Дӯстум 15-уми сентябр дар нишасти Шӯрои олии муқовимат барои наҷоти Афғонистон дар Туркия пешниҳод кард, ки ҳукумати баробар бо ҳукумати “Толибон” ташкил шавад. Ӯ гуфт, ки бар зидди ин гуруҳи тундрав мубориза мекунад ва муддаӣ шуд, ки метавонанд ҳукумати “Толибон”-ро шикаст диҳанд.

“Толибон” то кунун дар мавриди ин изҳороти Дӯстум вокуниш накардаанд.

Ин ҷангсолор, ки неруҳояш ба нақзи ҳуқуқи башар муттаҳам мешаванд, соли 2023 гуфта буд, ҷангиёни ӯ омода ҳастанд зидди Толибон биҷанганд.

Изҳороти Дӯстум дар ҳоле садо медиҳад, ки мақомоти амрикоӣ таъкид кардаанд, ки аз гуруҳҳои мухолифи "Толибон" ҳимояти низомӣ намекунанд. Мақомоти амрикоӣ чанд бор бо мухолифини “Толибон” дидорҳое доштаанд.

Абдурашид Дӯстум, фармондеҳи ҷиҳодӣ ва аз роҳбарони узбекҳои Афғонистон аст. Ӯ моҳи августи соли 2021, як рӯз аз қабл аз суқути ҳукумати Афғонистон аз ин кишвар фирор кард.

Эмомалӣ Раҳмон, раисҷумҳури Тоҷикистон, рӯзи 20-уми август барои ошноӣ бо ҷараёни сохтмони нерӯгоҳи “Роғун” ба маҳалли ин иншооти азимтарин дар кишвар рафтааст.

Дафтари матбуоти раёсати ҷумҳурӣ хабар дод, ки Эмомалӣ Раҳмон аз мутахассисони нерӯгоҳ хостааст, корҳо дар ин нерӯгоҳи барқи обӣ, ки бузургтарин дар Осиёи Марказӣ хоҳад буд, бо сифати баланд иҷро шаванд.

Сафари раисҷумҳур ба нерӯгоҳи “Роғун” чанд рӯз баъд аз он сурат гирифт, ки ширкати рутбасанҷии “S&P” гуфт, қарор аст, чархаи саввуми нерӯгоҳи Роғун дар тирамоҳи соли 2027 ба кор андохта шавад.

Сохтмони нерӯгоҳ, ки солҳои дароз аст, идома дорад, ба навиштаи “S&P” бояд то 9 соли дигар, яъне соли 2035, ба анҷом расад.

Сандуқи Байнулмилалии Пул соли 2024 дар як гузориш дар бораи иқтисоди Тоҷикистон гуфта буд, ки сохтмони нерӯгоҳи “Роғун” на соли 2032, тавре қаблан барномарезӣ шуда буд, балки соли 2033 ба анҷом мерасад.

Ҳукумати Тоҷикистон, ки барои сохтани чунин иншооти азим пули кофӣ надорад, барои анҷоми он аз кишвару созмонҳои байнулмилалии молӣ қарз гирифтааст.

Иқтисодшиносон, аз ҷумла дар худи кишвар, дар бораи харҷи пули давлат дар сохтмони нерӯгоҳ изҳори нигаронӣ кардаанд, вале вазири молия моҳи июл гуфт, ҳама гуна дахлу харҷ зери назорати ҷиддӣ аст.

Дар ҷараёни сохтмони “Роғун” бинобар беэҳтиётӣ чандин коргар дар садама ва ё тасодуфҳои гуногун ҷон додаанд.

Сафорати Амрико дар Душанбе эълон кард, ки кормандони ҳукумати ин кишвар муваққатан аз сафар ба минтақаҳои сарҳадии Тоҷикистон бо Афғонистон, бавижа Вилояти Мухтори Кӯҳистони Бадахшон (ВМКБ), манъ шудаанд.

Баёнияи расмии сафорат рӯзи 19-уми август нашр шуд.

Дар он сабаби тасмимро "афзоиши хушунатҳо дар минтақаҳои наздимарзии Афғонистон бо Вилояти Мухтори Кӯҳистони Бадахшони Тоҷикистон" тафсир кардаанд.

Намояндагии расмии Амрико дар Душанбе ба шаҳрвандони Иёлоти Муттаҳида гуфтааст, ҳушдорро дар бораи таъсири хушунатҳои Афғонистон ба вазъияти амниятӣ дар марзи Тоҷикистон ҷиддӣ бигиранд.

Сафорат аз шаҳрвандони Амрико хостааст, аз сафар ба ин минтақаҳо худдорӣ варзанд; ҳушёр бошанд; барои дарёфти хабарҳои нав расонаҳои маҳаллиро пайгирӣ ва барномаҳои амниятии худро бозбинӣ кунанд ва санадҳои даркориро бо худ дошта бошанд.

Ноҳияи Нусай дар вилояти Бадахшони Афғонистон, ҳаммарз бо ноҳияи Дарвози Тоҷикистон, ҳафтаи гузашта шоҳиди даргирӣ миёни нерӯҳои ҳукумати "Толибон" ва Ҷумъахон Фотеҳ, фармондеҳи норозии ин гурӯҳ, буд.

Дар он рӯзҳо Ҷасмина, сокини 21-солаи ноҳияи Дарвози Тоҷикистон, бар асари тирандозӣ аз ҷониби Афғонистон ба ҳалокат расид.

Мақомоти Тоҷикистон ҳодисаро маҳкум карда, ба ҳукумати "Толибон" дар Афғонистон ёддошти эътирозӣ фиристоданд. Вазорати корҳои хориҷии ҳукумати "Толибон" дар посух "ибрози таассуфи амиқ" карда, онро кори "афроди вайронкор ва фурсатталаб" донист, аммо аз касе ё гурӯҳе ном нагирифт.

Ҳадиса Қурбонова, шоири халқии Тоҷикистон, рӯзи 20-уми август дар шаҳри Душанбе даргузашт.

Ӯ 86 сол дошт.

Одили Нозир, хабарнигори тоҷик, дар суҳбат бо Радиои Озодӣ гуфт, дар маросими видоъ бо Ҳадиса Қурбонова баъзе аз намояндагони ҳукумат, адибону донишмандон ва рӯзноманигорон ширкат карданд.

"Ӯ бо овозхонҳо ва ҳунармандони зиёд ҳамкорӣ кардааст. Муаллифи матни оҳанги "Тоҷикистон" дар иҷрои Нуқра Раҳматова яке аз шеърҳои шинохтаратини Ҳадиса Қурбонова мебошад," – афзуд Одили Нозир.

Ҳадиса Қурбонова аз соли 1978 узви Иттиҳоди адибони Тоҷикистон буд.

"Лоиқ намеояд дигар", "Ҳилолӣ", "Меҳвари ишқ", "Хаймаи Хайём" ва "Шоҳин" аз ҷумлаи маҷмӯаҳои шеърии ӯст.

Номи Ҳадиса Қурбонова соли 2014 дар пайванд ба изҳори назараш дар бораи тақдими ҷоизаи давлатии ба номи Рӯдакӣ баҳсбарангез шуд.

Созмони Афви Байналмилали ва ҳайати намояндагии СММ дар Афғонистон хостори анҷоми таҳқиқоти ҳамаҷониба, мустақил ва бетарафона дар бораи таркиши рӯзи 17 август ра ғарби Кобул шудаанд.

Дафтари СММ тасдиқ кард, ки дар ин таркиш 42 кӯдаки 9 то 14-сола захмӣ шудаанд. Ин ниҳод дар сафҳаи Х-и худ бо ибрози ҳамдардӣ ба захмиён ва хонаводаҳои онҳо, хостори баррасии ин ҳодиса шудааст.

СММ таъкид кардааст, ки мактабҳо ва марказҳои омӯзишӣ бояд муҳофизат шаванд.

Пеш аз ин сухангӯи фармондеҳии амнияти Толибон дар Кобул ба Радиои Аврупои Озод\Радиои Озодӣ гуфта буд, ки сабаби ҳодиса таркиши як бомбаи дастӣ будааст, ки ба гуфтаи ӯ таҳқиқот дар бораи чигунагии рух додани он оғоз шудааст.

Бархе гузоришҳо шумори захмишудагони ин рӯйдодро ҳудуди 52 кӯдак эълон карда буданд.

Дар ҳамин ҳол, Созмони Афви Байнулмилал таркиш дар Дашти Барчиро бисёр нигаронкунанда хонд ва гуфт, ки дар ин минтақа, ки бештари сокинони он ҳазораҳо ҳастанд, тайи беш аз як даҳсолаи гузашта, мактабҳо, масҷидҳо, нақлиёти умумӣ ва марказҳои тандурустӣ борҳо ҳадафи ҳамлаҳои гурӯҳҳои мусаллаҳи мухталиф қарор гирифтаанд.

Ин созмон аз мақомҳои Толибон хостааст, ки бехатарии ғайринизомиён, аз ҷумла ақалиятҳои қавмӣ ва мазҳабиро дар Афғонистон таъмин кунад.

Ин созмон ҳамчунин хостори анҷоми таҳқиқоти ҳамаҷониба, мустақил ва бетарафона дар бораи ин ҳодиса мутобиқ бо қонунҳо ва меъёрҳои байналмилалӣ шуда ва таъкид кардааст, ки афроди гумонбар бояд пас аз як муҳокимаи одилона ба ҷазои аъмолашон бирасанд.

Бо вуҷуди онки то кунун ҳеч гурӯҳе масъулияти ин таркишро ба ӯҳда нагирифтааст, гурӯҳи ДОИШ пеш аз ин масъулияти ҳамлаҳои монанд дар ин минтақа аз Кобулро пазируфтааст.

Ҳамзамон бо норӯшантар шудани сарнавишти музокирот дар бораи бозкушоии тангаи Ҳурмуз, раванди афзоиши нархи нафт дар ҷаҳон идома ёфтааст.

Қимати ҳар бушка нафти хоми "брент" рӯзи 19-уми август назар ба як рӯз қабл як дарсад афзоиш ёфт ва ба 92 доллар расид.

Арзиши нафати хоми West Texas Intermediate ба 85 доллар бар сари ҳар бушка расид.

Ин рақамҳо сатҳи баландтарини қимати нафт дар ду ҳафтаи охир ба шумор меравад.

Доналд Трамп, раисҷумҳури Амрико, рӯзи 18-уми август гуфт, "ҳеч гуфтушуниде бо Эрон дар ҷараён нест ва ҳеч музокира низ барномарезӣ нашудааст".

Дар айни замон рӯзҳои охир танишҳо дар тангаи Ҳурмуз афзоиш ёфтааст.

Идомаи ҳамлаҳо ба чанд киштӣ ва эълони Имороти Муттаҳидаи Араб дар бораи муқобила бо ҳамлаи мушакии нав аз сӯи Эрон, аз ҷумлаи омилҳои афзоиши ин таниш гуфта шудааст.

Русия ва Украина рӯзи 19-уми август дигарбора асирони ҷангияшонро бо ҳамдигар иваз кардаанд. Ин дафъа 103-нафарӣ аз ҳарду ҷониб.

Хабари табодули зиндониҳоро раисҷумҳури Украина Владимир Зеленский дар саҳифааш дар Телеграм нашр кард.

Низомиёни рус дар хоки Беларус қарор доранд.

Имороти Муттаҳидаи Арабӣ дар мубодилаи зиндониҳо ҳамчун миёнрав хидмат кардааст.

Аз ин пеш, дар поёни моҳи июн, ду кишвар 160-нафарӣ низомиёни зиндонӣ ва 7-нафарӣ афроди мулкиро бо ҳамдигар табодул карданд.

Мақомоти интизомӣ дар ноҳияи Файзобод як мардро барои нафасгир кардан ва куштани ҳамсараш дастгир кардаанд, ки аломати дигаре аз ҳамчунон зиёд боқӣ мондани зӯроварӣ ба зан дар Тоҷикистон аст.

Вазорати корҳои дохилӣ хабар дод, ки Зиёбег Раҷабов, сокини деҳаи Меҳрободи ноҳияи Файзобод, рӯзи 18-уми август дар заминаи рашк ва бадгумонӣ ҳамсари 49-солааш Ҳавасгул Умароваро дар дохили ҳаммом латукӯб карда, сипас бо сими алюминий ҳалқи ӯро баставу нафасгир намудааст.

Назари гумонзад ва ё наздиконаш маълум нест.

Қатли ҳамсар дар Тоҷикистон солҳои ахир зиёд шудааст. Вазорати умури дохилӣ танҳо имсол дар бораи на камтар аз 6 мавриди қатли ҳамсар, таҳдид ба ҷони ӯ ва ё ба худкушӣ расонидани онҳо хабар дод.

Дар ду соли гузашта бештар аз 10 мавриди занкушӣ дар Тоҷикистон сабт шудааст.

Ҳомиёни ҳуқуқ ин ҳамаро баёнгари талошҳои нокофии ҳукумат барои маҳви зӯроварӣ ба зан ва хушунати хонаводагӣ хонда, пайваста онро танқид мекунанд.

Беларус шаш шаҳрванди Тоҷикистонро, ки дар ширкатҳои боркашонӣ дар Литва кор мекунанд, аз қаламраваш берун кардааст.

Онҳо рӯзи 13-уми август аз Узбекистон бо ҳавопаймо ба Минск рафта, мехостанд, аз роҳи заминӣ ба Аврупо гузаранд.

Яке аз ронандагони тоҷик рӯзи 18-уми август дар суҳбат бо Радиои Озодӣ гуфт, мақомоти Беларус онҳоро дар сарҳад дастгир карда, баъди се рӯз ба Узбекистон баргардонданд.

Ба қавли мусоҳиби мо, як далели мақомоти Беларус ин будааст, ки сафари онҳо ба Русия манъ аст ва бинобар ин ҳақ надоранд, вориди ин кишвар шаванд.

"Ман гуфтам, чаро чунин мекунед? Инҷо, ки Русия нест, давлати озод аст. Гуфтанд, ки мо бо Русия як ҳастем ва назорати гумрукӣ надорем," – афзуд мусоҳиби мо. Ӯ нахост номаш фош шавад.

Шарҳи расмии ҷониби Беларус дастрас нест. Ронандагони тоҷик мегӯянд, онҳо се рӯз дар ин кишвар дар шароити нохуб буданд ва бемор шуданд.

"Хӯроке доданд, ки онро ба саг медиҳанд. Ду бор заҳролуд шудем ва мошини "Ёрии таъҷилӣ" даъват карданд," – гуфт вай.

Навор дар Инстаграм:

Даҳҳо ронанда аз Тоҷикистон дар ширкатҳои боркашонӣ дар Аврупо кор мекунанд. Баъзе аз ин ронандагон мегӯянд, масири Тошканд-Минскро бештар барои арзон будани пули билет интихоб мекунанд.

Беларус шарики муҳими Русия аст ва аз сиёсатҳои ин кишвар, аз ҷумла ҷанги Маскав дар Украина пуштибонӣ мекунад.

Инро ҳам бихонед:

Кори осон ё душвор? Сафаре бо ронандагони боркаши тоҷик дар Аврупо

Қонуни афв дар Тоҷикистон то 14-уми август нисбат ба тақрибан 21 ҳазор нафар татбиқ шудааст.

Ҳабибулло Воҳидзода, додситони кул, рӯзи 18-уми август дар мулоқот бо сокинону фаъолони ноҳияи Рӯдакӣ гуфтааст, танҳо 8 ҳазору 157 нафар аз зиндонҳо озод гаштанд.

Ҳарчанд ӯ ишорае накард, дар миёни озодшудаҳо ду хабарнигори мустақил Завқибек Саидаминӣ ва Абдусаттор Пирмуҳаммадзода ҳам мебошанд.

Онҳо дар соли 2022 бо гуноҳи, ба гуфтаи мақомот, ҳамкорӣ бо гурӯҳҳои фаъолияташон мамнуъ дар Тоҷикистон аз озодӣ маҳрум карда шуданд. Худашон ҳеч гоҳ ин иттиҳомро напазируфтанд.

Аммо бисёре аз зиндониён, ки парвандаашонро дорои ангезаи сиёсӣ медонанд, афв нагардиданд. Аз ҷумла, чеҳраҳои саршиноси иҷтимоию давлатӣ, ки соли 2025 дар доираи парвандаи "табаддулот" ба солҳои тӯлонии зиндон маҳкум шудаанд.

Қонуни афв рӯзи 16-уми июн дар пайванд ба 35 соли истиқлоли давлатии Тоҷикистон қабул шуд.

Додгоҳи олии Покистон рӯзи 18 август дастур дод, ки Имрон Хон, нахуствазири пешини ин кишвар, ки дар зиндон ба сар мебарад, барои муолиҷа ба як бемористон дар Исломобод интиқол дода шавад.

Ин тасмим пас аз он гирифта шуд, ки вакилони дифои ӯ дар бораи вазъияти номуносиби саломатии вай ибрози нигаронӣ карданд.

Додрас Шоҳид Ваҳид гуфт, Имрон Хон, ки аз соли 2023 то кунун дар зиндон ба сар мебарад, дар ҷараёни ду рӯзи оянда ба бемористон интиқол хоҳад шуд.

Ба хоҳар ва табиби ӯ иҷоза дода хоҳад шуд, ки дар ҷараёни дармон дар паҳлӯи ӯ бимонанд ва аъзои хонаводааш низ иҷоза хоҳанд дошт ҳафтае як бор бо ӯ мулоқот кунанд.

Имрон Хони 73-сола ва ҳамсараш Бушро Бибӣ дар як парвандаи фасод, ҳар яке ба 17 сол зиндон маҳкум шудаанд.

Имрон Хон ва Ҳизби Таҳрики инсофи Покистон мегӯянд, иттиҳомҳои воридшуда алайҳи онҳо ангезаи сиёсӣ дорад.

Имрон Хон аз соли 2018 то 2022 нахуствазири Покистон буд ва бонуфузтарин раҳбари сиёсии мухолифи ҳукумати дар ин кишвар шинохта мешавад.

Сурия рӯзи 18 август аз ҳашт ҳамлаи ҳавоии Исроил ба пойгоҳи низомии "Абу Зуҳур" дар шимол-ғарби ин кишвар дар наздикии марзи Туркия хабар дод.

Телевизиони давлатии Сурия ба нақл аз як манбаи низомӣ гузориш дод, ки хатти парвози фурудгоҳ ва анборҳои ин пойгоҳ дар ин ҳамлаҳо ҳадаф қарор гирифтанд, аммо талафоти ҷонӣ надоштанд.

Артиши Исроил ва Вазорати дифои Сурия ҳанӯз дар ин бора баёния нашр накардааст. Аммо Томас Барак, фиристодаи вижаи Амрико дар умури Сурия, аз "ҳамлаҳои ҳавоии тасдиқшудаи Исроил" ба пойгоҳи ҳавоии "Абу Зуҳур" ибрози нигаронии шадид кард ва гуфт, ҳукумати Сурия вокуниши низомӣ нишон надода ва борҳо нишон додааст, ки хоҳони коҳиши таниш бо Исроил аст.

Пойгоҳи "Абу Зуҳур" дар ҳудуди 70-километрии марзи Туркия қарор дорад ва аз соли 2013 дигар ҳамчун фурудгоҳи низомии вижа, фаъол набудааст. Ин пойгоҳ дар ҷараёни ҷанги дохилии Сурия чандин бор миёни нерӯҳои Башор Асад ва гурӯҳҳои мухолиф даст ба даст шуд.

Ба гуфтаи як манбаи низомӣ, пас аз сарнагунии ҳукумати Башор Асад дар моҳи декабри соли 2024, ин пойгоҳ ба маркази омӯзишии артиши нави Сурия табдил шудааст.

Ба гузориши хабаргузории "Рейтерз", ҳамлаҳои нав дар шароит анҷом шудааст, ки ҳукумати нави Сурия дар талош барои бозсозии нерӯҳои мусаллаҳи ин кишвар аст ва Туркия низ нақши афзояндае дар омӯзиш ва таҷҳизи артиши Сурия дорад.

Анқара ва Димишқ пештар созише барои ҳамкории низомӣ имзо кардаанд, ки шомили омӯзиш ва машваратдиҳӣ барои нерӯҳои суриягӣ ва таъмини таҷҳизот мешавад.

Исроил дар моҳҳҳои гузашта низ шуморе аз пойгоҳҳо ва иншооти низомии Сурияро ҳадаф қарор дода ва борҳо ҳушдор додааст, ки иҷоза нахоҳад дод тавоноиҳои низомии Сурия ба шакле тақвият шавад, ки барои Исроил таҳдиде эҷод кунад.

Исроил дар бархе ҳамлаҳои пешини худ пойгоҳҳоеро ҳадаф қарор дода буд, ки Туркия имкони истифода аз онҳоро баррасӣ карда буд ва ин масъала ба афзоиши таниш миёни Анқара ва Телавив бар сари ояндаи амниятии Сурия доман задаааст.

Беш аз 71 дарсади кӯдаконе, ки ба мактабҳои миёнаи Қазоқистон дохил шудаанд, ба забони қазоқӣ таҳсил хоҳанд кард.

Дар ин бора Жулдиз Сулаймонова, вазири маорифи Қазоқистон, рӯзи 18-уми август дар ҷаласаи ҳукумат хабар дод.

Ӯ, инчунин, гуфтааст, дар барномаи таълим баъзе аз фанҳои нав ворид шуда, баҳогузории дониши хонандагон ҳам тағйир дода шуд.

Вазорати маорифи Қазоқистон гуфтааст, имсол беш аз 380 ҳазор кӯдак ба синфи аввал мераванд.

Беш аз 71 дарсади онҳо бо забони қазоқӣ таҳсил мекунанд, 26,6 дарсад бо забони русӣ ва 2,3 дарсад бо забонҳои дигар.

Барои синфҳои аз 5 то 7-уми мактабҳои миёнаи Қазоқистон фанни ҳатмии “Асосҳои Конститутсия”, барои талабаҳои синфҳои аз 8 то 11-ум дарси “Қонун ва тартибот” ҷорӣ мешавад. Барои синфҳои аз 5 то 11 дарси “Амнияти шахсӣ” ҳатмӣ хоҳад гашт.

Қоидаи ҳатмии дигар – манъи истифодаи телефонҳои ҳушманд дар дарсҳо будааст, ба истиснои барномаҳои таълимие, ки бар асоси нақшаи дарсӣ пешбинӣ шудааст.

Мақомоти Амрико гуфтанд, як шаҳрванди Тоҷикистон, ки бемори рӯҳист, аз ин кишвар фирор кардааст.

Вебсайти "Fox5" рӯзи 17-уми август навишт, Абдулло Тошпӯлодзода соли 2019 ба куштани соҳибхонааш дар Амрико гунаҳкор, аммо бо сабаби бемории равонӣ дар шифохонаи Вирҷинияи Шимолӣ бистарӣ шуда буд.

Дар як санади расмӣ аз 5-уми август гуфта шудааст, ки Тошпӯлодзода бо истифода аз таътили кӯтоҳмуддат аввал ба Истанбул ва аз он ҷо ба Душанбе рафт. Ин дар ҳолест, ки додгоҳ ҳанӯз моҳи июни имсол гуфтааст, “ӯ бе қарори додгоҳ набояд бемористонро тарк кунад”.

Қонунҳои Вирҷиния барои гурӯҳи муайяни беморони рӯҳӣ, аз ҷумла онҳое, ки даст ба куштор задаанд, як ё ду рӯз имкони берун шудан аз беморхонаро медиҳад.

Ҳатто додситон соли 2024 ба Абдулло Тошпӯлодзода иҷозат дода будааст, ки ба Вашингтон рафта, шиносномаашро бигирад. Намояндагии расмии Тоҷикистон дар Амрико дар ин шаҳр ҷойгир аст.

Бар асоси санадҳои расмӣ, Тошпӯлодзода рӯзи 6-уми июл, замоне ки бо иҷозатномаи муваққатӣ аз беморхона берун шуда буд, аз фурудгоҳи “Даллас” ба воситаи Истанбул ба Душанбе рафтааст.

Муфаттишон гуфтаанд, билет яктарафа буд ва ширкати ҳавопаймоии “Turkish Airlines” парвози ӯро тасдиқ кард. Зоҳиран билетро барои Тошпӯлодзода шахси дигаре харидааст.

Сомонаи "Fox5" менависад, хешовандони Абдулло Тошпӯлодзода нахостанд дар ин бора бо матбуот суҳбат кунанд. Маълум нест ҳоло ӯ дар куҷост ва оё ин қазия аз ҷониби ниҳодҳои Тоҷикистон ҳам пайгирӣ мешавад ё на.

Сухангӯйи Вазорати корҳои хориҷии Эрон даст доштани ин кишварро дар ҳамлаи паҳподӣ ба дафтари нахуствазири иқлими Курдистони Ироқ ва раиси истихбороти ин иқлим рад кард.

Ба гузориши хабаргузории ИРНА, Исмоил Бақоӣ бо машкук хондани ин ҳамлаҳо, хоҳони "ҳушёрии беш аз пеши ҳама тарафҳо дар ин робита" шуд.

Дар ҳамин ҳол, расонаҳои Эрон аз гуфтугӯйи телефонии вазири корҳои хориҷии Эрон бо ҳамтои ироқиаш хабар доданд, ки дар он Аббос Ароқчӣ ба Фуод Ҳусейн гуфтааст, "ҳеч маълумоте дар бораи оғози ин ҳамлаҳо аз дохили хоки Эрон вуҷуд надорад".

Ҳамзамон, Алӣ Аз-Зайдӣ, нахуствазири Ироқ, дастури ташкили як кумитаи таҳқиқ дар бораи ин ҳамларо содир кардааст.

Пештар Идораи мубориза бо терроризми иқлими Курдистон эълон карда буд, ду паҳподе, ки шоми 16-уми август аз дохили хоки Эрон партоб шуда буданд, дафтари Масрур Боризонӣ, нахуствазири Курдистони Ироқ, ва ҳамчунин манзили раиси истихбороти ин минтақаи худмухторро ҳадаф қарор доданд. Ба гуфтаи мақомҳо, ин ҳамлаҳо талафоте надошт.

Як узви Маҷлиси Эрон барои изҳороташ дар бораи марги Маҳсо Аминӣ аз волидони ӯ маъзарат хост.

Аҳмад Ориёинажод, узви Маҷлиси Эрон, дар як мубоҳисаи охири телевизионӣ гуфт, Маҳсо Аминӣ “ба ҷаҳаннам рафтааст” ва марги ӯ боис ба “ошӯб” шуд.

Маҳсо Аминӣ соли 2022 аз сӯйи пулиси ахлоқ ва бо иттиҳоми риоя накардани ҳиҷоб дар Эрон дастгир шуда, дар шароити мармуз ҷон дод.

Ин ҳолат хашми ҷомеаро ба бор овард ва боис ба эътирози густурдаи “Зан, Зиндагӣ, Озодӣ” гардид. Мақомот эътирозҳоро бераҳмона саркӯб карданд.

Ориёинажод дар наворе баъд аз мубоҳисаи телевизионӣ гуфт, ки “нохудгоҳ” алфози “ғайри қобили қабуле” ба забон овард ва аз волидони Аминӣ хост, узри ӯро бипазиранд.

Волидони Маҳсо Аминӣ рӯзи 15-уми август дар вокуниш гуфтанд: “Бигзор забонаш барои тамоми кишварро ба ҷаҳаннам табдил додан бурида шавад”.

“Исми духтари мову ҳазорҳо мардуми бегуноҳ дар таърихи ин кишвар ҷовидон хоҳад монд”, -- гуфтанд волидони Маҳсо Аминӣ дар поёни паёмашон.