Пайвандҳои дастрасӣ

Хабари нав

Ҷанги Украина

"Дар як маҳалла 19 ҷавонро кушта, зери хок карданд" ВИДЕО

Вайронаҳои шаҳри Ирпин

Нерӯҳои Русия дар оғози ҳамла ба Украина асосан шаҳри Киев ва минтақаҳои атрофи онро нишон гирифтанд. Яке аз чунин маҳалҳо, ки аз тири тӯпу тонки Русия хароб гашт, шаҳри Ирпин аст ва он дар 20-километрии пойтахти Украина воқеъст.

Аксар сокинони Ирпин ба муҳофизати ватани худ бархоста, бархеи дигар ба монанди Олга Овчаренко ва хонаводааш тасмим гирифтанд, маҳалли зисти худро тарк кунанд. Овчаренко мегӯяд, баъди мушакборон маҷбур шуд, бо ҳамсару духтараш биравад.

“Он лаҳза танҳо дар фикри наҷоти духтарам будем. Ба ӯ гуфтем, агар ҳодисае рӯй дод, зуд худашро аз мошин ба берун партояд ва украиниҳо ё шахсони кӯдакдорро ёбад. Онҳо мадад мекунанд,” – нақл кард ин сокини Ирпин.

Он рӯз Олга ва хонаводааш фикр мекарданд, ки сафарашон дигар бебозгашт аст. Бинобар ин, модараш Мария Боваленкоро низ ба фирор аз хона маҷбур кардаанд.

"Аслан фикр намекардам, ки одамон ба чунин амалҳои ғайриинсонӣ қодир бошанд. Фикр мекардам, ин вазъ зиёд тӯл намекашад ва ба ҳар ҳол аз ин ҷо мераванд," – мегӯяд хонум Боваленко.

Наворро дар инҷо бинед:

Сокинони Ирпин ба хонаҳои вайронашон бармегарданд
лутфан мунтазир бошед

Феълан кор намекунад

0:00 0:02:30 0:00

Баъди чанде онҳо тасмим гирифтанд, дигар ба фирору оворагардӣ поён диҳанд ва ба маҳалли зисти пешинаашон баргаштанд. Ба хонае, ки ба харобазор табдил шудааст.

Слава Овчаренко, шавҳари Олга, мегӯяд, “низомиёни рус ба касеву чизе раҳм накарданд. Бучаи ҳамсоя майдони даргириҳо буд. Ҷанги даҳшатноке шуд. Ман камаш 23 зарбаи тӯпхонаро ҳисоб кардам."

Аммо фоҷеаи аслӣ сарнавиштҳои шикаста ва одамони нобудшуда ҳастанд. Слава мегӯяд, нерӯҳои Русия 19 ҳамсояи ҷавони онҳоро куштанд. “Онҳоро дар як гӯри дастҷамъӣ дафн кардаанд,” – афзуд ӯ.

Сокинон намедонанд, кай сулҳу оромӣ ба зодгоҳашон бармегардад. Онҳое, ки ба монанди Олга Овчаренко ба ватани худ баргаштаанд, умед доранд, рӯзе хонаҳои худро аз нав месозанду ба зиндагии пешина бармегарданд. Ҳарчанд аз ҳоло медонанд, ки чандон саҳл нахоҳад буд.

Нерӯҳои Русия рӯзи 24-уми феврали имсол бедалел ба хоки Украина ҳамла карданд. Аз он замон то ҳоло ҷанг идома дорад. Аз ҳарду тараф ҳазорҳо кас кушта ва миллионҳо сокини Украина беҷову овора ва паноҳанда шудаанд.

Маскав борҳо ҳамлаашро “амалиёти вижа” барои ғайринизомӣ кардани Украина номидааст. Киев ва кишварҳои ғарбӣ онро таҷовуз ба хоки Украина дониста, алайҳи Кремлин ва мансабдорону сарватмандони рус таҳримҳои сахт ҷорӣ карданд.

Ҳамаи хабарҳои имрӯзро дар инҷо бихонед

Украинаро барои дар хатар гузоштани сокинони осоишта танқид карданд

Агнес Калламард, Дабири кулли Афви Байналмилал.

Созмони Amnesty International ё Афви Байналмилал нерӯҳои Украинаро ба он муттаҳам кард, ки дар биноҳои истиқоматӣ ва бемористонҳо ҷой гирифта, ҷони сокинони осоиштаро зери хатар мегузоранд. Мақомоти Киев ба ин изҳорот вокуниши шадид карданд.

Агнес Калламард, Дабири кулли Афви Байналмилал гуфт, ки пажӯҳишгарони онҳо ҳангоми таҳияи гузориши худ, ки 4-уми август нашр шуд, “намунаҳое сабт карданд, ки низомиёни Украина дар маҳаллаҳои пуродам ҷойгир шуда, мардуми осоиштаро зери хатар гузоштаанд ва бо ин рафтор қонунҳои ҷангро вайрон карданд.”

Ин гузориш аз ҷониби дастгоҳи тарғиботии Кремл ва расонаҳои Русия ба таври густарда истифода шуд ва Украинаро хашмгин кард.

Дмитрий Кулеба, вазири умури хориҷии Украина гуфт, ки созмони ҳомии ҳуқуқ бо нашри ин гузориш байни амалкарди нерӯҳои таҷовузгари Русия ва украиниҳо, ки аз ватани худ дифоъ мекунанд, "баробарии бардурӯғ"-ро намоиш дод. "Ин рафтори Авфи Байналмилал пайдо ва расонидани ҳақиқат ба ҷаҳон нест. Ин намоиши дурӯғин ва баробар нишон додани ҷинояткор ва ҷабрдида аст. Ин баробар нишон додани кишваре, ки садҳо ва ҳазорон ғайринизомиён, деҳаҳо, қаламравҳо ва шаҳрҳоро несту нобуд мекунад ва кишваре, ки ноумедона худро дифоъ мекунад, мебошад,”-гуфт, ӯ.

Олексий Резников, вазири дифоъи Украина, ин гузоришро барои зери суол бурдани талошҳои украиниҳо ба хотири дифоъ аз ватанашон "таҳриф" номид.

"Хурдтарин талош барои тавҷеҳи таҷовузи Русия ва нодида гирифтани худдифоии Украина, мисли гузориши Афви Байналмилал, далели аз даст додани адолатҷӯи ва беобрӯ кардани худ аст,"—навиштааст, ӯ.

Раҳбари созмони Афви Байналмилал гуфт, "дар мавқеи дифоӣ қарор доштан артиши Украинаро аз эҳтиром ба қонунҳои байналмилалии башардӯстона озод намекунад.”

Ин созмон гуфтааст, ки дар 19 шаҳру деҳот аз се минтақаи ин кишвар далелҳои сӯистифодаи нерӯҳои украинӣ аз манзилҳои зист ва маҳаллаҳои аҳолинишинро сабт кардааст. Ба гуфтаи таҳқиқгарони созмон, далелҳо дар миёнаҳои моҳи апрел ва июл сабт шудаанд.

Инчунин, Афви Байналмилал дар гузоришаш навиштааст, ки низомиёни Украина дар панҷ ҷой бемористонҳоро ҳамчун пойгоҳҳои низомӣ истифода мекунанд, ки он "нақзи ошкори қонуни байналмилалии башардӯстона" аст. Ин созмон аз ду ҷониби ҷанг хостааст, ки сокинони осоиштаро зери хатар нагузоранд ва аз макони зисти онҳо сӯистифода набаранд.

Дар гузориш таъкид шудааст, ки танқиди низомиёни Украина барои истифода аз маҳаллаҳои аҳолинишин ба маънои нодида гирифтани ҳамлаи худсаронаи Русия нест.

Ин созмон гуфтааст, дар минтақаҳои аҳолинишине, ки ба хулоса омада буданд, Русия ҷинояти ҷангӣ содир кардааст, далеле барои ин гуфта пайдо накарданд ва маълум шудааст, ки дар он минтақаҳо бештар нерӯҳои украинӣ ҷойгир будаанд.

Михайло Подоляк, мушовири президенти Украина дар саҳифааш дар Твиттер созмони Афви Байналмилалро ба он муттаҳам кардааст, ки дар маъракаи дурӯғпароканӣ алайҳи Украина бо Русия шарик шудааст.

Ӯ гуфтааст, ки “ Маскав талош дорад, ки нерӯҳои низомии Украинаро дар назди кишварҳои ғарбӣ бо истифода аз шабакаҳои ҷосусиаш бадном кунад ва ба барномаи кумаки низомӣ халал ворид кунад." Подоляк навиштааст, ки “афсӯс, Афви Байналмилал дар ин маърака ширкат мекунад.”

Гузориш тавре навишта шудааст, ки гӯиё Русия дар ҳамла ба манотиқи ғайринизомӣ ҳақ дорад, чун низомиёни украинӣ дар он ҷо мавқеъ доранд.

Мария Захарова, сухангӯи вазорати хориҷаи Русия дар Telegram навишт, ки онҳо борҳо дар ин бора гуфтаанд ва ба андешаи ӯ, нерӯҳои Украина сокинони одиро ҳамчун “сипари зинда” истифода мекунанд.

Русия рӯзи 24-уми феврал бесабаб ба Украина ҳамла кард. Аз он замон то кунун, ҳазорон нафар куштаву захмӣ ва миллионҳо нафар гуреза шудаанд.

Олмон: Фиристодани силоҳ ба Украинаро идома медиҳем, ҳатто агар газ комилан қатъ шавад

Анналена Бербок дар суҳбат бо Радиои Аврупо Озод/ Радиои Озодӣ.

Вазири корҳои хориҷии Олмон мегӯяд, ки кишвараш аз Украина ҳимоят мекунад ва ба фиристодани силоҳ ба Киев идома хоҳад дод, ҳатто агар Русия ба таври комил додани газ ба Аврупоро қатъ кунад. Анналена Бербок ин матлабро рӯзи сешанбеи 26-уми июл дар гуфтугӯ бо Радиои Аврупои Озод/Радио Озодӣ баён кард.

Ӯ ҳамчунин иқдоми ахири Русия ба коҳиши содироти газ ба Аврупоро "боҷхоҳӣ" номид ва гуфт, "бояд ҳарчӣ зудтар аз вобастагӣ ба энержии Русия раҳо шавем, чун ин масъалаи амният ва озодӣ" аст.

Вай ҳамчунин аз Маҷористон (Венгрия) барои ноҳамсӯӣ бо Иттиҳоди Аврупо дар ҷанги Русия ва Украина интиқод кард ва гуфт, Русия борҳо ва борҳо борҳо талош кардааст, ки миёни аъзои ин ИА ихтилоф биандозад, аммо муваффақ набудааст. "Аммо мо ҳамакнун дар як ҳамбастагӣ ва иттиҳоди бесобиқа қарор дорем".

Анналена Бербок дар посух ба пурсише дар бораи сафари вазири корҳои хориҷии Маҷористон ба Русия барои дарёфти гази бештар гуфт, "хушбахтона ҳеҷ кадом аз аъзои дигари Иттиҳоди Аврупо дар ин масъала бо Маҷористон нест ва албатта Будапешт низ чун дигар кишварҳои узви ИА ба тарафдорӣ аз таҳримҳо зидди Русия раъй додааст. Маҷористон хуб медонад, ки ояндаи онҳо дар чӣ самте беҳтар хоҳад буд".

Русия соли гузашта содироти газ ба Аврупоро тақрибан 20 дарсад коҳиш дод ва ба 420 миллион метри мукааб дар як рӯз расонд. Аз замони ҳамлаи низомӣ ба Украина, Русия содироти газ ба Украинаро боз ҳам коҳиш дод ва онро ба камтар аз 100 миллион метри мукааб дар рӯз расонд.

Иттиҳоди Аврупо рӯзи сешанбе тасмим гирифт, ки ба хотири пешгирӣ аз бӯҳрони энержӣ, то охири моҳи марти соли оянда 15 дарсад газро сарфаҷӯӣ кунад.

Қаблан Иттиҳоди Аврупо тасмим гирифта буд, ки воридоти газ аз Русияро аз охири соли ҷорӣ 66 дарсад коҳиш медиҳад ва аз соли 2027 комилан аз гази Русия даст мекашад. Аммо Русия дар қатъи газ пешдастӣ кардааст. Раҳбарони Аврупо Русияро ба истифода аз газ ҳамчун абзор барои боҷ хостан аз Ғарб муттаҳам кардаанд.

Хонум Бербок ҳамчунин дар посух ба пурсише дар бораи аслиҳаи пешрафтае, ки ахиран Олмон ба Украина дод ва ҳамчунин таъхири чандмоҳаи Олмон дар фиристодани чунин аслиҳа гуфт, ки ин силоҳҳо бисёр пешрафта ҳастанд ва барои истифода аз онҳо ниёз ба омӯзиши низомиёни Украина буд.

Рӯзҳои гузашта хабарҳо аз истифодаи сарбозони украинӣ аз силоҳҳои пешрафтаи олмонӣ дар ҷанг муқобили Русия, нашр шуда буд.

Вазири корҳои хориҷии Олмон дар робита ба ояндаи ҷанг дар Украина гуфт, "ҳарчӣ Украина тасмим бигирад, аз пуштибонии мо бархӯрдор хоҳад буд, зеро мо тарафдори қонунҳои байналмилалӣ ҳастем ва аз он ҳимоят мекунем".

"Хонаам дар бомбаборон вайрон шуд, ҷое барои рафтан надорам" ВИДЕО

Паноҳҷӯёни украинӣ

Миллионҳо украинӣ, ки бо оғози ҷанги Русия ба кишварҳои аврупоӣ фирор карда буданд, ба мушкили нав дучор шудаанд. Латвия, кишвари аврупоии наздик ба Украина, эълон кард, ки дигар тавони қабули паноҳандагонро надорад, чун имкони таъмини онҳо бо манзил нест. Ин хабар гурезаҳои украиниро нигарон кардааст.

Ҳар рӯз 120 гурзеа аз хоки Украина вориди Латвия мешаванд. Валентина, паноҳандаи украинӣ, мегӯяд, "чор моҳ боз дар инҷо рӯҳан азоб мекашам. Хонаи ман дар Харков дар бомбаборон вайрон шуд. Ҷое барои рафтан надорам."

Ҳукумати Латвия мегӯяд, давоми се моҳ гурезаҳои украиниро бо хона ва хӯрокворӣ таъмин карданд. Ҳоло ёрии давлатӣ ба паноҳандагони украинӣ хеле кам шудааст. Дар Рига, пойтахти Латвия ва шаҳрҳои дигари ин кишвар дар як рӯз ба паноҳандагон танҳо 3,5 евро медиҳанд.

Нина, паноҳандаи украинӣ, мегӯяд, “нархи хонаҳо барои иҷора хеле боло рафтааст. Мо барои пардохти пули иҷора, пардохти хидматрасониҳои коммуналӣ ва хӯрок пул надорем.”

Мақомоти Латвия умед доранд, ки паноҳандагон кор пайдо мекунанд ва зиндагиашонро худашон пеш мебаранд. Аксар паноҳандагон бекоранд ва шуғле дар ин кишвар наёфтаанд. Ҳоло онҳо дар ростои бесарпаноҳӣ ҳастанд.

“Мо дар хонае зиндагӣ мекунем, ки онро одамони хайрхоҳ додаанд. Соҳиби хона дар истироҳатгоҳи тобистонааш аст. Дар давоми ду-се ҳафта бояд аз инҷо кӯчем. Мушкил дар ин аст, ки ҷое барои рафтан надорем. Дигар барои мо касе чизе ваъда накардааст ва худамон бояд ҷой ёбем,” – мегӯяд паноҳандаи украинӣ Оксана.

Хонаводаҳои фирории украинӣ дар пайдо кардани роҳи ҳалли мушкил оҷиз мондаанд. Аксар гурезаҳо дастнигаранд. Ҳукумати Латвия аз сокинон хостааст, ба паноҳандагон мадад кунанд. Ҳоло на ҳама сокинон хоҳиши кумак ба гурезаҳои украиниро доранд.

Видеоро дар инҷо бинед:

Мушкили паноҳҷӯёни украинӣ
лутфан мунтазир бошед
Embed

Феълан кор намекунад

0:00 0:01:57 0:00

Гандумзори Украина месӯзад

Таркишу сӯхторҳо гандумзори Украинаро нобуд ва хатари бӯҳрони озуқаро дар ҷаҳон шадидтар мекунанд. Аксари кишварҳо роҳи фавран раҳо кардани ғаллаи муҳосирашудаи Украинаро ҷустуҷӯ доранд.

Зеленский: Силоҳҳои ғарбӣ вазъро дар майдони ҷанг дигар мекунанд

Одесса

Шаҳри Одесса ҳадафи ҳамлаи мушакии Русия қарор гирифт. Дар ҳамин ҳол, президент Владимир Зеленский гуфт, бо мадади силоҳҳои пешрафтаи ғарбӣ, ки оҳиста-оҳиста тавозунро дар майдони ҷанг дигар мекунад, Украина қодир аст "талафоти қобили таваҷҷуҳе" ба нерӯҳои русӣ ворид кунад.

Зеленский гуфт, нерӯҳои украинӣ "тавонистаанд, зиёни логистикии қобили таваҷҷуҳе ба ишғолгарон расонанд", ки ҳифзи мавзеъҳои артиши Русия дар минтақаҳои зери тасарруфашонро душвор мекунад.

"Мо қадам ба қадам пешравӣ мекунем", -- афзуд Зеленский. Вай илова кард, ки "ҳадаф як мебошад ва он барафроштани парчами Украина дар ҳама шаҳрҳо ва деҳаҳо хоҳад буд".

Сергей Ҳайдай, раиси идораи низомии минтақаи Луганск, рӯзи 19-уми июл гуфт, "силоҳҳои ғарбӣ на 100 дарсад, балки 200 дарсад кор медиҳанд, зеро анборҳои Русия метарканд, постгоҳҳои низомӣ мунфаҷир мешаванд".

Вазорати дифои Бритониё рӯзи 19-уми июл дар хабарномаи рӯзонаи худ гуфт, ҳадафи фаврии эълоншудаи Русия тасарруфи минтақаи Донбасс аст.

Бо ин ҳол, дар ин баёния омадааст, ки агарчӣ русҳо ҳамчунон мумкин аст қаламрави бештареро ишғол кунанд, суръати пешравии онҳо бисёр кунд хоҳад буд.

Лиза. Тифле, ки дар ҳамлаи мушакии Русия дар Украина кушта шуд. АКС

Дар ҳамлаи мушакии Русия ба шаҳри Виннитсаи Украина рӯзи 14-уми июл дар қатори даҳҳо мардуми осоишта як духтари чаҳорсола кушта шуд. Елизавета (Лиза) бемории синдроми Даун дошт. Модараш, Ирина Дмитриева, то замони фоҷиа ҳар рӯз дар Инстаграм гоҳ аз мушкилӣ ва гоҳе аз пешрафтҳои ӯ менавишт. Русия пайваста мегӯяд, ҳадафҳои низомӣ ва ҳарбиёнро дар Украина нишон гирифтааст, вале кушта шудани Лиза бисёриҳоро такон дод ва иддаои Маскавро бепоя баровард.

Ин акси Ирина Дмитриева ва духтараш Елизаветаро дар аввали моҳи июли имсол дар наздикии Виннитса гирифтаанд.

Пас аз як ҳафта чанд мушаки болдори русии "Калибр" ба Виннитса, шаҳре дар ҷануби ғарби Киев, бархӯрд.

Оқибатҳои зарбаи мушакӣ ба Виннитса, 14-уми июли 2022
Оқибатҳои зарбаи мушакӣ ба Виннитса, 14-уми июли 2022

Дар ҳамлаи мушакӣ камаш 23 нафар, аз ҷумла Елизаветаи чаҳорсола кушта шуданд. Модараш Ирина сахт захмӣ шуд.

Ирина мегӯяд, пизишкон пеш аз таваллуд ӯ ва шарики зиндагияшро огоҳ карда буданд, ки тифлашон чӣ гуна хоҳад буд.

"Вақте фаҳмидем, ки ман ҳомила ҳастам, бениҳоят шод шудем. Дар зеҳни мо тасвири як оилаи идеалӣ эҷод шуд, вале тақдир чизи дигар мехост," – навиштааст Ирина дар Инстаграм. Ва илова кардааст, "мо маҷбур шудем, дарду ноумедӣ, таҳқир ва тарсро аз сар гузаронем."

Ирина дар яке аз блогҳояш навиштааст, "пизишкон гуфтанд, Шумо ҳанӯз ҷавонед, тифли бемор чӣ даркор?"

Ӯ ва ҳамсараш медонистанд, ки кӯдак бо мушкилоти саломатӣ таваллуд мешавад, аммо тасмим гирифтанд, ба дунё биояд. Онҳо хостанд, "ҷаҳонро ба Лиза нишон диҳанд".

Дар ҳафтмоҳагӣ дили Лизаро ҷарроҳӣ карданд. Пас аз панҷ соати интизорӣ ба волидон хабар доданд, ки ҷарроҳӣ муваффақона гузашт.

Соли 2019. Рӯзи таваллуди Лизаро ҷашн мегиранд. Ирина дар блогаш дар Инстаграм нигоштааст, ки “Ман модари ин фаришта ҳастам”.
Соли 2019. Рӯзи таваллуди Лизаро ҷашн мегиранд. Ирина дар блогаш дар Инстаграм нигоштааст, ки “Ман модари ин фаришта ҳастам”.

Моҳи июни соли 2019 Ирина дар Инстаграм хабар дод, ки "Лиза худаш менишинад" ва афзудааст: "Барои баъзеҳо ин чизи хурд аст, аммо барои мо боварнакарданӣ. Лиза барои мо духтари қавӣ ва муборизу қаҳрамон аст."

"Барои ман ҳар як маҳорати нави Лиза хурсандии бузург аст ва дар паси он заҳмати зиёде нуҳуфтааст," – навиштааст Ирина.

Ирина дар боғе дар ҷануби Киев истироҳат дорад, духтараш дар аробача хобидааст. Соли 2019
Ирина дар боғе дар ҷануби Киев истироҳат дорад, духтараш дар аробача хобидааст. Соли 2019
Ҷасади ба хун оғӯштаи Лиза пас аз ҳамлаи мушакии Русия ба Виннитса, 14-уми июли 2022
Ҷасади ба хун оғӯштаи Лиза пас аз ҳамлаи мушакии Русия ба Виннитса, 14-уми июли 2022

"Омодагии Русия ба марҳилаи дигари ҷанг". Зеленский: Украина тоб меорад

Мақомоти Украина мегӯянд, бар асари ҳамлаҳои Русия дар се рӯзи охир дастикам 40 кас кушта шудаанд

Як мансабдори низомии Киев мегӯяд, Русия ба марҳилаи дигари ҳамлааш ба Украина омода мешавад. Ин хулоса баъди он баён шуд, ки Маскав ба нерӯҳояш барои густариши амалиёти низомӣ дастур дод.

Вадим Скибитский, сухангӯйи истихбороти низомии Украина, рӯзи 16-уми июл гуфт, «ин танҳо зарбаҳои мушакӣ аз ҳаво ва баҳр нест.»

«Мо дар тамоми хати ҷанг ба таври муайян фаъол шудани душманро мебинем. Ҳоло ба марҳилаи навбатии ҳуҷум тайёрӣ мебинанд,» -- афзуд ӯ.

Вазорати дифои Бритониё рӯзи 17-уми июл гуфт, Русия мавқеи дифоии худро дар қаламравҳои ишғолкардааш дар ҷануби Украина тақвият медиҳад.

Дар эъломия гуфтаанд, «ин сафарбаркунии нерӯҳо ва муҳиммот байни Мариуполу Запарожйе ва Херсонро дар бар мегирад.» Вазорати дифои Бритониё илова кардааст, ки нерӯҳои Русия дар Мелитопол низ чораҳои амниятиро шиддат мебахшанд.

Маскав рӯзи 16-уми июл эълон кард, ки амалиёти низомии худро дар Украина афзоиш медиҳад.

Украина мегӯяд, дар се рӯзи охир бар асари тирборони Русия ба шарҳрҳо камаш 40 нафар кушта шудаанд. Волии Харков рӯзи 16-уми июл гуфт, дар як ҳамлаи Русия дар шаҳри шимолу шарқи Чухуив се нафар ҷон бохтанд.

Президент Владимир Зеленский дар паёме ваъда дод, ки кишвараш "тоб" хоҳад овард. Ӯ гуфт, Украина тавонистааст як қисми қаламраверо, ки аз оғози ҷанг аз даст дода буд, бозпас бигирад ва дар ниҳоят заминҳои бештари ишғолшудаашро дубора соҳиб хоҳад шуд.

Иттиҳоди Аврупо рӯзи 18-уми июл масъалаи сахттар кардани таҳримҳоро алайҳи Русия баррасӣ хоҳад кард.

Русия рӯзи 24-уми феврали имсол ба Украина ҳамла кард.

Маскав онро амалиёте барои ғайринизомӣ кардани Киев номида, мегӯяд, асосан ҳадафҳои низомиро нишон мегирад. Созмони Милали Муттаҳид рӯзи 12-уми июл дар гузорише гуфт, дар натиҷаи ҷанги Русия дар Украина беш аз панҷ ҳазор ғайринизомӣ кушта ва зиёда аз 6500 каси дигар захмӣ шудаанд.

Дар ҳамлаи мушакии Русия ба Виннитсаи Украина 23 ғайринизомӣ кушта шуданд

Шаҳри Виннитсаи Украина, 14 июли соли 2022.

Мақомоти Украина гуфтанд, дар ҳамлаи мушакии Русия ба шаҳри Виннитса дар минтақаҳои марказии ин кишвар дастикам 20 ғайринизомӣ кушта ва даҳҳо нафари дигар захмӣ шудаанд.

Артиши Украина гуфт, дар ин ҳамла се мушак аз як киштӣ дар Баҳри Сиёҳ, ба шаҳри Виннитса дар 200-километрии ғарби Киев бархӯрданд ва системаи зиддиҳавоии Украина тавонист ду мушаки дигарро роҳгирӣ кунад ва аз байн барад.

Дар наворҳои видеоие, ки аз ҷойи афтодани мушакҳо дар шабакаҳои иҷтимоӣ нашр шудааст, метавон дуди сиёҳеро, ки аз як бинои баланд бархостааст, мушоҳида кард. Аз оғози ҳамлаи Русия ба Украина дар 24-уми феврали имсол, ин маргбортарин ҳамла б ғайринизомиён мебошад.

Ба гуфтаи мақомоти украинӣ, дастикам се кӯдак дар ин ҳамла ҷон бохтанд. Дар аксҳое, ки аз маҳали бархӯрди мушакҳо нашр шудааст, метавон аробачаи (коляска) чаппашуда дар пиёдарав ва ҷасадеро дар паҳлӯи он дид, ки рӯи он пӯшонида шудааст. Шумораи зиёде аз мошинҳое, ки тахриб шуданд ва деворҳое, ки аз ин бино фурӯ рехтааст, дар аксҳои дигар ба чашм мехӯранд.

Масъулини шаҳри Виннитса дар аввалин хабарномаи худ гуфтанд, ки ҳудуди 50 нафар ҷароҳатҳои вазнин бардоштаанд ва дастикам 15 нафари дигар нопадид шудаанд.

Владимир Зеленский, раиси ҷумҳури Украина дар бахше аз суханронии онлайнӣ дар нишасте дар мавриди пайгирии ҷиноятҳои ҷангии Русия дар Украина гуфт, "мушакҳои Куруз ба ду нуқтаи ғайринизомӣ бархӯрд кардаанд. Шумораи зиёде аз хонаҳои мардум ва як маркази беҳдоштӣ вайрон шудааст ва мошинҳо ва трамвай дар оташ сӯхтанд. Ин амали террористии Русия аст. Шумораи қурбониён то ин лаҳза ҳудуди 20 нафар аст".

Вазорати дифои Русия, ки борҳо ҳамла ба нуқтаҳои аҳолинишинро рад кардааст, то кунун дар мавриди ҳамлаи мушакӣ ба шаҳри Виннитса изҳори назар кардааст. Муовини вазири дифои Украина дар як нишасти хабарӣ дар Киев ин ҳамларо "далели бештаре аз наслкушӣ" хонд.

Дмитрий Кулеба, вазири корҳои хориҷии Украина низ дар паёме дар шабакаи "Твиттер" Русияро ба "иртикоби ҷинояти ҷангии дигар" муттаҳам кардааст.

Идораи ҳолатҳои фавқулоддаи Украина дар баёнияе гуфтааст, ки соати даҳу панҷоҳ дақиқаи субҳ ба вақти маҳаллӣ як мушак ба паркинги як бинои идории 9-табақа бархӯрд. Бар асари таркиши мушак, биноҳои истиқоматии атроф низ зарар дидаанд ва як сӯхтори калон рӯй дод. Як мақоми баландпояи ин ниҳод гуфт, ба эҳтимоли зиёд ёфтани қурбониён, ки зери деворҳо мондаанд, феълан имкон надорад.

Шаҳри Виннитса то оғози ҳамлаи Русия ба Украина тақрибан 370 ҳазор нафар аҳолӣ дошт. Ин шаҳр аз хатти аввали ҷанг садҳо километр дур буд ва то андозае дар оромӣ ба сар мебурд.

Русия додани шаҳрвандиро осонтар кард. Дар Киев "ҳамла ба истиқлол" номиданд

Владимир Путин, раиси ҷумҳури Русия, рӯзи 11-уми июл фармони додани шаҳрвандии Русияро ба ҳамаи сокинони Украина содир кард. Пеш аз ин, фақат сокинони Луганск ва Донетск, Херсон ва Запорожйе чунин ҳақро доштанд.

Аз соли 2019, ки ин муқаррарот барои сокинони Донетск ва Луганск эълон шуд, то соли ҷорӣ беш аз 720 ҳазор нафар, ки баробар бо 18 дарсади сокинони Донбас мебошад, шиносномаи русӣ гирифтаанд.

Дар охирҳои моҳи май ва ҳудуди се моҳ пас аз ҳамлаи низомии Русия ба Украина, ин муқаррарот шомили ҳоли сокинони ду вилояти Херсон ва Запорожйе дар ҷануби Украина шуд. Қисматҳои зиёде аз ин ду вилоят ҳоло дар назорати артиши Русия мебошад. Тибқи гузоришҳо, аввалин шиносномаҳои русӣ ба сокинони ин минтақаҳо моҳи гузашта супурда шуд.

Дар фармони нав омадааст, ки шаҳрвандони Украина, ҷумҳуриҳои худхондаи шарқи Украина ва афроди бешаҳрвандие, ки ба таври доимӣ дар Украина истиқомат доранд, метавонанд, барои дарёфти шаҳрвандии Русия, дар асоси тартиби содашуда, муроҷиат кунанд.

Дар Вазорати корҳои хориҷии Украина гуфтанд, ки фармони ахири Путин ҳамла ба истиқлоли Украина ва хилофи меъёрҳои ҳуқуқи байналхалқӣ аст.

Пештар аз ин манобеи русиягаро хабар дода буданд, ки дар ҳудуди вилоятҳои Херсон ва Запорожйеи Украина нуқтаҳои нашри шиносномаи Русия таъсис шудааст. Ин ду вилояти Украина қисман таҳти назорати неруҳои Русия қарор доранд.

Русия рӯзи 24-уми феврали имсол ба Украина ҳамла кард. Дар Русия ин ҳамларо "амалиёти вижаи низомӣ" меноманд. Аммо Украина ва кишварҳои ғарбӣ онро таҷовузи низомӣ хонда, Русияро маҳкум кардаанд.

То кунун бар асари ин ҷанг ҳазорҳо нафар кушта ва миллионҳо нафар овора шудаанд. Тибқи баровардаҳои СММ, ҳудуди 12 миллион украинӣ овора шудаанд, ки аз ин шумора тақрибан 5 миллион нафар ба хориҷ муҳоҷират кардаанд.

Аксари муҳоҷирони украинӣ ба Лаҳистон, Молдова, Олмон ва дигар кишварҳои аврупоӣ паноҳ бурдаанд. Амрико ҳам қаблан эълон карда буд, ки то 100 ҳазор паноҳандаи украинаро дар хоки худ ҷой медиҳад.

Ҷасадҳо, вайронӣ ва нигаронӣ. Ҳамлаи Русия ба хонаҳои мардум дар Украина

Reuters: Фирор аз артиши Русия ба таври чашмрас афзоиш ёфтааст

Тибқи гузоришҳо, дар пайи ҳамлаи низомии Русия ба Украина, мавридҳои фирор аз хидмат дар сафҳои нерӯҳои мусаллаҳи Русия ба таври чашмгир афзудааст.

Хабаргузории "Рейтерз" рӯзи 10-уми июл ба нақл аз созмонҳои байнулмилалӣ ва баъзе намояндагони созмонҳои дифоъ аз ҳуқуқи сарбозон дар Русия гуфт, шумораи онҳое, ки барои фирор аз хидмати сарбозӣ аз қонундонҳо машварат ва маслиҳат мехоҳанд, бештар шудааст.

Деник Кокшаров, раҳбари як созмони дифоъ аз ҳуқуқи сарбозон ба номи "Призивник" гуфтааст, шумораи муроҷиаткунандаҳо барои машварат гирифтан аз мутахассисон барои фирор аз артиш дар кишвар 50 дарсад афзуд.

Шумораи нерӯҳои низоми Русия, тибқи омори Маркази мутолеоти байналмилалии стратегӣ дар Лондон, ҳудуди 900 ҳазор нафар аст ва солона 260 ҳазор ҷавони рус ба сарбозӣ даъват мешаванд.

Хабаргузории "Рейтерз" менависад, бароварда мешавад, ки аз замони ҳамлаи Русия ба Украина 15 ҳазор низомии Русия кушта шудаанд.

Як гурӯҳи машваратии ҳуқуқӣ бо номи "Шаҳрванд, артиш ва қонун" мегӯяд, шумораи муроҷиаткунандаҳо ба мутахассисони ин гурӯҳ барои ёфтани роҳҳои алтернативӣ барои нарафтан ба хизмати аскарӣ, 10 баробар шудааст.

Ба навиштаи хабаргузории "Рейтерз", мушоҳида нишон медиҳад, ки Русия барои ҷалби афроди бештар ба артиш ва фиристодани онҳо ба майдони ҷанг дар Украина, талошҳояшро бештар кардааст.

Русия рӯзи 24-уми феврали имсол ба Украина ҳамла кард. Дар Русия ин ҳамларо "амалиёти вижаи низомӣ" меноманд. Аммо Украина ва кишварҳои ғарбӣ онро таҷовузи низомӣ хонда, Русияро маҳкум кардаанд.

То кунун бар асари ин ҷанг ҳазорҳо нафар кушта ва миллионҳо нафар овора шудаанд. Тибқи баровардаҳои СММ, ҳудуди 12 миллион украинӣ овора шудаанд, ки аз ин шумора тақрибан 5 миллион нафар ба хориҷ муҳоҷират кардаанд.

Дархости як мансабдори украинӣ аз 350 ҳазор сокини Донетск барои тарки минтақа

Донетски Украина.

Раиси вилояти Донетск дар пайи ҷангҳои сахт ва ҳамлаҳои Русия, аз сокинони ин минтақа, ки беш аз 350 ҳазор нафарро ташкил медиҳанд, хост, фирор кунанд. Бахшҳое аз ин минтақа дар ҳоли ҳозир дар назорати нерӯҳои украинӣ мондааст.

Павел Кириленко, раиси вилояти Донетск, таъкид кард, ки "сарнавишти ҳамаи кишвар ба минтақаи Донетск вобаста аст... вақте ки аҳолии камтаре ҳузур дошта бошад, бештар хоҳем тавонист, то ба душман зарба занем ва вазифаҳои худро анҷом диҳем."

Тибқи маълумоти Созмони Милали Муттаҳид, аз оғози ҳамлаи низомии Русия ба Украина беш аз 7,1 миллион украинӣ дар дохили кишвар овора шудаанд ва беш аз 4,8 миллион нафар ҳам ба берун аз кишвар паноҳ бурдаанд.

Владимир Зеленский, раиси ҷумҳури Украина, гуфт, шоми сешанбе дар саросари кишвар бонги хатар зада шуд. Ин дар ҳоле аст, ки ҳафтаҳои охир дар бисёре аз минтақаҳо оромиш ҳукмфармо буд.

Зеленский дар суханронии видеоии худ изҳор дошт, "Шумо дар робита ба корҳое, ки террористҳо мекунанд, набояд дунболи мантиқ бошед. Артиши Русия ҳеч истироҳате намекунад ва танҳо як вазифа дорад: гирифтани ҷони мардум ва тарсонидани онҳо."

Артиши Русия дар ҳоли ҳозир таваҷҷуҳи асосии худро ба шарқи Украина равона кардааст. Раиси вилояти Доненск гуфт, аз он сабаб, ки бисёре аз зерсохторҳои муҳими кишвар дар ин минтақа ҳастанд, ҳадафи аслии Русия низ акнун Краматорск ва Славянск аст.

Вай бо танқид аз бомбаборони нерӯҳои русӣ гуфт, онҳо "ҳеч чизи хосеро ҳадаф қарор намедиҳанд... ва танҳо қасди нобудии зерсохторҳои ғайринизомӣ ва минтақаҳои аҳолинишинро доранд."

Артиши Русия рӯзи якшанбе эълон кард, ки ҳама қаламрави вилояти Луганскро тасарруф кард ва пас аз он бамборони вилояти Донетскро шиддат бахшид.

Путин дастур додааст, ҳамла ба Украина идома ёбад

Путин ва Шойгу.

Раиси ҷумҳури Русия рӯзи 4-уми июл ба Сергей Шойгу, вазири дифои он кишвар дастур додааст, ки ҳамлаи низомӣ дар Украина пас аз тасарруфи пурраи вилояти Луганск бояд идома ёбад.

Владимир Путин ба вазири дифои ин кишвар гуфт, "воҳидҳои низомӣ дар гурӯҳи шарқӣ ва ғарбӣ бояд вазифаи худро бар асоси нақшаҳои аз пеш қабулшуда идома диҳанд. Умед дорем, ҳамон тавр, ки то ба ҳол дар Луганск рух додааст, ҳама чиз дар ростои муваффақияти онҳо пеш меравад."

Вазорати дифои Русия рӯзи якшанбе ба Путин гузориш дод, ки ҳама қаламрави вилояти Луганск дар назорати артиши ин кишвар аст. Тасарруфи пурраи Луганск як пирӯзии муҳим барои Русия хонда мешавад.

Путин афзудааст, нерӯҳое, ки дар ҷанги Луганск иштирок доштанд, акнун бояд истироҳат кунанд ва тавоноиҳои ҷангии худро барқарор намоянд.

Русия пас аз чанд ҳафта ҳамлаҳои ноком барои тасарруфи Киев дар оғози ҳуҷуми худ ба Украина, аз нимаи моҳи март аксар нерӯҳои худро барои тасарруфи минтақаи Донбасс сафарбар кард.

Дар як ҳодисаи дигар, артиши Украина рӯзи душанбе эълон кард, ки парчами он кишвар дар ҷазираи "Мор" (Змеиный остров) барафрошта шуд. Артиши Русия ҳафтаи гузашта аз ин ҷазираи стратегӣ дар 35-километрии соҳилҳои ҷануб-ғарбии Украина, ки дар рӯзи аввали ҳамлаи низомӣ тасарруф карда буд, берун рафт.

Сухангӯи сарфармондеҳии артиши Украина дар ҷануб-ғарб дар як нишасти хабарӣ гуфт, "амалиёти низомӣ бомуваффақият ба поён расид ва ҷазираи "Мор" ба қаламрави кишвар бозгардонида шуд".

Баъзе аз коршиносон бовар доранд, берун рафтани нерӯҳои русӣ аз ин ҷазира, назорати Русияро бар қаламравҳои баҳрӣ ва муҳосираи бандарҳои Украина дар ҷануб ва ғарби ин кишвар суст хоҳад кард.

Як дипломати ғарбӣ дар Киев ба расонаҳои байнулмилалӣ гуфтааст, ақибнишинии Русия аз ин ҷазира барои содироти амни ғаллаи Украина кофӣ нест. Ӯ афзудааст, "аз як тараф Украина бояд обҳои минтақаро аз мина тоза кунад. Аз сӯи дигар Русия бо истифода аз нерӯи баҳрии худ, ки дар соҳили ҷанубии Украина ҷобаҷо кардааст, метавонад ба осонӣ гаштугузори киштиҳои борбариро халалдор кунад."

Ин дипломат таъкид кард, ки барои аз байн бурдани муҳосираи ин бандарҳо ва дигарбора оғоз кардани содироти ғалла, ҳукумати Украина ба пуштибонӣ ва мадади кишварҳои ғарбӣ ниёз дорад ва Туркия дар ин замина бояд нақши муҳимро иҷро кунад.

Ҳукумати Русия рӯзи панҷшанбе ақибнишиниро аз ин ҷазира иқдоме барои нишон додани ҳусни ният ва мухолифат накардани Русия бо тарҳи Созмони Милал барои эҷоди роҳҳои амни киштиронӣ дар ғарби Баҳри Сиёҳ хондааст.

Артиши Украина иддао кардааст, ки нерӯҳои Русия зери фишори мушакҳо ва тирандозии нерӯҳои баҳрии Украина аз ин ҷазира гурехтаанд.

Бародарон Кличко гуфтанд, вайронаҳои Киевро обод мекунанд. ВИДЕО

Русия дар рӯзҳои аввали ҷанг дар Украина шаҳри Киевро ҳадафи асосӣ қарор дода буд. Шаҳр мушакборон шуд ва беш аз 600 иншооти ғайринизомӣ вайрону ҳазорон нафар бехонумон гаштанд. Ҳамакнун бозсозии 300 бино оғоз шудааст.

Виталий Кличко, шаҳрдори Киев, мегӯяд, Русия қасдан ба биноҳои ғайринизомӣ ҳамла мекунад: "Чизе, ки "амалиёти махсус" алайҳи нерӯҳои мо ва дар ватани мо меноманд, беш аз 220 бинои истиқоматиро вайрон кард. Онҷо мардуми оддӣ мезистанд. Ҳадаф ин аст. Ҳар чизе, ки дар таблиғоти Русия мебинем, дурӯғ аст."

Шаҳдори Киев дар идома гуфт, "суоли асосии ҳар украинӣ ҳоло ин аст, ки ҷанг кай тамом мешавад?"

Кличко дар талош барои бозсозии Киев ва барқарории сулҳ танҳо нест. Владимир Кличко, бародараш ва қаҳрамони ҷаҳон оид ба бокс, дар паҳлӯяш аст. Владимир Кличко мегӯяд, "ин қарзи шаҳрвандии ман аст. Ҳамин роҳро интихоб кардем. Бовар дорам, ки ҳама украиниҳо, мардону занон, иҷрои қарзи шаҳрвандиро дарк мекунанд."

Наворро инҷо бинед:

Бародарон Кличко вайронаҳои Киевро обод мекунанд?
лутфан мунтазир бошед

Феълан кор намекунад

0:00 0:02:40 0:00

Ҷанг моҳҳост, ки идома дорад. Сокинони Киев ба мисли миллионҳо украинӣ дуо мекунанд, ки ин даҳшат зудтар поён ёбад ва онҳо ба зиндагии маъмулӣ баргарданд. Бародари шаҳрдори Киев аз ҷомеаи ҷаҳонӣ мехоҳад, пеши роҳи таҷовузгарии Русияро бигиранд.

Владимир Кличко, қаҳрамони муштзанӣ, мегӯяд, "агар мо пеши роҳи Русияро инҷо нагирем, бояд донем, ки ин оғоз аст. Пас аз ғасби Украина, онҳо дари кишварҳои дигарро хоҳанд кӯфт. Бояд кишварҳои ҷаҳон ва созмонҳои ҷаҳонӣ ба Русия нишон диҳанд, ки дар асри 21, пас аз Ҷанги Дуюми Ҷаҳонӣ, ҳамла ба як кишвари мустақил бо нақзи қонунҳо кори дуруст нест."

Мардуми Украина барои сулҳ дуо мекунад. Ду бародар ва қаҳрамонони ҷаҳон оид ба муштзанӣ барои бозсозӣ талош мекунанд ва барои бозгашт ба сулҳ дар Аврупо алайҳи Русия мубориза мебаранд.

Русия рӯзи 24-уми феврали имсол ба Украина ҳамла кард. То кунун ба асари ин ҳамла ҳазорон нафар аз ҳар ду ҷониб ҷон бохтаанд. Тибқи иттилои Созмони Милал, ҳудуди 12 миллион украинӣ овора шуда, беш аз 5 миллион нафари онҳо ба хориҷ муҳоҷир шудаанд.

Қадам ба қадам. Ҷанги Украина аз дурбини хабарнигорони Озодӣ

Қадам ба қадам. Ҷанги Украина аз дурбини хабарнигорони Озодӣ
лутфан мунтазир бошед

Феълан кор намекунад

0:00 0:36:15 0:00

Радиои Озодӣ қадам ба қадам ҳамлаи Русияро дар Украина бозтоб медиҳад. Мардум чӣ гуна аз зери тиру мушакҳо фирор карданд ва чӣ тавр хонаву дар ва пайвандонашонро аз даст доданд, дар навори хабарнигорони мо тасвир ёфтааст. Ҳамаи онро дар як филм ва дар инҷо бинед.

Низомиёни Украина дар ҷанг дар як шаҳри муҳим "ақибнишинӣ" кардаанд

Низомиёни Украина дар шаҳри Северодонетск. Акс аз 20-уми июни 2022

Низомиёни украинӣ шаҳри Северодонетскро дар вилояти Луҳанск, ки ҳафтаҳо боз майдони даргирии сахт буд, пурра тарк кардаанд. Дар ин бора Александр Стрюк, шаҳрдори Северодонетск, хабар дод.

Вазорати мудофиаи Украина хабарро расман тасдиқ ё рад накардааст. Вазорати мудофиаи Русия низ ҳанӯз аз тасарруфи шаҳр хабар надод, вале Рамазон Қодиров, раҳбари Чеченистон, эълон кард, ки "шаҳр зери назорати низомиёни рус аст".

Қисми зиёди вилояти Луҳанскро солҳо боз ҷудоиталабони рӯ ба Русия ба даст доштанд. Северодонетск дар ихтиёри Украина буд.

Пештар Сергей Ҳайдай, волии низомии Луҳанск, гуфта буд, ки низомиён барои он берун шудаанд, ки дар ҷои беҳтаре муқобили низомиёни рус сангар бигиранд.

Рӯзи шанбе дар бораи задухӯрд дар Лисичанск хабар нашр шуд, ки охирин шаҳри зери назорати Украина дар вилояти Луҳанск аст.

Вазорати мудофиаи Русия хабар дод, ки ин шаҳр аз ҷануб баста шудааст. Ҷониби Украина гуфт, ҳамлаи низомиёни русро пас гардондаанд ва шаҳр дар муҳосира нест.

Дар задухӯрдҳо дар Северодонетск ва Лисичанск хонаҳои зиёде вайрон шудааст. Теъдоди ҳалокшудагон дар миёни сокинони маҳаллӣ маълум нест.

Русия рӯзи 24-уми феврал бебаҳона ба Украина ҳамла кард ва то кунун ҷанг дар ин кишвар давом дорад. Ҳазорон нафар дар ин ҷанг кушта ва миллионҳо нафар беҷову овора шудаанд.

"Ҷанги сахттарин". Дар шарқи Украина чӣ мегузарад?

Северодонетск, Украина

Нерӯҳои Русия ба ҳамлаҳояшон ба минтақаи Донбасс идома додаанд. Мақомоти Украина гуфтанд, вазъият дар хатти аввали ҷабҳа дар шарқи он кишвар "комилан душвор" аст.

Сергей Ҳайдай, волии низомии Луҳанск, гуфт, нерӯҳои Украина ба дифоъ аз минтақаҳои Лисичанск ва Северодонетск идома медиҳанд. Ҷое, ки ба гуфтаи ӯ "ҷанги сахттарин" ҷараён дорад.

Ҳайдай ба телевизиони миллии Украина гуфтааст, нерӯҳои Русия назорати бисёре аз бахшҳои Севердонетскро ба даст доранд, аммо ба қавли ӯ, корхонаи кимиёвии «Азот»-ро нагирифтаанд. Бино ба гузоришҳо, садҳо ғайринизомӣ дар онҷо паноҳ бурдаанд.

Волии низомии Луҳанск афзудааст, роҳе, ки Лисичанск ва Севердонетскро ба шаҳри Бахмут мепайвандад, пайваста зери оташборон аст.

Ин мақоми украинӣ афзуд, Лисичанск тамоми рӯз саҳнаи ҳамлаҳои густарда аз тарафи Русия аст ва шояд то ҳанӯз чунин ҳамлаҳои сангинро таҷриба накарда бошад. «Мушаххас кардани шумори талафот мумкин нест,» -- илова кардааст ӯ.

Ин дар ҳолест, ки Владимир Зеленский, раисиҷумҳури Украина, ҳушдор додааст, ки Маскав ба хотири наздик шудани тасмимгирии Шӯрои Аврупо дар мавриди номзадии Украина ба узвияти Иттиҳоди Аврупо «бисёр асабонист».

Зеленский ҳамчунон афзоиши ҳамлаҳои Русия пеш аз ҷаласаи сарони Иттиҳоди Аврупоро пешбинӣ кардааст. Ӯ рӯзи 20-уми июн дар суханронияш афзуд, барои инки ҳеч касе дар мавриди шоиста будани Украина ҷиҳати касби номзадӣ ба узвият дар Иттиҳоди Аврупо шак накунад, ҳар кореро анҷом хоҳанд дод.

Чанд рӯз пас аз он ки ҳамлаи бесабаби Русия бар Украина дар 24-уми феврали имсол оғоз шуд, Украина барои касби узвияти Иттиҳоди Аврупо дархост дод.

Сипас Молдова ва Гурҷистон низ дар пайи таҳдиде, ки бар асари ҳамлаи Русия ба Украина дар минтақа эҷод шудааст, дархости узвият дар ин Иттиҳодро доданд.

Қарор аст, раҳбарони 27 кишвари узви Иттиҳоди Аврупо рӯзҳои 23 ва 24-уми июн дар ҷаласае дархостҳои се кишварро баррасӣ кунанд.

Ду низомии пешини Амрико дар ҷангҳои наздикии Харкив бедарак шудаанд

Акс аз моҳвораи Maxar Technologies ҷойи таркишеро нишон медиҳад, ки биноҳоро аз байн бурда, гудоли 40-метра ба миён овардаанд. 6 июни соли 2022

Пайвандони ҳарбиёни пешини Амрико -- Энди Ҳюни 27 ва Александр Друики 39-сола, ҳарду аз Алабама, рӯзи 15 июн гуфтанд, ки бори охир як ҳафта пеш бо ин ду нафар тамос доштаанд. Ба гуфтаи хешовандон, Ҳюн ва Друик пас аз ҷанг дар минтақае дар наздикии Харкив, ки бино ба гузоришҳо, аз зарбаҳои шадиди Русия осеб дидааст, барои иҷрои вазифа рафтанд ва барнагаштанд.

Кохи Сафед ИМА рӯзи 16 июн гуфт, ки талоши сахт дорад, аз сарнавишти ин ду шаҳрванди ИМА огаҳӣ ёбад ва Департаменти давлатии ИМА гузоришҳоеро таҳқиқ мекунад, ки бар пояи онҳо неруҳои Русия ё ҷудоихоҳони таҳти ҳимояти Русия ба камияш ду шаҳрванди Амрикоро дастгир кардаанд. Сухангӯи департаменти давлатӣ Нед Прайс ба хабарнигорон гуфт, ки "то имрӯз мо ин масъаларо бо Федератсияи Русия дар миён нагузоштаем." Вай афзуд, аломате аз русҳо нарасидааст, ки асорати ин ду нафарро нишон диҳад.

Прайс ҳамчунин гуфт, ки аз бенишон шудани як амрикоии дигар дар Украина низ хабар расидааст. "Ба фаҳмиши мо, ин шахс барои ширкат дар ҷанг ба Украина сафар карда", дар ҳафтаҳои охир нопадид шудааст, гуфт Прайс.
Мария Захарова, сухангӯи Вазорати корҳои хориҷаи Русия рӯзи 16 июн дар як барномаи телевизионӣ гуфт, Вошингтон дар робита ба Ҳюн ва Друк бо Маскав тамос нагирифтааст.

Агар Ҳюн ва Друк дастгир шуда бошанд, онҳо аввалин шаҳрвандони ИМА хоҳанд буд, ки дар ҷараёни ҳамлаи бебаҳонаи Русия ба Украина, ки рӯзи 24 феврал оғоз ёфт, асир афтодаанд.

Сухангӯи амнияти миллии Кохи Сафед Ҷон Кирбӣ гуфт, агар ин гузоришҳо тасдиқ шаванд, Вашингтон "ҳар кори дар тавонаш бударо мекунад" то ин ду мардро бозпас гирад. Наздикони ин ду нафар гуфтаанд, бесаброна гӯш ба занги хабар аз ҳоли онҳоянд. Холаи Друк, Диана Вилямс гуфт, ки ин ду нафар метавонанд ба истифодаи таҷрибаи худ дар артиши ИМА аз дасти душман фирор кунанд. Вай афзуд, Друке дар ду сафари ҷангии худ ба Ироқ омӯзиш ва таҷрибаи густарда дида, Ҳюн дар неруҳои баҳрӣ хидмат кардааст. Пентагон тасдиқ кард, ки ин ду қаблан сарбозони артиши ИМА будаанд.

Ҳафтаи гузашта ду бритониёӣ -- Айден Аслин ва Шон Пиннер ва як шаҳрванди Марокаш Саъдун Броҳим аз ҷониби мақомоти минтақаи ҷудоиталаби таҳти ҳимояти Русия дар вилояти шарқии Донетски Украина ҳамчун "зархарид" ба қатл маҳкум шуданд. Ҳар се мегӯянд, дар ҳоле боздошт шудаанд, ки ҳамчун сарбозони артиши Украина зидди неруҳои Русия меҷангиданд. Бритониё, СММ, Украина ва Олмон ҳукми қатли ин афродро маҳкум карданд.

Аҳли хонадони Аслин гуфтанд, ки ӯ ва Пиннер дар Украина зиста, дар артиши он хидмат мекарданд ва бояд "ҳамчун низомиёни Украина асири ҳарбӣ дониста шуда, бо бархӯрди муносиб" рӯ ба рӯ бошанд. Падари Саъдун Броҳим рӯзи 13 июн гуфт, ки писараш шаҳрванди Украина аст ва бо ӯ бояд муносибати дурут сурат гирад.

Додгоҳи ҳуқуқи башари Аврупо рӯзи 16 июн ба Русия паём фиристод, ки аз қатли Саъдун пешгирӣ кунад. Русия "бояд кафолат диҳад, ки ҳукми қатл нисбати Саъдун иҷро нашавад", гуфт додгоҳ дар пайи дархости намояндаи Саъдун.

Вазири дифои Украина: "Ҳар рӯз дар хати ҷанг то 100 низомӣ кушта мешавад"

Алексей Резников, вазири мудофиаи Украина, хабар дод, ки дар хати ҷанг ё фронт ҳамарӯза то 100 низомии украинӣ кушта мешаванд.

"Вазъ дар хати ҷанг вазнин аст. Мо ҳамарӯза то 100 низомиро аз даст медиҳем ва 500 кас захмӣ мешавад. Кремл бо тамоми нерӯ ҳамла мекунад, дар мемонад, ба муқовимати сахт рӯ ба рӯ мешавад, талафоти калон дорад. Аммо то кунун барои пешрафт дар минтақаҳои алоҳидаи хати ҷанг нерӯ дорад", - навишт вазир дар Фейсбук.

Резников дар идома гуфтааст, дар ҷанги зидди Русия зиреҳпӯшҳои лаҳистонии "Краб"-ро истифода хоҳанд кард.

Украинаву Русия аз хабар додан дар бораи талафоташон дар ҷанг худдорӣ меварзанд. Вазорати мудофиаи Русия ҳанӯз дар моҳи март марги бештар аз 1,5 ҳазор низомиашро дар Украина тасдиқ карда буд. Аз он замон то кунун ҳеч иттилои дигаре дар бора талафоти Русия дар Украина нашр нашудааст.

Миёнаи моҳи апрел Владимир Зеленский, президенти Украина дар суҳбат бо расонаҳо хабар дода буд, ки аз оғози ҷанг аз 2500 то 3000 низомии украинӣ кушта шудаанд. Вай ҳамзамон хабар дода буд, ки то 10 ҳазор низомии дигар захмӣ ҳастанд.

Мусулмонони украинӣ гуфтанд, ки чӣ мехоҳанд

Мусулмонони украинӣ гуфтанд, ки чӣ мехоҳанд
лутфан мунтазир бошед

Феълан кор намекунад

0:00 0:03:23 0:00

Як зодаи дигари Тоҷикистон дар ҷанги Русия дар Украина кушта шудааст

Ин аксҳоро Меъроҷ Солиев дар ихтиёри Радиои Озодӣ гузошт

Ҷасади боз як сарбози тоҷики артиши Русияро, ки ба қавли наздиконаш дар Украина кушта шудааст, ба Тоҷикистон меоранд. Пайвандони Сулаймонхӯҷа Набиеви 22-сола аз ҷамоати Чилгазии шаҳри Исфара гуфтанд, ҷасади ӯро рӯзи 8-уми июн аз сардхонае дар Вилояти Ростов гирифтанд.

Бародараш Меъроҷ Солиев рӯзи 9-уми июн ба Радиои Озодӣ гуфт, дар бораи кушта шудани ӯ ду рӯз қабл хабардор шуданд.

Ба нақли пайвандон, Сулаймонхӯҷа Набиев соли 2017 ба муҳоҷират рафта, дар Русия кору зиндагӣ мекард, аммо ду моҳ пеш соҳиби шиносномаи русӣ шуда, баъди сабтином дар Санкт-Петербург ба хидмат даъват шуд.

"Сулаймонхӯҷа дар Грознийи Чеченистон хидмат мекард, вале дар бораи кай ва чӣ тавр ба ҷанги Украина рафтани ӯ маълумот надорем," -- афзуд Меъроҷ Солиев.

Ҳамчунин, дақиқ нест, Сулаймонхӯҷа Набиев дар кадом минтақаи Украина ва дар чӣ шароите ҳалок шудааст.

Меъроҷ Солиев, бародари сарбози кушташуда, мегӯяд, ду рӯз пеш як масъули қисми ҳарбие, ки Сулаймонхӯҷа дар он хидмат мекард, ба ҷойи кораш занг зада, хабари марги ӯро расонд.

“Ба сардхона (морг) рафтем. Ба ғайр аз як сарбоз каси дигар ба назди мо наомад. Ҷасадро барои дору кардан ба оромгоҳи Ростов бурдем. Гуфтанд, ҳақ надорем, ки инро кушоем. Ин мурдаи терминал аст. Дар сардхона (морг) ҷасад хеле зиёд буд, мурдаро мисли тарбуз кофта мегирӣ,” – нақл кард ӯ.

Ҷасади сарбози кушташудаи тоҷикро бо ёрии муҳоҷирон ба Тоҷикистон мефиристанд. Тобути ӯ шаби 9-уми июн аз Маскав ба Хуҷанд хоҳад расид.

Аз оғози ҷанги Русия дар Украина хабари марги тақрибан даҳ зодаи Тоҷикистон ба наздиконашон расида ё матбуот тасдиқи онро ёфтааст. Пайвандони ин ҷавонони тоҷик, ки ҳама сарбози Русия будаанд, кушта шудани онҳоро тасдиқ мекунанд.

Дар бораи талафоти тоҷикон дар сафи нерӯҳои мусаллаҳи Украина ҳанӯз иттилое нест. Дар наворҳое, ки дар расонаҳо ва шабакаҳои иҷтимоӣ чарх мезанад, дида мешавад, ки зодаҳои Тоҷикистон аз ҳарду ҷониби ҷанг ба асорат афтодаанд. Тасдиқу тафтиши дурустии ин навору хабарҳо дар шароити ҷанг номумкин аст.

Ҷанги Русия бо Украина, ки Кремлин «амалиёти махсус», вале Киев таҷовуз ба қаламраваш меномад, тақрибан чаҳор моҳ боз давом дорад.

Як нашрияи украинӣ чанде пеш рӯйхати низомиёни Русияро расонаӣ кард. Дар ин феҳрист номи наздик ба 6 ҳазор нафаре омадааст, ки аз Осиёи Марказӣ ҳастанд. Дар бораи наздик ба 100 нафари онҳо гуфта шудааст, ки зода ва парвардагони Тоҷикистонанд.

Садҳо ҳазор шаҳрванди Тоҷикистон ҳамзамон шиносномаи Русияро доранд. Байни ду кишвар низоми душаҳрвандӣ ҷорист.

Зеленский: "Барои бозпас гирифтани минтақаҳои ишғолшуда меҷангем"

Раисиҷумҳури Украина рӯзи 7-уми июн гуфт, Киев бунбаст дар ҷабҳаи ҷанг бо Русияро қабул надорад ва ҳадафаш бозпас гирифтани ҳама минтақаҳои ишғолшуда мебошад.

Владимир Зеленский дар як паёми видеоӣ ба нишасте, ки рӯзномаи "Financial Times" ташкил карда буд, гуфт, "мо талафоти зиёде додем ва наметавонем қаламрави худро ба ин осонӣ вогузор кунем. Мо бояд ҳамаи минтақаҳои ишғолшударо озод кунем".

Президенти Украина қаблан гуфта буд, ҳудуди 20 дарсад аз қаламрави ин кишвар дар шарқ ва ҷануб аз сӯи Русия ишғол шудааст. Ӯ дар бахши дигаре аз суханонаш афзуд, "мо нияти таҳқир кардани ҳеч касеро надорем. Мо вокуниши мутақобил нишон медиҳем".

Ишораи ӯ ба суханони ахири Эммануэл Макрон, ҳамтои фаронсавиаш аст, ки гуфта буд, барои боз гузоштани роҳ барои тавофуқи дипломатӣ набояд Русияро "таҳқир" кард.

Зеленский айни замон ибрози умед кард, ки бо дарёфти системаҳои мушакии дурпарвоз аз Амрико ва Бритониё, битавонанд ҳамлаи Русия бахусус дар минтақаи Донбасро хунсо кунанд.

Ба гуфтаи Владимир Зеленский, Русия аз назари афрод ва таҷҳизот бартарӣ дорад ва артиши Украина барои муқобила бо Русия ба силоҳҳои вазнин ниёз дорад.

Раисиҷумҳури Украина таъкид кард, ки Русияро дар ҷабҳаи ҷанг шикаст медиҳанд, вале афзуд, ҳанӯз ҳозир аст ба таври мустақим бо Владимир Путин гуфтугӯ кунад. Ӯ ҳамзамон иддао кард, ки таҳримҳои Ғарб ба ҳадди кофӣ ба Русия зарба назадааст.

Ҳадафи аслии ҳамлаҳои Русия дар ҳафтаҳои ахир минтақаи Донбас будааст. Артиши Русия то ба ҳол тавонистааст, қисматҳои зиёде аз вилояти Луҳанскро дар ин минтақа тасарруф кунад ва ба ҳамлаҳои худ дар Донетск идома диҳад.

Дар ҳамин ҳол, Сергей Шойгу, вазири дифои Русия, гуфт, нерӯҳои ин кишвар бо ҳамлаҳои давомдор ва фиристодани нерӯҳои бештар тайи рӯзҳои ахир 97 дарсади қаламрави Луҳанскро тасарруф кардаанд. Ҳанӯз маълум нест, ки пас аз тасарруфи комили Луҳанск ва Донетск, Русия ҳамлаҳои худро ба дигар минтақаҳои Украина густариш хоҳад дод ё на.

Сергей Лавров, вазири корҳои хориҷии Русия, рӯзи сешанбе ҳушдор дод, ки агар кишварҳои ғарбӣ силоҳҳои дурпарвозро дар ихтиёри Украина қарор диҳанд, артиши Русия бо идомаи ҳамла дар дарунтари хоки Украина, нерӯҳои украиниро аз марзҳои худ дуртар хоҳад кард.

Шиноснома, пул ва таблиғот. "Русификатсия" дар минтақаҳои ишғолшуда дар Украина. ВИДЕО

Дар Мариуполи Украина барномаҳои таблиғотии Русияро намоиш медиҳанд

Русия дар баъзе аз минтақаҳои ишғолкардааш дар Украина ба ташвиқ ва "русификатсия" ё русикунонии аҳолӣ сар кардааст. Дар ин минтақаҳо дар баробари намоиши барномаҳои телевизионии Русия тақдими шаҳрвандиро пешниҳод карда, додугирифтро бо рубли русӣ ба роҳ монданд. Мансабдорони украинӣ ба шаҳрвандон ҳушдор додаанд, ки хиёнат ба ватан ҷазои сахте дорад.

Таълими таърихи Русия

Дар шаҳри Мариупол, ки моҳҳо боз зери тиру тӯпхонаи низомиёни Русия аст, дар экранҳои калон ба сокинон барномаҳои тарғиботии расонаҳои Русияро намоиш медиҳанд.

Ҳангоми таътили тобистона дар инҷо дари мактабҳо ба рӯйи кӯдакон боз мемонад. Давоми се моҳ хонандагони украиниро барои таҳсил бар асоси барномаи таълимии Русия омода мекунанд. Қарор аст, ба онҳо дарси забону адабиёти рус ва таърихи Русия омӯзонида шавад. Беш аз 50 омӯзгор барои кор дар вақти таътил розӣ шудаанд.

Кремл бо тасвиби санаде пешниҳоди шиносномаи русиро ба сокинони минтақаҳои ишғолшуда осон кард. Аммо ба гуфтаи Сергей Хлан, вакили Шӯрои вилоятии Херсон, сокинони ин қисмати Украина наметавонанд дар шаҳри худ санадҳои Русияро бигиранд.

"Русификатсия" дар минтақаҳои ишғолшудаи Украина
лутфан мунтазир бошед

Феълан кор намекунад

0:00 0:02:19 0:00

Симкортҳои фиребанда

Ӯ афзуд: “Пешниҳоди шиносномаи русӣ дар Қрими иғшолшуда сурат мегирад. Хоҳишмандон аз Херсон бояд ба Қрим рафта, шиноснома бигиранд. Як қисми хурд, онҳое, ки бо маъмурият ва низомиёни ишғолгар ҳамкорӣ доранд, эҳтимол шиносномаи Русияро дар инҷо бигиранд. Онҳо баъди озод кардани Херсон ҳукми абад хоҳанд гирифт.”

Харидуфурӯш дар минтақаҳои ишғолшуда бо рубли русӣ ба роҳ монда шудааст. Мақомоти ишғолгари Русия мехоҳанд, сокинон симкортҳои ширкатҳои мобилии Русияро бигиранд. Рақами ин симкортҳо бо "+7" шуруъ шуда, ҳар дақиқаи гуфтугӯ бо Русия ҳамагӣ 5 сент, вале бо Украина 35 сент арзиш дорад.

Русия 24-уми феврали имсол ба Укрина ҳамла кард. Кремлин гуфт, ҳадафаш ғайринизомӣ кардани Украина аст. Киев ва кишварҳои ғарбӣ онро таҷовузи ошкор ба хоки Украина донистанд ва ба зидди Маскав таҳримҳои сахте ҷорӣ карданд.

Нерӯҳои Русия иддао доранд, ки дар бештар аз се моҳи гузашта чанд гӯшаи Украинаро зери тасарруфи худ дароварданд, вале дар аксар минтақаҳо ба ақибнишинӣ маҷбур шуданд. Ҷанг ҳанӯз идома дорад.

"Русия дар Украина на кам аз 1000 танку 36 ҳавопаймояшро аз даст дод"

Артиши Русия дар Украина "тадриҷан ба пешравӣ" ноил мешавад, ҳарчанд талафоти зиёде дидааст. Дар ин бора рӯзи 26-уми май як мақомдори баландпояи Вазорати мудофиаи Амрико бе зикри номаш хабар дод. Вай илова кард, ки вазъ дар хатти ҷангро наметавон "бунбаст" номид.

Ба гуфтаи ин мақомдор, ҳарчанд артиши Украина ба таври муваффақона "истодагӣ мекунад", Русия ҳамлаи сангинро ба мавқеи артиши Украина идома медиҳад.

Мансабдори Вазорати мудофиаи Иёлоти Муттаҳида илова кард, ки артиши Украина "дар атрофи Харков ба пешравӣ ноил мешавад" ва дар натиҷаи ҳамлаи ҷавобӣ чанд минтақаеро соҳиб шудааст, ки 90 рӯзи охир дар ихтиёри Русия буд.

Вазорати мудофиаи Амрико мегӯяд, бино ба иттилои дарёфтиаш, артиши Русия дар ҷанг дар Украина на камтар аз 1000 танк, 36 ҳавопаймо ва бештар аз 50 чархболро аз даст додааст, аммо ҳамоно артиши Русия нисбати артиши Украина аз ҳисоби техника ва неруи низомӣ бартарӣ дорад.

Мансабдори Пентагон аз қарори охири Вазорати мудофиаи Русия ёдовар шудааст, ки ба мардони болотар аз 50-сола иҷозаи шомил шудан ба артишро доданд. Пештар аз ин танҳо ба мардони то 40-сола иҷозаи шомил шудан ба артиш дода шуда буд.

"Мо назорат дорем, ки чӣ гуна Маскав талош дорад, бо роҳҳои гуногун нерӯи зиндаи худро дар хатти ҷанг афзоиш диҳад", - гуфт мансабдори амрикоӣ.

Ёфтҳои бештар

Шарҳҳо

Шарҳи нав расид
Идома
XS
SM
MD
LG