Рӯзи 27-уми май дар Тоҷикистон ва бисёр кишварҳои мусалмонӣ Иди Қурбонро ҷашн гирифтанд. Субҳи барвақт садҳо нафар дар Тоҷикистон барои адои намози ид ба масҷид шитофтанд. Тибқи дастури Шӯрои уламо намози ид соати 6:00 хонда шуд.
Дар хутбаи ид, имомхатибон, аз намозгузорон хостанд, амалҳои хайру савоб кунанд, дасти бечорагону ниёзмандонро бигиранд, аз исрофу густурдани дастархонҳои пурдабдаба худдорӣ кунанд, дар пайи ҳифзи оромию суботи сиёсии кишвар бошанд.
Мардум пас аз намоз ба ҷойе омадаанд, ки гову бузу гӯсфанд қурбонӣ мекунанд. Чанд сол ба ин сӯ дар Душанбе барои забҳи моли қурбонӣ ҷойҳои махсус муайян шудаанд.
Идгардаки кӯдакон аз зебогиҳо ва вижагиҳои идҳои Тоҷикистон дониста мешавад. Ҳарчанд мақомот дар солҳои ахир талош доранд, расмро камранг кунанд ва аз миён бибаранд.
Кӯдакон барои табрики ид хона ба хона гашта, туҳфа мегирифтанд. Дар Тоҷикистон ҳамчунин тухмҷангу дигар расму оинҳо бостонии мардумиро бо идҳои мусалмонӣ омезиш додаанд.
Аксҳо аз таҷлили Иди Қурбон дар Тоҷикистон
Иди Қурбони Тоҷикистон расму оинҳои дигаре низ дорд:
Раҷаб Раҷабов, сокини Душанбе ба Радиои Озодӣ гуфт, "дар Иди Қурбон мо баъди намоз ба сари гузаштагон рафта, ба арвоҳашон фотеҳа мехонем. Баъд ба хонаҳои хешу табор ва ақрабо меравем ва ба ягон камбағалу нодор ёрдам мекунем. Иди Қурбон барои ҳамин аст, як дуо кардану як камбизоатро ёрдам кардан".
Муҳаммад Сабур, Муҳаммад Анас ва Усома аз мусалмонони Кашмири Ҳиндустонанд, ки имсол дар Душанбе донишҷӯ шудаанд ва ба тамошои ҳолу ҳавои идонаи пойтахти Тоҷикистон пардохтаанд.
"Барои мо дидани манзараҳои ид аз ҳар нигоҳе ҷолиб аст. Хеле аҷиб буд, вақте ман аз масҷид бармегаштам як ҷавоне ба ман шоколад дод ва маро бо ид табрик кард. Ин лутфе, ки ба ман кард, ман худамро дар хонаам ҳис кардам. Ҳамчунин яке аз устодамон аз донишгоҳ моро ба хонааш даъват кардааст", - мегӯянд ин донишҷӯён.
Ба ҷуз хонаҳое, ки қурбонӣ кардаанд, ҳамчунин дар Душанбе ва бархе манотиқи дигари Тоҷикистон мардум дар хонаҳояшон дастурхони идӣ мегустуранд ва ба идтабрикгӯйии ҳамдигар мераванд.
Имсол дар пешорӯйи Иди Қурбон мақомот аз тоҷирон хостанд, ки дар рӯзҳои пеш аз ид нархи навои маҳсулотеро, ки мардум барои дастархони идӣ мехаранд, беҳуда боло набаранд. Аммо бо вуҷуди ин пулиси Душанбе аз мавридҳои зиёди муҷозот кардани тоҷирон, аз ҷумлу гӯштфурӯшҳо хабар дод.
Иди Қурбон дар баробари Иди Рамазон дар Тоҷикистон пас аз фурӯпошии Шӯравӣ расмӣ шуд ва рӯзи ғайрикорӣ аст.
