Шерик Карамхудоев, раҳбари пешини намояндагии ҳизби ҳоло дар Тоҷикистон мамнӯи наҳзати исломӣ дар шаҳри Хоруғ, дар зиндон фавтидааст.
Дар ин бора аввал рӯзноманигори мустақил Анора Саркорова рӯзи 30-юми ноябр дар саҳифааш дар Фейсбук хабар дод.
Дертар манбаъҳои Радиои Озодӣ дар Вилояти Мухтори Кӯҳистони Бадахшон тасдиқ карданд, ки Шерик Карамхудоев "ҳамагӣ чанд моҳ пеш аз раҳоияш аз зиндон" ба таври ногаҳонӣ ҷон додааст. Вай дар маҳбаси рақами ҳафт дар шаҳри Душанбе нигоҳ дошта мешуд.
Мақомот ҳанӯз дар ин бора шарҳе надодаанд. Як манбаи огоҳи Радиои Озодӣ рӯзи 30-юми ноябр гуфт, "сабаби расмии маргаш ҳанӯз маълум нест. Чанде пеш наздикон ба аёдати Шерик Карамхудоев рафта буданд, ягон душворӣ надоштааст. Вай бояд то панҷ-шаш моҳи дигар озод мешуд."
Анора Саркорова бо такя ба манбаъҳои ба гуфтааш боварбахш навишт, ки "Шерик Карамхудоев чанд соат пеш аз марг дучори заъфи ногаҳонӣ, дилбеҳузурии шадид ва қайкунӣ шуд. Бо ин вуҷуд, мақомоти зиндон ба маҳбуси сиёсӣ ёрии пизишкии зарурӣ нарасонданд."
Шерик Карамхудоев соли 2012, дар ҷараёни амалиёти нерӯҳои давлатӣ дар Хоруғ, ки ба дунболи куштори Абдулло Назаров, раиси Идораи амният дар Бадахшон роҳандозӣ шуда буд, боздошт ва дар соли 2013 ба чордаҳ сол зиндон маҳкум гашт.
Мақомот ӯро ба "ташкили гурӯҳи ҷиноӣ", "ширкат дар беназмиҳои оммавӣ", "зӯроварӣ алайҳи намояндаи давлатӣ" ва "ғайриқонунӣ доштани силоҳ" айбдор карданд, аммо Карамхудоев ва наздиконаш иттиҳомҳоро напазируфтанд.
Худаш ба вакилони мудофеъ гуфтааст, ки баъди боздошт мавриди шиканҷа ва латукӯб қарор гирифт. Ҳукми ниҳоӣ низ бе ҳузури вакилони мудофеъ эълон шуд.
Аз аввали имсол дар зиндонҳои Тоҷикистон шаш зодаи Вилояти Мухтори Кӯҳистони Бадахшон, ки созмону расонаҳои мустақил онҳоро зиндониёни сиёсӣ меноманд, ба сабаби нагирифтани муолиҷаи дуруст ва ё шиканҷа фавтидаанд.
Инҳо:
Қулмамад Паллаеви 50-сола ва фаъоли маданӣ аз Рӯшон дар моҳи январ;
Боғшо Имматшоеви 67-сола, яке аз тарафдорони “Гурӯҳи 24” дар моҳи феврал;
Аслан Гулобови 35-сола аз Хоруғ дар моҳи июн;
Музаффар Давлатмирови 61-сола, рӯҳонии шинохта дар моҳи июн;
Эроншо Мамадраҳимови 39-сола дар моҳи июл;
Шерик Карамхудоев, фаъоли сиёсӣ дар моҳи ноябр.
Созмони Дидбони Ҳуқуқи Башар (Human Rights Watch) қаблан аз ҳукумати Тоҷикистон хоста буд, марги фаъолони бадахшониро, ки имсол дар зиндонҳои кишвар фавтидаанд, бе ягон таъхир ва бетарафона таҳқиқ кунад.
Мақомоти Тоҷикистон дар навбати худ ин афродро зиндониёни сиёсӣ намешуморанд ва дар нишастҳои матбуотии тобистони имсол гуфтанд, ки ба ҳамаи зиндониён ёрии тиббӣ саривақт расонида мешавад. Санҷидани дурустии ҳарфҳои онҳо аз дохили зиндон сахт аст.
