Хабарнигорони Радиои Озодӣ рӯзи 11-уми июн дар ҳошияи ҳамоиш дар мавзӯи об дар Душанбе аз Эрлан Абдилдаев, сафири Қирғизистон, пурсиданд, ки таъйини хати марз бо Тоҷикистон ба куҷо расид?

Абдилдиев гуфт, дар ин мавзуъ танҳо роҳбарони кумисюнҳои аломатугзории марзи ду кишвар ҳаққи суҳбат доранд, аммо илова кард, ки "ба наздикӣ хабарҳои хуш пахш мешавад".

Тоҷикистон ва Қирғизистон зиёда аз 980 километр сарҳад доранд, вале бахше аз он солҳо боз таъйину нишонагузорӣ нашудааст.

Вазири корҳои хориҷии Туркия рӯзи 10-уми январи имсол дар Душанбе хабар дод, ки созишномаи ниҳоӣ дар бораи марз байни Тоҷикистон ва Қирғизистон эҳтимол моҳи март имзо шавад. Аммо ин созиш то ҳол имзо нашудааст.

Ҳайатҳои Тоҷикистон ва Қирғизистон дар як соли охир ба таври мунтазам ва барои кашидани хати сарҳад мулоқот мекунанд.

Ориф Хоҷазода, раиси Кумитаи замин ва геодезии Тоҷикистон моҳи феврали соли 2024 гуфта буд, аз 987,6 километр марзи Тоҷикистону Қирғизистон 889,45 километр мувофиқа шудааст.

Дар гузашта номуайян мондани қисмате аз марз, боиси сар задани муноқишаҳои хунин дар марзи Тоҷикистону Қирғизистон шудааст.

Чандин кишвари арабӣ ва исломӣ ба ҳамроҳи се ниҳоди минтақавӣ, изҳороти Майкл Ҳакаби, сафири Амрико дар Исроилро дар бораи ончӣ "ҳаққи инҷилӣ"-и Исроил бар бахшҳои калоне аз Ховари Миёна хондааст, маҳкум карданд ва онро мухолифи ҳуқуқи байналмилалӣ донистанд.

Майкл Ҳакаби дар гуфтугӯ бо Такер Карлсон, шореҳи муҳофизакори амрикоӣ, ки рӯзи 20 феврал нашр шуд, дар посух ба пурсише дар бораи тафсири таҳтулафзии як оят аз китоби муқаддаси масеҳиён гуфт, "агар Исроил ҳамаашро ҳам бигирад, мушкиле надорад".

Ин ояти Инҷил гоҳ ба унвони "ҳақ"-и Исроил бар сарзамини миёни дарёи Нил дар Миср то Фурот дар Сурия ва Ироқ, таъбир мешавад.

Дар вокуниш, Вазорати корҳи хориҷии Имороти Муттаҳидаи Араб рӯзи 22 феврал якҷо бо чандин кишвари дигари арабӣ ва исломӣ бо нашри баёнияи муштарак эълон кард, ин изҳорот "хатарнок ва таҳрикомез" аст ва бо санадҳои Созмони Милали Муттаҳид дар мухолифат қарор дорад.

Ба гузориши хабаргузории Франс-пресс, дар ин баёния Арабистони Саудӣ, Миср, Урдун. Имороти Муттаҳидаи Араб, Индонезия, Покистон, Туркия, Қатар, Кувайт, Умон, Баҳрайн, Лубнон, Сурия ва Давалти Фаластин, имзо гузоштаанд. Ҳамчунин Созмони ҳамкориҳои исломӣ, Иттиҳодияи Араб ва Шӯрои ҳамкориҳои Халиҷи Форс низ онро таъйид карданд.

Дар баёнияи кишварҳои арабӣ ва исломӣ таъкид шудааст, ки чунин мавзеъгирӣ талошҳо барои коҳиши таниш дар ҷанги Ғазза ва пешбурди як дурнамои сиёсӣ барои ҳаллу фасли фарогири ин муноқишаро камранг мекунад.

Дар муқобил, Амир Оҳана, раиси порлумони Исроил, дар шабакаи Х аз Майкл Ҳакаби ба хотири мавзеъгириаш дар ҳимоят аз Исроил дар мусоҳибааш, ситоиш кардааст.

Исроил аз замони таъсис дар соли 1948 марзҳои комилан ба расмиятшинохташуда надоштааст. Ин кишвар дар ҷанги шашрӯзаи 1967 Каронаи бохтарӣ ва Байтулмуқаддаси шарқиро ба тасарруфи худ даровард. Минтақае, ки акнун ҳудуди 700 ҳазор шаҳракнишини исроилӣ дар миёни се миллион фаластинӣ дар он зиндагӣ мекунанд.

Фаластиниҳо ин сарзаминҳоро барои ташкили кишвари мустақили худ ва пойтахташ Байтулмуқаддаси шарқӣ, мехоҳанд.

Дар ҳамин ҳол, расонаҳои гузориш додаанд, ки ҳукумати Исроил ахиран тарҳеро барои хариди осони замин аз сӯи шаҳракнишинон дар Каронаи бохтарӣ қабул кардааст. Иқдоме, ки бо интиқоди Олмон ва бархе кишварҳои дигар рӯбарӯ шудааст.

Маҷористон эълон кард, то вақте интиқоли нафти Русия аз тариқи хати лӯлаи "Дружба" ба ин кишвар аз сар гирифта нашавад, бо додани қарзи 90-миллиардевроии Иттиҳоди Аврупо ба Украина мухолифат хоҳад кард.

Додани қарз аз тарафи Иттиҳоди Аврупо ба Украина ниёз ба раъйи мусбати ҳамаи аъзои ин иттиҳодия дорад. Бо ин ҳол, ба сабаби наздикии ҳукуматҳои Будапешт ба Маскав, ҳукумати Виктор Орбан дар Маҷористон ҳамеша дар ҳар масъалае аз ин раъй ҳамчун абзори фишор истифода кардааст.

Петр Сийярто, вазири корҳои хориҷии Маҷористон рӯзи 20 феврал гуфт, Киев бо пешгирӣ аз транзити нафт ба Маҷоистон аз масири "Дружа", тавофуқи муштараки Иттиҳоди Аврупо ва Украинаро нақз кардааст ва Будапешт "дар баробари ин боҷхоҳӣ кӯтоҳ нахоҳад омад".

Ҷараёни нафт аз хати лӯлаи "Дружа" аз 28 январ ва пас аз ончӣ Украина "ҳамлаи паҳбодии Русия ба зерсохтҳои хати лӯла" эълон кард, қатъ шуд.

Маҷористон ва Словакия, ки танҳо полоишгоҳҳои боқимонда дар Иттиҳоди Аврупоро доранд, ки ҳанӯз аз нафти Русия аз тариқи ин хати лӯла истифода мекунанд, аз он замон барои таъмини ҷойгузин талош мекунанд.

Ҳар ду кишвар Киевро муттаҳам кардаанд, ки бинобар ангезаҳои сиёсӣ, аз интиқоли нафт пешгирӣ мекунанд.

Хабаргузории "Рейтерз" мегӯяд, ки дар ин робита аз вазорати корҳои хориҷии Украина ва ширкати нафту гази он кишвар тафсилот хоста, аммо посухе дарёфт накардааст.

Раҳбарони Иттиҳоди Аврупо дар моҳи декабри соли гузашта пас аз соатҳои музокирот бар сари ироаи бастаи кӯмакҳои 90-миллиардевроии дусола ба Украина мувофиқат карданд.

Аммо ба ҷойи истифодаи мустақим аз дороиҳои масдудшудаи Русия, тасмим гирифтанд ин кӯмакро умдатан аз тариқи қарзи бо замонат аз будҷаи иттиҳодия таъмин кунанд. Бархе аз кишварҳои узви иттиҳодия ба додани пулҳои бандмондаи Русия ба Украина мухолифат карданд.

Иттиҳоди Аврупо ҷанги Русия алайҳи Украинаро таҳдиде барои амнияти худ медонад ва бар зарурати таъмини молии Киев барои идомаи ҷанг ё бозсозӣ таъкид дорад.

Доналд Трамп, раисҷумҳури Амрико рӯзи 20 феврал гуфт, ки дар эътирозҳои моҳи январ дар Эрон 32 ҳазор нафар кушта шуданд.

Ӯ зимни суханронӣ дар Кохи Сафед гуфт, ки "32 ҳазор нафар дар муддати кӯтоҳе кушта шуданд. Барои мардуми Эрон бисёр нороҳатам".

Ин нахустин бор аст, ки раисҷумҳури Амрико ба таври ошкор ба шумори кушташудагони эътирозҳои густурдаи ахир дар Эрон ишора мекунад.

Дар вокуниш ба ин суханони Доналд Трамп, вазири корҳои хориҷии Эрон Аббос Ароқчӣ аз президенти Амрико хост, ки то дар ин бора "мадрак" пешниҳод кунад.

Ӯ дар шабакаи Х навишт, "агар касе нисбат ба дурустии маълумотҳои мо шак дорад, лутфан бо мадрак суҳбат кунад".

Ҳукумати Эрон омори кушташудагонро 3 ҳазору 117 нафар эълон кардааст, аммо ниҳодҳои ҳуқуқи башар мегӯянд, ки шумори ҷонбохтагон бисёр зиёд аст.

Созмони Мустақили Дидбони Ҳуқуқи Башар, HRANA, ки қароргоҳаш дар Вашинтгон мебошад, як ҳафта пеш дар охирини омори худ гуфт, ки шумори ҷонбохтагони эътирозҳои ахир, ки ҳувияташон маълум шуд, аз марзи ҳафт ҳазор нафар гузаштааст.

Раисҷумҳури Амрико ҳамчунин бори дигар эълон кард, ки ҳукумати Эрон ният дошт "837 нафар"-ро дар пайи эътирозҳо эъдом кунад, аммо пас аз ҳушори ӯ аз ин амал ақибнишинӣ кардааст.

Владимир Путин, раисҷумҳури Русия қонуни наверо имзо кард, ки ба Хадамоти амнияти дохилии ин кишвар қудрати нав барои қатъи интернет дар дохили кишварро медиҳад. Ин қонун, ки 20 феврал қабул шуд, навтарин қонун аз маҷмӯе аз муқаррарот аст, ки ба шиддат тавоноии мақомотро барои маҳдуд кардани ахбор ва маълумот дар дохили Русия афзоиш медиҳад.

Ин иқдоми нав, ки аввалҳои ин ҳафта аз сӯи вакилони Думаи давлатӣ пазируфта шуд, ба Хадамоти амнияти федеролӣ маъруф ба ФСБ ин қудратро медиҳад, ки аз ироакунандаҳои хадамоти интернетӣ ва телефонҳои ҳамроҳ бихоҳад дар мавридҳое, ки "тавассути қонунҳои назоратии раисҷумҳури Русия муайян шудааст", дастрасиро қатъ ё маҳдуд кунанд.

Ин иқдом ба Путин иҷозат медиҳад, то шахсан тасмим бигирад, ки чӣ вақт иртиботи онлайнӣ дар кишвар ё як минтақаи хос бояд хомӯш шавад, бе онки ниёзе ба пешниҳоди далелу сабаб бошад. Ҳамчунин ҳаргуна масъулиятеро барои ироакунандагони хадамот дар баробари анҷоми ин кор аз байн мебарад.

Дар моҳҳои ахир мақомоти рус бо равишҳое барои пешгирӣ аз вуруди паҳбодҳои украинӣ ба ҳарими ҳавоии Русия, даст ба кор шудаанд.

Мақомот аз ҷумла, шабакаҳои интернетии маҳбуб, ба вижа барномаҳои паёмрасон монанди "Вотсапп" ва "Телеграм"-ро маҳдуд карданд. Ҳар ду барнома ба шиддат масдуд шудаанд, зеро ҳукумат талош мекунад, то русҳоро ба истифодаи як барномаи зери ҳимояти ҳукумат бо номи Max тарғиб кунад. Дар як гузориш омадааст, ки "Телеграм" аз аввали моҳи апрел ба таври комил баста хоҳад шуд.

"Роскомнадзор", ниҳоди танзимкунандаи фаъолияти фановарӣ дар Русия, "Телеграм"-ро, ки аз сӯи Павел Дуров сохта шудааст ва ҳоло дар табъид ба сар мебарад, ба ифшои маълумоти шахсии шаҳрвандони Русия муттаҳам кард.

Маҳдудиятҳои ҷоришуда бар "Телеграм" боиси вокуниши блогерҳо шудааст, ки аз наздик таҳаввулоти майдонии набарди Русия дар Украинаро дунбол мекунанд ва барои воҳидҳои низомии Русия пул ҷамъоварӣ мекунанд. "Телеграм" ҳамчунин ба таври густурда аз сӯи сарбозони Русия, ки дар хатти ҷанг қарор доранд, истифода мешавад.

Дар як ҳушдори ғайримаъмулӣ, Хадамоти амнияти федеролии Русия рӯзи 21 феврал дар баёнияе иддао кард, ки ниҳодҳои амниятии Украина қодир ба дастрасӣ ба маълумоти фиристодашуда тавассути сарбозони рус дар "Телеграм" будаанд ва ин амр "борҳо боиси таҳдиди ҷони аъзои ФСБ" дар се моҳи гузашта шудааст.

Созмони Милали Муттаҳид эълон кард, ки як ҳайати нав дар бахши ҳуши маснуӣ таъсис кард, то "назорати инсон бар технология"-ро тақвият кунад.

Антонио Гуттериш, дабири кулли Созмони Милали Муттаҳид дар нишасти Деҳлӣ гуфт, ҷаҳон ба суръат ба сӯи ношинохтаҳо меравад ва бояд ба ҷойи тарс ва ҳаяҷон, ба воқеиятҳо таваҷҷуҳ шавад.

Ӯ афзуд, 40 нафар узви "Ҳайати илмии байналмилалии ҳуши маснуъӣ" таъйин шудаанд. Ба гуфтаи ӯ, мудирияти илмӣ метавонад ин фановариро бехафтар ва одилонатар кунад.

Ин дар ҳоле аст, ки дар канори хубиҳои ҳуши маснуӣ, нигарониҳое монанди аз байн рафтани ҷойҳои корӣ, сӯистифодаи онлайнӣ ва масрафи зиёди барқ низ вуҷуд дорад.

Раҳбарони ҷаҳон рӯзи 20 феврал дар поёни нишасти ҳуши маснуӣ дар Деҳлӣ, дидгоҳи муштараки худ дар бораи хатарҳо ва фурсатҳои ҳуши маснуиро баён карданд.

Дар ҳамоиши байналмилалии ҳуши маснуӣ дар Деҳлӣ, президенти Фаронса ва нахуствазири Ҳинд иштирок ва суханронӣ карданд.

Олмон, Ҳоланд, Австрия, Дания ва Юнон созиш карданд, ки марказеро барои муҳоҷирон дар хориҷ аз қаламрави Иттиҳоди Аврупо таъсис диҳанд.

Танос Плеврис, вазири муҳоҷирати Юнон рӯзи 20 феврал гуфт, муҳоҷироне, ки дархости паноҳандагиашон рад шудааст ва кишварҳое, ки онҳо аз онҷо ба Аврупо омадаанд ва онҳоро намепазиранд, ба маркази нав фиристода хоҳанд шуд.

Тибқи гузоришҳо, ин марказ эҳтимолан дар Африқо таъсис хоҳад шуд, аммо намояндагони панҷ кишвари аврупоӣ қарор аст ин ҳафта дар ин бора гуфтугӯ кунанд.

Юнон беш аз як даҳа аст, ки масири аслии муҳоҷирон ба Аврупо мебошад ва бисёре аз муҳоҷирон аз Ховари Миёна барои дархости паноҳандагӣ дар кишварҳои аврупоии пешрафта, аз роҳи Юнон сафар мекунанд.

Дар гузашта садҳо муҳоҷир аз Ховари Миёна ва Африқо дар обҳои Юнон ғарқ шудаанд, ки дар миёни онҳо занон ва кӯдакон низ буданд.

Доналд Трамп, раисҷумҳури Амрико рӯзи 20 феврал гуфт, ки дар ҳоли баррасии эҳтимоли анҷоми амалиёти маҳдуд алайҳи Эрон аст. Аммо ӯ ҷузъиёти бештар надод.

Ӯ дар посух ба ин пурсиш, ки оё барои водор кардани Эрон ба созиш дар бораи барномаи ҳастаии худ, ҳамлаи маҳдудро зери назар дорад ё не, ба хабарнигорон дар Кохи Сафед гуфт, "ҳадди аксар чизе, ки метавонам бигӯям ин аст, ки дар ҳоли баррасии он ҳастем".

Мақомоти Эрон ҳанӯз ба изҳороти ахири Трамп вокуниш нишон надодаанд. Аммо дар гузашта гуфта буданд, ки ба ҳар гуна иқдоми низомии Амрико вокуниши сахт нишон хоҳанд дод.

Рӯзномаи Wall Street Journal шомгоҳи 19 феврал дар гузорише ихтисосӣ хабар дод, ки Трамп дар ҳоли баррасии анҷоми як ҳамлаи низомии "маҳдуд ва аввалия" алайҳи Эрон аст, то ин кишварро водор кунад, ки ба хостаҳои ӯ барои даст ёфтан ба созиши ҳастаӣ мувофиқат кунад.

Ин нашрия ба нақл аз манбаъҳои огоҳ навишт, ин ҳамлаи ибтидоӣ, ки дар сурати имзо шудани фармон, шояд ҳатто "зарфи чанд рӯзи оянда" анҷом шавад, чанд пойгоҳи низомӣ ё муассисаи ҳукуматиро нишона хоҳад гирифт.

Бар асоси ин гузориш, агар Эрон ҳамчунон аз иҷрои хостаи раисҷумҳури Амрико барои поён додан ба ғанисозии уранюм худдорӣ кунад, ИМА бо як маъракаи густурдаи низомӣ алайҳи муассисаҳои ҳукуматӣ посух хоҳад дод.

Яке аз ин манбаъҳо ба Wall Street Journal ҳамчунин гуфтааст, Трамп метавонад сатҳи ҳамлаҳоро ба тадриҷ афзоиш диҳад, ибтидо бо иқдоми маҳдуд оғоз кунад ва сипас то замоне, ки ҳукумати Эрон ё барномаи ҳастаии худро барчинад ё суқут кунад, дастури ҳамлаҳои калонтареро содир кунад.

Дар ҷаласаи нахустини Ҳайати сулҳ, ки бо ташаббуси президенти Амрико 19-уми феврал барпо шуд, Доналд Трамп гуфт, барои бозсозии Ғазза 7 миллиард доллар ҷалб кардааст.

Ӯ гуфт, баъд аз халъи силоҳ шудани гурӯҳи “Ҳамос”, ки Амрикову Аврупо террористӣ медонанд, бо ин пул барқарорсозии Ғазза шуруъ хоҳад шуд.

Чанд масъалае ҳаст, ки дар моҳҳои оянда бояд таъсири ин маҳфилро нишон диҳад, аз ҷумла халъи силоҳи “Ҳамос”, берун бурдани артиши Исроил, эҳёи Ғазза ва ёриҳои башарӣ ба мардуми ҷангзадаи ин минтақа.

Ҳисобҳои пешакӣ ба он ишора мекунанд, ки дар асл ин ҳама ташаббусҳо хароҷоти даҳ баробар бештарро тақозо мекунад.

Ба Ҳайати сулҳ ба раҳбарии Доналд Трамп асосан давлатҳои Ховари Миёна шомил буда, аз Осиёи Марказӣ раҳбарони Узбекистону Қазоқистон дар мулоқот ҳузур доштанд.

Дар ин ҳайат мақомоти Исроил низ ҳастанд, вале фаластиниҳо на. Инчунин, чанд ҳампаймони калидии Амрико аз миёни кишварҳои ғарбӣ ба Ҳайати сулҳ шомил нашудаанд.

Соли 2025 дар Тоҷикистон ҷинояти таҷовуз ба номус қариб 20 дарсад зиёд шудааст.

Тибқи омори расмӣ, соли гузашта дар кишвар 49 мавриди таҷовуз ё қасди таҷовуз ба номус сабт шудааст, ки назар ба як соли пеш 8 маврид бештар аст.

Мақомот дар бораи сабабҳои зиёд шудани ҷинояти таҷовуз ба номус расман чизе нагуфтаанд.

Оҷонси омори Тоҷикистон танҳо омори ҷиноятҳоро ҷамъ меоварад ва аз ин рӯ сабабҳои рӯ ба афзоиш овардани таҷовуз ба номус маълум нест.

Ҳомиёни ҳуқуқи занон дар гузашта гуфтаанд, ки мавридҳои дастдарозӣ ба занон дар кишвар бештар аст, зеро занону духтарон аз "тарси шармсор ва беобрӯ шудан дар байни ҷомеа" ба мақомоти интизомӣ шикоят намекунанд.

Тибқи гузориши Оҷонсии омор, соли 2025 дар кишвар ҳамчунин ғоратгарӣ 24, роҳзанӣ 14, қаллобӣ қариб 11 ва қочоқи маводи мухаддир 20 дарсад афзудааст.

Сабаби зиёд шудани ин ҷиноятҳои вазнин маълум нест.

Оҷонси мубориза бо коррупсия дар Тоҷикистон мегӯяд, парвандаи як корманди комиссариати ҳарбиро ба додгоҳ фиристодааст.

Файзализода Ф., сардори шӯъбаи сафарбарии Комиссариати ҳарбии шаҳру ноҳияҳои тобеи ҷумҳурӣ, ба гирифтани ришва ва баромадан аз ҳадди ваколати хидматӣ гумонзад шудааст.

Назари Файзализода ва наздиконаш ба иттиҳом маълум нест.

Оҷонси зидди фасод 19-уми феврал дар хабарномае навишт, ин корманди комиссариати ҳарбӣ моҳи октябри соли 2025 аз волидони ду ҷавон барои озод намудан аз артиш дар умум 10 ҳазор доллар "пора" гирифтааст.

Манбаъ мегӯяд, Файзализода дар вақти гирифтани ришва дастгир шуда, парвандааш ба додгоҳ фиристода шуд.

Маълум нест, ки ин корманди пешини комиссариат дар додгоҳ то куҷо ба гуноҳаш иқрор шудааст.

Ин бори аввал нест, ки кормандони комиссариати ҳарбӣ, ки масъули даъвати ҷавонон ба артиш ҳастанд, бо иттиҳоми гирифтани пора дастгир мешаванд.

Раисҷумҳури Амрико рӯзи 19-уми феврал эълон кард, ки давоми даҳ рӯзи оянда тасмими Иёлоти Муттаҳида дар бораи Эрон рӯшан мешавад.

Доналд Трамп дар нишасти нахустини "Ҳайати сулҳи Ғазза" гуфт, Иёлоти Муттаҳида бояд ба як тавофуқи хуб бо Эрон даст ёбад, вагарна рӯйдоди баде рух хоҳад дод.

Дар айни ҳол раисҷумҳури Амрико таъкид кард, ки "дар тӯли солҳо собит шудааст, ки расидан ба як тавофуқи маънодор бо Эрон кори осон нест".

Изҳороти Трамп дар ҳоле садо медиҳад, ки рӯзи 18-уми феврал раисҷумҳури Амрико бо мушовирони худ дар бораи буҳрон бо Эрон гуфтугӯ кард.

Дар пайи ин, шабакаҳои CNN ва CBS гузориш доданд, ки артиши Амрико мумкин аст то чанд рӯзи дигар омодаи ҳамла ба Эрон шавад. Бо ин ҳол расонаҳо гузориш додаанд, ки Доналд Трамп дар мавриди Эрон ҳанӯз тасмими ниҳоӣ нагирифтааст.

Пештар пойгоҳи Axios гузориш дода буд, ки агар Ҷумҳурии Исломӣ ба талабҳои Амрико розӣ нашавад, Доналд Трамп якҷоя бо Исроил метавонанд дар ҳафтаҳои наздик ҷангро алайҳи Эрон оғоз кунанд.

Иёлоти Муттаҳида дар ҳафтаҳои охир барои фишор ба Эрон нерӯҳои зиёди низомӣ, аз ҷумла чанд киштии ҳавопаймобарро ба Халиҷи Форс фиристодааст.

Эндрю Маунтбеттен-Виндзор, бародари шоҳи Бритониё Карл (Чарлз)-и III, боздошт шудааст. Ба гузориши Би-би-сӣ ва Sky News, маъмурони пулис дар Сандрингем дар Норфолк, ки шоҳзодаи собиқи 66-сола дар он ҷо мезист, дида шуданд.

Пулис дар изҳороте гуфт, ӯ ба суистифода аз мақом гумонзад ва феълан дар боздоштгоҳ аст. Таҳқиқи парванда идома дорад.

Пештар созмони зиддисалтанатии "Republic" аз пулис хоста буд, ки иддаои суистифода аз мақом ва вайрон кардани қонуни сирри давлатиро аз ҷониби шоҳзодаи собиқ Эндрю бисанҷад.

Тибқи ҳуҷҷатҳои парвандаи сармоягузори амрикоӣ Ҷеффри Эпштейн, шоҳзодаи собиқ ба ӯ дар бораи имкониятҳои сармоягузорӣ маълумоти пинҳонӣ ва дар бораи сафарҳояш ба Сингапур, Ҳонконг ва Ветнам гузориш додааст. Худаш ин иддаоро намепазирад.

Шоҳи Бритониё дар соли 2025 бародараш Эндрюро аз унвону имтиёзҳояш маҳрум кард.

Вазорати адлияи Амрико се миллион саҳифа аз ҳуҷҷатҳои сармоягузори расвошуда Ҷеффри Эпштейнро дастраси умум гардонд, ки соли 2019 дар маҳбас худкушӣ кардааст. Аъмоли Эпштейн бо ҷурми қочоқи ҷинсии ноболиғон тафтиш мешуд.

Дар Куриёи Ҷанубӣ раисҷумҳури пешин Юн Сок Ёлро ба ҳабси якумрӣ маҳкум карданд. Додгоҳе дар Сеул рӯзи 19-уми феврал ӯро ба ташкили ошӯб ва берун рафтан аз салоҳиятҳои хидматӣ гунаҳкор донист.

Юни 65-сола иттиҳомҳоро рад кардааст. Ӯ гуфт, президент ҳақ дорад қуюди ҳарбӣ ҷорӣ кунад ва он замон барои он ки ҳизбҳои сиёсӣ пеши роҳи кори ҳукуматро нагиранд, чунин қарор қабул кард.

Ҳодиса моҳи декабри соли 2024 рух дод. Пас аз ихтилофҳои тӯлонии президент бо мухолифон дар порлумон, Юн Сок Ёл вазъияти ҳарбӣ ҷорӣ кард ва гуфт, дар ин муддат барпо кардани эътирозу раҳпаймоиҳо манъ аст. Қарор боис ба эътирозҳои сартосарӣ шуд ва баъди шаш соат президент маҷбур шуд қарорро бекор кунад.

Дар умум зидди президенти собиқи Куриёи Ҷанубӣ ҳашт парвандаи ҷиноӣ боз карданд. Моҳи январи имсол ӯро барои мудохила ба кори низоми додгустарӣ ба 5 сол ҳабс маҳкум карданд.

Юн Сок Ёл моҳи майи соли 2022 раисҷумҳури Куриёи Ҷанубӣ интихоб шуда, дар баҳори соли 2025 аз мақомаш барканор гардид.

Ҳамроҳи президенти собиқ чанд мақомдори пешини Куриёи Ҷанубӣ, аз ҷумла вазири собиқи дифоъ ба 30 сол, собиқ фармондеҳи идораи иктишофӣ ба 18 сол ва собиқ раиси полис ба 12 соли ҳабс маҳкум шуданд.

Дар пасманзари шикоятҳо аз зиёд шудани тамоси қаллобон ба муштариёни ширкатҳои мобилии Тоҷикистон, Хадамоти алоқа аз сокинон даъват кардааст, ки эҳтиёткор бошанд.

Хадамот 18-уми феврал дар изҳороте гуфт, ашхоси номаълум худро корманди бонк, оператори ширкатҳои мобилӣ ё шахси шинос нишон дода, бо баҳонаҳои гуногун аз муштариён коди SMS, рақами корти бонкӣ ва дигар маълумоти махфиро талаб мекунанд.

Ҳамчунин ба гуфтаи Хадамоти алоқа, "баъзе қаллобон бо баҳонаи танзими интернети 4G ё 5G дар телефонҳо занг зада, кӯшиш мекунанд маълумоти шахсӣ ё коди тасдиқиро гиранд".

Мақомот мегӯянд, дар сурати гирифтани рақам ё коди махфӣ аз муштариён қаллобон метавонанд ба корти бонкӣ ва ҳамёни мобилии шахс дастрасӣ пайдо карда, маблағҳои онро азхуд кунанд.

Дар изҳороти Хадамоти алоқа омадааст, ширкатҳои мобилӣ ҳеч гоҳ аз муштариён рамзи тасдиқ ё (SMS-код), рақами корти бонкӣ ва рамзи махфии барномаи насбшуда дар телефонро намепурсанд.

Хадамоти алоқа аз сокинон даъват кардааст, ки ба занг ва паёмакҳои шубҳанок ҷавоб надиҳанд, пайванд ё "ссилка"-ҳои шубҳанокро накушоянд ва барномаҳои номаълумро дар телефон насб накунанд.

Ҳафтаи равон чандин корбарони шабакаҳои иҷтимоӣ аз тамоси шахсони ношинос ва талаб кардани рамзи паёмак шикоят карданд.

Ба гуфтаи муштариён, афроди ношинос аз хориҷӣ, аз ҷумла аз Қирғизистон ва Русия занг зада, бо баҳони танзими интернети 5G рамзи паёмаки ирсолшударо мепурсанд.

Кумитаи дин ва танзими анъанаи Тоҷикистон сарусадоҳо дар бораи манъ ё маҳдуд шудани маъракаи ифторро дар кишвар рад карда гуфтааст, ин "хабару овозаҳо асоси воқеӣ надоранд".

Дар вокуниши Кумита аз рӯзи 18-уми феврал омадааст, танҳо аз сокинон даъват мекунанд, ки дар вақти гузарондани маъракаи ифтор "ба исрофу зиёдаравӣ роҳ надиҳанд".

Дар Тоҷикистон ва дигар кишварҳои мусалмоннишин афроди доро дар моҳи Рамазон маъракаи ифтор гузаронда, ба шахсони рӯзадор ғизо медиҳанд.

Ҳафтаи гузашта хабаре дар шабакаҳои иҷтимоӣ нашр шуд, ки гӯё бар асоси қонуни танзими ҷашну маросим маъракаи ифтор дар Тоҷикистон манъ шудааст.

Кумитаи дин ва танзими анъана бо радди ин хабарҳо мегӯяд, ифтор манъ нест, аммо сокинон метавонанд ба ҷойи густурдани хони бодабдаба таомро ба афроди ниёзманд фиристанд.

Моҳи Рамазон имсол дар Тоҷикистон 19-уми феврал фаро расида, то 20 март идома мекунад.