Номи падарии ду нафари онҳо "Исроилович" аст. Додгоҳ муносибати хешутабории ин се нафарро шарҳ надод, вале расонаҳои Русия гуфтанд Аминҷон ва Диловар писарони Исроил Исломови 62-солаанд. Ҳарсеи онҳо дар кӯмак ба терроризм гунаҳкор дониста, зиндонӣ шуданд. Аммо ҳарсе ин айбномаро рад карданд.

Исроил Исломов панҷ фарзанд дошта, Аминҷон 33-сола, ба гуфтаи мақомоти Русия, охирин соҳибмулки мошине будааст, ки дар ҳамла ба тороли консертӣ истифода шудааст. Мошинро ба гумонбарони терроримзм бародар ӯ Диловари 24-сола фурӯхтааст. Аминҷон шаҳрванди Русия аст.

Додгоҳи ноҳияи Басманнии Маскав шаби 24-уми март Далерҷон Мирзоев, Саидакрам Раҷабализода, Фаридуни Шамсиддин ва Муҳаммадсобир Файзовро ба ҳабси пешакӣ гирифт. Онҳо ба иттиҳоми даст доштан дар ҳамлаи маргбор дастгир шудаанд.

Дар наворҳое, ки дар шабакаҳои иҷтимоӣ нашр шуданд, дида мешавад, ки онҳо шадидан латукӯб шудаанд ва осори ҷароҳат дар сару рӯяшон мондааст.

Дафтари матбуоти Додгоҳ гуфт, ки онҳо айбномаро пазируфтанд. Азбаски мурофиа паси дарҳои баста гузашт, ҷузъиёти он дастрас нест. Ҳамзамон дар мавриди даст доштани онҳо дар ҳамлаи маргбор суолҳо зиёд аст.

Рӯзи 22-юми март чор марди мусаллаҳ ба толори консертии маҷмааи “Крокус Сити Ҳолл” дар канори Маскав ҳамла карданд.

Гурӯҳи тундрави “Давлати исломӣ” ё ДОИШ бо нашри видео ҳамларо кори пайравонаш номид, вале президенти Русия онро ба Украина пайванд дод.

Теъдоди қурбониёни ин ҳамла ба 137 нафар расидааст. Тақрибан дусад кас захмӣ ҳастанд.

Рӯзи чоршанбе дар шаҳри Миннеаполис як корманди Хадамоти муҳоҷират ва назорати гумруки ИМА (ICE) занеро аз тири туфанг ба ҳалокат расонид. Мақомоти федеролии ИМА мегӯянд, ки ин як амали худдифоӣ буд, чун ин зан талош кард корманди идораи муҳоҷиратро бо мошинаш пахш шуд. Шаҳрдори Миннеаполис инро рад мекунад.

Зани даргузашта Рене Никол Гуди 37-сола, шаҳрванди ИМА мебошад, ки фарзанди шашсола дорад. Гуд худро дар шабакаҳои иҷтимоӣ чун «шоир, нависанда, ҳамсар ва модар» муаррифӣ мекард.

Дар шабакаҳои иҷтимоӣ навори видеоии ҳодиса нашр шудааст ва дар он дида мешавад, ки як корманди ICE ба мошине, ки дар миёни роҳ истодааст, наздик шуда талаб мекунад, ки дарро боз кунад ва аз дастаи дар мекашад. Мошин ба ҳаракат медарояд ва баъди ин, корманди дигари ICE, ки аз пеши мошин истодааст, силоҳро берун кашида аз масофаи наздик ба сӯи мошин дастикам се тир холӣ мекунаду ба қафо мепадарад. Дар видео дида намешавад, ки оё мошин бо афсар бархӯрдааст ё на. Баъди ин мошин бо суръати калон ба ду мошини дигаре, ки дар канори роҳ қарор доштанд, бархӯрда якбора меистад.

Вазири амнияти дохилии ИМА Кристи Ноэм мегӯяд, Гуд бо мошинаш пеши роҳи кормандони ICE-ро гирифт ва нахост роҳро боз кунад. “Баъди ин ӯ хост, ки корманди ҳифзи қонунро пахш кунад”, гуфт Ноэм дар нишасти хабарӣ. Вазир инчунин гуфт, ки мошин корманди ICE-ро пахш кард. Вазир гуфт, ин ҳодисаи “терроризми дохилӣ” буд ва аз Бюрои федеролии тафтишот талаб кард, ки тафтиш барпо кунанд.

Президент Доналд Трамп ҳам ба ин ҳодиса вокуниш кард ва занро “як таблиғгари касбӣ” номид, ки “дар сари чанбари мошин беназм ҳаракат карда муқобилият нишон медод” ва баъди ин “афсари идорати ICE-ро махсус пахш кард”. Ӯ дар шабакаи иҷтимоиаш навишт: “Бино ба видеое, ки дида мешавад, ба зинда мондани он бовар кардан душвор аст, вале ӯ дар беморхона барқарор мешавад”. Вале дар наворҳои дигари видео дида мешавад, ки афсар то охири ҳодиса сарипо будааст.

Шаҳрдори Миннеаполис Ҷейкоб Фрей изҳороти мақомоти ICE-ро дар бораи он ки ходими ин идора ба нишонаи ҳимоят аз худ тир холӣ кардааст, қотеона рад кард. Ӯ гуфт, ки навори видеоии ин ҳодиса баёнгари ҳолати комилан дигар аст. Ӯ, аз ҷумла, гуфт: “Онҳо дар кӯчаҳои мо беназмӣ ҷорӣ карда, дар ин ҳолати мушаххас, инсонро куштаанд. Ба ҳамин хотир ҳам мехоҳанд ҳодисаро чун ҳимоят аз худ намоиш диҳанд. Ин корманд беандешона аз зӯр истифода кард ва дар натиҷа як нафар ҷон дод”, гуфт Фрей.

Волии аёлати Миннесота Тим Уолтс баъди ин ҳодиса гуфт, ки имрӯз мо “оқибатҳои мудириятеро мебинем, ки ба паҳн кардани тарсу ҳарос равона шудааст”.

Уолтс дар нишасти матбуотӣ гуфт, “давоми чандин ҳафта мо огоҳ карда будем, ки амалиёти хатарноки маъмурияти Трамп ба амнияти ҷамъиятии мо хатар дорад ва касе метавонад осеб бинад”. Манзури волии демократи Миннесота рейдҳои идораи ICE аст, ки мегӯяд, ҳадафаш мубориза бо муҳоҷирони ғайриқонунӣ мебошад. Фаъолони норозӣ бо сиёсати Трамп зидди чунин рейдҳо эътироз мекунанд.

Ба навиштаи хабаргузории Reuters, шоми чоршанбе дар ҷои тирандозӣ дар Миннеаполис як лавҳаи хотира пайдо ва чанд ҳазор нафар ҷамъ шуданд. Ҳодисаи Миннеаполис боиси эътирозҳо дар беш аз даҳ шаҳри дигари Амрико шуд.

Аз ин пеш вазорати амнияти дохилӣ гуфт, ки дар Миннесота “амалиёти азимтарини таърихӣ” ҷараён дорад, ки дар он ду ҳазор корманди ICE иштирок мекунад. Ноэм гуфт, дар давоми ҳафтаҳои ахир мақомот 1500 касро боздошт кардаанд. Ин тадбирҳо баъди он роҳандозӣ шуд, ки ба қавли мақомот, ҳолатҳои зиёди тақаллуб бо истифода аз ёрипулиҳои иҷтимоиро ошкор карданд, ки дар он муҳоҷирони Сомалӣ даст доштаанд.

Президенти ИМА Доналд Трамп шоми 7 январ қарореро имзо кард, ки бар асоси он кишвараш аз узвият дар 66 созмони байналмилалӣ, аз ҷумла, 31 сохтори СММ хориҷ мешавад. Дар матни қарор, ки дар сомонаи Кохи Сафед нашр шуд, гуфта мешавад, ки иштироки ИМА дар ин созмонҳо бар хилофи манфиатҳои ин кишвар мебошад. Қарори мазкур дар паи машваратҳо бо котиби давлатӣ ва аъзои ҳукумат бар асоси қарори моҳи феврали соли 2025 қабул шудааст. Маълум нест оё аъзои Конгресс ба ин қарор чӣ вокунише хоҳанд кард.

Дар миёни созмонҳое, ки ИМА бар асоси қарори Трамп аз онҳо хориҷ мешавад, ташкилоте ҳастанд, ки бо тағйироти иқлим мубориза мебаранд ва арзишҳои демократӣ ва ҳуқуқи инсонро ҳимоят мекунанд. Яке аз онҳо Комиссиюни Венетсиягии Шӯрои Аврупо мебошад, ки таҳқиқи қонунгузорӣ дар бахши волоияти қонун, адолати конститутсионӣ ва қонунмандӣ дар бахши ҳуқуқи башарро мавриди санҷиш қарор медиҳад. Масалан, кишвари номзад ба узвияти Иттиҳоди Аврупо, мисли Украина бар пояи санҷишҳои ҳамин комиссиюн амал мекунанд.

Инчунин ИМА аз эъломияи СММ оид ба тағйироти иқлим ҳам берун мешавад, дар ҳоле, ки ин созишномаи калидии байналмилалӣ дар ин соҳа дониста мешавад. ИМА аввалин кишваре мебошад, ки гуфт, аз ин эъломия хориҷ мешавад.

Дар миёни дигар сохторҳои СММ, ки ИМА ҳузурашро дар он қатъ мекунад, ин идораҳои мубориза бо табъйизи занон, Бунёди нуфусшумории СММ, Бунёди демократия, Эътилофи тамаддунҳо ва дигар сохторҳои СММ мебошанд.

Маъмурияти Трамп ба ин бовар аст, ки бисёр сохторҳои зери назари СММ афкори ҷаҳонгароёна ва чапгароро пеш мебаранд ва ин чиз хилоф бо мавзеъгирии сиёсии маъмурияти амалкунандаи ИМА мебошад. Пеш аз ин Трамп маблағгузории бисёр бахшҳои СММ-ро қатъ ва худи созмонро интиқод карда буд. Дар СММ ҳанӯз ба ин қарори Кохи Сафед ҳеҷ вокунише накардаанд.

Президенти ИМА Доналд Трамп гузинаҳои гуногунро барои назорат бар ҷазираи Гренландия баррасӣ дорад, ки яке аз онҳо истифода аз нерӯ аст. Дар ин бора телевизиони CNN аз қавли сухангӯи Кохи Сафед гузориш додааст.

Ба гуфтаи Кэролайн Левитт, Трамп возеҳ гуфтааст, ки назорат бар Гренландия "барои амнияти миллии Иёлоти Муттаҳида ва барои боздоштани рақибони мо дар минтақаи Арктика муҳим аст".

Дар ҳамин ҳол нашрияи The Wall Street Journal навиштааст, Котиби давлатӣ Марко Рубио дар нишасти пӯшида барои аъзои Конгресс гуфтааст, ҳушдорҳо дар бораи Гренландия маънои ҳамлаи ногузирро надоранд ва ҳадафи маъмурияти Трамп харидани ҷазира аз Дания аст. Манобеи ин расона гуфтаанд, ки дар пасманзари танқидҳои ахир Рубио талош кард, ки қонунгузоронро ором кунад.

Рӯзи 4-уми январ Доналд Трамп бори дигар эълон кард, ки Гренландия барои ИМА "муҳим" аст. Трамп аз он норозигӣ кард, ки атрофи ҷазираро "киштиҳои Русия ва Чин иҳота кардаанд.

"Барои мо Гренландия муҳим аст, Дания наметавонад аз уҳдаи ин кор барояд,"- гуфтааст Трамп.

Изҳороти раиси ҷумҳури Амрико дар бораи Гренландия вокуниши тунди Аврупоро ба дунбол дошт. Нахуствазири Дания Йенс-Фредерик Нилсен изҳор дошт, ки ҷазира солҳо мутаҳҳиди наздики ИМА буд ва интиқоди ахири Вашингтон ғайриқобили қабул аст. Нилсен ҳамчунин гуфт, ҳарфҳои Трамп дар бораи Гренландияро бояд ҷиддӣ гирифт.

Чанд тан аз роҳбарони Аврупо ҳушдор додаанд, ки ҳамлаи эҳтимолии ИМА ба Гренландия, ки ба ҳайати Дания шомил аст, мухолифи асосномаи НАТО аст ва метавонад ба поёни кори ин паймон сабаб шавад.

Гренландия, бузургтарин ҷазира дар дунё дар шимолу шарқи қораи Амрико ҷойгир аст ва он аз ҷониби Дания, як кишвари аврупоӣ идора мешавад.

Ситора Бобоева, як сокини ноҳияи Хуросони вилояти Хатлон барои куштани духтари сесолааш ба 18 сол зиндон маҳкум шудааст. Ҳукми Додгоҳи вилояти Хатлон моҳи ноябри соли 2025 эълон шуда, ҷузъиёти онро 7-уми январ хабаргузории "Азия-Плюс" нашр кардааст.

Ба қавли манбаъ, модар дар содир намудани куштор бо бераҳмии махсус айбдор дониста шудааст. Вокуниши ин зан ва наздиконаш ба қазия ва ҳукми додгоҳ маълум нест. Мақомот сабаби содир шудани ҷиноятро асабонияти модар аз рафтори кӯдаконаи духтараш гуфтанд.

"Субҳи 13 сентябри соли 2025 Ситора Бобоева ба тозакунии оғил машғул будааст. Духтараш Мавлуда назди ӯ омада, ширинӣ талаб мекунад. Ба ваъдаи модараш, ки баъди кор ба ӯ ширинӣ медиҳад, кӯдак пофишорӣ карда, гиря мекунад. Зан иқрор шудааст, ки худро идора карда натавониста, кӯдакро латукӯб ва баъдан бо пӯшонидани селофан ба сараш ӯро буғӣ кардааст", - навиштааст "Азия-Плюс".

Баъдан Бобоева ҷасади духтарашро пинҳон намуда, аз бедарак шудани духтарчааш эълон мекунад. Манбаъ мегӯяд, Ситора Бобоева шабона ҷасади духтарашро ба канали деҳа партофтааст ва ҷасади кӯдакро чор рӯз баъд ёфтаанд. Ташхиси тиббӣ-додгоҳӣ дар бадани кӯдак аломатҳои марги маҷбуриро ошкор кардааст.

Соли 2025 чанд ҳодисаи марги наздикон аз сӯи падару модаронашон расонаӣ шуд.

Ба хонаводаи Исматулло Қурбонов, афсари Нерӯҳои марзбонии Тоҷикистон, ки моҳи декабри соли 2025 дар марз кушта шуд, хона ва кӯмакпулӣ додаанд.

Дафтари матбуоти раиси вилояти Хатлон 7-уми январ хабар дод, ки калиди хонаи дуҳуҷрагӣ дар маркази шаҳри Бохтарро раиси вилоят ба хонаводаи афсари кушташуда додааст. Пайвандони ин афсар дар ноҳияи Ҳамадонӣ зиндагӣ мекунанд.

Рӯзи 1-уми январ мақомоти Вилояти Мухтори Кӯҳистони Бадахшон ҳам ба хонаводаи Зиреҳбон Наврӯзбеков, афсари дигари кушташуда дар шаҳри Хоруғ хонаи дуҳуҷрагӣ доданд.

Исматулло Қурбонов ва Зиреҳбон Наврӯзбеков, ду афсари Нерӯҳои марзбонии Кумитаи давлатии амнияти миллӣ, рӯзи 24-уми декабр дар пайи ҳамлаи афроди мусаллаҳ аз қаламрави Афғонистон дар наздикии мавзеи Қавоқ дар ноҳияи Шамсиддин Шоҳин кушта шуданд. Мақомоти тоҷик ҳамлаваронро гурӯҳи террористӣ ном бурданд.

Бар пояи иттилои манбаъҳои Радиои Озодӣ, Зиреҳбон Наврӯзбекови 33-сола бо зарби шаш тир ба ҳалокат расидааст. Исматулло Қурбонови 28-сола дар ин ҳодиса ба ҷуқурии 200-метрии яке аз ғорҳои минтақа афтодааст. Як рӯз баъд ҷасади ӯро берун оварда ва дар зодгоҳаш ноҳияи Ҳамадонии вилояти Хатлон ба хок супурдаанд. Ин афсарон дар қисми марзбонии "Саричашма" адои хидмат мекарданд.

Департаменти давлатӣ ё Вазорати корҳои хориҷии ИМА эълон кард, ки сар аз 21-уми январ шаҳрвандони Тоҷикистон барои дарёфти раводиди сафар ба Амрико бояд гаравпулӣ супоранд.

Онҳое, ки бо ҳадафи меҳмонӣ ё сайёҳӣ (раводиди навъи B1 ё B2) тасмими сафар ба Амрикоро доранд, баъди тасдиқ шудани раводидашон бояд аз 5 ҳазор то 15 ҳазор доллар гаравпулӣ гузоранд. Дар қарори Департаменти давлатӣ гуфта мешавад, ки ҳаҷми маблағ барои ҳар як шаҳрванд ҳангоми суҳбат дар консулгарӣ танҳо дар ҳолати ризоият ба дода шудани раводид муайян карда мешавад.

Ин қарор рӯзи 6-уми январ содир шудааст, ки 38 кишвари ҷаҳон шомили он мешаванд. Тоҷикистон, Қирғизистон ва Туркманистон, се кишвари Осиёи Марказӣ шомили ин феҳраст шудаанд.

Шаҳрвандони ин кишварҳо дар ин баробар бояд санад ё формаи I-352, “Замонати муҳоҷиратӣ” имзо кунанд.

Онҳое, ки бо чунин раводид вориди ИМА мешаванд, ҳақ надоранд, ки бештар аз мӯҳлати муқарраршудаи раводид дар хоки ин кишвар бимонанд. Бештар аз мӯҳлат истодан дар ин кишвар ё нақзи қонунҳои амрикоӣ вайрон кардани “Замонати муҳоҷиратӣ” ҳисоб хоҳад шуд.

Онҳое, ки ин раводидро дастрас мекунанд, танҳо аз тариқи фурудгоҳи байнулмиллии шаҳрҳои Бостон, Ню-Йорк ва Вашингтон бояд вориди хоки Амрико шаванд.

Агар шаҳрвандон бе нақзи қонун дар мӯҳлати муайяншуда ба ватани худ баргарданд ва Вазорати амнияти дохилии ИМА инро тасдиқ кунад, пули барои замонат супурдаашон ба онҳо пас дода хоҳад шуд.

Мақомоти ИМА бо ҳадафи ҷилавгирӣ аз муҳоҷирати ғайриқонунӣ ба ИМА қонуну қарорҳо ба ин кишварро сахттар кардаанд.

ЭЗОҲ. Матн бо шарҳи кутоҳи Сафорати ИМА дар Тоҷикистон такмил карда шуд.

Бо фармони Эмомалӣ Раҳмон роҳбарони чанд шаҳру ноҳия аз мақомҳояшон барканор шудаанд.

Дафтари матбуотии президент 7-уми январ хабар дод, ки муовинони раиси вилояти Хатлон, раисони шаҳру ноҳияҳои Кӯлоб, Ҷайҳун, Мир Саид Алии Ҳамадонӣ, Ховалинг, Исфара, Истаравшан, Спитамен, Бобоҷон Ғафуров ва Рӯдакӣ озод шудаанд.

Дафтари матбуотии президент номи раисони нави шаҳру ноҳияҳо дар Фейсбук нашр кард:

• Пирзода Диловар - иҷрокунандаи вазифаи раиси шаҳри Кӯлоб;
• Набизода Фаррухуддин Амурдин - иҷрокунандаи вазифаи раиси ноҳияи Мир Сайид Алии Ҳамадонӣ;
• Рауфзода Саймумин Тоҷиддин - раиси ноҳияи Ховалинг;
• Ализод Азизулло Муҳибулло - иҷрокунандаи вазифаи раиси ноҳияи Ҷайҳун;
• Ҷумазода Шарифҷон - иҷрокунандаи вазифаи раиси шаҳри Исфара;
• Қодирӣ Абдусаттор Ғаффорзода - раиси шаҳри Истаравшан;
• Нӯмонзода Темурҷон - иҷрокунандаи вазифаи раиси ноҳияи Бобоҷон Ғафуров;
• Ҷӯразода Ҷамшед Ҳабибулло - иҷрокунандаи вазифаи раиси ноҳияи Спитамен;
• Салимзода Нусратулло Файзулло - иҷрокунандаи вазифаи раиси ноҳияи Рӯдакӣ;
• Муминзод Камолиддин Рамазон - раиси Кумитаи рушди маҳали назди Президенти Ҷумҳурии Тоҷикистон;
• Давлатзода Зарина Дилмурод - муовини раиси Кумитаи рушди маҳали назди Президенти Ҷумҳурии Тоҷикистон;
• Маъмурзода Адҳам Маъмур - мушовири калони бахши Ёрдамчии Президенти Ҷумҳурии Тоҷикистон оид ба масъалаҳои рушди иҷтимоӣ ва робита бо ҷомеа

Ҳамчунин Ашурбой Солеҳзода, муовини якуми Вазири рушди иқтисод ва савдо ва Абдулло Раҳмонзода, ёвари раиси ҷумҳур дар умури робита бо ҷомеа аз мақомҳояшон барканор ва "муовинони раиси вилояти Хатлон оид ба иқтисод ва идеология таъин гардиданд".

Манучеҳр Шарифзода, ки то ин вақт муовини вазири фарҳанг буд, директори "Театри миллӣ" шудааст.

Ҳамасола дар оғози моҳи январ дар баъзе аз идораҳои давлатӣ ва ҳукуматҳои маҳаллӣ дар Тоҷикистон тағйироти кадрӣ анҷом мешавад.

Ҳукумати Тоҷикистон ҳамвора аз таъйини "кадрҳои ҷавону болаёқат" ситоиш мекунад. Баъзе аз намояндагони мухолифон мегӯянд, ин таъйинот на аз нигоҳи шоистасолорӣ, балки бештар бар асоси хидмату садоқат ба режим сурат мегирад.

Кумитаи тафтишотии Русия алайҳи як зодаи Тоҷикистон бо иттиҳоми аз беэҳтиётӣ ба марг расондани блогери рус парванда боз кардааст. Шоира Нарзуллоеваи 26-сола ба он муттаҳам мешавад, ки дар вақти гузарондани амали зебоӣ боиси марги Юлия Бертсева, блогери рус шудааст.

Ба гузориши расонаҳои русӣ, блогери 38-сола ҳангоми гузаронидани амали зебоӣ дар дармонгоҳи хусусии “Elmas”-и шаҳри Маскав ба “шоки анафилактикӣ” дучор шудааст.

Телеграм-канали “Mash” хабар медиҳад, ки Шоира Нарзуллоеваро ҳамчун корманди расмии клиникаи Elmas дар қайд набуда, танҳо як утоқи кориро дар беморхона ба иҷора гирифта, дар ҳамон ҷой Юлия Бурсеваро амали зебоӣ кардааст.

Дар сурати исбот шудани гуноҳ ба Нарзуллоева то се сол маҳрумият аз озодӣ таҳдид мекунад.

Блогер Юлия Бертсева дар саҳифааш дар бораи зиндагии худ дар Италия қисса мекард.

Мақомоти Узбекистон аз мусодираи 32 килограм маводи мухаддир хабар доданд, ки аз Тоҷикистон ворид шудааст.

Бино ба иттилои Хадамоти амнияти давлатии Узбекистон дар робита ба ин ҳолат парвандаи ҷиноӣ боз шудааст.

Ба гуфтаи мақомоти Узбекистон, фурӯшандаи эҳтимолии маводи мухаддир — сокини маҳаллӣ ва ҳамдасти ӯ шаҳрванди Тоҷикистон, боздошт гардиданд.

Назари боздоштшудаҳо ва мақомоти тоҷик ба ин қазия дастрас нест.

Гуфта мешавад, ки маводи мухаддир бо маблағи 34 ҳазор доллари амрикоӣ харидорӣ шудааст.

Дар гузашта ҳам чандин ҳолати интиқоли маводи мухаддир аз Тоҷикистон ба Узбекистон ошкор гардида буд.

Дар муассисаҳои тиббии Тоҷикистон 15 ҳуҷраи махсуси дастгирӣ барои ҷабрдидагони зӯроварӣ фаъол шудааст. Дар ин ҳуҷраҳо барои қурбониёни хушунати хонаводагӣ кӯмаки тиббӣ ва равонӣ-иҷтимоӣ мерасонанд.

Намояндагии Созмони милал дар Тоҷикистон мегӯяд, ин ташаббус дар доираи ташаббуси ҷаҳонии "Шуои нур" ва дар якҷоягӣ бо Вазорати тандурустӣ амалӣ мешавад.

Дар доираи лоиҳа зиёда аз 300 корманди соҳаи тиб ва 90 омӯзгор аз давраи омӯзишӣ гузаштаанд. Ин ташаббус соли 2017 аз ҷониби Созмони милал ва Иттиҳоди Аврупо роҳандозӣ гардида, бузургтарин барномаи ҷаҳонӣ дар самти решакан намудани ҳама гуна шаклҳои зӯроварӣ нисбат ба занон ва духтарон ба шумор меравад.

Хушунат дар оила дар Тоҷикистон, ки аксаран нисбат ба занон сурат мегирад, ба қавли ҳомиёни ҳуқуқ, як кори маъмулист. Дар 6 моҳи соли 2025 қариб 1800 нафар аз зӯроварӣ дар оила ба Кумитаи занон муроҷиат кардаанд.

Раиси ҷумҳури Чеченистон Рамазон Қодиров писари 20-солаашро иҷрокунандаи вазифаи муовини сарвазир таъйин кардааст. Ҳамзамон бо ин мансаб Аҳмад Қодиров мақоми вазири варзиши Чеченистонро ҳам ҳифз мекунад.

Ба гузориши "Кавказ.Реалии", Аҳмад Дудаев, вазири сиёсат, алоқаи беруна ва матбуот низ ба мақоми муовини сарвазир пешниҳод шудааст.

Рамазон Қодиров бо нашри хабари таъйини писараш ба мансаби нав дар Телеграм навишт, "тағйироти хурди кадрӣ гузарондем". Қодиров нагуфтааст, ки таъйини писараш ба мансаби болотар ба вазъи саломатии ӯ то куҷо рабт дорад. Дар остонаи соли нави мелодӣ расонаҳо гузориш доданд, ки Рамазон Қодиров дар яке аз беморхонаҳои шаҳри Маскав бистарӣ шудааст. Ин хабар расман тасдиқ нашуд.

Фарзандон ва наздикони Аҳмад Қодиров дар ҳукумати Чеченистон мансабҳои зиёд доранд. Хадича Қодирова, духтари Рамзан Қодиров дар 24-солагӣ муовини якуми раиси дастгоҳи ҳукумати Чеченистон таъйин гардид. Аҳмад Қодиров дар 18-солагӣ муовини вазири варзиш ва вазири кор бо ҷавонон шуд. Адам (Одам) Қодирови 18-сола, писари дигари Рамзан Қодиров, дабири Шӯрои амнияти Чеченистон аст. Ӯ ҳамчунин раёсати Хадамоти амнияти падарашро бар ӯҳда дорад.

Дар умум қариб 100 хешованди Рамазон Қодиров дар ҳукумати Чеченистон мансаб доранд.

Николас Мадуро, раиси ҷумҳури собиқи Венесуэла дар нахустин мурофиаи додгоҳиаш, ки шоми 5-уми январ баргузор шуд, иттиҳомоти нисбаташ эълоншударо рад кард ва гуфт, "ҳамоно раиси ҷумҳури кишвараш аст".

Мурофиа дар Додгоҳи федералии ноҳияи Манҳэттени Ню-Йорк, таҳти додрас Элвин Ҳеллерштейн доир шуд.

Мадуро, ки рӯзи 3-юми январ дар амалиёти неруҳои вижаи Амрико ҳамроҳи ҳамсараш дастгир ва ба ИМА интиқол ёфтанд, ба чор иттиҳом, аз ҷумла қочоқи маводи мухаддир муттаҳам аст.

Ба гузориши расонаҳои амрикоӣ, Мадуро бо дастбанд ба додгоҳ ҳозир шуд ва ба воситаи тарҷумон ба суолҳо посух дод. Президенти собиқи Венесуэла ва ҳамсараш иттиҳомҳои алайҳашон эълоншударо рад карда, худро бегуноҳ гуфтанд. Мадуро гуфт, то ҳол бо айбнома пурра шинос нашудааст.

Додгоҳ иҷозат дод, ки консули Венесуэла низ дар мурофиа ширкат кунад.

Дар назар аст, ки мурофиаи навбатӣ 17-уми март баргузор шавад. То он вақт Николас Мадуро ва ҳамсараш дар ҳабс хоҳанд буд. Пойгоҳи Bloomberg навиштааст, баррасии парванда дар додгоҳ шояд аввали соли 2027 оғоз шавад.

Милан Миланович, мутахассиси 63-солаи сербиягӣ, сармураббии дастаи "Хуҷанд"-и шаҳри Хуҷанд таъйин шуд. Ӯ дар ин вазифа Александр Крестинин, мутахассиси 47-солаи русиягиро, ки шартномааш бо бошгоҳи “Хуҷанд” моҳи декабри соли гузашта ба поён расид, иваз намуд.

Миланович хатмкардаи Донишгоҳи тарбияи ҷисмонии Белград буда, дорои муҷаввиз ё литсензияи UEFA PRO мебошад. Ӯ дар футболи ҳирфаӣ таҷрибаи ғанӣ дорад. Солҳои гуногун дастаҳояш дар мусобиқоти интихобии Лигаи қаҳрамонҳои УЕФА, Лигаи Аврупо ва Лигаи конференсияҳои УЕФА бозӣ кардаанд.

Дар мавсими 2013/2014 Миланович беҳтарин мураббии Суперлигаи Сербия эътироф шудааст.

Миланович солҳои мухталиф бошгоҳҳои футболи Сербия, Босния, Венгрия (Маҷористон), Ҷазираҳои Фарер, Арманистон, Молдова ва Қазоқистонро машқ додааст. Охирин ҷойи кори ӯ бошгоҳи футболи «Мезёкёвешд»-и Маҷористон дар соли 2024 буд.

Ба ғайр аз ин, бошгоҳи футболи «Ҳосилот»-и Фархор таъйин шудани сармураббии навро эълон намуд. Ин вазифа ба уҳдаи мутахассиси шинохтаи футболи тоҷик Шамсиддин Қосимови 33-сола гузошта шуд. Ӯ дар ин вазифа Зайниддин Раҳимов, мутахассии маъруфи 60-солаи тоҷикро, ки шартномааш бо бошгоҳи “Ҳосилот” охири мавсими гузашта ба охир расид, иваз кард.

Қосимов солҳои ахир сармураббии бошгоҳи Вазорати мудофиаи Тоҷикистон - КМВА (Клуби марказии варзишии артиш) – буд. Дар комёбии дастаи низомиён, ки соли 2025 барандаи медалҳои биринҷии мусобиқаи қаҳрамонии Тоҷикистон миёни дастаҳои лигаи олӣ гардид, саҳми Шамсиддин Қосимов калон аст.

Дар ҳамин ҳол қаҳрамони феълии Тоҷикистон – “Истиқлол”-и Душанбе – дар ҷустуҷӯи сармурабии нав мебошад. Ёдовар мешавем, дастпарвари футболи тоҷик Игор Черевченко, фарзанди бозигари маъруфи “Помир”-и Душанбе Геннадий Черевченко, аз вазифаи сармураббии дастаи “Истиқлол”-и Душанбе барканор шуд.

Мавсими нави футбол дар Тоҷикистон 6-уми март бо мусобиқаи дастаҳои лигаи олӣ оғоз меёбад. Дар ҳамин ҳол равзанаи гузариши футболбозон ҷараён дорад, ки то 5-уми март идома хоҳад кард. Дар ин муддат бошгоҳҳо метавонанд бозигарони навро ба қайд бигиранд.

Сайфиддин Одинаев, раиси ҷамъият ё диаспораи тоҷикон дар вилояти Перми Русия аз шаҳрвандии ин кишвар маҳрум ва вурудаш ба муддати 50 сол ба Русия манъ шудааст.

Хадамоти федералии амнияти Русия ё ФСБ дар вилояти Перм аз ихроҷи "як зодаи Осиёи Марказӣ" бо гумони "содир кардани амалҳое, ки ба амнияти Русия таҳдид мекунанд", хабар додааст.

Ин ниҳод дар бораи шахсияти нафари ихроҷшуда иттилои бештаре надодааст.

Бархе расонаҳои русӣ, аз ҷумла рӯзномаи "Коммерсант" навиштаанд, нафари ихроҷшуда Сайфиддин Одинаев, раиси ҷамъияти тоҷикони вилояти Перм ва зодаи Тоҷикистон аст. Назари Одинаев дар робита ба ин қазия маълум нест.

Ба навиштаи расонаҳои Русия, Сайфиддин Одинаев соли 2014 бо иттиҳоми “роҳзанӣ” 11 моҳ ҳабс шуда буд.

Ин бори аввал нест, ки роҳбари ҷамъияти тоҷикон дар Русия аз шаҳрвандӣ маҳрум ва аз ин кишвар ихроҷ мешаванд. Аз ин пеш Ҳокимшоҳ Таваров, раҳбари пешини диаспораи тоҷикон дар Округи мухтори Ямало-Ненетс ба се соли зиндон маҳкум шуда буд.

Ҳамчунин, Каромат Шарипов,роҳбари ҳаракати умумирусиягии "Муҳоҷирони меҳнатии тоҷик” ва Иззат Амон, раиси Маркази тоҷикон низ қаблан аз шаҳрвандии Русия маҳрум ва аз ин кишвар ихроҷ шуданд. Каромат Шарипов дар Тоҷикистон даргузашт ва Иззат Амон бо гуноҳи қаллобӣ ба 15 сол зиндон маҳкум шуд. Худаш ва наздиконаш иттиҳомро рад карданд.

Оҷонсии назорат дар соҳаи энергетика аз ошкор шудани боз як ҳолати дуздии барқ аз сӯйи корманди муассисаи тақсимоти барқ хабар додааст.

Ин ниҳод дар хабарномае навишт, як корманди идораи барқ дар ноҳияи Ҳамадонӣ аз зеристгоҳ то хонааш, ки дар наздикии иншоот ҷойгир будаас, хатти барқро пинҳонӣ кашида, бидуни пайвастшавӣ ба ҳисобкунак аз барқ истифода кардааст. Назари гумонбар ба дуздии барқ маълум нест.

Мақомот нисбати ин нафар санад тартиб додаанд, аммо маълум нест ӯро чӣ ҷазо додаанд.

Дар моҳҳои ахир ин ягона ҳолате нест, ки кормандони идораи барқ ба дуздии барқ муттаҳам мешаванд. Моҳи декабри соли гузашта ҳам як корманди идораи барқ дар минтақаи Кӯлоб ҳам ба дуздии барқ гумонбар шуда буд.

Мақомоти Тоҷикистон давоми як соли ахир мубориза бо дуздии барқро сахттар карданд. Аз ҷумла, ба Кодекси ҷиноӣ тағйирот ворид шуд, ки барои дуздӣ ё истифодаи ғайриқонунии нерӯи барқ аз 27 ҳазор сомонӣ ҷарима то 10 сол зиндонро пешбинӣ кардааст.