Пайвандҳои дастрасӣ

Хабари нав

Хабарҳо

Толибон аз ду ноҳияи ҳаммарз бо Тоҷикистон ронда шуданд

Ноҳияи Юмгони Бадахшони Афғонистон

Мақомоти маҳаллӣ дар вилояти Бадахшони Афғонистон мегӯянд, ду ноҳияи ҳаммарз бо Тоҷикистонро аз дасти гурӯҳи Толибон бозпас гирифтанд.

Ноҳияи Юмгон ва Вардуҷ, ки дар наздикии марз бо Тоҷикистон ҷойгиранд, панҷ сол боз дар дасти гурӯҳи Толибон қарор доштанд.

Амалиёт барои пас гирифтани ин ду ноҳия 11 рӯзи пеш оғоз шуд. Асадуллоҳ Муҳаммадӣ, фармондеҳи пулиси Бадахшон мегӯяд, дар пайи амалиёт наздики 200 ҷангҷӯ кушта шуд, ки дар миёни онҳо ҷангҷӯёни хориҷӣ низ ҳастанд.

Озодсозии ду ноҳия аз дасти Толибон дар ҳолест, ки рӯзи 8-уми сентябр Доналд Трамп, президенти Амрико гуфтугӯҳои сулҳ бо ин гурӯҳро қатъ кард. Чунин тасмимро президенти ИМА пас аз ҳамлаи маргбори чанд рӯзи пеши Толибон гирифт, ки дар он як сарбози амрикоӣ низ кушта шуда буд.

Ҳамаи хабарҳои имрӯзро дар инҷо бихонед

Попи Рум гуфт, ба ҷустуҷӯйи "оштӣ" ба Ироқ меравад

Поп Франсис дар роҳ ба сӯйи Ироқ. 5-уми марти 2021

Раҳбари католикҳои ҷаҳон рӯзи 5-уми март сафари чаҳоррӯзаи худро ба Ироқ оғоз кард. Поп Франсис дар остонаи сафараш гуфт, ҳамчун "зоири сулҳ" ба ин кишвари ҷангзадаи аксаран мусулмоннишин дар Ховари Миёна меравад.

Попи 84-сола дар муроҷиати видеоӣ рӯзи 4-уми март гуфт, "ба баҳои сангине, ки масеҳиёни Ироқ дар даҳсолаҳои охир пардохтаанд", арзиши воло қоил аст ва дар айни замон афзуд, "ба хоҳарону бародарони мазҳабҳои дигар низ даст хоҳад дод".

Ӯ хитоб ба мардуми Ироқ гуфт: "Орзу мекунам, ки чеҳраҳои Шуморо бибинам, мулоқот кунам, аз сарзамини Шумо, гаҳвораи тамаддуни бостонӣ, дидан кунам."

"Ҳамчун зоир, як зоири тавбахоҳ меоям, то пас аз солҳо ҷангу терроризм аз Худованд дархости омурзиш ва оштӣ кунам", -- афзуд Поп Франсис.

Ин сафари нахустини хориҷии Попи Рум аз оғози паҳншавии бемории коронавирус аст. Ба истиқболи ӯ дар Бағдоду Наҷаф аксҳояшро насб кардаанд. Қарор аст, раҳбари католикҳои ҷаҳон то 8-уми март дар баъзе аз чорабиниҳо дар Ироқ иштирок кунад.

Дар Қирғизистон Хадамоти мубориза бо ҷиноятҳои иқтисодиро барҳам медиҳанд

Ҳукумати Қирғизистон қарор кардааст, ки Хадамоти давлатии мубориза бо ҷиноятҳои иқтисодии ин кишвар барҳам дода шавад.

Ба иттилои хадамоти матбуотии ҳукумати Қирғизистон, ин қарорро сарвазири он кишвар Улукбек Марипов имзо кардааст.

Дар ҳукумати Қирғизистон гуфтанд, ҳаҷми иқтисоди соягӣ дар оморҳои расмӣ 130 млрд сом ё 23,6 % ММД нишон дода мешавад. Дар ҳоле ки коршиносони мустақил мегӯянд, он 24-43% ММД аст. Ин бозгӯи он аст, ки Хадамоти мубориза бо ҷиноятҳои иқтисодии Қирғизистон вазифаҳои худро ба таври зарурӣ анҷом дода наметавонад.

Президенти Қирғизистон Содир Ҷабборов чанде пеш дар Фейсбук навишт, ки шарт нест, вазорат ё ниҳоди дигаре барои шахсони алоҳида ҳифз карда шавад.

Дар Қирғизистон соли 2012 пулиси молӣ барҳам дода шуда, ба ҷои он Хадамоти мубориза бо ҷиноятҳои иқтисодӣ таъсис гашт.

Дар Алмато сокинон озодии маҳбусони сиёсиро талаб карданд

Эътироз дар Алмато. 4 март, 2021.

Рӯзи 4--уми март дар шаҳри Алматои Қазоқистон се сокини маҳаллӣ бо навбат дар назди ёдгории Истиқлол дар майдони Ҷумҳурӣ гирдиҳамоӣ ташкил карданд.

Онҳо озодии маҳбусони сиёсӣ, кам кардани маоши вакилони порлумонро талаб карданд. Яке аз эътирозгарон ба додгоҳ кашидани ҳокими пешини шаҳри Алмато Бауирҷон Байбекро талаб кард. Байбек дар фасодкорӣ гумонбар мешавад.

Дариға Раҳим, яке аз эътирозгарон номи 27 маҳбуси сиёсиро дар варақ навишта озодии онҳоро аз ҳасб талаб кард.

Дар ҳафтаҳои охир дар Қазоқистон эътирозҳои сокинон зидди сиёсатҳои давлат афзудааст. Сокинон бештар аз мақомот қатъи таъқиби фаъолон, озодии маҳбусони сиёсӣ, кӯмак ба модарони танҳо, бештар кардани маошу дигар пардохтҳои давлатиро талаб мекунанд.

Президенти Қирғизистон ба Узбекистон меравад

Раиси ҷумҳури Қирғизистон Содир Ҷабборов.

Вазири корҳои хориҷии Қирғизистон Руслан Казакбоев рӯзи 4-уми март хабар дод, ки президенти Қирғизистон Содир Ҷабборов дар рӯзҳои наздик ба чанд кишвар сафар мекунад.

Ба гуфтаи вай, рӯзҳои 11-12 март Ҷабборов ба Узбекистон ва баъди он ба Тоҷикистону Туркманистону Чин сафар мекунад.

Содир Ҷабборов рӯзҳои 2-3 март бо сафари давлатӣ ба Қазоқистон рафт. Вай бо ҳамтои қазоқаш Қосимҷомарт Тоқаев, президенти пешини Қазоқистон Нурсултон Назарбоев ва дигар шахсони расмии он кишвар мулоқот кард.

Пеш аз сафар ба Қазоқистон Ҷабборов ба Русия рафта буд.

Пулиси Мянмар дубора сӯи эътирозгарон оташ кушод

Пулиси Мянмар барои пароканда кардани эътирозҳои зидди ҳукумати низомиён аз аслиҳа ва гази ашковар истифода кард.

Сарфи назар аз он ки рӯзи 3 март дар натиҷаи пароканда кардани эътирозгарон 38 одам кушта шуд, рӯзи панҷшанбе дубора дар чанд шаҳри Мянмар сокинон ба кӯча баромаданд. Дар бораи қурбониёни рӯзи панҷшанбе ҳоло маълумот нарасидааст.

Дар шаҳри Янгон, пойтахти Мянмар ҳазорон эътирозгар ба кӯча баромада, озодии роҳбари мардумӣ Аун Сан Су Чжиро талаб карданд.

Ба навиштаи расонаҳо, аз ибтидои табаддулоти низомӣ - аз рӯзи 1 феврал то кунун - дар Мянмар на камтар аз 54 кас кушта шудааст. Бештар аз 1700 каси дигар, аз ҷумла 29 рӯзноманигор боздошт шудааст.

Иттиҳоди Аврупо истифодаи силоҳ зидди эътирозгарони осоиштаро дар Мянмар маҳкум кард.

Қарор аст, имрӯз, 5 март Шӯрои Амнияти СММ пӯшти дарҳои баста вазъ дар Мянмарро баррасӣ кунад.

Дар натиҷаи табаддулоти низомӣ дар Мянмар ҳукуматро низомиён ғасб карданд. Низомиён роҳбари ҳизби "Лигаи миллии тарафдори демократия" Аун Сан Су Чжиро боздошт карданд, ки ҳизби вай дар интихоботи порлумонии моҳи ноябри соли 2020 пирӯз шуда буд. Низомиён ҳизби ӯро дар тақаллубкорӣ айбдор мекунанд. Низомиён тасмим доранд, як сол баъд интихоботи нави порлумонӣ баргузор кунанд. Дар Мянмар сокинон зидди ҳукумати низомиён эътироз доранд.

Дар стратегияи амнияти миллии ИМА Чин рақиби асосӣ номида шуд

Энтону Блинкен, вазири умури хориҷии ИМА.

Дар стратегияи миллии муваққатии ИМА, ки ахиран аз номи президент Ҷо Байден ба нашр расид гуфта шудааст, Русия тавсеаи нуфузи худ дар ҷаҳонро ҳадаф гузошта, бо ноустувор сохтани меъёрҳои мавҷуда дар арсаи ҷаҳонӣ нақши харобкоронаро мебозад.

"Ҳамчунин ин кишвар дар баробари Чин талошҳои зиёдеро барои заиф сохтани ИМА анҷом додааст, то Вашингтон натавонад манфиатҳои худу ҳампаймонҳояшро дар саросари ҷаҳон ҳимоят кунад", - омадааст дар стратегия.

Вале рақиби асосии ИМА дар арсаи ҷаҳонӣ на Русия, балки Чин номид шудааст. Чин ягона рақиби Амрико дониста шудааст, ки бо истифода аз тавонмандии иқтисодӣ, низомӣ, технологӣ ва талошҳои дипломатӣ метавонад барои низоми бозу устуворӣ байналмилалӣ хатар эҷод кунад.

Номи Русия ва Чин дар қисмати назорати таслиҳотӣ низ зикр шудааст, вале ҳамзамон қайд гашта, ки ИМА барои гуфтугӯ дар ин масъала ва дар умум, роҷеъ ба суботи стратегӣ омодааст. Дар стратегияи мазкур эътироф шудааст, ки низоми худкомагӣ ба демократия, аз ҷумла Амрико ва ҳампаймонони он хатар дорад.

Додгоҳи Алмато бонкдори пешин Ҷомарт Ертоевро 9 сол зиндонӣ кард

Додгоҳи шаҳри Алматои Қазоқистон бонкдор Ҷомарт Ертоев ва соҳибкор Нурлан Тлеубоевро дар "дуздӣ"-и пули Бонки Авруоисё, Вank RBK ва Qazaq Banki айбдор эълом ва маҳкум ба зиндон кард.

Бар асоси қарори додгоҳ, Ертоев барои "ташкили дуздии амволи ғайр дар ҳаҷми махсусан калон" ва Тлеубоев "барои дуздӣ ва сохтакорӣ" 9-солӣ аз озодӣ маҳрум шуданд.

Ҷониби айбдоркунанда гуфт, Тлеубоев бо мусоидати Ертоев ва ҳамкоронаш бо роҳи сохтакорӣ ва беасос пул қарз мегирифтааст.

Се гумонбари дигари парванда Олимҷон Тлеубоев, Серик Атабай ва Оксана Шестакова аз 5 то 5,5 сол зиндонӣ шуданд.

Додгоҳ ҳамчунин айбдоршудаҳоро вазифадор кард, ки беш аз 167,8 миллиард танга ба созмонҳои молӣ ҷуброн ва ҳудуди 1 миллиард танга боҷи давлатӣ супоранд.

Пештар додгоҳи Алмато Ертоевро дар ғорати 329,5 ҳазор доллар аз бонки RBK айбдор ва 11 сол зиндонӣ карда буд. Вале худи Ертоев мегӯяд, ҳаргиз дар бонки мазкур фаъолият накардааст. Ӯро соли 2018 дар Маскав боздошт ва баъдтар ба Қазоқистон истирдод карданд.

Дар шарқи Афғонистон як пизишки занро куштаанд

Ду рӯз пеш дар Ҷалолобод се хабарнигори занро куштанд

Мақомоти Афғонистон гуфтанд, дар пайи таркиши бомбе дар шаҳри Ҷалолобод, ки онро бахши дигар аз ҳамлаҳои ҳадафманд меноманд, як пизишки зан кушта шудааст.

Атоуллоҳ Хугиёнӣ, сухангӯйи волии Нангарҳор, ки Ҷалолобод марказаш ҳаст, гуфт, дар мошине, ки пизишк нишаста буд, бомби миқнотисӣ ё магнитӣ гузошта будаанд. Дар ин ҳодиса як тифл захмӣ шуд.

Ба қавли Хугиёнӣ, пизишки зан дар шифохонаи хусусӣ дар Ҷалолобод кор мекард. То кунун масъулияти ҳамларо касе ва ё гуруҳе ба уҳда нагирифтааст.

Ду рӯз пеш дар Ҷалолобод се хабарнигори занро ба қатл расонданд ва масъулияти ҳамларо гуруҳи тундрави “Давлати исломӣ” ё ДОИШ ба дӯш гирифт.

Дар моҳҳои охир ва дар пасманзари гуфтугӯҳои ҳукумати Афғонистон ва Толибон барои даст ёфтан ба сулҳ куштори хабарнигорону фаъолони ҷомеаи шаҳрвандӣ ва намояндагони мақомот дар ин кишвар афзудааст.

Комиссия иҷозат дод, раиси Додгоҳи олии Қирғизистонро ба ҷавобгарӣ кашанд

Гулбара Калиева

Комиссияи интизомии Шӯрои додрасҳои Қирғизистон 4-уми март дар пайи баррасии дархости Додситонии кул иҷозат додааст, ки раиси Додгоҳи олии он кишвар Гулбара Калиева ба ҷавобгарии ҷиноӣ кашида шавад.

Худи Калиева дар ҷаласаи ҳузур надошт ва намояндаи ӯ хост, ҷаласа ба иллати бемор будани раиси Додгоҳи олии Қирғизистон ба таъхир гузошта шавад. Вале намояндаи Додситонии кулли он кишвар гуфт, қонун иҷозат медиҳад, ки масъала бе ҳузури Калиева баррасӣ шавад.

Бинобар ин, Комиссияи интизомӣ дархости додситониро бе ҳузури Калиева баррасӣ карда, иҷозат додааст, ки ӯ ба ҷавобгарӣ кашида шавад. Ҳамчунин комиссия аз президенти Қирғизистон Содир Ҷабборов дархост хоҳад кард, ки Калиеваро муваққатан аз мақомаш барканор кунад.

Гулбара Калиева аз 22-юми сентябри соли 2018 раиси Додгоҳи олии Қирғизистон аст.

Раиси Кумитаи амнияти миллии Қирғизистон Камчибек Тошиев моҳи декабри соли 2020 хабар дод, ки ба зидди Гулбара Калиева бо гуноҳи "суистифода аз мақом" парвандаи ҷиноӣ боз шудааст.

"Мо тамоми маводро ба Комиссияи интизомӣ додаем. Агар он розигӣ диҳад, мо ӯро ба ҷавобгарӣ хоҳем кашид. Ба назари мо, ӯ қонунро поймол карда, ба давлат зарар расондааст", - афзуда буд Тошиев.

Дар эътирозҳои зидди низомиён дар Мянмар 38 кас кушта шудаанд

Пахши эътирозҳо дар Мянмар

Дар саркӯби эътирозҳо ба зидди ҳукумати низомии тозаташкил дар Мянмар (Бирма) рӯзи чаҳоршанбе ба камияш 38 кас кушта шудаанд.

Намояндаи Созмони Милали Муттаҳид барои Мянмар 3-юми мартро "рӯзи маргбортарин" баъд аз кудето ё табаддулоти аввали моҳи феврал дар ин кишвар номид.

Ӯ гуфт, бар асари хушунатҳо дар ин кишвар аз моҳи гузашта ба ин сӯ 50 нафар ҷон бохтаанд. Нақли шоҳидони айнӣ ва наворҳо аз маҳалли ҳодиса баёнгари онанд, ки пулис барои пароканда кардани эътирозҳо дар чандин шаҳри Мянмар аз гази ашковар ва тирҳои резинӣ истифода кардааст.

Раҳбарони кудето ҳукумати мунтахаби ин кишварро лағв ва раҳбарони онро зиндонӣ карданд. Фаъолон мегӯянд, садҳо нафар, аз ҷумла дастикам шаш хабарнигор, дар ин хушунатҳо дастгир шудаанд.

Бритониё хоҳони баргузории нишасти Шӯрои амнияти Созмони Милали Муттаҳид дар бораи вазъияти Мянмар шудааст.

Баъд аз садамаи домоди Мирзиёев дар хадамоти муҳофизати президенти Узбекистон тафтиш шуруъ шуд

Отабек Умаров

Баъд аз садамаи Отабек Умаров, домоди Шавкат Мирзиёев, дар Хадамоти давлатии муҳофизати президенти Узбекистон тафтиш шуруъ шудааст. Манобеъ мегӯянд, дар ҳоли ҳозир варзишкороне, ки бо Умаров пойга ташкил карда буданд, зери назорат гирифта шудаанд. Ин варзишкорон дар "Вайрон кардани тартиби бехатарии ҳаракат дар роҳ ва ё истифодаи воситаи нақлиёт" гумонбар мешаванд.

Мирзиёв дастур додааст, дар бораи фаъолияти домод ва муҳофизаш дар моҳҳои охир гузориш таҳия карда шавад. Ба гуфтаи манбаи дигар, мототсикле, ки Отабек Умаров бо он садама кард, дар вақти ҳодиса бо суръати 180 километр дар соат ҳаракат мекард.

Отабек Умарови 36-сола баъд аз садама, ки шоми 13 феврали имсол рух дод, 15-уми феврал бо як ҳавопаймои махсус нахуст ба Маскав ва сипас ба Куриёи Ҷанубӣ интиқол дода шуд.

Умаров аз соли 2012 то 2016 дар Сеул, пойтахти Куриёи Ҷанубӣ, фаъолият дошт ва бо забони куриёӣ озодона суҳбат мекунад. Вай баъд аз садама гуфтааст, мехоҳад, дар Куриёи Ҷанубӣ табобат гирад.

Отабек Умаров, ки ҳамзамон муовини сардори Хадамоти амнияти роҳбари давлати Узбекистон аст, шоми 13-уми феврал дар маркази шаҳри Тошканд ба садамаи автомобилӣ дучор шуд. Манобеъ мегӯянд, ӯ бо мототсикл садама карда, пояш ҷароҳат бардоштааст.

Ба иттилои манобеъ, ӯро нахуст дар шифохонае дар Тошканд бистарӣ ва пояшро шаш соат ҷарроҳӣ кардаанд. Гуфта мешавад, пойи рости вай аз 3 ҷо шикастааст.

Сомонаи flightaware.com, ки ба пайгирии парвози ҳавопаймоҳо машғул аст, нишон медиҳад, ҳавопаймои як ширкати хусусии тиббӣ аз шаҳри Ҳамбурги Олмон ба Тошканд омада, рӯзҳои 14 ва 15-уми феврал дар фурудгоҳи Тошканд қарор доштааст.

Пештар аз ин дар шабакаҳои иҷтимоӣ хабари бо суръати баланд рондани нақлиёт аз сӯйи Отабек Умаров нашр мешуд. Тобистони соли 2019 вай дар кӯчаҳои Тошканд мошини навъи Tesla-ро бо суръати 200 км/соат ронд ва барои ин амал бештар аз 200 доллар ҷарима шуд.

Дар Арманистон 10 ҳазор нафар тазоҳурот карданд

Ереван дар рӯзи 3-уми март.

Ҳазорон нафар дар пойтахти Арманистон бо талаби истеъфои нахуствазир Никол Пашиниён эътироз карданд. Бештар аз 10 ҳазор нафар рӯзи 3-юми март дар назди бинои порлумони Арманистон ҷамъ омаданд, ки онро нерӯҳои зиёди пулис ва аз ҷумла нишонзанҳо ва ё снайперҳо муҳофизат мекарданд.

Як рӯз пештар аз ин буҳрони сиёсӣ дар Арманистон амиқтар шуд, чун раиси ҷумҳури Арманистон қарори барканории фармондеҳи артишро имзо накард. Фармони барканориро Никол Пашиниён содир кард, чун ба қавли ӯ фармондеҳони артиш, ки аз ӯ хостанд, истеъфо диҳад, саъй кардааанд, табаддулоти низомӣ анҷом бидиҳанд.

Армен Саркиссиён, раиси ҷумҳури Арманистон, ки салоҳиятҳои зиёде надорад, рӯзи 2-юми март бори дуввум ҳам аз имзои фармони барканории Оник Гаспариён, раиси Ситоди муштараки нерӯҳои мусаллаҳи Арманистон даст кашид.

Никол Пашиниён баъд аз ҷанги 44-рӯзаи Арманистону Озарбойҷон барои вилояти ҷудоиталаби Қаробоғи Кӯҳӣ зери фишори афзоянда қарор гирифтааст. Дар ин ҷанг, ки бо миёнҷигарии Русия хотима ёфт, Арманистон баъзе аз қисматҳои Қаробоғи куҳӣ ва ноҳияҳои атрофи онро ба Озарбойҷон супурд.

Як рӯзноманигори қазоқистонӣ гуфт, аз сӯи пулис латту кӯб шудааст

Пулиси Қазоқистон. Акс аз бойгонӣ.

Рӯзноманигори ширкати "Остона"-и Қазоқистон Баҳромбек Толибҷонов гуфт, шаби 2 март дар шаҳри Чимкент аз сӯи кормандони пулис латту кӯб шудааст. Толибҷонов он шаб аз рафти сӯхтори бозори маҳаллӣ гузориш таҳия мекард.

Ба гуфтаи рӯзноманигор, кормандони пулис дастонашро тоб дода, дар рӯ ва гурдаҳояш задаанд. "Ман гуфтам, ки рӯзноманигор ҳастам ва ба кори ман халал нарасонанд. Ба маҳзи ин ду корманди пулис аз дасту поям бардошта, ба мошини пулис бурданд. Дар рӯ ва гурдаҳоям заданд", - гуфт Толибҷонов.

Рӯзноманигор аз болои кормандони пулис шикоят кардааст. Мақомоти пулиси шаҳри Чимкент гуфтанд, аз рӯи ин ҳодиса тафтишот шуруъ шудааст.

Ин бори аввал нест, ки дар Қазоқистон кормандони пулис ба рӯзноманигорон ҳамла мекунанд. Моҳи октябри соли гузашта хабарнигори Радиои Озодӣ Сания Тойкен аз сӯи пулис латту кӯб шуд.

Созмонҳои байналхалқӣ Қазоқистонро дар радифи кишварҳои дорои "вазъи сахти озодии баён" қарор додаанд.

Тоҷири "ҷанҷолӣ"-и Қирғизистон Ҷалил Отамбоевро боздошт карданд

Ҷалил Отамбоев, корманди пешини пулиси Қирғизистон.

Кумитаи давлатии амнияти миллии (КДАМ) Қирғизистон рӯзи 3 март аз боздошти тоҷир, корманди пешини пулис Ҷалил Отамбоев хабар дод.

Ба иттилои мақомот, вай дар ҷамъоварии сарват аз роҳи ғайриқонунӣ айбдор мешавад.

Дар хабарномаи КДАМ омадааст, ки Отамбоев дар замони корманди пулис будан ва дастрасиаш ба молу сарват чанд амволи ғайриманқули гаронбаҳо харидорӣ ва онҳоро ба номҳои пайвандонаш сабт кардааст.

Сарҳанги пулис Ҷалил Отамбоев дар вилояти Ӯши Қирғизистон ҳамчун тоҷир маъруф аст. Вай соҳиби чанд тарабхона, ширкат ва биноҳои баландошёна аст. Вай пештар ба ҳайси сардори пулиси нақлиёти фурудгоҳи Ӯш фаъолият мекард.

Узбекистон барои бозсозии обанбори Сардоба озмун эълом мекунад

Обанбори Сардоба.

Вазири сохтмони Узбекистон Ботир Зокиров гуфт, садди рахнашудаи обанбори Сардобаи ин кишварро ширкате барқарор хоҳад кард, ки дар озмун пирӯз мешавад.

"Санадҳои марбут ба бозсозии обанбор баъди гузаронидани ташхиси байналмилалӣ дар озмун гузошта мешаванд. Ин озмун шаффоф хоҳад буд. Дар он кӣ баранда мешавад, вақт нишон хоҳад дод. Пешакӣ чизе гуфтан душвор аст. Санаи оғози бозсозӣ ҳам маълум нест. Барқарор сохтани садди обанбор вақти зиёдеро мегирад ва набояд дигар шитоб кард", - изҳор дошт Зокиров.

Ба гуфтаи вазир, бо пешниҳоди девони вазирони Узбекистон қароре таҳия шудааст, ки бозсозӣ ва пардохти ҷуброни зарари рахна шудани садди обанбори Сардобаро бар зиммаи ширкатҳои "ТупалангсувГЭСкурилиш" ва "Роҳи оҳани Узбекистон" вогузор мекунад. "Онҳо корҳоро дар асоси лоиҳа аз ҳисоби худ анҷом медиҳанд. Аз буҷаи давлат ҳеч гуна маблағе ҷудо намешавад", - афзуд вазир.

Садди обанбор 1 майи соли гузашта канда шуд ва боиси марги шаш тан гардид. Ҳамзамон наздики 70 ҳазор кас ба ҷои амн кӯчонида шуд. Дар хулосаи тафтишот гуфта шудааст, ки иштибоҳу норасоӣ дар ҳуҷҷатгузорӣ, сохтмон ва истифодаи обанбор боиси рахна шудани сад гардидааст.

Обанбори Сардоба соли 2017 бо харҷи 404,4 миллион доллар сохта шуда буд. Дар пайи рахнаи он чанд минтақаи Узбекистон ва Қазоқистон зери об монд.

Дар Узбекистон мансабдорон аз забони давлатӣ имтиҳон месупоранд

Имтиҳони забондонӣ дар Узбекистон. Акс аз бойгонӣ

Сардори Шуъбаи рушди забони давлатии девони вазирони Узбекистон Абдуғаффор Қирғизбоев рӯзи 2-юми март гуфт, дар ин кишвар минбаъд ҳар мансабдоре, ки ба вазифаи раҳбарӣ пешниҳод мешавад, аз забони давлатӣ имтиҳон месупорад.

Ба гуфтаи Қирғизбоев, соли гузашта роҷеъ ба рушди забонӣ давлатӣ дар Узбекистон 17 санади меъёрӣ-ҳуқуқӣ, аз ҷумла ду фармони президент, ду қарор, 1 қонун ва 12 қарори ҳукумат ба имзо расидааст.

Тибқи яке аз фармонҳои президенти Узбекистон Шавкат Мирзиёев, аз 1 апрели соли 2021 сатҳи забондонии хидматчиёни давлатӣ муайян ва баъди супоридани имтиҳон аз забони давлатӣ ба мансабдорон шаҳодатнома дода мешавад.

Бо ин фармон ҳамчунин консепсияи рушди забони узбекӣ ва такмили сиёсати забонӣ барои солҳои 2020-2030 тасдиқ шудааст.

Раиси "Внуково": Шояд моҳҳои апрелу май парвозҳо ба Тоҷикистон барқарор шаванд

Фурудгоҳи "Внуково"-и Маскав. Январи соли 2021

Яке аз раҳбарони фурудгоҳи “Внуково”-и шаҳри Маскав изҳори умед кард, ки эҳтимол дар моҳҳои апрелу май парвозҳо ба самти Узбекистону Тоҷикистон барқарор хоҳанд шуд.

Виталий Вантсев, раиси шӯрои мудирони фурудгоҳи байналмилалии “Внуково”, дар сӯҳбат бо журналистон 3-юми март гуфт: “Умедворем, парвозҳо ба самти кишварҳои шарики мо дар СНГ, пеш аз ҳама Узбекистону Тоҷикистон дубора боз мешаванд. Дар он кишварҳо вазъи эпидемиологӣ назар ба мо беҳтар аст. Шумо медонед, ки ин ҷо ҳам вазъ мӯътадил мешавад, ба ҳамин хотир умедворем, дари ин бозорҳо ба рӯи мо кушода мешаванд. Ин бозорҳои бисёр калон ҳастанд.”

Ба қавли ӯ, азсаргирии парвозҳои маъмулӣ дар самтҳои байналмилалӣ ё хориҷаи дур эҳтимол дар моҳҳои августу сентябри имсол имконпазир хоҳанд шуд.

Ӯ гуфт: “Бо ифтитоҳи парвозҳои байналмилалӣ интизор дорем, ки ҳаракати мусофирон ҳам барқарор мешавад. Фикр мекунам, ки ҳамаи парвозҳои байналмилалӣ то августу сентябр боз мешаванд”.

Вантсев гуфт, соли 2020 фурудгоҳи “Внуково” ба 12,56 миллион мусофир хидмат расонидааст ва умедвор аст, ки соли 2021 ин омор 11-43 дарсад афзоиш меёбад. Айни замон, ӯ афзуд, ки бисёр нақшаҳо ҳоло ғайри қобили пешбинӣ ҳастанд ва чизе кафолат дода намешавад.

Интизорӣ аз барқарории парвозҳо ба самти Русия барои садҳо ҳазор шаҳрвандони Тоҷикистон, ки дар Русия дунболи кору даромад мегарданд, яке аз масъалаҳои сахттарини даврони пандемияи коронавирус шуд.

Ҳизби "Фидес"-и Венгрия аз узвияти ҳизби мардумии Аврупо хориҷ шуд

Ҷаласаи парлумони Венгрия

Баъди қабули муқаррароти нав, ҳизби ҳокими Венгрия “Фидес” аз узвияти Ҳизби мардумии Аврупо дар парлумони Аврупо хориҷ шуд. Нахуствазир Виктор Орбан раҳбари гурӯҳи парлумонии Ҳизби мардумии Аврупо Манфред Веберро дар ин бора дар як номае огаҳ кард, ки дар саҳифааш дар Твиттер матни онро нашр намуд. Қарори мазкур дар ҳоле гирифта шуд, ки ҳизби аврупоӣ барои аз ҳайаташ берун кардани ҳизбҳои дигар қарори дохилӣ қабул кард. Ин қарор ба вакилони ҷудогона рабт надорад. Тасмими мазкурро ҳамчун талоши аз ҳайати парлумонии ҳизби аврупоӣ хориҷ кардани “Фидес” арзёбӣ карданд. Орбан инро “як иқдоми душманона алайҳи “Фидес” номид ва тасмимро “ғаридемократӣ, ноодилона ва ғайри қобили қабул” хонд. Гурӯҳи Ҳизби мардумии Аврупо, ки ба он муҳофизакорони ҳизби садри аъзами Олмон Ангела Меркел ҳам шомил мебошанд, давоми солиёни зиёд аст, ки бо “Фидес” дар ҳолати таниш қарор дорад. Узвияти ҳизби ростгарои Венгрия дар ҳизби аврупоӣ, ки аз соли 2010 ҳафтод дарсади курсиҳои парлумони Венгрияро дар ихтиёр дорад, соли 2018 боздошта шуд, вале ҳанӯз ҳам 12 вакилаш дар гурӯҳи парлумонӣ ҳузур доранд. Иттиҳоди Аврупо давоми муддати тӯлонӣ Орбан ва ҳукуматашро дар ба ҳам задани озодиҳои демократӣ, матбуот, созмонҳои маданӣ ва ҳам қонун айбдор кардааст.

Мушакборони болои пойгоҳи низомии амрикоиҳо дар Ироқ

Акси пойгоҳи Айн ал-Асад, воқеъ дар вилояти ғарбии Анбар аз баландии чархбол бардошта шудааст

Эътилофи низомии амрикоиҳо дар Ироқ гуфтанд, ба пойгоҳи низомие, ки макони истиқрори нирӯҳои амрикоиву эътилофӣ мебошад, дастикам 10 мушак партоб шуд. Полковник Вайн Маротто гуфт, мушакҳо соати 7:20 субҳи рӯзи 3 март ба пойгоҳи Айн ал-Асад, воқеъ дар вилояти ғарбии Анбар асобат карданд. Низомиёни ироқӣ гуфтанд, ки ин ҳамла хисороти ҷиддие дар пай надошт ва нирӯҳои амниятӣ маконеро ошкор карданд, ки аз он ҷо мушакҳо партоб шудаанд. Франс Пресс бо такя ба манбаъҳои амниятӣ навишт, ки мушакҳо сохти эронии навъи “Ораш” буданд.

Як манбаи амниятӣ ба ин оҷонсӣ гуфтааст, ки дар паи ин ҳодиса як сарбози қарордодӣ, ки шаҳрвандиаш маълум нест, аз сактаи қалбӣ ҷон дод. Дар пойгоҳи Айн ал-Асад нирӯҳои ироқӣ ва ҳам амрикоиву эътилофӣ мустақар шудаанд, ки бо бозмондаҳои ДОИШ меҷанганд. 16 феврал ҳам дар як мушакборон болои пойгоҳи ироқие дар минтақаи Курдистони шимолӣ як коргари қарордодӣ кушта ва як низомии амрикоиву чанд сарбози эътилофӣ маҷрӯҳ шуданд.

Ин ҳодиса дар ҳолест, ки ду рӯз баъд қарор аст попи Рум Франсис ба Ироқ сафар кунад. Раҳбари католикҳои ҷаҳон дар изҳороте 3 март гуфт, ки сафари серӯзааш ба Ироқ ба он хотир анҷом мешавад, ки “мардуми Ироқ интизори мо ҳастанд”. Ӯ бо ишора ба бекор шудани нақшаи боздид аз Ироқ дар соли 2000-ум аз ҷониби раҳбари пешини католикҳои ҷаҳон Иоан Павели Ду гуфт, “ин навбат мардумро ноумед кардан нашояд”.

Рад шудани қарори барканории фармондеҳи ситоди Арманистон бӯҳронро амиқтар кард

Рӯзи 2 март дар як қабристони низомии Ереван сарбозони дар ҷанги Қаробоғи Кӯҳӣ кушташударо дафн карданд

Президенти Арманистон рӯзи 2 март фармони аз кор барканор кардани фармондеҳи артишро рад кард ва бӯҳрони сиёсии ин кишвар боз ҳам амиқтар гардид. Нахуствазир Никол Пашинян ҳафтаи гузашта дар посух ба талаби истеъфои ӯ аз ҷониби фармондеҳони низомӣ посухи рад дода низомиёнро дар талоши табаддулоти давлатӣ гунаҳгор кард ва фармони аз мақом барканор кардани раҳбари артишро имзо кард. Президенти кишвар Армен Саркисян, ки мақомаш бештар ифтихорӣ аст, рӯзи 2 март гуфт, ки бори дуюм фармони аз кор барканор кардани фармондеҳи ситод Оник Гаспарянро рад мекунад. Бо ин вуҷуд, президент мутобиқи конститутсия будани дурустии аз кор барканор кардани Гаспарянро дархост накард ва дар ин ҳолат, ба қавли ҳуқуқшиносон, дар сурати то 4 март ба додгоҳи олӣ ирсол нашудани ин қазия, фармони барканорӣ ба таври расмӣ ба ҳукми иҷро медарояд. Дар Арманистон таниши сиёсӣ хеле пуршиддат боқӣ мемонад ва мухолифон, ки талаби истеъфои нахуствазир Пашинян ва ҳукуматашро талаб доранд, ба тазоҳуроти худ идома медиҳанд. Имзои созиши сулҳ бо Озарбойҷон моҳи ноябри порсол барои хатми ҷанги шашҳафтаина дар минтақаи ҷудоиталаби Қаробоғи Кӯҳӣ боиси норизоияти шадид аз Пашинян ва ҳукумати ӯ шудааст.

Манбаъҳо: домоди Мирзиёев баъди садамаи мудҳише барои табобат ба Корея интиқол ёфт

Отабек Умаров бо либоси низомии корӣ

Чандин манбаи наздик ба ҳукумати Узбекистон ва хонаводаи президенти ин кишвар Шавкат Мирзиёев гуфтанд, ки домоди ӯ баъди ҷароҳатҳои сангинаш дар Тошканд барои муолиҷаи тиббӣ ба Кореяи Ҷанубӣ интиқол дода шуд. Манбаъҳо мегӯянд, Отабек Умаров, ҳамсари Шаҳноза - духтари дуюми Мирзиёев 13 феврал дучори садамаи нақлиётӣ шуда аз сар ва поҳояш ҷароҳатҳои сангин бардоштааст. Манбаъҳои Радиои Озодлик, бахши Узбекии Радиои Озодӣ гуфтанд, ки президент Мирзиёев амр дод, ки дар робита бо садамаи мудҳиши домодаш нисбати чанд корманди амнияти хусусии ӯ тафтишоти дохилӣ анҷом шавад. Бархе нафароне, ки аз онҳо ҳамчун “атлет” ё варзишгар ном мебаранд ва дар лаҳзаи вуқӯи садама дар ҷои ҳодиса қарор доштанд, ҳамчунин мавриди тафтиш қарор дода мешаванд. Манбаъҳо гуфтанд, ки дафтари корӣ ва толорҳои варзишӣ дар Тошканд, ки таҳти назари тиҷоратҳои хусусии Умаров буданд, баста шуданд.

Ба иттилои манбаъҳо, Умарови 36-сола, муовини раиси амнияти хусусии президент Мирзиёев ва ҳам “варзишгарон” дар шаҳри Тошканд ҳар сари чанд вақт бо мошинҳои худ пойга ташкил карда, “ҳолати хатарноки нақлиётӣ” эҷод мекарданд. Талошҳои Радиои Озодлик барои фаҳмидани ҷузъиёти қазия аз сохторҳои додситонии кулл, вазорати умури дохилӣ ва мақомоти шаҳри Тошканд бенатиҷа анҷомид.

Айни замон, дар робита бо гузоришҳо аз садамаи нақлиётие бо иштироки Умаров, полиси Тошканд гуфт, ки дар миёнаҳои моҳи феврал чунин “садамаи нақлиётие расман ба қайд гирифта нашудааст”.

Як устоди донишгоҳи Кобул кушта шуд

3 март дар Ҷалолобод маросими дафни се ҷавонзани корманди ТВ "Инъикос" баргузор шуд, ки як рӯз пеш аз тири ҳамлагарони мусаллаҳ кушта шуданд

Як рӯз баъди қатли се корманди телевизиони Ҷалолобод, рӯзи 3 март як профессори донишгоҳи Кобул аз тири мусаллаҳони ношинос кушта шуд. Сухангӯи полиси Кобул гуфт, ки устоди донишгоҳ Файзмуҳаммад Файз дар роҳ ба масҷид барои намозхонӣ буд, ки ҳадафи ҳамлагарон қарор гирифт. Ҳеҷ нафар ё гурӯҳе феълан масъулияти ин ҳамларо ба дӯш нагирифтааст. Ду ҳафта пеш аз ин ду устоди дигари донишгоҳи Кобул бар асари таркиши мошини бомбогузоришуда кушта шуданд. Ин ҳодисаро ҳам касе ба дӯш нагирифт.

Гурӯҳи ифротгарои “Давлати исломӣ” иддао кард, куштори се ҷавонзанеро, ки дар телевизиони шаҳри Ҷалолободи Афғонистон кор мекарданд, ин созмон анҷом додааст. Ба иттилои SITE Intelligence Group, ки фаъолияти ҷангҷӯёнро пайгирӣ мекунад, куштори рӯзи 2 март дар маркази вилояти Нангарҳор кори дасти гурӯҳи ДОИШ-и воқеъ дар Афғонистон аст. Ба иттилои раҳбарияти ТВ “Инъикос”, се корманди кушташудаи телевизион 18 то 20-сола буданд ва тоза баъди хатми мактаби олӣ ба кор шурӯъ карда буданд. Ин ҷавонзанҳо ба ҳангоми бозгашт аз кор ба хона ҳадафи тири ҳамлагарон қарор гирифтанд.

Ҷумъагул Ҳиммат, раиси полиси Нангарҳор дар бораи куштори се кормнади телевизион ба Радиои “Афғонистони озод” гуфт: “Иттилое, ки мо дорем, мутаассифона, ин аст, ки се хоҳари мо куштаву ду нафари дигарашон маҷрӯҳ шуданд. Террористи номӣ Қорӣ Басир, ки ин корро раҳбарӣ кардааст, бо силоҳ ба даст савори рикшае боздошт шуд. Таҳқиқот ба роҳ монда шудааст. Басир ба Толибон иртибот дорад ва дар Покистон тамрин гирифтааст”

Моҳи декабр ҳам гурӯҳи “Давлати исломӣ” масъулияти куштори як барандаи телевизиони “Инъикос” ва ронандаашро дар Ҷалолобод ба дӯш гирифта буд.

Дар Афғонистон давоми моҳҳои охир аз афзоиши ҳодисаҳои қатли ҳадафмандонаи журналистон, фаъолони ҷамъиятӣ ва мақомоти кишвар изҳори нигаронӣ мешавад ва ин дар ҳолест, ки музокироти сулҳи ҳукумати Афғонистон ва гурӯҳи шӯришии Толибон дар шаҳри Давҳаи Қатар як сол аст идома дорад.

Маскав дар вокуниш ба таҳримҳо Ғарбро таҳдид кард, ки "бо оташ бозӣ накунанд"

Мария Захарова, сухангӯи вазорати хориҷаи Русия

Дар вокуниш ба таҳрими мақомдорони калони Русия аз ҷониби ИМА ва ИА ба хотири заҳролуд ва зиндоникунии Алексей Навалний, Маскав Ғарбро ҳушдор дод, ки “бо оташ бозӣ накунад”. Мария Захарова, сухангӯи вазорати хориҷаи Русия рӯзи 2 март бо нашри изҳороте таҳримҳои тоза ҷоришударо “иқдоми душманона нисбати Русия” номид. Ӯ гуфт, бо сабаби заҳролудкунии Навалний ҷорӣ кардани таҳримҳо “баҳонаи дахолати идомаёбанда ба умури дохилии мо аст ва мо инро ҳеҷ гоҳ қабул нахоҳем кард”. Вашингтон 2 март гуфт, ки ҳафт мақомдори Русия, аз ҷумла муовини раиси ситоди президент Владимир Путин таҳрим мешаванд. Дар изҳороти Вашингтон гуфта шуд, ки таҳқиқи ниҳодҳои иктишофии ИМА маълум кард, ки дар паси заҳролудкунии мунаққиди Кремлин Алексей Навалний афсарони ФСБ-и Русия қарор доранд. Қабл аз ин, ИА гуфт, ки чор мақомдори калони Русия таҳрим мешаванд.

ДОИШ масъулияти куштори се ҷавонзани корманди ТВ-и Ҷалолободро ба дӯш гирифт

2 март, беморхонаи Ҷалолобод. Дар ҳодисаи ҳамла ба кормандони ТВ "Инъикос" аз ҷумла як зани дигар маҷрӯҳ шуд

Гурӯҳи ифротгарои “Давлати исломӣ” иддао кард, куштори се ҷавонзанеро, ки дар телевизиони шаҳри Ҷалолободи Афғонистон кор мекарданд, ин созмон анҷом додааст. Ба иттилои SITE Intelligence Group, ки фаъолияти ҷангҷӯёнро пайгирӣ мекунад, куштори рӯзи 2 март дар маркази вилояти Нангарҳор кори дасти гурӯҳи ДОИШ-и воқеъ дар Афғонистон аст. Ба иттилои раҳбарияти ТВ “Инъикос”, се корманди кушташудаи телевизион 18 то 20-сола буданд ва тоза баъди хатми мактаби олӣ ба кор шурӯъ карда буданд. Ин ҷавонзанҳо ба ҳангоми бозгашт аз кор ба хона ҳадафи тири ҳамлагарон қарор гирифтанд.

Моҳи декабр ҳам гурӯҳи “Давлати исломӣ” масъулияти куштори як барандаи телевизиони “Инъикос” ва ронандаашро дар Ҷалолобод ба дӯш гирифта буд.

Дар Афғонистон давоми моҳҳои охир аз афзоиши ҳодисаҳои қатли ҳадафмандонаи журналистон, фаъолони ҷамъиятӣ ва мақомоти кишвар изҳори нигаронӣ мешавад ва ин дар ҳолест, ки музокироти сулҳи ҳукумати Афғонистон ва гурӯҳи шӯришии Толибон дар шаҳри Давҳаи Қатар як сол аст идома дорад.

Бонки Осиёии Рушд ба Тоҷикистон 105 миллион доллар медиҳад

Ҳисобкунакҳои барқ. Акс аз бойгонӣ.

Тоҷикистон аз Бонки Осиёии Рушд 105 миллион доллар қарзи бебозгашт мегирад. Мақомот гуфтанд, ин маблағ барои "рушди соҳаи энержӣ" ва "коҳиши талафоти нерӯи барқ" истифода мешавад.

Файзиддин Қаҳҳорзода, вазири молияи Тоҷикистон, рӯзи 3-юми март дар порлумон гуфт, дар чаҳорчӯби тавофуқнома хариду насби 398 ҳазор ҳисобкунакҳои муосир пешбинӣ шудааст.

Ба гуфтаи ӯ, аз 105 миллион доллар гранти БОР, 70 миллион доллари он барои коҳиши талафоти барқ ва рушди низоми биллингӣ ва боқимонда ба бахшҳои дигари арсаи энержӣ харҷ мешавад.

Ҷалби миллионҳо доллар грант барои беҳбуди бахши энержӣ дар ҳолест, ки ҳоло дар минтақаҳои кишвар расман шабона лимити барқ ҷорист ва бо гарм шудани ҳаво ҳам ҳанӯз ин маҳдудият идома дорад.

Масъулони ширкати "Барқи Тоҷик" дар муроҷиати расмии худ гуфтанд, маҳдудият танҳо ба аҳолии рустонишин дахл дорад ва ба сокинони биноҳои баландошёна рабт намегирад. Интиқоли барқро дар деҳот аз соати 23 то 6-и субҳ қатъ мекунанд.

Ёфтҳои бештар

XS
SM
MD
LG