Дар чанд ҷумла
Путин моҳи сентябр ба Душанбе меояд
Владимир Путин, президенти Русия моҳи сентябри соли ҷорӣ ба Тоҷикистон меояд. Дар ин бора хабаргузориҳои русӣ аз қавли нахуствазири Тоҷикистон Қоҳир Расулзода навиштаанд. Расулзода рӯзи 29-уми апрел дар Қазон бо ҳамтои русаш Михаил Мишустин мулоқот дошт. Ин мақомдори тоҷик гуфтааст, Эмомалӣ Раҳмон ва Владимир Путин ҳангоми сӯҳбати телефонӣ дар мавриди сафари президенти Русия ба Тоҷикистон дар нимаи дуввуми моҳи сентябр ба мувофиқа расидаанд. Раҳбарони ду кишвар рӯзи 23-юми апрел дар гуфтугӯи телефонӣ аз ҷумла мавзӯъи амнистияи муҳоҷиратӣ ва зиёд кардани парвозҳоро матраҳ намуда буданд.
Ҳамаи хабарҳои имрӯзро дар инҷо бихонед
Путин қонунеро имзо кард, ки аз кор рондани муҳоҷиронро осон мекунад
Владимир Путин, президенти Русия, қонунеро имзо кардааст, ки аз кор ҷавоб додани муҳоҷиронро барои корфармоён осонтар мекунад.
Тарҳи ислоҳшудаи Кодекси кор дар Русия рӯзи 17-уми ноябр пазируфта шуд. Ин санад ба корфармоён имкон медиҳад, ки дар сурати кам шудани квота ё меъёри қабули коргарони хориҷӣ муҳоҷиронро аз кор ҷавоб диҳанд.
Бар асоси кодекси пешин, корфармоён ҳақ надоштанд, ки кам шудани квотаҳои қабули коргарони хориҷӣ дар шаҳр ё ноҳияву вилояти худро ҳамчун асос барои аз кор ҷавоб додани муҳоҷирон истифода баранд.
Қонуни нав аз 1-уми марти соли 2026 эътибор пайдо мекунад. Агар ширкатҳо талаботи мазкурро иҷро накунанд, то 1 миллион рубл ҷарима ё фаъолияташон боздошта мешаванд.
Русия дар ду соли охир даҳҳо қонуни маҳдудкунандаи ҳузури муҳоҷиронро қабул кард ва бо баҳонаи иҷрои ин муқаррарот бо зӯру фишору таҳқир даҳҳо ҳазор хориҷӣ, аз ҷумла муҳоҷирони кории зиёди тоҷикро аз кишвар берун кард.
Русия раъй надод; Шӯрои Амният қатъномаро дар бораи Ғазза пазируфт
Шӯрои Амнияти Созмони Милал рӯзи 17-уми ноябр пешниҳоди президенти Амрико Доналд Трампро дар бораи хатми ҷанг дар Ғазза пазируфт.
Ин тарҳ, ки аз бист банд иборат аст, истиқрори нерӯҳои байнулмилалии посдори сулҳро дар борикаи Ғазза ва бозсозиву барқарории иқтисодии ин минтақаро пешбинӣ мекунад.
Исроил ва гурӯҳи фаластинии “Ҳамос” (Амрико ва Иттиҳоди Аврупо онро созмони террористӣ медонанд) моҳи октябр бо ин санад розӣ шуданд.
Майк Волтс, сафири Амрико дар Созмони Милал, гуфт, “ин қатънома баъд аз анҷоми ислоҳоти зарурӣ роҳҳои имконпазирро барои таъйини ояндаи Маъмурияти Фаластин боз мекунад. Он нерӯи "Ҳамос"-ро суст мегардонад ва раҳоии Ғаззаро аз сояи ваҳшат таъмин карда, шукуфоиву амниятро фароҳам мекунад”.
“Ҳамос”, ки онро Иттиҳоди Аврупо ва Амрико созмони террористӣ медонанд, батакрор гуфтааст, ки аслиҳаашро ба замин намегузорад.
Ин гурӯҳ иддао мекунад, ки нерӯҳои байнулмилалӣ дар дохили Ғазза дар асл бо тарафдорӣ аз Исроил як бахши низоъ хоҳанд шуд.
Русия, ки дар Шӯрои Амнияти СММ ҳаққи вето дорад, аз пеш гуфт, қатъномаро намепазирад ва аз овоздиҳӣ низ худдорӣ намуд.
Василий Небензя, сафири Русия дар Созмони Милал, гуфт: “Дар асл Шӯро бар асоси ваъдаҳои Вашингтон ва ташаббуси Амрико ризоият дода, назорати пурраи Ғаззаро дар ихтиёри Шӯрои сулҳ ва нерӯҳои байнулмилалии посдори сулҳ медиҳад, ки дар бораи онҳо то ҳол ҳеч маълумот надорем”.
Маъмурияти Фаластин аз ин қатънома истиқбол ва омодагии худро дар татбиқи он баён намуд. Трамп аз ин қарор чун “лаҳзаи воқеан таърихӣ” ситоиш кардааст.
Қатънома дар Исроил баҳсбарангез шуд, чун он ба таъсиси давлати Фаластин дар оянда ишора мекунад. Сарвазир Бенямин Нетаняҳу рӯзи 16-уми ноябр гуфт, зидди таъсиси давлати Фаластин буда, ваъда дод, ки “бо ҳар роҳи осон ё мушкил” ба халъи силоҳ дар Ғазза даст хоҳад ёфт.
Гузориши видеоӣ:
Амрико тарҳи таҳрим алайҳи шарикони тиҷоратии Русияро баррасӣ дорад
Намояндагони Ҳизби ҷумҳурихоҳи Амрико тарҳи қонунеро баррасӣ доранд, ки таҳрим алайҳи шарикони тиҷоратии Русияро пешбинӣ мекунад.
Дар ин бора президент Доналд Трамп хабар дод.
Ба гуфтаи ӯ, кадом кишваре, ки бо Русия додугирифти молӣ мекунад, ба таҳримҳои сахт рӯ ба рӯ хоҳад шуд.
Раисҷумҳури Амрико илова кард, ки Эрон низ метавонад ба ин рӯйхат ворид шавад.
Бар асоси ин санад, кишварҳое, ки аз Русия нафту газ мехаранд ва ҳамчунин ширкатҳое, ки бо бахши энергетикии Русия кор мекунанд, таҳрим хоҳанд шуд.
Дар охири моҳи октябр ИМА ду ширкати калони нафти Русия “Роснефт” ва “Лукойл”-ро ба рӯйхати сиёҳ ворид кард.
Ин аввалин маҳдудияти Амрико алайҳи Русия баъди бозгашти Доналд Трамп ба қудрат буд.
Абдуҷаббор Раҳмонзода аз мақомаш барканор шуд
Абдуҷаббор Раҳмонзода, сафири Тоҷикистон дар Узбекистон аз мақомаш барканор шудааст.
Дафтари матбуоти раёсати ҷумҳури Тоҷикистон рӯзи 18-уми ноябр хабар дод, ки бо фармони президент Эмомалӣ Раҳмон, сафири Тоҷикистон дар Узбекистон аз вазифа барканор шудааст. Сабаби ин барканорӣ "гузашта ба кори дигар" гуфта шудааст. Маълум нест, ки Раҳмонзода дар кадом вазифа ба фаъолияташ идома медиҳад.
Ҳамзамон тайи фармони дигар, Исматулло Насреддин ба ҷойи Абдуҷаббор Раҳмонзода сафири Тоҷикистон дар Узбекистон таъйин шудааст. Ба ҷой Исматулло Насреддин сафири пешини Тоҷикистон дар Амрико Фаррух Ҳамрализода муовини аввали вазири корҳои хориҷии Тоҷикистон таъйин шудааст.
Абдуҷаббор Раҳмонзодаи 66-сола, ки бо тасмиму изҳороти баҳсбарангезаш машҳур аст, дар моҳи майи соли 2021 сафири Тоҷикистон дар Узбекистон таъин шуда буд.
Пеш аз ин, аз соли 2014 то таъйин шудан дар мақоми сафири Тоҷикистон дар Узбекистон, Абдуҷаббор Раҳмонзода ёвари раиси ҷумҳури Тоҷикистон дар масъалаҳои рушди иҷтимоӣ ва робита бо ҷомеа буд.
Вай аз он пеш дар мансабҳои раиси Кумитаи телевизиону радио, вазири маориф ва мудири Донишгоҳи давлатии омӯзгории Тоҷикистон кор карда, ҳамеша бо тасмимҳои худ дар сархати расонаҳо қарор доштааст.
Аз ҷумла, ҳангоми раиси Кумитаи телевизион ва радио будан саводи кормандони эҷодиро зери суол бурда, ҳамаро аз як диктанти умумии забони тоҷикӣ гузаронд. Дар вазифаи вазири маориф ҳузури донишҷӯёну мактабиёнро ба дарс бо либоси исломӣ ва нимаурёни аврупоӣ ва истифода аз мошини шахсӣ ва телефонҳои мобилро манъ кард.
Дар ҳоле, ки худи Раҳмонзода пайваста аз паст рафтани саводи муҳассилон ва коста шудани интизоми талабагӣ интиқод кардааст, худи ӯро дар тундлаҳнӣ ва ҳам зиёдаравӣ интиқод мекарданд.
Яке аз пурбаҳстарин амалҳое, ки дар вазифаи ректори Донишгоҳи омӯзгории пойтахт кардааст, ин талаби ҳозир шудани духтарони донишҷӯ бо пошнаи баланд ба дарс ва пешниҳоди ҷорӣ кардани ҷарима барои донишҷӯёни дарсгурез буд.
Муҷозоти даҳҳо нафар барои сӯзондани барги дарахтон
Кумитаи ҳифзи муҳити зист мегӯяд, соли равон даҳҳо нафарро барои сӯзондани хазону барги дарахтон ҷазо додаанд.
Ин ниҳод дар иттилоияи расмӣ гуфтааст, давоми даҳ моҳи аввали соли равон барои сӯзондани хазон ва ба ин роҳ ифлос намудани муҳити зист, 2137 санадҳои маъмурӣ тартиб додаанд. Мақомот нагуфтаанд, ки сокинон барои оташ задани хазон чӣ қадар ҷарима шудаанд.
Кодекси ҳуқуқвайронкунии маъмурии Тоҷикистон барои дар ҷойҳои манъшуда сӯзондани партов ё хазон аз 375 то 750 сомонӣ ҷарима таъйин кардааст.
Мутахассисони Кумитаи ҳифзи муҳити зист мегӯянд, дар вақти сӯзонидани хазонҳо "моддаҳои заҳрнок ҳосил гардида, ба муҳити атроф паҳн гардида, ба саломатии инсон таъсири манфӣ мерасонад. Аз ҷумла, беморони роҳҳои нафас ва дилу рагҳо аз ин ҳолат ранҷ кашида, ҳолаташон метавонад бад гардад".
Қонун "Дар бораи ҳифзи ҳавои атмосфера" сӯзонидани ҳама гуна партовҳо, аз ҷумла хазонро манъ кардааст, аммо бо фаро расидани тирамоҳ оташ задани барги дарахтон дида мешавад.
Оҷонсӣ аз таъмини гармӣ дар Душанбе норозигӣ кард
Оҷонси назорат дар соҳаи энергетикаи Тоҷикистон мегӯяд, таъмини хонаҳои сокинон бо гармӣ дар шаҳри Душанбе ба қадри зарурӣ нест.
Ин ниҳод дар хабарномае навишт, дар аксар маҳаллаҳои ноҳияи Исмоили Сомонӣ ва Шоҳмансури Душанбе "меъёрҳои муқарраршудаи гармӣ риоя намегардад".
Ба гуфтаи мутахассисони Оҷонсӣ, гармӣ дар шабака ва дохили биноҳои баландошёна то 55 дараҷа баробар буд. Дар ҳоле, ки мувофиқи талабот, ҳарорат бояд 75 дараҷа бошад.
Дар хабарнома омадааст, паст будани таъминоти гармӣ боис шудааст, ки сокинон барои гарм кардани манзилашон аз барқ истифода баранд ва ин ҳолат боиси сарборӣ дар хатҳои барқ шудааст.
Оҷонси назорат дар соҳаи энергетика гуфтааст, барои рафъи мушкил ба масъулон супориш ва тавсияҳо додааст. Маълум нест, ки мақомот барои ҳалли мушкил чӣ чора меандешанд.
Мавсими гармидиҳӣ дар шаҳри Душанбе дар охири моҳи октябр шуруъ шуд, вале шикоятҳо аз набудани гармӣ дар манзилҳо зиёд аст. На танҳо ноҳияҳои Шоҳмансур ва Исмоили Сомонӣ, балки дар баъзе аз минтақаҳои ноҳияи Фирдавсӣ ҳам сокинон бо вуҷуди шартнома бо гармӣ таъмин нестанд.
“Ҳар вақте хостанд, барқ медиҳанд ё қатъ мекунанд”
“Кадом вақте хостанд, барқ медиҳанд ё хомӯш мекунанд. Ҳар шаб аҳвол ҳамин аст. Ё баҳона пеш меоранд, ки дастгоҳи тақсими барқ сӯхтааст.”
Ин нақли як сокини шаҳри Кӯлоб дар бораи маҳдудияти шадиди нерӯи барқ дар зодгоҳаш аст. Ҳоло, ба гуфтаи ӯ (нахост номаш фош шавад), вақти дақиқи омадани барқ маълум нест.
Чанд шаб боз дар Кӯлоб ва ноҳияҳои атрофи он барқ дар соати 21 хомӯш мешавад. Субҳи 11-уми ноябр аз тамоми маҳаллаҳои Кӯлоб шикоят расид, ки нерӯи барқ надоштанд.
Дар Шабакаҳои тақсими шаҳри Кӯлоб ин вазъро шарҳ надоданд. Баъзе аз сокинон талаб доранд, ки соатҳои таъмини нерӯи барқ муайян шаванд.
Дар Тоҷикистон расман мавсими “лимит” ё маҳдудияти барқ эълон нашудааст, вале дар тамоми гшаҳои кишвар мардум аз моҳи сентябр ба ин сӯ барқи кам мегиранд.
Гузориши видеоӣ дар инҷост:
Падаре, ки писарашро ба мошин баста буд, 25 сол гирифт
Хабаргузории "Азия-Плюс" бо такя ба манобеаш, аз ҷумла дар Додгоҳи олии Тоҷикистон, гузориш дод, ки сокини шаҳри Турсунзода Парвиз Одинаев дар пайванд ба шиканҷа ва марги писараш, Хусрав Одинаев, ба 25 сол зиндон маҳкум шуд.
Мақомот дар ин бора расман иттилоъ надодаанд.
Як манбаи "Азия-Плюс" 17-уми ноябр гуфтааст, ҳукм шаш рӯз қабл содир шуд. Ба қавли ӯ, "додситон барои Одинаев 27 сол зиндон талаб кард, аммо додрас фарзандони ноболиғ доштани Одинаевро ба назар гирифта, ҳукмро ду сол поин овард".
Хусрав Одинаеви 15-сола дар моҳи июли имсол дар пайи шиканҷаи падараш ҷон бохт. Мақомот гуфтанд, Парвиз Одинаев ӯро ба дуздии пул гумонзад дониста, вале ба ҷойи муроҷиат ба мақомот худаш ба мошин баста, ҷазо додааст.
Ин ҳодиса дар ҳоле рух дод, ки порлумони Тоҷикистон соле пеш падару модаронро вазифадор карда буд, дар тарбияи кӯдак аз зӯроварӣ, аз ҷумла ҷазои ҷисмонӣ истифода накунанд.
Соли 2024 дар Тоҷикистон нисбат ба ноболиғон 994 ҷиноят содир шудааст. Тибқи иттилои расмӣ, имсол хушунати зидди наврасон 30 дарсад афзуд.
Ба ҷуз марги Хусрав Одинаев, ҳадди ақал дар се ҳодисаи дигар, ки имсол расонаӣ гашт, падару модарон фарзандони худро ба об партофта ё бо корд захмӣ кардаанд. Яке аз ин волидон дар вилояти Хатлон ба 28 сол зиндон маҳкум шуд.
Дар ҳамлаи Русия ба Харков се кас кушта шудааст
Дар пайи ҳамлаҳои ҳавоии артиши Русия ба Украина дастикам се кас дар вилояти Харков кушта шудаанд.
Дар ин бора мақомоти маҳаллии вилоят хабар доданд.
Ин ҳамлаҳо дар остонаи сафари навбатии Владимир Зеленский, раисҷумҳури Украина ба кишварҳои аврупоӣ сурат гирифт.
Хадамоти ҳолатҳои фавқулодаи Украина рӯзи 17-уми ноябр хабар дод, ки дар Харков 3 кас кушта ва 13 нафари дигар маҷруҳ шуданд. Се нафар аз захмиён кӯдакон ҳастанд. Ҳамаи ин афрод сокинони шаҳри Балаклея буданд.
Артиши Русия дар оғози таҷовуз ба Украина дар моҳи феврали соли 2022 шаҳри Балаклеяро ишғол кард, аммо баъди чанд моҳ нерӯҳои Украина онро озод карданд.
Дар Амрико баъди ду аср истеҳсоли хурдтарин пули филизӣ ба поён расид
Дар ИМА таърихи беш аз дуасраи истеҳсоли тангаи яксентӣ ё пеннӣ расман ба поён расид. Дар маросиме, ки 12-уми ноябр дар корхонаи зарробии Филаделфия бо иштироки Брендон Бич, хазинадори ҳукумати Амрико барпо шуд, хабарнигорон тавлиди охирин тангаҳои амрикоиро дар таърихи 232-солаи ин кишвар шоҳид шуданд.
Моҳи феврали имсол президент Доналд Трамп ба Идораи хазинадорӣ амр дод, ки истеҳсоли ба гуфтаи ӯ “пурхарҷи” пенниҳоро хотима диҳанд. Дар пайи ин истифодабарандагони фаъоли пулҳои оҳанӣ – истгоҳҳои фурӯши сӯзишворӣ, автоматҳои ширинию хӯрокҳои зудпаз маҷбур дар пайи иваз кардани шеваи хадамот шуданд.
Мақомоти амрикоӣ ҳисоб кардаанд, ки харҷи истеҳсоли як пеннӣ дар даҳ соли охир аз 1,42 то 3,69 сент афзоиш ёфта, зиёновар шудааст.
Брендон Бич, хазинадори ҳукумати ИМА гуфт,“танҳо аз ҳисоби қатъи истеҳсоли пеннӣ соле андоздиҳандаҳои амрикоӣ 56 миллион долларро сарфа хоҳанд кард”.
Ӯ гуфт, ки ҳоло пеннӣ бо арзиши 300 миллиард доллар дар гардиш мебошад ва баъди қатъи истеҳсоли он ҳам, истифодааш дар дасти мардум идома хоҳад кард.
“Бо назардошти навшавии босуръати ҳамёни амрикоиҳо ва хазинадорӣ президент Трамп ба ин андешаанд, ки идомаи истеҳсоли пеннӣ барои ҷомеаи Амрико дигар як амри зарурии молӣ намебошад”, - афзуд Хазинадори ҳукумати ИМА.
Ҳукумати Амрико пенниро соли 1793 ҷорӣ намуда, аз соли 1909 дар рӯи он акси президент Абраҳам Линколнро сикка заданд. Барои сохтани ин тангаҳои хурд руҳ ва мис ба кор меравад.
Дар Тоҷикистон дирамҳо дар нақлиёт ба кор мераванд
Таҷрибаи дасткашӣ аз истеҳсоли тангаҳои хурдро дар давлатҳои дигари мисли Канада, Австралия, Ирландия, Зеландияи Нав ҳам роҳандозӣ кардаанд. Дар кишвари аврупоии Чехия соли 2008, баъди истифодаи 15-солаи хурдтарин сикаҳои металлии 10, 20 ва 50-ҳеллерӣ аз истифодаи он даст кашиданд. Вале дар муомилаҳои бонкӣ ин арзиш ҳифз шуда, масалан, агар маҳсулот 30 крону 50 ҳеллер нарх дорад, бо корти бонкӣ ҳамин пул ва бо пули нақд аз муштарӣ 31 крон гирифта мешавад. Агар нархи маҳсулот 30 крону 40 ҳеллер буд, пас бо пули нақд нархи он то 30 крон яклухт карда мешавад.
Дар Тоҷикистон 25 сол пеш пули миллии сомонӣ ва ҳамроҳ бо он сиккаҳои 1, 2, 5, 20 ва 50-дирамӣ чун нишондоди хурдтарини пули нақд ба гардиш дароварда шуданд. Барои истеҳсоли дирамҳои тоҷикӣ аз пӯлоду мису латун истифода мекунанд, мегӯяд Бонки миллӣ. Соли 2011 намунаҳои тангаҳои филизии Тоҷикистон нав шуданд.
Ҳамарӯза барои истифодаи нақлиёти мусофирбари мисли автобусу троллейбус ва микроавтобусҳо сокинони Тоҷикистон аз ҳамин тангаҳои хурд истифода мекунанд.
Сарвазири пешини Бангладеш дар ғайбаш ба эъдом маҳкум шуд
Шайх Ҳасина, нахуствазири пешини Бангладеш, ки моҳи декабри соли 2024 дар пайи эътирозҳои оммавӣ аз қудрат рафта буд, дар ғайбаш ба эъдом маҳкум гардид.
Як додгоҳи Бангладеш 17-уми октябр Шайх Ҳасинаро ба "ҷиноят алайҳи башарият" ва саркӯби маргбори норозиён гунаҳкор кард.
Ба гузориши хабаргузории "Франс Пресс", баъд аз эълони ҳукм ҳозирон дар толори додгоҳ хурсандӣ карданд.
Худи Шайх Ҳасина, ки ба Ҳинд фирор кардааст, аз ширкат дар мурофиаҳои додгоҳӣ худдорӣ кард ва ин додгоҳро супоришӣ хонд.
Шайх Ҳасинаи 77-сола дар пайи эътирозҳои густурда 5-уми августи соли гузашта истеъфо дода, аз Бангладеш фирор кард. Ҳасина 15 соли ахир нахуствазири Бангладеш буд.
Трамп аз эҳтимоли гуфтугӯ бо Мадуро хабар дод
Доналд Трамп, раисҷумҳури Амрико аз эҳтимоли гуфтугӯ бо Николас Мадуро, президенти Венесуэла хабар дод.
Раисҷумҳури Амрико рӯзи 16-уми ноябр ба хабарнигорон гуфт, “мумкин аст, гуфтугӯҳое бо Модуро дошта бошем, бояд бинем чӣ мешавад. Онҳо мехоҳанд суҳбат кунанд”.
Трамп бидуни шарҳи ҷузъиёти бештар танҳо илова кард, ки “Венесуэла мехоҳад гуфтугӯ кунад. Маънояш чист? Шумо бигӯед... ман бо ҳар касе суҳбат мекунам”.
Таниш миёни Амрико ва Венесуэла дар моҳҳои охир бештар шудааст.
Артиши Украина гуфт, ба корхонаи коркарди нафт дар Самара зарба зад
Ситоди кулли Нерӯҳои мусаллаҳи Украина гуфт, ки низомиёни ин кишвар ба як корхонаи коркарди нафт дар вилояти Самараи Русия зарба задаанд.
Ба иттилои манбаъ, ин корхона артиши Русияро бо сӯзишворӣ таъмин мекунад.
Вячеслав Федоришичев, волии Самара, ҳамларо тасдиқ кард, аммо хабар дод, ки онро "хунсо кардаанд" ва "талафоте нест".
Нерӯҳои мусаллаҳи Украина ҳамчунин гузориш доданд, ки як анбори ҳавопаймоҳои бесарнишин ва ҷойи нигоҳдории сӯзишвориро дар қаламрави зери назорати Русия дар вилояти Донетск хароб карданд.
Дар ҳамин ҳол, мақомоти Волгоград дар Русия дар хабарномае гуфтанд, ки шаби 15 ба 16-уми ноябр ҳавопаймоҳои бесарнишини украинӣ дар ноҳияҳои Дзержинский ва Тракторозаводский ба биноҳои истиқоматӣ зарар расонидаанд. Се кас маҷруҳ шудааст.
Вазорати дифои Русия гуфт, нерӯҳои дифои ҳавоии ин кишвар шаби гузашта дар фазои Волгоград 17 ва дар вилояти Самара 23 ҳавопаймои бесарнишини Украинаро раҳгирӣ карданд. Ба иттилои вазорат, дар умум 57 ҳавопаймои бесарнишин нобуд карда шудаанд.
Тасдиқи иддаои ҷонибҳои даргир феълан ғайриимкон аст.
Муҳлати нав барои паноҳандагоне, ки дар Бритониё иқомати доимӣ мехоҳанд
Бритониё эълон кард, ки давраи интизории паноҳандагонро барои гирифтани иқомати доимӣ дар ин кишвар ба таври чашмгир афзоиш медиҳад.
Тарҳ шоми 15-уми ноябр муаррифӣ шуд.
Бар асоси он, касоне, ки ба таври ғайриқонунӣ вориди Бритониё шуда, сипас паноҳандагӣ мегиранд, бояд 20 сол сабр кунанд, то битавонанд барои иқомати доимӣ дархост диҳанд. Ин муҳлат дар ҳоли ҳозир ба панҷ сол баробар аст.
Барои онҳое, ки аз роҳҳои қонунӣ вориди Бритониё мешаванд, низ муҳлати интизорӣ барои гирифтани иқомати доимӣ то даҳ сол боло бурда мешавад.
Вазорати умури дохилии Бритониё ин барномаро "ислоҳоти бузургтарин дар сиёсати паноҳандагӣ" номид ва гуфт, ҳадафи он коҳиши вуруди ғайриқонунии муҳоҷирон ва осон кардани ихроҷи ин гуна афрод аст.
Тибқи қоидаҳои ҳозира, шахсоне, ки дар Бритониё мақоми гуреза доранд, то 5 сол ҳимоят мешаванд. Вазорати корҳои дохилии Бритониё гуфт, ин давра низ ба дуним сол поин оварда мешавад ва бозгашти шахсоне, ки кишварашон "амн" ҳисобида мешавад, иҷборӣ хоҳад гашт.
Бар асоси тарҳи нав, масъулияти давлат барои таъмини паноҳандагон бо хона ва ироаи кумакҳои молӣ дар Бритониё, ки аз соли 2005 ба ин сӯ ҷорист, лағв карда мешавад.
Муҷозоти як сокини Исфара барои фурӯхтани адабиёти динӣ
Додгоҳи Исфара (вилояти Суғд) як сокини ин шаҳрро бо гуноҳи фурӯхтани адабиёти динии бидуни иҷоза зиёда аз 4 ҳазор сомонӣ, муодили беш аз чорсад доллар, ҷарима бастааст. Хулосаи қарори додгоҳ рӯзи 10-уми ноябр нашр шуд.
Мақомот аз ӯ ном нагирифта, гуфтаанд, дар бозори марказии Исфара ба савдои адабиёте машғул буд, ки “фурӯш ва паҳн карданаш бе ҳуҷҷати расмии диншиносӣ манъ аст.”
Мавқеи ин сокини Исфара маълум нест ва ҳам номгӯйи адабиёт нашр нашудааст.
Шерзод Аслиддинзода, муовини раиси Додгоҳи Исфара, дар хулосаи қарор гуфтааст, ҳафт китоб мусодира ва барои нигоҳдорӣ ба Кумитаи дин фиристода шуд: "Вақте адабиёти динӣ бе санҷиш... паҳн мешавад, ин эҳтимол дорад, ки ҳамвора хатарҳои идеологӣ ва экстремистӣ дар байни ҷомеа ҷой мегиранд."
Мақомоти Тоҷикистон соли 2009 ва пас аз қабули қонуни озодии виҷдон ва иттиҳодияҳои динӣ, воридот ва нашру паҳни адабиёти диниро зери назорат гирифтаанд. Аз он сол ба баъд бе иҷозаи мақомот ворид кардан, чоп ё фурӯхтани адабиёти динӣ бидуни санҷиш ва иҷозаи расмӣ манъ аст.
Мақомот ин корро барои пешгирӣ аз паҳн шудани адабиёти ифротӣ дуруст медонанд, аммо баъзе аз созмонҳои ҳомии ҳуқуқи башар онро ҳамчун бахше аз маҳдудиятҳои озодии бунёдӣ танқид мекунанд.
