Дар чанд ҷумла
Тошиев гуфт, Қирғизистон аз Туркия паҳподи "Аксунгур" харид
Як мансабдори баландпояи Қирғизистон хабар дод, ки кишвараш аз Туркия паҳпод ё ҳавопаймои бесарнишини "Аксунгур" харид, аммо шумораашро нагуфт.
Қамчибек Тошиев, раиси Кумитаи давлатии амнияти миллии Қирғизистон, рӯзи 2-юми ноябр дар саҳифааш дар Фейсбук навишт, "акнун "Аксунгур" ҳам аз мост."
Хадамоти марзбонии Қирғизистон соли 2021 аз Туркия ҳавопаймои бесарнишини "Байрактар ТБ-2" (Байрақдор) харида буд.
Ҳукумати Қирғизистон моҳи октябри соли гузашта барои навсозии таҷҳизоти низомӣ, бахусус харидани бесарнишинҳо аз Русия ва Туркия, 100 миллион доллар ҷудо кард.
Мақомоти ин кишвари ҳамсояи Тоҷикистон гуфта буданд, бесарнишинҳо барои таъмини амнияти дифоӣ ва муҳофизати сарҳад истифода хоҳанд шуд.
Мақомоти амниятӣ ва умури хориҷии Тоҷикистон батакрор аз корбурди паҳпод ё бесарнишинҳои тавлиди Туркия зидди аҳолии осоишта ва иншооти мулкии кишвари худ дар марз хабар додаанд. Тарафи Қирғизистон ин маълумотро рад ё тасдиқ накардааст.
Тоҷикистону Қирғизистон солҳо боз барои таъин ва нишонагузории марз ҷанҷол доранд. Аз тақрибан ҳазор километр сарҳади ду кишвар бахше аз он номуайян аст. Дар даргирии рӯзҳои 14-17-уми сентябри имсол аз ду тараф даҳҳо кас кушта ва садҳо нафар захмӣ шуданд.
Ҳамаи хабарҳои имрӯзро дар инҷо бихонед
Чанд таркиш дар ғарби Бандар Аббос
Расонаҳои Эрон аз шунида шудани садои чанд таркиш дар ғарби Бандар Аббос хабар доданд.
Радиои Фардо, бахши форсии Радиои Озодӣ, ба нақл аз хабаргузории “Тасним” (наздик ба Сипоҳи посдорони инқилоби исломӣ) навишт, мардуми Бушеҳр ва Чағодак низ садои чанд инфиҷорро шуниданд.
Маҳалли дақиқ ва ҷузъиёти таркишҳо ҳанӯз маълум нест.
Ин дар ҳолест, ки шаби гузашта артиши Амрико дар рафти амалиёте, ки ба гуфтаи Фармондеҳии марказии Амрико панҷ соат тӯл кашид, ба ҳадафҳое дар гӯшаҳои мухталифи Эрон, аз ҷумла Бушеҳр, Чобаҳор, Чосак, Абумӯсо ва Бандар Аббос ҳамла кардаанд.
Дар ҳамин ҳол, президенти Амрико Доналд Трамп гуфт, бо сабаби вайрон шудани шарти оташбас аз тарафи Эрон дигар ёддошти тафоҳум амал намекунад.
Э.Раҳмон хоҳони бозбинии низоми назорат дар маҳбасҳо шуд
Раисҷумҳури Тоҷикистон аз қонуншикании баъзе кормандони Сарраёсати иҷрои ҷазо, ниҳоди нозир бар зиндонҳо, изҳори нигаронӣ карда, гуфтааст, ин корҳо боиси поймол шудани ҳуқуқи маҳбусон мешавад.
Эмомалӣ Раҳмон 14-уми июл дар ифтитоҳи бинои нави Вазорати адлия дар Душанбе гуфт, "ҳолатҳои вайрон кардани талаботи қонунгузорӣ, содир намудани ҷиноят ва дигар қонунвайронкуниҳо аз ҷониби кормандони сарраёсат", ки боиси нақзи ҳуқуқи боздоштшудагон ва зиндониён мегардад, "ҳоло ҳам ҷой доранд". Аммо ӯ ҳеч омор пешниҳод накард ва ягон намуна ҳам наовард.
Президенти Тоҷикистон хоҳони бозбинии пурраи низоми назорати дохилии маҳбасҳо шуд.
Дар Тоҷикистон 19 боздоштгоҳ ва зиндон ҳаст. Мақомоти Тоҷикистон дар суҳбатҳои худ аз беҳтар шудани шароити боздоштгоҳу зиндонҳо суҳбат мекунанд, аммо созмонҳои ҳомии ҳуқуқ ва наздикони зиндониён борҳо аз шароити нохуб ва ҷой доштани ҳолатҳои шиканҷа дар зиндонҳо нигаронӣ кардаанд.
Пайвандони Маҳмадалӣ Ҳайит ва Саидумар Ҳусайнӣ, муовинони зиндонии раиси Ҳизби дар Тоҷикистон мамнӯи наҳзати исломӣ, моҳи июн ва июли имсол аз шиканҷа шудан ва фишори равонӣ ба онҳо нигаронӣ карданд. Мақомот ба ин гузориш вокунише нишон надоданд.
Департаменти давлатӣ ё Вазорати корҳои хориҷии Амрико дар соли 2024 "аз ҳад зиёд будани зиндониҳоро дар маҳбасҳои Тоҷикистон" мушкили ҷиддӣ номид.
Мақомоти Тоҷикистон гуфтанд, бар асоси қонуни афв дар ҳафтаҳои охир ҳазорҳо зиндониро озод кардаанд. Қонуни нави афв 16-уми июни имсол имзо ва нисбат ба 18 ҳазор нафар, аз ҷумла зиндониён татбиқ хоҳад шуд.
Эмомалӣ Раҳмон рӯзи 14-уми июл аз мақомот хостааст, дар вақти иҷрои қонуни афв “ба омилҳои коррупсионӣ роҳ надиҳанд”. Соли 2019 ва баъди қабули қонуни афв, ки 20 ҳазор нафарро фаро гирифта буд, иддае аз вуҷуди мавридҳои фасод шикоят доштанд.
Боздошти 191 тоҷикистонӣ барои қочоқи маводи мухаддир
Дар нимаи аввали соли равон, 191 шаҳрванди Тоҷикистон бо иттиҳоми қочоқи маводи мухаддир дар хориҷи кишвар дастгир шудаанд. Ҳашт нафар аз инҳо зан будаанд. Ин омор 13-уми июл дар нишасти Оҷонсии назорати маводи нашъаовар садо дод.
Ба қавли манбаъ, аз ин 191 тоҷикистонӣ, 156 нафарашон дар Русия, 12 кас дар Узбекистон, 19 тан дар Қазоқистон ва боқимонда дар Белорус ва Қирғизистон дастгир шудаанд.
Ба омори расмӣ, аз ин шаҳрвандони Тоҷикистон дар умум 35 кг маводи мухаддир мусодира шудааст.
Назари афроди боздоштшуда ва наздиконаш ба қазия маълум нест. Расонаҳои Русия ҳар чанд вақт аз боздошти шаҳрвандони Тоҷикистон бо иттиҳоми қочоқи маводи мухаддир хабар медиҳанд.
Баъзе аз муҳоҷирон, аз ҷумла таксирон ва хаткашонҳо мегӯянд, қурбони туҳмат мешаванд, чун намедонанд дар дохили боре, ки мебаранд чӣ аст.
Амрико муҳосираи дарёии Эронро барқарор кард
Президенти Амрико Доналд Трамп аз барқарор шудани муҳосираи дарёии Эрон дар тангӣ ё гулӯгоҳи Ҳурмуз хабар дод.
Трамп дар шабакаи иҷтимоиаш Truth Social навишт, муҳосираи дарёӣ танҳо ба киштиҳои эронӣ дахл дорад ва киштиҳои дигар кишварҳо метавонанд озодона аз тангаи Ҳурмуз гузаранд.
Дар ҳамин ҳол раиси ҷумҳури Амрико мегӯяд, Вашингтон барои таъмини амнияти киштиронии байналмилалӣ аз киштиҳо маблағ мегирад. Ҳаҷми ин маблағ баробар ба 20 дарсади бори интиқолшуда будааст.
Ба гуфтаи Трамп, Иёлоти Муттаҳида дигар ният надорад амнияти яке аз муҳимтарин масирҳои баҳрии тиҷоратии ҷаҳонро ройгон таъмин кунад.
Гулӯгоҳи Ҳурмуз яке аз муҳимтарин масирҳои тиҷорати ҷаҳонии нафт ба ҳисоб меравад ва қаблан 20 дарсад нафти ҷаҳон аз ин масир мегузашт. Баъди ҳамлаи Амрико ва Исроил ба Эрон дар таърихи 28 феврал, Эрон равуо аз гулугоҳи Ҳурмузро баст.
Боз шудани гулӯгоҳи Ҳурмуз яке аз бандҳои асосии ёддошти тафоҳум буд, ки моҳи июн миёни Вашингтон ва Теҳрон ба имзо расид. Дар аввали моҳи июл Трамп изҳор дошт, ки оташбас бо Эрон амалан ба поён расидааст. Пас аз ин, Эрон бори дигар аз баста шудани гулӯгоҳи Ҳурмуз хабар дод.
Сели харобиовар дар Айнӣ, Деваштич ва Панҷакент
Дар се рӯзи охир дастикам ду бор селу ярч чанд хона ва иншооти шаҳру навоҳии вилояти Суғдро вайрон кард. Ба гуфтаи мақомот, офати табиӣ асосан дар ноҳияҳои Айнию Деваштич ва шаҳри Панҷакент ба қайд гирифта шудаанд.
Аз ҷумла рӯзҳои 11 ва 12-уми июл сел ба хонаи сокинони деҳаҳои Дарғ ва Каздони ноҳияи Айнӣ зарар расонд. Дар ин офати табиӣ ҳамчунин роҳҳо, хатҳои об, боғҳо, заминҳои кишт, 11 мошини сабукрав, гирду атрофи мактаби деҳаи Каздон ва беморхонаи минтақавии деҳаи Дарғ осеб диданд.
Мақомот гуфтанд, ин ҳодиса талафоти ҷонӣ дар пай надошт.
Ҳукумати ноҳияи Айнӣ дар шабакаи Фейсбук навишт, барои бартараф кардани пайомадҳои офати табиӣ ситод ташкил шудааст.
Инчунин дар рӯзҳои 11-12 июл ба чанд деҳаи ҷамоати Шинги шаҳри Панҷакент низ селу ярч фаромада зиёни ҷиддӣ расондааст.
Чанд деҳаи ноҳияи Деваштич низ дар пайи омадани сел зарар дидаанд. Феълан дар бораи андозаи хисорот маълумоти расмӣ дар даст нест.
Дар шабакаҳои иҷтимоӣ наворҳо вобаста ба дархости кӯмак аз ҷониби корбарон ва блогерон роҳандозӣ шудааст.
Селу обхезӣ, ки баҳори имсол дар Тоҷикистон бисёр зиёд мушоҳида шуд, фақат дар моҳи май камаш 4 нафарро дар шаҳрҳои Кӯлоб ва Турсунзода ҳалок кард ва панҷ каси дигарро захмӣ шуданд.
Видеоро инҷо бинед:
"Кӯҳпора чаппа шуд." Ҳалокати чор наврас дар Нуробод
Дар пайи чаппа шудани кӯҳпора дар ноҳияи Нуробод чор наврас ҷон бохтаанд.
Як каси дигар захмист.
Ҳодиса шоми 11-уми июл дар ҷамоати Муҷихарф рух додааст.
Як манбаъ дар ҳукумати ноҳияи Нуробод 13-юми июл ба Радиои Озодӣ гуфт, "онҳо барои ҷустуҷӯйи чорво ба кӯҳ рафта буданд. Ҳамон вақт як қисми кӯҳ канда шудааст."
Ба гуфтаи ин манбаъ, ки нахост номаш навишта шавад, се наврас дар ҷойи ҳодиса ба ҳалокат расида, як кас дар шифохона ҷон додааст.
Ду нафар аз ҷонбохтагон 10 ва 11-сола будаанд.
Ҷузъиёти дигари ҳодиса маълум нест. Мақомот қазияро расман шарҳ надоданд.
Дар се рӯзи охир Тоҷикистон шоҳиди боронҳои сахт ва омадани сел буд. Аз ҷумла, бар асари омадани сел даҳҳо хона ва роҳу пулҳо дар ноҳияи Айнӣ ва шаҳри Панҷакент зарар диданд.
160 ҳазор муҳоҷири тоҷик дар Русия "зери назорат" будаанд
160 ҳазор шаҳрванди Тоҷикистон дар рӯйхати "муҳоҷирони зери назорат" дар Русия қарор доштаанд. Ба онҳо хатари ронда шудан ё депортатсия аз ин кишвар таҳдид мекунад.
Шариф Норзода, муовини якуми вазири кору муҳоҷирати Тоҷикистон, 13-уми июл дар нишасти матбуотӣ гуфт, "аз ин теъдод 25 ҳазор танро ноболиғон ташкил медиҳанд, ки бо аъзои дигари оила дар Русия ҳастанд".
Владимир Колоколтсев, вазири корҳои дохилии Русия, моҳи марти соли 2025 гуфт, ниҳоди зери раҳбарии ӯ 685 ҳазор хориҷиро ба рӯйхати "шахсони зери назорат" ворид кардааст.
Мақомоти тоҷик он замон гуфта буданд, ки 120 ҳазор шаҳрванди Тоҷикистон дар рӯйхати ба истилоҳ "сиёҳ" дар Русия ҳастанд ва агар ҳуҷҷату ҳузурашонро қонунӣ нагардонанд, ронда хоҳанд шуд.
Феҳрасти "шахсони зери назорат" дар пайи ворид шудани дигаргунӣ ба қонунҳои Русия аз 5-уми феврали соли гузашта ба иҷро даромадааст.
Дар ҳамин ҳол, намояндагони Вазорати кору муҳоҷират рӯзи 13-уми июл аз пешниҳоди омор дар бораи муҳоҷирони ихроҷшуда аз Русия худдорӣ карданд.
Шариф Норзода танҳо гуфт, дар шаш моҳи имсол 10 ҳазору 700 муҳоҷиреро, ки аз Русия ихроҷ шудаанд ва ҳаққи сафар ба ин кишварро надоранд, бо кор таъмин кардаанд.
Мақомоти Русия теъдоди муҳоҷирони тоҷикро дар ин кишвар зиёда аз як миллион нафар шумурдаанд. Вазорати меҳнату муҳоҷирати Тоҷикистон ду сол боз теъдоди муҳоҷирони тоҷикро дар Русия пинҳон медорад.
Чаро мақомоти Тоҷикистон омори тобути муҳоҷиронро намегӯянд?
Роҳбарони ду ниҳоди давлатии Тоҷикистон аз гуфтани омори интиқоли тобутҳо аз Русия ва кишварҳои дигар ба Душанбе худдорӣ карданд.
Хабарнигорон рӯзи 13-уми июл аз вазири кору муҳоҷират пурсиданд, ки дар нимаи аввали имсол пайкар ё ҷасади чанд нафар аз хориҷа ба Тоҷикистон оварда шудааст.
Намояндагони вазорат аз посух додан ба ин суол худдорӣ карда, гуфтанд, "масъаларо мақомоти ҳифзи ҳуқуқ пеш мебаранд". Дар ҳоле ки қаблан Хадамоти муҳоҷират, як ниҳоди зери итоати Вазорати меҳнат, ин оморро эълон мекард.
Ҳабибулло Назарзода, раиси Оҷонси ҳавонавардии Тоҷикистон, рӯзи 8-уми июл аз гуфтани омори овардани тобут аз тариқи фурудгоҳҳои кишвар худдорӣ кард.
Соли 2025 танҳо ба воситаи фурудгоҳҳои Душанбе ва Кӯлоб 1623 тобути шаҳрвандони Тоҷикистонро аз Русия ба ватан оварда буданд.
Омори овардани тобут ба Тоҷикистон то оғози ҷанги Русия алайҳи Украина ҳамеша дастрас буд.
Давоми чоруним соли ҷанг хабарҳо аз кушта шудани даҳҳо тоҷикистонӣ дар Украина ва интиқоли ҷасади онҳо ба ватан расонаӣ шуд. Мақомоти Тоҷикистон дар ин мавзуъ эҳтиёткоранд ва зиёд суҳбат намекунанд.
Линдси Граҳам, сенатори таъсиргузори ҷумҳурихоҳ даргузашт
Линдси Граҳам, сенатори шинохташудаи ҷумҳурихоҳ дар ИМА, дар 71-солагӣ фавтидааст. Саҳифаи расмии вай дар шабакаи иҷтимоии Х (Твиттери собиқ) хабар дод, Граҳам шомгоҳи рӯзи шанбе, 11 июл “аз як бемории ногаҳонӣ” вафот кардааст.
Линдси Граҳам, ки ба унвони яке аз чеҳраҳои аслии сиёсии Амрико шинохта мешуд, беш аз 30 сол дар арсаи сиёсат фаъолият кардааст.
Ӯ аввалин бор дар соли 1992 ба унвони узви маҷлиси намояндагон вориди сиёсати Иёлоти Муттаҳида шуд. Грамаҳ соли 2003 сенатор интихоб ва беш аз 20 сол дар маҷлиси Сенат фаъолият дошт.
Линдси Граҳам, сенатори ҷумҳурихоҳи наздик ба Доналд Трамп, президенти ИМА, дар охирин изҳори назари худ дар бораи Эрон дар вокуниш ба созиши Эрону Амрико бар сари бозгушоии тангаи Ҳурмуз нисбат ба коҳиши таҳримҳо алайҳи Эрон ҳушдор дода буд.
Вай дар саҳифаи корбарии худ дар шабакаи иҷтимоии Х навишт: “Ман комилан итминон дорам, ки раисҷумҳур Трамп иҷоза нахоҳад дод, Эрон даҳҳо миллиард доллар ба даст оварад, то ҷаҳонро гаравгон бигирад ва дар минтақа ҳарҷумарҷ эҷод кунад”.
Талоши ширкати чинӣ барои ёфтани нафту газ дар Тоҷикистон
Мақомоти Тоҷикистон мегӯянд, "CNPC" ё ширкати миллии нафту гази Чин, натиҷаи корҳои саҳроии худро дар Тоҷикистон ҷамъбаст мекунад. Ин ширкати чинӣ дар чанд минтақаи вилояти Хатлон нафту газ меҷӯяд.
Намояндагони Вазорати энергетика ва захираҳои об 10-уми июл гуфтанд, дар нимаи аввали имсол ҳамкорӣ бо ин ширкати чинӣ "дар самти ҷустуҷӯ, иктишоф, истихроҷ ва кашфи конҳои нафту газ идома дода шуд."
Мақомот бидуни овардани ҷузъиёти бештар гуфтанд, "ширкат ба ҷамъбасти натиҷаҳои корҳои саҳроӣ ва интерпретатсия (таҳлили маълумот) машғул мебошад".
Пештар намояндагони Идораи геологияи Тоҷикистон гуфта буданд, ба ширкати CNPC парвона ё иҷозаномаи кор то соли 2033 дода шудааст. Бар асоси ин санад, ширкат ҳақ дорад дар 57 майдон дар ҷануб-ғарби Тоҷикистон нафту газ ҷустуҷӯ кунад.
Тибқи омори Саридораи геология, дар Тоҷикистон беш аз 2 миллион тонна захираи нафт ва 3,4 миллиард метри мукааб газ муайян шудааст.
Талошҳо барои пайдо ва истихроҷи нафту гази Тоҷикистон камҳосил будаанд. Аз ҷумла, ширкатҳои "Газпромнефт", "Total" ва "Тетрис Петролиум" талош карданд, ки дар Тоҷикистон нафту газ истихроҷ кунанд, аммо дертар аз кишвар рафтанд.
Қарзи аҳолӣ аз барқ 600 миллион сомонӣ кам шудааст
Дар як соли ахир қарзи аҳолии Тоҷикистон аз барқ ҳудуди 600 миллион сомонӣ коҳиш ёфтааст.
Тибқи омори ахир, ки Вазорати энергетика ва захираҳои об 10-уми июл нашр кард, аҳолии Тоҷикистон аз истифодаи барқ 1,1 миллиард сомонӣ қарздор ҳастанд. Як сол пеш қарзи аҳолӣ аз барқ 1,7 миллиард сомонӣ эълон шуда буд.
Омори мақомот дар бораи қарздории аҳолӣ аз барқ солҳост, ки шубҳаву гумонҳоеро ба миён овардааст.
Хабарнигорон борҳо ин мавзӯъро бо намояндагони ширкати "Барқи тоҷик" баҳс кардаанд. Намояндагони "Шабакаҳои тақсимоти барқ" пештар гуфта буданд, беш аз 1 миллиард сомонӣ, қарзе мебошад, ки солҳои гузашта ҷамъ шудааст. Мустақилона тасдиқ кардани ин ҳарфҳо мушкил аст.
Ба гузориши ахири Вазорати энергетика, баъди аҳолӣ калонтарин қарздор аз барқ "Ширкати Алюминийи Тоҷик" мебошад, ки қарзаш ба 991 миллион сомонӣ расидааст. Як сол пеш қарзи ин корхона аз барқ 718 миллион сомонӣ буд.
Оҷонсии беҳдошти замин ва обёрӣ бо 322 миллион сомонӣ, ташкилоту муассисаҳои буҷетӣ бо 100 миллион ва Корхонаҳои обу корез бо 126,4 миллион сомонӣ, аз қарздорони калон дар назди идораи барқ будаанд.
Таҳлили омори расмӣ нишон медиҳад, ки дар як соли ахир ба ҷуз корхонаҳои буҷетӣ, қарзи Оҷонсии беҳдошти замин ва корхонаи обу корез ба таври назаррас зиёд шудааст.
Кушта шудани 3,5 ҳазор зархариди артиши Русия
Хабарнигорон номи беш аз 3,5 ҳазор хориҷиро муайян кардаанд, ки аз тарафи Русия зидди Украина ҷангида, кушта шудаанд.
Таҳқиқи Би-би-си ва пойгоҳи "Медиазона" нишон дод, ки бештари хориҷиёни ҳалокшуда ё 2304 нафар шаҳрвандони Кореяи Шимолӣ ҳастанд.
Дар ин рӯйхат ҳамчунин номи 1285 нафар аз 40 кишвар зикр шудааст. Аз ҷумла номи 339 қазоқистонӣ, 229 узбекистонӣ, 199 тоҷикистонӣ ва 89 шаҳрванди Қирғизистон ҳам дар миёни кушташудагон ҳастанд.
Дар таҳқиқот омадааст, беш аз нисфи шаҳрвандони Тоҷикистон ва Узбекистон, ки кушта шуданашон тасдиқ шудааст, аз зиндонҳои Русия ба ҷанг бурда шудаанд.
Омори расмии тоҷикон дар ҷанги Русия алайҳи Украина маълум нест. Мақомот дар ин бора ҳеч иттилоъ намедиҳанд, вале дар бештар аз чаҳор соли ҷанг хабари кушта ва нопадид шудани даҳҳо шаҳрванд ва зодаи Тоҷикистон расонаӣ шуд.
Тарҳи давлатии “Зистан мехоҳам” дар Украина дар як соли охир номи зиёда аз се ҳазор зодаи Тоҷикистонро нашр кардааст, ки дар ҷанги Русия бар зидди Украина ширкат карда, бархе кушта ё нопадид шудаанд.
Хабарнигорони Би-би-си ва пойгоҳи “Медиазона” пайваста номи кушташудагон аз тарафи Русияро аниқ мекунанд. Хабарнигорон то ин дам номи 233 ҳазор сарбози фавтида аз тарафи Русияро муайян кардаанд.
Ба маълумоти НАТО, қариб 24 ҳазор хориҷӣ аз 44 кишвар ба артиши Русия ҷалб шуда, зидди Украина меҷанганд. Ин маълумотро ахиран бахши русии Би-би-си дар ҳошияи ҷаласаи сарони кишварҳои узви НАТО дар Анқара нашр кард.
Даҳҳо нафарро аз зиндони Ваҳдат озод кардаанд
Бар асоси қонуни афв 273 зиндонӣ аз маҳбаси шаҳри Ваҳдат озод шудаанд. Ин хабарро 10-уми июл расонаҳои давлатии Тоҷикистон нашр карданд.
Дар гузориши расмӣ, ҷузъиёти бештар дар бораи зиндониёни озодшуда, аз ҷумла иттиҳоми онҳо зикр нашудааст. Гурӯҳе аз сиёсатмадорону мансабдорони собиқ, ки соли 2025 дар доираи парвандаи "табаддуллот" зиндонӣ шудаанд, дар зиндони шаҳри Ваҳдат адои ҷазо мекунанд.
Манобеи огоҳ қаблан ба Радиои Озодӣ гуфта буданд, ин афрод шомили қонуни афв нашуданд, чун дар парвандаашон банди 306-и Кодекси ҷиноӣ ё талоши ғасби қудрат ҷой дорад.
Қонуни нави афв дар Тоҷикистон, ки 16-уми июни имсол имзо шуд ва ба иҷро даромад, нисбат ба 18 ҳазор нафар, аз ҷумла зиндониён ва онҳое, ки парвандаашон дар ҳоли баррасист, татбиқ хоҳад шуд.
То кунун беш аз чаҳор ҳазор нафар, аз ҷумла қариб сесад зан аз зиндонҳои Тоҷикистон озод карда шудаанд.
Вокуниши Вазири маориф ба латукӯби омӯзгор
Вазири маориф ва илми Тоҷикистон ба танқидҳо дар бораи ҳимоя накардан аз ҳуқуқи омӯзгор Муҳимҷон Раҳмонов посух дод.
Раҳим Саидзода 10-уми июл дар посух ба суоли хабарнигори Радиои Озодӣ гуфт, омӯзгор Муҳимҷон Раҳмонов "нисбати хонанда аз таҳқир истифода бурдааст ва ин исбот ва алайҳаш чораҷӯйӣ шуд".
Ба гуфтаи Саидзода, намояндагони Иттифоқи касаба дар мурофиаи додгоҳӣ ширкат карданд.
Муҳимҷон Раҳмонов, омӯзгор аз ноҳияи Нуробод пештар шикоят кард, ки рӯзи 8-уми май бародари як хонанда ӯро задааст. Додгоҳ 3-юми июн омӯзгорро дар иҷро накардани ӯҳдадорӣ дар мавриди таълиму тарбияи кӯдак, гунаҳор карда, 1560 сомонӣ ҷарима баст. Фарде, ки ба латукӯби омӯзгор муттаҳам мешуд, барои майдаавбошӣ ба панҷ шабонарӯз ҳабс маҳкум шуд.
Баъди содир шудани ҳукм омӯзгор гуфт, аз ин қарор розӣ нест ва аз кор дар мактаб даст мекашад. Ин мавзуъ дар шабакаҳои иҷтимоӣ вокунишҳои зиёдеро ба миён овард.
Се хешованди зиндонии Саид Абдуллоҳи Нуриро озод кардаанд
Нурулло Саидов – бародар, Муҳибулло Нуриддинов ва Нусратулло Саидов – бародарзодаҳои Саид Абдуллоҳи Нурӣ, раҳбари пешини Иттиҳоди нерӯҳои мухолифини тоҷикро аз зиндон озод кардаанд.
Ҳарсеи онҳо соли 2022 бо ҷурмҳои гуногун, аз ҷумла барои гирифтани пул аз намояндагони мухолифон, ки мақомот ғайриқонунӣ медонанд, аз панҷ то панҷуним сол аз озодӣ маҳрум шуда буданд. Чизе, ки Муҳаммадҷони Нурӣ, писари Саид Абдуллоҳи Нурӣ, соли 2022 “қасосгирӣ” номид.
Дар ҳоле мақомот дар бораи озодии се хешованди Саид Абдуллоҳи Нурӣ ягон шарҳ намедиҳанд, як манбаи огоҳи Радиои Озодӣ рӯзи 10-уми июл гуфт, "нисбат ба онҳо қонуни нави афв татбиқ шуд".
Абдусаттор Бобоев, раиси Кумитаи шаҳрвандии наҷоти гаравгонон, қароргоҳаш дар Лаҳистон (Полша), ки бо шахсони наздик ба хонаводаи зиндониён дар Тоҷикистон дар тамос будааст, рӯзи 10-уми июл хабарро тасдиқ кард.
Вай гуфт, ба иттилои ёфтаи онҳо, Муҳибулло Нуриддинов ва Нусратулло Саидови 67-сола рӯзи ҷумъа аз маҳбаси Хуҷанд озод шуда, "дар роҳ ба тарафи вилояти Хатлон ҳастанд".
"Нурулло Саидов, додарзодаи дигари Саид Абдуллоҳи Нурӣ, аз маҳбаси "Якум Советский” дар Душанбе баромад," – афзуд ӯ.
Қонуни нави афв дар Тоҷикистон, ки 16-уми июни имсол имзо шуд ва ба иҷро даромад, нисбат ба 18 ҳазор нафар, аз ҷумла зиндониён ва онҳое, ки парвандаашон дар ҳоли баррасист, татбиқ хоҳад шуд.
То кунун беш аз чаҳор ҳазор нафар, аз ҷумла қариб сесад зан аз зиндонҳои Тоҷикистон озод карда шудаанд.
Дар ин миён қонуни афв ба баъзе аз мухолифон, фаъолони маданӣ ва сиёсатмадорони зиндонӣ, ки ба ҷиноятҳое чун хиёнат ба давлат, таҷовуз ба номус ё қаллобӣ ба миқдори махсусан калон айбдор шудаанд, сабукӣ нахоҳад дод. Ҳарчанд ин афрод ҳукми додгоҳро бепоя ва бештар дорои ангезаҳои сиёсӣ медонанд.
Гуфтугӯ