Пайвандҳои дастрасӣ

Хабари нав

Хабарҳо

Интернет ба замин. SpaceX 60 моҳвораро ба кайҳон бурд

Мушаки борбари Falcon 9-и ширкати SpaceX субҳи 24 май 60 моҳвораи хурди тарҳи Starlink-ро ба кайҳон бурд. Ин моҳвораҳо барои ташкили шабакаи ҷаҳонии интернет пешбинӣ шудаанд.

Ҳамаи онҳо ба интернет вайваст ҳастанд. Дар ин бора молики ширкати SpaceX Илон Маск хабар дод. Партоби мушак аз космодроми Канаверали аёлати Флорида сурат гирифт.

Парвози мушак тариқи шабакаи SpaceX дар YouTube нишон дода шуд.​

Ин дар ҳолест, ки партоби мушак ду дафъа ба таъхир гузошта шуда буд. Ибтидо мебоист, рӯзи 16-уми май маҳвораҳо ба кайҳон бурда шаванд, аммо бори аввал ба далели ҳавои номусоид ва бори дувум ба далели санҷиши дастгоҳҳо партоб сурат нагирифт.

Тарҳи Starlink, ки соли 2015 таҳия шудааст, барои таъмини тамоми кураи замин бо интернети боэътимоду баландсуръат пешбинӣ гардидааст. Ду моҳвораи санҷишӣ моҳи феврали соли 2018 мувафаққона ба кор дароварда шуданд.

Илон Маск тасмим дорад, давоми чанд соли оянда чанд ҳазор мушакро ба кайҳон барорад. Харҷи ин тарҳ 10 миллиард доллар ҳисоб шудааст.

Ҳамаи хабарҳои имрӯзро дар инҷо бихонед

Меҳмонхонаи Hilton дар Душанбе фаъолияташро муваққатан қатъ кард

Меҳмонхонаи "Hilton"-и Душанбе бо нашри баёнияе иттилоъ дод, ки фаъолияташро ба таври муваққатӣ қатъ мекунад. Ин меҳмонхонаи 5-ситорадори Душанбе тасмимашро ба паҳншавии коронавирус дар ҷаҳон, қатъ шудани парвозҳо ва коҳиши муштариҳо рабт дод.

Мудири кулли Hilton дар саҳифаи расмии меҳмонхона дар Фейсбук навишт, аз 1-уми апрел фаъолияти меҳмонхонаро муваққатан бозмедоранд ва талабу дархостҳоро барои баргузории чорабиниҳо ва иҷораи утоқҳо намепазиранд.

Ин меҳмонхона ҳамзамон эълон накардааст, ки фаъолияти худро дигарбора кай аз сар мегирад.Павел Йиндра, менеҷери кулли Hilton Dushanbe дар ин паём навиштааст, дигаргуниҳо роҷеъ ба паҳншавии коронавирус ва оғози дигарбораи парвозҳоро аз наздик пайгирӣ мекунанд ва дар ҳолати тағйири вазъ, муштариёнашонро огоҳ месозанд.

Меҳмонхонаи панҷситорадори "Hilton" дар моҳи сентябри соли 2014 мавриди истифода қарор дода шуд. Дар оғоз он "Шератон" ном дошт ва бо харҷи 275 миллион сомонӣ ё ҳудуди 55 миллион доллар аз сӯи ширкати хусусии СИ ЕЙ ЧЕЛ-и Ҳиндустон бунёд шуд.

Ин меҳмонхонаи 15-табақа дорои 148 утоқ буда, барои қабули ҳатто меҳмонони сатҳи баланд низ пешбинӣ шудааст. Меҳмонхона дорои толорҳои маҷлису гуфтушунид, ду тарабхона ва толорҳои варзишӣ мебошад.

Аз ин пеш, меҳмонхонаи "Ҳаят реҷенсӣ" дар Душанбе дар вебсайти худ гуфта буд, ки дар фаъолияти худ маҳдудиятҳоеро роҳандозӣ кардааст. Ба гуфтаи намояндагони меҳмонхона, камбуди сайёҳон онҳоро водор кардааст, ки ба чунин иқдом даст зананд. Вале манбаъ афзудааст, ки роҳбарияти меҳмонхона тасмим гирифтааст, ки фаъолиятро пурра қатъ накунанд ва ба бозсозии биноҳо машғул шаванд.

Ширкатҳои ҳавопаймоии Тоҷикистон – "Сомон Эйр" ва "Тоҷик Эйр" ва чаҳор фурудгоҳи байналмиллалии кишвар низ бархе аз кормандони худро ба рухсатии бемузд фиристодаанд.

Куштори 28 сарбоз дар Афғонистон ва ба таъхир уфтодани озодкунии Толибон

Таҳаввулоти ахир дар ҳолест, ки Афғонистон бо коронавирус ҳам дастбагиребон аст

Мақомот гуфтанд,ки дар чанд ҳамлаи ахир ҷангҷӯён дар Афғонистон 28 узви нирӯҳои амниятиро куштанд. Ин дар ҳолест, ки ҳукумат барномаи озодкунии Толибони зиндониро ба таъхир гузошт. Рӯзи 29 март гурӯҳи ҷангҷӯён ба қароргоҳи полиси вилояти Тахор ҳуҷум карда, 13 афсари полисро кушта бар ҷой гузоштанд. Дар ин ҳодиса як ходими аршади полис маҷрӯҳ шуд. Дар вилояти Зобул рӯзи 29 март ҷангҷӯёни Толибон ба посгоҳҳои амниятии ҳукуматӣ ҳамла карда, дастикам 11 сарбозро куштанд. Дар ҳамлаҳои вилоятҳои Ҳилманду Бағлон чор узви нирӯҳои давлатӣ кушта шуд.

Дар ҳамин ҳол, рӯзи 31 март Шӯрои амнияти миллии Афғонистон гуфт, ки ҳукумат барномаи озодкунии 100 зиндонии Толибонро ба таъхир мегузорад. Созиш дар заминаи озодкунии зиндониҳои сиёсии ҳукуматӣ ва шӯришиён дар чаҳорчӯби қарордоди сулҳи ИМА ва Толибон дар моҳи феврал ҳосил шуда буд.

Ҳодисаҳои нави олудашавӣ ба вирус дар Чин сабт шудааст

Роботе дар Вуҳан кӯчаҳоро "дезинфексия" мекунад

Чин гузориш дод, ки баъди чор рӯзи камшавии ҳодисаҳои нави олудашавӣ ба коронавирус, рӯзи 31 март дубора афзоиши ҳодисаҳои олудашавӣ мушоҳида шудааст. Чин, ки сарчашмаи пайдоиши коронавирус маҳсуб меёбад, гуфт, ки 48 ҳодисаи нави гирифторшавӣ ба коронавирус дар афроде мушоҳида шудааст, ки аз хориҷа олуда шуда омадаанд. Дар шаҳри Вуҳан, макони пайдошавии вирус даргузашти як нафар бар асари Ковид-19 гузориш шуд, вале мақомот гуфтанд, азбаски дар дохили кишвар дигар ҳодисаҳои одудашавӣ вуҷуд надорад, шаҳр ва вилояти Ҳубей барои боз кардани марзҳояш наздик мешавад. Вале мутахассисон бо назардошти як кишвари баставу ноозод ва шадидан назоратшаванда будани матбуоти Чин мегӯянд, ба ин изҳороти мақомот набояд зиёд эътимод кард.

Дар ИМА ҳодисаҳои олудагӣ аз 164 ҳазор нафар бештар шуда, дар кишваре бо 330 миллион ҷамъият озмоишҳои бештари тиббӣ вазъи воқеии гирифторонро рӯшантар собит мекунад.

Аз замони шурӯи паҳншавии пандемияи коронавирус, дар саросари сайёра то ҳол 37638 нафар ҷон додаанд.

Садама дар Ваҳдат. Ду нафар ҷон бохта, ду каси дигар маҷруҳ шуданд. ВИДЕО

Ҳалокати ду нафар дар садамаи шаҳри Ваҳдат
лутфан мунтазир бошед

Феълан кор намекунад

0:00 0:00:38 0:00

Дар натиҷаи садамае дар шаҳри Ваҳдат ду нафар ҷон бохта, ду каси дигар дар бемористон бистарӣ карда шудаанд.

Мақомоти корҳои дохилӣ гуфтанд, ҳодиса рӯзи 30-юми март рӯй дод. Ба иттилои расмӣ, ронандаи 71-сола Боймаҳмад Одинаев идораи мошинро аз даст дода, боис ба садама шудааст.

Вазорати корҳои дохилии Тоҷикистон дар иттилоияе гуфт, Одинаев савори "Лексус-РХ-350" ҳангоми ҳаракат дар рӯ ба рӯи бозори "Автостансия"-и шаҳри Ваҳдат ба худрави тамғаи "Мерседес-Бенс" бархӯрдааст.

Баъди садама ӯ хостааст, мошинро ба қафо ҳаракат диҳад, вале сокинони дар истгоҳ истодаро пахш кардааст.

Ба иттилои Вазорати корҳои дохилии Тоҷикистон дар ин ҳодиса ду зани пиёдагард - Файзимо Холмуродоваи 37-сола ва Хиромон Комиловаи 47-сола ҷон доданд.

Шоҳидон навори лаҳзаи садамаро ба Радиои Озодӣ фиристода ва гуфтанд, ронандаи мошин бемори қанд буда, бо хуруҷи ин беморӣ назорати мошинро аз даст додааст.

Ҳанӯз наздикони фавтидаҳо ва маҷруҳон дар робита ба ин ҳодиса изҳори назар накардаанд.

Фавти шаҳрванди дувуми Қазоқистон аз коронавирус

Қазоқистон, 18 март, 2020.

Сардори Идораи тандурустии шаҳри Нурсултон Сауле Кисикова рӯзи сешанбе дар як нишасти хабарӣ иттилоъ дод, ки дар яке аз бемористонҳои пойтахти Қазоқистон як бемор бар асари коронавирус ҷон бохтааст.

Ба гуфтаи ӯ, ин марди 50-соларо 21-уми марти соли равон кормандони "ёрии таъҷилӣ" ба беморхона интиқол дода буданд. "Як моҳ беморӣ кашидааст. Ӯ ба хотири сафари хидматияш ба ёрии тиббӣ муроҷиат накардааст. Ҳоло ҷамъан 31 нафар аз аъзои хонавода, дӯстон ва ҳамкоронаш бистарӣ карда шудаанд",-афзуд Кисикова.

Ҳамчунин 50 каси дигар, ки бо ин мард тамос доштанд, карантини хонагӣ ва дар ду узви хонаводааш коронавирус ошкор карда шудааст.

Мақомоти Қазоқистон 26-уми март аз нахустин қурбонии коронавирус дар ин кишвар хабар доданд. Зани 64-солаи мубтало ба коронавирус аз вилояти Акмолин дар бемористони Нурсултон ҷон бохта буд.

Дар Қазоқистон то 31-уми март 325 ҳолати мубталошавӣ ба коронавирус ба қайд гирифта шуда, ҳамакнун шумори фавтидагон аз он ба ду кас расид.

Парванда алайҳи як мард дар Тошканд барои баргузории арӯсии духтараш

Узбекистон тадбирҳои сахт ҷорӣ кардааст.

Пулиси ноҳияи Юнусободи Тошканд зидди як сокини 55-солаи маҳаллӣ барои баргузор кардани маросими арӯсии духтараш бо иштироки дӯстони хонаводаи худу домод парвандаи ҷиноӣ боз кардааст.

Ба огаҳии пулис, дар робита ба ин ҳодиса бо банди "Нақзи қонунгузории санитарӣ ё қоидаҳои мубориза бо бемориҳои сироятӣ"-и Кодекси ҷиноии Узбекистон парванда боз карда шудааст.

Ин банд ҷарима ба андозаи аз 11,1 миллион то 22,3 миллион сӯм (1150-2300 доллари амрикоӣ), маҳдуд кардани озодӣ аз 1 то 3 сол ё маҳрум шудан аз озодӣ ба муҳлати то 5 солро пешбинӣ мекунад.

Пештар низ хабар дода шуд, ки сокинони шаҳри Тошканди Узбекистон 27 март сарфи назар аз эъломи карантин кушиш карданд, ки дар саҳни яке аз биноҳои баландошёнаи зисти ноҳияи Чилонзор тӯй баргузор кунанд. Нақзкунандагони карантин ба маблағи беш аз 1 миллион сӯм (100 доллар) ҷарима карда шуданд.

Дар Узбекистон ба иллати коронавирус аз 16 март карантин эълом шудааст. Ҳамчунин аз 27 март сокинони ин кишвар вазифадор шудаанд, ки бидуни зарурат ба берун набароянд. Онҳо танҳо ба хотири хариди дору ва ғизо ҳаққи берун рафтанро доранд.

Дар ин кишвар то рӯзи 31 март шумори мубталоён ба коронавирус ба 158 нафар расида, 7 нафар шифо ёфтанд ва ду кас ҷон бохтанд.

Тошканд ирсоли ҳавопаймо барои овардани муҳоҷиронро рад кард

Бинои вазорати умури хориҷии Узбекистон.

Вазорати корҳои хориҷии Узбекистон рӯзи 30-юми март хабар дод, ки барои баргардонии муҳоҷирон аз Русия ҳавопаймо фиристода намешавад.

"Дар шабакаҳои иҷтимоӣ хабарҳо паҳн мешавад, ки гӯё рӯзҳои наздик ба Русия ҳавопаймо ирсол мегардад. Қаллобон пулҷамъкуниро аз хоҳишмандони баргаштан ба ватан шуруъ кардаанд ва "рӯйхат"-и мусофиронро ҳам тартиб медиҳанд",-иттилоъ додааст ВКХ.

Вазорат муҳоҷиронро огоҳ кардааст, ки фиреби қаллобонро нахӯранд ва ба хабарҳои шабакаҳои иҷтимоӣ бовар накунанд. "Аз 30 март то 20 апрел тамоми фурудгоҳҳои Узбекистон фаъолияташонро қатъ ва парвозҳоро манъ кардаанд",-омадааст дар хабари вазорат.

Вазорат ҳамзамон ба муҳоҷирон тавсия додааст, ки ба хотири эмин мондан аз мубталошавӣ ба вируси корона макони зисти муваққат ва ё доимии худро тарк накунанд.

Гардиши қатора миёни Узбекистону Русия аз 16 март қатъ гардида, 18 март хабар расид, ки баъди қатъи парвози ҳавопаймоҳо миёни ду кишвар ҳазорон узбекистонӣ наметавонанд, ба ватанашон баргарданд.

Сафорати Узбекистон дар Москва аз муҳоҷирон дархост кардааст, ки вазъро дуруст дарк кунанд ва ба иғвову воҳима дода нашаванд.

То имрӯз дар Узбекистон 149 кас ба вируси корона мубтало шуда, 2 тан фавтидааст. Ҳамзамон 7 нафар шифо ёфтааст.

RSF хадамоти махсуси Покистонро дар нопадидшавии журналист дар Шветсия гумонбар медонад

Саҷид Ҳусайн аз рӯзи 2 март ба ин сӯ бедарак аст

Созмони Гузоришгарони бидуни марз (RSF) тахмин кардааст журналисти покистоние, ки тахминан як моҳ шуд дар Шветсия нопадид шудааст, метавонист аз ҷониби оҷонсии иттилооти Покистон рабуда шавад.

Саҷид Ҳусайн, сардабири вебсайти хабарии Balochistan Times рӯзи 2 март дар шаҳри шведии Уппсала нопадид шуд. Ӯ бо нашри матолиби марбут ба поймолшавии ҳуқуқи инсон дар қаламравҳои ҷанубуғарби Покистон маъруф буд.

Эрик Ҳалкяер, раҳбари бахши шведии созмони RSF бо пахши изҳороте рӯзи 30 март гуфт, “бо назардошти ҳамлаҳои ахир ва озори журналистони покистонӣ дар Аврупо, мо ин воқеиятро нодида гирифта наметавонем, ки нопадидшавии ӯ ба кораш марбут мебошад”.

Дениел Бастард, раиси бахши Осиёву Уқёнусияи созмон гуфт, ки “ҳама нишонаҳои нопадидшавии маҷбурӣ вуҷуд дорад”. Ӯ афзуд, “агар аз худ бипурсед, ки дар хомӯш кардани журналисти дигарандеш кӣ манфиатдор аст, пеш аз ҳама ба хадамоти иттилооти Покистон ишора мешавад”.

Созмони Гузоришгарони бидуни марз мегӯяд, ки вебсайти The Balochistan Times “бисёр вақт хати сурхи аз ҷониби мақомоти интизомии Исломобод кашидашударо убур мекард”.

CPJ ё Кумитаи ҳимоят аз журналистон, мақарраш дар Ню-Йорк аз мақомоти Шведсия тақозо кард, ки корҳои ҷустуҷӯи журналистро суръат бахшанд.

Ҳуссайн баъди таҳдидҳои зиёд соли 2012 Покистонро тарк кард ва пеш аз он ки соли 2017 дар Шведсия паноҳанда шавад, дар чандин кишвар зиндагӣ кард. Рӯзи 2 март ӯ ба як қатори самти Уппсала савор шуд, дар 45 дақиқа ба ин шаҳр расид ва баъди ин ҳеҷ нишоне аз ӯ вуҷуд надорад.

Ширкати гази Полша гуфт, дар баҳси нарх бо Газпроми Русия $ 1,5 миллиард бурдааст

Ширкати Газпроми Русия гуфт, ки қарори додгоҳи Стокҳолмро мавриди таҳлил қарор додааст

Азимтарин ширкати давлатии тақсимкунандаи гази Полша гуфт, ки дар баҳси бисёрсолаи 1,5 миллиарддолларии нархи газ бо ширкати русии Газпром дар додгоҳи байналмилалии Шведсия пирӯз омад.

Ширкати гази давлатии Полша (Polskie Gornictwo Naftowe i Gazownictwo) рӯзи 30 март бо нашри изҳороте гуфт, ки ин маблағ подоши ниҳоии қарордоди соли 1996 мебошад.

Ин созиш пардохти маблағи барзиёд ба иловаи нархи муқарарршударо тақозо мекард. Ширкати гази Полша гуфт, ки давоми солҳои зиёд Газпром аз онҳо пардохти арзиши иловагиро тақозо мекард ва ҳамакнун муваззаф шуд, ки 1,5 миллиард долларро ба ширкати Полша баргардонад.

Мӯҳлати маблағи барзиёд пардохтшуда аз 1 ноябри соли 2014 то 29 феврали соли 2020-ро дар бар мегирад.

Ширкати Полша гуфт, ки додгоҳе дар Стокҳолм амр дод, ки Газпром формула ё шеваи нархгузориро бо назардошти квотаи бозор тағйир диҳад ва ин чиз шароити фаъолиятҳои тиҷоратиро беҳтар мекунад.

Оҷонсии Ройтерс навишт, ки намояндагии Газпром дар вокуниш гуфтааст, қарори додгоҳи ҳакамии Стокҳолмро мавриди таҳлил қарор медиҳад. Дар изҳороти Газпром гуфта мешавад, ки “ҳанӯз маълум кардани ҳаҷми пардохтҳои эҳтимолӣ барвақт аст”.

Полша, ки ба хотири ҳанӯз замони Шӯравӣ эҷод шудани роҳҳои транзити газ ба Аврупо, нисфи гази аз Русия интиқолшавандаро истифода мекунад.

Ҳукми додгоҳ як зарбаи дигар ба Газпром аст, чун лӯлаи гази зерибаҳрии он бо номи “Северный поток 2”, ки гази русиро ба Олмон интиқол медиҳад, бо таҳдиди таҳримҳои ИМА рӯбарӯ шудааст.

Ширкати гази русӣ соли гузашта дар як баҳси дигари байналмилалии додгоҳӣ дар баробари ширкати Нафтогази украинӣ мағлуб ва вазифадор шуд, ки тахминан 3 миллиард долларро ба ин ширкат пардохт кунад.

ИМА таҳримҳои марбут ба барномаи ҳастаии Эронро тавсеа дод

Реактори оби сангини Ароқ

Иёлоти Муттаҳидаи Амрико ба таври истисноӣ барои 60 рӯзи дигар иҷоза дод, ки ширкатҳои Русияву Чин ва кишварҳои аврупоӣ ба корашон дар иншооти атомии Эрон идома диҳанд. Ширкатҳои мазкур асосан дар нерӯгоҳҳои атомӣ кор мекунанд.

Майк Помпео, вазири корҳои хориҷии Амрико, рӯзи 30-юми март тамдиди мӯҳлати таҳримҳоро тасдиқ кард ва таъкид намуд, ки ин қарор фаъолиятҳои ҳастаии Эронро маҳдуд мекунад.

Морган Ортагус, сухангӯи Департаменти давлатӣ гуфт, ки “Тавсеаи фаъолиятҳои ҳастаии Эрон ғайриқобили қабул аст.”

Доналд Трамп, президенти ИМА баъди тарки созиши ҳастаӣ бо Эрон карданаш дар соли 2015, нисбати Теҳрон таҳримҳои сахттари иқтисодӣ ҷорӣ кард ва бештарини ин таҳримҳо ба содироти нафт рабт гирифт. Ин созиш соли 2015 миёни Эрону қудратҳои ҷаҳонӣ имзо шуд ва бар ивази бекор шудани таҳримҳо аз Эрон тағйири рафтор карданро тақозо мекард.

Баъди соли 2018 Вашингтон маъракаи “фишори ҳадди аксар” болои Эронро роҳандозӣ кард, то фаъолиятҳои минтақавии Эрон камтар ва барномаи ҳастаиаш маҳдуд шавад.

Таҳримҳои тамдидшуда идомаи фаъолиятҳои марбут ба адами густаришро дар реактори Ароқ, корхонаи ҳастаии Бушеҳр, реактори таҳқиқотии Теҳрон ва дигар фаъолиятҳоро дар назар мегирад.

Дар оғози моҳи март Оҷонсии нирӯи атомии СММ гуфт, ки Эрон ба нозирони ин созмон имкони боздид аз ду маконе, ки эҳтимолан он ҷо фаъолиятҳои ҳастаӣ ҷараён дорад, надод. Ин ниҳод гуфт, ки Теҳрон маҳдудиятҳои дар соли 2015 муқарраршуда дар шумори захирагоҳҳои уранро нақз кардааст.

Мақомоти Эрон сиёсатҳои ИМА-ро интиқод карда гуфтаанд, ки таҳримҳои ҷоришуда имконияти ин кишварро дар муқобила бо пандемияи коронавирус осеб мерасонад. Дар Эрон то имрӯз беш аз 41 ҳазор ҳодисаи гирифторӣ ба коронавирус, аз ҷумла 2700 ҳодисаи марг ба қайд гирифта шудааст.

Ҷавонеро барои латту кӯби як мухолифи ҳукумати Тоҷикистон дастгир кардаанд

Илҳомҷон Ёқубов дар Литва ҳаққи паноҳандагӣ гирифтааст.

Пулиси шаҳри Каунаси Литва як нафарро бо иттиҳоми ҳамла ба Илҳомҷон Ёқубов, яке аз мухолифони фаъоли ҳукумати Тоҷикистон дар қаламрави он кишвар боздошт кардааст.

Пулиси шаҳри Каунас рӯзи 30-юми март дар посухи хаттӣ ба Радиои Озодӣ навишт, кормандони пулис дар ҷойи ҳодиса шахси ҳамлаварро муайян карданд, ки "шаҳрванди Ҷумҳурии Тоҷикистон ва зодаи соли 1993" мебошад.

Дар посух аз ин бештар иттилое надодаанд ва ному насаби фарди муттаҳам ба ҳамла, ангезаҳои ӯ барои латту кӯби Илҳомҷон Ёқубовро нагуфтаанд.

Айни замон пулиси Литва ба нашрияи LRT.lt гуфтааст, ҳамлавар шахсеро ҳадаф гирифтааст, ки Литва ба ӯ ҳаққи паноҳандагӣ додааст ва аз мунтақидони ҳукумати Тоҷикистон аст. Илҳомҷон Ёқубов рӯзи 30-юми март дар суҳбат ба Радиои Озодӣ гуфт, дар ин муддат муфаттишон танҳо як дафъа ӯро ба шахси ҳамлавар рӯ ба рӯ карданд ва бинобар хуруҷи короновирус идомаи тафтишот ба таъхир афтод.

Ёқубов афзуд, пулис аз ӯ хостааст, ба далели халал наёфтани тафтишот номи муттаҳам ба ҳамларо ошкор накунад. "Барои ман, ҳанӯз ангезаи ҳамлавар аниқ маълум нест", - гуфт ӯ.

Илҳомҷон Ёқубов субҳи душанбеи рӯзи 16-уми март дар мошини шахсе, ки қаблан ӯро мешинохт ва равобити тиҷоратӣ дошт, аз сӯи шахси севвум мавриди ҳамла қарор гирифт. Мегӯяд, ки ташхис нишон дод, мағзаш осеб дидааст ва устухони бинӣ ва қарбурғааш лат хӯрдаанд. Мақомоти Тоҷикистон то кунун дар бораи латту кӯби Илҳомҷон Ёқубов шарҳе ва ё баёнияе надодаанд.

Илҳомҷон Ёқубов, муштзан ва қаҳрамони собиқи Осиёи Марказӣ, то соли 2014 раҳбари намояндагии Ҳизби мамнӯи наҳзати исломӣ дар вилояти Суғд буд. Анҷумани муҳоҷирони Осиёи Марказӣ дар Аврупо, ки ӯ раҳбарӣ мекунад, яке аз чаҳор созмони узви Паймони миллии Тоҷикистон мебошад, ки як эътилофи созмонҳои мухолифи давлат аст ва аъзои он дар хориҷ аз кишвар фаъолият мекунанд.

Давлати Тоҷикистон ин паймонро созмони ифротгаро эълон кардааст. Худи Илҳомҷон Ёқубов мегӯяд, ки дар Тоҷикистон ба зидди ӯ, бо иттиҳоми барангехтани кинаю адовати миллӣ, нажодӣ, маҳалгароӣ ва ё динӣ ва даъвати оммавӣ барои ифротгароӣ парвандаи ҷиноӣ боз кардаанд. Баъди латту кӯби фаъоли сиёсии тоҷик, Дидбони Ҳуқуқи Башар як созмони мӯътабари ҳомии ҳуқуқ дар Ню-Йорк дар як изҳороте навишт, Тоҷикистон аз соли 2015 инҷониб мухолифонро таъқиб мекунад ва асосан дар Иттиҳоди Аврупо.

Созмон дар ин баёния хост, “Мақомоти Литва амнияти Ёқубовро таъмин кунад ва ҳамлаваронро ба ҷавобгарӣ кашида, фармоишгари ин ҳамларо муайян кунанд”.

Муҷозоти табибоне, ки зани мубтало ба коронавирусро бистарӣ накарданд

Алмато, Қазоқистон, 24 март, 2020.

Елжан Биртанов, вазири тандурустии Қазоқистон шоми 30 март хабар дод, ки сардухтури хадамоти ёрии таъҷилии вилояти Акмола ва роҳбари раёсати тандурустии вилоят баъди марги сокини 64-солаи маҳаллӣ танбеҳ гирифтанд.

Ин сокин ҳафтаи гузашта аз вируси корона фавтид. Вай нахустин қурбонии вируси корона дар Қазоқистон буд. Марги сокини 64-сола баҳсҳои зиёдеро дар Қазоқистон ба бор овард. Писари зан табибонро дар марги модараш айбдор кард. Ба гуфтаи вай, табибон нахостанд, ки модарашро бистарӣ кунанд ва дар ниҳоят модари вай вафот кард.

Раёсати тандурустии вилояти Акмола тафтиши хизматиро шуруъ кард. Тафтиш муайян кард, ки табибон "эҳтимоли ба коронавирус" мубтало будани занро ҷиддӣ нагирифта ва ӯро ба бемористон набурдаанд.

"Мо ин ҳолатро ҷиддан омӯхтем ва барои такрор нашудани ҳолатҳои ҳамсон дар оянда чораҳои иловагӣ меандешем",-гуфт вазири қазоқ.

То субҳи 31-уми март дар Қазоқистон 308 ҳолати гирифторӣ ба коронавирус сабт шудааст. Мақомот мегӯянд, аз ин вирус дар Қазоқистон як зан вафот кардааст. Сар аз 16-уми март дар он кишвар ҳолати фавқулодда эълом ва вориду хориҷшавӣ ва гардиш дар дохили шаҳрҳои сераҳолии Қазоқистон маҳдуд шудааст.

Арӯсӣ дар Қирғизистон бинобар коронавирус онлайнӣ баргузор шуд

Искандар ва Юля дар Бишкек бинобар коронавирус маросими арӯсии худро онлайни баргузор карданд.

Дар шаҳри Бишкеки Қирғизистон ду ҷавон - Искандар ва Юля ба иллати коронавирус ва эъломи вазъи фавқулода дар шаҳр маҷбур шуданд, тӯйи худро онлайнӣ баргузор кунанд.

"Мо оромиро ҳифз карда, дар хона қарор дорем. Аз наздикону пайвандони худ низ даъват мекунем, ки дар хона бимонанд. Бояд хушҳол буд, ки мо метавонем бо ҳам бошем", - мегӯяд Юля Холмурзоева.

"Бар иловаи ин, мо дар хона 30 кило гречка ва коғази ташноб ҳам дорем", - изҳор медорад Искандар.

Искандар ва Юля барои ба расмият даровардани ақди никоҳи худ ҳанӯз пеш аз эъломи вазъи фавқулода дар Бишкек ба идораи сабти асноди ҳолати шаҳрвандӣ ё ЗАГС муроҷиат карда буданд. Вале онҳо баъди манъи даромаду баромад аз шаҳр тасмим гирифтанд, тӯйро лағв накунанд.

Онҳо баъди ба расмият даровардани ақди никоҳи худ тӯйи арӯсиро бар асоси тавсияҳои Вазорати тандурустии Қирғизистон баргузор карданд: домоду арӯс бо ниқоби тиббӣ ва табрикоти фосилавӣ.

Ба нахустин тӯйи арӯсии онлайнӣ дар Қирғизистон ҳудуди 40 кас даъват шуда буд. Видеои тӯй низ дар тамоми шабакаҳои иҷтимоӣ паҳн шудааст.

Дар се шаҳри бузургтарин ва пойтахти Қирғизистон аз 25-уми март вазъи фавқулода эълом шудааст. Равуои рӯзонаи сокинон ва воситаҳои нақлиёт маҳдуд ва аз соати 20:00 то 07:00 соати комендантӣ эълом шудааст.

Дар Қирғизистон то 30-юми март 94 кас ба коронавирус мубтало шудааст.

Ҳукумати Қирғизистон соати комендантии шабонарӯзиро рад кард

Шаҳри Бишкек, 31 март, 2020.

Ҳукумати Қирғизистон хабарҳо дар бораи эъломи соати комендантии шабонарӯзиро дар саросари ин кишвар рад кард.

Ба огаҳии девони вазирони Қирғизистон, "хабарҳои паҳншуда дар паёмакрасонҳо, ки гӯё аз рӯзи чоршанбе дар саросари ин кишвар соати комендантии шабонарӯзӣ эълом мешавад ва бояд маҳсулоти ғизоиро захира кард, ҳақиқат надоранд. Дар ҳоли ҳозир эъломи чунин ҳолат баррасӣ карда намешавад".

"Дар рафти нишасти хабарӣ муовини аввали сарвазири Қирғизистон Қубодбек Боронов гуфт, ки дар кишвар тадбирҳои амниятӣ пурзӯр шуда, сокинон ба хотири ҳифзи саломатии худу наздиконашон бояд равуои рӯзонаи худро дар кӯчаҳо маҳдуд кунанд",-омадааст дар иттилоия.

Дар се шаҳри бузургтарин ва пойтахти Қирғизистон аз 25 марти соли равон вазъи фавқулода эълом гаштааст. Равуои рӯзонаи сокинон ва воситаҳои нақлиёт маҳдуд ва аз соати 20:00 то 07:00 соати комендантӣ эълом шудааст.

Дар Қирғизистон то 30-юми март 94 кас ба коронавирус мубтало шудааст.

Трамп ва Путин нафту коронавирусро баррасӣ карданд

Владимир Путин ва Доналд Трамп.

Дафтари матбуоти раёсати ҷумҳурии Русия хабар дод, ки президенти ин кишвар Владимир Путин ва ҳамтои амрикоияш Доналд Трамп рӯзи 30-юми март суҳбати телефонӣ анҷом доданд. Ба иттилои манбаъ, ин тамос бо ташаббуси ҷониби Амрико сурат гирифтааст.

Ҷонибҳо мушкилоти марбут ба паҳни коронавирусро дар ҷаҳон баррасӣ ва дар бораи чораҳое, ки дар ҳар ду кишвар андешида мешавад, табодули афкор намуданд.

Ба иттилои дафтари матбуоти раёсати ҷумҳури Русия, Путин ва Трамп ҳангоми баррасии вазъ дар бозори ҷаҳонии нафт созиш карданд, ки машваратҳои ду кишварро дар ин замина дар сатҳи вазоратҳои энержӣ роҳандозӣ кунанд.

Путин ва Трамп ҳамчунин дар бораи идома додани тамосҳои шахсиашон ба созиш расидаанд.

Тавре пештар расонаҳои амрикоӣ хабар доданд, Трамп гуфт, тасмим дорад, "ҷанг" дар бозори нафт миёни Русия ва Арабистони Саудиро баррасӣ кунад.

Таърихи нави баргузории бозиҳои олимпии Токио 2020 маълум шуд

Томас Бах, президенти Кумитаи байналмилалии олимпӣ

Бозиҳои Олимпии Токио рӯзи 23 июли соли 2021 шурӯъ шуда, то 8 август идома мекунад. Санаи нави бозиҳо баъди он маълум шуд, ки бозиҳои имсолаи олимпӣ бо сабаби пандемияи коронавирус дар ҷаҳон ба таъхир уфтод. Қарори Кумитаи байналмилалии олимпӣ дар ин замина рӯзи 30 март дар ҷаласаи шӯрои кумита қабул шуд. Исми бозиҳо тағйир намеёбад ва бо ин ки дар соли 2021 баргузор мешавад, таҳти номи “Токио 2020” хоҳад гузашт.

Бозиҳои паралимпӣ, ки бояд 25 августи имсол шурӯъ мешуд, дар таърихи 24 август то 5 сентябри соли 2021 барпо хоҳанд шуд.

Томас Бах, президенти Кумитаи байналмилалии олимпӣ гуфт: “Бовар дорам, ки ҳамроҳ бо ташаббускорони кумитаи тадорукотии Токио 2020, ҳукумати шаҳри Токиову Ҷопон ва дигар дастандаркорон, мо бар чолишҳои ғайримуқаррарӣ пирӯз мешавем”. Ӯ гуфт, “башарият худро дар дохили як нақби торике мебинад. Бозиҳои олимпии Токио 2020 метавонад рӯшноие дар охири ин нақби торик бишавад”.

Дар Самарқанд мардеро барои дурӯғпароканӣ дар бораи вирус ҳабс карданд

Чораҳои сахтгирона дар Узбекистон барои пешгирии коронавирус.

Як сокини 43-солаи ноҳияи Пахтачини вилояти Самарқанди Узбекистон бо айби паҳнсозии маълумоти бардурӯғ дар бораи маргу мир аз вируси корона, 30 рӯз ҳабс шуд. Вай овоза паҳн кардааст, ки "ҳамсояаш аз вируси корона мурдааст".

Рӯзи 29 март додгоҳи ноҳияи Пахтачин ӯро дар “вайронсозии тартиботи ҷамъиятӣ дар шароити ҳолати фавқулода” айбдор ва 30 рӯз ҳабс кард.

Ин мард шунидааст, ки рӯзи 25 март “ҳамсояаш аз истифодаи аз меъёр зиёди машруб фавтидааст”. Баъдтар вай дар шабакаҳои иҷтимоӣ навишт, ки “сокини маҳаллаи “Том”-и ноҳияи Пахтачин ба вируси корона мубтало шуда, машруби зиёд нӯшид ва вафот кард”.

Ин дар ҳолест, ки рӯзи 26 март президенти Узбекистон тағйиру иловаҳо ба Кодекси мурофиавии ҷиноятӣ ва Кодекси ҷавобгарии маъмуриро имзо кард.

Бино ба тағйироти нав, ҷавобгарӣ барои паҳнсозии иттилои бардурӯғ дар Узбекистон сахттар шудааст.

Идомаи коҳиши нархи нафт дар пайи паҳншавии коронавирус

Дар пайи густариши коронавирус, қимати нафт ҳамоно дар ҳоли поин рафтан аст.

Навъи нафти WTI бори аввал дар бозори ҷаҳонӣ, аз соли 2002 ба ин тараф, ба 20 доллар барои як бушка баробар шуд. Нафти навъи Brent каме бештар аз 23 долларро ташкил медиҳад.

Аз оғози моҳи март арзиши нафт қариб 50 дарсад коҳиш ёфт. Қоҳиши қимати нафт дар пайи он сар зад, ки Русия аз маҳдудсозии истихроҷи он худдорӣ кард. Арабистони Саудӣ пешниҳод дошт, ки дар пайи бемории COVID-19, бо ҳадафи ҳифзи иқтисод, истихроҷи нафт кам карда шавад. Аммо Русия розӣ нашуд ва ба истихроҷи ҳаҷми маъмулӣ идома дод.

Дар ИМА дар натиҷаи ба созиш нарасидани кишварҳои асосии истихроҷкунандаи нафт ва хуруҷи коронавирус талабот ба нафт то ҳадде пойин рафтааст, ки истеҳсолкунандагон барои интиқоли ҳар бушка нафт ба истеъмолкунандагон 19 сенти иловагӣ пардохт мекунанд. Зеро анборҳои истеҳсолкунандагон пур шуда, ғунҷоиши нафти иловагиро надоранд.

Табиби узбек аз зарби корд захмӣ шуд

Карантин дар Хоразм.

Дар ноҳияи Шовоти вилояти Хоразми Узбекистон табибе, ки вазъи сиҳатии сокинонро дар ҳолати карантин назорат мекард, 24 март захми корд бардоштааст.

Як манбаъ дар ҳукумати вилояти Хоразм бо тасдиқи ин хабар гуфт, ҳодиса шаби 24 март дар қисми низомие рух додааст, ки дар он шаҳрвандони аз хориҷ баргаштаро ба карантин гирифтаанд.

"Ин қисми низомӣ дар наздикии деҳаи мо аст. Онҷо онҳоеро дар карантин нигаҳ медоранд, ки аз Дубай ва Русия омадаанд. Як сарбози қисми низомӣ гуфт, табиб худашро се корд задааст. Вале сабабҳояш маълум нест", - гуфт як ҳамсуҳбати мо аз Шовот.

Намояндаи пулиси Хоразм низ гуфт, ки дар ҳақиқат табиб худашро корд задааст. "Кормандони мо он шаб ба қисми низомӣ рафтанд. Табиб худро на се, балки як корд задааст. Ҳоло дар беморхона бистарӣ аст", - афзуд ӯ.

Вале яке аз ҳамкорони табиб фарзияи мақомоти узбекро, ки мегӯянд, ӯ худашро корд задааст, зери суол қарор дод.

"Ӯ табиби машҳур аст ва замоне сардухтури беморхонаи касалиҳои сироятии шаҳри Урганч буд. Вай марде нест, ки худашро корд занад. Инҷо чизеро пинҳон медоранд. Он шаб ба маҳалли ҳодиса додситон ва сардори пулиси вилоят рафта буданд ва пас аз рафтани онҳо ин фарзия расонаӣ шуд, ки табиб худашро корд задааст", - изҳор дошт вай.

Манбаи мо дар ҳукумати Хоразм дар навбати худ афзуд, ки шаби 24 март дар қисми низомии Шовот миёни табибоне, ки вазъи сиҳатии сокинонро дар ҳолати карантин назорат мекарданд, задухӯрд ва кордзанӣ шудааст.

Трамп қарори дар миёнаҳои апрел азсаргирии кори соҳаи тиҷоратро бекор кард

Трамп дар ҷаласаи марбут ба вазъи коронавирус дар ИМА иштирок мекунад

Президенти ИМА Доналд Трамп муқаррароти давлатиро дар бораи бо сабаби пандемияи коронавирус дар хона истодани мардумро то 30 рӯзи дигар – то охири моҳи апрел - тамдид кард. То имрӯз дар саросари ҷаҳон бар асари Ковид-19 34 ҳазор нафар ҷон додаанд. Трамп дар як нишасти хабарӣ дар Вашингтон рӯзи 29 март гуфт,ки эҳтимолан авҷи паҳншавии коронавирус дар ИМА “дар ду ҳафтаи наздик” мушоҳида шавад. Ӯ изҳори умедворӣ кард, ки баъди он “бояд поинравии суръати нишондодҳо ҳам шурӯъ шавад”. Ӯ гуфт, ки муқаррароти марбут ба инзиво ваё дур истодани мардум аз ҳамдигарро ба хотири коҳиш додани суръати олудашавӣ ба вирус тамдид мекунад. Дар саросари ИМА шумори гирифторон ба коронавирус аз марзи 143 ҳазор нафар гузашта, 2513 нафар ҷон додаанд.

Трамп таъкид кард, ки “ҳар як нафар бляд дастури рафтор дар замони бӯҳрони коронавирусро ҷиддан риоя кунад” ва бидуни зарурати оҷили мисли харидории ғизо ва маводи дорувор ба кӯча набарояд.

Қабл аз ин як мутахассиси аршади амрози сироятӣ ҳушдор дод , ки ҳодисаҳои марг бар асари коронавирус метавонад ба 200 ҳазор нафар бирасад.

Шумораи қурбониёни коронавирус дар Эрон ба 2757 тан расид

Теҳрон, Эрон, 26 март, 2020.

Сухангӯи вазорати тандурустии Эрон Киёнуши Ҷаҳонпур рӯзи 30-юми март ба телевизиони давлатии он кишвар гуфт, бо 117 ҳолати нави фавт, шумораи қурбониёни бемории коронавирус дар ин кишвар ба 2757 нафар расид. Вай афзуд, ки шумораи гирифторон ба ин беморӣ дар Эрон 41,495 нафарро ташкил медиҳад. Ба гуфтаи оқои Ҷаҳонпур, дар 24 соати гузашта 3186 ҳолати нави гирифторӣ ба коронавирус дар Эрон ба қайд гирифта шудааст.

Сухангӯи вазорати тандурустии Эрон аз шаҳрвандон хостааст, ки дар хонаҳояшон бимонанд. Эрон яке аз кишварҳоест, ки аз ин вирус сахт зарар дидааст ва коршиносон ба омори расмие, ки аз тарафи мақомоти Ҷумҳурии исломӣ дар рӯзномаҳои маҳаллӣ ва хориҷӣ чоп шудааст, бовар надоранд.

Рӯзи 30-юми март расонаҳои давлатӣ гузориш доданд, ки дар ҷануби Эрон зиндониҳо дурбинҳоро шикастаанд ва дар рафти эътироз зарарҳои дигар низ расонданд. Дар доираи чораҳо зидди бемории ҳамагир, Эрон тақрибан 100,000 маҳбусро муваққатан озод кард ва наздик ба 50,000 нафар, аз ҷумла зиндониёни "хавфнок"- ба амнияти кишварро, дар маҳбас нигаҳ дошт.

Президенти Эрон Ҳасани Рӯҳонӣ рӯзи 29-уми март дар ҷаласаи ҳайати давлат гуфт, "мо бояд омода шавем, ки бо ин вирус зиндагӣ кунем, то даме ки дармон ва ё ваксинае пайдо шавад, вале то ба ҳол чунин нашудааст."

Теҳрон рӯзи 25-уми март қарор кард, ки ҳама сафарҳои байнишаҳриро ҳадди ақал то 8-уми апрел маҳдуд кунад.

Озодии шартии Нозанин Зоғарӣ-Ратклифф дар давраи бӯҳрони Ковид-19 тамдид шуд

Акси Нозанин Зоғарӣ-Ратклифф аз хонаи падар баъди муваққатан озод шуданаш бардошта шудааст.

Нозанин Зоғарӣ-Ратклифф дар давраи бӯҳрони Ковид-19 муваққатан аз зиндон озод шуд.
Ҳамсари корманди созмони ёрирасони бритониёиву эронӣ гуфт, ки мӯҳлати озодии шартии Нозанин Зоғарӣ-Ратклифф дар замони паҳншавии Ковид-19 дар Эрон боз то ду ҳафтаи дигар тамдид шуд. Ричард Ратклифф дар сӯҳбати имейлӣ бо Франс Пресс гуфт, ки аз падари Нозанин фаҳмид, ки озодии муваққатии ҳамсараш то 18 апрел тамдид шуд.

Ӯ афзуд, ки аз шунидани ин хабар хеле шод шудааст.

Нозанин Зоғарӣ-Ратклифи 41-сола, ки ҳоло дар хонаи падараш ба сар мебарад, қарор буд 4 апрел барои идомаи мӯҳлати ҳабс ба зиндони Эвини Теҳрон бармегашт. Қаблан шавҳараш гуфт, ки ӯ як дастбанд дорад ва он назорат мекунад, ки ҳаракати ӯ дар хонаи падар дар фосилаи 300 метр маҳдуд бошад.

Ин зан апрели соли 2016 боздошт ва моҳи сентябр гӯё барои “талоши сарнагун кардани режим” ба панҷ соли зиндон маҳкум шуд. Худи Нозанин Зоғарӣ-Ратклифф ин иттиҳомотро рад карда гуфтааст, ки дар доираи кораш барои созмони ҷамъиятӣ ва ҳукумати Бритониё кор кардааст.

Рӯзи 17 март ҳамсараш хабар дод, ки Нозанин яке аз 80 ҳазор зиндонии эронӣ аст, ки дар пасманзари муборизаи ҳукумат бо паҳншавии коронавирус муваққатан ба озодӣ мебарояд.

Президенти Эрон Ҳасани Рӯҳонӣ рӯзи 24 март гуфт, ки “тими ҳукуматӣ оид ба муқобила бо бӯҳрони коронавирус қарор кард, ки озодии шартии зиндониҳоро то 19 апрел тамдид кунад ва дар сурати зарурӣ ин озодии шартӣ тамдид хоҳад шуд”.

Эрон дар қаламрави Ховари Миёна осебдидатарин кишвар аз коронавирус ба ҳисоб меравад. Дар ин кишвар шумори гирифторон рӯзи 30 март аз 38300 нафар гузашта ҳалокати инсонҳо 2640 нафарро ташкил дод. Вале мутахассисон мегӯянд, ки ин шумор метавонад ниҳоӣ набошад, ба он хотир ки имкони аз санҷиш гузаронидани ҳама вуҷуд надорад.

Зоғарӣ-Ратклифф ҳамроҳ бо духтари хурдсолаш замоне, ки мехост баъди анҷоми сафари дидорбиниаш бо волидон ба хона баргардад, моҳи апрели соли 2016 дар фурудгоҳи Теҳрон боздошт шуд. Ӯ он замон корманди Бунёди Thomson Reuters буд. Бритониё озод кардани ӯву дигар дорандагони мақоми душаҳрвандиро талаб кард, вале Теҳрон душаҳрвандиро эътироф намекунад. Ҷеремӣ Ҳант, собиқ вазири хориҷаи Бритониё дар твиттераш навишт, ки таҳаввулоти ахир “қатраи умеде дар торикӣ” аст. Ӯ гуфт, “дуогӯем, ки ин хонавода дубора ба ҳам ояд”.

Дар Фаронса вазири собиқи арманитабор аз Ковид-19 даргузашт

Патрик Девидҷон дар 75-солагӣ даргузашт ва аввалин сиёсатмадори фаронсавӣ шуд, ки қурбонии Ковид-19 гардид. Акс аз бойгонӣ

Собиқ вазире дар Фаронса аввалин сиёсатмадоре шуд, ки бар асари олудагӣ ба коронавирус даргузашт. Патрик Девидҷон рӯзи 29 март дар синни 75-солагӣ даргузашт. Ӯро рӯзи 26 март бо натиҷаи мусбати олудагӣ ба вирус ба бемористон интиқол доданд. Девидҷон, ки решаҳои арманӣ дорад, дар солҳои раёсатҷумҳурии Николя Саркозӣ ва Жак Ширак ба ҳайси узви маҷлис ва вазир ифои вазифа кардааст. Рӯзи 29 март шумори ҳалокшудаҳо бар асари вирус дар Фаронса 2314 нафарро ташкил дод ва ин кишвар аз назари омори ҳалокати инсонҳо бар асари коронавирус панҷумин кишвар дар ҷаҳон шуд. Собиқ нахуствазири Фаронса Мануэл Воллс бо таассуф аз даргузашти Девидҷон ӯро чун як инсони “дар кораш самимиву ҳазлкаш” ёд кард. Нахуствазири Арманистон Никол Пашинян гуфт, ки марги Девидҷон ба арманиҳои Фаронса ва мардуми Арманистону Фаронса “зарбаи шадид” зад.

121 ҳодисаи нави Ковид-19 дар Покистон

Исломобод. Коргаре кӯчаву мошинҳоро дезинфексия мекунад

Мақомоти Покистон гуфтанд, ки дар 24 соати гузашта 121 ҳодисаи нави олудагӣ ба коронавирусро ошкор кардаанд, ки шумори умумии гирифторон ба вируси навро ба 1600 нафар баробар мекунад. Ба ин шумор, аз ҷумла 14 нафари ҳалокшуда ҳам шомил мешаванд. Вазири беҳдошт Зафар Мирзо рӯзи 29 март гуфт, ки 71 дарсади ҳодисаҳои гирифторӣ ба коронавирус дар Покистон аз берун, асосан аз Эрон овардашуда мебошад. Дар Эрон вазъи паҳншавии вирус дар миқёси Ховари Миёна мудҳиштарин ҳолатро касб кардааст. Дар Покистон бо аҳолии 220 миллион ҷамъият мақомот тадбирҳои маҳдудкунанда аз паҳншавии вирусро ҷорӣ кардаанд, вале бо ин вуҷуд дар ин кишвар афзоиши ҳодисаҳои гирифторӣ ба вирус мушоҳида мешавад. Қонунгузорон ва мутахассисон аз ҳукумат тақозо кардаанд, ки санҷишҳои тиббии аҳолӣ аз коронавирусро афзоиш диҳад.

Украина ба қабули қонуни нави ҳимояткунандаи иқтисоди осебдида аз Ковид-19 омода мешавад

Президенти Украина Владимир Зеленский

Парлумони Украина рӯзи 30 март дар як ҷаласаи изтирорӣ қонуни наверо баррасӣ мекунад, ки ҳадаф дорад ин кишварро аз таъсири Ковид-19 ҳимоят бикунад. Зарурати доштани ин қонунро Сандуқи байналмилалии пул тақозо кардааст, ки бар асоси он барномаи қарздиҳӣ ба Украина дар ҳаҷми 8 миллиард доллар боз мешавад ва Киевро ба дарёфти миллионҳо доллар кӯмакҳои Иттиҳоди Аврупо, Бонки Ҷаҳонӣ, Бонки Аврупоии Бозсозӣ ва Рушд ва дигар пуштибонҳои хориҷӣ умедвор хоҳад мекунад.

Президент Владимир Зеленский дар муроҷиати даҳдақиқаинааш тавассути телевизион дирӯз гуфт, ки қабул нашудани чунин як қонун кишварро бо хатари мушкилоти сангини иқтисодӣ дар пасманзари паҳншавии Ковид-19 рӯбарӯ мекунад. Дар Украина шумори сироятшудагон 500 ва фавтидагон 10 нафарро ташкил додааст. Зеленский хитоб ба вакилони Верховная Рада гуфт, “мардуми Украина фардо хоҳад дид, ки то куҷо шумо омодаи ҳимоят аз манфиатҳои миллӣ ҳастед”. Сандуқи Байналмилалии Пул гуфт, ки кишвар ба қонуни нави танзимкунандаи кори бонкҳо ниёз дорад, то ки моликони собиқи бонкҳои миллишудаву азбайнрафта натавонанд аз кӯмакҳои нав даъвои дарёфти ҷубронпулӣ бикунанд.

Ёфтҳои бештар

XS
SM
MD
LG