Масъулони Оҷонси зиддифасод рӯзи 15-уми август гуфтанд, бештаре аз ин ҳолатҳо дар ҳукуматҳои маҳаллӣ ва бахшҳои маорифу илм сабт шуд.

Хабарнигорон хостанд, ки номи мансабдорон фош шавад. Намояндагони Оҷонсӣ фақат аз ду мақоми маҳаллии сатҳи пойин ном бурданд. Яке раиси дастгоҳи ҳукумати ноҳияи Рашт ва дигаре мақоми ҳамсон дар вилояти Хатлон.

Сулаймон Султонзода, раиси Оҷонси мубориза бо коррупсия дар Тоҷикистон, рӯзи 15-уми август гуфт, "дар Сарраёсати иҷрои ҷазои ҷиноии Вазорати адлия, Вазорати корҳои дохилӣ, Вазорати мудофиа, Кумитаи ҳолатҳои фавқулода, Хадамоти гумрук ва дар ҳокимияти судӣ низ ҷиноятҳои коррупсионӣ сабт шудааст."

Ойниҳол Бобоназарова, ҳуқуқдони тоҷик, мегӯяд, рақамҳои пешниҳодӣ асли вазъиятро бозгӯ намекунанд. Вай бовар дорад, дар асл мавридҳои фасоди молӣ дар идораҳои давлатӣ бамаротиб бештар аз ин аст.

“Вақте ҷазо намегиранд, парво намекунанд, масъулият ҳис намекунанд. Медонанд, ки барои ин кор ба онҳо ҳеч чиз намешавад. То замоне ки шахс ва роҳбараш барои чунин кор ҷазо нагирад, вазъ тағйир намеёбад. Дар мо анъанаи масъулиятшиносӣ вуҷуд надорад. Барои ҳамин бе ҳарос корашонро идома медиҳанд,” – афзуд ӯ.

Бар асоси радабандии созмони Trancparency International ё Шаффофияти Байнулмилал, Тоҷикистон аз байни 180 кишвари ҷаҳон дар ҷойи 151 ва дар миёни 30 кишвари дорои бадтарин сатҳи фасод қарор дорад.

“Аксарият дар Тоҷикистон бовар доранд, ки порагирӣ, азхудкунии пули давлат, сустии ҳукумат барои решаканкунии фасод, хешутаборбозӣ ва мавридҳои дигар аз масоили паҳншуда мебошад,” – хулоса кардааст Шаффофияти Байнулмилал.

Латиф Ҳадязода, фаъоли ҷомеаи шаҳрвандии Тоҷикистон, ки солҳои охир бемор буд, дар ҳафтодсолагӣ даргузашт.

Маросими видоъ ва дафни ӯ рӯзи даҳуми апрел дар Душанбе баргузор шуд.

Ҳадязода раиси ташкилоти "Тамаддун" ва аз бунёдгузорони Анҷумани созмонҳои ғайридавлатии Тоҷикистон буд ва чанд дафъа дар масъалаҳои гуногун бо Радиои Озодӣ суҳбат кардааст.

Аз ҷумла, соли 2014, вақте Шӯрои уламои Тоҷикистон дигарандешӣ, эътироз ва балворо "гуноҳи кабира" хонд, Латиф Ҳадязода гуфт, “асри 19 нест. Давлати мо ҳам давлати динӣ нест.”

Аз он пеш, дар соли 2010 ва дар пайванд ба кори вакилони порлумон чунин гуфта буд: "Аксар вакилоне, ки интихоб мешаванд, мутаассифона, ё вакилони гузашта ҳастанд ё он нафароне, ки дар мақомот ё раҳбарӣ буданд, аммо кори намоёну шоистае накардаанд. Дар натиҷа, ин ҳам электорати моро як андоза дилсард кардааст."

Латиф Ҳадязода дар гузашта дар Радиои Тоҷикистон ва Пажӯҳишгоҳи забон ва адабиёти ба номи Рӯдакӣ кор карда, дар Афғонистон афсари тарҷумон будааст.

Амчигул Амиршоева, модари Тӯтишо Амиршоев, ҷавоне, ки соли 2021 дар эътирозҳои Хоруғ кушта шуда буд, дар Русия дастгир ва ба мақомоти Тоҷикистон супурда шудааст.

Манобеи Радиои Озодӣ рӯзи 10-уми апрел гуфтанд, ки Амчигул Амиршоева пас аз кушта шудани фарзандаш мақомоти тоҷикро дар шабакаҳои иҷтимоӣ танқид мекард ва дар пайгард қарор дошт. Ба гуфтаи онҳо, ин зан ҳоло дар як боздоштгоҳ дар шаҳри Душанбе қарор дорад.

Мақомоти Тоҷикистон ҳанӯз хабари боздошт ва Душанбе оварда шудани Амчигул Амиршоеваро тасдиқ ё рад накардаанд.

Рӯзноманигори мустақил Анора Саркорова, ки ҳодисаҳои Вилояти Мухтори Кӯҳистони Бадахшонро пайгирӣ мекунад, 9-уми апрел дар Фейсбук навишт, ки ин зан бо дархости ҷониби Тоҷикистон рӯзи 6-уми апрел дар Русия боздошт ва маҷбуран ба Душанбе оварда шудааст.

Ба навиштаи ӯ, дар боздошти Амиршоева кормандони мақомоти ҳифзи ҳуқуқи Русия ва Тоҷикистон иштирок доштаанд.

Амчигул Амиршоева пас аз марги фарзандаш ба Русия рафта, дар онҷо кору зиндагӣ мекард.

Ба гуфтаи наздиконаш, Тӯтишо Амиршоеви 23-сола рӯзи 25-уми ноябри соли 2021 дар Хоруғ дар як эътирози осоишта аз ҷониби нерӯҳои амниятӣ кушта шуд, вале мақомот пайваста мегӯянд, онҳоеро “безарар карданд", ки муқобилияти мусаллаҳона нишон додаанд.

Амчигул Амиршоева зодаи ноҳияи Роштқалъаи Бадахшон пайваста дар шабакаҳои иҷтимоӣ навору акс аз писараш нашр карда, мақомоти тоҷикро танқид мекард.

Эътирозҳо дар Хоруғ рӯзи 25-уми ноябри соли 2021 пас аз он сар шуд, ки як сокини 29-солаи ноҳияи Роштқалъа Гулбиддин Зиёбеков дар амалиёти мақомот кушта шуд. Сокинон дар Хоруғ аз мақомот хостанд, омилони қатли Зиёбековро дастгир кунанд.

Ин эътирозҳо, ки аз охири соли 2021 то нимаи соли 2022 давом кард, дар умум боиси боздошт ва кушта шудани даҳҳо сокини Вилояти Мухтори Кӯҳистони Бадахшон шуд.

Як марди 50-сола аз Тоҷикистон ба дастдарозӣ ва талоши таҷовуз ба номуси духтари 13-сола дар Бритониё айбдор шудааст.

Аз ӯ Абдулманнон Алиев ном бурда мешавад. Мавқеи мард ва наздиконаш ба боздошту иттиҳоми зидди ӯ маълум нест. Ҳукми додгоҳ рӯзи 17-уми июни имсол содир хоҳад шуд.

Пулиси Лондон 9-уми апрел хабар дод, ки Абдулманнон Алиев моҳи июни соли 2025 дар дохили қатор (поезд) нисбат ба як духтари ноболиғ ба “ҷинояти нафратовар” даст зада, ба “дастдарозӣ, се мавриди талоши робитаи ҷинсӣ ва қасди таҷовуз ба номус муттаҳам аст”.

Мақомоти Бритониё гуфтаанд, ин мард дар аввал талош кардааст, бо духтари ҷавон, ки аз Саутенд ба Лондон мерафт, бо тарҷумони онлайнӣ суҳбат кунад. “Духтари ноболиғ аз ӯ фирор карда, ҷойи нишасташро тағйир дод, вале Алиев ӯро таъқиб карда, дар паҳлӯяш нишаст ва ба ӯ иҷозаи ҳаракат надод,” – гуфта шудааст дар хабарномаи пулис.

Дар идома омадааст, “Алиев ба наврас дарафтода, ӯро то расидан ба Лондон озори ҷинсӣ додааст. Духтар пас аз пойин шудан аз қатор ҳодисаро ба дигарон нақл кард ва онҳо ба полис хабар доданд.”

Маъмурони пулис марди тоҷикро рӯзи 27-уми июни соли гузашта дар як маҳаллаи канори Лондон пайдо ва боздошт кардаанд. Элизабет Кэхил, муфаттиши пулиси Лондон, гуфтааст, Алиев нисбат ба як кӯдак ҷинояти “нафратовартарин”-ро раво дид. Ӯ ин мардро “даррандаи манфур” номидаааст, ки “дар пайи шуҷоат нишон додани ҷабрдида чеҳрааш ошкор шуд”.

Расонаҳо навори лаҳзаи боздошти мардро нашр кардаанд. Дар он дида мешавад, ки ӯ зоҳиран забони англисиро намедонад ва нафаре бо забони англисӣ мегӯяд, ки "ҳоло далели боздоштро барояш тарҷума мекунад".

Назари наздикони ин мард дар Тоҷикистон ба боздошти ӯ дар Лондон маълум нест. Вай дар саҳифааш дар Фейсбук аз соли 2023 ба ин сӯ чанд аксро аз Лондон нашр карда, ҷойи зисташро ин шаҳр сабт кардааст. Маълум нест, ӯ аз кадом тариқ ба Бритониё рафтааст ва онҷо чӣ кор мекунад.

Ҳанӯз дақиқ нест, ки додгоҳ нисбат ба ӯ чӣ ҳукм содир хоҳад кард, вале барои муттаҳамони чунин ҷиноят дар Бритониё маъмулан ҷазои сангин медиҳанд.

Камол Харрозӣ, собиқ вазири корҳои хориҷии Эрон ва раиси Шӯрои раҳбурдии сиёсати хориҷии Ҷумҳурии исломӣ, беш аз як ҳафта пас аз ҳадаф қарор гирифтан дар ҳамлаи Исроил ба хонааш дар Теҳрон, даргузашт.

Рӯзи 1 апрел хонаи Камол Харрозӣ ҳадафи як ҳамла қарор гирифт, ки дар ҷараёни он, ҳамсари вазири хориҷии пешини Эрон кушта шуд, аммо худи ӯ ба шиддат маҷрӯҳ шуда буд ва дар бемористон қарор дошт.

Камол Харрозӣ, ки дар замони даргузашт 82-сола буд, даҳ сол раҳбарии Хабаргузории давлатии "ИРНА"-ро бар ӯҳда дошт ва пас аз он, ҳашт сол сафири Ҷумҳурии исломӣ дар СММ буд.

Камол Харрозӣ дар даврони президентии Муҳаммад Хотамӣ, аз 20 августи соли 1997 то 24 августи соли 2005 вазири корҳои хориҷии Эрон буд.

Дар солҳои ахир ба унвони раиси Шӯрои раҳбурдии сиёсати хориҷӣ ва мушовири Алии Хоманаӣ, раҳбари пешини Ҷумҳурии исломӣ, шинохта мешуд.

Вакилони Думаи давлатии ё порлумони Русия талош доранд сабабҳо ё асос барои рондани муҳоҷиронро ду баробар бештар кунанд. Дар ин бора Вячеслав Володин, раиси Думаи давлатии Русия дар телеграмканали худ хабар дод.

Вай таъкид кард, ки тарҳи қонуни нав дар ин бора барои баррасӣ омода мешавад. Ба таъкиди ӯ, аз соли 2024 дар кишвар барои сахттар кардани сиёсати муҳоҷират 22 қонун қабул шудааст. Аксари ин қонунҳоро вакилони порлумон бо ҳадафи пешгирӣ аз вуруди муҳоҷирони ғайриқонунӣ ба Русия омодаву пешниҳод кардаанд.

Дар ҳоли ҳозир, муҳоҷирон дар Русия бар асоси 22 моддаи Кодекси ҳуқуқвайронкунии маъмурӣ ихроҷ карда мешаванд. Аз ҷумла, барои нақзи қоидаҳои муҳоҷират, даст доштан дар қочоқи маводи мухаддир ва дигар қонуншиканиҳо.

Аммо дар лоиҳаи нави қонун пешниҳод шудааст, ки бар асоси 43 модда муҳоҷирон бояд аз кишвар хориҷ карда шаванд. Яъне вакилон мехоҳанд, барои нақзи тартиботи ҷамъиятӣ, итоат накардан ба талаби маъмурони пулис ва эҷоди монеа дар кори нақлиёту зерсохторҳо низ муҳоҷиронро ихроҷ кунанд.

Ба иттилои Вазорати корҳои дохилии Русия, соли гузашта 72 ҳазор муҳоҷир барои қонуншиканӣ аз ин кишвар ронда шудаанд.

Сездаҳ зодаи Осиёи Марказиро дар Амрико боздошт карданд. Бино ба иттилои Шабакаи телевизионии 11 News, муҳоҷирон дар аёлати Пенсилвания аз сӯи кормандони Хадамоти муҳоҷират ва назорати гумруки ИМА (ICE), дастгир шудаанд.

Ба навиштаи расонаҳои маҳаллӣ, ҳодиса дар пайи шикояти сокинон ба пулис сурат гирифтааст.

Зодаҳои Қирғизистон, Узбекистон ва Туркманистон бо мошинҳои борбари худ дар назди маркази додани санади ронандагӣ дар шаҳри Киттэнинг ҷамъ омадаанд ва ин мардуми маҳаллиро нигарон кард ва сабаби муроҷиат ба пулис шуд.

Ба иттилои мақомот, дар миёни муҳоҷирони боздоштшуда афроде будаанд, ки ягон санади расмӣ барои будубош дар Амрикоро надоштаанд.

Шабакаи телевизионии ABC гузориш дод, ки яке аз боздоштшудагон ҳангоми амалиёт саркашӣ ва ба корманди мақомоти ҳифзи ҳуқуқ ҳамла кардааст. Чанд нафари дигар мошинҳои худро партофта, пинҳон шудаанд. Ҳоло маълум нест, ки боздоштшудаҳо дар куҷо нигаҳдорӣ мешаванд.

Боздошт ва ихроҷи муҳоҷирони ғайриқонунӣ аз қаламрави ИМА аз сиёсатҳои президент Доналд Трамп аст. Рӯзи 11 март 72 зодаи Узбекистонро барои будубоши ғайриқонунӣ аз Иёлотти Муттаҳидаи Амрико ба ватанашон баргардонданд.

Президенти Иёлоти Муттаҳида эълон кард, ки нерӯҳои амрикоӣ то замони даст ёфтан ба як "созиши ҳақиқӣ" дар "дохил ва атрофи Эрон" хоҳанд монд.

Зеро ба бовари Трамп, оташбаси шикананда байни Амрико ва Эрон асосан бинобар ончи Вашингтон "суитафомҳум" дар мавриди онки оё ин оташбас шомили "Ҳизбуллоҳ"-и Лубнон мешавад, номуайян аст.

"Ҳизбуллоҳ"-и Лубнон, ки як гурӯҳи ниманизомӣ аст, аз сӯи Эрон ҳимоят мешавад ва Амрикову Исроил онро гурӯҳи террористӣ медонанд. Ин гурӯҳ дар порлумони Лубнон намояндагони худро дорад.

Доналд Трамп рӯзи 8-уми апрел дар шабакаи Truth Social айни ҳол ибрози боварӣ кард, ки созиши пойдор бо Эрон ба даст хоҳад омад ва иҷро хоҳад шуд.

Ӯ афзуд, агар ба ҳар далеле чунин нашавад, ки ба гуфтаи ӯ "аз эҳтимол дур" аст, даргирӣ дар сатҳе "бисёр калонтар, бартар ва қудратмандтар аз ҳар ончӣ то кунун дида шудааст", оғоз хоҳад шуд.

Қарор аст ҳайатҳои Эрон ва Амрико рӯзи 10-уми апрел дар Исломобод, пойтахти Покистон пойи мизи музокирот биншинанд. Тарафҳо баъд аз 40 рӯз ҷанг, 8 апрел ба оташбаси дуҳафтаӣ розӣ шуданд.

Бо вуҷуди онки Амрико ва Эрон ҳар ду дар ҷанге, ки шаш ҳафта давом кард ва ҳазорон кушта ба ҷой гузошт, эълони пирӯзӣ кардаанд, ихтилофоти асосӣ ҳанӯз ҳал нашудааст ва ҳар ду тараф ба хостаҳои худ барои даст ёфтан ба созише, ки метавонад ояндаи Ховари Миёнаро шакл диҳад, пофишорӣ мекунанд.

Мақомот ба таҳқиқи куштори Зиёратшо Қаландаров, раиси пешини "совхози 40-солагии Камароб" дар минтақаи Рашт, шуруъ кардаанд.

Ин ҳодиса дар соли 1994 дар авҷи ҷанги дохилии Тоҷикистон рӯй дода, яке аз гумонзадҳо Шарифи Ширинҷон нав дастгир шудааст.

Шарифи Ширинҷон, машҳур бо лақаби "Шарифи Каллабур", яке аз размандагони собиқи нерӯҳои мухолифин будааст.

Талоши мо барои суҳбат бо наздикони ӯ натиҷа надод.

Зоиршо Қаландаров, писари Зиёратшо Қаландаров, рӯзи 9-уми апрел ба Радиои Озодӣ гуфт, дар қатли падараш ду нафари дигар гумонзад ҳастанд.

"Чанде пеш Шарифи Ширинҷонро ба хонаи мо оварда, дар бораи шеваи ба қатл расондани падарам пурсиданд ва ба навор гирифтанд. Гуфт, се нафар буданд ва мусаллаҳ. Вориди хонаи мо шуда, падарамро куштаанд," – афзуд Зоиршо Қаландаров. Худи ӯ дар вақти ҳодиса ҳашт сол доштааст.

Ангезаи куштор маълум нест.

Мақомоти ҳифзи ҳуқуқ бо далели идомаи тафтиши ҳодиса ҷузъиётро нагуфтанд.

Пайвандони Зиёратшоҳ Қаландаров мунтазири таҳқиқи пурра ва мунсифона ҳастанд.

ИНЧУНИН, БИХОНЕД:

Рӯйхат. Номи гуруҳе аз қурбониён ва гумшудаҳои ҷанги дохилии Тоҷикистон

Мақомоти Тоҷикистон дар гузашта дар бораи боздошт ва ҳабси баъзе аз афроди муттаҳам ба содир кардани ҷиноят дар замони ҷанги дохилӣ хабар додаанд.

Аз ҷумла, Додгоҳи шаҳри Бохтар ду сол пеш Юсуф Солиҳов, сокини ноҳияи Хуросонро бо гуноҳи куштори гурӯҳӣ дар замони ҷанги шаҳрвандӣ дар Тоҷикистон ба 12 сол зиндон маҳкум кард.

Баъзе аз ҷиноятҳои ҳодисаи сӣ сол пеш дар Тоҷикистон ҳанӯз нокушода мондааст.

ИНЧУНИН, БИХОНЕД:

15 сол ҳабс барои қатли 22 кас. Тағйири ҷазои "муҳофизи Хӯҷа Командир"

Мақомоти Қирғизистон мегӯянд, ният доранд имсол 580 шаҳрванди ин кишварро, ки дар зиндонҳои Русия адои ҷазо мекунанд, барои идомаи маҳкумият ба ватан баргардонад.

Дар ин бора Максат Асаналиев, Додситони кулли Қирғизистон рӯзи 7-уми апрел дар порлумон гуфт, ҳоло дар ин маврид корҳо идома доранд.

Ба гуфтаи ӯ, ҳадаф ин аст, ки ин маҳкумшудаҳо мӯҳлати боқимандаи адои ҷазоро дар маҳбасҳои дохили Қирғизистон гузаронанд.

Ба иттилои Додситони кул, дар ҳоли ҳозир беш аз 1423 шаҳрванди Қирғизистон дар зиндонҳои хориҷи кишвар қарор доранд. 1126 нафари онҳо дар зиндонҳои Русия адои ҷазо мекунанд. Аксари онҳо бо иттиҳоми қочоқи маводи мухаддир маҳкум ба зиндон шудааст.

Дар ду соли гузашта ҳудуди 350 зиндониро аз Русия ба Қирғизистон истирдод додаанд.

Маҳбусон ва наздикони онҳо аз кишварҳои Осиёи Марказӣ борҳо аз мақомоти кишварҳои худ хостанд, онҳоро барои идомаи адои ҷазо ба ватан баранд.

Дар порлумони Қирғизистон ҳам ин мавзӯъ чандин бор матраҳ шудааст.

Масъуд Пизишкиён, президенти Эрон, ба Шаҳбоз Шариф, нахуствазири Покистон, гуфтааст, ки мақомоти ин кишвар рӯзи 10-уми апрел барои музокирот бо Иёлоти Муттаҳида ба Исломобод сафар хоҳанд кард.

Дафтари матбуоти нахуствазири Покистон, рӯзи 8-уми апрел хабар дод, ки раҳбарони ду кишвар 45 дақиқа “гуфтугӯи гарму самимӣ” доштаанд.

Шаҳбоз Шариф пас аз тамоси телефонӣ дар шабакаи иҷтимоии “X” навишт, ки “президент Пизишкиён иштироки Эронро дар музокироти оянда таъйид кард ва аз талошҳои Покистон изҳори сипос намуд”.

Пештар, ӯ эълон карда буд, ки ҳайатҳои ИМА ва Эронро барои рӯзи 10-уми апрел ба Исломобод даъват кардааст, то “ҷиҳати дастёбӣ ба созиши ниҳоӣ барои ҳалли ҳамаи баҳсҳо суҳбати бештар анҷом диҳанд”.

ИСНО, хабаргузории нимрасмии Эрон гузориш дод, ки Муҳаммадбоқири Қолибоф, раиси порлумони ин кишвар ҳайати кишварро раҳбарӣ хоҳад кард.

Иёлоти Муттаҳидаи Амрикоро дар ин гуфтушунид эҳтимол Ҷей Ди Вэнс, муовини президенти ИМА намояндагӣ кунад.

Бо вуҷуди ин, ҷузъиёти мазкур ҳанӯз аз ҷониби ҳукуматҳои ИМА ё Эрон расман тасдиқ нашудааст.

ИМА ва Исроил рӯзи 28-уми феврал ба Эрон ҳамла карданд. Ин ду кишвар эълон карданд, ки Эрон дар пайи сохтани силоҳи ҳастаӣ ҳаст ва бояд аз он пешгирӣ шавад. Эрон борҳо сохтани силоҳи ҳастаиро рад кардааст. Ҷанг беш аз як моҳ давом кард. Рӯзи 8-уми апрел ду кишвар ба оташбас барои ду ҳафта розӣ шуданд, то шартҳои ҳамдигарро барои хатми пурраи ҷанг баррасӣ кунанд.

Иёлоти Муттаҳидаи Амрико ва Тоҷикистон ба тавофуқ расидаанд, ки давоми панҷ соли оянда барои мубориза ва пешгирӣ аз бемориҳои сироятӣ, аз ҷумла сил ва ВНМО (ВИЧ/СПИД), 78 миллион доллар сарф хоҳанд кард.

Дар умум, дар панҷ соли оянда ИМА ба Тоҷикистон 38 миллион доллар медиҳад ва Тоҷикистон низ ваъда додааст, ки дар ин муддат барои беҳтар кардани сифати хидматрасонии тиббӣ 40 миллион доллар аз буҷаи худ сарф хоҳад кард.

Сафорати ИМА дар Тоҷикистон рӯзи 7-уми апрел хабар дод, ки дар ин бора “тафоҳумномаи дуҷонибаи панҷсола” имзо кардаанд.

Дар хабарнома гуфта мешавад, ки ин тасмим дар доираи барномаи “Аввал Амрико”, стратегияи маъмурияти Трамп, бо ҳадафи ҳифзи сиҳати дар саросари ҷаҳон гирифта шудааст.

Дар хабарнома гуфта шудааст, ки ҳадаф беҳтар кардани хидмарасониҳои тиббӣ ва “таъмини амнияти устувор дар соҳаи тандурустӣ барои аҳолии Тоҷикистон ва Иёлоти Муттаҳидаи Амрико” мебошад.

Ба гуфтаи Сафорат, бо кӯмаки ИМА Тоҷикистон барои бунёди низоми миллӣ барои сари вақт ошкор кардани бемориҳои сироятӣ талош хоҳад кард.

ИМА дар чаҳорчуби стратегияи “Аввал Амрико” бо 29 кишвари дигари ҷаҳон низ ёддошти тафоҳум барои ҳамкорӣ дар соҳаи тандурустӣ имзо кардааст.

Намояндагии Вазорати меҳнат, муҳоҷират ва шуғли аҳолии Тоҷикистон дар Русия муҳоҷирони тоҷикро огоҳ кардааст, ки барои бе мушкил ворид шудан ба Русия, расмиёти заруриро ҳанӯз пеш аз сафар дар дохили кишвар анҷом диҳанд.

Ба иттилои ин ниҳод, бо ворид шудани тағйир дар қонунгузории Русия ва пурзӯр шудани назорат дар ин кишвар, муҳоҷиронро зарур аст, ки пеш аз сафар дар Хадамоти шиносномадиҳӣ ва раводиди ВКД-и Русия дар Душанбе, аз қайди дактилоскопӣ ва аз ташхиси тиббӣ гузарашта, бисанҷанд, ки вурудашон ба Русия манъ аст ё на.

Ҳамчунин мақомоти тоҷик таъкид кардаанд, ки барои бе мушкил ва интизорӣ гузаштани муҳоҷир аз марз вай бояд тавассути замимаи мобилии "Госуслуги" пешакӣ дархост пешниҳод кунад ва пас аз бақайдгирӣ ва дарёфти QR-коди махсус, раванди санҷиши ӯ дар марз зудтар хоҳад шуд.

Ин тавсия ва ҳушдор дар ҳолест, ки моҳҳост муҳоҷирони тоҷик аз мушкил дар фурудгоҳҳои Русия ва соатҳои тӯлонии интизорӣ барои роҳ ёфтан ба ин кишвар шикоят мекунанд.

Пас аз санҷиши чандинсоата, дар бисёр мавридҳо муҳоҷиронро аз фурудгоҳ хориҷ карда, ба ватан бармегардонанд.

Мироҷ Абдуллоев, раиси 78-солаи Ҳизби коммунист ва номзад ба мансаби президенти Тоҷикистон дар соли 2020, даргузаштааст.

Хабаргузории "Азия-Плюс" навишт, ки маросими видоъ ва дафни ӯ 8-уми апрел дар Кӯлоб баргузор мешавад.

Абдуллоев дар гузашта дар мақомоти умури дохилӣ, Оҷонси мубориза бо қочоқи маводи мухаддир ва идораҳои дигари ҳукуматӣ кор карда, қариб нуҳ сол пеш раёсати Ҳизби коммунистро бар дӯш гирифт.

Шарҳи ҳолаш бозгӯйи он аст, ки ӯ то соли 2017 таҷрибаи кор дар Ҳизби коммунисти Тоҷикистонро надошт. Соли 2017 раҳбари созмони иҷтимоии "Ҳомиёни ватан", як иттиҳоди бознишастаҳои мақомоти интизомӣ буд.

Ҳизби коммунист, ки дар замони Иттиҳоди Шӯравӣ ҷилави ҳукуматро ба даст дошт, пас аз пош хӯрдани он қудратро аз даст дод ва ба гуфтаи баъзе аз коршиносон ба “як созмони куҳансолони сарсупурдаи идеологияи коммунистӣ” табдил ёфт.

Мироҷ Абдуллоев як муддат вакили Маҷлиси Намояндагони Тоҷикистон буд.

Дар интихоботи президентии соли 2020 вориди рақобат шуд, аммо бо дарёфти каме бештар аз як дарсад раъй шикаст хӯрд.

Раисҷумҳури Амрико чанд соат пеш аз поёни муҳлате, ки ба Ҷумҳурии Исломии Эрон барои боз кардани гулӯгоҳи Ҳурмуз дода буд, дар паёми наве таҳдид кард, ки “имшаб як тамаддуни комил аз байн хоҳад рафт”.

Доналд Трамп 7-уми апрел дар шабакаи Truth Social навишт, “намехоҳам чунин иттифоқе биуфтад, аммо эҳтимол рух хоҳад дод.”

Вай ҳамзамон афзуд: “Акнун ки тағйири комили режим рух дода ва андешаҳои дигаргун, ҳушмандтар ва камтар ифротӣ ғолиб шудаанд, шояд чизи шигифтангезе ба тарзи инқилобӣ иттифоқ биуфтад. Имшаб хоҳем фаҳмид. Яке аз лаҳзаҳои муҳимтарин дар таърихи тӯлонӣ ва печидаи ҷаҳон. 47 соли тамаъҷӯӣ, фасод ва эъдом дар ниҳоят ба поён хоҳад расид.”

Президенти Амрико шарҳ надод, аммо дар поёни паёми худ навишт: “Худо мардуми бузурги Эронро нигаҳ дорад.”

БЕШТАР БИХОНЕД: ДАР ЭРОН ЧӢ МЕГУЗАРАД?

Ин изҳорот дар идомаи ҳушдорҳои тунди Доналд Трамп дар нишасти хабарии 6-уми апрел дар Кохи Сафед аст. Ӯ дар он нишаст таҳдид карда буд, ки дар сурати ба созиш нарасидан барои поёни ҷанг ва бозкушоии гулӯгоҳи Ҳурмуз, Иёлоти Муттаҳида метавонад нерӯгоҳҳо ва пулҳои Эронро ҳадаф қарор диҳад.

Дар ҳамин ҳол, Сипоҳи посдорони инқилоби исломии Эрон ҳушдор дод, ки посухаш ба иқдоми эҳтимолии Амрико “фаротар аз минтақа” хоҳад буд.

Сипоҳ дар баёнияе 7-уми апрел бо лаҳни тунд ба кишварҳои “шарики Амрико” дар минтақа ҳушдор дод, ки бо зерсохтҳояшон коре хоҳад кард, ки “Иёлоти Муттаҳида ва ҳампаймонҳояш солҳо аз нафт ва гази минтақа маҳрум шаванд”.

Зарбулаҷали таъйиншуда барои ҳукумати Эрон бомдоди 8-уми апрел ба поён мерасад.

То кунун хабарҳои тасдиқношуда аз ҷараён доштани гуфтшуниди маҳрамона миёни ду тараф бо миёнравии ниҳодҳои амниятии баъзе аз кишварҳо, аз ҷумла Покистон нашр шуд.

Ҳамзамон ҳамлаҳои Исроил ва Амрико ба ҳадафҳои гуногун дар гӯшаҳои мухталифи Эрон ҳамчунон бо шиддат идома дорад.

Дар тирпаронӣ дар назди консулгарии Исроил дар Туркия ду кас кушта шудааст. Ҳодиса рӯзи 7-уми апрел дар шаҳри Истанбул рӯй дод.

Нашрияи "Ҳуррият" навишт, се нафар бо силоҳ ба биное ҳамла кардаанд, ки дар яке аз ошёнаҳояш консулгарии Исроил ҷойгир буд.

Ба иттилои манбаъ, нерӯҳои амниятӣ ва пулиси Туркия ду ҳамлагарро кушта ва нафари севумро дастгир кардаанд. Ӯ сахт захмист.

Дар ин ҳодиса ду корманди пулис низ ҷароҳат бардоштанд.

Як манбаъ дар ҷомеаи яҳудиёни Истанбул ба нашрияи "The Jerusalem Post" гуфтааст, консулгарӣ беш аз ду сол боз баста буд ва эҳтимол ҳангоми ҳодиса дар он ҷо дипломатҳо ҳузур надоштанд.

Мақомоти Туркия ҷузъиётро дар бораи сабаб ё ангезаи тирпаронӣ нашр накардаанд.

Вазорати корҳои хориҷии Исроил низ иттилоъро дар бораи ин ҳодиса мавриди санҷиш қарор додааст.