Дар чанд ҷумла
Дар бетартибиҳои Бангладеш даҳҳо кас кушта шудааст
Дар натиҷаи задухурди маъмурони пулис бо донишҷӯёни норозӣ дар шаҳри Дакка, пойтахти Бангладеш даҳҳо кас кушта ва садҳо нафари дигар захмӣ шудааст.
Ҳамчунин бинои телевизиони давлатии "BTV" оташ гирифтааст. Хабаргузории "AFP" иттилоъ дода, ки дар натиҷаи бетартибиҳо алайҳи низоми квотаҳо ба хидмати давлатӣ дар Бангладеш, 32 кас ҷон бохтааст. Мақомоти Бангладеш гуфтанд, бинои телевизиони давлатиро эътирозгарон оташ заданд.
Дар саҳифаи расмии телевизион дар шабакаҳои иҷтимоӣ навишта шудааст, ки дар дохили бино одамон қарор доранд ва наметавонанд ба берун бароянд.
Вазорати иттилооти Бангладеш хабар дод, ки пахши барномаҳои телевизион қатъ шуда, бештари кормандон тавонистаанд биноро тарк кунанд.
Донишҷӯёни Бангладеш дар эътироз ба низоми квотаҳо ба мансабҳои давлатӣ даст ба эътироз заданд. Онҳо мегӯянд, сеяки ҷойҳои корӣ дар идораҳои давлатӣ, ба номи хешовандони онҳое, ки барои истиқлоли кишвар аз Покистон дар соли 1971 ҷангидаанд, банд карда шудааст.
Ҳамаи хабарҳои имрӯзро дар инҷо бихонед
Нақби неругоҳ дар Непал ду нафарро аз марг наҷот дод
Баъди нӯҳ рӯзи фоҷеаи маргбори Непал субҳи 4 сентябр ду сокини ин кишварро аз як нақби нерӯгоҳи барқи обӣ пайдо карданд.
Ҳардуи онҳо бо чархболи низомӣ ба як беморхонаи шаҳри Катманду расонда шуданд.
Онҳоро нӯҳ рӯз баъди фоҷеа дар дохили як нақби гидроэнергетикие ёфтанд, ки дар дарёи Тришули ҷойгир мебошад. Рӯзи 26 август дар натиҷаи афтодани як пораи азими пирях ба кӯли маҳаллӣ дар Непал, обхезии азиме рух дод, ки бинову иморатҳо, роҳу мошину киштзорҳои зиёдро вайрон карду боиси марги садҳо нафар гардид.
Дафтари вазири энержии Непал Бираҷ Бхакта Шрестха дар изҳороте гуфт, ду коргари наҷотёфта аз дохили нақби “Тришулии боло” механикҳо Санҷай Сах ва Кабир Махарҷан мебошанд.
Мақомоти расмӣ ва наҷотбахшон гуфтанд, вақте яхпора дар болооби Тришули афтод, дар дохили нақбҳои шаш муассисаи гидроэнергетикӣ дарё на камтар аз 900 коргар банд монданд.
То ҳол марги 1252 нафар тасдиқ шудааст. Офати табиӣ хонаву кӯча, мактабу беморхонаҳои зиёдеро нобуд кард, ки дар сарҳад бо ноҳияи мухтори Тибети Чин ҷойгир мебошанд. То ҳол беш аз 4200 нафар бенишонанд ва ҳазорҳо нафар аз хонаву сарпаноҳ маҳрум шудаанд.
Тарҷума ва нашри "Тоҷикон"-и Бобоҷон Ғафуров ба забони олмонӣ
Китоби "Тоҷикон", асари мондагори академик Бобоҷон Ғафуров, ба забони олмонӣ тарҷума ва нашр шудааст.
Ба иттилои Вазорати корҳои хориҷии Тоҷикистон, ин асар ба муносибати 35-уми солгарди Истиқлоли давлатии Тоҷикистон нашр гардид.
Китоби "Тоҷикон" аз ҷониби дипломати тоҷик Соҳибназар Ғайратшо Қаноатшо ба забони олмонӣ тарҷума ва мураттаб шуда, дар нашриёти олмонии "Ферлаг Восток Берлин", ба нашр расидааст.
Вазорати корҳои хориҷӣ мегӯяд,"тарҷумаи олмонии китоби "Тоҷикон" доираҳои илмӣ ва маъхазҳои шарқшиносии кишварҳои Ғарбро боз ҳам ғанӣ гардонида, ба ташаккули афкори илмӣ нисбат ба таъриху тамаддуни тоҷикон ва дигар халкҳои минтақаи Осиёи Марказӣ мусоидат хоҳад кард".
Китоби "Тоҷикон"-и аллома Бобоҷон Ғафуров аз ин қабл ба забонҳои англисӣ, арабӣ, туркӣ ва узбек низ нашр шуда буд.
СММ: Дар 3 сол 6 млн муҳоҷири афғон ба ватанашон бозгаштаанд
Комиссариати олии Созмони Милали Муттаҳид дар умури паноҳандагон мегӯяд, ки дар наздик ба се соли гузашта, шаш миллион муҳоҷири афғон ба кишварашон бозгаштаанд. Оморе, ки ба гуфтаи ин ниҳод, дар таърихи муосир бесобиқа аст.
Комиссариати олии СММ дар умури паноҳанданон рӯзи 2 сентябр дар сафҳаи "Фейсбук"-и худ навишт, "бозгашти муҳоҷирон бояд довталабона, амн ва боиззат бошад".
Ин ниҳод аз ҷомеаи ҷаҳонӣ хостааст, ки Афғонистон ва муҳоҷирони афғонро фаромӯш накунанд.
Аз сӯи дигар, Вазорати умури муҳоҷирини ҳукумати Толибон гуфтааст, ки ҳафтаи ҷорӣ наздик ба 400 муҳоҷири афғон аз зиндонҳои Покистон озод ва ба Афғонистон бозгардонида шудаанд.
Покистон ва Эрон дар се соли гузашта фишор бар муҳоҷирони афғонро афзоиш дода ва шуморе аз онҳоро аз кишварҳои худ берун карданд.
Тоҷикистон ҳам солҳои ахир даҳҳо муҳоҷири афғонистониро аз кишвар берун кардааст.
Даргирии нерӯҳои амниятӣ дар Киев. Зеленский "шармовар" хонд
Даргирии мусаллаҳона миёни ду ниҳоди аслии амниятии Украина дар Киев бо вокуниши Владимир Зеленский, раисҷумҳури ин кишвар, рӯбарӯ шуд.
Ин тирандозӣ рӯзи 2 сентябр дар яке аз минтақаҳои шаҳри Киев миёни нерӯҳои Хадамоти амнияти Украина (SBU) ва Созмони истихбороти низомии ин кишвар (HUR), рух дод.
Шоҳидони айнӣ аз дидани афроди захмӣ ва осори хун дар маҳал хабар додаанд. Ба гузориши Радиои Аврупои Озод\Радиои Озодӣ, ҷузъиёти дақиқи ҳодиса ҳанӯз рӯшан нест ва ду ниҳод ривоятҳои гуногун ироа кардаанд.
Хадамоти амнияти Украина ибтидо эълон кард, ҳамроҳ бо Созмони истихбороти низомӣ дар ҳоли пешгирӣ аз як "ҳамлаи террористӣ"-и Русия будааст, аммо баъд гуфт, гурӯҳе талош кардаанд монеи анҷоми амалиёти бозрасӣ шаванд.
Дар муқобил, яке аз фармондеҳони нерӯҳои вижаи Созмони истихбороти низомӣ гуфт, кормандони Хадамоти амнияти Украина дар ҳоли боздошти нерӯҳои ин созмон буданд ва "бе ҳеч ҳушдор" ба сӯи онҳо тирандозӣ карданд.
Ба назар мерасад ин даргирӣ бо парвандаи боздошти Степан Каплунов, муовини фармондеҳи "Сипоҳи довталабони рус" рабт дошта бошад. Ин гурӯҳи ниманизомӣ аз сӯи Украина ҳимоят мешавад ва бо Созмони истихбороти низомии ин кишвар ҳамкорӣ дорад.
Зеленский ин ҳодисаро "комилан шармовар" хонд ва хостори "посухгӯӣ" шуд. Ӯ гуфт, танҳо касоне, ки нерӯҳои украинӣ бояд ба сӯи онҳо тирандозӣ кунанд, "ишғолгарони рус" ҳастанд.
Раисҷумҳури Украина ҳамчунин эълон кард, ки додситонӣ дар бораи ин даргирӣ таҳқиқ хоҳад кард.
Ҳалокати кӯҳнаварди шинохтаи амрикоӣ дар Тоҷикистон
Як кӯҳнаварди амрикоӣ ҳангоми фатҳи қуллаи “Исмоили Сомонӣ” дар Тоҷикистон аз кӯҳ афтода, ба ҳалокат расидааст.
Фоҷиа бо Метт Доусони 47-сола, ки ҳам ҷаҳонгард ва ҳам ризокори маъруф буд, рӯзи 15-уми август рух дод.
Пайвандонаш хабари марги ӯро рӯзи якуми сентябр дар Инстаграм нашр карданд.
Ориф Нозимиён, сухангӯйи Кумитаи ҳолатҳои фавқулодаи Тоҷикистон, рӯзи сеюми сентябр ба Радиои Озодӣ гуфт, “Доусон дар баландии 5800 метр бо сабабҳои номаълум ба чуқурии тақрибан 70-80 метр афтида, ҷароҳатҳои вазнини ҷисмонӣ бардоштаву дар ҷойи ҳодиса ба ҳалокат расидааст.”
Нозимиён афзуд, ин шаҳрванди Амрико ҳамроҳи нуздаҳ сайёҳи дигар тавассути ширкати “Қуллаҳои Тоҷик” ба онҷо рафта буд. Пайкарашро рӯзи 17-уми август ба Душанбе овардаанд.
Талоши Радиои Озодӣ барои фаҳмидани назари гурӯҳи сайёҳии “Қуллаҳои Тоҷик” натиҷа надод.
Маросими дафни Метт Доусон рӯзи 5-уми сентябр дар Лос-Анҷелеси Амрико баргузор хоҳад шуд. Хонаводааш дар паёме ӯро “як дӯст, бародар ва писаре” донистаанд, ки шиор дошт, “агар ҳаёти ту як зарра арзиш дорад, пас, ин дастоварди бузург аст”.
Нашрияи People навиштааст, Доусон варзишгари бисёрҷанба ва нотарс буд ва бо ҳадафи ҷалби пул барои саҳм гузоштан дар муолиҷаи склерози паҳлӯии амиотрофӣ ба фатҳи қуллаҳои “Исмоили Сомонӣ” рафта буд.
Ин иқтисоддон ва ризокори маъруф баъди аз даст додани модар ва дӯстдухтараш, 15 соли охир бештар бо варзишҳои навъи экстремалӣ машғул буд.
Вай инчунин ба саёҳати биёбону уқёнус рафтааст. Соли 2024 барои босуръат ва пиёда гузаштани биёбони Мохаве дар Калифорния ба Китоби рекордҳои Гиннес ворид шуд. Вай ин биёбонро дар 7 рӯзу 8 соату 45 дақиқа тай кард.
Соли 2018 барои кумаку дастгирии варзишгарон Бунёди Қуллаи Доусонро таъсис дод. Ба навиштаи нашрияи People, ӯ мехост тобистони имсол ба се қулла – Исмоили Сомонӣ, Озодӣ ва Манаслу – барояд.
Видеоро дар инҷо бинед:
Баъди ҳушдори Зеленский. Лағву таъхири чанд парвоз байни Русия ва Тоҷикистон
Рӯзи 2-юми сентябр парвози ду ҳавопаймои ширкати "Ural Airlines" аз фурудгоҳи Жуковскийи Маскав ва Челябински Русия ба Тоҷикистон бекор карда шудаанд.
Ҳамчунин, парвози як ҳавопаймои ширкати "Ural Airlines", ки бояд бегоҳи дувуми сентябр аз фурудгоҳи Душанбе ба Жуковскийи Маскав мерафт, лағв гардид.
Вебсайти фурудгоҳи Душанбе нишон медиҳад, ки ду ҳавопаймо бо таъхири тақрибан нимрӯза аз Русия ба Тоҷикистон расидаанд, аммо ҳанӯз парвози Душанбе-Жуковский сурат нагирифтааст.
Мақомоти Тоҷикистон сабаби таъхири тӯлонӣ ва сурат нагирифтани парвозҳоро шарҳ надодаанд.
Владимир Зеленский, раисҷумҳури Украина, рӯзи 2-юми сентябр ҳушдор дод, ки бо сабаби парвози дронҳо осмони Русия барои парвози ҳавопаймоҳои мусофиркаш дигар амн нахоҳад буд.
Мақомоти Русия гуфтаанд, парвозҳои дохилӣ ва хориҷӣ тибқи нақша давом мекунад.
Як манбаи огоҳ дар Фурудгоҳи Душанбе рӯзи 3-юми сентябр гуфт, дар ширкати "Сомон Эйр" ҳушдори Владимир Зеленскийро ҷиддӣ гирифтаанд.
Вай афзуд, "ҳанӯз қароре дар ин замина қабул нашудааст, аммо масъулони ширкати ҳавопаймоӣ гуфтаанд, то Русия кафолати парвози бехатар надиҳад, набояд ба шаҳрҳои ин кишвар парвоз анҷом дод."
Дар сомонаи Фурудгоҳи Душанбе дида мешавад, ки ширкати "Сомон Эйр" дар як шабонарӯзи охир аз Русия ба Тоҷикистон ё баръакс 13 парвоз анҷом додааст.
Таъхири парвозҳо аз Русия ба Тоҷикистон ё баръакс дар ду соли охир борҳо сабт шудааст.
Баъди он ки мақомоти Украина гуфтаанд, ҳамлаҳои паҳподӣ ва мушакиро ба Русия афзоиш хоҳанд дод, шуморе аз парвозҳо аз Узбекистон ба Русия низ бекор шудаанд. Мақомоти он кишвар ин тасмимро ба вазъи амниятӣ дар фазои Русия бастагӣ медиҳанд.
Афви як милисаи дигар, ки дар марги сокини Кӯлоб гумонзад буд
Як милисаи дигарро, ки дар марги Мақсудҷон Саидов, сокини шаҳри Кӯлоб, гумонзад буд, аммо аз тафтишот пинҳон мегашт, афв кардаанд.
Ба иттилои дарёфтии Радиои Озодӣ, Сайриддин Файзуллоев, корманди пешини Шуъбаи умури дохилии ноҳияи Сино дар пойтахт ҳоло дар озодист.
Аз ин пеш панҷ ҳамкори ӯ бо айни иттиҳом дастгир ва се нафар аз 5 то 13 сол ба зиндон маҳкум шуда, дуи дигар бар асоси қонуни афв озод шуданд. Додгоҳи олии Тоҷикистон ҳукми онҳоро рӯзи 28-уми июл эълон кард.
Як манбаи огоҳи Радиои Озодӣ рӯзи 3-юми сентябр бе зикри номаш гуфт, волидони Сайриддин Файзуллоев аз Назарбӣ Саидова, модари Мақсудҷон Саидов, хостаанд, то зидди писарашон шикоят накунад ва аз даъвояш даст кашад. Мусоҳиби мо дар бораи гуё “харидани як манзили сеҳуҷраӣ ба хонаводаи Мақсудҷон Саидов” хабар дод, вале тасдиқи он аз манбаъҳои дигар феълан имконпазир нест.
"Назарбӣ Саидова, сокини маҳаллаи Исмоили Сомонии шаҳри Кӯлоб, бо пешниҳоди волидони Файзуллоев розӣ шуда, ба Додситонии ноҳияи Сино барои даъво надоштанаш ариза пешниҳод намудааст. Бо назардошти ин ариза, парванда қатъ ва ӯ бар асоси Қонуни афв аз ҷавобгарӣ раҳо шудааст,” – афзуд манбаъ.
Ҷузъиёти гуфтушунид ва муомилаи наздикони Сайриддин Файзуллоев бо хонаводаи Мақсудҷон Саидов маълум нест. Талоши мо барои гирифтани ҳарду ҷониб то ин дам бенатиҷа буд.
Мақсудҷон Саидов рӯзи 8-уми январи соли 2026 бо гумони паҳн ва фурӯши “кристал”, як навъ маводи мухаддир, дастгир, аммо дертар дар шароити мармуз даргузашт.
Мақомот аз наздиконаш хостаанд, ки пайкари ӯро зуд дафн кунанд ва ҳамин маврид шубҳаро дар бораи табиӣ будани марги ӯ бештар кардааст.
Пайвандони Мақсудҷон Саидов ҳеч гоҳ дар бораи қазияи ӯ бо расонаҳо суҳбат накардаанд. Чанде аз дӯстони Мақсудҷон дар суҳбати пешинаи телефонӣ гуфта буданд, ки дар баданаш “осори шиканҷа дида мешуд” ва гуё “ангуштони пою дасташ сӯхта буданд”.
Истифода аз шиканҷа барои “эътирофи гуноҳ” дар Тоҷикистон яке аз масъалаҳои ҷиддӣ дар мақомоти интизомӣ дониста мешавад. Эътилофи зидди шиканҷа дар Тоҷикистон мегӯяд, аз соли 2021 то нимсолаи аввали соли 2025 аз сокинон дар бораи шиканҷа 83 шикоят гирифт, ки тақрибан навад дарсади шикоятҳо нисбат ба маъмурони милиса аст.
Пешниҳоди Трамп: Тангаи Ҳурмуз "тангаи Трамп" номгузорӣ шавад
Доналд Трамп, раисҷумҳури Амрико, рӯзи 2-юми сентябр ба таври ғайримустақим пешниҳод кард, номи тангаи Ҳурмуз ба "тангаи Трамп" тағйир кунад ва бори дигар гуфт, ки ин оброҳа акнун зери назорати Иёлоти Муттаҳида қарор дорад.
Ӯ дар шабакаи иҷтимоии Truth Social навишт, "ҳоло, ки онро зери назорати Амрико дорем, оё бояд номи тангаи Ҳурмузро ба тангаи Трамп тағйир диҳем?"
Трамп дар идома бо ишора ба номи худ афзуд, ин танга "мисли худи Амрико гармтар аз ҳамеша хоҳад буд".
Раисҷумҳури Амрико пештар чанд бор гуфта буд, ки ният дорад ин оброҳаи стратегиро бахше аз қаламрави Иёлоти Муттаҳида эълон кунад.
Изҳороти Трамп дар бораи тангаи Ҳурмуз як рӯз пас аз он нашр мешавад, ки нерӯҳои амрикоӣ ҳамлаҳои наверо дар дохили Эрон анҷом доданд.
Эрон ҳам дар вокуниш пойгоҳҳои низомии Амрикоро дар Баҳрайн, Урдун ва Имороти Муттаҳидаи Арабӣ ҳадаф қарор дод.
Олмон консулгарии Русияро дар Бонн мебандад
Ҳукумати Олмон Русияро ба даст доштан дар "ҳамла"-и номуваффақ бо истифода аз як паҳподи ҳомили маводи тарканда дар моҳи август ба фурудгоҳи стратегӣ дар Лейпсиг муттаҳам кард.
Вазири корҳои хориҷии Олмон гуфтааст, Берлин то поёни моҳи сентябр консулгарии Русияро дар Бонн мебандад ва қарордодро бо Маркази фарҳангии "Хонаи Русия" дар Берлин бекор хоҳад кард.
Вай афзудааст, Олмон назорати вуруди шаҳрвандони Русияро ба ин кишвар сахттар хоҳад кард ва аз Иттиҳоди Аврупо мехоҳад, ки русҳои бештарро ба феҳристи таҳримҳои худ изофа кунад.
Вазорати умури хориҷии Олмон ҳамчунин сафири Русияро дар Берлин даъват кардааст.
Владимир Путин, раисҷумҳури Русия, иқдомоти ахири Олмонро "иштибоҳи ҷиддии дигар" хондааст.
Фурудгоҳи Лейпсиг дар ҳамлу нақли таҷҳизоти низомии Олмон ва НАТО нақши калидӣ дорад ва пойгоҳе барои ҳавопаймоҳои "Антонов"-и Украина аст.
Ҳамлаи Русия ба чанд хонаву мактабу фурӯшгоҳ дар Одесса
Нерӯҳои Русия шаби 2-юми сентябр ба Одесса дар Украина зарбаҳои сахт задаанд.
Дастикам ҳашт нафар, аз ҷумла як кӯдаки панҷсола, захмӣ шуда, ду тан дар шифохона бистарӣ ҳастанд.
Олег Кипер, раиси вилояти Одесса, гуфт, Русия зербунёдҳои иҷтимоӣ ва энергетикиро нишон гирифт.
Вай афзуд, дар ин ҳамлаҳо чанд хонаву мошин ва мактабу анбору фурӯшгоҳ осеб дида, баъзе аз хонандагон ба таҳсили онлайн гузаштанд.
Нархи ҷаҳонии нафт панҷ дарсад боло рафт
Дар пайи ҳамлаҳои дигарбораи Амрико ба Эрон, нархи ҷаҳонии нафт панҷ дарсад афзоиш ёфт.
Арзиши ҳар бушка нафти "брент" ба 94,5 доллар расид ва қимати нафти хоми West Texas Intermediate ҳам аз марзи 90 доллар бар сари ҳар бушка гузашт.
Афзоиши қимати нафт дар ду рӯзи охир бо боло гирифтани танишҳо миёни Эрон ва Амрико ва ҳамлаҳо ба чанд туфангкаш дар гулӯгоҳи Ҳурмуз шиддат гирифтааст.
Доналд Трамп, раисҷумҳури Амрико, гуфт, дар ҳоли "ба даст гирифтани зимоми умур" дар Ҳурмуз аст ва ҳар шаб "30 киштӣ" аз ин оброҳа мегузаранд.
Муҳаммадбоқир Қолибоф, раиси Маҷлиси Эрон, бори дигар мавзеи Теҳронро дар бораи гулӯгоҳи Ҳурмуз такрор кард ва гуфт, “иҷозаи убур аз масири ҷанубии тангаро нахоҳем дод.”
Раёсати давраии СҲШ ба Покистон гузашт
Раёсати давраии Созмони Ҳамкориҳои Шонгҳой ба Покистон гузаштааст.
Тибқи гузоришҳо, Содир Ҷабборов, раисҷумҳури Қирғизистон, ки мизбони нишасти сарони Созмони Ҳамкориҳои Шонгҳой буд, рӯзи якуми сентябр ба Шаҳбоз Шариф, нахуствазири Покистон орзуи муваффақият кард.
Покистон дар соли 2017 узви комили Созмони Ҳамкориҳои Шонгҳой шуд ва пойтахти он, Исломобод, дар соли 2027 мизбони нишасти баъдии сарони ин созмон хоҳад буд.
Чин, Русия, Қазоқистон, Қирғизистон, Тоҷикистон, Ҳинд, Покистон, Эрон ва Беларус 10 узви ин созмон ва Афғонистону Муғулистон кишварҳои нозир ҳастанд.
Ба нишасти имсолаи сарони ин созмон, намояндае аз Афғонистони зери назорати "Толибон" даъват нашуда буд.
Путин гуфт, аз нигарониҳои амниятии Тоҷикистон огоҳ аст
Владимир Путин, президенти Русия, дар мулоқот бо раисҷумҳури Тоҷикистон Эмомалӣ Раҳмон гуфт, аз нигарониҳои амниятии Душанбе, бахусус дар мавриди рӯйдодҳои Афғонистон, огоҳ аст.
Гуфтугӯйи ду ҷониб рӯзи якуми сентябр дар шаҳри Бишкек ва дар ҳошияи нишасти сарони кишварҳои узви Созмони Ҳамкориҳои Шонгҳой анҷом шуд.
Дафтари матбуоти Тоҷикистон рӯзи сешанбе навишт, "таҳкими ҳамкорӣ барои таъмини амнияту суботи минтақа, аз ҷумла дар мубориза бо таҳдиду хатарҳои ҷаҳони муосир, аз мавзуъҳои муҳими суҳбат буд", аммо тафсилот наовард.
Кремл навореро нашр кард, ки дар он Владимир Путин дар баробари ситоиш аз додугирифти афзуни иқтисодии Душанбе ва Маскав гуфтааст, "мо аз нигарониҳои шумо (Тоҷикистон) дар бораи ончи дар кишвари ҳамсоя, Афғонистон, мегузарад, хабар дорем. Дар ин замина ва масъалаҳои дигари вобаста ба таъмини амният дар тамоси наздик ҳастем."
Маълум нест, ишораи Путин ба чист.
Ҳафтаҳои гузашта ноҳияи Нусайи Афғонистон, ҳаммарз бо ноҳияи Дарвози Вилояти Мухтори Кӯҳистони Бадахшон, шоҳиди даргирии шадид миёни нерӯҳои "Толибон" ва як фармондеҳи норозии ин гурӯҳ буд.
Дар он рӯзҳо Ҷасмина, сокини 21-солаи ноҳияи Дарвози Тоҷикистон, бар асари тирандозӣ аз ҷониби Афғонистон ба ҳалокат расид. Мақомоти Тоҷикистон эътироз карданд. Вазорати корҳои хориҷии ҳукумати "Толибон" онро кори "афроди вайронкор ва фурсатталаб" донист, аммо аз касе ё гурӯҳе ном нагирифт.
Дар пасманзари ин ҳодиса, сафорати Амрико дар Душанбе рӯзи 19-уми август эълон кард, ки кормандони ҳукумати ин кишвар муваққатан аз сафар ба минтақаҳои сарҳадии Тоҷикистон бо Афғонистон, бавижа Вилояти Мухтори Кӯҳистони Бадахшон (ВМКБ), манъ шудаанд.
Тоҷикистон бо Афғонистон тақрибан 1400 километр марз дорад.
Видеоро дар инҷо бинед:
Эмомалӣ Раҳмон: Ба зудӣ ба Эрон меравам
Раисҷумҳури Тоҷикистон дар ҷаласаи сарони кишварҳои Созмони Ҳамкориҳои Шонгҳой бо ишора ба таҳаввулот дар Ховари Миёна гуфт, ин низоъ ва муноқишаҳои дигар бояд аз роҳҳои сиёсиву дипломатӣ ҳал шаванд. Нишаст рӯзи 1-уми сентябр дар Қирғизистон баргузор шуд.
Эмомалӣ Раҳмон рӯзи 31-уми август бо Масъуди Пизишкиён, раисҷумҳури Эрон, низ гуфтугӯ дошт ва ба навиштаи дафтари матбуоти раёсати ҷумҳурӣ, “ҳамкориҳои дуҷониба, аз ҷумла тиҷорат ва сармоягузорӣ дар бахшҳои энергетиĸа баррасӣ шуд.”
Баъд аз мулоқот Раҳмон дар суҳбат бо расонаҳои эронӣ Ҷумҳурии Исломиро “як кишвари бародар” номида, гуфтааст, базудӣ ба Эрон сафар мекунад.
Прзидент Раҳмон пеш аз ин дидор бо фиристодаи махсуси Доналд Трамп, раисҷумҳури Амрико дар Осиёи Марказӣ ва Ҷанубӣ Серҷио Гор гуфтугӯ ва дар бораи ҳамкориҳои дуҷониба суҳбат кард.
Тафсилоти гуфтугӯи онҳо дастрас нест. Дафтари матбуоти президент бидуни ҷузъиёт навишт, ки амнияту субот дар минтақа ва ҷаҳон ва роҳҳои ҳалли сиёсию дипломатии низоъҳо бахше аз мулоқот буд.
Тоҷикистон аз замони шурӯи низоъ байни Амрико ва Эрон дар моҳи феврал ошкоро пуштибониашро аз Эрон намоиш додааст.
Коршиноси СММ: Тоҷикистон ҳамоно пойбанди пули муҳоҷирон аст
Як коршиноси Созмони Милал гуфтааст, ҳарчанд иқтисоди Тоҷикистон рӯ ба рушд аст, ҳамоно аз муҳоҷирати корӣ ва пули фиристодаи шаҳрвандон аз хориҷа вобаста аст.
Изҳороти Аттия Ворис, коршиноси мустақили Шӯрои ҳуқуқи инсони СММ, рӯзи 31-уми август ва баъд аз поёни боздидаш аз Тоҷикистон нашр шуд.
Ҳар сол садҳо ҳазор шаҳрванди Тоҷикистон дар ҷустуҷӯйи кору маоши муносиб ба Русия ва кишварҳои дигар мераванд. Мақомот на шумораи муҳоҷирони кориро мегӯянд ва на пули фиристодаи онҳоро.
Аттия Ворис дар изҳороти худ гуфтааст, пулҳои фиристодаи муҳоҷирон ба беҳтар шудани зиндагии мардум ва коҳиши камбизоатӣ дар Тоҷикистон кумак кардааст, аммо ба қавли ӯ, “пулҳои интиқолӣ наметавонанд ҷойҳои кории муносиб, кофӣ ва самарбахшро дар дохили кишвар иваз кунанд.”
Биноан, коршиноси Созмони Милал пешниҳод кардааст, ки ҳукумати Тоҷикистон талоши худро ба рушди кишоварзӣ, коркарди маводи ғизоӣ, сайёҳӣ, захираҳои маъдан ва иқтисоди рақамӣ дар кишвар равона кунад, то мардум зиндагии хубу шоиста дошта бошанд.
Вай ҳамзамон ба шаффофият ва адолати бештар дар масъалаҳои молӣ ишора карда, гуфтааст, “мардум бояд ба маълумоти дақиқ ва саривақтӣ дар бораи буҷаи давлатӣ, хароҷот, қарз ва тарҳҳои бузурги сармоягузорӣ дастрасӣ дошта бошанд.”
Вазорати корҳои хориҷии Амрико рӯзи 11-уми август дар гузориши солонааш пиромуни шаффофияти молӣ дар идораҳои давлатии 140 кишвар Тоҷикистонро дар радифи давлатҳое гузошт, ки ба талаботи ҳадди ақали шаффофияти молӣ ҷавобгӯ набуданд.
Набуди шаффофият яке аз мушкилотест, ки намегузорад, сармоягузорони хориҷӣ ба Тоҷикистон биёянд ё онро кишвари олуда ба фасод ва номуносиб барои ҳамкорӣ ва сармоягузорӣ медонанд.
Қарор аст, гузориши комили коршиноси Созмони Милал, Аттия Варис, дар бораи Тоҷикистон моҳи марти соли 2027 ба Шӯрои ҳуқуқи инсон пешниҳод шавад.