Додситонҳои Русия имрӯз аз ҳукми додгоҳи шаҳри Санкт-Петербург, ки қотилони духтараки нӯҳсолаи тоҷик Хуршеда Султоноваро ба солҳои мухталифи зиндон маҳкум кард, ба додгоҳи олии ин кишвар шикоят бурдаанд.
Наздикони Хуршеда Султонова ва ҳомиёни ҳуқуқи башар мегӯянд, қотилони духтараки бегуноҳ ҷавонони миллатгарои рус ҳастанд. Аммо додгоҳи Санкт-Петербург муттаҳамон дар қатли Хуршеда Султоноваро бо ҷурми авбошӣ ба зиндон маҳкум кардааст.
Ва дигар ин ки хабаргузории Интерфакси Русия гуфтааст, мақомоти вилояти Красноярск як нафарро дар робита ба латукуби ваҳшиёнаи як муҳоҷири тоҷик дар ин вилоят боздошт кардаанд. Хабаргузорӣ навиштааст, ки барои ошкор кардани ангезаҳои ҷиноят муттаҳам мавриди бозпурсии мақомоти интизомӣ қарор дорад.
Тибқи гузоришро рӯзи якуми апрел як гурӯҳи ҷавонон ба қаҳвахонае, ки муҳоҷири тоҷик онҷо кор мекардааст, ворид шуда ва ӯро ба берун кашида шадидан зарбу лат кардаанд. Вазъи ҷабрдидаро вахим арзёбӣ мекунанд. Гуфта мешавад, зоҳиран ин ҳамла дар заминаи бадбинии нажодӣ сурат гирифтааст.

Дастаи мунтахаби футболи наврасони то 17-солаи Тоҷикистон зери раҳбарии Далер Каёсов барои омодагӣ ба қисми ниҳоии Ҷоми Осиё-2026 рӯзи 12-уми январ ба шаҳри Дубай расид.

Ба иттилои Федератсияи футболи Тоҷикистон (ФФТ), наврасони тоҷик дар Дубай бо ҳамсолонашон аз Арабистони Саудӣ (13-уми январ) ва Имороти Муттаҳидаи Арабӣ (16-уми январ) бозиҳои санҷишӣ баргузор мекунанд.

Ба ҳайати дастаи мунтахаби наврасони Тоҷикистон (U-17) ду дарвозабон, ҳашт ҳимоятгар, даҳ нимҳимоятгар ва се ҳамлагар даъват шудаанд, ки 18 нафар аз бошгоҳҳои футболи кишвар ва 5 кас аз дастаҳои Русия ва Имороти Муттаҳидаи Арабӣ мебошанд.

Ҳайати дастаи мунтахаби наврасони Тоҷикистон (U-17) дар бозиҳои санҷишӣ муқобили тимҳои Арабистони Саудӣ (13-уми январ) ва Имороти Муттаҳидаи Арабӣ (16-уми январ):

Дарвозабонҳо: Абубакр Раҳмонқулов, Алиҷони Баҳодурзода (ҳарду аз «Душанбе»);

Ҳимоятгарон: Исломҷон Ҳоҷиев (Академияи «Криля Советов», Русия), Мактум Алидодов («Ал-Наср», Имороти Муттаҳидаи Арабӣ), Мустафо Ҳасанбеков («Истиқлол», Душанбе), Шуҳрат Нурматов, Ҳикматулло Кабиров, Муҳаммадҷон Кароматуллозода (ҳарсе аз Академияи ФФТ), Ёқубҷон Муродов, Озодбек Танҷихолов (ҳарду аз «Душанбе»);

Нимҳимоятгарон: Назарбек Маҳатов, Мансурбек Раимбердиев (ҳарду аз СШОР №1 Белгород, Русия), Меҳрубон Одилзода, Парвиз Бобоназаров (ҳарду аз «Истиқлол»), Муҳаммадҷон Мираҳмадов («Барқчӣ», Ҳисор), Олимҷон Олимов (КМВА, Душанбе), Бахтовар Арабов («Душанбе»), Азизҷон Шодиев, Муҳаммадҷон Қудратов (ҳарду аз Академияи ФФТ), Усмон Ширинов (МҶМОВ, Душанбе);

Ҳамлагарон: Парвиз Сангинов (Академияи «Космос», Маскав, Русия), Асадбек Махтумов («Эсхата», Хуҷанд), Аминҷон Асоев («Душанбе»).

Сармураббӣ – Далер Каёсов.

Як омӯзгори 21-соларо дар вилояти Самарқанди Узбекистон бо иттиҳоми “барангехтани адовати диниву мазҳабӣ" ба мӯҳлати 12 шабонарӯз ҳабс карданд. Дар ин бора нашрияи Gazeta.uz бо такя ба қарори додгоҳ хабар додааст.

Омӯзгори ҷавонро баъди он ба ҷавобгарӣ кашиданд, ки рӯзи 30 декабр дар як канали Телеграм дар бораи Муҳаммад пайғамбари мусулмонон бад ва ё "кӯдакозор" гуфтааст. Корбароне, ки ин гуфтаҳоро дидаанд, аз мақомот хостаанд, ки ӯро ҷазо диҳанд.

Рӯзи 9-уми январ мақомоти умури дохилӣ телефони ин муаллимро санҷида маълум карданд, ки муаллифи ин ҳарфҳо ӯ будааст. Худи ҳамон рӯз мурофиаи додгоҳӣ барпо карда, ба ӯ амр додаанд, ки барои хароҷоти ҳабс 741,6 ҳазор сӯм ё 61 доллар пардохт кунад.

Мавҷи вокунишҳо ба эътирозҳои ахир дар Эрон ва саркӯби норозиён аз сӯи мақомоти қудратӣ идома дорад. Нахуствазири Суид ё Швейсария рӯзи якшанбеи 11-уми январ дар шабакаи X (Твиттер) навишт, “гузориши даҳшатнок аз Эрон дар бораи кушта шудани эътирозгарон нашр шудааст. Мо ҳаргуна истифода аз хушунат алайҳи эътирозгарони мусолиматомезро маҳкум мекунем”.

Антонио Гуттериш, дабири кулли Созмони милал ҳам эълом кард, ки аз гузоришҳо дар бораи “хушунат ва истифодаи зӯр тавассути мақомҳои эронӣ алайҳи эътирозгарон”, ки боиси кушта шудани даҳҳо нафар гардид, ваҳшатзада шудааст. Гуттериш хостори барқарор кардани хатти интернет дар Эрон ва дастрасӣ ба иттилоъ шуд.

Эътирозҳо дар Эрон, ки бо далели боло рафтани нархҳо ва паст шудани қурби миллӣ сар зад, беш аз ду ҳафта аст, ки идома дорад. Мақомоти Эрон интернетро дар кишвар қатъ карда, ба гуфтаи созмонҳои ҳомии ҳуқуқ ба саркӯби бераҳмонаи норозиён идома медиҳанд.

Оҷонсии хабарии фаъолони ҳуқуқи башар (HRANA), ки қароргоҳаш дар Амрикост, рӯзи 11-уми январ гуфт, ки дар ҷараёни эътирозҳои 15- рӯзи охир 544 нафар кушта шудаанд. Ба гуфтаи созмон, дастикам 10,061 нафар боздошт шудааанд. Тасдиқи дурустии ин ҳарфҳо ба далели қатъи дастрасӣ ба интернет дар Эрон ғайриимкон аст.

Маросими қуръакашии марҳилаи муқаддамотии мусобиқаи анъанавии Ҷоми Федератсияи футболи Тоҷикистон (ФФТ)-2026 дар минтақаи Душанбе 12-уми январ доир гардид.

Ба иттилои Федератсияи футболи Тоҷикистон, Ҷоми ФФТ-2026 пеш аз оғози мавсим дар ду марҳила - пешакӣ ва ниҳоӣ - баргузор мегардад. Дар марҳилаи аввал дастаҳо ба се минтақа – Душанбе, Суғд ва Хатлон – тақсим мешаванд.

Дар минтақаи Душанбе панҷ дастаи лигаи олӣ - КМВА (Душанбе), «Регар-ТадАЗ» (Турсунзода), «Барқчӣ» (Ҳисор), «Ҳосилот» (Фархор), «Сардор» (Турсунзода) ва панҷ дастаи лигаи якум – «Шодмон» (Ҳисор), «Шоҳмансур» (Душанбе), «Душанбе» (Душанбе), «Рангон» (ноҳияи Рӯдакӣ), «Саройкамар» (Панҷ) - иштирок мекунанд.

Дар натиҷаи қуръакашӣ дастаҳо ба ду гурӯҳ тақсим шуданд:

Гурӯҳи «А»: «Рангон» (Рӯдакӣ), «Сардор» (Турсунзода), «Регар-ТадАЗ» (Турсунзода), «Шоҳмансур» (Душанбе), «Шодмон» (Ҳисор).

Гурӯҳи «Б»: «Душанбе» (Душанбе), «Ҳосилот» (Фархор), «Саройкамар» (Панҷ), КМВА (Душанбе), «Барқчӣ» (Ҳисор).

Мусобиқа дар минтақаи Душанбе 23-юми январ оғоз меёбад. Чаҳор дастаи беҳтарин аз ин минтақа ба марҳилаи ниҳоии Ҷоми ФФТ-2026 роҳ меёбад.

Маблағи умумии ҷоизавии мусобиқа 100 000 сомониро ташкил медиҳад. Ғолиб бо 50 000 сомонӣ мукофотонида мешавад. Барандаи медали нуқра бо 30 000 сомонӣ ва медали биринҷӣ бо 20 000 сомонӣ сарфароз мегарданд.

Ёдовар мешавем, соли гузашта дастаи «Истиқлол»-и Душанбе, ки 22-юми феврал дар бозии ниҳоӣ дар Варзишгоҳи марказии ҷумҳуриявӣ КМВА (Клуби марказии варзишии артиш)-и Душанберо бо ҳисоби 2:0 шикаст дод, бори ҳафтум Ҷоми ФФТ (Федератсияи футболи Тоҷикистон)-ро ба даст овард.

Дастаи “Панҷшер”-и Ҷалолиддини Балхӣ барои ҷойи сеюм бар тими “Сомон”-и Данғара бо ҳисоби 3:0 ғолиб омад.

Ҷоми ФФТ сар аз соли 2012 бори понздаҳум сурат мегирад. Дар ин мусобиқа аз ҳама бештар – ҳафт бор - “Истиқлол”-и Душанбе ғолиб гардидааст. “Регар-ТадАЗ”-и Турсунзода се бор, “Хайр”-и Ваҳдат, “Кӯктош”-и Рӯдакӣ, КМВА-и Душанбе ва “Равшан”-и Кӯлоб якборӣ барандаи Ҷоми ФФТ шудаанд.

Натоиҷи ҳамаи бозиҳои ниҳоии Ҷоми ФФТ (2012-2025):

2012 – «Регар-ТадАЗ» (Турсунзода) – «Хайр» (Ваҳдат) – 1:0
2013 – «Хайр» (Ваҳдат) – ССКА «Помир» (Душанбе) – 1:1. Аз рӯи пеналти – 6:5
2014 – «Истиқлол» (Душанбе) – «Хайр» (Ваҳдат) – 2:0
2015 – «Истиқлол» (Душанбе) – «Хайр» (Ваҳдат) – 5:1
2016 – «Регар-ТадАЗ» (Турсунзода) – «Хуҷанд» (Хуҷанд) – 1:0
2017 – «Истиқлол» (Душанбе) – «Регар-ТадАЗ» (Турсунзода) – 2:1
2018 – «Истиқлол» (Душанбе) – «Регар-ТадАЗ» (Турсунзода) – 3:1
2019 – «Кӯктош» (Рӯдакӣ) – «Истиқлол» (Душанбе) – 2:5
2020 – «Равшан» (Кӯлоб) – «Кӯктош» (Рӯдакӣ) – 1:2
2021 – «Хатлон» (Бохтар) – «Истиқлол» (Душанбе) – 0:1
2022 – «Ҳосилот» (Фархор) – «Регар-ТадАЗ» (Турсунзода) – 0:4
2023 – КМВА (Душанбе) – «Регар-ТадАЗ» (Турсунзода) – 2:1
2024 – «Равшан» (Кӯлоб) – «Ҳосилот» (Фархор) – 1:0
2025 – «Истиқлол» (Душанбе) – КМВА (Душанбе) – 2:0

Ин маблағ назар ба соли гузашта 4 ҳазор сомонӣ камтар аст. Зоҳиран паст шудани қурби доллар дар баробари асъори милли сомонӣ боиси коҳиши нархи сафари ҳаҷ шудааст.

Дар Кумитаи дин гуфтанд, нархи сафари ҳаҷ моҳи декабри соли гузашта муқаррар шуда, довталабон аллакай маблағҳои худро супориданд. Солона аз Тоҷикистон ҳудуди 5-6 ҳазор кас барои адои маносики ҳаҷҷи фарзӣ ба Арабистони Саудӣ мераванд. Соли 2025 Арабистон барои Тоҷикистон 7 ҳазор квота ҷудо карда буд.

Дар назар аст, ки имсол зоирон тақрибан моҳи май ба Арабистони Саудӣ сафар кунанд. Кумитаи дини Тоҷикистон ба сокинон ҳушдор додааст, ки дар мавсими ҳаҷҷи фарзӣ бидуни раводиди ҳаҷ ба Арабистон сафар накунанд, чун метавонанд боздошт шаванд.

Ҳаҷ яке аз панҷ рукни дини Ислом аст ва адои он барои мусалмонони доро ҳатмӣ мебошад. Дар Тоҷикистон танҳо Кумитаи дин ҳақ дорад сокинонро ба ҳаҷҷи фарзӣ фиристад. Қаблан ин ниҳод ба сокинон ҳушдор дода буд, ки барои адои ҳаҷ танҳо аз роҳҳои қонунӣ сафар кунанд ва аз талоши вуруд ба Макка бо роҳҳои ғайриқонунӣ худдорӣ варзанд. Дар акси ҳол имкон дорад аз сӯйи кишвари мизбони ин маросим, яъне Арабистони Саудӣ то 20 ҳазор риёл, муодили 5400 доллар, ҷарима шаванд.

Назарҳо ба адои ҳаҷ дар ҷомеаи Тоҷикистон яксон нест. Як гуруҳ ба ин назаранд, ки бо даст додани имконият бояд ин фаризаи диниро иҷро кард, вале гуруҳи дигар пешниҳод мекунанд, ки ба ҷойи ҳаҷ аз ҷумла ҳаҷҷҳои такрорӣ бояд дар дохили кишвар ҷойеро обод кард.

Вазорати корҳои хориҷии Арманистон ба Сафири Русия дар Ереван ёддошти эътирозӣ ё нота супоридааст. Дар ин нота Арманистон аз “изҳороте, ки дар шабакаҳои давлатии Русия садо дод, нигаронӣ кардааст”.

Сухан дар бораи барномаи Владимир Соловев, мубаллиғи рус меравад, ки густариши “Амалиёти махсуси низомӣ”-ро дар кишварҳои Осиёи Марказӣ ва Арманистон аз эҳтимол дур намедонад. Русия ҷангаш дар Украинаро “Амалиёти махсуси низомӣ” медонад.

Вазорати корҳои хориҷии Арманистон ба Сафири Русия гуфтааст, ин ҳарфҳои Соловев “поймол кардани истиқлолияти Арманистон ва дағалона вайрон кардани муносибатҳои дӯстонаи Маскав ва Ереван аст”. Ахиран Владимир Соловев дар як барномаи телевизионӣ гуфт, “минтақаи нуфуз” аз ҳуқуқи байналхалқӣ боло меистад.

Ин ҳарфҳои Владимир Соловев, мубаллиғи рус, дар пасманзари ҳодисаҳои Венесуэла, амалиёти ИМА зидди Николас Мадуро ва вокуниши вазорати корҳои хориҷии Русия садо дод. Рӯзҳои охир мубаллиғони Кремл дар бораи ҳудуди нуфузи абарқудратҳо бештар ҳарф мезананд.

Нахуствазири пешини Гурҷистонро дар ватанаш бо гуноҳи қонунӣ кардани даромадҳои зиёди аз роҳи ғайриқонунӣ ба даст омада ба 5 соли зиндон маҳкум кардаанд. Иракли Гарибашвилӣ, ки раиси собиқи ҳизби ҳокими “Ормони Гурҷистон” буд, ҳамчунин бояд як миллион ларӣ ва ё тақрибан 370 ҳазор доллар ҷарима пардозад.

Айни замон бо амри додгоҳ бояд пулҳоеро, ки “дар натиҷаи фаъолиятҳои ҷиноӣ ба даст омадаанд ва дар хонаи истиқоматии ӯ ёфтаанд”, ба нафъи давлат мусодира шавад ва он ҳам 6.5 миллион доллар будааст.

Радиои "Эхо Кавказа", бо такя ба вакили дифои Иракли Гарибашвилӣ навиштааст, ки ӯро боздоштгоҳ бурдаанд. Ба гуфтаи муфаттишон, Гарибашвилӣ, ки аз соли 2019 то соли 2024 дар мақомҳои вазири дифоъ ва нахуствазир кор кардааст, ҳақ надошт, ҳамчун корманди давлатӣ ба соҳибкорӣ машғул шавад, вале ин корро пинҳонӣ карда ва ғайриқонунӣ даромад гирифтааст.

Дар парванда омадааст, ки ӯ дар эъломияи даромадҳояш, иттилооти дурӯғ нишон дода, аз аъзои хонаводааш ҳадяҳои бузурге ба даст овардааст ва ҳамингуна хостааст, қисме аз онҳо дар ҳаҷми 301 ҳазор долларро қонунӣ кунад.

Эмомалӣ Раҳмон, президенти Тоҷикистон бо имзои чандин амру қарор се муовини вазири корҳои хориҷиро дигар карда ва чандин додрасро ҳам аз мақомҳояшон озод ва ба ҷойи онҳо дигар касро таъйин кардааст.

Дафтари матбуоти раёсати ҷумҳурӣ хабар дод, ки Эмомалӣ Раҳмон рӯзи 12-уми январ бо афроде, ки мансаб гирифтаанд, суҳбат карда ва аз онҳо хостааст, ки “софдилона ва бовиҷдони пок” хидмат кунанд.

Эмомалӣ Раҳмон 22 додрасро ба вазифаҳои нав таъйин карда, вале Саидхоҷа Шарифзода, як додраси додгоҳи Роғунро "барои кирдоре, ки шаъну эътибори додрасро паст мезанад" аз мақомаш барканор кардааст. Аз ин пеш дар рӯзи 4-уми январ Мирзо Одиназода, додраси додгоҳи ноҳияи Исмоили Сомонӣ дар Душанберо аз мақомаш барканор кард. Дар гузашта додрасҳоеро, ки бо сабаб аз кор рондаанд, ба ришвахорӣ муттаҳам кардаву ҷазо ҳам додаанд.

Моҳи январ ва феврал маъмулан мавсими барканорӣ ва ба мансабҳои нав таъйин кардани мансабдорон дар ҳукумати Тоҷикистон аст. Мунтақидон мегӯянд, бештари афрод бо назардошти садоқати шахсӣ ба президент аз як вазифа ба вазифаи дигар мегузаранд.

Чор соли охир бо вуҷуди баста будани марзи Тоҷикистону Қирғизистон, ин маводи сӯхт нисбатан дастрас буд. Бо кушодани шудани марз имсол нархаш боло рафт. Ин ҳолат дар пасманзари камбарқӣ сокинон ва ҳам худи тоҷиронро ба ташвиш овардааст.

Дадобой Юсуфов, ки 5 сол боз ба фурӯши ангишт машғул аст, мегӯяд, имсол дар кораш бебандубориҳо пеш омад. Он ҳам вобаста ба воридоти ангишт аз Қирғизистон. Тоҷири тоҷик, ки роҳу равиши ин корро то ҳадде омӯхта, тиҷораташро хуб ба роҳ мондаааст, гуфт, ба фарқ аз солҳои гузашта, ҳоло ба ҷойи ангишти қирғизӣ ангишти Узбекистонро ба фурӯш гузоштаанд.

Ин ангишфурӯш мегӯяд, бештар маҳсулотро мувофиқ ба ҷайби мардум пешниҳод мекунад ва бо гарон шудани нархи ангишти қирғизӣ имсол аз фурӯши он даст кашидааст. “Яклухт 6 сомонӣ гиред мегӯянд, мо медонем, ки ин нарх хеле гарон аст, мо намехарем. Нархаш туғрӣ намегирад. Мо агар онро оварда фурӯшем ба мо гап мерасад. Гӯё мо онро махсусан қимат кардаем. Мо нархи онро баланд намекунем-ку. Беҳтараш онро намехарем ва намефрӯшем.”- гуфт, Дадобой Юсуфов

Марзи Тоҷикистону Қирғизистон чор соли охир баста буд. Аксари фурушандагони ин навъи сӯзишворӣ мегӯянд, ки то боз шудани он баръакс ангишт барзиёд ва бемонеа ба Тоҷикистон меомаду нархаш ҳам дастрас буд. Аммо акнун вазъ дигар шудааст.

Мирзокамол Раҳматов, тоҷири дигар мегӯяд ангишти Қирғизистон ба воситаи Узбекистон ба Тоҷикистон ворид карда мешуд. “Имсол наомада истодааст. Аз ҳамин ҳисоб қимат аст. Талаботаш аз ҷониби худи халқаш зиёд шудааст ё чизи дигар ман намедонам. Инҷо ҳоло азони Узбекистон зиёд шуд, халқ ҳаминро гирифта одат кард. Сӯхта истодаанд, хуб аст”.

Қирғизистон ним сол пеш содироти ангишти худро манъ кард ва охири имсол ин мамнуият то шаш моҳи дигар дароз карда шуд.

Имсол дар вилояти Суғд аксаран ангишти Узбекистон ва қисман ангишти дохилии Тоҷикистонро фурӯхта истодаанд. Нархи он аз 2 то 4 сомонӣ барои ҳар як кило муайян шудааст. Мирзокамол Раҳматов, ангиштфурӯш гуфт: “Дар ҳар килояш то 3 сомон фарқ карда истодааст. Ангишти Узбекистон назар ба Қирғизистон хеле арзон аст”.

Абдукарим Ғафуров, сокини ноҳияи Бобоҷон Ғафуров, ки нонвойхона дорад мегӯяд, имсол маҷбур шудааст аз ангишти дохилӣ истифода барад. Вай барои истифода дар нонвойхонааш ва сандаливу бухории бобоӣ ба ангишти зиёд ниёз дорад. Гаронии нарх ба кораш таъсири амиқ расонидааст. “Мо ҳоло ангишти Исфараро истифода карда истодаем, сифаташ хеле паст аст. Нархаш ҳам гарон аст. Вай сол ангишти қирғиз 3,5 сомон буд, имсол ангишти Исфара 5 сомонӣ аст. Ангишти қирғиз имсол аз 6 то 7 сомонӣ аст, вале нест”. - афзуд, Абдукарим Ғафуров.

Дар пасманзари маҳдудияти нерӯи барқ дар аксари манотиқи Тоҷикистон ва афзоиши нархи он, камбуди ангишти қирғизӣ низ мардумро нигарон кардааст. Ангиште, ки нисбатан хушсифат ва камзарар будааст.

Аз сифати ангишти Узбекистон ва Тоҷикистон сокинон розӣ нестанд ва мегӯянд, аз истифодаи ин навъи ангишт, ки бехатар нест ҳарос доранд. Аммо бо ин вуҷуд ноилоҷ аз он истифода мебаранд.

Ҳукумати ҷумҳурии исломӣ хушунатҳои баамаломадаро ба рафтори гуруҳи ДОИШ ташбеҳ додааст. Мақомот ва расонаҳои давлатӣ дар тайи се рӯзи ахир дар гузоришҳои худ эътирозгаронро “террористони мусаллаҳ” хонда, ба таҷаммуи мардуми зиёд бо талаби тағйири низом дар Эрон ишорае намекунанд.

Раисҷумҳур Масъуд Пизишкиён низ рӯзи якшанбе дар гуфтугӯ бо телевизиони давлатии Эрон, эътирозгаронро “террорист” хонда, хостори бархӯрди нерӯҳои амниятӣ бо онҳо шудааст.

Ба далели қатъи саросарии интернет дар Эрон дақиқ нест, ки шумори қурбониёни эътирозҳо дар саросари ин кишвар ба чӣ теъдод расидааст. Созмонҳои ҳуқуқи башар бо такя ба манобеи худ оморҳои гуногуни қурбониёро пешниҳод мекунанд.

Дар ҳамин ҳол, мақомоти Эрони истифодаи аз ҳад зиёди нерӯ ё афзоиши саркӯбу хушунат алайҳи эътирозгаронро тасдиқ карданд. Аҳмадризо Родон, фармондеҳи куллӣ пулиси Эрон гуфт, ин кор дар ҳамоҳангӣ бо нерӯҳои амниятӣ ва мақомоти қудратӣ сурат гирифт.

Бино ба хабари Радиои Фардо- Бахши форсии Радиои Озодӣ Аҳмадризо Родон гуфтааст, "бар асоси хулосаҳои ташхиси додгоҳӣ-тиббӣ, қисми зиёди кушташудаҳо аз силоҳи сард ва захми корд ба ҳалокат расидаанд".

Мақомоти Эрон шумори кушташудагонро эълон намекунанд ва ба иддаои онҳо, худи эътирозгарон омили барангехтани хушунатҳо шудаанд.

Ин дар ҳолест, ки дар навору гузоришҳои зиёде, ки дар шабакаҳои иҷтимоӣ нашр шуд, дида мешавад, ки нерӯҳои амниятии Эрон ба сӯйи эторозгарон тир холӣ мекунанд. Радиои Фардо ва шабакаи телевизионии CNN бо истинод ба шоҳидони воқеа хабар доданд, ки беморхонаҳо пур аз захмиву қурбониён шудаанд.

Як масъул аз ҷамоати деҳоти Файзи Истиқлоли ноҳияи Вахш бо тасдиқи ин хабар ба Радиои Озодӣ гуфт, “зан аз ин ноҳия буда” ҷанозаи ӯ ва ду аъзои дигари оилааш дар хонаи шавҳараш баргузор шудааст, ки аз ноҳияи Кушониён аст.

Ба гуфтаи мақомоти ноҳияи Вахш, онҳо аз дуди ангишт ба ҳалокат расидаанд.

Ҳодиса 7-уми январ дар шаҳри Самараи Русия рух додааст. Яке аз дӯстони марди фавтида рӯзи 11-уми январ ба Радиои Озодӣ гуфт, наздикони Алӣ аз марги ӯ ва ҳамсару духтараш як рӯз баъд огоҳ шудаанд. "Алӣ ва ҳамсару духтараш аз газ заҳролуд мешаванд. Хешу табор аз Тоҷикистон як рӯз занг мезананд, аммо ба зангҳояшон касе ҷавоб намедиҳад. Як рӯз баъд наздикони Алӣ, ки дар Самара буданд ба хонааш мераванд ва дарро шикаста медароянд. Маълум шуд, ки баъди заҳролуд шудан аз газ, Алӣ аз хоб бедор шуда, кӯшиш мекунад дари ҳаммомро кушояд, аммо ҳамонҷо мефавтад. ", - гуфт яке аз дӯстони марди фавтида.

Ба гуфтаи ин мусоҳиби Радиои Озодӣ, соли гузашта дар пайи сӯхтор дар манзили ҳамин оила дар Самара писари сесолаи Алӣ ба ҳалокат расида буд. Баъди ин ҳодиса, ҳамсари Алӣ пойфишорӣ доштааст, ки ба Тоҷикистон баргарданд.

Русия макони кору зиндагии ҳазорон муҳоҷир аз Тоҷикистон аст. Солона наздики ҳазор тоҷикистонӣ аз беморӣ ё дар ҳодисаҳои нохуш дар Русия мефавтанд.

Ба иттилои Кумитаи миллии олимпии Тоҷикистон, чаҳор варзишгари тоҷик дар намуди лижаронии кӯҳӣ барои ба даст овардани роҳхатҳо ба Бозиҳои XXV зимистонаи олимпӣ, ки рӯзҳои 6-22-юми феврал дар шаҳрҳои Милано ва Кортина-д’Ампетсои Италия доир мегарданд, талош доранд. Мусобиқаҳои интихобӣ то охири моҳи январ идома меёбанд.

Дар ин бозиҳо иштироки наздики 3000 варзишгар аз 91 кишвар дар назар аст, ки барои 116 маҷмуи медалҳо мубориза мебаранд. Варзишгарони Бенин, Гвинея-Бисау ва Имороти Муттаҳидаи Арабӣ бори аввал дар Бозиҳои олимпии зимистона иштирок хоҳанд кард.

Ба барномаи бозиҳо ҳашт намуди варзиш: биатлон, бобслей, кёрлинг, конкитозӣ, лижаронӣ, чанатозӣ, ҳоккей ва лижаронии кӯҳӣ ворид шудааст.

Бори охир варзишгарони тоҷик соли 2014 дар Бозиҳои зимистонаи олимпии Сочи ширкат карда буданд. Аммо Олимпиадаҳои зимистонаи соли 2018 дар Пйонгчанги Кореяи Ҷанубӣ ва соли 2022 дар Пекини Чин бе иштироки намояндагони Тоҷикистон гузаштанд.

Рӯзҳои 22-30-юми апрел дар шаҳри Санйаи Чин Бозиҳои VI соҳилии осиёӣ баргузор мешаванд. Дарвоқеъ, ин бозиҳо пас аз 10 соли танаффус доир мегарданд. Охирин маротиба ин чорабинӣ соли 2016 дар Ветнам баргузор шуда буд.

Ба барномаи 6-умин Бозиҳои соҳилии осиёӣ дар Санйа 14 намуди варзиш ворид аст: баскетбол (3х3), варзишҳои обӣ (шиноварии озод, тӯббозӣ дар об), акватлон, варзиши сабуки соҳилӣ, ҳандболи соҳилӣ, кабаддии соҳилӣ, футболи соҳилӣ, волейболи соҳилӣ, гуштии соҳилӣ, қайиқи дракон, ҷиу-ҷитсу, заврақронӣ, шӯхпаймоӣ ва текбол.

Дастаи мунтахаби олимпии Тоҷикистон дар риштаҳои баскетбол, футболи соҳилӣ, волейболи соҳилӣ, гуштии соҳилӣ ва ҷиу-ҷитсу ширкат хоҳад кард.

Тими миллии футболи Тоҷикистон муборизаро барои роҳхат ба Ҷоми Осиё-2027 идома медиҳад. Дар гурӯҳи “А” охирин бозиҳо 31-уми март баргузор мешаванд. Мунтахаби Тоҷикистон дар ин рӯз дар Варзишгоҳи марказии шаҳри Ҳисор бо тими миллии Филиппин рақобат мекунад. Алъон ҳарду даста 13-имтиёзӣ доранд ва барои роҳхат ба Ҷоми Осиё-2027, ки дар Арабистони Саудӣ баргузор мешавад, талош меварзанд.

Дастаи “Истиқлол”-и Душанбе, қаҳрамони феълии Тоҷикистон, дар марҳилаи гурӯҳии Лигаи даъвати AFC (Конфедератсияи футболи Осиё)-2026/27 иштирок менамояд. Бозиҳо ба таври мутамарказ аз 17-ум то 24-уми октябр баргузор мегарданд. Ғолиби мусобиқа ба Лигаи қаҳрамонҳои дуи AFC дар мавсими 2027/28 роҳ меёбад.

Тирамоҳи имсол се чорабинии маҷмуии варзишӣ ба нақша гирифта шудааст. Нахуст, аз 19-уми сентябр то 4-уми октябр дар шаҳрҳои Нагая ва Аичии Ҷопон Бозиҳои XX осиёӣ доир мешаванд. Ба барномаи бозиҳо 42 намуди варзиш ворид шудааст ва варзишгарон аз 45 кишвари қора, аз ҷумла Тоҷикистон, барои 460 маҷмуи медалҳо мубориза хоҳанд бурд.

Баъдан, аз 31-уми октябр то 13-уми ноябр пойтахти Сенегал – шаҳри Дакар - Бозиҳои IV олимпии наврасонро мизбонӣ мекунад. Ин аввалин бор аст, ки як кишвари африқоӣ бозиҳои олимпиро мегузаронад.

Ба барномаи бозиҳо 25 намуди варзиш ворид аст ва дар мусобиқот наздики 3000 варзишгари то 17-сола ширкат мекунанд. Имсол тартиби нави интихоби варзишгарон ба Бозиҳои олимпии наврасон роҳандозӣ мешавад. Қаблан варзишгарон роҳхат мегирифтанд, ҳамакнун бо тасмими Кумитаи байналмилалии олимпӣ иштироккунандагони Бозиҳои олимпии наврасонро федератсияҳои байналмилалӣ дар асоси радабандии ҷаҳонӣ интихоб менамоянд.

Мавсими варзишии соли 2026 бо Бозиҳои осиёӣ дар иншооти сарпӯшида ва ҳунарҳои размӣ ба поён мерасад. Ин чорабиниро аз 28-уми ноябр то 7-уми декабр Арабистони Саудӣ мизбонӣ мекунад. Дар бозиҳо иштироки варзишгарон аз 45 кишвари Осиё, аз ҷумла Тоҷикистон, инчунин кишварҳои Уқёнус дар назар аст.

Дар баробари бозиҳои маҷмуӣ имсол даҳҳо мусобиқаи анъанавӣ дар риштаҳои алоҳидаи варзиш баргузор мешаванд. Аз он ҷумла, соли равон аз рӯйи бисёр намудҳои варзиш мусобиқаҳои интихобӣ ба Бозиҳои олимпии соли 2028 оғоз меёбанд.

Мусобиқаҳои қаҳрамонии ҷаҳон дар риштаи ҷудо рӯзҳои 4-11-уми октябр дар Бокуи Озарбойҷон, дар намудҳои гуштии озод ва юнону румӣ 13-21-уми сентябр дар Загреби Хорватия, дар риштаи қайиқронӣ дар байдарка ва каноэ 26-30-юми август дар Познани Полша (Лаҳистон), дар намуди тенниси рӯйи миз 1-10-уми май дар Лондони Англия доир мегарданд, ки дар онҳо иштироки варзишгарони тоҷик низ дар назар аст.

Дар пайи заҳролуд шудан аз газ, як марди тоҷик бо ҳамсар ва духтари панҷсолааш дар шаҳри Самараи Русия ба ҳалокат расидаанд. Ҳодиса 7-уми январ рух дода, наздикони мард танҳо як рӯз баъд аз он хабардор шудаанд.

Яке аз дӯстони марди фавтида 11-уми январ ба Радиои Озодӣ гуфт, ҷасади Алӣ ва ҳамсару духтарашро имрӯз ба Тоҷикистон мефиристанд. Фавтидагон сокинони маҳаллаи Туркманистони шаҳри Бохтар будаанд.

"Рӯзи 7-уми январ Алӣ ва ҳамсару духтараш аз газ заҳролуд мешаванд. Хешу табор аз Тоҷикистон як рӯз занг мезананд, аммо ба зангҳояшон касе ҷавоб намедиҳад. Як рӯз баъд наздикони Алӣ, ки дар Самара буданд ба хонааш мераванд ва дарро шикаста медароянд. Маълум шуд, ки баъди заҳролуд шудан аз газ, Алӣ аз хоб бедор шуда, кӯшиш мекунад дари ҳаммомро кушояд, аммо ҳамонҷо мефавтад. Ҳамсараш низ ҳомиладор буд", - гуфт яке аз дӯстони марди фавтида.

Ҳамсуҳбати мо гуфт, соли гузашта дар пайи сӯхтори манзилашон дар Самара писари сесолаи Алӣ ба ҳалокат расида буд. Баъди ин ҳодиса, ҳамсари Алӣ пойфишорӣ доштааст, ки ба Тоҷикистон баргарданд.

"Алӣ дар яке аз баландошёнаҳои Бохтар хона харида буд ва ин оила мунтазири тамом шудани таъмири хона буданд. Аммо имрӯз ҷасадашонро мефиристем", - гуфт дӯсти Алӣ.

Русия макони кору зиндагии ҳазорон муҳоҷир аз Тоҷикистон аст. Солона наздики ҳазор тоҷикистонӣ аз беморӣ ё дар ҳодисаҳои нохуш дар Русия мефавтанд.

Президенти ИМА Доналд Трамп зимни вохӯрӣ бо роҳбарони ширкатҳои нафтӣ дар Кохи Сафед бори дигар гуфт, назорат бар Гренландия барои амнияти миллии ИМА зарур аст.

Трамп 9-уми январ гуфт, "агар мо ин корро накунем Русия ва Чин назорати Гренландияро ба даст мегиранд. Мо намехоҳем, ки Русия ва Чин дар ҳамсоягии мо бошанд".

Раиси ҷумҳури Амрико ҳамчунин ҳаққи Дания бар ҷазираи Гренландияро зери суол бурда афзуд, "500 сол пеш омадани қаиқе ба инҷо" маънои онро надорад, ки ҷазира моли Дания аст.

Неруҳои амрикоӣ дар асоси созиш бо Дания дар Гренландия ҳузур доранд, вале Доналд Трамп инро нокофӣ мехонад.

Изҳоротҳои батакрори Доналд Трамп дар бораи зери назорат гирифтани Гренландия нигаронии ҷиддии роҳбарони Аврупоро ба миён овардааст.

Гренландия, бузургтарин ҷазира дар дунё дар шимолу шарқи қораи Амрико ҷойгир аст ва он аз ҷониби Дания, як кишвари аврупоӣ идора мешавад.

Шоми 10-уми январ вилояти Воронежи Русия ҳадафи ҳамлаи паҳпод ё ҳавопаймоҳои бесарнишини Украина қарор гирифт.

Мақомоти вилоят гуфтанд, дар натиҷаи таркиши як паҳпод 5 хона зарар дидааст. Шоҳидон аз 25 таркиш дар гӯшаҳои Воронеж хабар доданд.

Александр Гусев, волии Воронеж хабар додааст, ки дар пайи ин ҳамлаҳо 2 нафар захмӣ шудаанд.

Ба навиштаи телеграм-канали "База", дар пайи ҳамлаи паҳподҳо чор нафар бо ҷароҳатҳои гуногун дар бемористон бистарӣ шуданд. Вазъи ду нафари онҳо вазнин гуфта мешавад.