Дар чанд ҷумла
Корманди собиқи Додгоҳ дар қатли ҳамсараш гумонбар шуд
Вазорати корҳои дохилии Тоҷикистон Бобоҷон Ширинови 33-сола, котиби пешини Додгоҳи олии иқтисодиро бо гумони қатли ҳамсари собиқаш ҷустуҷӯ мекунад. Мақомот мегӯянд, ин мард ба он гумонбар аст, ки шоми 6-уми июн дар ҳудуди ноҳияи Синои пойтахт Моҳира Ятимоваи 33-сола, ҳамсари собиқи худро бо ёздаҳ зарби корд куштааст.
Бобоҷон Ширинов, писари Раҷабалӣ Ширинов, собиқ муовини раиси Оҷонсии мубориза бо фасоди Тоҷикистон аст. Генерал Ширинов соли 2015 аз ин мақом барканор шуда буд.
Як манбаъ аз Вазорати корҳои дохилии Тоҷикистон рӯзи 7-уми июн ба Радиои Озодӣ гуфт, ин ҷуфт ду сол пеш аз ҳам ҷудо шуда, додгоҳ тарбияи се кӯдакро ба мард дода буд.
"Онҳо барои кӯдакон ва амвол баҳси тӯлонии додгоҳӣ доштанд. Ҳамон бегоҳ Моҳира Ятимова барои дидорбинии кӯдаконаш меояд. Сӯҳбати онҳо ба ҷанг мепечад ва Бобоҷон Ширинов ба ӯ бо корд ҳамла намуда, аз ҷойи ҳодиса фирор мекунад. Зан дар ҷойи ҳодиса ба ҳалокат расид", - гуфт манбаъ.
Кормандони Вазорати корҳои дохилӣ ҳоло Бобоҷон Шириновро ҷустуҷӯ мекунанд. Мақомот гуфтанд, ки пас аз боздошт далели аслии куштор шарҳ дода мешавад.
Бобоҷон Ширинов ва Моҳира Ятимова ҳарду ҳамдарс буда, соли 2007 риштаи ҳуқуқшиносии Донишгоҳи миллии Тоҷикистонро хатм кардаанд.
Пас аз хатми донишгоҳ бо ҳам издивоҷ карданд, вале тавре тафтишот муайян кардааст, дар давоми ду соли баъди аз ҳам пошидани оила даъвоҳои онҳо тамом намешуд.
Ҳодисаҳои куштори ҳамсарон ва ҳамсарони собиқ бо дасти мардон солҳои ахир афзоиш ёфтааст. Дар аксари ҳолат мардоне даст ба ин кор мезананд, ки ба гуфтаи мақомот, бекор ва дониши пасти ҳуқуқӣ доранд. Аммо дар ин ҳодиса ҳарду тараф маълумоти олии ҳуқуқӣ доранд.
Дар давоми панҷ моҳи ахир бар асоси иттилои Вазорати корҳои дохилии Тоҷикистон беш аз даҳ ҳолати куштори ҳамсарон бо дасти шавҳарони собиқ сабт шудааст.
Куштор дар Тоҷикистон маъмулан бар асоси моддаи 104-и Кодекси ҷиноятӣ баррасӣ мешавад. Ин модда муҷозотро аз 8 то 15 соли зиндон пешбинӣ мекунад.
Ҳамаи хабарҳои имрӯзро дар инҷо бихонед
Ҳусиҳои Яман мегӯянд, ки нахуствазири ин гурӯҳ дар ҳамлаи Исроил кушта шуд
Гурӯҳи ҳусиҳои Яман эълон кард, ки Аҳмад Ғолиб Ар-Раҳавӣ, нахуствазири ҳукумати ин гурӯҳ ва шуморе аз вазирони ӯ дар ҳамлаи Исроил ба Санъо дар рӯзи 28 август, кушта шудаанд.
Дар баёнияи ин гурӯҳ, ки рӯзи шанбе нашр шуд, гуфта мешавад, ки шуморе аз вазирон ва ҳамроҳони онҳо дар ин ҳамла захмӣ шуданд, ки вазъи саломатии бархе аз онҳо вазнин аст.
Баёнияи ҳусиҳо дар бораи шахсияти вазироне, ки дар ҳамлаи Исроил кушта ва захмӣ шуданд, маълумоти бешта ироа накардааст.
Гурӯҳи ҳусиҳои Яман аз сӯи Эрон ҳимоят мешавад. Амрико ин гурӯҳро созмони террористӣ медонад.
Артиши Исроил рӯзи панҷшанбе эълон кард, ки нерӯҳои ҳавоияш ба як мавзеи низомии ҳусиҳо дар Санъо ҳамла анҷом дод.
Шабакаи 12-и телевизиони Исроил ба нақл аз як манбаи амниятии Исроил гуфт, шахсиятҳои сиёсии баландпояи ҳусиҳо ҳадафи ин ҳамлаҳо буданд.
Эмомалӣ Раҳмон фармони даъват ба артишро имзо кард
Президент Эмомалӣ Раҳмон фармони даъвати тирамоҳии ҷавонон ба сафи неруҳои мусаллаҳро имзо кардааст.
Бар пояи ин фармон, ки рӯзи 29 август имзо шуд, мақомот вазифадоранд, моҳҳои октябр-ноябри соли 2025 ҷавонписарони аз 18 то 27-соларо, ки то рӯзи даъват ҳуқуқи ба таъхир андохтани муҳлати даъват ё озод будан аз даъват ба хизмати ҳарбиро надоранд, ба сафи нерӯҳои мусаллаҳ, ҷалб кунанд.
Даъват ба сафи неруҳои мусаллаҳи Тоҷикистон ҳамасола бо сару садо дар бораи сарпечии ҷавонон аз хидмат ва ҷалби маҷбурӣ, ё ба истилоҳи русӣ "облава" олуда мешавад.
Дар Тоҷикистон хидмат дар сафи неруҳои мусаллаҳ ҳатмист ва барои саркашӣ аз он ҷазо пешбинӣ шудааст. Бар асоси қонун, агар ҷавони солим ва мутобиқ ба талаботи артиш аз хидмат дар сафи нерӯҳои мусаллаҳи Тоҷикистон саркашӣ кунад, додгоҳ метавонад, ӯро ё ҷаримаи бузург банданд ва ё то 2 сол ба зиндон маҳкум кунад.
Як сабаби аслии сарпечии ҷавонон аз хидмати ҳарбии ҳатмии дусоларо дар бадрафторӣ дар сафи неруҳои мусаллаҳи Тоҷикистон меноманд, ки гоҳо бо маргу маъюб шудани сарбозон меанҷомад.
Мақомот мегӯянд, ки вазъ дар қисмҳои ҳарбӣ назар ба солҳои пеш беҳтар шудааст.
Иҷрои фармони раиси ҷумҳури Тоҷикистон дар бораи оғози мавсими нави даъват ба сафи неруҳои мусаллаҳ ва ба рухсат фиристодани онҳое, ки 2 соли расо хидмат кардаанд, то охири моҳи ноябр идома мекунад.
Нишасти машваратии СҲШ дар бораи Афғонистон дар Душанбе мегузарад
Нишасти машваратии кишварҳои узви Созмони Ҳамкориҳои Шанхай дар бораи вазъияти феълии Афғонистон ва таъсири он ба минтақа, рӯзҳои 11-12 сентябр дар шаҳри Душанбе доир мешавад.
Хабаргузории русии РИА Новости ба нақл аз Нурлан Ермекбаев, дабири кулли ин созмон навишт, ки мавзӯъҳои калидии ин нишаст масоиле чун чолишҳои амният ва мубориза бо терроризм, замонатҳои амниятӣ, рушди пойдор ва муносибат бо мақомоти Афғонистон, хоҳанд буд.
Ба гуфтаи Нурлан Ермекбаев, ҳамчунин масоили дигар чун чолишҳои иҷтимоӣ ва ҳуқуқи занон, баррасӣ хоҳанд шуд.
Ҳамкории кишварҳои узви СҲШ бо идораи Толибон дар бахши амният, аз дигар масъалаҳое аст, ки ба гуфтаи Нурлан Ермекбаев, дар нишасти оянда мавриди баҳс қарор хоҳад гирифт.
Кишварҳои минтақа ҳамвора аз ҳузури гурӯҳҳои тундрав дар Афғонистон ибрози нигаронӣ кардаанд.
Изҳори назари дабири кулли СҲШ дар бораи нишасти Душанбе дар бораи Афғонистон дар ҳоле садо дод, ки қарор аст бузургтарин нишасти ин созмон аз 31 август то 1 сентябр дар шаҳри Тянсзини Чин баргузор шавад.
Созмони Ҳамкориҳои Шанхай як созмони минтақавӣ аст, ки дар соли 2001 таъсис шуд. Русия, Чин, Ҳинд, Қазоқистон, Қирғизистон, Тоҷикистон, Покистон, Эрон, Узбекистон ва Белорус аъзои аслии ин созмон ҳастанд.
Афғонистон ва Муғулистон дар Созмони Ҳамкориҳои Шанхай мақоми нозирро дорад.
Туркия робитаҳои тиҷории худро бо Исроил қатъ кард
Вазири корҳои хориҷии Туркия мегӯяд, ки ин кишвар дар эътироз ба ҷанги Ғазза, ҳарими ҳавоии худро ба рӯи ҳавопаймоҳои Исроил бастааст.
Ҳоқон Фидон рӯзи 29 август дар як нишасти фавқулодаи порлумони Туркия гуфт, "мо робитаҳои тиҷории худро бо Исроил ба таври комил қатъ кардем. Иҷоза намедиҳем, ки киштиҳои Туркия ба бандарҳои Исроил бираванд ва иҷозаи вуруди ҳавопаймоҳои исроилӣ ба ҳарими ҳавоии худро намедиҳем".
Исроил ҳанӯз ба ин тасмими Туркия вокунише нишон надодааст.
Туркия дар моҳи майи соли гузашта робитаҳои мустақими тиҷорӣ бо Исроилро қатъ карда буд ва хостори оташбаси доимӣ ва вуруди фаврии кӯмакҳои башардӯстона дар Ғазза шуд.
Ҳаҷми тиҷорат миёни ду кишвар дар соли 2023 ба ҳафт миллиард доллар расида буд.
Расонаҳои Туркия ҳафтаи гузашта гузориш доданд, ки манъи рафту омади баҳрӣ миёни ду кишвар ба ҳолати иҷро даромадааст, ҳарчанд баёнияи расмие дар ин бора нашр нашудааст.
Тибқи ин гузоришҳо, киштиҳои исроилӣ аз таваққуф дар бандарҳои Туркия манъ шудаанд ва киштиҳои таҳти парчами Туркия низ иҷозаи вуруд ба бандарҳои исроилиро надоранд.
Ҳоқон Фидон дар суханронии худ Исроилро ба иртикоби "ҷиноят" дар Ғазза муттаҳам кард ва онро "яке аз ториктарин фаслҳои таърихи башарият" хонд.
Ӯ гуфт, "Исроил давоми ду соли гузашта дар Ғазза муртакиби наслкушӣ шуда, "арзишҳои асосии инсониро дар баробари чашми ҷаҳониён нодида гирифтааст".
Анқара яке аз мунтақидони ҷиддии ҳамлаҳои Исроил ба Ғазза аст. Раҷаб Таййид Эрдуғон, раисҷумҳури Туркия, борҳо амалкарди Исроилро "наслкушӣ" хонда ва Бенямин Нетаняҳу, нахуствазири Исроилро бо Гитлер муқоиса кардааст.
Мақомоти Анқара ҳамчунин дар тирамоҳи гузашта ба ҳавопаймои раисҷумҳури Исроил иҷозаи вуруд ба ҳарими ҳавоии Туркияро барои сафар ба Конфронси СММ оид тағйири иқлим, ки дар Ҷумҳурии Озарбойҷон баргузор шуд, надоданд.
Аз сӯи дигар, Бенямин Нетаняҳу, нахуствазири Исроил рӯзи 26 август дар мусоҳибае гуфт, ки "наслкушӣ"-и арманиҳо ва ошӯриҳо дар замони императории усмониҳоро ба расмият мешиносад.
Туркия як рӯз баъд ин изҳороти Нетаняҳуро маҳкум кард.
Зеленский гуфт, рӯзҳои наздик бо Трамп мулоқот мекунад
Раисҷумҳури Украина мегӯяд, талош мекунад дар се то чаҳор рӯзи оянда бо Доналд Трамп, президенти Амрико ва муттаҳидони аврупоӣ, дидор кунад.
Владимир Зеленский рӯзи 29 август дар Киев ба хабарнигорон гуфт, ки тасмими баргузории ин нишастро пас аз он гирифтааст, ки Русия барои ҳамлаи нав дар шарқи Украина омода шудааст.
Зеленский афзуд, ки наздик ба сад ҳазор сарбози рус дар хатти пеши ҷанг дар наздикии шаҳри стратегии Покровск, ҷамъ шудаанд.
Трамп 15 август ҳангоми дидор бо Владимир Путин, раисҷумҳури Русия дар Аляска ӯро ташвиқ кард, ки бо президенти Украина сари мизи музокирот биншинад, аммо то ҳол ин нишаст баргузор нашудааст.
Ҳудуди як ҳафта пеш Трамп гуфт, ки агар ин гуфтугӯҳо анҷом нашавад, дар ду ҳафтаи оянда дар бораи гомҳои баъдии худ тасмим хоҳад гирифт.
Рӯзи 26 август Доналд Трамп ҳамчунин аз эҳтимоли ҷорӣ кардани таҳримҳои нав алайҳи Русия сухан гуфт, аммо таъкид кард, ки ин ҷанги ҷаҳонӣ нахоҳад буд, балки ҷанги иқтисодӣ хоҳад буд.
Трамп ҳамзамон гуфт, ки Зеленский ҳам комилан бегуноҳ нест.
Нафақаи бознишастагон зиёд мешавад. Ба зиндагиашон мерасад?
Аз аввали моҳи оянда ҳаққи бознишастагӣ ва ё нафақа дар Тоҷикистон 10 дар сад боло бурда мешавад.
Бар асоси фармони раисҷумҳур Эмомалӣ Раҳмон, ки моҳи феврали имсол имзо кард, ҳаққи нафақаи маъмулӣ, ки ҳоло 325 сомонӣ аст, ба 357 сомонӣ мерасад.
Ҳаққи бознишастагии корӣ, ки мардум пас аз расидан ба синни нафақа мегиранд, камаш 645 сомониро ташкил хоҳад дод. Ҳоло нафақаи меҳнатие, ки як коргари оддӣ мегирад, 586 сомонӣ аст.
Аз моҳи оянда стипендияи донишҷӯёни тоҷик низ андаке зиёдтар мешавад.
Ҳукумати Тоҷикистон мегӯяд, ки ҳадаф аз боло бурдани ҳаққи бознишастагӣ, беҳтар кардани сатҳи некӯаҳволӣ ва зиндагии мардум ва бахусус кормандони идораҳои давлатӣ, ба мисли омӯзгорону табибон аст.
Бино ба омори расмӣ теъдоди афроде, ки дар Тоҷикистон ҳаққи нафақа ё бознишастагӣ мегиранд, тақрибан 860 ҳазор нафарро ташкил медиҳад.
Шумораи онҳое, ки бинобар маъюбӣ кӯмаки иҷтимоиро аз давлат мегиранд аз 170 ҳазор нафар ҳам зиёд аст.
Умдатан пас аз боло бурдани ҳаҷми музди кору ҳаққи бознишастагӣ, шикоятҳо зиёд мешавад, ки таваррум ва ё афзоиши инфлятсия ҳам суръат мегирад ва нархи молу маҳсулот ҳам боло меравад.
Бархе иқтисодшиносон мегӯянд, афзоиши маошу дар Тоҷикистон бо сабаби таваррум зиёд эҳсос намешавад, чун арзиши молу маҳсулот ва хӯрокворӣ дар Тоҷикистон пайваста дар ҳоли боло рафтан мебошад.
Сокинони Тоҷикистон дар миёни кишварҳои собиқ Шӯравӣ маошу нафақаи аз ҳама кам мегиранд. Бисёриҳо дар Тоҷикистон шикоят доранд, ки маошу нафақа ба рӯзгорашон намерасад.
Медуза ва Медиазона: Русия қариб 220 000 низомияшро аз даст додааст
Бино ба як таҳқиқи ду расонаи мустақил, Русия аз оғози ҷанг дар Украина то аввали моҳи август тақрибан 220 ҳазор сарбозу дигар низомиёнашро аз даст додааст. Ин оморро вебсайтҳои хабарии “Медуза” ва “Медиазона”, ки аз парвандаҳои меросбарӣ ва феҳрасти сарбозони ҳалокшуда ба даст овардаанд, рӯзи 29-уми август нашр карданд.
Хабарнигорону ихтиёриёни машғул ба ҷамъоварии омор ба ин хулоса расидаанд, ки талафоти сарбозони Русия, ки соли 2022 ҷангро оғоз кард, сол ба сол меафзояд. Масалан, агар дар соли 2023 дар ҷабҳаҳои ҷанг тақрибан 50 ҳазор низомии рус кушта шудаанд, пас дар соли 2024 талафоти Русия дар ҷанг ба 93 ҳазор нафар расидааст.
Ба гуфтаи муаллифони таҳқиқ, танҳо дар як моҳи ноябри соли 2024 тақрибан 3 ҳазор низомии Русия дар ҷанг кушта шудаанд. “Медиазона” менависад, “як далели афзоиши талафот ин аст, ки аз нимаи дувуми соли 2024 дар додгоҳҳои Русия аризаҳо барои бенишон шудан ва тасдиқи марги низомиён якбора зиёд шудааст.”
Дар феҳрасти ном ба номи низомиёни кушташуда, ки хабарнигорони бахши русии Би-би-сӣ ва Медиазона ва ихтиёриён аз манобеи озод омода кардаанд, то охири моҳи август номи бештар аз 125 ҳазор нафар сабт шудааст. Аммо ин омор воқеиятро нишон намедиҳад, зеро дар бораи на ҳамаи сарбозони талафшуда ошкоро хабар медиҳанд.
Мақомоти Русия ҳам расман дар бораи талафот дар ҷанг ба зидди Украина ва теъдоди захмиён хабар намедиҳанд, вале расонаҳои ғарбӣ бо такя ба иттилои ҷосусӣ мегӯянд, ки дар ҷанг садҳо назор нафар аз низомиёни рус куштаву захмӣ шудаанд. Бино ба иттилое, ки то кунун расонаҳо бо такя ба идораҳои ҷосусии ғарбӣ овардаанд, эҳтимол дорад, ки дар ҷанги Русия ба зидди Украина аз ҳарду тараф тақрибан 1 миллион нафар куштаву захмӣ шуда бошанд ва дар ин миён талафоти Русия зиёд аст.
Дар бораи марги даҳҳо нафар аз зодагони Тоҷикистон ва ё шаҳрвандони кишвар, ки аз тарафи Русия дар Украина ҷангидаанд, гузоришҳои зиёде ҳам нашр шудааст.
Видео дар инҷост:
Аз як зиндони Русия шаш тоҷики дигарро ба ҷанг дар Украина бурдаанд
Аз як зиндони шаҳри Тюмен дар Русия дар як ҳафтаи охир шаш зодаи Тоҷикистонро ба ҷанг дар Украина бурдаанд.
Яке аз маҳбусон бо шарти фош нашудани номаш рӯзи 29-уми август ба Радиои Озодӣ гуфт, ки “онҳо зери фишор қарордод имзо карданд”. Ин кор рӯзи 21-уми август сурат гирифтааст. Тасдиқи мустақилонаи хабар имконпазир нест.
Ҳамсуҳбати Радиои Озодӣ иддао кард, ки “дар пайи фишори зиёд ва ваъдаи мақомоти Русия барои озод кардани маҳбусон ҳар моҳе чанд зиндонии тоҷику узбек ночор ба ҷанг мераванд.”
Дар аввали имсол низ 9 маҳбуси тоҷикро аз зиндони Тюмен ба ҷанг дар Украина бурда буданд.
Ду шаҳрванди зиндонии Тоҷикистон дар маҳбаси рақами дуи шаҳри Тюмен дар моҳи март ба Радиои Озодӣ шикоят карда буданд, ки барои рафтан ба ҷанги зидди Украина зери фишор мондаанд. Онҳо аз мақомоти Тоҷикистон талаб доштанд, ки барои идомаи адои ҷазо ба маҳбасҳои кишвар фиристода шаванд, вале сарнавишти баъдии онҳо маълум нест.
Ба хабарҳои гуногун, “дар зиндони шаҳри Тюмен қариб 60 тоҷик ҳаст, ки асосан бо гуноҳи қочоқи маводи мухаддир, қаллобӣ ва дуздӣ маҳкум шудаанд.”
Аз оғози ҷанги бедалели Русия дар Украина то кунун даҳҳо мавриди ҷалб ва кушта шудани шаҳрвандони Тоҷикистон дар Русия расонаӣ гаштааст. Мақомоти Тоҷикистон соли 2023 танҳо сад мавриди ҷалби маҳбусони тоҷикро аз зиндонҳои Русия ба ҷанг тасдиқ карда, дигар дар ин бора маълумоте надодаанд.
Тарҳи давлатии Украина, “Зистан мехоҳам”, рӯзи 18-уми август гуфт, танҳо дар ним сол 628 зодаи Тоҷикистон бо артиши Русия қарордод баста, асосан дар ҷанги Русия алайҳи Украина истифода мешаванд. Аз он пеш, дар моҳи апрел, номи тақрибан ҳазор зодаи Тоҷикистон ошкор шуда буд.
Дар Тоҷикистон то кунун касе барои ширкат дар ҷанги Русия дар Украина ба ҷавобгарӣ кашида нашудааст.
CPJ таҳқиқи куштори 5 хабарнигорро дар Ғазза тақозо кард
Кумитаи дифоъ аз хабарнигорон (CPJ) хоҳони таҳқиқи комил ва мустақилони марги панҷ рӯзноманигор дар шаҳри Хон Юнуси Ғазза шудааст. Изҳороти созмони воқеъ дар Ню-Йорк рӯзи 28-уми август нашр шуд.
Панҷ хабарнигори Рейтерс, Ассошиэйтед Пресс, Ал-Ҷазира, Эн-би-си ва Middle East Eye рӯзи душанбе бар асари ҳамлаҳои Исроил ба бемористоне дар шаҳри Хон Юнус кушта шуданд.
Мақомоти Исроил дар гузориши ибтидоии худ гуфтаанд, ки як дурбини “Ҳамос”-ро ҳадаф қарор доданд. Амрико ва Иттиҳоди Аврупо ин созмонро террористӣ медонанд.
Ҷоди Гинсберг, мудири иҷроияи Кумитаи дифоъ аз хабарнигорон рӯзи панҷшанбе гуфт, “гузориши Исроил бисёре аз суолҳоро бепосух гузоштааст ва аз ҷумла шарҳ намедиҳад, ки чаро наворгири “Рейтерс” Ҳусам Ал-Масрӣ ва дурбини ин хабаргузорӣ тирборон карда шуданд.”
Кумитаи дифоъ аз хабарнигорон мегӯяд, ба артиши Исроил суолҳоро фиристод, аммо ҷавоб нагирифт. Сухангӯйи артиш ба хабаргузории Рейтерс гуфтааст, “рӯзноманигорони Рейтерс ва Ассошиэйтед Пресс ҳадафи ҳамла набуданд."
“Дар 24 соли охир дар Исроил касе ба куштани рӯзноманигор масъул нашудааст. Мо тақозо мекунем, ки таҳқиқи пурра, шаффоф ва мустақил гузаронда шавад,” -- гуфт Ҷоди Гинсберг, мудири иҷроияи Кумитаи дифоъ аз хабарнигорон.
Зеленский гуфт, ҳамлаи Маскав ба Киев “зарба ба Трамп низ ҳаст”
Раисҷумҳури Украина ҳамлаи Русияро бо садҳо мушаку ҳавопаймои бесарнишин ба шаҳри Киев "зарбаи Маскав" алайҳи президенти Амрико Доналд Трамп номид.
Владимир Зеленский рӯзи 28-уми август дар паёми видеоӣ гуфт, "Русия ба ҳар касе, ки дар ҷаҳон сулҳ мехоҳад, зарба мезанад. Ин зарба зидди Украина аст... Ин зарбаи Русия алайҳи президент Трамп низ ҳаст."
Кохи Сафед гуфт, Доналд Трамп аз ҳамлаҳои шаби 27 ба 28-уми август дар саросари пойтахти Украина, ки 23 касро кушт ва даҳҳо нафарро захмӣ кард, норозӣ аст. Вай қаблан Маскавро бо таҳриму боҷҳои нав таҳдид карда буд.
"Мо дар Вашингтон шунидем, ки президенти Русия Владимир Путин гуё омода аст, ҷангро поён диҳад. Ӯ дар ивази қадамҳои воқеӣ ба сӯйи сулҳ мушаки дурпарвозро интихоб мекунад," -- гуфт Зеленский.
Раисҷумҳури Украина афзуд, мунтазир аст, ҳафтаи оянда чаҳорчӯби кафолатҳои амниятӣ барои кишвараш муайян карда шавад.
Як мансабдор дар Ваҳдат ба дуздии 200 ҳазор сомонӣ гумонбар аст
Сардори Раёсати оҷонсии меҳнат ва шуғли аҳолӣ дар шаҳри Ваҳдат ба дуздии қариб 200 ҳазор сомонӣ гумонбар дониста мешавад.
Оҷонсии зиддифасоди Тоҷикистон нисбати Идиев А, сардори ин раёсат ва роҳбари як ҷамъияти хусусӣ барои дуздии қариб 200 ҳазор сомонӣ пули буҷа, парвандаи ҷиноӣ боз кардааст.
Ба иттилои манбаъ, Идиев, ки аз июни соли 2023 дар ин вазифа кор мекард, дар ду соли гузашта бо Гадоев, И.Н, раҳбари "Ясир Инкишоф" барои ҷалби шаҳрвандони бекор ба корҳои ҷамъиятӣ дар ҳудуди ин шаҳр, дар чанд ҳолат ба суратҳисоби ин ҷамъият қариб 200 ҳазор сомонӣ гузаронида, ба воситаи Гадоева И.Н ин пулро аз худ кардааст.
Оҷонсӣ алайҳи Идиев ва Гадоева бо иттиҳоми "азонихудкунӣ ё исрофкорӣ ба миқдори махсусан калон" ва "сохтакории хизматӣ", парвандаи ҷиноӣ боз карда, барои баррасӣ ба додгоҳ ирсол карданд.
Ба гуфтаи манбаъ, зарар пурра ба буҷаи давлат баргардонида шудааст.
Дар ҳамин ҳол маълум нест, ки гумонбарон боздошт шудаанд ё не. Ҳамчунин, назари худи онҳо дар робита ба ин қазия дастрас нест. Маълум нест, ки онҳо чӣ ҷазо гирифтанд.
Фасод аз мушкилиҳои асосии Тоҷикистон гуфта мешавад ва солона даҳҳо корманди давлатӣ, аз ҷумла кормандони мақомоти ҳифзи ҳуқуқ, мизи ҳарбӣ ва заминсозӣ бо ҷурми гирифтани пора дастгир ва ҳабс мешаванд.
Муҷозоти як марди рус барои ҳамла ба зодаи Тоҷикистон
Додгоҳе дар шаҳри Санкт-Петербурги Русия як мардро барои ҳамла ба зодаи Тоҷикистон ба се соли шартӣ аз озодӣ маҳрум кард.
Дафтари матбуоти муштараки додгоҳҳои ин шаҳр хабар медиҳанд, ки Владислав Поплавскийро додгоҳ барои авбошӣ гунаҳкор донист.
Ба иттилои манбаъ, моҳи феврал ин марди нажодпараст, ҳамроҳ бо ду шарики худ дар шоҳроҳи Ланское ба як зодаи Тоҷикистон, ки савори дучарха аз назди онҳо мегузашт, ҳамла карданд.
Додгоҳ муайян кардааст, ки онҳо дар асоси нажодпарастӣ ва хусумат нисбат ба зодагони кишварҳои Осиёи Марказӣ, даст ба чунин кор заданд.
Поплавский дар мурофиа ба гуноҳаш иқрор шуда, изҳори пушаймонӣ кардааст.
Шикоятҳо аз шиканҷаву муносибати бад нисбати муҳоҷирони тоҷик дар Русия борҳо садо медиҳад, вале муҷозот шудани онҳо дар расонаҳои русӣ хеле кам расонаӣ шудаанд.
Русия макони кору зиндагии ҳудуди як миллион муҳоҷир аз Тоҷикистон аст.
“Бердимуҳаммадов акнун андозаи шиками моро муқаррар мекунад”
Мақомот дар ғарби Туркманистон ба ҳунармандон дастур додаанд, ки агар майли ширкат дар чорабиниҳои Рӯзи истиқлол доранд, бояд вазн гум карда, намуди зоҳирии худро ба тартиб биоранд.
Дар ин бора баъзе аз ҳунармандони театр, овозхонҳо ва раққосон бо шарти ошкор нашудани номашон ба Радиои Озодӣ хабар доданд. Ҷашни истиқлоли Туркманистон рӯзи 27-уми сентябр таҷлил мешавад.
Гуфта мешавад, фармонро Қурбонқулӣ Бердимуҳаммадов, раиси Шӯрои Халқи ин кишвар ва падари президенти кунунии Туркманистон, содир кардааст, ки тамоми шохаҳои ҳукумат ва сиёсатро муқаррар мекунад.
Як ҳамсуҳбати Радиои Озодӣ гуфт, дар баробари ҳунармандони фарбеҳ шахсони беш аз ҳад нозуку ба истилоҳ "мурчамиён" ҳам дастур гирифтаанд, ки бояд каме вазн гиранд.
Ҳунармандони театри давлатии драмаи ба номи Сафармурод Туркманбошӣ дар шаҳри Балканобод мегӯянд, ки маоши ночизи онҳо барои харидани хӯроки муносиб, меваву сабзавот ва машқ дар толорҳои варзишӣ намерасад.
Онҳо ҳамчунон ёдовар шуданд, ки барои чорабиниҳои идона аз пули худашон либос мехаранд. Ба қавли ҳунармандон, маоши миёнаи ҳунарманд се ҳазор манат ё беш аз 800 доллар буда, як кило себ 50 манат (14 доллар), як кило афлесун 60 манат (17 доллар) ва ҳаққи узвият дар толори варзишӣ ба як ҳазор манат (284 доллар) баробар аст.
Масъалаи фарбеҳии кормандони давлатӣ дар ҷумҳуриҳои дигари Осиёи Марказӣ ҷой дорад. Дар Тоҷикистон дар як соли охир тақрибан 30 корманди мақомоти корҳои дохилӣ бо сабаби “гаронвазнӣ” аз кор ронда шуда, баъди кам кардани вазн фақат 13 нафари онҳо ба кор баргаштанд.
Қурбонқулӣ Бердимуҳаммов, падари президенти кунунии Туркманистон, ошиқи варзиш ва тарзи ҳаёти солим аст. Ҳар моҳи апрел дар Туркманистони худкома моҳи саломативу хушбахтӣ баргузор шуда, кормандони давлативу донишҷӯён маҷбуранд дар чорабиниҳои дастҷамъии варзишӣ ва раҳпаймоиҳо ширкат кунанд.
Дар ин кишвари саршор аз маводи сӯхт бисёриҳо аслан худро хушбахт намешуморанд ва ба сиёсатҳои шадиди давлат, ришваситонӣ ва камбағалӣ ишора мекунанд. Миллионҳо нафар барои таъмини рӯзгорашон ба муҳоҷирати корӣ маҷбур шудаанд. Як ҳунарманд ба истеҳзо гуфтааст, акнун Бердимуҳаммадов андозаи шиками моро муқаррар мекунад.
ВКД гуфт, ҷавони ҳамлавар ба полиси Русия аз Тоҷикистон нест
Вазорати корҳои дохилии Тоҷикистон мегӯяд, як ҷавоне, ки рӯзи 27-уми август ба кормандони пулиси Русия бо корд дарафтод, шаҳрванди Тоҷикистон нест ва хабарҳо дар ин бора асос надоранд.
Дар баёнияи вазорат, ки имрӯз нашр шуд, омадааст, “муайян карда шуд, ки Шерафган Кунҷумови 26-сола зодаи вилояти Саратов ва шаҳрванди Русия мебошад.”
Расонаҳои Русия дирӯз бо нашри видеои кашмакаши сахти ин ҷавон бо кормандони пулис ва калтак хӯрдани ӯ гуфтанд, ки Шерафган Кунҷумов зодаи Тоҷикистон аст. Ин ҷавон пеш аз кашмакаш аввал ба самти мошини афсарони пулис зарфи шишагии оташгиранда андохтааст.
Ҳангоми талоши дастгир кардан, ӯ ба кормандони милиса муқовимат нишон медиҳад, вале дар ниҳоят дастгир мешавад.
Ҳодиса рӯзи 27-уми август рух додааст. Кумитаи тафтишоти Русия гуфт, ки ба зидди ин ҷавон парвандаи ҷиноӣ боз кардаанд.
Вазорати корҳои дохилии Тоҷикистон гуфтааст, ин ҷавон, ки ҳеч гоҳ шиносномаи миллӣ ё хориҷӣ надошт, соли 2017 бо иттиҳоми терроризм ба 7 сол зиндон маҳкум шуда буд ва моҳи майи имсол озод шуд.
Расонаҳои Русия, ки бо муҳоҷирситезӣ мехоҳанд, мухотаб пайдо кунанд, аксаран ҳангоми ҷинояти пурсарусадо саъй мекунанд, омилони онро шаҳрвандони кишварҳои Осиёи Марказӣ, аз ҷумла Тоҷикистон муаррифӣ намоянд.
Ҳамлаи густардаи Русия бо садҳо мушаку дрон ба пойтахти Украина
Бар асари ҳамлаи густардаи Русия ба шаҳри Киев, пойтахти Украина, дастикам 14 кас, аз ҷумла ду кӯдак кушта шудаанд.
Ҳодиса рӯзи 28-уми август ва замоне рух дод, ки мансабдорони баландпояи Украина барои дидору гуфтушунид бо намояндагони Амрико дар Ню-Йорк омода мешаванд. Иёлоти Муттаҳида хоҳони хатми комили ҷанги Русия дар Украина аст.
Мақомот дар Киев гуфтанд, Русия субҳи панҷшанбе бо мушаку ҳавопаймоҳои бесарнишин ба гӯшаҳои пойтахти Украина ҳамла кардааст ва то кунун 45 нафар маҷрӯҳ гаштаанд.
Президенти Украина, Владимир Зеленский, дар Телеграм навишт, ки шояд бархе то ҳол дар зери вайронаҳо ҳастанд ва мумкин аст теъдоди захмиён бештар шавад.
Зеленский гуфт, “ҳамлаи имрӯзаи Русия бо мушаку ҳавопаймоҳои бесарнишин посухи рӯшан ба ҳамаи онҳоест, ки ҳафтаҳо ва моҳҳо боз ба оташбас ва дипломатия даъват мекунанд.”
