Тибқи иттиллои Вазорати адлияи Тоҷикистон, дар зиндонҳои кишвар беш аз 11 ҳазор маҳбус ба сар мебаранд. Аз ҷумла, чеҳраҳои шинохта ба монанди Ёқуб Салимов, вазири пешини умури дохила, Муҳаммадрӯзӣ Искандаров, раҳбари Ҳизби демократи Тоҷикистон ва Ғаффор Мирзоев, фармондеҳи пешини Горди раёсати ҷумҳурӣ зиндонӣ ҳастанд.

Суоле, ки ҳоло дар зеҳни мардум пайдо мешавад, ин аст, ки афви умумӣ кадом гурӯҳи маҳбусонро фаро хоҳад гирифт? Радиои Озодӣ ин суолро бо мутахассисон ва коршиносони масоили марбут ба ҳуқуқи башар дар миён гузошт.

Сайфулло Сафаров, коршиноси Маркази таҳқиқоти стротежики вобаста ба раёсати ҷумҳурӣ дар ин бора гуфт, агар дар афви умумӣ, ки дар арафаи интихоботи раёсати ҷумҳурӣ сурат мегирад, ба маҳбусони сиёсӣ низ таваҷҷуҳ зоҳир шавад, чунин иқдом обруи раисиҷумҳуриро дар миёни мардум болотар хоҳад бурд:

Албатта, ба чунин чеҳраҳои шинохта таваҷҷӯҳ кардан ё сабукӣ додан ба онҳо ба обруи президент обрӯ зам мекунад, дар ин ҷойи шубҳа нест, аммо ҳадаф аз ин авфи умум ҳамин аст, ки ба оилаҳои теъдоде аз онҳое, ки паси панҷараи зиндон нишастаанд, имкон дода шавад, то рӯҳияи идона дошта бошанд. Масалан, дар Туркманистон ҳамаи маҳбусонро авф карданд. Аммо вазъ дар кишвари мо дигар аст.

Аммо Ҳикматулло Сайфуллозода, масъули маркази таҳлилӣ-иттилоъотии «Диалог» мегӯяд, ӯ интизор надорад, ки дар ин афви умумӣ зиндониёни сиёсӣ ё чеҳраҳои шинохташудаи кишвар бахшуда шаванд:

Ман баъид медонам, ки ба чеҳраҳои сиёсии кишвар, масалан ба Маҳмадрӯзӣ Искандаров, Ғаффор Мирзоев ва дигарон, ки ба ҳар баҳонае ба маҳбас кашида шуданд, ягон сабукӣ дода шавад, зеро дар афвҳои гузашта низ чунин амал нисбати онҳо сурат нагирифта буд.

Ойниҳол Бобоназарова, ҳуқуқдон ва раиси бунёди Сорос дар Тоҷикистон дар сӯҳбат бо радиои Озодӣ зимни истиқбол аз қонуни афв, чунин гуфт:

Барои ман хеле муҳим аст, ки бахусус занон, ки теъдоди онҳо феълан дар зиндонҳо наздики 600 нафар аст ва бо чанд грам маводди мухаддир ба солҳои зиёд зиндонӣ шудаанд, сабукӣ дода шавад ва онҳоро озод кунанд, зеро дар зиндон будани зан барои хонавода ва фарзандон бадбахтӣ аст.

Тибқи маълумоти дафтари матбуъотии раёсати ҷумҳурии Тоҷикистон, дар афви умумӣ ба муносибати солгарди истиқлоли кишвар ҷинсият, синну сол, вазъи саломатӣ ва замони раҳоии маҳбусон ба эътибор гирифта шудааст.

Бо як қарори ҳукумати Арманистон, аз 1 ноябри соли ҷорӣ аз муҳри марзбонони ин кишвар дар бораи убури сарҳади давлатии Арманистон нақши кӯҳи Арарат пок карда мешавад.

Ба ҷои он дар рӯи муҳр навиштаҷоти “Арманистон” ба забонҳои англисӣ ва арманӣ, номи гузаргоҳи марзӣ, санаи убури марз ва ҳам рамзи истгоҳи марзии ҳавоӣ, роҳи оҳан ё гузаргоҳи заминӣ ифода мешавад.

Кӯҳи Арарат рамзи миллии Арманистон буда, он дар рӯи герб ё нишони миллии ин кишвар кашида шудааст, вале аз ҷиҳати ҷуғрофиёӣ ин кӯҳ дар қаламрави Туркия ҷойгир мебошад.

Ин тағйирот иқдоме дар самти оддисозии муносиботи миёни Ереван ва Анкара дониста мешавад, ки дар паи саркӯби арманитаборҳо дар Туркияи Усмонӣ дар соли 1915 ва даъвои Арманистон барои эътирофи наслкушӣ ва ҳам низои Арманистону Озарбойҷон барои Қаробоғи кӯҳӣ бад шудааст.

Сарҳади миёни Арманистону Туркия аз соли 1993 баста буда, вале соли 2022 миёни ду кишвар парвози ҳавопаймоҳо аз сар гирифта шуд ва фиристодаҳои вижа дар заминаи тавсеаи ҳамкорӣ музокиротро барпо кардаанд.

Толибон хабар доданд, ки сафири Тоҷикистон дар Афғонистон Саъдӣ Шарифӣ ба Кунар сафар карда, бо волии ҳукумати Толибон мулоқот кардааст.

Телевизиони “Афғонистон интернешинал” навишт, ки сафир рӯзи 14-уми сентябр кумаки Тоҷикистон ба осебдидагони заминларзаро расондааст.

Ба навиштаи "Афғонистон интернешинал", дипомати тоҷик аз номи президенти Тоҷикистон паёми таслият расонда, гуфтааст, ки кишвараш ба осебдидагони заминларза кумаки изофӣ хоҳад расонд.

Матбуоти расмӣ дар Тоҷикистон ин хабарро нашр накардааст.

Зилзилаи шашдараҷаии рӯзи 31 август дар вилоятҳои шарқии Афғонистон, аз ҷумла, Кунар, Нангарҳор ва Лағмон наздик ба ду ҳазор нафарро кушта ва ҳазорон нафарро маҷрӯҳу бехона кард.

Мақомоти Тоҷикистон эълон карданд, ки ба осебдидагони ин заминларза дар сад мошини боркаш маводи озуқа фиристодаанд.

Коллегияи олии додрасҳои Русия номзадии Игор Краснов, додситони кулли Русияро ба мақоми раиси Додгоҳи олии ин кишвар дастгирӣ кард. Акнун бояд номзадии ӯро Шӯрои Федератсия қабул кунад. Раиси Додгоҳи олии Русия бо пешбарии президент ба мӯҳлати шаш сол таъин мешавад.

Раиси пешини Додгоҳи олии Русия Ирина Подносова соли гузашта, баъди як соли ишғоли ин мақом даргузашт. Красновро шахси мавриди назари Путин меноманд.

Ӯ 50 сол дошта, аз соли 2006 дар Додситонии кулл ва Кумитаи тафтишот кор мекунад. Дар миёни парвандаҳое, ки зери назари ӯ таҳқиқ шудаанд, сӯиқасд ба ҷони Анатолий Чубайс, куштори Борис Немтсов ва хабарнигор Анастасия Бабурова мебошанд.

Краснов соли 2020 додситони кулл таъин шуд ва дар давраи ӯ чандин парвандаи зидди мухолифон, аз ҷумла раҳбари Бунёди зидди коррупсия Алексей Навалний боз шудааст.

Низоми адлияи Русияро барои ҳукмҳои ноодилонаву фармоишӣ ва олудагиаш ба фасод бисёр интиқод мекунанд.

Дар Тоҷикистон то 11 сентябр дар ҳаҷми беш аз 85 ҳазор тонна пахта ҷамъоварӣ шудааст, ки назар ба солҳои пеш камтар мебошад. Ба мавзӯи чиниши маҳсулоти аз назари давлат стратегии кишоварзӣ хабаргузории давлатии “Ховар” таваҷҷӯҳ карда гуфтааст, ки "арзиши пасти харидории пахта” сабаби асосии иҷро нашудани нақша ва коҳиши ҳаҷми ҳосил мебошад.

Манбаъ менависад, “солҳои охир дар Тоҷикистон коҳиши майдони кишт ва ҷамъоварии пахта ба қайд гирифта шудааст. Агар соли 2022 зиёда аз 404 ҳазор тонна пахта ҷамъоварӣ шуда бошад, пас соли 2024 ҳамагӣ 254 ҳазор тонна пахта ҷамъ карда шудааст”.

Устоди Донишгоҳи аграрии Тоҷикистон Зикриёхон Ҳайдаров гуфтааст, ки мушкили асосии пахтакорони тоҷик норасоии техникаи муосири пахтағундор ва кам будани нархи хариди пахта мебошад.

Ин мушкилро чанде пеш бархе кишоварзони тоҷик ҳам тавассути шабакаҳои иҷтимоӣ баён карда буданд. Масалан, як кишоварзе аз ноҳияи Ҳамадонӣ оғози моҳи сентябр бо нашри навори видеоие аз майдони кишташ гуфт, як килограмм пахта имсол “6-6,5 сомонӣ пешниҳод мешавад ва ин хароҷоти деҳқонро намепӯшонад”. Ин ҳам дар ҳолест, ки кишоварзон дар дигар минтақаҳои ҷануби Тоҷикистон имсол аз маҷбурӣ кишт кардани пахта шикоят карданд.

Мунаққидон мегӯянд, Тоҷикистон, ки дар даврони иқтисоди нақшавиву дастурии шӯравӣ соле аз як миллион тонна ҳам бештар пахта истеҳсол мекард, дар даврони истиқлолият натавонист мушкили соҳаро пурра ҳал кунад ва кишоварзи пахтакор як қишри ноозоду дастнигар боқӣ мемонад.

Айни замон назорат бар соҳаи фурӯши пахта дар кишвар аз ҷониби ширкатҳои наздик ба ҳукумат монополия шуда, даромади аслӣ аз фурӯши “тилло”-и сафедро онҳо ба даст меоранд. Кишоварзон ҳамасола аз дастурӣ будани кишти пахта ва кам будани даромади он, боло будани нархи дорувории кишоварзӣ, хушксолӣ ва дигар мушкилот шикоят карда инро чун далели дилгарм набудани худ ба соҳаи пахтакорӣ меноманд.

Узбекистон мехоҳад барои шаҳрвандони Русия ҳақи вуруд ба ин кишварро бо шиносномаҳои дохилӣ ё ID-корт иҷоза диҳад. Дар Вазорати корҳои хориҷии Узбекистон ба нашрияи “Известия” гуфтаанд, ки Тошканд ва Маскав имкони ба шаҳрвандони Русия додани иҷозаи вуруд ба Узбекистон бо шиносномаи дохилиро баррасӣ доранд.

Ҳоло шаҳрвандон Русия ба Узбекистон бо шиносномаҳои хориҷӣ равуо мекунанд. Узбекистон аввал шуда ба шаҳрвандони Қирғизистон иҷоза дод, ки бо шиносномаҳои дохилӣ ба ин кишвар сафар кунанд. Аз соли 2023 сокинони Узбекистону Қирғизистон ба кишварҳои ҳамдигар бо ID-корт сафар мекунанд.

Соли гузашта Узбекистон тасмим дошт бо Тоҷикистон ҳам тартиби сафар бо корти дохилиро ба роҳ монад. Моҳи майи имсол хабар дода шуд, ки Узбекистон имкони вуруди шаҳрвандони Русия, Қазоқистона Озарбойҷонро барои 30 рӯз бо шинохсномаи дохилӣ ё ID-корт баррасӣ дорад.

Умеди Ҷаҳон, як овозхони попи эронӣ дар 43-солагӣ даргузашт. Ин сароянда, ки дар Тоҷикистон ҳам ҳаводори зиёд дошт, пас аз як консерт дар шаҳри Бами Эрон дучори сактаи қалб шудааст.

Бино ба эълони мудири кулли фарҳанг ва иршоди шаҳри Кирмони Эрон, Умеди Ҷаҳон пас аз иштирок дар ҷашни “Хурмои Бам”, замоне, ки мехост ба мошин нишинад, "дучори исти қалб шуда ва рӯзи шанбе, 13-уми сентябр даргузаштааст".

Умеди Ҷаҳон дар соли 1982 дар шаҳри Ободони Эрон таваллуд шудааст. Вай фарзанди Маҳмуди Ҷаҳон аст, ки ӯ ҳам як сарояндаи шинохта дар Эрон буд.

Сурудҳои Умеди Ҷаҳон дар Тоҷикистон ҳам ҳаводорони зиёд дорад. Ин сароянда ба Тоҷикистон мунтазам рафтуомад дошт ва як муддат инҷо кору зиндагӣ кардааст.

Бошгоҳи футболи «Регар-ТадАЗ»-и Турсунзода, ки дар бозии ниҳоӣ дастаи «Эсхата»-и Хуҷандро бо ҳисоби 5:0 шикаст дод, бори ҳаштум Ҷоми Тоҷикистонро ба даст овард.

Бозии ниҳоӣ рӯзи якшанбеи 14-уми сентябр дар варзишгоҳи «20-солагии Истиқлолияти Тоҷикистон»-и шаҳри Хуҷанд бо ҳузури наздики 14 ҳазор тамошобин доир гардид.

Дар нимаи аввали бозӣ футболбозони шаҳри Турсунзода ба дарвозаи “Эсхата” ду гол заданд. Голҳоро Шервонӣ Мабатшоев дар дақиқаи 7-ум ва Самандар Қодиров дар дақиқаи 21-ум ба самар расонданд.

Се голи дигарро регариҳо дар нимаи дуюми дидор ба дарвозаи хуҷандиҳо ворид карданд. Шуҳрат Элмуродов ду гол (86, 90+21) ва капитан ё сарвони “Регар-ТадАЗ” Нозим Бобоҷонов як гол (90+7) заданд.

“Эсхата” бори аввал дар финали Ҷоми Тоҷикистон рақобат кард. “Регар-ТадАЗ” бошад, бори 16-ум дар бозии ниҳоии ин мусобиқот иштирок намуда, дар ҳаштоаш пирӯз шудааст. Аз ҷумла ду соли ахир пайиҳам регариҳо барандаи Ҷоми Тоҷикистон мешаванд.

Дар маросими ҷоизасупорӣ нахуст гурӯҳи доварони бозии ниҳоӣ бо сарварии довари FIFA (Федератсияи байналмилалии футбол) Сайёдҷон Зайниддинов аз Душанбе мукофотонида шуданд.

Сипас ба бозигари беҳтарини бозии ниҳоӣ Шервонӣ Мабатшоев, нимҳимоятгари “Регар-ТадАЗ”, ҷоиза тақдим гардид.

Ба дастаи “Эсхата” (сармураббиаш Шуҳратҷон Умаров) медалҳои нуқра ва ҷоизаи молӣ ба маблағи 40 ҳазор сомонӣ супурда шуд.

Дастаи “Регар-ТадАЗ” (сармураббиаш Алишер Тухтаев) бо Ҷоми Тоҷикистон, медалҳои тило ва ҷоизаи молӣ ба маблағи 100 ҳазор сомонӣ сарфароз гашт.

Мусобиқот барои Ҷоми Тоҷикистон бори 35-ум сурат гирифт. Ҷоми миллиро аз ҳама бештар дастаи “Истиқлол”-и Душанбе (10 бор) ва “Регар-ТадАЗ” (8 бор) ба даст овардаанд.

Соли гузашта дастаи “Регар-ТадАЗ” дар бозии ниҳоӣ тими “Хуҷанд”-ро бо ҳисоби 2:1 шикаст дода буд.

Ҷоми Тоҷикистон-2025

Финал

«Регар-ТадАЗ» - «Эсхата» – 5:0

Голҳо: Шервонӣ Мабатшоев, 7 (1:0). Самандар Қодиров, 21 (2:0). Шуҳрат Элмуродов, 86 (3:0). Шуҳрат Элмуродов, 90+1 (4:0). Нозим Бобоҷонов, 90+7 (5:0).

Аз майдон хориҷ шуд: Бахтиёр Зарипов («Эсхата»), 90+1 – корти дуюми зард.

Беҳтарин бозигари дидор: Шервонӣ Матабшоев («Регар-ТадАЗ»).

14-уми сентябр. Хуҷанд. Варзишгоҳи «20-солагии Истиқлолияти Тоҷикистон». 13 850 тамошобин.

НАТОИҶИ ҲАМАИ БОЗИҲОИ НИҲОИИ ҶОМИ ТОҶИКИСТОН (1992-2025):

1992 – «Помир» (Душанбе) – «Регар» (Турсунзода) – 1:0

1993 – «Ситора» (Душанбе) – «Равшан» (Кӯлоб) – 0:0. Аз рӯи пеналти – 5:3

1994 – «Равшан» (Кӯлоб) – «Шодмон» (Ҳисор) – 2:1

1995 – «Пахтакор» (Ҷаббор Расулов) – «Регар-ТадАЗ» (Турсунзода) – 0:0. Аз рӯи пеналти – 3:2

1996/1997 – «Вахш» (Қӯрғонтеппа) – «Хуҷанд» (Хуҷанд) – 4:0

1997/1998 – «Хуҷанд» (Хуҷанд) – «Ранҷбар» (Восеъ) – 2:1

1998 – «Варзоб» (Душанбе) – «Хуҷа Каримов» (Ғозималик) – 3:1

1999 – «Варзоб» (Душанбе) – «Регар-ТадАЗ» (Турсунзода) – 0:0. Аз рӯи пеналти – 4:2

2000/2001 – «Регар-ТадАЗ» (Турсунзода) – «Варзоб» (Душанбе) – 4:2

2001/2002 – «Регар-ТадАЗ» (Турсунзода) – «Хуҷанд» (Хуҷанд) – 3:1

2002 – «Хуҷанд» (Хуҷанд) – «Вахш» (Қӯрғонтеппа) – 3:0

2003 – «Вахш» (Қӯрғонтеппа) – «Олимп-Ансол» (Кӯлоб) – 3:1

2004 – «Авиатор» (Бобоҷон Ғафуров) – «Ӯротеппа» (Истаравшан) – 5:0

2005 – «Регар-ТадАЗ» (Турсунзода) – «Вахш» (Қӯрғонтеппа) – 1:1. Аз рӯи пеналти – 3:1

2006 – «Регар-ТадАЗ» (Турсунзода) – «ҲИМА» (Душанбе) – 2:1

2007 – «Парвоз» (Бобоҷон Ғафуров) – «ҲИМА (Душанбе) – 1:0

2008 – «Хуҷанд» (Хуҷанд) – «Энергетик» (Душанбе) – 2:1

2009 – «Истиқлол» (Душанбе) – ССКА «Помир» (Душанбе) – 3:1

2010 – «Истиқлол» (Душанбе) – «Хуҷанд» (Хуҷанд) – 5:0

2011 – «Истиқлол» (Душанбе) – «Регар-ТадАЗ» (Турсунзода) – 0:1

2012 – «Истиқлол» (Душанбе) – «Регар-ТадАЗ» (Турсунзода) – 1:1. Аз рӯи пеналти – 5:6

2013 – «Истиқлол» (Душанбе) – «Регар-ТадАЗ» (Турсунзода) – 2:0

2014 – «Истиқлол» (Душанбе) – «Регар-ТадАЗ» (Турсунзода) – 5:2

2015 – «Истиқлол» (Душанбе) – «Регар-ТадАЗ» (Турсунзода) – 2:2. Аз рӯи пеналти – 6:5

2016 – «Истиқлол» (Душанбе) – «Ҳосилот» (Фархор) – 2:2. Аз рӯи пеналти – 3:2

2017 – «Истиқлол» (Душанбе) – «Хуҷанд» (Хуҷанд) – 0:2

2018 – «Истиқлол» (Душанбе) – «Регар-ТадАЗ» (Турсунзода) – 1:0

2019 – «Истиқлол» (Душанбе) – «Регар-ТадАЗ» (Турсунзода) – 2:2. Аз рӯи пеналти – 4:2

2020 – «Равшан» (Кӯлоб) – «Хатлон» (Бохтар) – 1:0

2021 – «Истиқлол» (Душанбе) – «Хуҷанд» (Хуҷанд) – 0:2

2022 – «Истиқлол» (Душанбе) – «Кӯктош» (Рӯдакӣ) – 2:2. Аз рӯи пеналти – 5:4

2023 – «Равшан» (Кӯлоб) - «Истиқлол» (Душанбе) –– 1:1. Аз рӯи пеналти – 2:4

2024 – «Регар-ТадАЗ» (Турсунзода) - «Хуҷанд» (Хуҷанд) –– 2:1

2025 – «Регар-ТадАЗ» (Турсунзода) - «Эсхата» (Хуҷанд) –– 5:0

Дар ин бора Алексей Жафяров, муовини сардори Раёсати назорати риояи қонунгузорӣ оид ба амният хабар дод.

Ба гуфтаи вай, ин созмонҳо ба талоши ноором кардани вазъ дар Русия, дахолат ба равандҳои интихоботӣ ва бадном кардани сиёсати давлат даст доранд. Созмони “Хабарнигорони бидуни марз” ҳам ба ин феҳраст шомил шудааст. Жафяров гуфтааст, ин созмон барои фаъолияти пайвастаи зиддирусиягии худ ва паҳн кардани хабарҳо дар бораи нақзи озодии баён дар кишвар созмони номатлуб дониста шудааст.

Ба иттилои Жафяров, аз оғози сол дар Русия барио ҳамкорӣ бо “Созмонҳои номатлуб” 130 парвандаи маъмурӣ боз шудааст.

Барои фаъолият дар “созмонҳои нохушоянд” дар Русия ҷазои ҷиноятӣ ва маъмурӣ пешбинӣ шудааст. То охири соли 2024 дар ин кишвар 200 созмон мамнӯъ ё номатлуб эълон шуда буд.

Дар ин бора дафтари Созмони ҷаҳонии муҳоҷират дар Тоҷикистон рӯзи 13 уми сентябр хабар дода, гуфтааст, давраҳои омӯзиши моҳи июл шурӯъ шудаанд. Ба иттилои ин созмон як давраи омӯзишӣ аз 6 моҳ иборат буда, ин иқдом кори онҳоеро, ки мехоҳанд, барои кор ба Ҷопон сафар кунанд, осон хоҳад кард.

Дар доираи ин барнома ба хоҳишмандон забону фарҳанг ва вижагиҳои зиндагӣ дар Ҷопон омӯзонида мешавад. Ба гуфтаи муттахасисони Созмони Ҷаҳонии Муҳоҷират, ин иқдом раванди муҳоҷиратро амну роҳат хоҳад кард.

Дар ҳамин ҳол Хадамоти муҳоҷирати Тоҷикистон аз мулоқоти сафири Ҷопон бо масъулини ин ниҳод хабар додааст. Ин мулоқот рӯзи 12-уми сентябр баргузор шуда, дар он раванди муҳоҷирати меҳнатӣ, вазъи бехатарӣ ва ҳуқуқии шаҳрвандон дар хориҷи кишвар баррасӣ шудааст. Кэйко Фуруда, сафири Ҷопон дар ин мулоқот ба ҳамкории беҳтар дар самти муҳоҷират изҳори умедворӣ кардааст.

Мақомоти тоҷик солҳои ахир дар ҷустуҷӯйи роҳҳои нав барои фиристодани муҳоҷирони кориянд ва аз талошҳои тағйири самти муҳоҷирату коҳиши пойбанди аз бозори кори Русия суҳбат мекунанд.

Сабаб ба гуфтаи коршиносон афзоиши бозгашту ихроҷи муҳоҷирони зиёд аз Русия дар ду се соли ахир аст. Ҳоло корҷӯён аз Тоҷикистон дар баробари Русия бештар ба Қазоқистон, Кореяи Ҷанубӣ Бритониё ва баъзе аз кишварҳои арабӣ муҳоҷират мекунанд.

Мулоқоти Толибон бо намояндагони ИМА рӯзи 13-уми сентябр баргузор шуд ва Толибон бо нашри акс аз ҷарраёни гуфтугӯи Адам Бойлер, намояндаи вижаи Амрико дар умури гаравгонҳо ва Амирхон Муттақӣ, вазири умури хориҷии ҳукумати Толибон дар ин бора хабар доданд. Мақомоти Толибон гуфтанд: “Адам Бойлер дар робита ба масъалаи боздоштшудаҳо дар Афғонистон ва Амрико сӯҳбат карда гуфт, ҳарду кишвар зиндониёнро мубодила хоҳанд кард.”

Аммо Марко Рубио, вазири корҳои хориҷии Иёлоти Муттаҳида рӯзи шанбе дар сӯҳбат бо хабарнигорон эҳтимоли ба зудӣ сурат гирифтани мубодилаи зиндониёнро тайид накард. Вай танҳо гуфт, ки фиристодаи вижаи Амрико дар умури гаравгонҳо, барои “баррасӣ ва омӯзиши роҳу имкониятҳо”барои табодул ба Кобул сафар кардааст.

“Намояндаи вижаи мо дар умури боздоштшудаҳои ғайриқонунӣ муддатест, ки гуфтугӯ анҷом медиҳад. Фикр мекунам ба он ҷо рафт, то баррасӣ кунад, ки чӣ имкониятҳо вуҷуд дорад. Тасмими ниҳоиро дар бораи муомила ё табодул раиси ҷумҳур хоҳад гирифт.” - афзуд, вай.

Ҳамдулло Фитрат, сухангӯи ҳукумати Толибон дар саҳифаи X хабар додааст, ки "ҳарду ҷониб таъкид карданд, ки ба баррасии масоили мухталиф ва ояндаи равобити дуҷониба, ба хусус шаҳрвандоне, ки дар ҳарду кишвар зиндонӣ ҳастанд, идома хоҳанд дод."

Залмай Халилзод, намояндаи пешини амрико дар умури сулҳи Афғонистон, ҳайати Амрикоро дар сафараш ба Афғонистон ҳамроҳӣ мекунад. Ӯ то ҳол дар ин бора изҳори назар накардааст.

Вазорати хориҷаи Толибон дар баёнияе гуфтааст, ки дар ин гуфтугӯҳо равобити дуҷониба бо Амрико ва зарурати идомаи гуфтушунид, ба хусус дар масъалаи табодули зиндониён баррасӣ шудааст.

Дар изҳорот дар бораи теъдоди зиндониён дар ду кишвар, ҳуввияти онҳо ва сабабҳои боздошт чизе гуфта нашудааст.

Маҳмудшоҳи Ҳабибӣ, шаҳрванди 37-солаи Амрико, ки дар ҳукумати пешини Афғонистон ба ҳайси раиси Идораи ҳавонавардӣ кор мекард, аз маъруфтарин амрикоиҳоест, ки гуфта мешавад дар Афғонистон зиндонӣ ҳастанд.

Сарнавишти Ҳабибӣ аз замони боздошташ дар моҳи августи соли 2022 рӯшан нест ва Толибон мегӯянд, ӯ дар дасти онҳо нест.

Хонаводаи Ҳабибӣ мегӯянд, ки Толибон ӯро ба гурӯҳи террористии Ал-Қоида супурдаанд. Амрико барои пайдо кардани ӯ 5 миллион доллар ҷоиза ваъда карда буд.

Ҷорҷ Голзмани 66-сола, амрикоии дигаре, ки ба ҳайси муҳандиси ширкати ҳавопаймоӣ кор мекард, ҳангоми сафари қаблии Боҳлер ба Кобул дар моҳи март пас аз беш аз ду соли боздошт раҳо шуд.

Вай севвумин амрикоист, ки баъд аз бозгашти Доналд Трамп ба курсии президентӣ дар моҳи январ аз зиндони Толибон раҳо шуд.

Аз замони сарнагунии ҳукумати пешини Афғонистон дар моҳи августи соли 2021 ва бозгашти дубораи Толибон ба сари қудрат дар Афғонистон, даҳҳо шаҳрванди хориҷӣ боздошт шудааст.

Марко Рубио, рӯзи шанбе қабл аз сафараш аз Вашингтон ба Исроил ба хабарнигорон гуфт: “Албатта, мо хушнуд набудем, президент ҳам норозӣ аст.” Вай илова кард, ки: “Ин масъала моҳияти равобити мо бо Исроилиҳоро тағйир намедиҳад, вале мо бояд дар ин бора гуфтугӯ кунем, махсусан дар бораи он, ки ин вазъ ба талошҳои дипломатӣ барои дастёбӣ ба оташбас дар Ғаззаи ҷангзада чӣ таъсире хоҳад кард.”

Ҳамлаи ҳавоии рӯзи сешанбе, нахустин ҳамлаи Исроил алайҳи Қатар, ки аз муттаҳидони Амрико дар Ховари Миёна аст, минтақаро таккон дод ва ба талошҳои дипломатӣ барои расидан ба оташбас дар Ғаззаи ҷангзада зарба зад.

Нахуствазири Қатар, ҳамлаи Исроил ба хоки кишварашро “Ваҳшиёна” хонд ва хостори муҳокимаи Бенямин Нетаняҳу шуд. Вай нахуствазири Исроилро ба ин ҳамла муттаҳам карда, гуфт, бо ин дастур ӯ “ҳамагуна умед барои раҳоии асиронро аз айн бурда аст.”

Аз сӯйи дигар, нахуствазири Исроил рӯзи шанбе аз ҳамла ба қароргоҳи Ҳамос дар Доҳа дифоъ кард ва гуфт, аз байн бурдани раҳбарони Ҳамос, ки дар Қатар зиндагӣ мекунанд, монеаи асосӣ дар роҳи раҳоии гаравгонҳо ва поён додани ҷанг дар Ғаззаро аз байн мебарад.

Дар вокуниш ба ин мавқеъ, гурӯҳи исроилие, ки барои раҳоии гаравгонҳои Ғазза кор мекунад, эълом кард, ки Бинёмин Нетаняҳу бузургтарин монеа дар роҳи раҳоии гаравгонҳост.

Гурӯҳи "Ҳамос" дар баёнияе эълон кард, ки дар ин ҳамла 5 тан аз аъзои ин гурӯҳ, аз ҷумла, писари раҳбари ҳайати музокиракунандаи ин гурӯҳ Халил Ҳайя ва раиси дафтари ӯ, кушта шуданд. Аъзои ҳайати музокиракунандаи "Ҳамос" аз ин ҳамла ҷон ба саломат бурданд.

Қатар гуфт, ки яке аз нерӯҳои амниятии дохилиаш дар ин ҳамла кушта шудааст.

Бино ба иттилои Оҷонсии ҳавошиносии кишвар, рӯзҳои 13-16-уми сентябр дар шаҳру ноҳияҳои вилояти Хатлон, Суғд, ноҳияҳои тобеи ҷумҳурӣ ва шаҳри Душанбе ҳаво пур аз чангу ғубор хоҳад шуд.

Ин ниҳод сабаби хокборишу олудшави ҳаворо ба “омилҳои метеорологӣ” рабт додааст.

Кумитаи ҳолатҳои фавқулодаи Тоҷикистон ба ронандагон ва сайёҳон ҳушдор додааст, ки дар ин рӯзҳо ҳангоми ҳаракат дар роҳҳо эҳтиёткор бошанд ва суръати ҳаракатро риоя кунанд.

Ба шаҳрвандон тавсия дода мешавад, ки дар ин рӯзҳо бештар об нӯшанд ва ҳавои дохили хонаро тоза нигаҳ доранд.

Ба онҳое, ки бемориҳои роҳҳои нафас ранҷ мекашанд, тавсия дода шудааст, ки дар чунин ҳавои олуда “меъёри доруҳои истеъмолиро дар ин рӯзҳо коҳиш надиҳанд ва ҳамеша бо худ инглятор дошта бошанд”

Солҳои охир ҳавои гарм ва хокбориши пайдарҳам дар Тоҷикистон сабаби афзоиши бемориҳои роҳҳои нафас шудааст. Мардум аз хокбориши пайваста ва ҳавои пурчангу ғубор шикоят мекунанд.

Тоҷикистон дар қатори чаҳор кишвари ҳавояшон бисёр олуда ё нопок дар ҷаҳон қарор гирифтааст. Ба гуфтаи масъулони Оҷонсии обуҳавошиносии Тоҷикистон, пайдо шудани хокбодҳо аз ҳарорат, набудани бориш ва самту суръати шамол вобаста аст. Ба Тоҷикистон хокбодҳо асосан аз самти ҷанубу ғарб меоянд.

Муҳоҷирони тоҷик бо фиристодани як навори видеоӣ мегӯянд, ки пулиси Алмато рӯзи ҷумъа шуморе аз зодагони Тоҷикистонро боздошт ва бозпурсӣ кардааст.

Дар навори видеоие, ки муҳоҷирони тоҷик рӯзи 13 сентябр ба Радиои Озодӣ фиристоданд, дида мешавад, ки беш аз 10 нафар дар боздоштгоҳ қарор доранд.

Фарде ки ин наворро фиристодааст, мегӯяд, ки ин муҳоҷирон пас аз намози ҷумъа аз дохил ва саҳни масҷид боздошт шуданд.

Ба нақли наздиконаш, бо вуҷуди доштани санадҳои дурусти будубош, дар ин рейд танҳо муҳоҷирони тоҷик боздошт шудаанд. Аз замони боздошти ин афрод як шабонарӯз мегузарад, вале ҳанӯз ҳам онҳоро раҳо накардаанд.

Радиои Озодӣ мустақилона дурустии гуфтаҳои фиристандагони ин наворро тасдиқ карда наметавонад.

Мақомоти қазоқ ҳанӯз сабаби боздошти ин шаҳрвандони Тоҷикистонро шарҳ надодаанд. Сафоратхонаи Тоҷикистон дар Қазоқистон ҳам ҳанӯз дар робита ба ҳодиса, ибрози назар накардааст.

Қазоқистон баъд аз Русия кишвари дувуми муҳоҷирпазир аз Тоҷикистон аст. Бо афзоиши таъсири таҳримҳои байнулмилалӣ болои Русия ва коҳиши иқтисоди ин кишвар, баъзе аз муҳоҷирони тоҷик ба Қазоқистон рӯ оварданд. Онҳо асосан дар бозору сохтмон кор мекунанд.

Муҳоҷирон пештар аз он хушҳол буданд, ки дар муқоиса ба Русия, дар Қазоқистон таъқиби пулис ва бегонаситезӣ камтар аст. Ҳоло мегӯянд, вазъият ба Русия монанд мешавад.

Вазорати корҳои дохилии Тоҷикистон аз боздошти ду гумонбар дар қатли як модар ва се фарзандаш дар деҳаи Дарёободи ҷамоати Зайнабободи ноҳияи Рӯдакӣ, хабар дод. Ин ҳодиса рӯзи 5-уми сентябр рух дод ва боиси сару садоҳо дар ҷомеа ва тарсу ҳароси сокинони маҳал шуд.

Вазорати корҳои дохилии Тоҷикистон нӯҳ рӯз баъд аз ҳодиса эълон кард, ки дар пайи чораҳои оперативӣ-ҷустуҷӯӣ, ду нафар бо номҳои А.С ва С.Н ба гумони даст доштан дар ин куштор, боздошт шудаанд. Ба иттилои ВКД, боздоштшудаҳо яке 32-сола ва дувумӣ 16-сола мебошанд.

Дар хабари Вазорати корҳои дохилии Тоҷикистон дар бораи шахсияти гумонбарон ва ангезаи ҳодиса омадааст, ки онҳо истиқоматкунандагони ҳамин деҳа буда, "бо ҳадафи дуздӣ ва ғоратгарӣ" ба ин хона ворид шуданд ва ҳангоми огоҳ шудани соҳибхона, онҳоро "ваҳшиёна", ба қатл мерасонанд.

Вазорати корҳои дохилӣ мегӯяд, ки ин ду нафар аз қабл доғи судӣ доштанд. Ба иттилои ВКД, тафтишро додситонӣ пеш мебарад.

Назари худи ин афрод ва наздиконаш ба ин иттиҳом маълум нест. Ва низ то кунун маълум нест, ки оё онҳо бо вакили дифоъ таъмин ҳастанд ё не.

Мақомот мегӯянд, ки марги Шаҳло Назароваи 45-сола ҳамроҳ бо писар ва ду духтараш дар манзили истиқоматиашон рух додааст. Ба нақли ҳамсояҳо, ҷасади онҳоро баъди ду рӯз пайдо кардаанд.

Дар пайи ин ҳодиса мақомоти интизомӣ ҳамсояҳоро бозпурсӣ карда, изи ангушт гирифтанд. Бархеро ҳушдор додаанд, ки бе иҷоза бо дигарон дар ин бора сӯҳбат накунанд. Масъулони деҳа аз сокинон хостаанд, ки эҳтиёткор бошанд ва кӯдаконро беназорат намонанд.

Духтарони зан Ҳабиба ва Ҳамида, писараш Шараф ном доштанд. Писар дар синфи шашум мехондааст ва духтарон 15 ва 17-сола будаанд. Шавҳари зан, ки дар муҳоҷирати корӣ буд, баъди ҳодиса ба Тоҷикистон омадааст.

Мақомоти тафтишотӣ ҳамчунин ҳамсинфону омӯзгорони мактаберо, ки духтарони ин хонадон дар он таҳсил мекарданд, бозпурсӣ намуданд.

Маҷмаи умумии СММ рӯзи 12 сентябр пешнависи қатъномеро, ки Фаронса ва Арабистони Саудӣ дар бораи ташкили кишвари Фаластин пешниҳод карда буданд, бо аксарияти оро қабул кард.

Ин қатъномаи ҳафтсафҳаӣ, ки "Эъломияи Ню-Йорк" хонда шудааст, натиҷаи як нишасти байналмилалӣ дар СММ дар моҳи июл бо мизбонии Арабистони Саудӣ ва Фаронса дар бораи муноқишаи чансола миёни фаластиниҳо ва Исроил аст. Амрико ва Исроил аз ҳузур дар ин нишаст худдорӣ карда буданд.

Дар нишасти Маҷмаи умумии СММ дар рӯзи 12 сентябр, 142 кишвар аз ин пешниҳод пуштибонӣ карда, 10 кишвар раъйи мухолиф доданд ва 12 кишвар аз раъй додан худдорӣ намудад.

Ин раъйгирӣ пеш аз нишасти сарони кишварҳои ҷаҳон дар 22 сентябр дар ҳошияи иҷлоси Маҷмаи умумӣ баргузор шуд. Интизор меравад Бритониё, Фаронса, Канада, Австралия ва Белгия ба таври расмӣ дар нишасти Маҷмаи умумии имсол кишвари Фаластинро ба расмият бишиносанд.

Қатъномаи мавриди тасдиқи Маҷмаи умумӣ, ҳамлаҳои "Ҳамос" ба Исроилро дар 7 октябри соли 2023 маҳкум кардааст.

Ин қатънома ҳамчунин ҳамлаҳои Ироил алайҳи ғайринизомиён ва зерсохтҳои ғайринизомӣ дар Ғазза, муҳосира ва барқасдона ба миён овардани қаҳтиро маҳкум намудааст.

Ҷанги навбатӣ миёни фаластиниҳо ва Исроил рӯзи 7 октябри соли 2023 бо ҳамлаи гурӯҳи "Ҳамос" ба Исроил оғоз шуд. Тибқи оморҳои Исроил, ҳар ин ҳамла "Ҳамос" 1200 нафарро кушт ва ҳудуди 251 тани дигарро ба гарав бурд.

Бар асоси эълони мақомоти маҳаллии фаластинӣ, аз он замон то кунун беш аз 64 ҳазор нафар, ки аксарашон ғайринизомӣ ҳастанд, дар ҳамлаҳои Исроил ба навори Ғазза кушта шудаанд.