Як миллиону ҳафтсад ҳазор нусха. Бузургтарин нашри "Шоҳнома"-и Абулқосим Фирдавсӣ. Ин теъдод китоб шаҳр ба шаҳр ва русто ба рустои Тоҷикистон ба ҳар хонавода ройгон дода мешавад. Маросими тақсими дуҷилдаи "Шоҳнома" аз Вилояти Мухтори Кӯҳистони Бадахшон оғоз шуд ва ҳоло ба ноҳияи Файзобод расидааст.
Ҷунайдулло Каримзода, муовини раиси ноҳияи Файзобод, гуфт, ба ноҳияи онҳо 16 ҳазору 56 ҷуфт рост омад. "Китобҳо дар 9 ҷамоат хона ба хона тақсим мешаванд ва бошандагони ноҳия дар санади қабул имзо мегузоранд," – афзуд ӯ.
Ҳарчанд дар шабакаҳои иҷтимоӣ баъзе аз корбарон нашру тақсими "Шоҳнома"-ро аз сӯи раисҷумҳури Тоҷикистон як кори таблиғотӣ ба манфиати худ номидаанд, бархе бошандагони Файзобод онро барои худшиносии мардум муҳим мешуморанд. "Ин кор имкон медиҳад, ки ҳамаи мардум бо ин асари ҳувиятсоз дастрасӣ пайдо кунанд ва аз гузаштаи пурифтихори худ бохабар шаванд," -- андеша дорад Амруллоҳ Мусоев, сокини ноҳияи Файзобод.
Нусхаи комил?
Нусхае, ки ҳоло нашр шудаву тақсим мешавад, бар пояи нусхаест, ки замони шӯравӣ бо ҳуруфи сириллик дар Тоҷикистон таҳия шуда буд. Ҳоло пеш аз чоп дар чанд донишгоҳи Тоҷикистон ва пажӯҳишгоҳҳои Академияи улум бар асоси нусхаҳо ва нашрҳои муътабари "Шоҳнома" такмил дидааст.
Адабиётшинос Мубашшир Акбарзод, ки беш аз як сол намунаи охирини ин нашрро бо нусхаҳои чопи Маскаву Теҳрону Аврупо муқоиса ва такмил кардааст, онро дар ҳоли ҳозир мукаммалтарин ва дақиқтарин нусхаи “Шоҳнома” дар ҷаҳон мешуморад.
"Мо ин корро аввал шуруъ кардем, дар муқоиса бо охирин чопи Холиқии Мутлақ дар Теҳрон. Сипас ба баъзе омилҳо баргаштем ба чопи Жул Мул ва чопи Маскав. Чопи Маскав солҳои 60-ум сурат гирифта буд ва нисбат ба чопи Холиқӣ комилтар аст. Баъзе байтҳо дар чопи Холиқӣ ба кадом сабабе фурӯгузор шуда. Ба сабабе, ки матни комил бояд ба ҷомеа пешниҳод мешуд, мо рӯ овардем ба чопи Жул Мул ва чопи Маскав," -- мегӯяд Акбарзод.
Кадканӣ: "Ёрие ба густариши забону хатти русӣ"
Ба чунин шева нашр ва тақсим шудани “Шоҳнома” дар Тоҷикистон истиқболи гарме дар миёни форсзабонон, аз ҷумла сокинони Эрону Афғонистон дошт. Раҳматуллоҳ Бежанпур, фарҳангшиноси афғонистонии муқими Аврупо, бар ин аст, ки “Шоҳнома” шоҳасари ҳувиятии ҳамаи форсзабонҳост ва дар ҳар ҷойе нашр шавад, барои шинохти бештари гузаштаи меросбарони он асаргузор хоҳад буд.
Ӯ афзуд: “Бовар дорам, иқдоми пасини Тоҷикистон, ки аз ҳар ҷиҳате сазовори таҳсин аст, дар ояндасозии мо, дар ҳувияти мо, дар боварсозии мо ва дар муаррифӣ ва шинохти мардум аз “Шоҳнома” ба вусъати бузургии худи ин асар нақш дорад”. Аз назари ин донишманд, “Фирдавсӣ тамоми умри худро барои он сарф кард, ки “Шоҳнома”-ро ба вуҷуд биёрад. Ҳоло “Шоҳнома” тамоми таърихро балъида, то ин ки моро ҳифз кунад ва мо бояд “Шоҳнома”-ро ҳифз кунем.”
Аммо Шафеии Кадканӣ, шоир ва донишманди маъруфи эронӣ чопи “Шоҳнома”-ро бо ҳуруфи сириллик дар наворе дар шабакаҳои иҷтимоӣ ёрие ба густариши забони русӣ донист ва ҳадс зад, ки “ин тавсеаи забону хатти русӣ аст, бо баҳонаи он ки мо мехоҳем фарҳанги миллии шуморо тақвият диҳем”.
Гузориши видеоӣ дар инҷост:
Дар пайи нашри ин асар, дар Тоҷикистон озмуни сартосарии шоҳномахонӣ эълон шуд, ки онро мақомдорон як нақше барои густариши худшиносӣ ва ҳувияти миллии мардуми Тоҷикистон медонанд.
Дар шабкаҳои иҷтимоӣ ин ақида низ баён мешавад, ки бо коҳиши сатҳи фарҳанг ва афзоиши мушкилоти иқтисодию иҷтимоӣ майли мардум ба китобхонӣ хеле кам шудааст ва бе беҳбуди бунёдии зиндагии одамон онҳоро маҷбуран китобхон кардан мушкил аст. Мухолифони ин ақида мегӯянд, бо вуҷуди ин тақсими ройгони китоб то ҷое ба ислоҳи вазъ кумак кардаву хоҳад кард. Пеш аз ин китоби “Тоҷикон”-и академик Бобоҷон Ғафуров бо чунин шева нашру паҳн шуда буд. Ҳоло маълум нест, китоби навбатии миллионӣ барои тақсими ройгон кадом хоҳад буд.
