Маъмурияти Буш гуфт, ки тасмими Бритониё барои шурӯъи берункашии 1600 нирӯяш аз Ироқ ба он ишора дорад, ки дар вогузории масъулият ба дӯши ироқиҳо пешрафте ҳосил шудааст. Вазири умури хориҷаи Амрико Кондализа Райс гуфт, ки эътилофи таҳти раҳбарии Амрико дар Ироқ дастнохӯрда боқӣ мемонад ва таъкид кард, ки Бритониё дар ҷануби Ироқ ҳазорҳо дигар нирӯҳои худро нигаҳ хоҳад дошт. Қонунгузорони ҳизби мухолифи демократӣ, ки Конгресси Амрикоро таҳти назари худ қарор додаанд, аз раиси ҷумҳурӣ Ҷорҷ Буш даъват карданд, ки аз барномаи Бритониё дар хуруҷи нирӯҳо пайравӣ кунад.





Тони Блэр, нахуствазири Бритониё гуфт, ки дар моҳҳои наздик шумори нирӯҳояшро дар Ироқ ба андозаи 1600 нафар коҳиш хоҳад дод. Феълан дар Ироқ, ғолибан дар ҷануби ин кишвар 7100 сарбози бритониёӣ ҳизмат мекунанд. Блэр гуфт, ки парлумон ва баъзе сарбозон дар Ироқ то соли 2008 боқӣ хоҳанд монд ва онҳо ба қавли Блэр кори зиёде доранд, ки бояд анҷом шавад.




Блэр гуфт, ки нирӯҳои бритониёӣ масъулияти таъмини амниятро ба ҳамтоёни ироқиашон вогузор кардаанд ва нирӯҳои боқимондаи бритониёӣ вазифаи кӯмаккунандаро ба артиши ироқӣ иҷро хоҳанд кард. Вай гуфт: "Нирӯҳои бритониёӣ, ки дар Ироқ боқӣ мемонанд, чунин вазифа хоҳанд дошт: омӯзиш ва кӯмак ба нирӯҳои ироқӣ, таъмини амнияти марзи Ироқу Эрон ва роҳҳои интиқоли озуқа, ва гузашта аз ин ҳама, онҳо бояд маҳорати анҷоми амалиёт алайҳи гурӯҳҳои тундравро дошта бошанд ва дар сурати дархости кӯмак аз ҷониби артиши ироқӣ бояд сари вақт дар канори онҳо ҳозир бошанд"




Блэр гуфт, ки нишонаҳое мавҷуданд, ки ҳукумати Сурия барои кӯмак ба Ироқ омодагӣ нишон додааст. ИМ Сурияро дар он муттаҳам кардааст, ки ба шӯришиёни Ироқ кӯмак мекунад. Дик Чейнӣ, муовини раиси ҷумҳурии Амрико эълони Блэрро истиқбол кард ва гуфт, ки коҳиши шумори нирӯҳо ба он ишора дорад, ки дар Ироқ корҳо ба хубӣ ҷараён мегирад. Кандализа Райс, вазири умури хориҷаи Амрико дар Берлин гуфт, ки нирӯҳои эътилоф дастнохӯрда боқӣ мемонанд.

Владимир Зеленский, раисҷумҳури Украина гуфт, Иёлоти Муттаҳида мехоҳад, ки ҷанги васеъмиқёси Русия дар Украина пеш аз тобистони имсол ба поён расад.

Ин изҳорот дар ҳоле садо дод, ки Русия мавҷи нави ҳамлаҳои мушакӣ ва ҳавопаймоҳои бесарнишинро ба зербунёдҳои энергетикии Украина сар кардааст.

Тибқи изҳороте, ки дафтари Зеленский рӯзи 7-уми феврал нашр кард, Вашингтон пешниҳод додааст, ҳафтаи оянда дар Майами даври нави гуфтугӯйи сеҷониба баргузор шавад.

Киев розӣ шудааст. Мақомоти Маскав ва Вашингтон ҳанӯз дар бораи баргузории чунин музокирот изҳори назар накардаанд.

Раисҷумҳури Украина рӯзи шанбе гуфт: "Амрикоиҳо пешниҳод мекунанд, ки ҷонибҳо ҷангро қабл аз тобистон бас кунанд ва бо эҳтимоли зиёд барои пойбандӣ ба ин ҷадвали замонӣ фишор хоҳанд овард."

Доналд Трамп, президенти Амрико, дар маъракаи интихоботии соли 2024 ваъда дода буд, ки ба ҷанги Русия дар Украина поён хоҳад дод. Талошҳои ӯ барои ҳалли масъала беш аз як сол боз идома дорад.

Русия ва Украина ба иҷрои шартҳои худ пойфишорӣ доранд, ки аз тазмини амниятӣ то вогузории қаламаравро дар бар мегирад.

Як ҷунбиши мухолифи ҳукумати Тоҷикистон дар хориҷа ҳодисаи Боздоштгоҳи Хуҷандро маҳкум кард. Дар ин воқеа, ки рӯзи 31-уми январ иттифоқ уфтода, вале мақомот на хабари расмияшро доданд ва на ҷузъиёташро бармало карданд, ба иттилои манобеи Радиои Озодӣ, се зиндонӣ кушта шудаанд.

"Гурӯҳи 24"Фаъолияташ дар ҳудуди Тоҷикистон мамнуъст рӯзи 4-уми феврал дар изҳороте аз сенарияи ба гуфтааш такрорӣ дар зиндонҳои кишвар ибрози нигаронии ҷиддӣ кардааст.

"Дар солҳои охир, ҳар боре вазъияти сиёсӣ ва иҷтимоӣ дар кишвар муташанниҷ мегардад, мақомоти расмӣ аз рух додани "ошӯб" дар зиндонҳо хабар медиҳанд," -- гуфта шудааст дар изҳорот. Дар ҳоле ки, ба гуфтаи масъулони "Гурӯҳи 24", "ин ҳама бе таҳқиқоти мустақил, бидуни шаффофият ва бидуни иҷозати назорати ҷомеа сурат мегирад… Ин сенария метавонад барои аз байн бурдани садоҳои норозӣ, маҳбусони сиёсӣ ё шоҳидоне бошад, ки қобилияти расонидани ҳақиқатро ба ҷомеа доранд."

Созмони мухолифи ҳукумат бовар дорад, "хомӯшии ҷомеаи байнулмилалӣ ва набудани фишори ҷиддӣ ба режими ҳоким боис мегардад, ки ин давраи зӯроварӣ идома ёбад."

Манобеи Радиои Озодӣ рӯзи 3-юми феврал хабар доданд, ки дар як тирпаронӣ дар Боздоштгоҳи шаҳри Хуҷанд камаш се зиндонӣ ва як нигаҳбон кушта шудаанд. Дертар як манбаи наздик ба Идораи тандурустӣ дар вилояти Суғд бо шарти фош нашудани ному мақомаш гуфт, "аз боздоштгоҳ се маҳбуси кушташуда ва як захмиро оварданд." Вай дар бораи нигаҳбон чизе нагуфт.

Ба гузориши манбаъҳои Радиои Озодӣ, воқеа замоне рӯй додааст, ки “ҳашт маҳбус баъди тир задан ба як нигаҳбони Боздоштгоҳ бо нияти фирор ба нуқтаи ҳоил ворид гаштаанд”. “Нигаҳбонҳои дигар ба тарафи онҳо тир задаанд. Агар онҳо аз нуқтаи ҳоил мегузаштанд, дигар як дарвозаи баромад буд ва метавонистанд гурезанд,” – гуфт яке аз манбаъҳо.

Бо гузашти бештар аз як ҳафта аз ҳодиса Идораи зиндонҳои Вазорати адлия дар ин бора хабаре надодааст.

Ангезаи ҳамла дар Боздоштгоҳи Хуҷанд рӯшан нест. Маълум нест, ин ҳодиса тарҳи ошӯб будааст ё тавре намояндагони мухолифони ҳукумат дар хориҷа таъкид мекунанд, баъзе аз зиндониён аз вазъи боздоштгоҳ ва тарзи муносибат бо онҳо “ба дод омадаанд”.

Дар Тоҷикистон 19 боздоштгоҳ ва зиндон ҳаст. Мақомоти Тоҷикистон дар суҳбатҳои худ аз беҳтар шудани шароити боздоштгоҳу зиндонҳо суҳбат мекунанд. Департаменти давлатӣ ё Вазорати корҳои хориҷии Амрико дар соли 2024 "аз ҳад зиёд будани зиндониҳоро дар маҳбасҳои Тоҷикистон" мушкили ҷиддӣ номид.

Дар солҳои охир дар зиндонҳои Хуҷанд ва Ваҳдат (2018, 2019 ва 2025) чанд ошӯб ё исён рух дода, зиёда аз 50 нафар кушта шуданд. Мақомот ҳамвора ошӯбро кори дасти ифротгароёни исломӣ донистаанд. Ҳомиёни ҳуқуқ бадрафтории мақомот бо маҳбусон, аз ҷумла тамаъҷӯиро аз сабабҳои эҳтимолии ангезандаи исёни маҳбусон ном бурданд.

Мақомоти Русия дар пайванд ба суиқасд ба ҷони генерал Владимир Алексеев як каси дигарро дастгир кардаанд.

Ҳамла ба муовини аввали раиси Сарраёсати Ситоди кулли нерӯҳои мусаллаҳи РусияЧун муассисаи истихбороти ҳарбӣ ё ГРУ ҳам маъруф аст рӯзи 6-уми феврал дар назди хонааш дар Маскав сурат гирифт. Вай захмӣ ва дар бемористон бистарист.

ФСБ ё Хадамоти федеролии амнияти Русия рӯзи 8-уми феврал гуфт, гумонзади нав шаҳрванди Русия аст ва дар Дубай боздошт шуд. Аз ӯ Любомир Корба ном бурданд. 65-сола аст.

Ин ниҳод гуфт, дар ин ҳодиса ду шаҳрванди дигари Русия даст доранд, ки яке дар Маскав боздошт шуда, дигаре гуё ба Украина рафтааст.

Дар бештар аз як соли охир дастикам се низомии баландпояи Русия дар Маскав кушта шудаанд. Моҳи декбари соли 2025 дар натиҷаи таркиши мошин дар Маскав генерал-лейтенант Фанил Сарваров, раҳбари як раёсати Ситоди кулли нерӯҳои мусаллаҳи Русия, ба ҳалокат расид.

Генерал Ярослав Москалик, муовини сардори сарраёсати Ситоди кулли нерӯҳои мусаллаҳи Русия, моҳи апрели соли 2025 дар таркиши мошин дар наздикии шаҳри Маскав кушта шуд. Москалик дар солҳои 2015 ва 2019 дар музокироти “шакли Нормандӣ” дар бораи Украина нақши калидӣ дошт.

Дар моҳи декабри соли 2024 дар пайи таркиши бомбе дар Маскав генерал-лейтенант Игор Кириллов ҷон бохт. Вай аз соли 2017 раҳбарии Нерӯҳои ҳимоя аз ҳамлаҳои кимиёӣ ва биологии Русияро бар дӯш дошт.

Қатли Кириллови 54-сола як рӯз баъди он рух дод, ки Додситонии Украина ӯро ба истифода аз силоҳи кимиёӣ алайҳи нерӯҳои украинӣ муттаҳам кард. Мақомоти Русия дар пайванд ба куштори ин генерал як шаҳрванди 29-солаи Узбекистонро дастгир карданд.

Дар ҳама вазоратҳои Тоҷикистон ғайр аз муовинони ҳозираи вазир боз як муовини дигар таъйин хоҳад шуд, ки вазифааш ба рақамикунонӣ нигаронида мешавад.

Дар ин бора Хуршед Мирзо, раиси Оҷонси инноватсия ва технологияҳои рақамӣ рӯзи 6-уми феврал дар як нишасти хабарӣ иттилоъ дода, афзуд, чунин амал ба манфиати кор аст.

Вай шарҳ дод, афроде, ки ба ҳайси муовин таъйин мешавад, шарт нест мутаххассиси IT ё фанновариҳои иттилоотӣ бошанд, муҳим аз раванди ислоҳот ба гузориши рақамӣ огоҳ бошанд.

Тоҷикистон дар чанд соли охир бо таҳияи барномаву таъсиси ниҳоди алоҳида талош дорад аз иқтисодӣ анъанавӣ ба иқтисодӣ рақамӣ гузарад.

Мақомот норасоии зерсохтори зарурӣ, аз ҷумла марказҳои коркарди маълумот, махзанҳои рақамӣ, суръату сифати интернет ва омодасозии мутахассисони соҳаи IT-ро аз мушкилотҳои ин раванд медонад.

Маълум нест таъйини муовини нав дар вазоратҳои кишвар дар гузор ба иқтисоди рақамӣ ё рушди ҳукумати электронӣ то куҷо таъсир хоҳад гузошт.

Оҷонсии инноватсия ва технологияҳои рақамии Тоҷикистон суръат ва сифати интернетро дар кишвар яке аз мушкилиҳои соҳа арзёбӣ кард. Дар Тоҷикистон танқид аз сифати пасти интернет ва нархи гарони он чандин сол аст вуҷуд дорад, вале зоҳиран, ҳалли худро намеёбад.

Хуршед Мирзо, раиси Оҷонсии инноватсия ва технологияҳои рақамии Тоҷикистон рӯзи 6-уми феврал дар ҷараёни нишасти хабарӣ дар Душанбе гуфт, “самти мо бо ин бисёр вобастагии зич дорад ва гузариши рақамӣ бе суръату сифати интернет ғайриимкон аст.

Талабот рӯз то рӯз зиёд шуда истодааст, ин сарбориро ба миён овардааст ва ин ҷо ба ҳисоби интернети мобилӣ гирем, ширкатҳо вазифадор гардидаанд, ки таҷҳизоти заруриро насб намоянд,” - афзуд ӯ.

Дар Оҷонсии инноватсия ва технологияҳои рақамӣ гуфтанд, бо ин вуҷуд дар кишвар низоми ягонаи гардиши ҳуҷҷатҳои электронӣ таҳия шуда, дар беш аз 850 мақомоту идораҳои давлатӣ ва зерсохтори онҳо мубодилаи мукотибот бидуни коғаз фаъол мебошад. Ин ниҳод аз роҳандозии портали ягонаи хадамоти давлатӣ хабар дод, ки ҳадафи он таъмини шаффофият ва рушди ҳукумати электронӣ будааст.

“Ба ҳолати имрӯза номгӯи 83 хизматрасониҳои давлатӣ дар портали мазкур ... ворид гардида, ба шаҳрвандон дар шакли рақамӣ бе ҳозиршавӣ ба мақомот дастрас мебошад,” – афзуд раҳбари Оҷонсии инноватсия ва технологияҳои рақамии Тоҷикистон.

Ситоиши раиси оҷонсӣ аз роҳандозии хадамоти гуногуни электронӣ дар ҳолест, ки сокинон борҳо шикоят намудаанд, ки бо далели паст будани суръати интернет наметавонанд, амалҳоеро ба мисли пардохти пули барқу об ё андоз сари вақт анҷом диҳанд.

Шикоятҳо аз дастрасӣ ба интернест ва суръати сусти он ҳамеша дар шабакаҳои иҷтимоӣ низ ба назар мерасад. Ба иттилои Хадамоти алоқаи Тоҷикистон соли сипаришуда бештар аз 5 ҳазору 700 арзу шикоятро аз сӯи сокинон дастрас кардаанд ва дар аксари онҳо аз сатҳи хадамоти мобилӣ ва суръати интернет дар шаҳру навоҳии кишвар норозигӣ кардаанд. Дар нишасти матбуотии раиси Оҷонсии инноватсия ва технологияҳои рақамӣ низ хабарнигорон ин мушкилро ба миён гузоштанд, ки бо суръату сифати интернете, ки дар кишвар аст, чӣ гуна рақамикунонӣ рушд хоҳад ёфт.

Конфедератсияи футболи Осиё (AFC) рӯйхати ниҳоии довталабонро барои баргузор кардани Ҷоми футболи Осиё-2031 тасдиқ кард.

Чунонки сомонаи расмии AFC хабар додааст, ба рӯйхати ниҳоии кишварҳое, ки барои баргузории Ҷоми Осиё-2031 доталабанд, Австралия, Ҳиндустон, Индонезия, Кореяи Ҷанубӣ, Кувайт, инчунин дархости муштарак аз Тоҷикистону Узбекистон ва Қирғизистон дохил шудаанд.

Конфедератсияи футболи Осиё мизбони Ҷоми Осиё-2031-ро имсол эълон хоҳад кард.

Бояд зикр намуд, дар ҳамин ҳол дар шаҳри Душанбе барои баргузор кардани Ҷоми Осиё-2031 сохтмони иншооти бузургтарини варзишӣ дар Тоҷикистон – Варзишгоҳи миллӣ, ки барои беш аз 30 ҳазор ҷойи нишаст пешбинӣ шудааст, ҷараён дорад.

Ҳамзамон сомонаи расмии AFC хабар додааст, ки кишварҳои номзад барои баргузории Ҷоми футболи Осиё-2035 муайян шуданд. Инҳо Австралия, Ҷопон, Кореяи Ҷанубӣ ва Кувайт мебошанд.

Қаблан Тоҷикистону Қирғизистон ва Узбекистон низ барои дар соли 2035 баргузор намудани Ҷоми Осиё дархости муштарак пешниҳод карда буданд.

Ҷоми футболи Осиё сар аз соли 1956 дар чаҳор сол як маротиба, пас аз як соли мусобиқаи қаҳрамонии ҷаҳон, барпо мегардад. Аз ҳама бештар - чаҳор бор - Ҷоми футболи Осиёро мунтахаби Ҷопон соҳиб шудааст. Тимҳои миллии Арабистони Саудӣ ва Эрон себорӣ қаҳрамони Осиё гаштаанд.

Аз соли 2019 дар ин мусобиқа 24 дастаи мунтахаби қора иштирок мекунад. Охирин мусобиқаи Ҷоми футболи Осиё соли 2023 дар Қатар баргузор шуда, бо ғалабаи соҳибони майдон анҷом ёфта буд. Мусобиқаи соли 2027 дар Арабистони Саудӣ доир мегардад.

Дар Узбекистон барои нашр ва истифодаи дашному ҳақорат дар интернет, аз ҷумла шабакаҳои иҷтимоӣ базудӣ ҷазо ба шакли ҷарима ва ҳабс ҷорӣ мешавад. Тарҳи қонун дар ин замина дар хониши аввал дар Олий Маҷлис ё парлумони Узбекистон қабул шуд. Дар ин бора рӯзи 7 феврал дар телеграм-канали парлумон хабар дода шудааст.

Вакилони маҷлиси Узбекистон барои нашри алфози қабеҳ дар интернет ҷарима дар ҳаҷми 5 миллион сӯм ё 400 доллар ва ҳам ҳабси маъмурӣ ба мӯҳлати то 10 шабонарӯзро дуруст мешуморанд. Вакилон мегӯянд, ки ҳадафи онҳо ба риояи маданият ва одоби рафтор дар интернет одат кунонидани корбарон мебошад.

Дар қонунҳои Узбекистон барои истифодаи алфози қабеҳ дар ҷои ҷамъиятӣ ҷазо дар ҳаҷми ҷарима ва ҳам ҳабси маъмурӣ вуҷуд дорад. Ҷорӣ кардани ҷазо барои чунин рафтор дар интернет ташаббуси нав мебошад.

Муовини раиси парлумони Узбекистон Алишер Қодиров, ки як тарафдори қабули чунин ҷазо дар қонунҳои кишвар аст, гуфт, “танҳо бо корҳои маърифатӣ дигар намешавад пеши роҳи ҷаҳолатро гирифт, аз ин рӯ, тадбирҳои молӣ ва маҳдудкунанда меъёрҳои ногузир барои танзими ин масъала мебошанд”.

Тарҳи қонун бояд аз ду хониши дигари вакилон гузашта баъди он ба Сенат фиристода шавад. Танҳо баъди имзои президент ва нашри расмии он дар матбуот ин тарҳ қувваи қонунӣ мегирад.

Сохторҳои ҳифзи қонуни Русия як гумонбар дар ҳамла ба муовини раиси Сарраёсати ситоди кулли артиш генерал Владимир Алексеевро боздошт карданд. Дар ин бора чандин нашрияи маҳаллӣ, аз ҷумла, "Коммерсант", Baza ва "РЕН ТВ" бо такя ба манбаъҳои худ хабар додаанд.

"Коммерсант" рӯзи 7 феврал навишт, ки боздоштшударо ба бозпурсӣ бурда, 8 феврал қарор аст мурофиаи додгоҳӣ барои ҳабси ӯ барпо шавад. Парвандаи ҷиноӣ бар асоси моддаи сӯиқасд ба куштор ва муомилаи ғайриқонунии силоҳ боз шудааст.

Телеграм-каналҳои Mash ва Baza мегӯянд, ки гумонбарро “аз шаҳри Дубай” меоранд. Ҳамроҳ бо ӯ як шарикаш ҳам боздошт шудааст. Ҳеҷ маълумоте дар бораи шахсияти гумонбар ва фармоишгарони эҳтимолии ӯ нашр намешавад.

Худи генерал, ба навиштаи телеграм-каналҳои хабарӣ, баъди ҳамлаи дирӯза аз амалиёти ҷарроҳӣ гузашта ба ҳуш омадааст. Сӯиқасд ба ҷони Алексеев сабҳи ҷумъа дар хонааш дар шаҳри Маскав сурат гирифт.

Дар хабар омадааст, ки ба сӯи генерал шахси ношиносе дар даромадгоҳи манзили истиқоматие дар минтақаи шимолу ғарби Маскав тир холӣ кардааст. Пойгоҳи Baza бо такя ба шоҳидон навишт, ки ҳамла субҳи 6 феврал дар зинапояи даромадгоҳи манзили истиқоматӣ ва лаҳзаҳое сурат гирифт, ки генерал аз дохили манзилаш берун мешуд.

Нашрияи “Коммерсант” бо такя ба манбаъҳояш дар сохторҳои ҳифзи қонун навишт, ки ҳамла ба генерал тахминан соати 7-и субҳи ҷумъа, дар лаҳзаҳое рух дод, ки генерал мехост аз хонааш берун шуда ба кор биравад. Дар саҳни назди дари хонааш Алексеев бо шахси ношиносе рӯбарӯ шуд, ки худро чун ғизорасон вонамуд карда ба дохили даромадгоҳи бино ворид шудааст. Замоне, ки генерал хост силоҳро аз дасти ӯ бигирад, ҳамлагар оташ кушода дасту пои генералро захмӣ кард. Ӯро бо ҷароҳатҳои сангин ба беморхона интиқол доданд ва ба иттилои нашрия, як тир ба узви муҳими бадани генерал расидааст.

Дмитрий Песков, сухангӯи Кремлин гуфт, ки президент Владимир Путин дар бораи ин ҳодиса гузоришҳоро саривақт дарёфт мекунад.

Дар солҳои охир дар натиҷаи ҳамлаҳои гуногун чандин раҳбари артиши Русия кушта шуданд, вале дар гузаштаҳо алайҳи ин мақомдорони ҳарбӣ асосан мавори таркандаро ба кор бурдаанд.

Дар Бритониё Алексеевро дар иштирок дар сӯиқасд ба ҷони Сергей Скрипал дар Солсбери гунаҳгор мекунанд. Инчунин ӯро яке аз раҳбарони ширкати нимаҳарбии «Вагнер» меноманд ва дар вақти ошӯби Евгений Пригожин дар моҳи июни соли 2023 ӯ ба унвонии ҷангиёни «Вагнер» муроҷиати видеоӣ сабт карда худаш ҳам шахсан бо Пригожин сӯҳбат кардааст.

Раҳбари бевоситаи Алексеев Игор Костюков дар музокираҳои миёни ИМА ва Украина ҳайати Русияро раҳбарӣ мекунад. Охирин даври ин музокираҳо дар шаҳри Абузаби барпо шуд.

Мақомоти интизомии Русия ҳаҷвнигори қазоқ Нурлан Сабуровро 50 сол аз ҳаққи даромадан ба Русия маҳрум карданд. Дар ин бора РБК бо такя ба манбааш дар ниҳодҳои қудратӣ хабар додааст.

Ба иттилои манбаъ, манъи вуруди ҳаҷвнигор аз 30-юми январ имзо шудааст. Хабаргузории расмии РИА Новости навишт, чунин қарор "бо назардошти манфиатҳои амнияти миллии Русия, риояи қонун ва ҳимояти арзишҳои миллию ахлоқӣ содир шуд".

Як манбаи ин хабаргузорӣ гуфт, далели чунин қарор ба танқиди Сабуров аз ҷанги Русия дар Украина ва ҳам вайрон кардани қонунгузории муҳоҷират ва молиёт (андоз) мебошад.

Айни замон, "Важние истории" аз қавли як шиноси Сабуров навишт, сабаби чунин рафтори мақомоти Русия ин буд, ки ҳаҷвнигори маъруфро чандин бор ба идораи ФСБ – Хадамоти амнияти федеролӣ даъват карда, аз ӯ хостанд бо онҳо ҳамкорӣ кунад, вале ӯ “на розигӣ дод ва на рад кард”.

Бори охир соли 2025 ӯро ба ФСБ даъват карда, шарт гузоштаанд, ки ба ҷанги зидди Украина равад ё Русияро тарк кунад.

Shot навишт, Сабурови 34-сола, ки шаҳрванди Қазоқистон аст, шаби 6-уми феврал бо ҳавопаймои ширкати Fly Dubai ба Маскав расид, вале ӯро ҳангоми аз санҷиш гузаштан ба як хонаи алоҳида бурда, ба дасташ санади манъи ворид шудан ба Русияро супурданд.

Mash шоми 6-уми феврал навишт, ки Нурлан Сабуров дар фурудгоҳи Внуково дар миёни нафароне мебошад, ки мунтазири ихроҷ аз Русия ҳастанд.

Як сол пеш ӯро дар фурудгоҳи Шереметево барои вайрон кардани қонуни муҳоҷират ҷарима бастанд. Моҳи ноябр фаъолони як гурӯҳи рӯ ба ҳукумат бо номи "Сорок сороков" аз болои Сабуров ба Кумитаи тафтишоти Русия барои шӯхиаш дар ҳаққи Исои Масеҳ шикоят карданд.

Вазири корҳои дохилии Тоҷикистон гуфт, дар давоми солҳои охир сохторҳои ҳифзи қонуни кишвар 2500 шаҳрвандеро, ки “дар хориҷи кишвар ба таҳсили ғайриқонунии динӣ машғул буда, дар муноқишаҳои мусаллаҳонаи мамлакатҳои бегона иштирок доштанд, баргардониданд”.

Вазир Рамазон Раҳимзода дар ин бора зимни сафараш ба ноҳияи Ёвон ва мулоқот бо фаъолони маҳаллӣ сӯҳбат кардааст. Сомонаи ВКД Тоҷикистон рӯзи 6 феврал хабар дод, ки дар суханрониаш дар Кохи фарҳанги ба номи Тағоймурод Хушвахтови ноҳияи Ёвони вилояти Хатлон Раҳимзода инчунин дар бораи таҳдидҳои мисли ҷалби ҷавонон ба ақидаҳои ифротӣ ва ҳам узвият дар созмонҳои мамнӯъ изҳори нигаронӣ кардааст.

Ҷузъиёти бештаре дар бораи омори аз хориҷа баргардонидашудаҳо нашр намешавад, вале матбуоти мустақил борҳо дар бораи таъқибу истирдоди на танҳо муттаҳамон дар содир кардани ҷиноятҳои воқеӣ, балки мухолифон ва мунаққидони ҳукумати Тоҷикистон аз хориҷа ҳам хабар додааст.

Чунин бозгардонҳои баҳсбарангез солҳои охир аз кишварҳои мисли Туркия, Олмон, Австрия, Фаронса ва Полша ҳам сурат мегирад ва дар миёни онҳо нафароне ҳастанд, ки барои саркӯби озодиҳои сиёсиву фишор ба ҷомеаи маданӣ ҳукумати Тоҷикистонро ошкор танқид кардаанд.

Маросими ифтитоҳи Бозиҳои XXV зимистонаи олимпӣ шаби 6-ум ба 7-уми феврал дар варзишгоҳи “Сан-Сиро”-и шаҳри Милани Итолиё баргузор шуд. Маросим бо намоише оғоз ёфт, ки дар он 70 рақсандаи театри Ла Скала муҷассамаҳоро тасвир карданд. Баъдан овозхони маъруф Лаура Паузини суруди миллии Итолиёро иҷро намуд.

Аз рӯи анъана, паради варзишгарон бо баромади дастаи мунтахаби Юнон оғоз ёфт. Парад дар шаҳрҳое барпо шуд, ки он ҷо мизбони мусобиқаҳои олимпӣ мешаванд.

Парад бо баромади дастаи мунтахаби Итолиё ба анҷом расид. Парчами миллиро шорт-трекчӣ Арианна Фонтана ва лижарон Федерико Пеллегрино бардоштанд.

Пас аз баромади ҳамаи кишварҳои ширкаткунанда, бахши "Саёҳати замон"-и намоиш шуруъ шуд. Ситораи сериали “Нилуфари сафед” Сабрина Импаччиаторе ба саҳна баромада, намоиши ҷолиберо нишон дод, ки якчанд давраҳоро фаро гирифт.

Баъдтар, Ҷованни Магало, раиси Кумитаи тадорукоти Бозиҳо дар Итолиё ва Кирсти Ковентри, президенти Кумитаи байналмилалии олимпӣ, суханронӣ карданд.

Дарҳол пас аз эълони кушода шудани Бозиҳои олимпӣ овозхони маъруфи итолиёӣ Андреа Бочелли дар саҳна ҳозир шуд. Ҳунарпеша Шарлиз Терон низ ба саҳна баромада, орзу кард, ки бозиҳо на танҳо варзиш бошанд, инчунин вай ба «сулҳ дар тамоми ҷаҳон» даъват кард.

Дар баробари ҳунарнамоии ҳунарпешаҳо варзишгарони Итолиё эстафетаи машъали олимпиро дар варзишгоҳи Милан давом доданд. Парчами олимпӣ таҳти гимни олимпӣ бардошта шуд, ки онро пианинонавоз Лан Лан ва сароянда Чечилия Бартоли иҷро карданд.

Оташи олимпиро дар ду ҷом: дар Милан лижаронхои кӯҳӣ Алберто Томба ва Дебора Компанйони ва дар Кортина София Гогги фурӯзон намуданд. Маросим бо оташбозии дурахшон ба охир расид.

Дар Бозиҳои XXV зимистонаи олимпӣ, ки дар шаҳрҳои Милан ва Кортина-д’Ампетсои Итолиё то рӯзи 22-юми феврал идома меёбанд, иштироки наздики 3000 варзишгар аз 91 кишвар дар назар аст.

Итолиё бори чаҳорум дар таърихт бозиҳои Олимпӣ мизбони чунин мусобиқоти бузург гардидааст. Варзишгарон барои 116 маҷмуи медалҳо дар 16 намуд: биатлон, бобслей, лижаронии кӯҳӣ, кёрлинг, конкитозӣ, дуҳарбаи лижаронӣ, пойгаи лижаронӣ, ҷаҳиш аз трамплин, чанатозӣ, скелетон, сноуборд, рақси рӯйи ях, фристайл, ҳоккей, шорт-трек ва лижаронӣ-кӯҳнавардӣ рақобат хоҳанд кард.

Бояд гуфт, ки варзишгарони Бенин, Гвинея-Бисау ва Имороти Муттаҳидаи Арабӣ бори аввал дар Бозиҳои олимпии зимистона ширкат меварзанд.

Аммо Тоҷикистон дар Олимпиадаи зимистона дар Итолиё ширкат надорад. Чаҳор варзишгари тоҷик, ки дар мусобиқаҳои интихобӣ дар намуди лижаронии кӯҳӣ барои ба даст овардани роҳхатҳо ба Бозиҳои зимистонаи соли 2026 талош карданд, натавонистанд меъёрҳои олимпиро иҷро намоянд. Бинобар ин, лижаронҳои тоҷик аз роҳхатҳои олимпӣ бенасиб монданд.

Зулфиқор Гулаҳмадзода, раиси Кумитаи ҷавонон ва варзиши Тоҷикистон дар як нишасти матбуотӣ, ки 5-уми феврал дар шаҳри Душанбе доир гардид, сабаби роҳ наёфтани варзишгарони тоҷикро ба Бозиҳои олимпии зимистонаи соли 2026 чунин шарҳ дод: “Тоҷикистон шароити зарурӣ барои тамрини варзишгарон дар намудҳои зимистонаи варзиш надорад. Мо як пойгоҳ ва як мактаби зимистонаи варзишӣ дорем. Хатти лижаронии мо ба талаботи байналмилалӣ ҷавобгӯ нест. Ҳарчанд ба варзишгарони намудҳои зимистона идрорпулӣ ҷудо шугардид ва дар хориҷа ба тамрин фаро гирифта шуданд, вале имтиёзҳои заруриро барои гирифтани иҷозатнома ба даст оварда натавонистанд.”

Коршиносони соҳаи варзиш сабабҳои инро ба мавҷуд набудани заминаи доимии омодагӣ, тақвими маҳдуди мусобиқаҳо оид ба навъҳои варзиши зимистона дар дохили кишвар нисбат медиҳанд.

Бояд зикр намуд, ки бори охир варзишгарони тоҷик соли 2014 дар Бозиҳои зимистонаи олимпӣ дар шаҳри Сочии Русия ширкат варзида буданд. Олимпиадаҳои зимистонаи соли 2018 дар Пйонгчанги Кореяи Ҷанубӣ ва соли 2022 дар Пекини Чин бе иштироки намояндагони Тоҷикистон гузаштанд.

Алъон дар Тоҷикистон танҳо як намуд - лижаронии кӯҳӣ – роҳандозӣ шудааст, ки ба барномаи Бозиҳои зимистонаи олимпӣ шомил аст. База ё урдугоҳи лижаронӣ, ки дар мавзеи Сафеддараи ноҳияи Варзоб воқеъ аст, ба талаботи меъёрҳои ҷаҳонӣ ҷавобгӯ нест. Бинобар ин, дар онҷо мусобиқоти байналмилалӣ гузаронида намешавад.

Дар шаҳри Маскав ба генерал-лейтенант Владимир Алексеев, муовини аввали раиси Сарраёсати Ситоди кулли нирӯҳои мусаллаҳи Русия, ки чун муассисаи истихбороти ҳарбӣ ё ГРУ ҳам маъруф аст, сӯиқасд сурат гирифт.

Дар ин бора Кумитаи тафтишот хабар дод. Дар хабар гуфта мешавад, ки генерал маҷрӯҳ ва бистарӣ шудааст.

Дар хабар омадааст, ки ба сӯи генерал шахси ношиносе дар даромадгоҳи манзили истиқоматие дар минтақаи шимолу ғарби Маскав тир холӣ кардааст. Пойгоҳи Baza бо такя ба шоҳидон навишт, ки ҳамла субҳи 6 феврал дар зинапояи даромадгоҳи манзили истиқоматӣ ва лаҳзаҳое сурат гирифт, ки генерал аз дохили манзилаш берун мешуд.

Нашрияи “Коммерсант” бо такя ба манбаъҳояш дар сохторҳои ҳифзи қонун навишт, ки ҳамла ба генерал тахминан соати 7-и субҳи ҷумъа, дар лаҳзаҳое рух дод, ки генерал мехост аз хонааш берун шуда ба кор биравад. Дар саҳни назди дари хонааш Алексеев бо шахси ношиносе рӯбарӯ шуд, ки худро чун ғизорасон вонамуд карда ба дохили даромадгоҳи бино ворид шудааст. Замоне, ки генерал хост силоҳро аз дасти ӯ бигирад, ҳамлагар оташ кушода дасту пои генералро захмӣ кард. Ӯро бо ҷароҳатҳои сангин ба беморхона интиқол доданд ва ба иттилои нашрия, як тир ба узви муҳими бадани генерал расидааст.

Дмитрий Песков, сухангӯи Кремлин гуфт, ки президент Владимир Путин дар бораи ин ҳодиса гузоришҳоро саривақт дарёфт мекунад.

Дар солҳои охир дар натиҷаи ҳамлаҳои гуногун чандин раҳбари артиши Русия кушта шуданд, вале дар гузаштаҳо алайҳи ин мақомдорони ҳарбӣ асосан мавори таркандаро ба кор бурдаанд.

Дар Бритониё Алексеевро дар иштирок дар сӯиқасд ба ҷони Сергей Скрипал дар Солсбери гунаҳгор мекунанд. Инчунин ӯро яке аз раҳбарони ширкати нимаҳарбии «Вагнер» меноманд ва дар вақти ошӯби Евгений Пригожин дар моҳи июни соли 2023 ӯ ба унвонии ҷангиёни «Вагнер» муроҷиати видеоӣ сабт карда худаш ҳам шахсан бо Пригожин сӯҳбат кардааст.

Раҳбари бевоситаи Алексеев Игор Костюков дар музокираҳои миёни ИМА ва Украина ҳайати Русияро раҳбарӣ мекунад. Охирин даври ин музокираҳо дар шаҳри Абузаби барпо шуд.

Масъалаи пайвастан ба Иттиҳоди иқтисодии Авруосиё ва БРИКС ҳоло дар дастури кори сиёсати хориҷии Тоҷикистон қарор надорад ва баррасӣ намешавад.

Чунин изҳоротро Сироҷиддин Муҳриддин, вазири корҳои хориҷии Тоҷикистон рӯзи 6-уми феврал дар ҳузури хабарнигорон баён кард.

Сироҷиддин Муҳриддин, ки дар нишасти хабарие оид ба натиҷаҳои кори ВКХ дар соли 2025 гузориш медод, гуфт, “Тоҷикистон бо ҳама кишварҳои узви иттиҳоди Авруосиё ва БРИКС дар доираи равобити дуҷониба ва бисёрҷониба ҳамкории танготанг дорад” ва ҳоло ҳатто пайвастан “ба сифати нозир низ ба ин созмонҳо” баррасӣ намешавад.

Тоҷикистон аз замони таъсиси иттиҳоди иқтисодии Авруосиё борҳо гуфтааст, ки масъалаи вуруд ба ин созмонро меомӯзад. Соли гузашта вазири собиқи иқтисоди Тоҷикистон гуфта буд, ки дар Тоҷикистон як гуруҳи кории вазорату идораҳо таъсис шудааст, ки суду зиёни пайвастан ба ин созмонро меомӯзад ва ба ҳукумат пешниҳод мекунад.

БРИКС ва Авруосиё ду созмони байналмилалие дониста мешаванд, ки зери назорати Русия таъсис шудаанд. Тоҷикистон ҳарчанд узвият дар БРИКС-ро надорад, аммо Эмомалӣ Раҳмон, раисҷумҳури Тоҷикистон дар чандин анҷуману нишастҳо дар доираи ин созмон ширкат кардааст ва ҳамчунин варзишгарони тоҷик соли 2024 дар Бозиҳои панҷуми варзишии кишварҳои БРИКС (BRICS Sports Games 2024) ширкат карданд.

Вазири корҳои хориҷии Тоҷикистон рӯзи 6 феврал зимни нишасти хабарӣ гуфт, ки кишвараш рӯзҳои наздик корвони ёриҳои башардӯстонаро ба мардуми ниёзманди Ғазза равон мекунад.

Ба гуфтаи Сироҷиддин Муҳриддин, ин ёриҳо аз тариқи Ҷумҳурии Мисри Араб ба Ғазза расонида мешаванд.

Вазири тоҷик ҳарчанд нагуфт, ки ин ёриҳо аз чӣ иборатанд, аммо зикр кард, ки Тоҷикистон аз нахустин рӯзҳои оғози низоъ дар Ғазза, ҷонибдори ҳалли сулҳомези ин низоъ буд ва ҳаст.

Тоҷикистон дар моҳи январи соли 2025 ҳам дар доираи ташаббуси башардӯстонаи чанд кишвари узви Созмони исломии амнияти озуқаворӣ барои бартарафсозии мушкилоти шадиди норасоии ғизо дар Ғаззаи ҷангзада, 200 тонна орд фиристода буд.

Вазорати корҳои хориҷии Тоҷикистон он замон гуфт, ин иқдом аз сӯйи кишварҳои узви Созмони исломии амнияти озуқаворӣ дар ҳамкорӣ бо Ташкилоти хайриявии Урдун амалӣ карда шуда, ба он Қазоқистон, Озарбойҷон ва Бангладеш низ ҳамроҳанд.

Ин кӯмакҳо дар ҳамоҳангӣ бо Барномаи ҷаҳонии озуқа ва дигар ниҳодҳои Созмони Милали Муттаҳид, ба ниёзмандон расонида шуданд.

Созмони исломии амнияти озуқаворӣ дар оғози соли 2024 барои мубориза бо хатари гуруснагӣ дар навори Ғазза бо интишори як даъвати изтирорӣ барномаи "Орд барои башарият"-ро роҳандозӣ карда буд.

Ҷанг миёни фаластиниҳо ва Исроил рӯзи 7 октябри соли 2023 бо ҳамлаи гурӯҳи "Ҳамос" ба Исроил оғоз шуд. Тибқи оморҳои Исроил, ҳар ин ҳамла "Ҳамос" 1200 нафарро кушт ва ҳудуди 251 тани дигарро ба гарав бурд.

Бар асоси эълони мақомоти маҳаллии фаластинӣ, аз он замон то кунун беш аз 70 ҳазор нафар, ки аксарашон ғайринизомӣ ҳастанд, дар ҳамлаҳои Исроил ба навори Ғазза кушта шуданд.

Бориши бошиддати барф ва фаромадани тарма ҳаракати нақлиётро махсусан дар роҳи мошингарди Душанбе-Чаноқ мушкилу хатарнок кардааст.

Оҷонсии обуҳавошиносӣ ҳушдор додааст, ки дар пайи боришоти зиёд дар рӯзҳои 6-9 уми феврал дар роҳҳои самти шимоли кишвар хатари лағзиши тарма зиёд хоҳад буд.

Ҳушдор дода шудааст, ки мусофирон ба хусус ҳангоми сафар ба минтақаҳои Майхура, Зиддеҳи Варзоб ва ноҳияҳои кӯҳӣ эҳтиёткор бошанд.

Дар ҳамин ҳол, ширкати IRS, ки масъули нигоҳубини ягона роҳи пулакӣ дар кишвар аст, субҳи имрӯз хабар дод, ки дар километри 78-81-и роҳи Душанбе-Чаноқ, дар ҳудуди ноҳияи Айнӣ 7 тарфа фаромадааст.

Ҳоло бартарафсозии тармаҳо идома дорад ва масъулини ширкат аз ронандаҳо хостаанд, то эълони навбатӣ дар бораи боз шудани роҳ, аз сафар дар ин масир худдорӣ кунанд.

Ягона масир аз пойтахт ба шимоли Тоҷикистон, ки аз роҳҳои кӯҳӣ убур мекунад, маъмулан дар пайи бориши зиёди барф муваққатан баста мешавад.