Ҳиҷрона Мирахмедова, як муҳоҷирзани тоҷик барои баргардонидани ҳудуди якуним миллион рубли худ, аз президентҳои Русияву Тоҷикистон кӯмак хостааст. Ин зан ду ҳамватанашро барои аз худ кардани ин маблағ муттаҳам мекунанд. Аммо ин афрод, мегӯянд, ки Ҳиҷрона Мирахмедоваро намешиносанд ва аз ӯ ҳеҷ гуна маблағе ҳам нагирифтаанд. Масъулини намояндагии меҳнат ва муҳоҷирати Тоҷикистон дар Русия мегӯянд, ки дар ин робита ба онҳо ҳеҷ шикояте нарасидааст ва дар сурати муроҷиати ин зан, мавзӯъро пайгирӣ мекунанд.
Ҳиҷрона Мирахмедова, сокини шаҳри Душанбе, ки се сол боз дар Русия кору зиндагӣ дорад, пас аз якуним соли талошҳо барои баргардонидани пули бо заҳмати зиёд ба даст овардааш, ҳоло ба Эмомалӣ Раҳмон ва Владимир Путин муроҷиат кардааст.
Дар ин номаи худ ӯ гуфтааст, дар мағозае ба фурӯши сарулибос машғул буд ва умед дошт маблағ ҷамъ оварда, барои се фарзанди бесарпаноҳаш дар Тоҷикистон хона мехарад. Аммо аз коршариконаш -- ду марди тоҷики муқими шаҳри Химкии Русия фиреб хӯрда, натавонистааст якуним миллион рублро, ки барои гирифтани мол фиристода буд, бозпас бигирад.
Вай гуфт, "ширкати онҳо ба истеҳсоли либосҳои варзишӣ машғул буд, ман мол мегирифтам ва дар бозор мефурӯхтам. Пешакӣ маблағашро ба суратҳисоби онҳо мефиристодам. Аммо онҳо моли камтар мефиристоданд. Дар охир вақте гуфтам, ки қариб якуним миллион рубли маро на бор додед на пулро баргардондед, онҳо рад карданд".
Ҳиҷрона Мирахмедова се соли пеш ба умеди дарёфти маблағ барои кор ба Русия рафта буд. Ӯ пас аз ҷудо шудан аз шавҳар се фарзанди ноболиғашро ба танҳоӣ бузург мекунад ва ҳоло кӯдаконаш дар тарбияи хоҳараш қарор доранд. "Ман хона надорам. Бо ин умед, ки инҷо кор мекунаму меравам барои се кӯдакам хона мехарам, баръакс бо ин мушкил дубор шудам".
Ӯ мегуяд, агар ин муносибатро бо ӯ як шаҳрванди Русия мекард, чунин сахт набуд. Ба бовари ин муҳоҷирзан, ду нафаре ки ба қавли ӯ маблағашро барнамегардонанд ва фиребаш карданд, аз зан будани ӯ истифода мекунанд.
Ҳиҷрона мегӯяд, ин ду коршарикаш И.Р ва Р.Р -- зодаҳои шаҳри Хуҷанд ҳастанд ва шаҳрвандии Русияро доранд. Аз ин рӯ, ӯ ба Владимир Путин ҳам муроҷиат кардааст. Ӯ аз ҷумла дар номааш гуфтааст: ".....ин ду нафар, ки шаҳрвандии Русияро доранд, ҳамеша маро таҳдид ба он мекунанд, ки бо роҳе аз ин кишвар ихроҷам мекунанд".
Ҳиҷрона дар ҳоле бо як номаи пурдард ба раҳбарони ду кишвар муроҷиат кардааст, ки кумакхоҳияш ба Консулгарии Тоҷикистон дар Русия натиҷа надодааст.
Талошҳои мо барои сӯҳбат бо И.Р -- яке аз онҳое, ки ба иддаои Ҳиҷрона ӯро фиреб кардаву маблағашро барнагардонистааст, бенатиҷа буд.
Аммо Р.Р коршарики дигар ин муҳоҷирзан дар як сӯҳбати телефонӣ аз Русия ба Радиои Озодӣ гуфт, "ҳеҷ нафареро бо ин ному насаб намешиносам ва на чиз додааму на чизе гирифтам". Вале ин ҳамсуҳбати мо тасдиқ кард, ки бо И.Р якҷоя кор кардааст.
Дар ҳамин ҳол, Иброҳим Аҳмадов, сухангӯи намояндагии Вазорати меҳнат ва муҳоҷирати Тоҷикистон дар Русия гуфт, дар сурати муроҷиати Ҳиҷрона Мирахмедова ба онҳо, ин масъаларо пайгирӣ хоҳанд кард. Ба гуфтаи ин ҳамсӯҳбати мо, ҳарчанд оморҳои ҷудогонаи чунин шикоятҳо вуҷуд надорад, вале дар умум дар нӯҳ моҳи соли ҷорӣ 164 муроҷиати хаттии муҳоҷирон дар мавриди пардохт нашудани музди маош ба ин намояндагӣ ворид шудааст.
"Гарчанде бисёр набошад ҳам, чунин муроҷиатҳо ба Намояндагӣ ворид мешаванд. Асосан сабаби чунин баҳсу нофаҳмӣ, иҷро нагардидан ё ба таъхир афтодани масъулияти молиявии як ҷониб мебошад. Мо мавқеи ҳарду тарафро омӯхта, кушиш менамоем, масъаларо дар миёни ҷонибҳо бо роҳи созиш ҳал кунем",-афзуд Иброҳим Аҳмадов.
Шикоятҳо аз сарпечии корфармоҳо аз пардохти ҳаққи заҳмати муҳоҷирони корӣ кам нест. Кор то ҷое расидааст, ки дар бораи худдории ширкатҳо аз пардохти пули кори кормандон матбуоти русӣ ҳам хабарҳо чоп карда, дар бораи ба тафтишот рафтани кори ин ё он ширкат ваё то ба президент Путин фиристода шудани номаҳои коргарони мунтазири маош, гузоришҳо нашр мекунанд.
Шикояту хабарҳо дар бораи фиреб ва лабукубу кушта шудани муҳоҷирон бо мусоидати ҳамватанони тоҷикашон ҳам зиёд расонаӣ мешаванд. Тибқи иттилои расмӣ, 460 ҳазор ва бинобар омори ғайрирасмӣ, беш аз як миллион шаҳрванди Тоҷикистон хонаводаашонро аз ҳисоби кор дар Русия таъмин мекунанд.
Мисли Ҳиҷрона ҳамасола аз Тоҷикистон дар баробари мардон садҳо занон ҳам барои пешбурди рузгор роҳи Русияро пеш мегиранд. Аммо ба фарқ аз мардон, муҳоҷирати занон, ки фарзандони хурдсолу ноболиғи худро аз оғуши худ дур карда мераванд, сахттар аст.
Ҳоло охирин умеди Ҳиҷрона баъд аз талошҳои зиёду бенатиҷа, номааш ба раҳбарони ду кишвар аст, ҳарчанд дақиқ намедонад, ки ин номаҳои электронӣ ба Эмомалӣ Раҳмон ва Владимир Путин мерасад ё не.
