Қувваталӣ Қурбонализода, роҳбари Идораи оташнишонӣ дар ноҳияи Ҷайҳун гуфт, ки соҳибкороне, ки дар сӯхтори бозор зарар диданд, имтиёз доранд. Аз ҷумла, ба гуфтаи ин мақомдор, соҳибкороне, ки аз бонкҳо қарздор ҳастанд, муҳлати пардохти қарзи бонкӣ то оғози дигарбораи фаъолият боздошта шудааст.
Манбаи дигар дар ҳукумати ноҳияи Ҷайҳун гуфт, соҳибкорони зарардида то оғози корашон муввақатан аз пардохти андоз озод шудаанд.
Як соҳибкори бозор, ки ҳудуди 500 ҳазор сомонӣ зарар дидааст, мегӯяд, ба онҳо ваъда додаанд, ки бонкҳо барояшон имтиёз медиҳанд, вале ҳоло ба бонк нарафтааст.
Аммо суоли асосӣ барои соҳибкорон беҷавоб аст, ки дӯконҳоро маъмурияти бозор месозанд ё худашон?
Сӯхтор дар бозори марказии ноҳияи Ҷайҳун шаби 1 ба 2-юми июл рух дода, дар натиҷаи он 401 дӯкон пурра сӯхт.
Мақомоти оташнишонии вилояти Хатлон қаблан гуфта буданд 95 дар сади бозор ба коми оташ рафтааст. Вазорати корҳои дохилӣ сабаби сар задани сӯхторро расиши ноқилҳои барқӣ гуфта буд.
Бозори ноҳияи Ҷайҳун наздик ба марзи Тоҷикистону Афғонистон бозори калонест, ки сокинони чанд ноҳия онҷо хариду фурӯш мекарданд.
Оташ гирифтани бозорҳо дар Тоҷикистон нав нест ва солҳои ахир сӯхтор дар бозорҳо зуд-зуд сабт мешавад.
Садҳо тоҷир ҳам баъди ин ҷуброне намегиранд ва варшикаставу муфлис мешаванду ба сафи муҳоҷирони корӣ мепайванданд.
