Пайвандҳои дастрасӣ

Хабари нав

Аббос Неъматуллоев: "Роҳхати олимпӣ гирифтем, аммо то ба ҳол қадрдонӣ нашудем". САДО


Аббос Неъматуллоев, мураббии варзидаи бокс.
Аббос Неъматуллоев, мураббии варзидаи бокс.

Чунонки маълум аст, Бозиҳои тобистонаи олимпии соли 2020 дар Токио ба иллати пандемияи коронавирус дар ҷаҳон ба соли 2021 гузаронида шуданд. Ин тасмим аз ҷониби Кумитаи байналмилалии олимпӣ ва Кумитаи тадорукоти бозиҳо гирифта шудааст.

Мавқуф гузоштани Бозиҳои XXXII тобистонаи олимпӣ ба як сол дар ҷомеаи варзишӣ мавриди баҳс қарор гирифтааст. Мураббии варзидаи бокс Аббос Неъматуллоев, ки шогирд ва писараш Шаббос Неъматуллоев, муштзани маъруфи тоҷик, дар вазни то 81 кило соҳиби роҳхат ба Олимпиадаи Токио гардидааст, дар як сӯҳбати ихтисосӣ бо Радиои Озодӣ роҷеъ ба масъала суҳбат кард ва ба суолҳои дигар низ посух дод.

Радиои Озодӣ: Муҳтарам Неъматуллоев дар бораи ба соли 2021 гузаронидани Олимпиадаи Токио-2020 чӣ назар доред?

Аббос Неъматуллоев: Ин ташаббуси ташкилкунандагони Бозиҳои олимпӣ, инчунин тасмими Кумитаи байналмилалии олимпӣ, ба фикри ман, дуруст аст. Ҳоло дар ҷаҳон хатари ҷиддӣ коронавирус аст. Бинобар ин, чунин тасмим барои он гирифта шуд, ки паҳншавии вирус дар тамоми ҷаҳон пешгирӣ карда шавад. Пеш аз ҳама, ин барои бехатарии варзишгарон, иштиркунандагон, сайёҳон аст. Ман ба таъхир гузоштани Бозиҳоро ҷонибдорӣ мекунам.

Шаббос Неъматуллоев яке аз ду варзишгари тоҷик мебошад, ки ба Бозиҳои олимпӣ роҳхат гирифтааст.
Шаббос Неъматуллоев яке аз ду варзишгари тоҷик мебошад, ки ба Бозиҳои олимпӣ роҳхат гирифтааст.


Радиои Озодӣ: Ба таъхир гузоштани Бозиҳо ба омодагии варзишгарон чӣ гуна таъсир мерасонад?

Аббос Неъматуллоев: Ба таъхир гузоштани Олимпиада ба варзишгарон таъсири мусбат мерасонад, зеро ки дар ин муддат имкон пайдо мешавад, ки ба Бозиҳо хубтар омодагӣ бигиранд. Ҳоло қариб дар тамоми ҷаҳон чорабиниҳои варзишӣ қатъ карда шудаанд. Варзишгарон машқҳо мегузаронанд, аммо бе рақобат. Дар робита ба ин, нигоҳ доштани омодагии варзишӣ хеле мушкил аст. Бо вуҷуди ин, мо кори худро идома медиҳем. Ман боварӣ дорам, ки ба зудӣ ин вазъияти душвор беҳтар хоҳад шуд.

Радиои Озодӣ: Ҳамакнун ба Олимпиада чӣ тавр омодагӣ мегиред? Нақшаҳоятон чӣ гуна аст?

Аббос Неъматуллоев: Муҳим аст, ки мо солро бо руҳияи мусбат ба итмом расонем. Дар Олимпиада рақибони мо варзишгарони касбӣ хоҳанд буд ва дар ин асос, мо бояд ҳаматарафа омода шавем, аз таҷҳизоти варзишӣ сар карда, то натиҷаҳоямон. Умедворам, ки ба туфайли дастгирии давлат ва роҳбарияти федератсия мо ба муваффақиятҳои бузург ноил хоҳем шуд. Вале ҳоло мушкилоти зиёд дорем. Ба шогирдам Шаббос моҳе ба маблағи 350 доллар стипендия дода мешавад, ки ин барои омодагии ҳамаҷониба хеле кам аст. Мо кӯшиш мекунем, ки маблағ пайдо кунем ва дар мусобиқаҳо иштирок намоем.

лутфан мунтазир бошед

Феълан кор намекунад

0:00 0:10:11 0:00
Линки мустақим


Радиои Озодӣ: Ду роҳхате, ки то ҳоло варзишгарони тоҷик ба Олимпиадаи Токио гирифтаанд, якеашро муштзани машҳур Баҳодур Усмонов ва дувумиро Шаббос ба даст овардаанд. Барои чунин дастовард шуморо чӣ гуна қадрдонӣ карданд?

Аббос Неъматуллоев:То ҳоло ҳеҷ гуна қадрдонӣ нашудаем. Баъди бозгашт аз Урдун дар хонаем, вале то имрӯз аз масъулини соҳа касе ба мо занг назадааст, ба ягонҷо даъват нашудаем. Ба чунин хулоса омадам, ки роҳхат ба Тоҷикистон зарур набудааст, касе парво ҳам надорад.

Радиои Озодӣ: Зимнан, барои онҳое, ки ба Олимпиадаи Рио-де-Жанейро-2016 роҳхат гирифта буданд, мукофотпулӣ ба маблағи 10 ҳазор сомонӣ супурда мешуд, ҳоло чӣ?

Аббос Неъматуллоев: Бале, он замон ин маблағ якуним ҳазор доллар мешуд. Соли 2016 ба шогирдам Анвар Юнусов, ки ба Олимпиадаи Рио роҳхат гирифта буд, мукофоти молӣ тақдим гардид. Ман соли 2008 се муштзанро ба Пекин бурда будам. Пешакӣ Кумитаи миллии олимпии Тоҷикистон эълон карда буд, ки гирандагони роҳхатҳои олимпӣ бо ҷоизаҳои молӣ сарфароз мешаванд. Вале ҳоло чунин мукофотпулӣ нест. Шаббос баъди бозгашт аз мусобиқаи интихобии олимпӣ ба Кумитаи олимпӣ рафт ва пурсон шуд, ки оё маблағи стипендияааш зиёд мешавад? Вале посух доданд, ки ҳоло имкон нест. Ҳамон 350 доллар боқӣ мемонад. Дар Қазоқистон 5 ҳазор доллар, дар Узбекистон 2 ҳазор доллар стипендия медиҳанд, ки ин барои ғизо ва либос аст, барои иштирок дар мусобиқаҳо боз маблағи алоҳида медиҳанд. Бояд гуфт, ки чор сол боз ба мусобиқаҳои байналмилалӣ ман ҳамчун мураббӣ аз ҳисоби худам меравам. Ба Урдун бо пули қарзкардаам рафтам. Аз Кумитаи олимпӣ хоҳиш кардам маблағро пардохт намояд, вале маълум нест, ки пули харҷшударо медиҳанд ё не?

Шаббос Неъматуллоев.
Шаббос Неъматуллоев.


Радиои Озодӣ: Боз як мусобиқаи интихобии ҷаҳонии олимпӣ барои дарёфти роҳхатҳо ба Олимпиадаи Токио бояд дар Фаронса баргузор шавад, шумо аз муштзанҳои тоҷик чиро интизоред?

Аббос Неъматуллоев: Ин мусобиқаи ҷаҳонӣ бояд моҳи май доир мегашт, вале он ба таъхир гузошта шуд. Шояд моҳҳои июн-июл баргузор шавад. Ман, албатта, мехоҳам, ки муштзанҳои дигари тоҷик боз соҳиби роҳхатҳои олимпӣ шаванд. Вале, ба назари ман, ин кори хеле мушкил аст. Дар ин мусобиқа медали биринҷӣ ҳам бигирӣ, боз барои роҳхат мубориза мебарӣ. Бо зӯртарин муштзанҳои дунё рақобат кардан кори осон нест.

Радиои Озодӣ: Аз нигоҳи шумо барои муваффақ шудани варзишгарони тоҷик дар Бозиҳои олимпӣ чӣ чизҳо аз ҳама зурурист?

Аббос Неъматуллоев: Ба назари ман, бояд пеш аз ҳама раҳбарони соҳа, федератсияҳои варзишӣ ба варзишгарон ва мураббиён таваҷҷуҳ намоянд, кӯмак кунанд, аз ҳолашон ҳамеша бохабар бошанд. Солҳои пеш ҳангоми омодагӣ ба Бозиҳои олимпии солҳои 2008, 2012 ва 2016 таваҷҷуҳ ба омодагии варзишгарон хеле ҷиддӣ буд. Ин фикри шахсии ман аст.

Радиои Озодӣ: Шаббос дар чанд соли ахир ба натиҷаҳои баланд, минҷумла қаҳрамони ҷаҳон миёни донишҷӯён мушарраф шудааст. Оё дар тули ин солҳо касе ба шумо кӯмак накардааст?

Аббос Неъматуллоев: Ба Шаббос, ки аз 11-солагиаш ба бокс машғул аст, раиси Корхонаи воҳиди давлатии “Роҳи оҳан”-и Тоҷикистон Мирзоалӣ Комил Ҷумъахон кумак мерасонад. Маҳз бо ёрдами ӯ мо дар мусобиқаҳои байналмилалӣ ширкат меварзем. Мо дар толори бокси варзишгоҳи “Локомотив” машқ мекунем, ки бароямон тамоми шароитҳо муҳайёст.

Корбарони азиз!

Ҳангоми навиштани шарҳ аз истифодаи таҳқиру тӯҳмат нисбат ба якдигар, намояндагони қавму миллатҳо ва динҳои гуногун худдорӣ кунед. Шарҳҳое, ки дорои туҳмату таҳқир, дашном ва иттилооти дурӯғанд ё гурӯҳеро таблиғ мекунанд, нашр карда намешаванд!

XS
SM
MD
LG