Дар чанд ҷумла
“Аз ҳарду кишвар як хоҳиши сода дорем: Ба ҷанг дода нашавед”
Пас аз ҳодисаи рӯзи 22-юми апрел дар Кашмир таниш миёни Ҳиндустону Покистон афзоиш ёфта, нигарониҳо аз ҷанг миёни ду кишвари дорои силоҳи ҳастаӣ бештар гаштааст.
Ҳафтаи гузашта гурӯҳи мусаллаҳе дар минтақаи сайёҳии Пахалгамии Кашмир, ки зери назорати Ҳиндустон аст, 26 сайёҳро куштанд ва 17 танро захмӣ карданд.
Ҳиндустон инро кори дасти гурӯҳҳои зери назорати Покистон номид. Покистон рад кард, аммо хатари эҳтимолии ҷанг аз байн нарафтааст.
Ин вазъ бештар зиндагии мардум, аз ҷумла кишоварзонро хароб кард. Деҳқонони деҳаи Вагаҳ аз тарси ҷанги эҳтимолӣ ҳанӯз ба ҷамъоварии ҳосил оғоз накардаанд. Мақомот ҳам иҷоза намедиҳанд, ки онҳо дар саҳро кор кунанд.
Деҳқон Муҳаммад Адолат Сардор гуфт: "То гандум ба ҳосил расидан мо шаш моҳ заҳмат мекашем, об медиҳем, вале саривақт нағундоштани ҳосил зарари зиёд меорад. Аз ҳарду кишвар як хоҳиши сода дорем: Ба ҷанг дода нашавед. Ин беҳтарин кор барои ҳама аст”.
Кишоварзон нигаронанд, ки тӯлонӣ шудани маҳдудият ба онҳо зиёни ҷуброннопазир мерасонад.
Муҳаммад Зишан, кишоварз, гуфт, “вақти ҳосилғундорӣ мегузарад, вале ҷавонони мо дар кӯчаҳо ба бозӣ машғуланд. Маҳдудият ба ҳама зиён мерасонад.”
Ҳиндустону Покистон минтақаи Кашмирро аз худ медонанд ва қисматҳое аз онро ду кишвар назорат мекунанд. Солҳост, ки вазъ дар ин минтақа ҳассос аст ва хатари ҷанг миёни ду кишварро, ки бомбаи атомӣ доранд, бештар мекунад.
Видеоро дар инҷо бинед:
Ҳамаи хабарҳои имрӯзро дар инҷо бихонед
Дар Узбекистон ба мансабдорони китобхон мукофотпулӣ медиҳанд
Ба кормандони давлатӣ дар Узбекистон барои мутолиаи китоб мукофотпулӣ дода мешавад. Дар ин бора Вазорати адлияи ин кишвар хабар додааст.
Ин иқдом бо қарори раиси ҷумҳур, Шавқат Мирзиёев гирифта шудааст. Бино ба қарор “дар бораи тадбирҳои рушди фарҳанги китобхонӣ ва ҷалби таваҷҷӯҳи мардум ба китоб", мақомоти Узбекистон ният доранд, ки дар солҳои 2026-2030 шумораи миёнаи китобҳои хондашударо барои ҳар як нафар ба даҳ адад расонанд.
Дар доираи ин барнома дар вазорату идораҳо сабқати китобхонӣ баргузор ва ба ғолиби озмун, ба андозаи як маоши моҳонааш ҷоизапулӣ дода мешавад.
Ҳамчунин бо дастури раиси ҷумҳур то 1 -уми апрел бояд тамоми корхонаҳои давлатӣ соҳиби гӯшаи китоб шаванд ва барои кормандон “соати китобхонӣ” ташкил кунанд.
Дар назар аст барои мактаббачаҳо ва донишҷӯёне ҳам, ки ба рӯйхати 100 китобхони беҳтарин шомил мешаванд, мукофоти пулӣ пешниҳод шавад. Ба донишомӯзон 856 доллар ҷоизапулӣ дода хоҳад шуд.
Президенти Узбекистон ба қонуне имзо гузоштааст, бар асоси он ба маҳбусон ҳам имкон дода мешавад бо хондани китоб аз рӯйхати таҳияшуда, муҳлати ҷазоро кам кунанд. Шахсоне, ки ба ҳабси абад маҳкум шудаанд аз ин имтиёз маҳрум хоҳанд буд.
Ба иттилои хабаргузории Kun.uz, бар асоси дастури нав барои мутолиаи ҳар як китобе, ки муҳтавояш ба рушди "арзишҳои дурусти маънавию ахлоқӣ" нигаронида шудааст, мӯҳлати ҷазои зиндониён се рӯз кам карда мешавад.
Марги асроромези Оиша.Заҳролуд шуд ё ӯро куштанд?
Волидони як ҷавонзани фавтида дар ноҳияи Абдураҳмонӣ Ҷомӣ иддао доранд, ки духтарашон бар асари шиканҷа дар хонаи шавҳар фавтидааст. Онҳо дар марги Оиша Каримоваи 23-сола шавҳари ӯро гунаҳкор медонанд, ба қавли онҳо, дар гузашта низ чанд дафъа ба ҳамсараш бадрафторӣ кардааст.
Мадина Салимова, модари Оиша Каримова дар сӯҳбат бо Озодӣ гуфт: "Се бор ҳамин хел духтари маро қуртуқҷаф кардагӣ буд. Арӯсаки якмоҳа буд ҳамин хел кард, беморхона бурданд. Як бори дигар дар Федератсияи Русия ҳамин хел кард. Сеюмбора духтарамро кушт."
Волидони Оишаи марҳум мегӯянд, қабл аз дафни духтарашон дар ҷисми ӯ нишонаҳои латукӯб ва шиканҷаро дидаанд. Чанд акс ҳам аз осори шиканҷа дар бадани духтарашон дар даст доранд. Амирҷон Каримов, падари Оиша гуфт: "Дар гарданаш пайи буғӣ кардан ҳаст, аз гулуяш қапида, буғӣ кардааст. Баданаш ҳама сип-сиёҳ, кабуд, кандагӣ. Нишонаҳои қатлаш бисёр аст".
Ба нақли волидон ҷасади Оишаро муоинаи тиббӣ-судӣ кардаанд, аммо бо гузашти даҳ рӯз ҳанӯз хулосаро ба онҳо нишон надодаанд. Танҳо табибон ба онҳо гуфтаанд, ки духтаратон аз дуди движок ё генератор дар ҳаммом фавтидааст: "Вақте ки ба беморхона меоранд, аллакай вайро барвақт ҷонаш баромадагӣ. Табибон гуфтанд, аз дуди движок заҳролуд шуда, мурдааст",- нақл кард, Амирҷон Каримов, падари Оиша.
Вале то ҳол ҳеҷ санади расмие ба хонаводаи марҳум пешниҳод накардаанд, ки марги ӯро аз дуди генератор собит кунад.
Тамосҳои батакрори мо бо бемористон ва мақомоти додситонӣ бепосух монд. Падари ҷавон бо шунидани пурсиш атрофи ин қазия гӯширо хомӯш кард.
Сартабиби Бемористони марказии ноҳияи Абдураҳмони Ҷомӣ низ гуфт, баъдан тамос гиред, вале дигар ба зангҳои мо посух надод. Танҳо яке аз наздикони хонаводаи шавҳари Оиша иддаои аз шиканҷа фавтидани ӯро беасос хонда, гуфт, ҳангоми шустушӯ дар ҳаммом, ки он ҷо генератор кор мекардааст, заҳролуд шуда, фавтидааст.
Бо ин ҳол наздикони Оиша мунтазири хулосаи тиббии додгоҳӣ ҳастанд. Амирҷон Каримов, падари Оиша мегӯяд, ҳоло фақат як хоҳиш дорад: " Ҳамин қотил дар назди қонун бо адолат ҷавоби худашро диҳад. Ҷазо дода шавад."
Оиша ва шавҳараш Давлатёр дар 5 соли зиндагии муштарак соҳиби як писар шудаанд. Шавҳараш ба муҳоҷиратӣ меҳнатӣ рафта, ба қавли модари Оиша чанде пеш аз Русия баргашт ва зиндагияшон миёна доштанд.
Ин бори аввал нест, ки волидон аз марги духтаронашон бар асари шиканҷа дар хонаи домод шикоят мекунанд. Чунин нигарониҳо дар ҳоле садо медиҳанд, ки шиканҷа нисбати занҳо бештар шудааст.
Ба иттилои расмӣ, дар нимаи аввали соли сипаришуда 763 зан аз хушунат шикоят кардаанд, ки аз ҳамин давраи соли 2024 дида, 256 ҳолат бештар аст.
Як пажӯҳиши Барномаи Рушди Созмони Милал дар гузашта нишон додааст, ки 67 дарсад дар Тоҷикистон ба ин боваранд, ки зӯроварӣ ба зан дар оила як кори маъмулист ва мақомот ба таҳқиқи чунин парвандаҳо талоши зиёд надоранд.
Додгоҳ Тимошенкоро бар ивази гаравпулӣ озод кард
Додгоҳе дар Киев қарор кард, ки Юлия Тимошенко, сарвазири собиқи Украина бар ивази пардохти 33 миллион гривен ё тақрибан 760,000 доллар гаравпулӣ дар озодӣ бимонад. Додситон як миллион доллар талаб карда буд.
Тимошенко дар додани ришва ё имтиёз ба вакилони порлумони Украина бар ивази овоздиҳӣ ба тарҳҳои муайяни қонун гумонбар дониста мешавад.
Ҳукми додгоҳ, рӯзи 16-уми январи соли 2026 эълон шуд. Ба иттилои "Маркази мубориза бо ришваситонӣ”, сиёсатмадор бояд баробари иваз кардани суроғаи зист, мақомотро огоҳ кунад ва аз тамос бо аксар вакилони порлумон худдорӣ намояд. Вай ҳамчунин ҳақ надорад Киевро тарк кунад.
Тимошенко гуфта буд, ки суратҳисобҳояшро пеш аз содир шудани қарори додгоҳ бастанд ва имкони пардохти гаравпулиро надорад.
Қабл аз мурофиа Тимошенко, парвандаро фармоишӣ ва “сирф сиёсӣ” хонд. Дар посух ба суоли хабарнигорон, ки оё ба вакилон пул пешниҳод карда буд ё на, вай гуфт, “Ҳаргиз дар ҳаётам чунин гуфтугӯе сурат нагирифтааст.”
Юлия Тимошенко, раҳбари ҳизби мухолифи “Баткившина” ва се карат номзад ба мақоми раёсати ҷумҳурӣ, ҳама гуна иттиҳоми қонуншиканиро рад карда, ваъда дод, ки бегуноҳии худро исбот хоҳад кард.
Тимошенко соли 2011 дар давраи президентии Виктор Янукович дар берун рафтан аз салоҳиятҳои худ ҳангоми имзои созишномаи газ бо Русия айбдор ва 7 сол зиндонӣ шуд. Ӯ соли 2014, баъди фирори Янукович аз Украина озод шуд. ИМА ва Иттиҳоди Аврупо он замон парвандаи Тимошенкоро "сиёсӣ" номида буданд.
Кавказ.Реалии: Корвони мошинҳои Адам Қодиров дучори садама шуд
Писари Рамазон Қодиров, раҳбари ҷумҳурии Чеченистон дар пайи як садама ба беморхонаи шаҳри Грозний интиқол ёфтаст. Дар ин бора тарҳи Кавказ.Реалии бо истинод ба ду манбаи худ ва саҳфаи мухолифони чечен хабар додааст. Яке аз мусоҳибони ин расона гуфт, роҳ то беморхонае, ки Адам (Одам) Қодировро мебурданд, баста буд.
Бино ба гузориши телеграм- канали мухолифин — NIYSO, корвони мошинҳои Одам Қодиров “бо суръати баланд ҳаракат мекард” ва ба монеае дучор шуд. “Дар натиҷа мошинҳо ба ҳам бархурда, хабарҳо мерасанд, ки осебдидагон кам нестанд”
Аз ин пеш гуфта мешуд, ки Қодиров дар ҳолати вазнин қарор дорад.
Адам (Одам) Қодирови 18-сола, писари Рамзан Қодиров, дабири Шӯрои амнияти Чеченистон аст. Ӯ ҳамчунин раёсати Хадамоти амнияти падарашро бар ӯҳда дорад. Соҳиби унвони Қаҳрамони Ҷумҳурии Чеченистон, ҷоизаи олии ҷумҳурӣ - ордени Қодиров ва ҳадди аққал шаш ордени дигар аст.
Аксари ин ҷоизаҳоро Одам Қодиров баъди он соҳиб шуд, ки дар боздоштгоҳ Никита Журавел, ҷавонеро, ки китоби Қуръонро сӯзонда буд, латтукуб намуд.
Ду марг аз заҳри ангишт дар як ҳафта
Як духтари 15-сола дар шаҳри Ваҳдат ва духтарчаи дигари 4-сола дар ноҳияи Айнӣ аз дуди ангишт заҳролуд шуда, ба ҳалокат расидаанд. Ҳодисаи аввал рӯзи 14-уми январ дар деҳаи Зарафшон ва дувум 8-уми январ дар деҳаи Қумарғи Айнӣ рух додаанд.
Дар ҳодисаи аввал ҳамчунин хоҳари ин духтар ва дар воқеаи дувум дигар аъзоҳои оила низ заҳролуд шудаанд.
Як манбаъ дар ҳукумати шаҳри Ваҳдат 16-уми январ ба Радиои Озодӣ гуфт, хоҳари духтари ҳалокшударо "дар ҳолати беҳушӣ ба беморхона бурданд ва аҳволи ӯ хуб аст".
Раёсати ҳолатҳои фавқулодаи вилояти Суғд, воқеаи 8-уми январ дар ноҳияи Айниро тасдиқ кард. Маълум нест, вазъи заҳролудшудагони дигар дар ин ҳодиса чӣ гуна аст.
Дар Тоҷикистон, ки сокинон дар тирамоҳ ва зимистон бо маҳдудият барқ мегиранд, маҷбур мешаванд, бо ангишт хонаҳоро гарм кунанд. Тақрибан ҳар сол дар пайи заҳролуд шудан аз дуди ангишт нафаре ё гоҳе ҳамаи аъзои оила ҷон медиҳанд.
Занозании хонандагони ду мактаб дар Душанбе
Хонандагони ду мактаб дар шаҳри Душанбе бо ҳам занозанӣ кардаанд. Ба гуфтаи манобеи Радиои Озодӣ, муноқиша рӯзи 13-уми январ миёни хонандагони мактабҳои рақами 123 ва 129 рух додааст. Ҳардуи ин мактабҳо дар ҳудуди ноҳияи Фирдавсии шаҳри Душанбе ҷойгир шудаанд. Мақомот аз шарҳи ҳодиса худдорӣ мекунанд.
Ба гуфтаи як манбаи огоҳ аз ҳодиса, хонандагонии ду мактаб бар сари хариди кабӯтар ё кафтар бо ҳам занозанӣ кардаанд. Ҳодиса баъди соати дарсӣ рух додааст. Дар ин ҳодиса наврасон аз корд истифода бурдаанд. Як хонандаи мактаби рақами 129 захмдор шуда, дар беморхона бистарӣ шудааст.
Мудири мактаби 129, ки хонандагонаш дар ин занозанӣ ширкат карданд гуфт, аҳволи хонандаи кордхӯрда хуб аст ва захмаш чандон вазнин нест.
Манобеи Радиои Озодӣ дар Раёсати маорифи шаҳри Душанбе гуфтанд, дар пайи ин занозанӣ ҳадди ақал як хонандаи мактаб боздошт шудааст ва чанд хонандаи дигар бозпурсӣ мешаванд.
Раёсати корҳои дохилии Душанбе то ин лаҳза ҳодисаро шарҳ надодааст.
Муноқишаи наврасон дар Тоҷикистон ҳодисаи нав нест. Рӯзи 9-уми октябри соли 2025 дар пайи кашокаши наврасон дар Душанбе Алӣ Раҷабов, як навраси 16-сола кушта шуд. Дар ин муноқиша як навраси дигар захмӣ ва понздаҳ нафар дастгир шуданд. Ҳамчунин шаби 11-уми январи имсол дар занозании як гуруҳи наврасон дар шаҳри Кӯлоб варзишгари 19-сола Муҳаммадалӣ Саъдуллоев кушта шуд.
Як намояндаи Раёсати маорифи шаҳри Душанбе 15-уми январ бо шарти зикр нашудани номаш ба Радиои Озодӣ гуфт, "истифодаи нодуруст аз шабакаҳои иҷтимоӣ ва ҳузури наврасон дар марказҳои компютерӣ" аз сабабҳои асосии зиёд шудани занозанӣ миёни наврасон аст.
Барои пешгирӣ аз ҷанҷол байни наврасон ва кордзании онҳо, дар чанд соли охир дар мактабҳо муҳофиз гузошта шуд, рафтани наврасон ба маркази бозиҳои компютерӣ манъ шуд, садҳо падару модарро барои бемасъулиятӣ дар тарбияи фарзанд ҷазо доданд ва ҳамчунин мақомот амалиёти “Корд”-ро роҳандозӣ карда, аз боздошти наврасону ҷавонон бо корду силоҳҳои сард хабар доданд. Аммо баъди ин ҳама талошҳо боз ҳам ҷанҷолу кордкашии наврасон рух медиҳад.
Дар Тоҷикистон Фестивали бозиҳои миллии варзишӣ доир мешавад
Моҳи сентябр дар Тоҷикистон Фестивал ё Ҷашнвораи бозиҳои миллии варзишӣ баргузор мегардад.
Ин ҷашнвора дар асоси "Ҷадвали баргузории ҷашну солгард, фестивал, намоиши иду озмунҳои фарҳангию маърифатӣ ва анъанаҳои мардумӣ дар Ҷумҳурии Тоҷикистон барои соли 2026", ки онро президенти кишвар тасдиқ намудааст, доир карда мешавад.
Барои баргузории ин чорабинии оммавии варзишӣ Кумитаи кор бо ҷавонон ва варзиш ва Кумитаи миллии олимпӣ дар якҷоягӣ бо федератсияҳои миллии варзишӣ, Вазорати маориф ва илм, кумитаҳои таҳсилоти ибтидоӣ ва миёнаи касбӣ, телевизион ва радио, Донишкадаи тарбияи ҷисмонӣ ва мақомоти иҷроияи ҳокимияти давлатии вилоятҳо ва шаҳру ноҳияҳо муваззаф шудаанд.
Гуфта мешавад, Фестивали бозиҳои миллии варзишӣ бо мақсади эҳё, рушди бозиҳои миллии варзишӣ ва тарбияи насли наврас дар руҳияи эҳтиром ва арҷгузорӣ ба таъриху анъанаҳои миллии аҷдодон, ҳамзамон таҳкими тарзи ҳаёти солим, ҳисси худшиносию худогоҳӣ, зиракии сиёсӣ ва пешгирии омилҳои номатлуб дар байни наврасону ҷавонон баргузор мегардад.
Ба барномаи Фестивали бозиҳои миллии варзишӣ гуштигирӣ, чавгонбозӣ, шиноварӣ, вазнабардорӣ (сангбардорӣ), дастхобонӣ, варзиши сабук (давидан ба масофаҳои мухталиф), шоҳмот, бандкашӣ ва ғайра дохиланд.
Бояд зикр намуд, нахустин Фестивали бозиҳои миллии варзишӣ моҳи сентябри соли 2016 доир гардида буд. Ба барномаи фестивал ба ғайр аз намудҳои миллии варзиш, инчунин бозиҳои намоишӣ – хурӯсҷанг, чиликдангал, ланкабозӣ, буҷулбозӣ, камонғулак, фалахмонбозӣ, ҳойталак ва бандпарак шомил буданд.
Таҳрими панҷ мақомдори эронӣ аз сӯи ИМА
Иёлоти Муттаҳидаи Амрико алайҳи панҷ мақомдори эронӣ таҳрим карда, онҳоро ба саркӯби эътирозгарон гунаҳкор кард. Бино ба гузориши Вазорати молия ё хазонадории Амрико, ба рӯйхати таҳримҳо, аз ҷумла Алии Лориҷонӣ, дабири кулли Шӯрои олии амнияти миллӣ шомил шудаанд.
Мақомоти амрикоӣ мегӯянд, Алии Лориҷонӣ масъул ва ҳамоҳангсози саркӯби эътирозгарон аст. Ҳамчунин чор фармондеҳи минтақавии пулис ва Сипони посдорон дар вилоятҳои Луристон ва Форс низ ба рӯйхати сиёҳи Амрико илова шуданд.
Вазорати хазонадории Амрико гуфтааст, ин фармондеҳон алайҳи эътирозгарон аз хушунат истифода бурда, норозиёнро куштаанд. “Аз замони оғози эътирозҳо дар моҳи декабри соли 2025 мақомоти қудратии Эрон аз силоҳҳои ҷангӣ истифода бурда, мардумро аз ҳаққи зиндагӣ ва озодӣ маҳрум карданд”, - омадааст дар хабарномаи Вазорати хазонадории Амрико.
Иёлоти Муттаҳида ҳамчунин чанд нафарро барои давр задани таҳримҳо ва фурӯши нафти Эрон таҳрим кард.
Навраси тоҷик дар Русия 5 сол аз озодӣ маҳрум шуд
Додгоҳе дар Русия як зодаи 17-солаи Тоҷикистонро бо иттиҳоми узвият дар гуруҳи тундрави “Давлати исломӣ” панҷуним сол аз озодӣ маҳрум кард.
Расонаҳои русӣ, 15-уми январ навиштанд, ин зодаи Тоҷикистон ба гуруҳи тундрави “Давлати исломӣ” савганди садоқат ёд карда, дар телеграм-каналаш ба тарафдории террористон таблиғот бурдааст.
Падари ин наврас пеш аз содир шудани ҳукм аз додгоҳ хостааст, ки писарашро ҷазои сахт надиҳанд. Ба гуфтаи падари наврас, ӯ аз он ҳайратзада шудааст, ки писараш мехост, ба Афғонистон равад. Бо қарори додгоҳ ин наврас панҷуним солро дар муассисаи ислоҳотии тарбиявӣ мегузаронад.
Бо қарори Додгоҳ, наврас ҳамчунин ҳақ надорад баъди озод шудан, давом се сол сомонаҳои интернетиро мудирият кунад. Дар ҳоле, ки назари навраси ҳабсшуда ва наздиконаш ба қазия маълум нест, додситон гуфтааст ӯ гуноҳро пурра эътироф кардааст.
Дар гузашта низ зодагони Тоҷикистон бо гуноҳи узвият дар созмонҳои террористӣ дар Русия зиндонӣ шудаанд. Аммо наздикони бархе аз онҳо ба бегуноҳии азизонашон таъкид карданд.
"Ҷасадҳоро намедиҳанд". Дидаву шунидаҳои мусофирони аз Эрон омада
Дар шароите, ки мақомоти Эрон интернетро қатъ қарданд ва ҳеҷ тамосе бо дохили кишвар нест, мардум дар чӣ вазъе қарор доранд? Аксари мусофироне, ки нисфирӯзии 15-уми январ аз шаҳри Теҳрони Эрон ба Душанбе расиданд, дар суҳбат бо Озодӣ гуфтанд, вазъ дар кишвар нигаронкунанда аст.
Ҳамкорони мо Иршод Сулаймонӣ ва Шаҳлои Абдуллоҳ ба пешвози мусофирони ҳавопаймои самти Теҳрон-Душанбе рафтанд, ва аз онҳо дар бораи ҳоли мардум дар ин кишвар пурсон шуданд.
Зани эронӣ дар фурудгоҳ:
- Вазъ ҳануз одӣ нашуда, мусалламан иттифоқе ба назарам бояд биуфтад, чун ҳама мунтазиранд ва ҳама дар воқеъ азодоранд. Ҳама касони кушташудаашонро суроғ доранд.
- Ҳанӯз тазоҳургарон дар хиёбонҳо зиёд аст?
-На, нерӯҳои зиддишӯриш, ҳамашон бо калашникуф мусаллаҳ ва бо туфангҳои ҷангӣ дар хиёбонанд.
- Дар расонаҳо хабарҳои даҳшатангезе дар бораи кушташудаҳо аст, дар воқеъ зиёданд?
- Бисёр зиёд, бисёр зиёд. Ҷанозаҳоро ҳам намедиҳанд. Бештар ҳаст, 12 ҳазор. Мағозаҳо кор мекунанд, вале баъди зуҳр соати ду ба се мебанданд, ки хатар надошта бошад. Вале ҳозир дигар назорат сахт шуда, шаҳр ором аст.
- Аз бастагони шумо касе зарар надид?
- На, Худоро шукр. Вале касонеро мешиносем, ки бисёр бастагонашонро ҳам дастгир кардаанд ва ҳам кушта шуданд.
Шаҳрванди Тоҷикистон, ки аз Теҳрон омадааст:
- Мо надидем вазъиятро, фақат дар беморхона будем. Фаҳмидем фақат.
-Интернет кор мекунад?
-Тамоман, як ҳафта шуд, ки тамоман кор намекунад. Занг зада нашуд ягон хел.
- Худи духтурон дар бораи вазъият чӣ мегуфтанд?
-Мегуфтанд хуб мешаваду маълум набуд.
- Хабарҳо ҳаст, ки одами биёреро куштаанд?
- Ин чизро дидагӣ нестем.
Марди эронӣ дар фурудгоҳ:
- Иншоаллоҳ, ки ҳама чӣ дуруст бишавад. Феълан авзоъ ором аст. Интерент феълан қатъ аст. қавл доданд, кӣ чанд рӯзи оянда васл бишавад.
-Кушташудаҳоро ба чашми худ дидед?
-Ман, шахси худам чизе надидам, вале эълом мекунанд. Мисли ин ки кушта ҳам доштем, бале, мутассифона.
- Ҳамин шабу рӯзҳое, ки шумо омадед, авзоъ дар худи Теҳрон чӣ тур аст?
-Дар ҳоли ҳозир, авзоъ ором аст, таҳти контроли неруҳои амниятӣ аст.
- Шумо ин ҷо бо масруфияте омадед ё аз авзоъ фирор кардед?
-На, на, Мо ин ҷо барои анҷоми як коре, як маъмурияте омадем. Як кори шахсӣ дорам.
-Ҳоло парвозҳо тибқи маъмул аст ё кадом тағйироте аст?
- Дишаб мисле, ки парвозҳо лағв шуда буд, вале хушбахтона субҳ парвозҳо барқарор шуд. Дар шаҳр нерӯҳои амниятӣ зиёд шудаанд, рафту омади мардум ҳам ҳаст.
Шаҳрванди Тоҷикистон, ки аз ҷазири Кеш омадааст:
- Воҳимае, ки карданд инхелӣ набуд, фақат интернетро куштанд, ҳамин қадар кор карданд, вале роумингомон кор мекард.
-Бо хона тамос доштед?
- Бале, фақат бо смс.
- Шаҳрвандони Тоҷикистон бисёранд он ҷо?
-Не, ҳамин дар Кеш буданамон 100 ё 110 кас будем. Тарс набуд.
Марди эронӣ, ки аз Теҳрон омад:
- Тазоҳурот кам шуда. Пулису нерӯҳои амниятӣ зиёданд.
- Таъқиб мекунанд хона ба хона?
- На, таъқиб нест, фақат дар хиёбонҳо.
-Мегӯянд масоҷиду бонкҳову муассисот зиёд ба оташ кашида шуданд, Инҳоро дидед?
-Оре, масҷид буда, оре. Ҷойҳои дигар ҳам буд. Мошину ин чизҳо ҳам буд. Бонкро надидам, аммо мошини пулис, оре.
Ҷавони эронӣ, дар фурудгоҳи Душанбе:
-Расонаҳо бисёр дурӯғ мегӯянд.
-Масъалан дар бораи кушта шудани 4-5 ҳазор сухан меравад.
-На-на, ин гапҳо воқеияте надорад.
-Ҳоло ки шумо омадед, вазъ чӣ гуна буд.
-Хеле хуб буд, мушкиле надоштем. Ҳама чи тибқи ривол буд. Мо аз Мозандарон омадем. Аз шимол то Теҳрон.
-Дар шимол ҳам тазоҳурот буд?
- Дар ҳадди як эътироз буданд. Он чизе, ки расонаҳо бузургаш карданд, набуд.
Бозии тимҳои миллии Тоҷикистону Филиппин дар Ҳисор доир мешавад
Федератсияи футболи Тоҷикистон (ФФТ) макон ва замони баргузории бозии интихобии Ҷоми Осиё-2027 байни тимҳои миллии Тоҷикистон ва Филиппинро тасдиқ кард.
Бозии ниҳоии даври интихобӣ дар гурӯҳи “А” рӯзи сешанбеи 31-уми март дар Варзишгоҳи марказии Ҳисор соати 19 шуруъ мешавад.
Баъди натиҷагирии бозиҳои даври панҷуми мусобиқот дар гурӯҳи “А” дастаҳои мунтахаби Тоҷикистон ва Филиппин 13-имтиёзӣ гирифтаанд. Аз рӯи таносуби беҳтари тӯбҳо Тоҷикистон дар ҷойи аввал ва Филиппин дар ҷойи дуюм қарор доранд. Тимори Шарқӣ бо 3 имтиёз дар ҷойи сеюм ва Молдив бидуни имтиёз дар ҷойи чорум мебошанд.
Ба ин тартиб, дастаҳои мунтахаби Филиппин ва Тоҷикистон муборизаро барои роҳхат ба қисми ниҳоии Ҷоми Осиё-2027 идома медиҳанд.
Тақдири роҳхати ягона аз гурӯҳи “А” ба қисми ниҳоии мусобиқот дар бозии даври охирини марҳилаи гурӯҳӣ байни тимҳои миллии Тоҷикистону Филиппин 31-уми март ҳал хоҳад шуд.
Тимҳои миллии Тимори Шарқӣ ва Молдив аз ҳаққи ширкат дар қисми ниҳоии Ҷоми Осиё-2027 маҳрум гаштанд.
Дар марҳилаи гурӯҳии Ҷоми Осиё-2027 тимҳои миллӣ ба шаш гурӯҳи иборат аз чаҳордастаӣ тақсим шудаанд. Танҳо ғолибони гурӯҳҳо ба қисми ниҳоии Ҷоми Осиё, ки аз 15-уми январ то 8-уми феврали соли 2027 дар Арабистони Саудӣ баргузор мешавад, роҳ меёбанд.
Трамп: Эрон аз эъдоми эътирозгарон даст кашидааст
Президенти ИМА Доналд Трамп мегӯяд, ҳукумати Амрико маълумот гирифтааст, ки давлати Эрон нақшаи эъдом ё қатли эътирозгаронро надорад. Дар ин бора шабакаи NBC News хабар додааст.
Трамп бори дигар таҳдид кард, ки агар Эрон куштани эътирозгаронро дубора оғоз кунад, ИМА чораҳои сахт хоҳанд андешид. Ба маълумоти ИМА ва созмонҳои ҳомии ҳуқуқ, Ҷумҳурии исломии Эрон ният дошт, ки рӯзи 14-уми январ як эътирозгари 26-соларо ба қатл расонад.
Тибқи омори созмонҳои ҳомии ҳуқуқ, аз замони оғози норозигиҳои ахир, ки беш аз ду ҳафта аст идома дорад, зиёда аз 2500 кас кушта шудаанд. Доналд Трамп куштани эътирозгаронро маҳкум кард. Маъмурияти Трамп роҳҳои гуногуни фишор ба Теҳронро баррасӣ дорад, аз ҷорӣ кардани таҳримҳои нав то ҳамлаҳои ҳавоӣ.
Манобеи хабаргузории “Ройтерс” 14-уми январ гуфтаанд, ИМА мумкин аст давоми як рӯзи оянда ба Эрон ҳамла кунад. Дар чунин шароит ИМА ба хориҷ кардани нерӯҳояш аз Ховари Миёна оғоз кардааст.
Рақобати навбатии Муин Ғафуров бо размкори лаҳистонӣ
Варзишгари тоҷик Муин Ғафуров рақобати навбатиашро дар ташкилоти UFC бо размкори лаҳистонӣ Ёқуб Виклач баргузор мекунад. Муҳорибаи ду варзишгар 8-уми феврал дар мусобиқаи UFC Vegas баргузор мешавад.
Дар назар аст, ки муҳориба дар вазни сабуктарин баргузор шуда, 3 раунд идома кунад. Муин Ғафуров 29 сол дошта, дар корномаи варзишиаш дар муҳорибаҳои омехта 21 ғалаба ва 6 шикаст дорад.
Рақиби ӯ Ёқуб Виклач ҳам 29-сола буда, дар муҳорибаҳои омехта 16 маротиба пирӯз шуда, 3 бор шикаст хӯрдааст. Дар ташкилоти маъруфи UFC аз Тоҷикистон се варзишгар Нурулло Алиев, Муин Ғафуров ва Муҳаммад Наимов баромад мекунанд. Ахиран роҳбарони UFC шартнома бо Лоиқ Раҷабовро тамдид накарданд.
Тими миллии футзали Тоҷикистон дар Ҷакарта се бозии санҷишӣ мекунад
Дастаи мунтахаби футзали Тоҷикистон дар доираи омодагиҳо ба қисми ниҳоии Ҷоми Осиё-2026 дар пойтахти Индонезия – шаҳри Ҷакарта - се бозии санҷишӣ анҷом медиҳад.
Ба иттилои Федератсияи футболи Тоҷикистон (ФФТ), тими миллии футзали кишвар дар Ҷакарта дар доираи омодагиҳо ба Ҷоми Осиё-2026 бо дастаҳои мунтахаби Қирғизистон (16-уми январ), Индонезия (18-уми январ) ва Арабистони Саудӣ (20-уми январ) бозиҳои санҷишӣ баргузор мекунад.
Сармураббии тими миллии футзали Тоҷикистон Пайрав Воҳидов 16 бозигарро барои тамринҳои дастаҷамъӣ даъват кардааст. Ҳайати ниҳоии дастаи мунтахаб барои Ҷоми Осиё-2026 14 бозигарро дарбар хоҳад гирифт.
Ҳайати васеи тими миллии футзали Тоҷикистон:
Дарвозабонҳо: Фирӯз Бекмуродов («Сипар», Хуҷанд), Нуриддин Ҷабборов («Соро компания», Душанбе), Фирӯз Бозмамадов («Сомон», Душанбе);
Бозигарони майдонӣ: Дилшод Саломов, Бахтиёр Солиев, Самандар Ризомов, Муҳаммад Раҷабов (ҳама аз «Соро компания»), Муҳаммадҷон Шарипов, Иқбол Воситзода (ҳарду аз «Сипар»), Комрон Алиев, Насратшо Исмоилов, Абдуқаюм Умаров, Некрӯз Идиев (ҳарчор аз «Истиқлол», Душанбе), Идрис Ёров, Баҳодур Хоҷаев (ҳарду аз «Ойл Стар», Узбекистон), Умед Қузиев («Амонатбанк», Душанбе).
Сармураббӣ – Пайрав Воҳидов.
Дар Ҷоми Осиё-2026, ки аз 27-уми январ то 7-уми феврал дар Индонезия баргузор мегардад, рақибони тими миллии футзали Тоҷикистон дар гурӯҳи “С” дастаҳои мунтахаби Ҷопон, Узбекистон ва Австралия мебошанд.
Таркиби се гурӯҳи дигар чунин аст:
Гурӯҳи “А”: Индонезия, Ироқ, Қирғизистон, Кореяи Ҷанубӣ;
Гурӯҳи “В”: Тайланд, Ветнам, Кувайт, Лубнон;
Гурӯҳи “D”: Эрон, Афғонистон, Арабистони Саудӣ, Малайзия.
Дар марҳилаи гурӯҳии Ҷоми футзали Осиё-2026 тими миллии Тоҷикистон дар гурӯҳи “С” бо дастаҳои мунтахаби Узбекистон (28-уми январ), Ҷопон (30-юми январ) ва Австралия (1-уми феврал) бозӣ хоҳад кард.
Ду дастаи беҳтарин аз ҳар гурӯҳ ҷуфтҳои даври чорякниҳоиро ташкил дода, муборизаро барои медалҳо идома хоҳанд дод.
Дар Тоҷикистону ду нерӯгоҳи офтобӣ месозанд
Соли 2026 дар Тоҷикистон ду нерӯгоҳи барқи офтобӣ сохта мешавад. Дар ин бора Кумитаи давлатии сармоягузорӣ хабар дода гуфтааст, созишнома бо ширкати “Аён Энерҷӣ” 13-уми январ дар Душанбе имзо шуд.
Ба қавли манбаъ, иқтидори ду нерӯгоҳи барқии офтобӣ 500 мегават хоҳад буд ва марҳилаи наве дар рушди энергияи сабз аст. Дар назар аст, ки нерӯгоҳҳои барқӣ офтобӣ дар ноҳияҳои Ашт ва Ҷайҳун сохта шавад.
Дар хабари расмӣ омадааст, “нерӯгоҳи барқӣ офтобӣ бори аввал дар таърихи Тоҷикистон бо чунин иқтидори бузург” сохта мешавад. Дар назар аст, ки барои сохтани лоиҳа 250 миллион доллар сарф шавад. Кумитаи сармоягузорӣ мегӯяд, ширкати “Аён Энерҷӣ” бояд ҳарду нерӯгоҳи барқии офтобиро соли 2026 ба истифода диҳад.
Ҷузъиёти бештари созишнома бо ин ширкат ва ҳамчунин моликони “Аён Энерҷӣ” маълум нестанд. Моҳи декабри имсол Сафири Арабистони Саудӣ дар Тоҷикистон гуфта буд, ширкати ACWA Power музокирот бо Вазорати энержӣ ва захираҳои оби Тоҷикистонро оғоз кардааст.
Дар пайи камбуди шадиди нерӯи барқ дар Тоҷикистон мақомот талош доранд тавлиди барқро аз дастгоҳҳои офтобӣ ва бодӣ роҳандозӣ кунанд. Феълан бахши асосии барқи Тоҷикистон дар неругоҳҳои обӣ тавлид мешавад.
Гуфтугӯ