Эмомалӣ Раҳмон, раисҷумҳури Тоҷикистон ба муносибати ба истифода додани чархаи дуввуми нерӯгоҳи “Роғун” ба 42 нафар мутахассисони ин иншоот мукофотҳои давлатӣ супоридааст.

Дафтари матбуоти Президент рӯзи 6-уми сентябр хабар дод, ки “барои саҳми муҳим дар сохтмони нерӯгоҳ коргарон бо ордени “Шараф дараҷаи II”, медали “Хизмати шоиста” ва “Ифтихорномаи Ҷумҳурии Тоҷикистон” қадр карда шуданд.”

Ба гуфтаи манбаъ, Президенти Тоҷикистон дар ин маросим таъкид кардааст, ки бунёди “Роғун” кишварро ба истиқлолияти комили энергетикӣ мерасонад.

Қарор аст чархаи дуввуми “Роғун” рӯзи 9-уми сентябр ба кор дарояд. Чархаи якуми нерӯгоҳ моҳи ноябри соли гузашта фаъол шуда буд. Ду чархаи нерӯгоҳи "Роғун" ба таври муваққат насб шудаанд ва мувофиқи нақша то соли 2021 барқ истеҳсол мекунанд ва баъдан иваз мешаванд.

Даҳ сокини ҷамоати Язгулом дар ноҳияи Ванҷ, ки боздошту ҳабси онҳо дар солҳои 2024 ва 2025 сарусадо барпо карда буд, бар асоси Қонуни авф озод шудаанд.

Мақомоти Тоҷикистон онҳоро ба узвият дар гурӯҳҳои тундрав гунаҳкор дониста, панҷсолӣ аз озодӣ маҳрум карданд, аммо худашон айбномаро напазируфтанд.

Ду манбаи огоҳи Радиои Озодӣ рӯзи 24-уми июл гуфтанд, ки яке аз онҳо ҳафтаи гузашта аз зиндони “Якум Советский”-и шаҳри Душанбе озод шудааст.

“Ӯро дар охири соли 2024 аз Русия оварда, ба зиндон маҳкум карда буданд,” – гуфт яке аз мусоҳибони мо. Номи ӯ ба далели амниятӣ навишта намешавад.

Боздошт ва ҳабси даҳҳо сокини ҷамоати Язгулом дар ноҳияи Ванҷи Вилояти Мухтори Кӯҳистони Бадахшон, ки дар сарҳад бо Афғонистон ҷойгир аст, дар солҳои 2024 ва 2005 сурат гирифт.

Дертар чанд нафар аз язгуломиҳое, ки дар маҳаллаи “Дарвоз”-и шаҳри Душанбе, ноҳияи Абдураҳмони Ҷомии вилояти Хатлон ва хориҷ аз Тоҷикистон зиндагӣ мекунанд, низ бо айбномаҳои ҳамсон дастгиру зиндонӣ шуданд.

ИНЧУНИН, БИХОНЕД:

"Маънои сиёсӣ надорад." Чаро мехоҳанд номи Жамакро дигар кунанд?

Вазорати корҳои дохилии Тоҷикистон аксари онҳоро ба ҳамкорӣ бо “Ҷамоати Ансоруллоҳ” муттаҳам кард.

Фаъолияти ин гурӯҳ дар Тоҷикистон мамнуъст. Пештар мақомоти Тоҷикистон гуфта буданд, ки ҷангҷӯёни “Ансоруллоҳ” дар хоки Афғонистон аз 200 то 300 нафаранд. Омори нави эҳтимолӣ дар бораи онҳо дар даст нест.

Созмони Дидбони Ҳуқуқи Башар (Human Rights Watch) моҳи январи соли 2025 ба зиндон маҳкум кардани даҳҳо сокини ҷамоати Язгуломи ноҳияи Ванҷро “намунаи поймоли ҳуқуқи инсон дар Тоҷикистон” номида, гуфт, “онҳо барои дигарандешӣ ҷазо гирифтанд”.

Дар ҳоле ки маоши кам яке аз сабабҳои афзоиши фасод дар идораҳои давлатии Тоҷикистон номбар мешавад, мақомот назари дигар доранд.

Муовини якуми раиси Оҷонси мубориза бо коррупсия гуфт, дар солҳои охир маошу нафақа чанд бор афзудааст ва барои рӯзгор кофист, аммо бояд мафкураи одамонро дар бораи харҷи пул дигар кард.

Барот Расулӣ рӯзи 22-юми июл дар нишасти хабарӣ гуфт, “вақте мафкураи мардум дигар шуд, маош ҳам мерасад.”

Дар ҳоли ҳозир маоши миёна дар Тоҷикистон тақрибан се ҳазору дусад сомонӣ ё каме бештар аз сесад доллари амрикоист. Қарор аст, аз моҳи сентябри имсол маоши кормандони давлатӣ ва нафақа дар Тоҷикистон зиёд карда шавад.

Бо вуҷуди ин, дар миёни кишварҳои собиқ Шӯравӣ, шаҳрвандони Тоҷикистон маошу нафақаи аз ҳама камро мегиранд ва онҳо чархи зиндагиро бо пуле мегардонанд, ки ҳамсару фарзандон ё хешовандон аз муҳоҷирати корӣ аз Русия ё кишварҳои дигар мефиристанд.

Навор дар Инстаграм:

Дар пайи ҳамлаҳои ҳавоии Украина анбори ширкати тиҷорати онлайнии Wildberries дар вилояти Ленингради Русия оташ гирифтааст. Волии вилояти, Александр Дрозденко, 24-уми июл хабар дод, ки бар асари ҳамлаи паҳподҳо се нафар маҷруҳ шуд.

Wildberries, ки яке аз бузургтарин ширкатҳои тиҷории Русия ба шумор меравад, тасдиқ кардааст, ки фаъолияти ду маркази лоҷистикияш дар вилояти Ленинград мутаваққиф гардида, кормандони ширкат аз нимҷазираи ишғолшудаи Қрими Украина берун кашида шудаанд. Аммо Wildberries исрор меварзад, ки дар ҳамлаи охир касе ҷароҳат набардошт.

Дар як ҳафтаи гузашта панҷ анбори Wildberries мавриди ҳамла қарор гирифтаанд, ки тибқи ҳисобҳои тахминӣ даҳ дарсади имконоти лоҷистикӣ ё икмолотии ин ширкатро ташкил медиҳанд.

18-уми июл ҳавопаймоҳои бесарнишини Украина ба анборҳои Wildberries дар шаҳрҳои Котовски вилояти Тамбов ва шаҳри Электростали вилояти Маскав ҳамла карданд. Дар натиҷа 8 коргари Wildberries ба ҳалокат расиданд.

ИНЧУНИН, БИХОНЕД:

Дафни як ҷонбохтаи ҳамла ба анбори Wildberries дар Тоҷикистон

Баъди чор рӯз анборҳои ин ширкат дар шаҳрҳои Краснодар, маркази вилояти Краснодар ва Невинномисски вилояти Ставрополи ҷануби Русия ҳадафи ҳамлаҳои паҳподҳои украинӣ қарор гирифтанд.

Русия ҳар рӯз шаҳрҳои Украина, марказҳои лоҷистикӣ, нерӯгоҳҳо ва хату шабакаҳои интиқоли барқи Украинаро оташборон мекунад.

Киев бар ин назар аст, ки Wildberries дар таҷовузи Русия ба хоки Украина саҳм дошта, тавассути ин ширкати азим амволи ҷангӣ нигаҳдорӣ ва интиқол меёбанд.

Кремл ин айбномаро рад мекунад.

Ҳамлаҳои ахири Украина марҳилаи наверо дар ҷанги чорунимсола боз мекунанд, чун дастовардҳои низомии Русияро беасар карда, ҳаёти маъмулии мардуми Русияро дар манотиқи хеле дуртар аз марз бо Украина дарҳаму барҳам мезананд.

Амволи Wildberries ҳамроҳ бо рақибаш, ширкати ОЗОН, ҳаштуним дарсади маҷмӯи маҳсулоти миллии Русияро ташкил медиҳанд. Дар ин ду ширкати азим 4 миллион нафар кор мекунад, ки панҷ дар сади нерӯйи кории Русияро ташкил медиҳад.

Видео дар инҷост:

Embed ба дигарон фиристед

Ҳамлаи дигар ба анбори Wildberries дар Русия

Аз ҷониби Радиои Озодӣ

Embed ба дигарон фиристед

Нусхабардорӣ шуд

---

бар px баландӣ px

---

URL нусхабардорӣ шуд

Феълан кор намекунад

0:00 0:02:37 0:00

Линки мустақим

• 240p | 6.9MB
• 360p | 10.7MB
• 480p | 17.8MB
• 720p | 31.1MB
• 1080p | 58.2MB

Теъдоди нафткашҳое, ки аз тангӣ ё гулӯгоҳи Ҳурмуз мегузаранд, рӯзи 23-юми июл ба камтарин шумора дар наздик ба 7 ҳафтаи охир расид.

Тибқи маълумоти ширкатҳои назорат бар рафтуомади нафткашҳо, дар ин рӯз танҳо як нафткаши калон, ки ду миллион бушка нафти хом бо худ дошт, аз тангии Ҳурмуз берун ва роҳии Чин шуд.

Дар ин рӯз ҳеч нафткаше вориди тангаи Ҳурмуз нашуд.

Дар рӯзҳои чаҳоршанбе ва сешанбе ба тартиб 3 ва 8 нафткаш аз тангии Ҳурмуз убур карда буданд.

Дар шароити одӣ шумори киштиҳое, ки рӯзона аз ин оброҳа мегузаштанд, то 150 киштӣ мерасид.

Як қурбонии ҳамла ба анбори Wildberries, ширкати азими онлайнӣ дар Русия, рӯзи 23-юми июл дар ноҳияи Ҷайҳун, ҷануби Тоҷикистон, дафн карда шуд.

Наврӯзҷон Содиқов 25 сол дошт.

Вай рӯзи 18-уми июл дар ҳамлаҳои паҳподии Украина ба анбори Wildberries дар вилояти Подмосковйе ҷон бохтааст.

Бародараш, Тоҷиддин Содиқов, дар суҳбати телефонӣ бо Радиои Озодӣ гуфт, ҷасад ё пайкари Наврӯзҷонро аз шаҳри Электростали вилояти Маскав оварданд.

Ӯ афзуд, то кунун ягон ширкат ё масъуле барои марги бародараш ҷуброн напардохтааст.

Нашрияи "Новая Газета Европа" навишт, ки "Ресурс Плюс", ширкати ҳамкори Wildberries, ба пайвандони Наврӯзҷон Содиқов 1 миллион рубл додааст. "Ресурс Плюс" коргаронро аз кишварҳои Иттиҳоди Давлатҳои Мустақил (СНГ) барои фаъолият дар анборҳои Wildberries дар Русия ҷалб мекунад.

Дар ҳамлаҳои паҳподии Украина ба вилоятҳои Томбов ва Подмосковйеи Русия рӯзи 18-уми июл ҳашт нафар кушта ва даҳҳо тани дигар захмӣ шуданд.

Анборҳои ширкати азими Wildberries рӯзи 22-юми июл низ ҳадафи ҳамла қарор гирифтанд. Татяна Ким, мудири кулли ширкат, гуфт, дар ин ҳамла дар Краснодару Невинномиск камаш даҳ кас маҷруҳ шуд.

Владимир Зеленский, раисҷумҳури Украина, ҳамлаҳоро ба анбори Wildberries дар Русия тасдиқ кард ва гуфт, онҳо марказҳоеро нишон гирифтаанд, ки “дар таъмини артиш” нақш доранд.

Қимати ҷаҳонии нафт ҳамзамон бо идомаи ҳамлаҳои Амрико ба Эрон, рӯзи чоршанбеи 22 июл бори дигар афзоиш ёфт. Ҳамакнун қимати ҳар бушка нафти хоми навъи "брент" барои аввалин бор дар тақрибан шаш ҳафтаи гузашта, аз 95 доллар боло рафт.

Дар баробари нафти хоми "брент", шохиси нархи нафти хоми Амрико маъруф ба West Texas Intermediate, ба беш аз 87 доллар дар ҳар бушка расид.

Ин нархҳо беш аз се дарсад бештар аз қимати рӯзҳои қабл ҳастанд ва нишондиҳандаи афзоиши нигаронӣ дар бозорҳои молии ҷаҳон аз ба вуҷуд омадани нобасомонии бештар дар таъмини маводи сӯхт аст.

Аз оғози даври нави ҳамлаҳои Амрико ба Эрон пас аз имзои созишномаи Исломобод, қимати нафт беш аз 20 дарсад коҳиш ёфтааст.

Ба гузориши хабаргузории "Рейтерз", изҳороти рӯзи чаҳоршанбеи Марко Рубио, вазири корҳои хориҷии Амрико дар бораи ҷиддӣ набудин Эрон дар музокирот ва ҳамин тавр, сӯҳбатҳои ахири Доналд Трамп дар бораи ҳамла ба иншооти ҳастаии махфии Эрон дар "Кӯҳи Куланг", боис шудааст, то таҳлилгарони бозорҳои молӣ эҳтимоли убури қимати нафт аз 100 доллар дар ҳар бушка тайи рӯзҳои ояндаро бисёр боло арзёбӣ кунанд.

Дар ҳамин ҳол, нашри хабарҳо аз тағйири масири бештари нафткашҳо дар Баҳри Сурх пас аз ҳушдори гурӯҳи "Ҳусӣ"-ҳои Яман дар ҳадаф қарор додани киштиҳои Арабистони Саудӣ дар танга ё гулугоҳи Боб-ул Мандаб, дар афзоиши қимати нафт дар ду рӯзи ахир таъсир доштааст.

Хабаргузории "Рейтерз" рӯзи 22 июл гузориш дод, ки чаҳор нафткаши ҳомили нафти хоми Арабистони Саудӣ ба Осиё, дар Баҳри Сурх масирашонро ба тарафи шимол тағйир доданд. Як рӯз пеш низ се нафткаши дигар ҳам масирашонро ба тарафи шимол тағйир дода буданд.

Истифода аз роҳи канали "Суэтс" барои хуруҷ аз Баҳри Сурх боис мешавад, то замони расидани нафткашҳои ҳомили нафти Арабистони Саудӣ ба кишварҳои шарқи Осиё чанд ҳафта афзоиш ёбад.

Дар ҳамин ҳол, вебсайти рафтуомади баҳрӣ дар гузорише эълон кард, ки бо вуҷуди таҳдидҳо ва ҳамлаҳои нав, убур ва мурури нисбӣ дар тангаи Ҳурмуз ва Боб-ул-Мандаб идома дорад. Ин дар ҳоле аст, ки Сипоҳи посдорони Эрон мегӯяд, ки тангаи Ҳурмуз баста аст.

Доналд Трамп, раисҷумҳури Амрико рӯзи 22 июл ҳушдор дод, ки агар Эрон дар тангаи Ҳурмуз ба ҳар киштӣ ҳамла кунад, Амрико дар посух як пул ё нерӯгоҳи барқии ин кишварро ҳадаф қарор хоҳад дод.

Трамп дар шабакаи иҷтимоии худ Social Truth навишт, "аз ҳамин лаҳза ба баъд, ҳар гоҳ Эрон дар тангаи Ҳурмуз бо мушак, паҳбод ё ҳар навъи силоҳи дигар ба як киштӣ ҳамла кунад, ИМА як пул ё нерӯгоҳи барқии ин кишварро бамборон ва нобуд хоҳад кард".

Ӯ афзудааст, ки ин ҳушдор шомили пулҳо ва нерӯгоҳҳои барқӣ дар дохил ва атрофи шаҳри Теҳрон низ мешавад.

Раисҷумҳури Амрико пеш аз ин низ гуфта буд, ки агар Теҳрон созиши мавриди назарро напазирад, ИМА дар ҳафтаҳои оянда ҳамлаҳои худ ба пулҳо ва нерӯгоҳҳои барқи Эронро густариш хоҳад дод.

Трамп ҳамчунин пеш аз имзои созиши оташбас, борҳо Эронро ба ҳамла ба зерсохтҳо, аз ҷумла, пулҳо ва нерӯгоҳҳои барқӣ, таҳдид карда буд.

Амрико дар даври нави ҷанг бо Эрон, ки акнун вориди дувоздаҳумин рӯзи худ шуд, то кунун чандин пулро дар минтақаҳои гуногуни Эрон, ба вижа дар ҷануби ин кишвар, ҳадафи ҳамлаҳои худ қарор додааст.

Абдусалом Содиқов, писари зиндонии яке аз фаъолони собиқи Ҳизби дар Тоҷикистон мамнӯи наҳзати исломиро баъд аз се моҳи ба таври бераҳмона кушта шудани падараш озод кардаанд.

Мунаввара Содиқова, модари Абдусалом, рӯзи 22-юми июл ба Радиои Озодӣ гуфт, писарашро 17-уми июл бар асоси қонуни афв раҳо карданд ва ба хонаводаи онҳо "андаке хурсандӣ омад".

Ба иттилои расмӣ, Маннон Содиқов (Домулло Абдуманнон)-и 60-сола моҳи май фирефтаи ваъдаи ду нафар барои раҳоии писараш дар ивази 100 000 доллар шуда, вале худ кушта шудааст. Ҷасади ӯро 2-юми майи имсол дар таҳхонаи иморати нимасохтае дар деҳаи Чорбоғи Исфара пайдо карданд.

Эҳсон Бобоеви 31-сола ва хеши 46-солааш Юсуф Шарифов бо гумони қатл ва ғорати 100 ҳазор доллари Маннон Содиқов дастгир шудаанд. Ба гуфтаи мақомот, ин ду нафар Маннон Содиқовро бо ваъдаи озод кардани писари зиндониаш фиреб додаанд.

Бо гузашти тақрибан се моҳи қатл, мақомоти интизомӣ дар бораи ҷараёни таҳқиқ чизе нагуфтаанд. Талоши батакрори Радиои Озодӣ барои гирифтани шарҳи мақомоти интизомӣ дар бораи парванда натиҷа надод.

Ба гуфтаи чанд вакили дифои хориҷ аз Тоҷикистон, ки номашон ба далели амниятӣ нашр намешавад, дар кишвар ингуна муомилаҳои ғайриқонунӣ бе миёнаравии мақомоти интизомӣ сурат намегирад.

ИНЧУНИН, БИХОНЕД:

Муҳиддин Кабирӣ: "Дар қатли Домулло Абдуманнон мақомот даст доранд"

Абдусалом Содиқовро соли 2024 бо гуноҳи фиристодани пул ба Муҳаммадиқболи Садриддин, яке аз мухолифони тундлаҳни ҳукумат ба ҳафт соли зиндон маҳкум карда буданд.

Модараш, Мунаввара Содиқова, мегӯяд, писараш ҳангоми гуфтугӯҳои телефонӣ ба падар мегуфтааст, барои раҳоии ӯ пуле надиҳад, зеро мумкин аст, “онҳоро моҳҳои оянда афв кунанд”, вале падараш ба ин гуфтаҳо эътиное накардааст.

Бар асоси Қонуни афв, ки рӯзи 16-уми июл қабул шуд, дар Тоҷикистон ҳазорон нафарро аз зиндонҳо раҳо карданд, аз ҷумла онҳоеро, ки дар тундгароӣ ҳам гунаҳкор дониста шудаанд.

Тоҷикистон 250 миллион доллар маблағи "евробондҳо"-ро баргардондааст ва кишвар ният дорад, ки боқимондаи маблағро то соли оянда бозпас диҳад. Ин омор 22-юми июл дар нишасти хабарии Вазорати молия садо дод.

Ба гуфтаи намояндагони вазорат, 100 миллион доллари дигар моҳи сентябр ва 150 миллиони боқимонда моҳи апрели соли оянда пардохт мешавад.

Файзиддин Қаҳҳорзода, вазири молияи Тоҷикистон гуфт, кишвар дар масъалаи бозгардонии маблағи "евробондҳо" ягон мушкилӣ надорад.

Маълумоти алтернативӣ дар ин бора дастрас нест.

Бонки Осиёии Рушд дар соли 2018 гуфта буд, пардохти фоиз ё баҳраи "евробондҳо" ба иқтисоди Тоҷикистон гаронӣ мекунад.

Тоҷикистон дар соли 2017 барои бунёди нерӯгоҳи барқи обии "Роғун" ба 500 миллион доллар "евробонд" фурӯхт. Ба муҳлати даҳ сол ва бо баҳраи солонаи беш аз 7-дарсадӣ. Ин маблағ бояд солҳои 2026-2027 баргардонида шавад.

Файзиддин Қаҳҳорзода, вазири молия 22-юми июл аз тасмими фурӯши "евробондҳо" ҳимоя кард ва гуфт, Тоҷикистон ният дорад, ки "фурӯши бондҳои сабз"-ро ба роҳ монад. Қаҳҳорзода афзуд, ҷузъиёти фурӯши бастаи нави "евробондҳо" бояд моҳи сентябр муайян шавад.

"Бе ҷалби маблағҳои қарзии дарозмуддат ва имтиёзнок, татбиқи чунин лоиҳаҳо мисли неругоҳи Роғун имкон надорад", - афзуд вазири молияи Тоҷикистон.

Навор дар Инстаграм:

Тибқи омори нави Вазорати молия, Тоҷикистон дар нимаи аввали имсол барои баргардондани қарзҳои хориҷӣ 270,3 миллион доллар сарф кардааст.

Манбаъ мегӯяд, қарзи хориҷии Тоҷикистон ба ҳолати 1 июли имсол ба 2,9 миллиард доллар расидааст, ки ба 13,7 дарсади Маҷмӯи маҳсулоти дохилӣ баробар аст.

Дар пайи фаромадани сел дар ноҳияи Рӯшон даҳҳо хона зарар дидааст. Мақомот гуфтанд, ки талафоти ҷонӣ нест.

Ҳодиса 20-уми июл дар деҳаҳои Баррӯшон ва Деҳрӯшон бар асари баланд шудани ҳарорати ҳаво ва обшавии пиряхҳо рух додааст.

Мақомоти Вилояти Мухтори Кӯҳистони Бадахшон гуфтанд, дар деҳаи Баррӯшон 10 хона пурра, 6 хона қисман ва 14 хона ба таври ҷузъӣ зарар дид.

Дар Деҳрӯшон чора хона қисман ва 6 хона ба таври ҷузъӣ осеб дидааст. Дар умум, ба иттилои мақомот, дар ин ҳодиса ба чиҳил хона зарар расидааст.

Сокиноне, ки аз ин ҳодиса зарар дидаанд, ба ҷойҳои амн кӯчонида шудаанд ва қарор аст ба онҳо манзилҳои нав сохта диҳанд.

Хисороти сел дар Рӯшон пурра дақиқ нашудааст ва ба гуфтаи мақомот "ҳар хонавода вобаста ба ҳаҷми зарар кумак дарёфт хоҳад кард".

Тоҷикистон имсол шоҳиди офатҳои табиии зиёд, аз ҷумла омадани селу тармафароӣ ва шамоли сахт шуд.

Фақат дар моҳи май бар асари омадани сел камаш 4 нафар дар шаҳрҳои Кӯлоб ва Турсунзода ҳалок ва панҷ каси дигар захмӣ шуданд.

Ҳодисаҳои нохуши табиӣ дар шаш моҳи аввали имсол ба иқтисоди Тоҷикистон беш аз 52 миллион сомонӣ ё 5,7 миллион доллар зарар расондааст.

Навор дар Инстаграм:

Дар нимаи аввали имсол кори 30 созмони иҷтимоӣ дар Тоҷикистон қатъ шудааст.

Ҷаҳонгир Сайдализода, намояндаи Вазорати адлия, рӯзи 21-уми июл дар нишасти хабарӣ гуфт, феълан дар Тоҷикистон тақрибан 1700 иттиҳодияи ҷамъиятӣ мондааст. Ӯ аз созмонҳое, ки дигар фаъол нестанд, ном набурд.

Музаффар Ашӯриён, вазири адлия дар ин нишаст, "хотима ёфтани маблағгузорӣ аз ҷониби сарпарастон"-ро яке аз сабабҳои асосии қатъи фаъолияти баъзе созмонҳои ҷамъиятӣ номид.

Созмонҳои ҳомии ҳуқуқ солҳои охир ҳукумати Тоҷикистонро барои маҳдуд кардани фаъолияти созмонҳои ҷамъиятӣ ва вакилони дифоъ интиқод мекунанд. Мақомот ин танқидҳоро қабул надоранд.

Тибқи омори Вазорати адлия, созмонҳои иҷтимоӣ дар нимаи аввали соли равон ин миқдор маблағ ё грант гирифтаанд:

• 46 миллиону 93 ҳазору 363 сомонӣ
• 21 миллиону 852 ҳазору 905 доллар
• 7 миллиону 660 ҳазору 448 евро
• 6 миллиону 424 ҳазору 524 дирҳами Имороти Муттаҳидаи Арабӣ

Ҷомеаи шаҳрвандии Тоҷикистон давоми чор соли охир аз фишори афзояндаи мақомот шикоят доранд. Ба гуфтаи ҳомиёни ҳуқуқ, ин фишорҳо баъд аз саркӯби эътирозҳои соли 2022 дар Вилояти Мухтори Кӯҳистони Бадахшон сахттар шуд.

Фаъолони мадании ВМКБ соли 2023 гуфта буданд, ба баъзе аз онҳо фишор овардаанд, ки ихтиёрӣ созмонҳо худро барҳам диҳанд. Ҳарчанд мақомот он вақт ин шикоятро рад карда буданд.

Ба иттилои Иттиҳоди Аврупо дар соли 2023 беш аз 700 созмони ғайридавлатӣ дар Тоҷикистон баста шуданд. Раҳбари намояндагии Иттиҳоди Аврупо моҳи декабри соли 2023 дар Душанбе гуфт, "ин ба нафъи демократисозии ҷомеа нест."

Вазири корҳои дохилии Тоҷикистон гуфт, касе, ки дар Исроил бо гумони ҷосусӣ ба нафъи Эрон дастгир шудааст, "зодаи Тоҷикистон аст, аммо шаҳрванд нест".

Рамазон Раҳимзода 21-уми июл дар нишасти хабарӣ иддао кард, ки ин нафар гуё аз шаҳрвандии Тоҷикистон берун шуда, шиносномаи Русияро гирифтааст. Ӯ дигар ҷузъиёт надод.

Тасдиқи дурустии ҳарфҳои вазир аз манобеи мустақил феълан мушкил аст. Байни Тоҷикистон ва Русия низоми душаҳрвандӣ амал мекунад. Яъне, сокинон метавонанд ҳамзамон шиносномаи тоҷикӣ ва русӣ дошта бошанд.

Пештар як намояндаи Вазорати корҳои хориҷии Тоҷикистон дар посух ба муроҷиати Радиои Озодӣ навишта буд, ки барои тасдиқи ҳувият ва шаҳрвандии шахси гумонбар "тавассути роҳҳои дипломатӣ" бо ҷониби Исроил ба тамос баромадаанд.

"Ҳоло мунтазири посухи расмии ҷониби Исроил ҳастем. То ҳол нисбат ба дастгир шудани шаҳрванд ба мо ягон маълумоти расмӣ дастрас нагардидааст," – навишт дафтари матбуоти ВКХ дар ҷавоб ба муроҷиати Радиои Озодӣ. Посух охири ҳафтаи гузашта дастрас шуд.

Пулиси Исроил ва Хадамоти амниятии ин кишвар рӯзи 2-юми июл эълон карданд, ки як шаҳрванди Тоҷикистону Русияро бо иттиҳоми ҷосусӣ ба нафъи Эрон боздошт кардаанд.

Номи ӯ дар изҳороти мақомоти Исроил ба ду шакл муаррифӣ шудааст: Ҳангоми боздошт чун Беҳрӯз Собирҷон ва пас аз эълони айб чун Беҳрӯз Шариф Додобоеви 33-сола.

Додситони Исроил рӯзи 6-уми июл гуфт, бар асоси маълумоти ибтидоӣ, ин шаҳрванди Тоҷикистон "дар бораи макони расидани мушакҳо, соҳилҳои Ҳайфа ва муассисаи низомии Elbit Systems маълумот ҷамъ оварда, бар ивази криптоасъор ба хадамоти иктишофии Эрон фиристодааст."

Расонаҳо ва додситониву додгоҳи Исроил дар бораи мавқеи шаҳрванди боздоштшудаи Тоҷикистон то ҳол чизе нагуфтаанд.

Вазорати корҳои дохилии Тоҷикистон мегӯяд, дар шаш моҳи аввали имсол дар тасодуф ё садамаҳои нақлиётӣ 287 кас ҷон бохта, 508 каси дигар ҷароҳат бардоштаанд.

Намояндагони ин ниҳод 21-уми июл дар нишасти хабарӣ гуфтанд, дар қиёс ба ҳамин давраи соли гузашта шумораи фавтидагон 8 кас ва теъдоди захмиён 284 нафар бештар шудааст.

Ба гузориши ВКД, дар нимаи аввали имсол дар кишвар 531 ҳодисаи нохуши нақлиётӣ рух додааст.

Тоҷикистон дар як моҳи ахир шоҳиди чанд тасодуфи маргбор буд. Аз ҷумла рӯзи 4-уми июл дар як садама дар роҳи Фархор-Душанбе, ҳафт нафар ҷон бохтанд. Пеш аз он дар рӯзи 2-уми июл дар тасодуфи роҳ дар шаҳри Ваҳдат 11 кас ҳалок шуданд.

Суръати баланд, беэътиноӣ ба қоидаву қонуни ҳаракат, мошинҳои куҳна ва роҳҳои ноҳамвор сабаби тасодуфи нақлиётӣ ва маргумири зиёд дар роҳҳои Тоҷикистон гуфта мешавад.

Беэътиноӣ ба дониши ронандагон ҳангоми имтиҳонгирӣ аз сабабҳои дигари ин мусибатҳо арзёбӣ мешавад.

Исматулло Абдуллозода, раиси пешини Фурудгоҳи байнулмилалии Душанбе бо ҳукми Додгоҳи олӣ, озод шудааст. Додгоҳ ҳукми худро дар ин бора рӯзи 13 июл содир кардааст.

Рустам Мирзозода, раиси Додгоҳи олии Тоҷикистон рӯзи 21 июл зимни нишасти хабарӣ гуфт, ки раиси пешини фурудгоҳ бо пардохти 2200 нишондиҳанда барои ҳисобҳо, баробар ба 165 ҳазор сомонӣ, озод шуд.

Раиси Додгоҳи олӣ афзуд, Абдуллозода ҳамаи маблағи зиёни молии расонидаашро баргардонидааст.

Мақомот қаблан гуфта буданд, ки Исматулло Абдуллозода 94,3 миллион сомонӣ зарарро ҷуброн карда, бояд боз бештар аз 922 миллион сомонии дигарро баргардонад.

Аз ин пеш Додгоҳи шаҳри Душанбе панҷ мансабдори пешини Фурудгоҳи байнулмилалии Душанберо, ки якҷо бо раиси пешини фурудгоҳ Исматулло Абдулллозода ба тасарруфи 1 миллиарду 245 миллион сомонӣ, муодили беш аз сад миллион доллар, гумонзад буданд, бо пардохти ҷарима озод карда буд.

Исматулло Абдулллозода, ки яке аз наздикони Ҳасан Асадуллозода, бародарарӯси президенти Тоҷикистон ном бурда мешавад, 9 сол раиси Фурудгоҳи байнулмилалии Душанбе буд.

Панҷ мансабдори пешини Фурудгоҳи Душанбе ҳамроҳ бо роҳбари ин муассиса Исматулло Абдуллозода дар моҳи майи соли 2025 боздошт, вале чор моҳ баъд бо шарти берун нарафтан аз ҷойи зист раҳо шуданд.

Парвандаи Исматулло Абдуллозода ва чанде аз зердастони собиқаш баҳсҳоеро дар ҷомеаи Тоҷикистон, аз ҷумла миёни корбарони шабакаҳои иҷтимоӣ ба миён овард.

Бархе инро як намунаи густардагии фасод дар Тоҷикистон гуфтанд ва бархи дигар аз эҳтимоли беҷазо мондани Абдуллозода бар пояи равобиташ бо оилаи аввали кишвар изҳори нигаронӣ карданд.

Бар асоси қонуни нави афв, то кунун 8 ҳазору 8 нафар аз зиндонҳои Тоҷикистон озод шудаанд.

Дар ин бора Музаффар Ашӯриён, вазири адлияи Тоҷикистон рӯзи 21-уми июл дар посух ба суоли Радиои Озодӣ изҳори назар кард.

Ашӯриён аз ин бештар ҷузъиёт надод ва танҳо гуфт, ин 8 ҳазор нафар онҳое буданд, ки ба зиндон маҳкум шудаанд.

Қонуни нави афв дар Тоҷикистон, ки 16-уми июни имсол имзо шуд ва ба иҷро даромад, нисбат ба 18 ҳазор нафар, аз ҷумла зиндониён ва онҳое, ки парвандаашон дар ҳоли баррасист, татбиқ хоҳад шуд.