Дар чанд ҷумла
Хонаводаи дипломати зиндонии узбек аз СММ кумак мехоҳанд
Наздикони корманди пешини Вазорати умури хориҷии Узбекистон Қодирҷон Юсупови 69-сола, ки бо ҷурми хиёнат ба давлат беш аз 5 сол зиндонӣ шудааст, муроҷиатномаеро ба унвонии Гуруҳи кории СММ оид ба боздоштҳои худсарона омода доранд.
Ҷеффрӣ Робертсон аз "Queens Council", бунёдгузор ва раҳбари ширкати ҳуқуқии "Doughty Street Chambers", ки бо ҳимояти ҳуқуқи инсон ва озодиҳои шаҳрвандӣ машғул аст, барои хонаводаи Юсупов ба ҳайси мушовир кироя шудааст. Ба гуфтаи Робертсон, ӯ дар ҳоли ҳозир аз номи Юсупов муроҷиатномаеро ба унвонии Гуруҳи кории СММ омода дорад.
Наздикони Юсупов мегӯянд, ӯ аз бемории равонӣ ранҷ мебарад, вале мақомот вайро баъди талоши худкушияш боздошт карда, дар хиёнат ба давлат айбдор намуданд. Кормандони Хадамоти амнияти давлати Узбекистон Юсуповро дар бемористон бозпурсӣ карда, ӯро дар асоси баёноте зиндонӣ кардаанд, ки дар рахти хоб гуфта буд.
Юсупов дар сафорати Узбекистон дар Австрия, Бритониё ва Шарқи Наздик, инчунин намояндаи доимии Узбекистон дар СММ ва САҲА фаъолият кардааст. Вай солҳои 2002-2005 сухангӯи Вазорати корҳои хориҷии кишвараш низ буд.
Қодирҷон Юсупов, ки солҳои тӯлонӣ аз бемории равонӣ ранҷ мебарад, 3 декабри соли 2018 талош кард, худро зери чархи қатора партояд. Вай аз ин талоши худкушӣ ҷон ба саломат бурд, аммо захмӣ ва бистарӣ шуд. Дар бистари беморӣ дар ҳолати бехудӣ вай гуфтааст, ки "ҷосуси ғарбӣ" аст. Мақомоти қудратӣ дар асоси ин "изҳорот" зидди вай парванда боз карданд.
Мақомот Юсуповро 9 декабри соли 2018 аз бемористон ба боздоштгоҳ бурданд. Созмони байналхалқии ҳомии ҳуқуқи "Human Rights Watch" (HRW) моҳи июни соли 2019 аз Тошканди расмӣ даъват карда буд, ки дипломати пешин Қодирҷон Юсуповро фавран аз зиндон раҳо кунад.
Ҳамаи хабарҳои имрӯзро дар инҷо бихонед
На беш аз 1 миллион рубли нақд. Маҳдудияти нав дар Русия
Шаҳрвандони 7 кишвар, аз ҷумла Тоҷикистон, аз баровардани пули зиёди нақд аз Русия маҳрум шудаанд.
Қарорро дар ин бора Владимир Путин, раисҷумҳури Русия, рӯзи 29-уми сентябр имзо кард.
Акнун шаҳрвандони Арманистон, Беларус, Қазоқистон, Қирғизистон (кишварҳои узви Иттиҳгоди иқтисодии АвруОсиё) ва инчунин Тоҷикистону Узбекистон ва Озарбойҷон ҳақ доранд, танҳо то 1 миллион рубли нақд (баробар ба дувоздаҳ ҳазор доллар)-ро аз Русия берун баранд.
Пештар як мусофир ҳақ дошт, аз Русия то 8,5 миллион рубли нақд, муодили 100 ҳазор долларро бо худ гирад.
Рӯзноманигор ва иқтисоддони тоҷик Пайрав Чоршанбиев дар суҳбат бо Радиои Озодӣ гуфт, тасмими Путин бештар на ба миқдори пул, балки ба шеваи интиқоли пули муҳоҷирон метавонад таъсир гузорад.
Ӯ афзуд: “Муҳоҷироне ҳастанд, ки моҳҳои дароз дар Русия кор карда, барои харидани мошину бунёди хона ё баргузории тӯю маърака ва хароҷоти дигари калон пулҳои ҷамъкардаи худро нақд ба Тоҷикистон меоранд. Ин гурӯҳи муҳоҷирон акнун маҷбур мешаванд, аз хадамоти бонкӣ ва интиқоли расмии пул истифода кунанд,” -- гуфт Чоршанбиев.
Аз моҳи марти соли 2022 дар Русия берун бурдани пул (асъор)-и хориҷӣ ба миқдори беш аз 10 ҳазор доллар манъ аст.
Ду кушта ва чор захмӣ дар ҳамлаҳои Русия ба Киев
Мақомоти Украина рӯзи 30-юми сентябр гуфтанд, дар ҳамлаи мушакӣ ва паҳподии Русия ба Киев ва минтақаҳои атрофи он, ду кас, аз ҷумла як кӯдак кушта ва чаҳор тани дигар захмӣ шудаанд.
Тимур Ткаченко, раиси вилояти Киев, дар саҳифааш дар Телеграм навишт, пайкар ё ҷасади як кӯдаки кушташударо аз зери вайронаҳо берун овардаанд.
Ӯ афзуд, дар ин ҳамла хонаҳои мардум, анбору мошинҳо ва биноҳои дигари иҷтимоӣ низ осеб дида, дар чанд гӯша сӯхтор сабт шудааст.
Нерӯҳои ҳавоии Украина эълон карданд, ки Русия дар тӯли шаб бо чанд мушаки баллистикӣ ва 188 паҳпод ба Украина ҳамла кард ва вилояти Киев ҳадафи асосияш буд.
Русия дар ҳафтаҳои охир ҳамлаҳои худро ба пойтахти Украина шиддат бахшидааст.
Вазорати дифои Русия 30-юми сентябр тасдиқ кард, ки ба он чи як маркази иртиботот ва зербунёди энергетикии пуштибони тавлидоти низомӣ дар Киев ва минтақаҳои атрофи он меномад, бо истифода аз “силоҳҳои дақиқи дурбурд ва паҳподҳои ҳамлавар” “ҳамлаи густарда” анҷом додааст.
22 хориҷиро дар Душанбе бо гумони танфурӯшӣ дастгир кардаанд
Мақомоти интизомии Душанбе аз боздошти 22 духтари хориҷӣ хабар додаанд, ки ба гуфтаи онҳо ба танфурӯшӣ машғул буданд ва акнун аз Тоҷикистон ихроҷ карда мешаванд.
Раёсати корҳои дохилии пойтахт рӯзи 30-юми сентябр бо нашри баёнияи расмӣ гуфт, ин духтарон дар як марказе, ки хориҷиён иҷора гирифта, ба ҷойи танфӯрушӣ табдил додаанд, кор мекарданд.
"Дар натиҷаи санҷишҳои фаврӣ муайян гардид, ки шаҳрвандони яке аз кишварҳои хориҷӣ дар меҳмонхонаи “Hulbuk Palace” маркази дилхушӣ ташкил намуда, онро ба фоҳишахона табдил додаанд," -- гуфта шудааст дар баёнияи расмӣ.
Шарҳи боздоштшудаҳо дастрас нест.
Мақомот нагуфтаанд, ки онҳо шаҳрвандони кадом кишвар ҳастанд, аммо дар аксҳои нашркардаи мақомот дида мешавад, ки ё аз Чин ё аз ягон кишвари дигари Осиёи шарқӣ ҳастанд.
Дар ду соли охир боздошти духтарони хориҷӣ, бахусус аз Чин бо иттиҳоми танфурӯшӣ дар Тоҷикистон зиёд шудааст.
Аввали моҳи августи имсол мақомоти интизомии Душанбе аз боздошти гурӯҳе аз шаҳрвандони ин кишвари ҳамсоя хабар доданд, ки ба танфурӯшӣ машғул будаанд.
Моҳи октябри соли гузашта ҳам мақомоти интизомии Душанбе аз боздошти як нафар бо иттиҳоми “ташкили фоҳишахона” ва 15 духтаре хабар дода буданд, ки ба танфурӯшӣ машғул будаанд.
Дар Тоҷикистон барои танфурӯшӣ фақат ҷарима таъйин шудааст, вале барои мусоидат ба ин кор ҷазо сахттар ва ҳукми зиндон аст.
Боздошти шаш кас барои ташкили муҳоҷирати ғайриқонунӣ дар Русия
Мақомоти интизомии Русия як гурӯҳеро боздошт кардаанд, ки ба қавли онҳо ба ташкили муҳоҷирати ғайриқонунӣ машғул будаанд.
Вазорати корҳои дохилии Русия рӯзи 27-уми сентябр бо нашри як видео, ки тасдиқи дурустии он аз манобеи мустақил имконпазир нест, гуфт, ин гурӯҳи 6-нафарӣ даҳҳо шаҳрванди хориҷиро дар вилояти Маскав сабти ном кардаанд.
Дар ин видео гуфта мешавад, ки дар байни боздоштшудагон ду корманди идораи муҳоҷирати Русия низ ҳастанд.
Ба қавли намояндаи Вазорати корҳои дохилӣ, ин афрод як шеваи ғайриқонунии сабти расмӣ дар идораҳои муҳоҷират, кори ғайриқонунӣ ва ба даст овардани шаҳрвандии Русияро ба роҳ монда ва барои ин корашон пули зиёд мегирифтанд.
Дар видео дида мешавад, ки чӣ гуна мақомоти интизомӣ аз маҳалли боздошт санадҳои расмӣ, мӯҳр ва дигар ҳуҷҷатҳо мусодира мекунанд.
Дар умум, ба гуфтаи мақомоти Русия, 20 мавриди сабти ғайриқонунии хориҷиён ва муҳоҷирони кориро маълум кардаанд ва айни замон даст доштани афроди дигар ба ингуна фаъолияти ғайриқонунӣ таҳқиқ мешавад.
Мақомоти Русия умдатан худи муҳоҷирони корӣ аз Осиёи Марказӣ, аз ҷумла муҳоҷирони тоҷикро ба кору иқомати ғайриқонунӣ муттаҳам мекунанд.
Бисёр кам иттифоқ меафтад, ки онҳо кормандони идораи муҳоҷират ва ҳам маъмурони милисаро дар мусоидат ба кору муҳоҷирати ғайриқонунӣ ба Русия муттаҳам карда, ба ҷавобгарии ҷиноӣ бикашанд.
Насли бабри барфии Тоҷикистон дар Русия зиёд шудааст
Як бабри барфӣ, ки соли 2019 бо ҳадафи наҷоти ин ҷонвари зебо аз Тоҷикистон ба Русия бурда шуд, ду бачаи нав ба дунё оварда, саршумори умумии бабр ё паланги барфиро дар як мамнуъгоҳи азими ин кишвар ба 21 адад расонидааст.
Раҳбарияти мамнӯъгоҳи Саяно Шушенски Русия гуфтааст, бачаҳои бабри модина, ки “Таджичка” ё “Тоҷик” ном дорад, дар видеоҳои мушоҳидавӣ сабт шудаанд ва ин хабари хуше барои онҳост.
Аз Тоҷикистон ба Русия бурдани бабри барфӣ таҷрибаи нодир дар ҷаҳон ба ҳисоб меравад.
Бабри зодаи Бадахшони Тоҷикистон дар ҳафт соли гузашта 9 бача ба дунё овардааст ва наслҳояш хубу солим ҳастанд.
Ҳадаф аз овардани бабр аз Тоҷикистон ба Саяно Шушенск афзоиши насли бабри барфӣ дар ин мамнуъгоҳи бузург дар вилояти Красноярски Русия будааст.
Ба навиштаи дафтари матбуоти мамнуъгоҳ, бабри Тоҷикистон акнун модарбузург ё бибӣ ҳам шудааст, чун фарзандони аввалини ӯ ҳам соҳиби бача ҳастанд.
Дар Тоҷикистон теъдоди бабри барфӣ афзуда, аз марзи 500 сар гузаштааст. Ин ҷонваре, ки дар вартаи нобудӣ қарор дорад, фақат дар 12 кишвар боқӣ мондааст.
Видеоро дар инҷо бинед:
Даъвати Михаил Галустян ба Тоҷикистон баҳс барангехт
Михаил Галустян, ҳаҷвнигоре аз Русия, ки дар Тоҷикистон ӯро бештар бо нақшҳои таҳқиромезаш дар мавриди муҳоҷирони корӣ мешиносанд, ба шаҳри Душанбе даъват шудааст.
Ин тасмим эътирози баъзе фаъолонро дар шабакаҳои иҷтимоӣ ба бор овард.
"TAS International Group", ки қарор аст дар пойтахти Тоҷикистон бинои баландтаринро бисозад, дар саҳифаҳояш дар шабакаҳои иҷтимоӣ навишт, Галустян 30-юми сентябр дар барномаи фарҳангии ин ширкати сохтмонӣ ҳузур пайдо мекунад.
Намояндагони ширкат ба суоли Радиои Озодӣ дар бораи ҳадафи даъвати Михаил Галустян ҳанӯз посух надодаанд.
Нақши Михаил Галустян дар силсиланамоиши ҳаҷвии “Наша Russia” дар соли 2010 эътирози фаъолони тоҷикро ба бор оварда буд.
Дар ин мазҳакаи телевизионӣ ду муҳоҷири корӣ бо номҳои "Равшан" ва "Ҷамшуд" нодону бесавод тасвир ёфтаанд, ки қоидаҳои одитарини зиндагиро намедонанд ва гуё ба забони тоҷикӣ гап мезананд.
Ин мазҳакаи телевизиониро фаъолони муҳоҷирон таҳқири тоҷикон номида буданд.
Исфандиёри Назар, шоири тоҷик дар саҳифааш дар Фейсбук навиштааст, ки Вазорати корҳои хориҷии Тоҷикистон бояд сафари Михаил Галустянро ба Душанбе лағв кунад. Ӯ гуфтааст, нафаре, ки “миллати моро таҳқир кардааст”, набояд ба Тоҷикистон биояд ва мо ба “таҳқиргари худ каф занем”.
Дар айни замон чанде аз корбарон дар шабакаҳои иҷтимоӣ навиштаанд, ки сафари Михаил Галустян ва дидани Тоҷикистони муосир шояд дидгоҳи ӯ ва ҳамназарашонро тағйир хоҳад дод.
Аммо Орзу Исоев, шоир ва рӯзноманигори тоҷик, дар вокуниш ба даъват шудани Галустян аз Русия ба Душанбе гуфт, “мутмаинам, бо омадану дидани ӯ андешаи соири русҳо, ки дар кишварашон мардуми Осиёи Марказӣ, махсусан тоҷиконро таҳқиру таҳдиду тазйиқ мекунанд, дигар намешавад, зеро сохтор чунин бунёд шудааст."
Ӯ афзуд, "бе Галустян ҳам, русҳои зиёде аз ҷабҳаву ҷанг фирор карда, дар маркази шаҳри Душанбе ва кишварҳои дигар ба фаровонӣ рехтаанд. Мо ҳар рӯз мо онҳоро мебинем. Онҳо аз зебоиҳои Тоҷикистон, аз ободиҳо дар ТикТоку Инстаграм наворҳо пахш мекунанд. Ин, албатта, барои ман қобили қабул аст, аммо ҳеч вақт ба сохторе, ки аслу бунёдаш саркӯбгароёна аст, бо меҳру отифа ҷавоб додан фоида надорад. Инро як навъ тарс мепиндоранд. Галустян меояд, яъне чӣ? Меравад ва саҳначаҳое аз шукӯҳ, шаҳомат ва зебоиҳои мо таҳия мекунад? Ман дар ин марвид шак дорам."
Назари худи ҳунарманд маълум нест.
Михаил Галустян 46 сол дорад ва дар тарҳи телевизионии “Наша Russia” нақши “Равшан”-ро бозӣ кардааст.
Барканории Фарзона Ғафурзода, додраси Додгоҳи Истиқлол
Фарзона Ғафурзода ҳамагӣ пас аз тақрибан якуним сол кор аз мақоми додраси Додгоҳи шаҳри Истиқлол (вилояти Суғд) барканор шудааст.
Фармони аз мақом рондани ӯро Эмомалӣ Раҳмон, раисҷумҳури Тоҷикистон, рӯзи 29-уми сентябр имзо кард.
Дар он Фарзона Ғафурзода ба содир кардани кирдоре муттаҳам шудааст, ки "шаъну эътибори судяро паст мезанад".
Назари худи ӯ ба фармон маълум нест ва ин ҳам рӯшан нест, ки Фарзона Ғафурзода бо кадом рафтору амалкардаш шаъну эътибори додрасҳои тоҷикро пас задааст.
Аммо он додрасҳоеро, ки Эмомалӣ Раҳмон дар гузашта бо айни иттиҳом аз кор рондааст, баъдан бо гуноҳи ришвахорӣ ё суистифода аз мақом ба ҷавобгарӣ кашида шудаанд.
Танҳо дар моҳи декабри соли 2025 се додрас бо айни сабаб, яъне паст задани шаъну эътибори додрас дар Тоҷикистон аз мақомашон барканор шуданд.
Низоми додгоҳии Тоҷикистон ва рафтори додрасҳо солҳост, ки танқид мешавад. Додрасҳоро ба он муттаҳам мекунанд, ки пойбанди мақомот ҳастанд ва ҳарчӣ, ки додситонҳо мехоҳанд, иҷро ва ҳукмҳои ноодилона содир мекунанд.
Худи Эмомалӣ Раҳмон рӯзи 5-уми декабри соли 2024 эътироф кард, ки фасоду ришвахорӣ дар байни додрасҳо мояи амиқи нигаронӣ аст. Ӯ ин оморро овард, ки дар 10 моҳи соли 2024 кормандони низоми додгоҳӣ 26 ҷиноят содир кардаанд.
Раисҷумҳур он замон ҳамчунин гуфт, дар даҳ соли гузашта нисбат ба беш аз сад нафар, аз ҷумла 45 додрас, муовинон ва раисони додгоҳҳои шаҳру ноҳияҳо парвандаҳои ҷиноӣ оғоз карда, онҳоро ба ҷавобгарӣ кашидаанд. Бисёре аз ин ҷиноятҳо ришвахорӣ, қаллобӣ, фаро рафтан аз ваколатҳо, эълони ҳукмҳои ноодилона номбар шуданд.
Додрасҳо дар Тоҷикистон бо фармони президент таъйину барканор мешаванд ва танқидҳо зиёданд, ки ҳангоми таъйини онҳо лаёқат ва донишҳо ба қадри кофӣ ба эътибор гирифта намешаванд.
Афзоиши дубораи қимати нафт дар бозорҳои ҷаҳонӣ
Қимати нафт дар бозорҳои ҷаҳонӣ рӯзи 28 сентябр бори дигар афзоиш ёфт ва баҳои ҳар бушка нафти хоми навъи "брент" аз 107 доллар боло рафт.
Қимати нафт пас аз он афзоиш ёфт, ки Доналд Трамп, раисҷумҳури Амрико пешниҳоди Эрон барои таваққуфи ҷанг ба муддати ҳафт рӯз ва бозкушоии дубораи тангаи Ҳурмузро рад кард.
Қимати нафт рӯзи 25 сентябр пас аз нашри пешниҳоди Эрон беш аз ду дарсад коҳиш ёфта буд, аммо рӯзи 28 сентябр дубора афзоиш ёфт.
Тангаи Ҳурмуз яке аз масирҳои муҳими интиқоли энержии ҷаҳонӣ аст ва баста шудани он фишор ба қиматҳои ҷаҳонии нафтро афзоиш додааст.
Дар Туркманистон беш аз ҳазор зиндониро афв карданд
Сардор Бердимуҳаммадов, раисҷумҳури Туркманистон, 1054 зиндониро афв кардааст.
Мақомот гуфтанд, ин тасмим ба муносибати 35-солагии истиқлоли Туркманистон ва бар пояи раҳму башардӯстӣ эълон шуд.
Рӯзи истиқлоли Туркманистонро 27-уми сентябр таҷлил мекунанд.
Бахши туркмании Радиои Озодӣ навишт, маълум нест, то куҷо қонуни афв нисбат ба онҳое, ки созмонҳои ҳомии ҳуқуқи инсон "маҳбусони сиёсӣ" медонанд, татбиқ хоҳад шуд.
Дар Туркманистон афви зиндониён зуд-зуд барпо мешавад, аммо ҳомиёни ҳуқуқ аз мақомот мехоҳанд, фаъолони иҷтимоӣ ва мунтақидони давлатро раҳо кунанд.
Ба гузориши Human Rights Watch аз соли 2025, даҳҳо нафар солҳо боз дар шароити баста ва бидуни ягон муошират бо наздикон нигаҳдорӣ мешаванд.
Сарнавишти ҳадди ақал 21 кас, ки муҳлати ҳабсашон аз соли 2017 то 2024 ба итмом расидааст, номаълум мемонад.
Доналд Трамп тарҳи пешниҳодии Эронро напазируфтааст
Доналд Трамп, раисҷумҳури Амрико, рӯзи 27-уми сентябр гуфт, тарҳи пешниҳодии Эронро дар мавриди бозкушоии тангӣ ё оброҳаи муҳими Ҳурмуз ва поён додан ба даргириҳо дар Ховари Миёна напазируфтааст.
“Онҳо мехоҳанд созиш кунанд ва ба фикрам, ин хуб аст. Ман ҳам созишро хуш дорам… вале ин пешниҳод барои мо пазируфтанӣ нест," – гуфт ӯ.
Аббос Ароқчӣ, вазири корҳои хориҷии Эрон, дар Маҷмаи умумии Созмони Милал гуфт, ин пешниҳод бо миёнравии Қатар ба Амрико расонда шудааст. Ба гуфтаи ӯ, дар сурати пазируфтани тарҳ, гулӯгоҳи муҳими Ҳурмуз метавонад дар ҳафт рӯз боз шавад ва даргириҳо поён ёбанд.
Ӯ афзуд: "Эрон ба воситаи Қатар ба Иёлоти Муттаҳида як тарҳи мушаххасро расонд. Агар шартҳои зарурӣ иҷро шаванд, гулӯгоҳ дар муддати ҳафт рӯз боз ва ҳаракати киштиҳо оғоз мешаванд. Ҳоло интихоб бо Иёлоти Муттаҳида аст."
Трамп рӯзи 26-уми сентябр дар суҳбат бо хабарнигорон дар Кохи Сафед гуфт, фишорҳои иқтисодӣ Эронро ба пешниҳоди боз кардани гулӯгоҳ водор кардааст: "Онҳо мехоҳанд гулӯгоҳи Ҳурмузро зуд боз кунанд. Медонед чаро? Чун вазъашон бисёр бад аст. Медонед чаро? Чун дигар пул ба даст намеоранд. Онҳо даромадашонро аз гулӯгоҳи Ҳурмуз мегиранд."
Иёлоти Муттаҳида зидди Эрон таҳримҳои сахти иқтисодӣ ҷорӣ кардааст, то ин фишор Теҳронро ба боз кардани гулӯгоҳи Ҳурмуз водорад. Танише, ки ҳафт моҳ боз идома дорад, интиқоли нафтро аз оброҳаи муҳим халалдор карда, ба иқтисоди ҷаҳон осеб расондааст.
Рӯзномаи "The Wall Street Journal" пештар аз қавли манобеаш навишт, ки Трамп ба рафторҳои Эрон бо шубҳа менигарад ва ба зердастонаш гуфтааст, пас аз интихоботи миёндавраии моҳи ноябр дар Амрико ҳамлаҳоро аз сар мегирад.
Исроилу Амрико ва дигар кишварҳои ғарбӣ солҳост Эронро ба талош барои сохтани силоҳи ҳастаӣ муттаҳам мекунанд. Эрон ин иттиҳомро рад мекунад. Масъуд Пизишкиён, президенти Эрон дар мусоҳибае бо шабакаи CBS гуфтааст, Теҳрон омода аст дар бораи барномаи ҳастаӣ ва масъалаҳои дигар гуфтугӯ кунад, вале "зӯргӯӣ" ё фишорро намепазирад.
Барканории вазири дифои Қазоқистон дар пайи марги 14 сарбоз
Қосимҷомарт Тоқаев, раисҷумҳури Қазоқистон, дар вокуниш ба марги 14 сарбоз, ки ҳангоми машқи ҳарбӣ ҷон бохтаанд, вазири дифои ин кишвар Даврон Қосановро аз мансаб барканор кард. Ӯ ҳамагӣ як сол пеш ба ин мақом таъйин шуда буд. Айдос Мирзоаҳмадови 45-сола рӯзи 27-уми сентябр вазири нави мудофеаи Қазоқистон эълон шуд.
Рӯзи 24-уми сентябр ҳангоми машқи ҳарбӣ 17 низомии Қазоқистон дар обҳои Баҳри Хазар ё Каспий ғарқ шуда, 14 нафари онҳо ҷон бохтаанд. Вазорати дифои Қазоқистон гуфт, се нафарро наҷот доданд, аммо дертар матбуот хабар дод, ки се нафари зиндамонда бо талошҳои худ то соҳил расидаанд.
Мақомоти Қазоқистон гуфтанд, дар пайванд ба ин фоҷиа бар асоси ду банди Кодекси ҷиноӣ парванда боз кардаанд, аз ҷумла барои “иҷрои бепарвоёнаи вазифа, ки боис ба пайомадҳои вазнин гардид” ва ҳам барои “вайрон кардани қоидаи киштиронӣ”. Панҷ мақомдори Вазорати дифои Қазоқистон, аз ҷумла муовини аввали сарфармондеҳи нерӯҳои мусаллаҳ ҳамчун гумонбар дастгир шудаанд.
Қосимҷомарт Тоқаев марги сарбозонро дар замони осоишта “натиҷаи фаъолияти ғайрикасбии афсарон, дар асл генералҳо” номид. Вай гуфт, “раҳбарият мушкилоти деринаи артишро ҳалношуда мегузорад ва ин чиз боис ба суст шудани иқтидори дифоии кишвар мегардад”.
Раисҷумҳури Қазоқистон инчунин гуфт: “Аз гузашта ҳеч сабақ гирифта нашуд. Кӣ ин машқҳоро таҳия кардааст? Чаро сарфармондеҳи нерӯҳои ҳарбию баҳрӣ дар машқҳо ҳузур надошт? Бепарвоӣ, саҳлангорӣ, намоишкорӣ як кори маъмулӣ шудааст.”
Ба қавли ӯ, артиши Қазоқистон “дар асри пешин дармондааст” ва “ҳоло вақти ислоҳоти бунёдии он расидааст”.
Саида Мирзиёева хоҳони ҳукми қатл барои ҷиноятҳои сангин шудааст
Саида Мирзиёева, духтари раисҷумҳури Узбекистон Шавкат Мирзиёев, хоҳони эҳёи ҳукми қатл барои ҷиноятҳои сангин дар ин кишвар шудааст.
Изҳороти ӯ, ки ҳамзамон раҳбари дастгоҳи иҷроияи президенти Узбекистон аст, дар вокуниш ба таҷовуз ба номуси як кӯдак дар вилояти Намангон садо дод.
Мирзиёева рӯзи 27-уми сентябр дар саҳифааш дар Телеграм навишт: “Барои чунин ҷиноятҳои ваҳшатбор, ба бовари ман, бояд ҳукми қатл татбиқ шавад. Дареғ, қонунгузории ҳозира инро пешбинӣ намекунад.”
Ӯ афзуд, дар ҳоли ҳозир барои сахттар кардани ҷазо тарҳи тағйирот ба қонунро омода мекунанд.
Нашрияи Gazeta.uz навишт, мақомоти Узбекистон таҷовузи як шогирди 5-соларо дар кӯдакистони давлатӣ дар Намангон таҳқиқ доранд.
Бо гумони содир кардани ин ҷиноят мудири 52-солаи анбор дастгир шудааст. Модари тифл гуфтааст, хешовандони марди гумонзад ба ҷиноят ба онҳо пул пешниҳод карданд.
Шаҳноза, духтари дигари Шавкат Мирзиёев, дар шарҳи ин ҳодиса гуфтааст, Оҷонси миллии ҳифзи иҷтимоӣ ба хонаводаи кӯдаки ҷабрдида дасти ёрӣ дароз мекунад, то ба шаҳри дигар бикӯчанд.
"Ба онҳо хона медиҳанд. Тамоми чораҳои заруриро барои офиятрасонӣ ва ёриҳои иҷтимоӣ фароҳам мекунанд. Аз ҷумла, модарро бо ҷойи кор таъмин мекунанд ва агар зарур буд, дар тағйир додани ному насаби онҳо ёрӣ мерасонанд, то тавонанд зиндагии наверо аз сар бигиранд," – гуфтааст Шаҳноза Мирзиёева, муовини аввали раиси Оҷонси миллии ҳифзи иҷтимоии Узбекистон.
Дар Узбекистон аз моҳи январи соли 2008 бо қарори президенти пешинаи он кишвар, Ислом Каримов, ҳукми қатл бекор карда шудааст.
Шавкат Мирзиёев соли 2022 дар як изҳороташ гуфт, ба эҳёи ҳукми қатл дар ин кишвар розӣ нест ва пешниҳод кард, ки дар Конститутсия ҳам ҳамин нукта дарҷ гардад. Аз соли 2023 мораторияи ҳукми қатл дар Узбекистон дар Қонуни асосии ин кишвар ҷой дода шудааст.
Акбарҷон Исмоилов, тоҷики зодаи Қазоқистон, узви Шӯрои мардумӣ шудааст
Акбарҷон Исмоилов, тоҷики зодаи Қазоқистон, узви Шӯрои мардумии ин кишвар шудааст.
Ин ниҳоди тозатаъсис 126 намоянда дорад ва мақоми олии машваратӣ ба шумор меравад.
Ҳимоят аз манфиатҳои мардуми Қазоқистон аз вазифаҳои аслии он номбар мешавад.
Акбарҷон Исмоилов рӯзи 26-уми сентябр дар паёми хатӣ ба Радиои Озодӣ гуфт, ӯро чаҳор рӯз пеш раисҷумҳури Қазоқистон Қосимҷомарт Тоқаев ба ин мақом таъйин кард.
Вай 38-сола аст ва дар вилояти Улутави Қазоқистон дар оилаи рӯҳонии тоҷик, Яҳёхоҷа Исмоилов, зода шудааст.
Таҳсили миёнаро дар Қазоқистон гирифт ва соли 2016 Донишгоҳи Мадинаро хатм кард.
Ба соҳибкорӣ машғул аст ва чандин ширкатро асос гузоштааст.
Аз соли 2017 то 2022 роҳбари Маркази тоҷикони шаҳри Остона буд. Аз моҳи сентябри соли 2022 роҳбари Маркази ҷумҳуриявии фарҳангӣ ва этникии тоҷикон ва аз соли 2023 муовини раиси Ассамблеяи халқҳои ин кишвар буд.
Рубио бо як ҳайати 100-нафарӣ ба Узбекистон меравад
Марко Рубио, вазири корҳои хориҷии Амрико, дар миёнаи моҳи октябр бо як ҳайати 100-нафарӣ барои ширкат дар ҷаласаи кишварҳои Осиёи Марказӣ ва Амрико ба Узбекистон меравад.
Ин хабарро Серҷио Гор, фиристодаи вижаи Амрико барои Осиёи Ҷанубӣ ва Миёна нашр кард.
Ҷаласа дар Самарқанд барпо мешавад ва ин нахустин сафари Рубио ба ҳайси вазири умури хориҷии Амрико ба Осиёи Марказӣ хоҳад буд.
Рубио дар ҷаласаи вазирони корҳои хориҷии маҳфили “5 ҷамъи 1” иштирок мекунад, ки ба он кишварҳои Осиёи Марказӣ ба иловаи Амрико шомил ҳастанд.
Дар ин ҷаласа дар бораи ҳамкориҳои иқтисодиву тиҷоратӣ, амнияти энержӣ табодули назар сурат мегирад.
Нетаняҳу гуфт, мардуми Эрон рӯзе озод хоҳанд шуд.
Бенямин Нетаняҳу, сарвазири Исроил, рӯзи 24-уми сентябр аз минбари Созмони Милали Муттаҳид дар Ню-Йорк гуфт, ки мардуми Эрон рӯзе озод хоҳанд шуд.
Ӯ ин ҳарфҳоро замоне ба забон овард, ки гурӯҳе аз намояндагони давлату кишварҳои гуногуни ҷаҳон ба нишони эътироз толорро тарк карданд.
Нетаняҳуро барои ҷанг дар Ғазза ва кушта шудани мардуми осоишта танқид мекунанд. Додгоҳи байнулмилалии Гаага ӯро ҷинояткори ҷангӣ унвон ва ҳукми боздошташро содир кардааст. Нетаняҳу ҷангро дар Ғазза дифоъ аз Исроил номида, иттиҳоми наслкуширо борҳо рад кардааст.
Сарвазири Исроил онҳоеро, ки пеш аз суханронии ӯ толори Маҷмаи умумии Созмони Милалро тарк карданд, “тарсу” номид.
Нетаняҳу гуфт, Исроил талош кардааст, ки монеи дастёбии Эрон ба силоҳи ҳастаӣ шавад. Ӯ гуфт, дур нест, ки режими саркӯбгари Эрон нобуд шавад ва мардуми ин кишвар ба озодӣ бирасанд.
Вай кушта шудани Оятуллоҳ Алӣ Хоманаӣ, раҳбари пешини Эронро яке аз муввафақиятҳо номид. Ин дар ҳолест, ки раисҷумҳури Эрон Масъуди Пизиишкиён онро амали ғайриқонунӣ ва ҷиноӣ номид.
Исроил ва Амрико рӯзи 28-уми феврали имсол ба Эрон ҳамла карданд ва бо вуҷуди қатъи ҳамлаҳо ҳанӯз таниш вуҷуд дорад. Иёлоти Муттаҳида ва Исроил Эронро ба он айбдор мекунанд, ки талош дорад, силоҳи ҳастаӣ бисозад.
Масъуд Пизишкиён, президенти Эрон, рӯзи 23-юми сентябр дар нишасти СММ гуфт, ки Ҷумҳурии Исломӣ “террорист нест” ва аз фанноварии сулҳомези ҳастаӣ даст намекашад.
