Дар ҳоле ки кадбонуҳои тоҷик дар остонаи Иди Қурбон ё Иди Азҳо барои оро додани дастархони идонаи хоксорона талош мекарданд, эҳтимол ин эҳсосро доштанд, ки чашме ноаён торти онҳоро бармекашад, дастархони онҳоро чен мекунад ва пиставу чормағзро мешуморад.
Ин иди аввалин баъди қарори Кумитаи дин аст, ки гуфтааст, барои исроф ва дастархони бошукӯҳ шаҳрвандон 5 ҳазор сомонӣ ҷарима мешаванд. Мақомоти Тоҷикистон чанд сол боз талош доранд, суннатҳои серхарҷро, ки ба буҷети оилаҳо зарба мезанад, маҳдуд кунанд.
Аммо сокинон ин дахолатро хуш надоранд, ҳарчанд бархеи онҳо эътироф мекунанд, ки танзиими суннатҳо зиндагиашонро сабуктар кардааст. Ҳамкорони мо дар остонаи ид бо дастархони идонаи бонувон ошно шуданд.
