Пайвандҳои дастрасӣ

Хабари нав

Вазирони корҳои хориҷии Тоҷикистону Қирғизистон вазъ дар сарҳадро баррасӣ карданд


Сироҷиддин Муҳриддин ва Руслан Казакбаев. Акс аз моҳи ноябри соли 2020
Сироҷиддин Муҳриддин ва Руслан Казакбаев. Акс аз моҳи ноябри соли 2020

Сироҷиддин Муҳриддин ва Руслан Казакбоев, вазирони корҳои хориҷии Тоҷикистону Қирғизистон, рӯзи 29-уми апрел дар робита ба вазъ дар сарҳад гуфтугӯ кардаанд.

Дар Раёсати иттилоот, матбуот, таҳлил ва тарҳрезии сиёсати хориҷии Вазорати корҳои хориҷии Тоҷикистон гуфтанд, мулоқот "бо ташаббуси ҷониби Қирғизистон баргузор гардид".

Ба иттилои манбаъ, "ҷонибҳо зарурати ҳал кардани қазияи мазкурро бо роҳи дипломатӣ - сиёсӣ зикр намуданд. Инчунин, бо супориши раҳбарияти Тоҷикистон низоми оташбас аз ҷониби Тоҷикистон пурра риоя гардида истодааст ва дар наздиктари фурсат дар шаҳри Исфара музокироти байни мақомоти қудратии Ҷумҳурии Тоҷикистон ва Ҷумҳурии Қирғизистон баргузор мегардад".

Дар баёнияи матбуотии Вазорати корҳои хориҷаи Қирғизистон гуфта мешавад, дар пайи якчанд гуфтугӯи вазирони корҳои хориҷаи ду кишвар "дар бораи оташбаси комил аз соати 20:00 ва боз гардониданри нерӯҳои низомӣ ба ҷойҳои пешинаи онҳо мувофиқа ҳосил шудааст". Аммо Вазорати корҳои хориҷаи Тоҷикистон оташбасро тасдиқ карда, дар бораи созише дар мавриди боз гардонидани нерӯҳо ба ҷойи қаблиашон чизе нагуфтааст.

Муноқиша дар марзи Тоҷикистону Қирғизистон рӯзи 28-уми апрел дар наздикии дарғот ё Маркази тақсими об шуруъ шуда, рӯзи 29-уми апрел идома кард.
Сокинон якдигарро ба сангандозӣ ва мақомоти марзбонии ду кишвар якдигарро ба шурӯи тирпарронӣ айбдор карданд.
Аз ду тараф захмиён ҳастанд. Пизишкон гуфтанд, баъзе аз онҳо аз тири силоҳи оташфишон маҷруҳ шудаанд. Вазорати тандурустии Қирғизистон дар бораи фавти яке аз захмиён хабар дод.
Тоҷикистону Қирғизистон 970 километр марз доранд ва танҳо 519 километри онро таъину аломатгузорӣ кардаанд. Боқимонда минтақаҳои баҳсӣ ҳастанд.
Ин вазъ аксар вақт боис ба ихтилофи назар дар истифодаи обу замин дар байни сокинони минтақаҳои наздимарзӣ шуда, баъзан бо маргу захмӣ шудани сокинон меанҷомад.
XS
SM
MD
LG