«Моро раис даъват кард. Рафтем. Шогирдаш омаду гуфт, ки ҷойҳоятонро худатон ёбед. Ман ба пеши раис ду бор бо арзу шикоят рафтам. Модари танҳоям, шароит надорам, куҷо равам, як тикка нони қоқро аз ҳаминҷо меёбам,» -- гуфт Бибисоро Давлатова, савдогари бозори “Саховат”-и Кӯлоб.
Фурӯшандаҳо дар як номаи дастҷамъӣ ба ҳукумати Кӯлоб шикоят бурдаанд, ки аб мушкили онҳо расидагӣ кунад. Зери он 40 нафар имзо гузоштааст.
Масъулони бозор иддаои савдогаронро беасос мехонанд. Раиси бозор мегӯяд, «танҳо шаш савдогар аз ҷояш хезонда мешавад». Ӯ ҳангоми супурдани огоҳинома гуфт, ҳеҷ касро аз бозор пеш нахоҳанд кард.
«Маро прокурор даъват кард ва гуфт, ки бару огоҳинома диҳ. Инҳо имзо накарда истодаанд,» -- гуфт Акбар Алимов, раиси бозори “Саховат”-и Кӯлоб.
Савдогарон мегӯянд, бо маҳрум шудан аз нуқтаи фурӯш дигар намедонанд ба куҷо раванд. Аз ҷумла Анварбӣ Насимова, ки бо фурӯши чаккаву хӯриш зиндагияшро пеш мебарад.
Ӯ гуфт: “Мегӯянд, соҳибкорони хурду миёнаро дастгирӣ кунед. 30 сол мешавад, ки дар бозор мешинам. Нонамон аз ҳамин ҷост. Имрӯз мегӯянд, ки ҷойро холӣ кунед.”
Бори аввал нест, ки дар Кӯлоб савдогарон аз тасмими раисони бозор эътироз мекунанд. Моҳи майи имсол дар пайи тасмими ҳамсон савдогарони бозори «Лола» низ эътироз карда буданд.
Видеоро дар инҷо бинед:
Гуфтугӯ