Пештар намояндагони Идораи ободонии шаҳри Хуҷанд гуфта буданд, ки ба эҳтимоли зиёд аксари дарахтон дар охири фасли тобистон дигарбора месабзанд ва нашъунамо меёбанд. Вале баръакси интизориҳо сабзу шукуфо нагаштанд.
Ин дарахтонро баҳори имсол дар остонаи сафари раҳбарони Тоҷикистон, Қирғизистон ва Узбекистона шинонида буданд, вале баъди муддати кутоҳ зарду пажмурда шуданд. Он вақт намояндагони шаҳр мегуфтанд, ки ин дарахтҳо дар фасли тобистон дигарбора сабз хоҳанд шуд.
Яке аз масъалаҳои мавриди баҳси рӯзноманигорон дар нишасти хабарии Сарраёсати ҳифзи муҳити зист ҳамин буд. Ба гуфтаи масъулони ин ниҳод, сабаби насабзидани дарахтони ороишии хориҷӣ, тағйирёбии иқлим ва аз меъёр зиёд гарм шудани ҳаво будааст.
Сӯҳроб Холзода, раҳбари ин ниҳод гуфт, ки дарахтони магнолия бидуни мувофиқат бо мутахассисони ҳифзи муҳити зист, дар шаҳри Хуҷанд шинонида шудаанд.
"Тибқи хулосаи мутахассисони Сарраёсати ҳифзи муҳити зист, сабаб, нодуруст шинонидани дарахт ба тарзи ҳашар, яъне риоя нагардидани тарзи дурусти шинонидани дарахт ва бо об таъмин нагардидан аст. Вақте ин масъаларо мутахассисони Сарраёсат дида баромаданд, ягон ҳуҷҷати тасдиқкунандаи манбаи харидорӣ нишон дода нашудааст ва аз тарафи соҳибкорон ҳамчун тӯҳфа ба вилоят ворид шудаанд",-афзуд-Сӯҳроб Холзода. Ба гуфтаи Холзода, миқдори умумии дарахтони хушкшуда, дар моҳҳои сентябр ва октябр маълум мегардад.
Дар ҳамин ҳол, масъулони Идораи ободонии шаҳр мегӯянд, ки на ҳама дарахтон хушкидаанд.
Саидҷон Маъруфов, cардори Идораи ободонии Хуҷанд: "Он дарахтони магнолияро, ки соҳибкорон аз кишварҳои хориҷа оварда буданд ва мо тибқи қоидаҳои агротехникӣ шинонида будем, қисман хушк шуд. Ҳоло 60-70 дарсадаш гирифтагӣ аст. Ба ҷойи хушкшудаҳояш аз нав мешинонем. Аз он сабаб, ки аз дигар шаҳр омадааст, климаташро нав кардааст, мутобиқ карда мешавад".
Тақрибан сесад дарахти магнолияро моҳи марти имсол аз Италия ба Хуҷанд оварданд ва дар рӯзҳои омодагӣ ба сафари раҳбарони Тоҷикистону Қирғизистон ва Узбекистон дар маркази вилояти Суғд шинонданд.
Боғпарварон мегӯянд, дарахтоне, ки аз кишвари дигар оварда мешаванд, бояд ба муҳит мутобиқ карда шаванд.
Аввалин дарахтони магнолияро зиёда аз даҳ сол пеш дар пойтахти Тоҷикистон шинонида буданд. Он замон нархи ин ниҳолҳо дар байни сокинону меҳмонон баҳсҳоеро ба миён оварда буд ва гуфта мешуд, ки арзиши онҳо ба даҳҳо ҳазор сомонӣ мерасад.
Ҳоло низ чунин баҳс вуҷуд дорад, чун роҳ аз Италия то Хуҷанд дур аст ва ҳамлу нақли бор ҳам арзону осон нест. Намояндагони ҳукумат мегӯянд, дарахтони магнолияро соҳибкорони маҳаллӣ оварданд, вале нархи онҳоро ошкор намекунанд.
Гуфтугӯ