Як мақоми тоҷик гуфт, умедвор аст, ба Тоҷикистон воксинаи зидди коронавируси тасдиқшуда аз ҷониби Созмони ҷаҳонии тандурустӣ ворид мешавад. Наврӯз Ҷаъфаров, сардори раёсати амнияти санитариву эпидемиологии вазорати тандурустӣ дар сӯҳбат бо оҷонсии ТАСС гуфтааст, чунин умедворӣ ба хотири узви барномаи COVAX будани Тоҷикистон вуҷуд дорад. Барномаи мазкур, ки зери назари СҶТ аст, 92 кишварро фаро мегирад ва ин кишварҳо умед доранд, ки бо ёрии ин созмон аҳолии худро бо воксина таъмин хоҳанд кард. Ҷаъфаров гуфтааст, ки барои Тоҷикистон муҳим аст, ки воксинаи зидди COVID-19 аз ҷониби СҶТ тасдиқ шуда бошад, амну фоидаовар ва интиқолаш ба Тоҷикистон ҳам осон бошад.

Пештар хабар дода мешуд, ки мақомоти Тоҷикистон умедвори дарёфти эм ё воксини Русияанд ва дар ин бобат бо мақомоти Маскав вориди гуфтугӯ шудаанд.

Ҷаъфаров гуфтааст, ки Тоҷикистон тавассути барномаи COVAX метавонад ба чанд навъи воксинаҳои зидди коронавирус умедвор шавад. Ин мақоми вазорати беҳдошти Тоҷикистон гуфтааст, ки 20 дарсади ҷамъияти Тоҷикистон, пеш аз ҳама кормандони тиб, сокинони аз 50-сола боло ва ашхоси дорои бемориҳои ғайриинфексионии музмим ба таври ройгон эм карда мешаванд.

Мақомот мегӯянд, дар Тоҷикистон то 13-уми ноябр шумори олудашудаҳо 13308 ва марги инсонҳо бар асари COVID-19 – 90 нафарро ташкил додааст. Вале дар ҷомеа ба ин омор нобоварӣ вуҷуд дорад, чунки ба қавли бисёр онҳое, ки бемор шудаву наздиконашро аз даст додаанд, ин фактҳо аз ҷониби омори расмӣ ба қайд гирифта нашудааст. То дер вақт рад шудани вуҷуди вирус дар Тоҷикистон баҳори соли 2020 як мояи дигари нобоварии мардум ба омори расмӣ гардид.

Муҳсин Муҳаммадиев, собиқ ҳамлагари маъруфи дастаи "Помир"-и Душанбе ва сармураббии пешини тими миллии футболи Тоҷикистонро дар оромгоҳи Лучоби пойтахт ба хок супориданд. Маросими видоъ бо Муҳаммадиев 3-юми январ дар масҷиди марказии Душанбе баргузор шуд.

Муҳсин Муҳаммадиев рӯзи 1-уми январ пас аз бемории вазнин дар синни 60-солагӣ дар шаҳри Маскави Русия аз олам даргузашт.

Ӯ дар оғози мавсими футболи соли 2025 ҳангоми сафар ба Туркия ба сактаи мағзӣ дучор шуд ва давоми қариб як соли ахир дар яке аз бемористони Маскав табобат мегирифт.

Муҳсин Муҳаммадиев, ки 21-уми октябри соли 1966 дар шаҳри Душанбе таваллуд шудааст, ҳамлагари моҳир буд ва ҳаводоронашро бо ҳунари воло мафтун мекард.

Дар бораи корномаи Муҳсин Муҳаммадиев дар инҷо бештар бихонед:

Алӣ Хоманаӣ, роҳбари Ҷумҳурии исломии Эрон дар вокуниш ба эътирозҳо дар ин кишвар гуфт, "бо ошӯбгарон бояд сахт бархӯрд шавад".

Хоманаӣ 3-юми январ дар дидор бо хонаводаи Қосим Сулаймонӣ, фармондеҳи пешини нерӯи Қудс эътирозро "ҳаққи мардум" донист, аммо болоравии қурби доллар дар баробари асъори милли Эронро кори "душманон" хонд.

"Мо бо эътирозгарон гап мезанем ва масъулин бояд бо эътирозгарон ҳарф зананд. Аммо бо ошӯбгарон ҳарф задан фоида надорад ва бояд ӯро ба ҷойи худаш нишонд", - таҳдид кард Хоманаӣ.

Эътирозҳо дар чанд шаҳри Эрон рӯзи ҳафтум аст, ки идома доранд. Ин норозигиҳо 31-уми декабр ба сабаби поин рафтани бесобиқаи арзиши пули миллӣ ва таварруми афзоянда оғоз шуданд.

Расонаҳо ва созмонҳои ҳомии ҳуқуқ аз саркӯби эътирозгарон ва кушта шудани чанд нафари онҳо гузориш доданд.

Вазорати корҳои хориҷии Тоҷикистон дар робита ба сӯхтор ва ҳалокати даҳҳо нафар дар як маҳфили лижаронӣ дар Швейтсария ба ин кишвар ҳамдардӣ кардааст.

Ин ниҳод 2-юми январ дар изҳороте навишт, ба мардуми Швейтсария ҳамдардӣ ва “ба зарардидагон шифои ҳарчи зудтар таманно дорем”.

Мақомоти Швейтсария рӯзи 1-уми январ хабар доданд, ки бар асари сӯхтор дар ҷанубу ғарби ин кишвар даҳҳо кас ҷон бохтаанд. Ҳодиса дар як клуби серодам дар маҷмааи лижаронии Le Constellation рух додааст.

Тибқи иттилои ахир, дар пайи ин ҳодиса 40 нафар ҳалок шуда, зиёда аз 115 нафар сахт захмӣ шудаанд. Мақомоти Швейтсария гуфтанд, шумораи қурбониён ва захмиёни метавонад бештар шавад.

Сабаби сӯхтор ҳанӯз маълум нест. Муфаттишон мегӯянд, ягон нишонаи ҳамлаи террористӣ ё қасдан оташ задани клуб феълан дар даст нест. Радиои Rhône ва Blick гузориш доданд, ки сабаби сӯхтор метавонад истифода аз маводҳои тарфгарӣ (пиротехникӣ) бошад.

Рӯзи 2-юми январ мақомоти Швейтсария эълон каданд, ки ба поси хотири ҷонбохтагони ин ҳодиса дар кишвар расман панҷ рӯз мотам эълон мешавад.

Тоҷикистон ва Узбекистон интиқоли молу коло аз тариқи долон ё масири навро ба таври озмоишӣ ба роҳ мемонанд.

Вазорати нақлиёти Тоҷикистон дар хабарномае гуфт, долони нав "Чин – Тоҷикистон – Узбекистон – Туркманистон – Эрон –Туркия-Аврупо"-ро дарбар мегирад.

Қарор аст, ки дар навбати аввал корвони иборат аз 10 мошини пурбор аз Узбекистон тавассути қаламрави Тоҷикистон ҷониби Чин роҳсипор шаванд.

Бар асоси созише, ки миёни вазирони нақлиёти Тоҷикистон ва Узбекистон ҳосил шудааст, рухсатномаҳо барои интиқоли бор дар шакли электронӣ дода мешаванд.

Корвони аввали мошинҳо ба таври озмоишӣ дар масири нав ҳаракат мекунад ва маълум нест, ки ҳаракати доимии мошинҳои боркаш дар ин масир аз кай оғоз мешавад.

Мақомоти Узбекистон дар робита ба марги як шаҳрванди ин кишвар дар Шарқи Дур аз мақомоти Русия маълумот талаб кардаанд.

Консулгарии Узбекистон дар шаҳри Владивосток бо ирсоли ёддошт ё нота аз додситонии минтақаи Хабаровск ва дигар мақомоти маҳаллӣ талаб кардааст, ки марги муҳоҷири узбек таҳқиқ шавад.

Тибқи гузоришҳо, рӯзи 12-уми декабр неруҳои вижаи пулис (ОМОН) барои гузарондани рейд вориди як қаҳвахона дар Хабаровск шуданд ва чанд шаҳрванди Узбекистонро онҷо латукӯб кардаанд. Яке аз онҳо баъди шиканҷа ба ҳолати беҳушӣ (кома) афтида, ҳалок шудааст. Сабабҳои марги ин нафар расман эълон нашудаанд.

Вазорати корҳои хориҷии Узбекистон хабар дод, ки қазия зери назорати консулгарии ин кишвар ва Оҷонсии муҳоҷират аст. Мақомоти Узбекистон ҳамчунин гуфтанд, бо наздикони муҳоҷири фавтида дар тамос буда, ҷасади ӯро ба ватан мефиристанд.

Аз рӯи қонунҳои Узбекистон, масъулияти пулию ташкилии интиқоли ҷасадҳои шаҳрвандони ин кишвар дар хориҷа ба дӯши давлат мебошад.

Ин бори аввал нест, ки муҳоҷирон дар пайи рейдҳои пулис дар Русия кушта ё захмӣ мешаванд.

Шумори қурбониёни селобҳо дар пайи борандагиҳо дар Афғонистон ба ҳабдаҳ тан расид. Дар миёни қурбониён панҷ узви як хонавода ҳастанд, ки рӯзи 1 январ дар натиҷаи фурӯ рехтани боми хонаашон дар вилояти Ҳирот ҷон бохтанд.

Идораи миллии мубориза бо ҳодисаҳои табииӣ ҳукумати Толибон рӯзи 1 январ дар як эъломия гуфтааст, ки дар баробари талафоти ҷонӣ, дар натиҷаи борандагиҳо ва селобҳо беш аз 270 хона ба таври комил ва наздик ба 1560 хона қисман вайрон шудаанд.

Дар чаҳор рӯзи гузашта гузоришҳое аз талаф шудани ҳудуди 1200 сар ҳайвон дар натиҷаи борандагиҳо дар Афғонистон нашр шудааст.

Ҳизби дар Тоҷикистон мамнуи наҳзати исломӣ хуруҷи ду узви баландпояшро тасдиқ кард ва гуфт, дар пайи ислоҳоти фарогири ин созмон мебошад.

Охири моҳи декабр Маҳмудҷон Файзраҳмонов ва Бобоҷон Қаюмов, ду узви Раёсати олии ҲНИТ эълон карданд, ки аз "исломи сиёсӣ канорагирӣ" мекунанд ва дигар ҳеч робитае бо Ҳизби наҳзат надоранд. Файзраҳмонов ва Қаюмов ҳамчунин гуфтанд, "исломи сиёсӣ дар ниҳоят ба бунбаст мерасад".

Ҳизби дар Тоҷикистон мамнуи наҳзати исломӣ дар баёнияе гуфт, 9-уми декабри соли 2025 гуруҳи корие иборат аз 6 узви Раёсати олии ин ҳизбро созмон дод, то "тарҳи ислоҳоти роҳбурдӣ ва фикрии ҲНИТ"-ро дар муддати се моҳ омода кунанд. Маҳмудҷон Файзраҳмонов ва Бобоҷон Қаюмов ҳам узви ин гуруҳи корӣ будаанд, ки ба навиштаи Ҳизби наҳзати исломӣ мунтазири анҷоми тарҳи ислоҳот нашуда, "канор рафтани худ эълон намуданд". Аммо номбурдагон дар як мусоҳибаи катбӣ рӯзи 1 январ ба Радиои Озодӣ гуфтанд, раванди тасмимгирии онҳо хеле пештар аз талоши ислоҳот, "тақрибан ду сол пеш" сар шуда, "натиҷаи арзёбии тӯлонӣ мебошад."

Намояндагони Ҳизби наҳзати исломӣ бидуни овардани ҷузъиёти мушаххас гуфтаанд, дар доираи ислоҳоти нав бояд "муносибати ҳаракат бо масоиле чун давлат, миллат, дин ва сиёсат" бознигарӣ шавад.

Ҳанӯз маълум нест, ки Ҳизби наҳзати исломӣ, ки аз соли 2015 фаъолияташ дар Тоҷикистон мамнуъ аст, чӣ тағйиротеро дар кори худ роҳандозӣ мекунад, вале тарки сафҳои он кардани аъзои шинохтааш ва қаблан дар як ҷунбиши дигар муттаҳид шудани чанде аз аъзои саршиноси онро мунтақидон нишонаҳои буҳрони амиқ дар ин созмон номиданд. Бархе аз мубоҳисони ин воқеа, ба монанди Мавлавӣ Муҳиддин Аҳмадов истеъфои Файзраҳмонов ва Қаюмовро ба буҳрони мудирият аз ҷониби раиси ҳизб Муҳиддини Кабирӣ нисбат медиҳанд. Вале ҳарду узви ҳамакнун собиқи раёсати ҳизб мегӯянд, тарки созмон кардани онҳо ба шахсиятҳо бастагӣ надорад.

Маҳмудҷон Файзраҳмонов ва Бобоҷон Қаюмов ба Радиои Озодӣ гуфтанд, "дар даҳаи навадуми асри гузашта, замоне ки ҳанӯз дар синни наврасӣ қарор" доштанд, узи ҲНИТ шуданд ва сабаби тасмими ахири "душвор ва сарнавиштсоз"-и онҳо "тағйир ё адами тағйири равиш ва хати машйи Ҳизби наҳзати исломӣ нест, балки ба қаноат ва ҷамъбасти фикрии мо дар бораи худи исломи сиёсӣ бозмегардад."

Хадамоти махсуси Иёлоти Муттаҳидаи Амрико ба хулосае расидааст, ки Украина кушиши ҳамла ба қарорҳои Владимир Путинро накардааст. Дар ин бора чанд расона, аз ҷумла CNN, Ню-Йорк Таймс ва The Wall Street Journal бо такя ба манобеашон гузориш додаанд.

Ба гузориши ин расонаҳо, Ҷон Рэтклифф, роҳбари Хадамоти иктишофии Амрико ё СРУ ба Доналд Трамп гузориш додааст, ки истихборот изҳороти мақомдорони Русия дар бораи ҳамла ба қароргоҳи Путинро боварбахш намеҳисобад.

Ба гуфтаи манобеи The Wall Street Journal, СРУ парвози бесарнишинҳои украинӣ ба вилояти Новгородро тасдиқ кардааст, аммо гуфтааст ҳадафи ин паҳподҳо як маркази низомӣ буд, ки қаблан ҳам ҳадафи ҳамла қарор гирифтааст.

Мақомоти Русия, аз ҷумла вазири корҳои хориҷии ин кишвар мегӯянд, неруҳои Украина шаби 29-уми декабр ба қароргоҳи Владимир Путин дар вилояти Новгород ҳамла карданд. Аммо мақомоти Русия барои исботи гуфтаашон ягон далел наоварданд. Неруҳои Русия гуфтаанд, далелҳои худро ба Амрико ирсол мекунанд.

Президенти Украина Владимир Зеленский талоши ҳамла ба қароргоҳи Путинро рад карда, онро "дуруғи навбатии Маскав" хонд.

Ду корманди Раёсати бозрасии давлатии автомобилӣ (БДА) дар ноҳияи Варзоб зери тарма монда, ҷон бохтаанд. Ҳодиса 1-уми январ рух додааст.

Ду манбаи огоҳ аз қазия ба Радиои Озодӣ гуфтанд, Фаррух Ҳасанзода ва Саидмурод Ғанизода барои ба танзим даровардани ҳаракати нақлиёт дар роҳи Душанбе-Чаноқ ба минтақаи Варзоб сафарбар шуда буданд ва дар вақти иҷрои вазифаҳои хизматӣ зери тарма монданд.

Як манбаъ дар Кумитаи ҳолатҳои фавқулодаи Тоҷикистон бо тасдиқи ин хабар гуфт, ҷасади ду афсарро аз зери тарма бароварда, ба наздикон доданд.

Дар назар аст, ки 2-юми январ маросими видоъ бо Фаррух Ҳасанзода дар ноҳияи Фирдавсии шаҳри Душанбе ва ҷанозаи Саидмурод Ғанизода дар зодгоҳаш ноҳияи Файзобод баргузор шавад.

Намояндагони ширкати IRS, ки масъули нигоҳбини роҳи Душанбе-Чаноқ ҳастанд, то ҳол қазияро шарҳ надодаанд.

Давоми як ҳафтаи ахир ҳаракати нақлиёт дар роҳи Душанбе-Чаноқ, ягона масир миёни пойтахт ва шимоли кишвар мушкил шудааст.

Ширкати IRS мегӯяд, боридани барфи зиёд ва фаромадани тарма ҳаракати нақлиётро мушкил кардааст. Дар наворҳое, ки ба шабакаҳои иҷтимоӣ роҳ ёфт, дида мешавад, ки мошинҳои зиёде дар роҳ дармондаанд.

Масъулияти нигоҳбонии роҳи Душанбе-Чаноқ ба ӯҳдаи ширкати IRS аст ва ширкат барои ин кораш аз ронандагон маблағ мегирад. Молики ширкат маълум нест.

Тоҷикистон ва Узбекистон ба созиш расидаанд, ки фаъолияти як гузаргоҳ дар марзи ду кишварро васеътар кунанд, то мошинҳо зиёд мунтазир намонанд.

Вазорати нақлиёти Тоҷикистон дар хабарномае гуфт, бар асоси созиш дар назди гузаргоҳи "Ҷартепа-Саразам" маркази нави логистикӣ таъсис дода мешавад, ки метавонад дар як шабонарӯз то 100 мошини боркашро бо сабти зуди санадҳо гузаронад.

Гузаргоҳи "Ҷартепа-Саразм" дар минтақаи марзии шаҳри Панҷакенти Тоҷикистон ва ноҳияи Ургути Узбекистон ҷойгир шудаанд.

Ба иттилои Вазорати нақлиёт, ду тараф имкониятҳои зиёд кардани шумораи рухсатномаҳо барои ҳамлу нақли байналмилалӣ ва интиқоли онҳоро ба шакли электронӣ баррасӣ доранд.

Пештар ронандагони мошинҳои боркаш аз Тоҷикистон шикоят доштанд, ки рухсатнома барои интиқоли молу колоро саривақт гирифта наметавонанд.

Гузаргоҳи "Ҷартепа-Саразам" яке аз масирҳои асосии равуо миёни Тоҷикистону Узбекистон ба шумор мешавад. Қаблан ронандагони мошинҳои боркаш дар инҷо ва ҳам гузаргоҳи "Ойбек-Фотеҳобод" аз зиёд будани навбатпоӣ шикоят доштанд.

Мақомоти Швейтсария рӯзи 1-уми январ хабар доданд, ки бар асари сӯхтор дар ҷанубу ғарби ин кишвар даҳҳо кас ҷон бохта ва 100 нафар захмӣ шудаанд.

Ҳоли аксари маҷруҳон “вазнин” гуфта мешавад.

Хабаргузории Reuters гузориш дод, ки ҳодиса ҳангоми таҷлил аз Соли нав дар як клуби серодам соати 1:30-и шаб рӯй дод.

Ба иттилои Би-би-сӣ, ба ҷойи ҳодиса даҳ чархболу чиҳил мошини Ёрии таъҷилӣ фиристода шуд.

Сабаби сӯхтор ҳанӯз маълум нест.

Пулис дар аввал гуфта буд, ки таркиш рух додааст.

Мақомоти Швейтсария гуфтаанд, ҳодиса бештар ба як тасодуф монанд аст, на ба ҳамлаи барқасдона.

Раисҷумҳури Русия бахши асосии паёмашро дар шаби соли нав ба ширкатдорони “амалиёти махсуси низомӣ” бахшид. Маскав ҷанги густурдаашро дар Украина расман чунин меномад.

Владимир Путин рӯзи 31-уми декабри 2025 низомиёни Русияро "қаҳрамон" хонд ва иддао кард, ки онҳо барои “ҳақиқат ва адолат” мубориза мебаранд.

Вай бо ибрози боварияш ба пирӯзӣ, аз мардум хост, бо сухан ва амал низомиёнро дастгирӣ кунанд, аммо дар бораи сулҳ ва поён додан ба ҷанг дар Украина ҳарфе ба забон наовард.

Владимир Зеленский, раисҷумҳури Украина, дар паёми солинавии худ дар шабакаҳои иҷтимоӣ аз истодагарӣ ва заҳмати украиниҳо, бавижа низомиён, ситоиш кард.

Ӯ гуфт, сокинони Украина "қобилияти ҳамкорӣ ва инсондӯстӣ"-ро бо худ ба соли 2026 мебаранд. "Мо ба сулҳ бовар дорем, барои он мубориза мебарем ва барои он кор мекунем," – навишт ӯ.

Паёми раҳбарони Русия ва Украина дар ҳоле садо дод, ки вазъ дар майдони ҷанг душвор мемонад ва ҳарду ҷониб ба якдигар бо мушаку паҳпод зарба мезананд.

Русия аз моҳи феврали соли 2022 ба ҳамлаи густурдааш дар хоки Украина беист идома медиҳад.

Мақомот дар Вилояти Мухтори Кӯҳистони Бадахшон эълон карданд, ки ба хонаводаи Зиреҳбон Наврӯзбеков, афсари кушташудаи Нерӯҳои марзбонии Тоҷикистон хона доданд. Наврӯзбеков ҳафтаи гузашта дар даргирӣ бо афроди мусаллаҳ дар марз бо Афғонистон кушта шуд.

Тибқи хабаре, ки ҳукумати ВМКБ дар саҳифааш дар Фейсбук нашр кард, ба хонаводаи ин афсари кушташуда дар шаҳри Хоруғ хонаи дуҳуҷрагӣ дода шудааст. Дар хабар омадааст, ки мақомот дар оянда ба хонаводаи афсари кушташуда кумак хоҳанд кард.

Зиреҳбон Наврӯзбеков ва Исматулло Қурбонов, ду афсари Нерӯҳои марзбонии Кумитаи давлатии амниятӣ миллӣ рӯзи 24 декабр дар даргирӣ бо афроди мусаллаҳ дар наздикии мавзеи Қавоқ дар ноҳияи Шамсиддин кушта шудаанд. Мақомоти тоҷик ҳамлаваронро гурӯҳи террористӣ ном бурданд.

Бар пояи иттилои манбаъҳои Радиои Озодӣ, Зиреҳбон Наврӯзбекови 33-сола бо зарби шаш тир ба ҳалокат расидааст. Ӯ зодаи ноҳияи Шуғнони Вилояти Мухтори Кӯҳистони Бадахшон аст ва пайкарашро баъди ташхису шиносоӣ ба зодгоҳаш фиристоданд.

Исматулло Қурбонови 28-сола дар ин ҳодиса ба ҷуқурии 200-метрии яке аз ғорҳои минтақа афтода буд ва як рӯз баъд ҷасади ӯро берун оварданд ва дар зодгоҳаш ноҳияи Ҳамадонии вилояти Хатлон ба хок супурданд.

Ҳардуи ин афсарон дар қисми марзбонии "Саричашма" адои хидмат мекарданд.

Ҳукумати "Толибон" дар Афғонистон гуфтааст, дар соли 2025 шумори нерӯҳои амниятӣ ва дифоии омӯзишдидааш дастикам 300 ҳазор тан расидааст.

Забеҳуллоҳ Муҷоҳид, сухангӯи ҳукумати "Толибон", рӯзи 31-уми декабр дар гузориши солона дар шабакаи Х навишт, дар соли гузашта Вазорати дифои онҳо шумори нерӯҳои омӯзишдидаи амниятиро ба 181 ҳазору 84 тан расонд.

Ба гуфтаи ӯ, ҳамчунон дар ҷараёни як сол 100 ҳазору 300 пулис дар бахшҳои амниятӣ, ҷиноӣ, марзӣ ва дигар соҳаҳо омӯзиш дида ва фориғуттаҳсил шуданд.

Бо ин ҳол, ӯ мушаххас накардааст, ки дар ҳоли ҳозир шумори умумии нерӯҳои мусаллаҳи ҳукумати "Толибон" ба чӣ теъдод мерасад.

Фасеҳуддин Фитрат, сардори Ситоди кулли нерӯҳои мусаллаҳи ҳукумати "Толибон", баҳори соли 2024 дар гуфтугӯ бо телевизиони "Тулӯъ" иддао карда буд, ки шумори умумии нерӯҳои мусаллаҳи онҳо ба 500 ҳазор тан мерасад.

Ҳамчунин Кумитаи назорат бар таҳримҳои Шӯрои амнияти СММ дар навтарин гузориши худ дар нимаи моҳи декабр эълон кард, ки дастгоҳи амнияти "Толибон" байни 380 то 450 ҳазор фард дорад. Ҳудуди 150 ҳазор тани он нерӯҳои дифоӣ ва наздик ба 200 ҳазор тани дигар пулис ва нерӯҳои истихборотӣ будаанд.

Дар ин гузориш омада буд, ки дар нимаи нахусти соли молии 2025 хароҷоти "Толибон" дар бахши амниятӣ ба 55,2 миллиард афғонӣ (беш аз 830 миллион доллар) расидааст, дар ҳоле ки 64,2 миллиард афғонӣ дар дигар бахшҳо харҷ шудааст.

Дар ҳамин ҳол, шуморе аз таҳлилгарон ва сокинони ин кишвар мегӯянд, дар шароите ки фақр, тангдастӣ ва бекорӣ дар Афғонистон рӯз ба рӯз афзоиш меёбад, бештар кардани нерӯҳои амниятии "Толибон" авлавият нест, балки ба гуфтаи онҳо, бояд барои беҳбуди вазъияти мардум кор сурат бигирад.

Мақомҳои маҳаллӣ дар Украина рӯзи 31-уми декабр гуфтанд, ки дар пайи ҳамлаҳои Русия чаҳор нафар, аз ҷумла се кӯдак дар шаҳри Одесса захмӣ шуданд.

Раиси Идораи низомӣ дар минтақаи Одесса дар Телеграм навишт, "ҳавопаймоҳои бесарнишин ба зерсохтҳои истиқоматӣ ва энержии минтақа ҳамла карданд".

Ин ҳамлаҳо пас аз он рух дод, ки Украина ҳамлаи ҳавопаймоҳои бесарнишинро ба яке аз иқоматгоҳҳои президенти Русия Владимир Путин рад кард ва Маскавро ба пахши маълумоти нодуруст барои халалдор кардани гуфтугӯҳои поёни ҷанг муттаҳам намуд.

Раисҷумҳури Украина Владимир Зеленский иддаои Русияро "комилан бофта" хонд ва гуфт, ният дорад шашуми январ бо раҳбарони кишварҳои ҳампаймони Киев дар Фаронса мулоқот кунад.

Кремл рӯзи 30-юми декабр нерӯҳои Украинаро муттаҳам кард, ки гуё шаби 29-уми декабр ба қароргоҳи Владимир Путин дар вилояти Новгород бо паҳпод ҳамла кардаанд.

Доналд Трамп, раисҷумҳури Амрико охири ҳафтаи гузашта гуфт, созиш барои поёни ҳамлаи Русия ба Украина аз ҳамеша наздиктар аст, аммо ҳеч пешрафти мушаххасе дар бораи вогузории қаламрав пас аз гуфтугӯҳои нав бо раҳбарони кишварҳои даргир гузориш нашуд.