорони тоҷик дар кишвари ҳамсоя рӯ ба афзоиш аст.

Барои намуна, аввали соли 2024 дар Узбекистон ҳамагӣ 278 корхона бо сармояи тоҷикистониҳо кор мекард ва ҳоло теъдоди онҳо аз 400 адад гузаштааст.

Соҳибкорони тоҷик дар Узбекистон асосан дар бахши савдо, саноат ва сохтмон кор мекардаанд. Ҳамчунин 33 ширкати тоҷикикистониҳо дар бахши алоқа дар Узбекистон кор мекардаанд.

Мақомоти Узбекистон нагуфтаанд, ки сабаби зиёд шудани ҳузури соҳибкорони тоҷик дар он кишвар чист.

Баъзе корбарони шабакаҳои иҷтимоӣ дар Тоҷикистон зиёд будани молиёт ё андоз ва фишору санҷишҳои зиёдро аз сабабҳои рӯ ба кишвари ҳамсоя овардани тоҷирон медонанд.

Cафирони кишварҳои аврупоӣ дар Тоҷикистон рӯзи 24-уми феврал гирди ҳам омада, ҷанги Русияро дар Украина маҳкум карданд.

Дар ҳамоиш дипломатҳои дигари муқими Душанбе ва масъулони Вазорати корҳои хориҷии Тоҷикистон низ ҳузур доштанд.

Радослав Дарски, сафири Иттиҳоди Аврупо дар Душанбе, гуфт, ҷонибдори сулҳи пойдор дар Украина аст. Ӯ афзуд, Иттиҳоди Аврупо дар канори Украина меистад ва аз ёриҳои сиёсиву низомӣ ва иқтисодиву дипломатияш даст намекашад.

“Ҳеч созиши сулҳ бе ҳузури Украина қобили эътимод ва устувор нест. Ва ҳеч тавофуқе, ки амнияти Аврупоро зери хатар қарор диҳад, бе ҳузури комили Аврупо наметавонад муваффақиятомез бошад. Созишҳои сусту саросемавор, ки ташвиқгари таҷовузкорӣ ҳастанд, танҳо сабаби ба вуҷуд омадани даргириҳои оянда хоҳанд шуд,” – афзуд ӯ.

Сафири Украина дар Тоҷикистон Валерий Евдокимов мегӯяд, ҷанг ҳамон гуна ки дар як рӯз оғоз шуда буд, метавонад дар як рӯз бас шавад, агар Русия бихоҳад, "зеро ин кишвар ба хоки Украина таҷовуз кардааст".

Евдокимов афзуд: "Украиниҳо низ сулҳ мехоҳанд, аммо сулҳ бояд одилона бошад. Ин шарти асосӣ аст, зеро мардуме, ки имрӯз бо нерӯҳои мусаллаҳи Русия меҷанганд, адолат мехоҳанд. Агар мо ба кадом шарту шароити дигар розӣ шавем, пас, он ҳама қурбониҳое, ки кишвари мо дод, барҳадар хоҳанд рафт."

Баъзе аз шаҳрвандони украинӣ низ дар Душанбе мегӯянд, ҳеч интизор надоштанд, ки ин ҷанг ин қадар тӯлонӣ мешавад ва ҷони ҳазорҳо танро мегираду вайрониҳои гӯшношунид меорад.

Владимир, шаҳрванди Украина, гуфт: "Ин қадар тӯлонӣ шудани ҷангро касе тасаввур намекард. Мо танҳо метавонем ин воқеиятро таъйид кунем, ки ин рӯйдод шудааст ва тасдиқ кунем, ки ба шарофати размандагони ҷасурамон ҳанӯз кишвари озод ва мустақил дорем.”

“Ба назари ман, дар ин гуна мавридҳо набояд гуноҳи шаҳрвандони одӣ бошад, ки ҳар рӯз кушта мешаванд. Танҳо хубиву бадӣ вуҷуд дорад, ки мо комилан ҷонибдори хубием,” – гуфт Елена аз Днепр.

Намояндагии Иттиҳоди Аврупо дар Тоҷикистон рӯзи 24-уми феврал бо нашри изҳороти муштараке дар ҳамдастӣ бо сафоратҳои Фаронса, Олмон ва Бритониё дар Душанбе гуфт, дар ҳоле талошҳои раисҷумҳури Амрико Доналд Трамп дар соли 2025 барои дастёбӣ ба сулҳ оғоз шуд, “Русия ошкоро роҳи ташаннуҷро пеш гирифтааст".

Дар ин изҳорот ҳамчунин омадааст, “Иттиҳоди Аврупо то бас кардани ҷанги Русия фишори қатъӣ ва ҳамоҳангшудаи худро ба Маскав идома ва афзоиш хоҳад дод”.

Гузориши видеоӣ дар инҷост:

Embed ба дигарон фиристед

Дар Душанбе аз ҷанги Украина гуфтанд

Аз ҷониби Радиои Озодӣ

Embed ба дигарон фиристед

Нусхабардорӣ шуд

---

бар px баландӣ px

---

URL нусхабардорӣ шуд

Феълан кор намекунад

0:00 0:02:20 0:00

Линки мустақим

• 240p | 6,8MB
• 360p | 11,6MB
• 480p | 18,8MB
• 720p | 36,3MB
• 1080p | 54,0MB

Мақомоти интизомии Тоҷикистон соли 2025 барои аз таҳсил дур кардани кӯдакону наврасон бештар аз 330 парвандаи ҷиноӣ боз кардаанд.

Дар миёни онҳо волидоне ҳастанд, ки фарзандони худро ба Русия бурда, вале ба мактаб надоданд.

Додситонии кул як сокини ноҳияи Спитаменро мисол овардааст, ки ду фарзанди ноболиғашро ба Русия бурда, монеи таҳсили онҳо шудааст.

Теъдоде аз онҳое, ки фарзандони худро ба Русия бурдаанд, мегӯянд, дар ватан касе надоранд, ки фарзандонашонро сарпарастӣ кунад, аз ин рӯ ночоранд барои пешбурди зиндагӣ онҳоро низ бо худ баранд.

Дар Тоҷикистон барои монеъ шудан ба таҳсили фарзанд ҷаримаҳои бузург ва то ду соли зиндон ҷазо муқаррар шудааст.

Раисҷумҳури Украина гуфт, бовар надорад, ки агар нерӯҳои кишвараш, ҳамон тавре Русия мехоҳад, аз қаламрави Донбасс берун раванд, шароит барои сулҳи пойдор фароҳам гардад.

Владимир Зеленский ин суханонро дар суҳбат бо маҷаллаи бонуфузи “Financial Times” баён доштааст. Дар рӯзҳое, ки аз таҷовузи низомии Русия ба хоки Украина чаҳор сол гузашт.

"Рости гап, бовар надорам, ин танҳо чизест, ки Русия мехоҳад. Берун рафтани мо аз Донбасс. Ва гуё он гоҳ ҷанг поён меёбад. Медонед, ки ба Русия набояд бовар кард," – афзудааст Зеленский.

Ба қавли ӯ, масъалаи муҳимтарин барои Украина кафолат ё тазминҳои амниятӣ аст, ки метавонад аз таҷовузи дубораи Русия пешгирӣ кунад.

Зеленский ҳамзамон гуфт, маъмурияти президенти Амрико Доналд Трамп барои розӣ шудан ба созишномаи сулҳ дар муқоиса ба Маскав ба Киев фишори бештар меорад.

Раисҷумҳури Украина дар навбати худ аз кишварҳои ғарбӣ хост, ба Кремл фишори сахти иқтисодӣ биоранд.

Вазорати нақлиёти Тоҷикистон хабар додааст, ки аввалин қатораи санҷишӣ дар хатсайри Чин-Тоҷикистон ба роҳ баромад.

Вазорат 23-юми феврал дар хабарномае навишт, қатор 17-уми феврал ба роҳ баромада, давоми 18-20 рӯз ба Душанбе мерасад.

Дарозии умумии хатсайри Чин-Тоҷикистон зиёда аз 3 500 километр гуфта мешавад ва ин роҳ аз қаламрави Чин, Қирғизистон, Узбекистон ва Тоҷикистон мегузарад.

Ба иттилои вазорат, қатор молҳои мавриди ниёзи мардум ва техникаи сохтмониро ба Тоҷикистон меорад.

Роҳандозии ҳаракати қатораҳо дар масири Чин-Тоҷикистон аз сӯи ширкати "UTK International Logistics Co. Ltd" амалӣ карда мешавад. Ин ширкати муштараки Чин ва Узбекистон мебошад, ки соли 2025 ташкил шудааст.

Чин яке аз шарикони асоси тиҷоратии Тоҷикистон мебошад ва молу колои ду кишвар аз тариқи нақлиёт интиқол дода мешавад.

Пулиси Душанбе мегӯяд, ду тоҷир барои гарон фурӯхтани гӯшт, бо қарори додгоҳ панҷ шабонарӯз аз озодӣ маҳрум шуданд.

Ба иттилои расмӣ, Умед Раҷабов ва Файзулло Ҷалилов қаблан барои муътадил нигоҳ доштани нарх расман огоҳонида шуданд, аммо боз ҳам "дидаву дониста гӯштро ба шаҳрвандон бо нархи баланд" фурӯхтанд.

Назари ин ду соҳибкор ба қазия маълум нест. Пулиси Душанбе нагуфтааст, ки ин ду нафар гӯштро чанд сомонӣ зиёдтар аз нархи бозор ба савдо гузоштанд.

Пулиси Душанбе бо нашри ин хабар аз тоҷирони маҳсулоти хӯрокворӣ талаб кардааст, ки "аз худсарона баланд бардоштани нархи маҳсулот худдорӣ намоянд!"

Давоми панҷ рӯзи моҳи Рамазон ин ягона ҳолати ҷазо додани гӯштфурӯшон нест.

Рӯзи 19-уми феврал ва дар нахустин рӯзи моҳи Рамазон ду фурӯшандаи гӯшт дар пойтахт барои ба гуфтаи мақомот беасос боло бурдани нарх чор шабонарӯз аз озодӣ маҳрум шуданд. Аммо назари ин афрод ба қазия маълум нашуд.

Мақомоти Тоҷикистон аз роҳи таъйини нарх барои маҳсулоти хӯрокворӣ, аз ҷумла гӯшт талош доранд қиматҳоро танзим кунанд. Бархеҳо аз ин чиз интиқод карда мегӯянд, бигзор бозор нархро муайян кунад.

Додгоҳи олии Тоҷикистон Самандари Қаландар, додраси пешини ноҳияи Ҷалолиддин Балхиро бо иттиҳоми гирифтани пора чор сол аз озодӣ маҳрум кардааст. Дар ин бора як манбаъ аз Додгоҳи олӣ 24-уми феврал ба Радиои Озодӣ хабар дод.

Ба гуфтаи манбаъ, ҳукм аввали моҳи феврал содир шуда, додраси пешин аз болои он шикоят накардааст. Назари Самандари Қаландар ва наздиконаш ба ҳукм маълум нест ва талошҳои мо барои пайдо кардани назари онҳо то ин дам бенатиҷа буд.

Ҳамсуҳбати мо дар Додгоҳи олӣ гуфт, додраси пешин аз ҳукми содиршуда нисбаташ "қаноатманд аст".

Самандари Қаландар рӯзи 17-уми декабри соли 2025 бо фармони раисҷумҳури Тоҷикистон аз мақом ронда шуд. Сабаби барканории ӯро кирдоре донистанд, ки "шаъну эътибори судяро паст мезанад".

Рӯзи 23-юми феврал Оҷонсии мубориза бо фасод дар хабарномае навишт, ин додраси пешин ба гирифтани 75 ҳазор сомонӣ ришва муттаҳам шудааст. Дар ҳоле, ки назари Самандари Қаландар ва наздиконаш ба иттиҳом маълум нест, Оҷонси мубориза бо фасод гуфтааст, ӯ моҳи октябри соли 2025 барои сабук кардани ҷазои як шахс "пора" талаб кардааст.

Ба иттилои манбаъ, Самандари Қаландар "дар утоқи корияш, бори аввал 50 ҳазор сомонӣ ва бори дуюм 25 ҳазор сомонӣ гирифт."

Дар Тоҷикистон зиёда аз чорсад додрас кор мекунанд. Дар бештар аз даҳ соли гузашта зиёда аз сӣ нафари онҳо ба иттиҳоми ришвагирӣ боздошт ва бархе зиндонӣ шуда ё бо пардохти ҷарима озод гардидаанд.

Вазирони корҳои хориҷии Иттиҳоди Аврупо рӯзи 23-юми феврал бар сари бастаи 20-уми таҳримҳо алайҳи Русия ба тавофуқ нарасиданд.

Ин хабарро Кая Каллас, масъули сиёсати хориҷии Иттиҳоди Аврупо тасдиқ кард. Масъули сиёсати хориҷии ИА гуфт, "ин на он паёме буд, ки мехостанд" дар остонаи чорсолагии таҷовузи Русия ба Украина ирсол кунанд.

Маҷористон (Венгрия) ва Словакия ба ин тасмим мухолифат кардаанд. Барои тасдиқи бастаи таҳримҳо розигии ҳама аъзои Иттиҳоди Аврупо лозим аст.

Қаблан интизор мерафт, ки бастаи 20-уми таҳримҳо алайҳи Русия то рӯзи 24-уми феврал тасдиқ мешавад. Масъули сиёсати хориҷии Иттиҳоди Аврупо гуфт, кор дар ин самт идома дорад.

Маҷористон ё Венгрия мақомоти Украинаро ба қасдан зарар расондан ба хати лӯлаи нафти "Дружба" муттаҳам мекунад, ки роҳи асосии интиқоли нафти Русия ба Маҷористон ва Словакия буд. Ҷараёни нафт аз хати лӯлаи "Дружба" аз 28-уми январ ва пас аз ончӣ Украина "ҳамлаи паҳбодии Русия ба зерсохтҳои хати лӯла" эълон кард, қатъ шуд. Ба ғайр аз ин Киев мегӯяд, Маҷористон ва Словакия бо идомаи хариди нафт аз Русия, ҷанги Маскав алайҳи Украинаро сармоягузорӣ мекунанд.

Рӯзи 23-юми феврал намояндагони Маҷористон ҳамчунин аз тасдиқи 90 миллиард евро қарзи Иттиҳоди Аврупо ба Украина худдорӣ карданд.