Худи Кароматулло Раҳимзода моҳи июл дар пайи нашри хабарҳо дар бораи боз шудани парвандаи ҷиноӣ нисбаташ, онро рад карда буд.

Насриддин Низомзода, сардори Раёсати тафтишоти Оҷонсии назорати давлатии молиявӣ ва мубориза бо коррупсия рӯзи 9-уми август дар нишасти хабарӣ гуфт, санҷиш дар Филармонияи давлатӣ азхудкунии ин маблағро ошкор кард. Ба гуфтаи ин мақомдори Оҷонсӣ, дар ин иртибот нисбати се нафар -- муҳосиб, сармуҳосиби Филармонияи давлатӣ ва худи Раҳимзода парвандаи ҷиноӣ боз карда, барои баррасӣ ба додгоҳ фиристодаанд.

Ӯ шарҳ дод, ки ин афрод маблағҳо барои чорабиниҳои фарҳангӣ ҷудошударо азхуд кардаанд. Ба қавли ин масъули Оҷонсӣ, ҳарчанд зарари молӣ барқарор шуд, вале парванда қатъ нашудааст.

Ӯ дар посух ба пурсиши батакрори Радиои Озодӣ, ки чаро айбдоршаванда Кароматулло Раҳимзода дар озодист, посух дод, ки бар асоси қонун, аз ӯ забонхат гирифта шудааст.

Дар Оҷонсии назорати давлатии молиявӣ ва мубориза бо коррупсия гуфтанд, ки қарори ниҳоиро барои муҷозоти ӯ додгоҳ содир мекунад ва ин, ки парванда қатъ шудааст ё чунин парванда боз нашуда бошад, асос надорад.

Сафҳаи "Паёми Душанбе" рӯзи 9-уми июл бо такя ба дафтари матбуоти Оҷонсии зидди фасод дар саҳфаи фейсбукиаш навишт, ки Кароматулло Раҳимзода ва муҳосиби пешини Филармония ба азхудкунии 830 ҳазор сомонӣ (зиёда аз 78 ҳазор доллар) айбдор мешавад. Тақрибан баъд аз се соати нашраш "Паёми Душанбе" ин хабарро пок кард.

Ҳамзамон бо таҳияи ин нашри хабар, Радиои Озодӣ талош кард назари Кароматулло Раҳимзода ва хонаводаашро ба қазия фаҳмад. Раҳимзода дар суҳбати ҳузурӣ ба хабарнигорони Радиои Озодӣ хабари дастгир шаданаш ва боз ҳам мавҷудияти парвандаи фасодро нисбаташ рад кард. Ӯ дар суҳбати бидуни сабт тасдиқ кард, ки нисбати муҳосиби пешини Филармонияи давлатӣ, ки дар давраи роҳбарии ӯ кор мекард, парванда боз шудааст ва дар заминаи он зарари молӣ барқарор шуда буд. Кароматулло Раҳимзода танҳо гуфт, ӯро чанд дафъа ба бозпурсӣ даъват карда буданд.

Кароматулло Раҳимзода, падари Ситораи Кароматулло, овозхони шинохта аз соли 2020 то 2023 роҳбари Филармонияи давлатӣ буд. Ӯ солҳо дар бахши фарҳангу санъати Тоҷикистон, аз ҷумла дар Консерваторияи миллӣ ба ҳайси устод кор кардааст. Пеш аз директори Филармонияи давлатӣ шудан директори Мактаби мусиқии ба номи Миратулло Атоев буд.

Ба гузориши расонаҳои Русия, Ёқубҷон Юсуфзода аз Тоҷикистон ва яке аз маҳкумшудаҳои ҳамла ба "Крокус Сити Ҳол"-и Маскав дар боздоштгоҳ худкушӣ кардааст. Додгоҳи ҳарбии Русия тақрибан як моҳ пеш ӯро ба ҳабси якумрӣ маҳкум кард.

Хабаргузории расмии "Интерфакс" аз қавли Идораи зиндонҳо навишт, ки ҷасади Ёқубҷон Юсуфзодаро 6-уми апрел дар яке аз ҳуҷраҳои боздоштгоҳ ёфтанд. Дар ин ниҳод гуфтаанд, "ӯ худкушӣ кард".

Ба иттилои манбаъ, "пизишкон зуд ба ҷойи ҳодиса расида, аммо натавонистанд ӯро наҷот диҳанд. Дар робита ба ин воқеа санҷиш идома дорад."

Тасдиқи мустақилони хабар аз манбаъҳои дигар имконпазир нест.

Ёқубҷон Юсуфзода дар охири моҳи марти соли 2024 ҳангоми амалиёти “Нелегал” дар Русия дастгир шуд ва мақомот сипас гуфтанд, ки робитаи ӯ бо ҳамлаварон ба “Крокус Сити Ҳол”-и Маскав ошкор гашт. Мақомоти Русия ӯро ба он муттаҳам карданд, ки чанд рӯз пеш аз ҳамла барои таъмини ҳамлаварон бо ҷой “ба як шарикаш пул фиристодааст”.

Ба иттилои дарёфтии Радиои Озодӣ, Ёқубҷон Юсуфзода 26 сол дошта, соҳиби се фарзанд аст. Дар сохтмон кор мекардааст.

Додгоҳи ҳарбии Маскав моҳи марти имсол 15 гумонбари ҳамла ба толори "Крокус"-ро ба зиндони якумрӣ ва чаҳор тани дигарро аз 19 то 22 сол зиндон маҳкум кард. Шонздаҳ маҳкумшуда аз Тоҷикистон, як нафар аз Қирғизистон ва дуи дигар аз Ингушистон ҳастанд.

Азбаски мурофиаи онҳо паси дарҳои баста гузашт, мавқеашон ба айбнома ва ҳукм маълум нест. Пештар ҳомиёни ҳуқуқ латукӯб ва шиканҷаи баъзе аз гумонбарони ҳамла ба толори “Крокус”-ро танқид карда, дурустии иқрори онҳоро зери суол бурда буданд.

Дар ҳамлаи маргбор ба "Крокус Сити Ҳолл"-и Маскав 149 нафар куштаву садҳо тан захмӣ шуданд. Гурӯҳи ДОИШ ҳамларо кори дасти пайравонаш номид, вале далели возеҳе пешниҳод накард.

Мақомоти Русия бо баҳонаи ҳамла ба "Крокус" фишору азияти муҳоҷирон ва махсусан зодагони Тоҷикистонро ба маротиб афзоиш доданд. Садҳо муҳоҷири тоҷик бо шеваи таҳқиромез боздошту азият ва сипас ба ватан фиристода шуданд.

Бо гузашти ду сол аз ҳодиса ва эълони ҳукми гумонбарон, ин парванда ҳамчунон норӯшанӣ ва суолҳои зиёде дорад, ки дар шароити ҷомеаи бастаи Русия ба онҳо посух ёфтан мушкил аст.

Эрон як эътирозгареро, ки дар ҷараёни намоишҳои зиддиҳукуматии моҳи январ боздошт шуда буд, қатл кардааст.

Дар ин бора ҲРАНА, гурӯҳи ҳуқуқи башар бо такя ба "Мизон", нашрияи Додгоҳи Олии Эрон хабар додааст.

Мақомоти Эрон гуфтаанд, ки Алӣ Фаҳим рӯзи 6-уми апрел, пас аз таъйиди ҳукмаш аз ҷониби зинаи болоии додгоҳ, ба дор кашида шуд.

Ӯро ба он муттаҳам карда буданд, ки гӯиё дар ҷараёни эътирозҳо як пойгоҳи нерӯҳои Басиҷро оташ задааст. Созмонҳои ҳуқуқи башар ин иддаоро бепоя меноманд.

Алӣ Фаҳим нафари чорум аст, ки дар чанд рӯзи охир эъдом мешаванд.

Созмонҳои ҳомии ҳуқуқи инсон мегӯянд, эҳтимол чанд боздоштшудаи дигар, рӯзҳои оянда ба қатл маҳкум шаванд.

Ба гуфтаи ин созмонҳо, мақомоти Эрон боздоштшудаҳоро маҷбур мекунанд, то гуноҳеро эътироф кунанд ва баъдан додгоҳҳо ноодилона нисбат ба онҳо ҳукми қатл содир мекунанд.

Расонаҳои давлатии Эрон хабар доданд, ки рӯзи 6-уми апрел дар ҳамлаҳои ИМА ва Исроил ба ин кишвар 19 нафар кушта ва 20 нафар захмӣ шудаанд.

Хабаргузории давлатии ИРНА бо такя ба мақомоти маҳаллӣ хабар доданд, ки дар ноҳияи Шаҳриёр ва Баҳористон ба ду бинои истиқоматӣ ҳамла шудааст.

Наҷотдиҳандагон аз зери харобаҳо чанд ҷасадро берун кардаанд.

Тасним, хабаргузории наздик ба Сипоҳи Посдорони Инқилоби Исломӣ навиштааст, ки дар миёни кушташудагон 6 кӯдаки аз даҳсола поён низ ҳаст.

Тасдиқи мустақилонаи иддаои мақомоти Эрон дар шароити кунунӣ имконнопазир аст.

Аз сӯи дигар, расонаҳои Исроил рӯзи 6-уми апрел гузориш доданд, ки Эрон дар ҳамлаи мушакӣ ба Телавив аз бомби хӯшаӣ истифода кардааст. Бино ба иттилои хабаргузории “Ynet”, тақрибан дар 20 минтақа бархӯрди мушакҳо сабт шудааст.

Дар ин ҳамлаҳо чанд нафар ҷароҳат бардоштааст, ки вазъи яке аз онҳо сангин арзёбӣ мешавад. Як мактаб низ дар Исроил дар ҳамлаи рӯзи 6-уми апрел осеб дидааст.

Дар шаҳри Ҳайфаи Исроил дар ҳамлаҳои Эрон ду нафар кушта шуда, чанд воситаи нақлиёт оташ гирифтаанд.

Сипоҳи посдорони инқилоби исломии Эрон 6-уми апрел эълон кард, ки Маҷиди Ходимӣ, раиси созмони иттилоот ё "разведка"-и ин нерӯи низомӣ дар ҳамлаҳои Амрико ва Исроил кушта шудааст.

Мақомоти Ҷумҳурии Исломӣ ӯро шахсе номбар кардаанд, ки "ҳудуди ним қарн инқилоб, низом ва меҳани исломиро содиқона ва шуҷоона пос дошт".

Вазири дифои Исроил соате баъд аз эълони хабар гуфт, дар ҷараёни як ҷаласаи арзёбӣ бо раиси Ситоди артиш аз ин ҳамла хабардор шудааст.

Исроил Катс афзуд, "раҳбарони Эрон бо эҳсоси таъқиб ва таҳдид зиндагӣ мекунанд. Мо пайгирии ҳар яке аз онҳоро идома хоҳем дод."

Маҷид Ходимӣ дар тобистони порсол ва дар пайи кушта шудани Муҳаммад Козимӣ дар ҷанги 12-рӯзаи Исроилу Эрон ба раёсати созмони иттилооти Сипоҳ расид.

Вазорати хазонадории Амрико соли гузашта ӯро дар феҳрасти шахсони зери таҳрим қарор дод.

Мансабдорони Амрико созмони иттилооти Сипоҳро "сутуни корзори хушунати густарда, боздоштҳои худсарона ва иръоб (шантаж)" номиданд. Корзоре, ки бо ҳадафи аз байн бурдани мавҷи эътирозҳо дар Эрон анҷом шудааст.

Аз оғози ҷанг бо Эрон дастикам 7 ҳавопаймои ҷангии Амрико сарнагун шудааст.

Бино ба гузориши шабакаи телевизионии CNN, яке аз охирин ҳавопаймоҳои нобудшудаи ҷангӣ F-15E Strike Eagle аст, ки рӯзи 3-юми апрел аз ҷониби нерӯҳои Эрон сарнагун карда шуд.

Ҳавопаймои навъи А-10 Thunderbolt II ҳам, ки дар амалиёти наҷоти халабонҳои ҷангандаи F-15 ширкат мекард, мавриди ҳамла қарор гирифт.

Бино ба навиштаи CNN, рӯзи дуюми март се ҳавопаймои ҷангии навъи F-15 аз сӯйи нерӯҳои Кувайт нобуд карда шуд ва 12-уми март ҳавопаймои КС-135 дар Ироқ суқут карда, сабаби марги 6 нафар шуд.

Ҳамин тавр, рӯзи 27-уми март дар пайи ҳамлаи Эрон ба пойгоҳи ҳавоии Амрико дар Арабистони Саудӣ, ҳавопаймои дигари низомии Амрико, E-3 Sentry сарнагун шуд.

Рӯзи якшанбе хабар дода шуд, ки наҷотдиҳандагони амрикоӣ халабони дувуми ҳавопаймои сарнагуншудаи F-15-ро дар Эрон пайдо карданд. Телевизионии CBS News навиштааст, дар ҷарраёни амалиёти наҷот ИМА ду ҳавопаймои худро нобуд кард, то ба дасти нерӯҳои Эрон наафтанд.

Ҳангоми ҷустуҷӯйи тило дар Фондарё як сокини ноҳияи Айнӣ ба ҳалокат расидааст.

Идораи ҳолатҳои фавқулода дар Зарафшон гуфт, ҳодиса субҳи панҷуми апрел дар мавзеи оби Хуиҷи ҳамин ноҳия рух дод.

Ба иттилои манбаъ, ду сокини деҳаи Вотаи Урметан бо ҳадафи дарёфти тило ба мавзеи хатарноки дарё ворид шуда, яке аз онҳо ғарқ гардидааст.

Мақомот “риоя нагардидани қоидаҳои бехатариро ҳангоми убури дарё” сабаби ҳодиса номиданд.

Нафари дувумро, ки дар тарафи дигари дарё дармонда буд, наҷот додаанд.

Аз нафари фавтида ном бурда нашудааст ва ҷустуҷӯйи ӯ аз сӯйи кормандони Кумитаи ҳолатҳои фавқулода идома дорад.

Мусобиқаи байнулмилалии гуштигирӣ барои дарёфти «Ҷоми раиси шаҳри Душанбе», ки 5-уми апрел дар Қасри теннис ва маҷмааи варзишҳои обӣ баргузор шуд, бо пирӯзии паҳлавонон аз Тоҷикистон, Узбекистон ва Русия ба поён расид.

Дар ин мусобиқаи байнулмилалӣ, ки бори ҳафтум сурат гирифт, варзишгарон аз 25 кишвар дар вазнҳои -65 кг, -78 кг, -86 кг, +86 кг байни мардон ва дар вазни то 70- килограмм миёни занон рақобат карданд.

Дар сабқати мардон дар ду вазн паҳлавонони тоҷик –Ёсин Бобокалонов (-65 кг) ва Маҳмадшариф Наҷмиддинов (-78 кг) - ғолиб шуданд. Бобокалонов дар финал паҳлавони дигари тоҷик Сарвар Абдушукуровро мағлуб кард. Наҷмиддинов бошад, дар финал бар паҳлавони узбекистонӣ Умед Эсанов дастболо шуд.

Ҳамин тариқ, дар вазни то 65 кило Ёсин Бобокалонов медали тило, Сарвар Абдушукуров медали нуқра, Дилшод Буриев ва Артём Штурбабин, ҳарду аз Узбекистон, медалҳои биринҷӣ гирифтанд.

Дар вазни то 78 кило Маҳмадшариф Наҷмиддинов бо медали тило, Умед Эсанов бо медали нуқра, Қоим Шукронов аз Тоҷикистон ва Адилет Ахметгалӣ аз Қазоқистон бо медалҳои биринҷӣ сарфароз гардиданд.

Дар ду вазни дигар байни мардон гуштигирони Узбекистон Аҳрор Зиёдуллоев ва Шоҳруххон Бахтиёров бар намояндагони Тоҷикистон ғалаба карданд. Зиёдуллоев дар финали вазни то 86 кило бар Ҳақназар Назаров пирӯз шуд. Бахтиёров бошад, дар финали вазни +86 кило Шарифҷон Назриевро шикаст дод.

Дар вазни то 86 кило Аҳрор Зиёдуллоев бо медали тило, Ҳақназар Назаров бо медали нуқра, Ёқубҷон Назиров аз Русия ва Раҳматуллобек Фарҳодов аз Тоҷикистон бо медалҳои биринҷӣ мукофотонида шуданд.

Дар вазни беш аз 86 кило Шоҳруххон Бахтиёров медали тило, Шарифҷон Назриев медали нуқра, Бекмурод Олтибоев аз Узбекистон ва Ҳусейн Холмурзаев аз Русия медалҳои биринҷӣ гирифтанд.

Дар қувваозмоии ниҳоӣ миёни занон дар вазни то 70 кило Камила Бадурова бар ҳамватани худ Алёна Прокопенко пирӯзӣ ба даст оварда, бо медали тило сарфароз гашт. Прокопенко бо медали нуқра, Алина Молдоқулова аз Қирғизистон ва Юлия Гребеножко аз Украина бо медалҳои биринҷӣ мукофотонида шуданд.

Маблағи умумии ҷоизаҳои молии мусобиқа 100 ҳазор доллари амрикоиро ташкил медод. Барои ҷойи аввал 10 ҳазор доллар, барои ҷойи дуюм 5 ҳазор доллар ва барои ҷойҳои сеюм 2 ҳазору 500-долларӣ тақдим гардид.

Бояд зикр намуд, ки соли 2022 ба гуштии миллии тоҷикӣ – «гуштигирӣ» - мақоми байнулмилалӣ дода шуд. Ин мақом дар Вазорати адлияи Швейтсария ба қайд гирифта, гуштигирӣ соҳиби сертификати байнулмилалӣ гардид.

Доналд Трамп, президенти Амрико дигарбора ҳушдор дод, ки агар Теҳрон гулӯгоҳи Ҳурмузро боз накунад, ба зерсохторҳои ин кишвар зарбаи сахт хоҳад зад.

Ин изҳороти шадиди ӯ чанд соат пас аз эълони хабари наҷоти охирин халабони ҳавопаймои ҷангии F-15, ки дар Эрон сарнагун шуд, садо дод.

Трамп дар шабакаи иҷтимоии "Truth Social" бо лаҳни бисёр шадид ва дурушт навишт: "Рӯзи сешанбе дар Эрон "Рӯзи неругоҳҳо" ва "Рӯзи пулҳо" хоҳад буд. Чизе шабеҳи онро то ҳол надидаед!!! гулӯгоҳи лаънатиро боз кунед, вагарна дар дӯзах зиндагӣ хоҳед кард"- гуфтааст Трамп.

Дар мусоҳиба бо рӯзномаи "The Wall Street Journal" рӯзи 5-уми апрел, вай гуфт, ки Эрон бояд ин оброҳаро дар давоми ду рӯз боз кунад, вагарна “онҳо ҳама неругоҳҳои барқӣ ва ҳар корхонаи дигареро, ки дар саросари кишвар доранд, аз даст хоҳанд дод".

Ӯ дар як паём "Сешанбе, соати 20:00"-ро мӯҳлати охирин эълон кард, аммо тафсилоти бештаре надод. Раисҷумҳури Амрико пештар таҳдид карда буд, ки агар дар 48 соат гулӯгоҳи муҳими Ҳурмуз боз нашавад, нерӯгоҳҳои Эронро “торумор” мекунад.

Бо вуҷуди таҳдидҳо, Трамп дар мусоҳиба бо "Fox News" гуфт, ки Теҳрон “ҳоло дар ҳоли гуфтушунид аст" ва ӯ бовар дорад, ки дар 24 соати оянда "имкони хубе" барои расидан ба созиш вуҷуд дорад.

Ҷумҳурии Исломии Эрон таҳдид кардааст, ки дар сурати ҳамла ба нерӯгоҳҳои ин кишвар ба нерӯгоҳҳо дар минтақа ҳамла хоҳад кард. Раиси Парлумони Эрон Муҳаммадбоқир Қолибоф, дар як вокуниши тунд, рӯзи 5-уми апрел гуфт, Вашингтон бояд “ба ин бозии хатарнок” ва ҷанг хотима диҳад.

Вай Амрикоро ба "иқдомҳои бемулоҳиза" муттаҳам кард ва гуфт, ки “тамоми минтақа хоҳад сухт”

Вазорати тандурустии Тоҷикистон эълон кардааст, ки сокинони кишвар метавонанд ин ҳафта бепул ё ройгон аз ташхиси тиббӣ ва муоинаи пизишкон гузаранд.

Ба иттилои расмӣ, дар доираи иқдоми ҳафтаи саломатӣ ва рӯзи ҷаҳонии тандурустӣ, аз 6 то 10-уми апрел "мутахассисон бо истифода аз дастгоҳу таҷҳизоти муосир" сокинонро ройгон ташхис мекунанд.

Дар хабари расмӣ омадааст, рӯзи аввали чорабинӣ дар беморхонаи маъруф ба Клиникаи Мансуров мегузарад ва сокинон аз субҳ метавонанд барои гузаштан аз ташхиси ройгон ва гирифтани машварати тиббӣ ба ин дармонгоҳ муроҷиат кунанд.

Рӯзи 7-уми апрел бошандагони шаҳри Душанбе, вилоятҳои Суғду Хатлон ва ноҳияҳои тобеи марказ метавонанд барои гузаштан аз ташхиси бепул ба дармонгоҳи ҷойи зисташон раванд.

Барои сокинони Вилояти Мухтори Куҳистони Бадахшон ин иқдом рӯзи 8-уми апрел баргузор мешудааст.

Солҳои гузашта низ сокинон ройгон аз ташхиси пизишкон мегузаштанд. Ин иқдом боис мешуд, ки одамони зиёде барои бепул супоридани ташхис дар назди беморхонаҳои давлатӣ ҷамъ шаванд.

Шикоят аз гарон будани нарх дар ташхисгоҳҳо ва хадамоти тиббӣ дар Тоҷикистон кам нест. Онҳое, ки тавони пардохтро надоранд дар рӯзи ҷаҳонии тандуруст ба беморхонаҳо шитофтаанд.

Кумитаи ҳифзи муҳити зисти Тоҷикистон барои ҳисоб кардани саршумори ҷонвари нодири бузи "Морхӯр" кормандонашро ба минтақаи баландкуҳи кишвар фиристодааст.

Ба иттилои расмӣ, мутахассисон бояд ҳисоб кунанд, ки дар кишвар чанд сар бузи "Морхӯр" ҳаст.

Мақомот мегӯянд, ин кор "барои муайян намудани вазъи воқеии саршумори бузи кӯҳии морхӯр, ҳифзи гуногунии биологӣ" ва роҳҳои ҳифзи ин ҷонвари нодир зарур аст.

Тибқи маълумоти ахири Оҷонси омор, давоми даҳ соли ахир саршумори бузи "Морхӯр" дар Тоҷикистон аз 1900 то 6827 сар зиёд шудааст.

Морхӯр, аз нодиртарин ва гаронтарин ҷонвари шикорӣ дар Тоҷикистон аст, ки барои шикори як сари он 40 ҳазор доллари амрикоӣ пардохт мешавад. Иҷозаи шикори ҳайвоноти нодирро бештар хориҷиён харидорӣ мекунанд.

Ҳукумати Тоҷикистон имсол барои шикори танҳо 24 сар бузи “Морхӯр” иҷозат додааст.

Эмомалӣ Раҳмон, раиси ҷумҳури Тоҷикистон моҳи сентябри соли гузашта аз мақомоти расмӣ ва донишмандон хоста буд, саршумори чанде аз ҷонварҳои нодир, аз ҷумла, бабри барфӣ, морхӯр ва меши кӯҳӣ ва ё архарро аз нав дақиқ карда, ба ҳукумат гузориш бидиҳанд.

ИНЧУНИН, БИХОНЕД:

Дар Тоҷикистон иҷоза доданд, ки 24 сар бузи нодир шикор шавад

Дар пайи заминларзаи рӯзи 3-юми апрел 22 хона дар ноҳияи Тоҷикобод зарар дидаанд.

Ба иттилои Кумитаи ҳолатҳои фавқулодаи Тоҷикистон, 16 хонаи истиқоматӣ дар ҷамоати Ширинчашма ва 6 манзили дигар дар ҷамоати Нӯшор "зарари сабук" дида, як оғилхона пурра хароб шудааст.

"Дар натиҷаи заминларза талафоти ҷонӣ ба қайд гирифта нашудааст", - омадааст дар хабари расмӣ.

Мақомот мегӯянд, комиссияи вижа ҳаҷми пурраи зарарро муайян мекунад. Корбарони Радиои Озодӣ бо ирсоли навор хабар доданд, ки дар пайи заминларза дар ноҳияи Тоҷикобод тарма фаромадааст.

Навор аз ҷойи ҳодиса:

Рӯзи 3-юми апрел ду заминларза чанд минтақаи Тоҷикистонро такон дод. Як зилзила соати 15:26 ва дуввумӣ соати 21:12 сабт шудааст.

Ба иттилои Хадамоти геофизикии Тоҷикистон, қувваи заминларза дар ноҳияҳои Тоҷикобод, Рашт ва Лахш 4–5 ва дар Душанбе 2 дараҷа буд.

Ларзиши ин зилзила дар Покистон, Афғонистон ва Ҳиндустон низ эҳсос шудааст. Бар асари ин зилзила ҳашт нафар дар вилояти Кобули Афғонистон ҷон бохтанд.

Тоҷикистон ва Афғонистон аз ҷумлаи кишварҳое мебошанд, ки дар баробари зилзила осебпазир мебошанд.

ИНЧУНИН, БИХОНЕД:

Ҳалокати 8 нафар аз зилзила дар Афғонистон

Халабони дуввуми ҳавопаймои ҷангии F-15, ки дар Эрон сарнагун шуда буд, наҷот дода шудааст.

Ин хабарро президент Доналд Трамп субҳи 5-уми апрел дар шабакаи иҷтимоиаш Truth Social пахш кард. "Мо ӯро пайдо кардем. Ӯ ҷароҳат бардоштааст, аммо хуб мешавад", - навишт Трамп.

Раиси ҷумҳури Амрико дар паёмаш навиштааст, дар ҷараёни амалиёти наҷоти халабон, ягон амрикоӣ кушта ё захмӣ нашудааст.

Як мақоми амрикоӣ ба Радиои Аврупои Озод/Радиои Озодӣ гуфт, "маъмурият иҷро шуд".

Дар бораи пайдо шудани халабони дуввуми ҳавопаймои ҷангии F-15E дар Эрон, нахуст хабаргузории "Рейтерз" гузориш дода буд.

Чанд расона, аз ҷумла рӯзномаи "Ню-Йорк Таймз" гузориш доданд, ки халабон дар ҷанубу ғарби Эрон пайдо шуда, барои табобат ба як дармонгоҳи Кувайт интиқол ёфтааст. Дар бораи вазъи саломатии ин низомӣ маълумоти расмӣ нашр нашудааст.

Мақомоти амрикоӣ гуфтанд, ин афсар, ки масъули низоми идоракунии силоҳ (WSO) буд, аз сӯи нерӯҳои махсуси ИМА ва дар як амалиёти мураккаб наҷот дода шуд.

Ба гузориши шабакаи Fox News, халабон ва ҳам гурӯҳи наҷот аз Эрон хориҷ шудаанд.

Мансабдорони ИМА гуфтанд, ки Сипоҳи посдорон ва неруҳои Басиҷ талош карданд монеи амалиёти наҷоти халабон шаванд ва низомиёни амрикоӣ бо онҳо даргир шуданд.

Ба гузоришҳои расонаҳо, ду ҳавопаймои борбари амрикоӣ, ки дар амалиёти наҷоти халабон иштирок доштанд, натавонистанд аз як пойгоҳи Эрон берун шаванд. Мақомоти амрикоӣ гуфтанд, ин ду ҳавопайморо пеш аз афтидан ба дасти нерӯҳои эронӣ нобуд кардаанд.

Ҳарду халабони ҷангандаи F-15 баъди сарнагун шудани ҳавопаймоашон дар ҷанубу ғарби Эрон, худро ба берун партофтаанд. Ба гузориши расонаҳои Axios ва Fox News, онҳо бо истифода аз таҷҳизоти алоқаи фаврӣ бо нерӯҳои ИМА тамос барқарор карданд.

Рӯзи ҷумъаи 3-юми апрел як ҳавопаймои ҷангии F-15-и амрикоӣ дар Эрон суқут кард. Сипоҳи посдорон эълон кард, ки ин ҷангандаро сарнагун кардааст.

Ин ҳавопаймо ду сарнишин дошт, ки яке аз онҳо дар ҳамон соати аввал аз сӯи нерӯҳои артиши Амрико наҷот ёфт, аммо халабони дуввум пайдо набуд. Сипоҳи посдорон ҳам ба ҷустуҷӯи ин халабони амрикоӣ пардохт ва барои ёфтани ӯ ба мардум ҷоиза ваъда кард.

Ба гуфтаи мақомоти амрикоӣ, ин нахустин ҷангандаи F-15E аст, ки дар ҷанг бо Эрон ҳадаф қарор мегирад.

Рӯзи ҷумъаи 3-юми апрел ҳамчунин як ҳавопаймои ҷангии дигари нерӯҳои ҳавоии Амрико (А 10) дар Халиҷи Форс суқут карда, ягона халабони он ҷони солим ба дар бурдааст.

Пештар Доналд Трамп, раисҷумҳури Амрико ба шабакаи NBC News гуфт, ки сарнагунии ҳавопаймои ҷангӣ бар гуфтугӯҳо бо Эрон таъсир нахоҳад гузошт, зеро ӯ ҳамчунон ба Теҳрон фишор меоварад, то созиши сулҳ бо Амрикоро, ки то кунун чеҳраҳои ҳукумати Эрон онро рад кардаанд, бипазирад.

Халабони дуввуми ҳавопаймои ҷангии F-15, ки дар Эрон сарнагун шуда буд, наҷот дода шудааст. Дар ин бора хабаргузории "Рейтерз" субҳи якшанбеи 5-уми апрел ба нақл аз ду мақоми амрикоӣ хабар дод.

То ҳол ҳеч мақоми расмӣ дар Пентагон ин хабарро тасдиқ накардааст. Сипоҳи посдорон низ дар ин бора чизе нагуфтааст.

Рӯзи ҷумъаи 3-юми апрел як ҳавопаймои ҷангии F-15-и амрикоӣ дар Эрон суқут кард. Сипоҳи посдорон эълон кард, ки ин ҷангандаро сарнагун кардааст.

Ин ҳавопаймо ду сарнишин дошт, ки яке аз онҳо дар ҳамон соати аввал аз сӯи нерӯҳои артиши Амрико наҷот ёфт, аммо халабони дуввум пайдо набуд. Сипоҳи посдорон ҳам ба ҷустуҷӯи ин халабони амрикоӣ пардохт ва барои ёфтани ӯ ба мардум ҷоиза ваъда кард.

Ба гуфтаи мақомоти амрикоӣ, ин нахустин ҷангандаи F-15E аст, ки дар ҷанг бо Эрон ҳадаф қарор мегирад.

Рӯзи ҷумъаи 3-юми апрел ҳамчунин як ҳавопаймои ҷангии дигари нерӯҳои ҳавоии Амрико (А 10) дар Халиҷи Форс суқут карда, ягона халабони он ҷони солим ба дар бурдааст.

Пештар Доналд Трамп, раисҷумҳури Амрико ба шабакаи NBC News гуфт, ки сарнагунии ҳавопаймои ҷангӣ бар гуфтугӯҳо бо Эрон таъсир нахоҳад гузошт, зеро ӯ ҳамчунон ба Теҳрон фишор меоварад, то созиши сулҳ бо Амрикоро, ки то кунун чеҳраҳои ҳукумати Эрон онро рад кардаанд, бипазирад.

ИНЧУНИН, БИХОНЕД:

Идомаи ҷустуҷӯи халабони ҳавопаймои сарнагуншудаи амрикоӣ дар Эрон

Дар идомаи бомбаборони бандарҳои ҷануби Эрон дар рӯзи 4 апрел, ки маълум нест аз сӯи Исроил ё Амрико сурат гирифтааст, Бушаҳр низ дар ҳамин рӯз ҳадафи ҳамла қарор гирифт. Ҳамлае, ки таркишҳои он ба нерӯгоҳи атомии Бушаҳр ҳам расид.

Хабаргузории "Тасним", наздик ба Сипоҳи посдорони Эрон навиштааст, ки субҳи шанбе "як партоб дар наздикии атрофи нерӯгоҳи атомии Бушаҳр бархӯрд... ва бар асари мавҷи инфиҷор ва таркишҳои ин ҳамла, яке аз биноҳои ҷонибии нерӯгоҳ дучори осеб шуд".

Ба навиштаи "Тасним", дар ин ҳамла яке аз кормандони бахши ҳифозати физикии нерӯгоҳ ҳам ба ҳалокат расидааст.

Баррасиҳои ибтидоӣ нишон медиҳад, ки "чаҳорумин ҳамла" ба нерӯгоҳи Бушаҳр осебе ба бахшҳои аслии нерӯгоҳ ворид накарда ва "раванди баҳрабардорӣ аз нерӯгоҳ низ таҳти таъсир қарор нагирифтааст".

Дар ҳафтаи ҷорӣ қарор аст ҳудуди 200 корманди рус нерӯгоҳи Бушаҳрро тарк кунанд. Ҳафтаи гузашта Русия эълон карда буд, ки 162 нафар аз коркунони худро аз ин маҳал берун бурдааст.

Холид Аш-Шамронӣ сафири нави Арабистони Саудӣ дар Тоҷикистон таъйин шуд. Ӯ дар ин мақом ҷойгузини Валид Абдурраҳмон Ар-Рушайдон шуд, ки аз августи соли 2021 то декабри 2025 сафири Арабистони Саудӣ дар Тоҷикистон буд.

Сафорати Арабистони Саудӣ дар Тоҷикистон эълон кард, ки сафири навтаъйини ин кишвар Холид Аш-Шамронӣ рӯзи 3 апрел дар Душанбе нусхаи эътимодномаи худро ба муовини вазири корҳои хориҷии Тоҷикистон супурд.

Вазорати корҳои хориҷии Тоҷикистон ҳам дар хабарномае гуфт, ки Фаррух Шарифзода, муовини вазири корҳои хориҷии Тоҷикистон дар мулоқот бо Холид Аш-Шамронӣ роҷеъ ба ҳолати кунунӣ ва дурнамои ҳамкориҳои Душанбе ва Риёз баррасӣ карданд.

Арабистони Саудӣ аз ҷумлаи ду кишвари арабӣ ҳаст, ки дар Тоҷикистон сафорати худро дорад. Дар ҳоли ҳозир Тоҷикистон бо ин кишвари нафтхези арабӣ равобити ҳасана дорад. Арабистони Саудӣ солҳои ахир ба Тоҷикистон миллионҳо доллар кӯмак кардааст.

Аз ҷумла, Подшоҳии Арабистони Саудӣ ва Фонди саудии рушд тобистони соли гузашта барои сохтмони нерӯгоҳи барқи обии "Роғун" 100 миллион ва ҳам барои амалисозии лоиҳаи сохтмони роҳи ҳалқавии шаҳри Кӯлоб 30 миллион доллари амрикоӣ ихтисос дод.

Як ширкати дигар арабистонӣ бо номи ACWA Power ҳам мехоҳад дар Тоҷикистон истгоҳҳои тавлиди барқи офтобӣ ва бодӣ роҳандозӣ кунад.

Маркази имдод ва кумакҳои башардӯстонаи Малик Салмон ҳамасола ба ҳазорон хонаводаҳои ниёзманди тоҷик сабади ғизо пешниҳод мекунад.

Аз ҷумла, ин марказ аввали соли 2025 ба 7 ҳазор хонаводаи камбизоати Тоҷикистон 490 тонна ёрии башардӯстона дода буд. Ба ҳар хонавода қариб 70 кило орду равған ва лубиёву макарону шакар.

Аммо сифати ин маҳсулот интиқодҳоеро дар пай дошт, ҳарчанд намояндагони Сафорати Арабистон гуфтанд, онҳо пул медиҳанд ва маҳсулотро ширкатҳои тоҷикистонӣ интихоб мекунанд.