Файзи Олии 74-сола рӯзи 29-уми ноябр ба дуним сол зиндон маҳкум шуд.

Додгоҳи ноҳияи Синои шаҳри Душанбе ӯро ба “дидаю дониста расондани хабари дурӯғ нисбат ба прокурор” гунаҳкор донист.

Худаш рӯзи 25-уми ноябр дар суҳбат бо Радиои Озодӣ гуфта буд, ки ҳеч гуноҳ надорад. Баръакс, мақомотро танқид кард, ки ба ҷойи баррасии номааш дар бораи ришвагирии муфаттишон худи ӯро ба ҷавобгарӣ кашидаанд. Ин нома, ба гуфтаи ӯ, бар асоси баёнот ва бо иҷозаи зерҳимояаш, Шамсулло Ҳамроҳзода, омода ва фиристода шуда буд.

Додситонии кул рӯзи 4-уми декабр дар хабарномае тасдиқ кард, ки Файзи Олӣ ба ин ниҳод, Шӯрои амният, Оҷонси мубориза бо фасод, ВКД ва Палатаи ҳисоб хатӣ муроҷиат кардааст. Аз ҷумла, дар бораи гуё 21 ҳазор сомонӣ гирифтани корманди Додситонӣ У. Холиқзода, 50 ҳазор сомонӣ гирифтани нозири Палатаи ҳисоб Ҷ. Шарифзода ва 20 ҳазор сомонӣ гирифтани вакили мудофеъ Ҳ. Саидова аз Шамсулло Ҳамроҳзода.

Аммо мақомот номаи Файзи Олиро “дидаю дониста расондани хабари дурӯғ, оворакунии мақомоти давлатӣ, қасосгирӣ ва дигар ниятҳо” номидаанд, ки ба бовари онҳо “бе огоҳии шахси ваколатдиҳандааш Ҳамроҳзода” навишта шудааст.

Файзи Олӣ рӯзи 25-уми ноябр ба Радиои Озодӣ гуфта буд, ки “Шамсулло Ҳамроҳзодаро маҷбур кардаанд, аз баёноташ даст кашад. Гӯяд, ки мо ба Файзи Олӣ ин хел ваколат надодаем."

Дар хабарномаи Додситонии кул гуфта шудааст, ки “дар ҷараёни санҷиш ваҷҳҳои ҳимоятгар Юлдошев Ф.Ш. тасдиқ наёфт” ва ба ҳамин далел нисбат ба корманди Додситонӣ, нозири Палатаи ҳисоб ва як вакили мудофеъ парванда боз нашуд.

Шамсулло Ҳамроҳзода як масъули ҶДММ “Маркази дастгирии суғуртаи мутақобила” аст, ки моҳи марти соли 2024 ҳамроҳи ду ҳамкораш бо гуноҳи азхудкунии 4672,8 ҳазор сомонӣ зиндонӣ карда шудааст.

Файзи Олӣ дар гузашта дар чанд қазияи пурсарусадои додгоҳӣ, аз ҷумла боздошту ҳукми зиндони Саиднуриддин Шамсиддинов (судиҷрочии собиқ) ва марги Ҳамза Икромзода дар зиндони рақами яки Душанбе ба ҳайси вакили мудофеъ баромад кардааст.

Ҳоло маълум нест, ки ӯ нисбат ба ҳукми Додгоҳи ноҳияи Сино шикоят мебарад ё не.

Бародари ӯ, Ашраф Гулов, домоди президент Эмомалӣ Раҳмон сафири Тоҷикистон дар Имороти Муттаҳидаи Араб аст.

Сомонаи президенти Тоҷикистон рӯзи 14-уми ноябр навиштааст, ки "бо розигии президент" дар шаҳру вилоятҳои Русия "аз ҳисоби кадрҳои дорои таҷрибаву собиқаи корӣ ва ҷавобгӯ ба талаботи муосир таъин гардиданд."

Исми афроди нав расман эълон нашудааст, вале манобеи Радиои Озодӣ гуфтанд, ки Хуршед Шерализода, ки ёвари вазири корҳои хориҷӣ буд, ба кори наваш дар Санкт-Петербург оғоз кардааст.

Бар асоси маълумотҳои дарёфтӣ, Заррина Исмоилзода, консули генералии Тоҷикистон дар шаҳри Новосибирски Россия шудааст. Ӯ нахустин зани дипломат аст, ки консули Тоҷикистон дар яке аз вилоятҳои бузурги Русия таъин мешавад.

Бар асоси тағйироти ахир, Холназар Ғоиб, консулии генералии Тоҷикистон дар Екатеринбург, Файзуллозода Фаридун, консули генералии Тоҷикистон дар шаҳри Уфаи Русия муқаррар шудаанд.

Муродзода Фирӯз, консулии генералии Тоҷикистон дар шаҳри Алмаатои Қазоқистон таъин гаштааст.

Дар шаҳрҳои Русия, ки консулҳои Тоҷикистон дигар шудаанд, теъдоди зиёди муҳоҷирони тоҷик кору фаъолият мекунанд.

Муҳоҷирони тоҷик пайваста аз озору азият ва нақзи ҳуқуқашон дар Русия шикоят мекунанд ва намояндагиҳои Тоҷикистонро танқид мекунанд, ки ба додашон намерасанд.

Тибқи созиш миёни Узбекистон ва ҳукумати Толибон, маҳсулоти кишоварзии Афғонистон аз тариқи фурудгоҳҳои Узбекистон ба кишварҳои дигар содир мешавад.

Сухангӯи раиси вилояти Балхи Афғонистон рӯзи 13 ноябр дар сафҳаи Х навишт, ки бар асоси тафоҳумномаи имзошуда бо Узбекистон, мева ва сабзавоти Афғонистон аз тариқи фурудгоҳҳои Узбекистон ба бозорҳои дигар кишварҳои Осиёи Марказӣ, Осиёи Ҷанубӣ ва Аврупо содир мешавад.

Аз тақрибан як моҳ ба ин тараф Покистон роҳҳои заминии худро бо Афғонистон бастааст, ки дар натиҷаи он тоҷирони афғон зарари зиёд дидаанд.

Мулло Абдулғанӣ Бародар, муовини раиси вазирони ҳукумати Толибон рӯзи 12 нобяр аз тоҷирони афғон хостааст, ки масирҳои дигари тиҷоратиро бар ивази Покистон ҷустуҷӯ кунанд.

Шуморе аз тоҷирони афғон ба Радиои Озодӣ гуфтанд, ин шояд барои онҳо осон набошад, ки ба зудӣ масирҳои дигаре бар ивази роҳҳои Покистон барои худ пайдо кунанд, зеро Покистон бозори калон ва наздик барои мева ва сабзавоти Афғонистон мебошад.

Дар шаҳри Душанбе ҳазору 312 падару модарро барои таълиму тарбияи нодурусти фарзандонашон ҷазо додаанд. Ин омор давоми 10 моҳи соли ҷорӣ ба қайд гирифта шудааст.

Пулиси Душанбе дар ин бора хабар дода навиштааст, ки онҳо бар асоси моддаи 90-и Кодекси ҳуқуқвайронкунии маъмурӣ, яъне иҷро накардани ӯҳдадории таълиму тарбияи кӯдак, ҷазо гирифтаанд.

Ин банди қонунгузорӣ аз 750 сомонӣ ҷарима то 10 рӯз ҳабсро пешбинӣ мекунад.

Пулиси пойтахт бо нашри ин омор, гуфтааст, ки дар аксари мавридҳо маҳз аз беназоратӣ ва бемасъулиятии падару модарон наврасон истифода бурда, даст ба кирдорҳои гуногуни ҳуқуқвайронкунанда ва ҳатто ҷиноятҳои вазнин мезананд.

Ин омор дар ҳоле нашр мешавад, ки чанд рӯз қабл дар пайи кордкашии мактаббачагон дар шаҳри Душанбе як хонанда ҷон бохта, навраси дигар маҷрӯҳ шуд.

Вазири дифои Покистон мегӯяд, ки кишвараш омодаи ҷанг дар ду ҷабҳа бо Афғонистон ва Ҳинд аст. Хоҷа Осиф ин матлабро рӯзи 13 ноябр дар як нишасти хабарӣ дар Исломобод баён кард.

Пеш аз ин Муҳсин Нақавӣ, вазири корҳои дохилии Покистон ба порлумони ин кишвар гуфта буд, ки ду ҳамлаи интиҳорӣ дар ин кишвар дар ин ҳафта, аз сӯи афғонҳо анҷом шудааст.

Дар яке аз ин ҳамлаҳо дар рӯзи 11 ноябр дар Исломобод 12 нафар кушта ва 27 тани дигар захмӣ шуданд.

Ба гуфтаи мақомоти покистонӣ, таркиши дигаре рӯзи 10 ноябр дар наздикии дарвозаи як мактаби ҳарбӣ дар Вазиристони ҷанубӣ рух дод ва боиси кушта шудани се нафар шуд.

Вазири дифои Покистон ҳамчунин Кобулро ба таъмини молии терроризм ва Ҳинро ба ҳимоят аз он барои пешгирӣ аз сулҳ дар Покистон, муттаҳам кард.

Покистон пеш аз ин низ чунин иддао карда буд ва ҳукуматҳои Ҳинд ва Толибон дар Афғонистон онро рад карда буданд.

Пеш аз имзои президент, вакилони Маҷлиси Намояндагони ИМА низ ин лоиҳаро тасвиб карданд.

"Қатъи кори ҳукумат", ки 43 рӯз давом кард, дарозтарин "шатдаун" дар таърихи ИМА будааст.

Ин тарҳро дар ибтидо вакилони Сенати ИМА пас аз баҳсҳои тӯлонӣ имзо карда, барои баррасӣ ба Маҷлиси Намояндагон фиристоданд. Пас аз имзои президент ин тарҳ амалӣ мешавад.

Аз замони қатъи кори ҳукумат тақрибан 1 миллиону 500 ҳазор коргари давлатӣ ба рухсатии бемузд фиристода шуда буд, ки ҳоло дубора сари кор бармегарданд.

Бар асоси ин тарҳи муваққат, кори ниҳодҳои давлатӣ то 30-юми январи соли 2026 мисли соли пеш маблағгузорӣ мешавад. То охири моҳи январ бояд вакилони Сенат тарҳи солонаи буҷаро қабул кунанд.

Дар Амрико соли молӣ аз рӯзи 1-уми октябр оғоз ёфт, вале то ин муддат Конгресс натавонист, ягон қарори ҳатто муваққатӣ ҳам дар бораи маблағгузории буҷаи ҳукумати марказӣ қабул кунад. Вакилони ду ҳизб сари нуктаҳои буҷа ихтилофи назар доштанд, аз ин рӯ, маблағгузории қисме аз идораҳои ҳукумати марказӣ қатъ шуда буд.

Барои қабули қонун дар бораи маблағгузории буҷаи Амрико бояд на камтар аз 60 вакили Сенат раъй диҳад, аммо Ҳизби Ҷумҳурихоҳ дар Сенат фақат 53 раъй дошт, ки барои қабули санад кофӣ набуд. Рӯзи якшанбеи гузашта гурӯҳи 8-нафарии вакилони Ҳизби Демократ бо раҳбарони Ҳизби Ҷумҳурихоҳ ва намояндагони ҳукумати Амрико ба созиш расиданд, ки роҳро барои тасвиби буҷаи муваққат боз кард.

Дар иваз вакилони ҷумҳурихоҳ гуфтаанд, ки омодаи баррасии хостаи демократҳо, яъне идомаи кумак барои бимаи тиббии мардуми камбизоат дар Амрико ҳастанд. Як талаби асосии демократҳо барои қабули буҷа ҳамин аст.

Дарозтарин "шатдаун" боиси бекор мондани ҳазорон корманди давлатӣ, лағв шудани парвозҳо ба ИМА ва лағви кумакҳо ба мардуми камбизоат шуда буд. Агар ин вазъ то моҳи дигар давом мекард, низомиёни амрикоӣ низ бекор мемонданд.

Дар ин бора рӯзи 13-уми ноябр Хадамоти давлатии оташнишонии Вазорати корҳои дохилии Тоҷикистон дар саҳифаааш дар Инстаграм хабар додааст.

Ба ҳисоби ниҳоди мазкур, кормандони Хадамоти давлатии оташнишонӣ ба маблағи 27 миллион сомонӣ молу амволи бозор ва манзилҳои истиқоматиро аз коми оташ наҷот додаанд.

Сӯхторе, ки шаби 12-уми ноябри имсол дар бозори "Гулистон" сар зад, ба мағозаҳо ва манзилҳои истиқоматии ҳамшафат паҳн гардида, дар маҷмӯъ 792 метри мураббаро фаро гирифтааст.

Кормандони оташнишонӣ танҳо баъди чаҳор соати талош алангаи оташро хомӯш кардаанд.

Сабабҳои сӯхтор аз сӯи мақомот таҳқиқ мешавад.

Оташ гирифтани бозорҳо дар Тоҷикистон солҳои ахир зиёд ба мушоҳида мерасад. Мақомот дар чанд ҳолат гуфтанд, ки риоят накардани қоидаҳои бехатарӣ, сабаби ин ҳодисаҳо шудааст.

Тоҷироне, ки дар чунин сӯхторҳо дар гузашта осеб дида буданд, борҳо шикоят карданд, ки ҳеч ниҳоде зарари расидаро ҷуброн накард ва тиҷораташон муфлис шуд.

Вазири дифои Тоҷикистон генерал-полковник Эмомалӣ Собирзода бо генерал Шамшод Мирзо, сардори Ситоди кулли нерӯҳои мусаллаҳи Покистон, мулоқот кардааст.

Ба иттилои Радиои Покистон, дар ин мулоқот, ки рӯзи 12 ноябр дар шаҳри Равалпиндӣ сурат гирифт, ҷонибҳо дар мавриди робитаҳои дуҷониба, ба вижа фазои амниятии ҷаҳонӣ ва минтақаӣ, сӯҳбат кардаанд.

Ҷонибҳо ҳамчунин иқдомотеро баррасӣ карданд, ки ба густариши минбаъдаи сатҳи ҳамкориҳои низомии ду кишвар нигаронида шудаанд.

Ба иттилои расонаҳои покистонӣ, генерал Шамшод Мирзо гуфтааст, ки ҳар ду кишвар манофеи минтақаии муштарак доранд ва ба ҳамкорӣ ва тақвияти низомии худ идома медиҳанд.

Генерали покистонӣ ба ӯҳдадории кишвараш ба тақвияти сулҳ, субот ва ҳамкорӣ дар саросари минтақа, ба вижа бо кишварҳои Осиёи Марказӣ, таъкид кардааст.

Ба навиштаи расонаҳои покистонӣ, вазири дифои Тоҷикистон аз касбият ва дастовардҳои нерӯҳои мусаллаҳи Покистон дар мубориза бо терроризм ситоиш кардааст.

Пеш аз ин Тоҷикистон мизбони размоиши муштараки зиддитеррористии "Дӯстӣ-2025" буд, ки нерӯҳои вижаи Покистон дар он иштирок доштанд. Ин размоишҳо дар тамрингоҳи Вазорати дифои Тоҷикистон дар Фахробод баргузор шуда буд ва 100 нафар аз низомиён аз ҳар ду кишвар иштирок карданд.

Тибқи қарори шаҳрдории Маскав, арзиши "патент" ё иҷозатномаи кор барои муҳоҷирони меҳнатӣ дар ҳудуди пойтахти Русия боло бурда шуд. Қарор аз ҷониби шаҳрдори Маскав Сергей Собянин имзо шудааст.

Бар пояи ин қарор, сар аз 1-уми январи соли 2026 муҳоҷирон ба ҷои 8 ҳазору 900 рубл, ба буҷаи ин кишвар ҳар моҳ 10 ҳазор рубл пардохт мекунанд.

Ҳанӯз охири моҳи октябр, Кумитаи сиёсати иқтисодӣ ва иҷтимоии маҷлиси вакилони Маскав тарҳи қонун барои боло бурдани арзиши "патент" барои шаҳрвандони хориҷиро омода ва баррасӣ карда буд.

Айн замон, Маскав ягона минтақае нест, ки сар аз соли 2026 нархи патент ё иҷозатномаи корӣ барои муҳоҷирон қимат мешавад.

Масъулин дар вилояти Новосибирск гуфтанд, қимати иҷозатномаи корро 11 дарсад боло мебаранд ва аз соли 2026 нархи патент дар ин вилоят 10 ҳазору 860 рублро ташкил хоҳад дод, ки нисбат ба соли ҷорӣ 2950 рубл бештар хоҳад буд.

Мақомоти ин вилоят гуфтанд, аз 58 ҳазор муҳоҷири корӣ дар Новосибирск, 37 дарсадаш тоҷикистониҳо ҳастанд.

Маблағи ҳармоҳа барои иҷозати кор дар Санкт-Петербург низ аз якуми январ аз 6 ҳазор рубли русӣ ба 8 ҳазор хоҳад расид. Ин афзоиш ҳам ба Санкт Петербуг ва ҳам ба вилояти Ленинград дахл дорад, зеро мақомот тасмими муштарак гирифтаанд.

Дар вилояти Иркутск ҳам муҳоҷирон барои патент, ба ҷойи 10 ҳазору 900 рубл бояд 12 ҳазору 231 рубл пардохт кунанд. Қонунгузорон дар Камчатка рӯзи 28-уми октябр эълон карданд, ки қимати патент аз 9 ҳазору 27 рубл ба 13 ҳазору 776 рубл боло бурда мешавад.

Дар вилояти Свердловск қарор шуд, ки барои муҳоҷирон аз соли нав патент бо арзиши 9 ҳазору 500 рубл пешниҳод шавад. Ҳоло нарх 7 ҳазору 500 рубл аст.

Аксари муҳоҷирони тоҷик дар Русия тариқи патент фаъолият доранд ва пайваста аз нархи баланди он шикоят мекунанд. Бидуни патент дар Русия кор кардан манъ аст ва ҳамасола садҳо муҳоҷир бо ҳамин далел ронда мешаванд.

Моҳи гузашта президенти Русия дар мулоқоташ бо сарони ҳизбҳои Думаи давлатӣ масъалаи бекор кардани патент ва тариқи саҳмияҳо ба Русия овардани муҳоҷиронро баррасӣ карда буд.

Хадамоти алоқаи Тоҷикистон аз фаъолияти як паёмрасони нави миллӣ бо номи "ОРИЗ" хабар дод, ки имкон дорад дар оянда ҷойгузини "Вотсапп" ва "Телеграм" бошад.

Дар як паём ё "смс"-е, ки аксар шаҳрвандони Тоҷикистон рӯзҳои 10 ва 11 ноябр дар телефони ҳамроҳи худ дарёфт карданд, омадааст, ки бо истифода аз он, ҳар як корбар метавонад бо наздикон, ҳамкорон ва дӯстони худ ҳам дар дохил ва ҳам дар хориҷи кишвар бе маҳдудият дар тамос бошад.

Хадамоти алоқа дар шарҳи фаъол шудани он навиштааст, ки чанд соли охир, дастрасӣ ба платформаҳои хориҷӣ маҳдуд гардидааст ва дар Русия дар ҳоле, ки "Телеграм" ва "Вотсап" маҳдуд шуданд, ҳазорҳо муҳоҷир барои иртибот бо аҳли оилаи худ дар Тоҷикистон ба мушкил рӯ ба рӯ шуданд.

Ба иттилои манбаъ, ORIZ дар шароити суръати пасти интернет ҳам метавонад кор кунад. Хадамот иқрор шудааст, ки ин бартарӣ пеш аз ҳама барои минтақаҳои дурдасти кишвар ва муҳоҷирони тоҷик хеле муҳим аст, зеро аксари барномаҳои хориҷӣ танҳо дар шароити интернети баландсуръат хуб кор мекунанд.

Маълум нест, ки то кадом андоза ин паёмрасон метавонад ҷойи дигар барномаҳоро гирад ва мардум аз он истифода кунанд, вале Хадамоти алоқа мегӯяд, барномаи нав имкон медиҳад, ки маълумоти корбарон дар дохили кишвар ҳифз шаванд, иртибот бе вобастагӣ аз кишварҳои дигар таъмин гардад, муассисаҳо ва шаҳрвандон дар муҳити амн ва боэътимод муошират кунанд.

Дар тобистони имсол идораи "Роскомнадзор"-и Русия занг задан аз тариқи паёмрасонҳои "Вотсап" ва "Телеграм" дар он кишварро маҳдуд кард.

Шаби гузашта соатҳои тахминан 22:10 дар бозори "Гулистон"-и шаҳри Панҷакент сӯхтор сар задааст.

Ба иттилои Хадамоти оташнишонии шаҳр, сӯхтор тақрибан 600 метри мураббаъро фаро гирифта, то соати 02:30-и субҳ пурра хомӯш карда шуд.

Яке аз соҳибкорон ба Радиои Озодӣ гуфт, дар ин бозор асосан матоъҳову таҷҳизоти техникӣ ба коми оташ рафтааст .

Дар наворҳое, ки корбарон ба Радиои Озодӣ фиристоданд, дида мешавад, ки қисмати зиёди бозор оташ гирифтааст ва фурӯшандагон талош доранд молҳои худро берун бароранд.

Сабабҳои сӯхтор ва ҳаҷми хисорот ҳанӯз эълон нашудааст. Мақомот гуфтаанд, ки иллати ин ҳодиса ва ҳаҷми зарар ҳисоб карда мешавад.

Оташ гирифтани бозорҳо дар Тоҷикистон нав нест ва солҳои ахир сӯхтор дар бозорҳо зуд-зуд рух медиҳад.

Садҳо тоҷир ҳам баъди ин ҷуброне намегиранд ва варшикаставу муфлис мешаванду ба сафи муҳоҷирони корӣ мепайванданд.

Артиши Украина рӯзи 12-уми ноябр эълон кард, ки нерӯҳояш ба як корхонаи кимиёвӣ дар Ставрополи Русия зарба задаанд.

Ба иттилои Ситоди кулли Нерӯҳои мусаллаҳи Украина, ин коргоҳ ба ширкати "Лукойл" тааллуқ дорад ва артиши Русияро бо маводи зарурӣ таъмин мекунад.

Маҳсулоти ин ширкат дар таҳияи ҳавопаймоҳои бесарнишин низ истифода мешудааст.

Мақомот дар Русия сӯхторро эътироф ва иддао карданд, ки он дар пайи афтодани пораҳои паҳпод ё ҳавопаймои бесарнишин сар зад.

Вазорати дифои Русия изҳор дошт, ки чаҳор ҳавопаймои бесарнишини украиниро дар фазои Ставропол аз байн бурд.

Ба ҷуз ин, ситоди кулли Нерӯҳои мусаллаҳи Украина изҳор дошт, ки артиши Украина ба анбори лавозимоти ҷангии Русия дар деҳаи Новий Мир дар бахши ишғолшудаи вилояти Донетск зарба задааст.

Додситонии кулли Тоҷикистон аз кормандонаш дар шаҳру ноҳияҳои кишвар хостааст, ки маҳала ба маҳалла рафта, бо мардум дар бораи истифодаи дурусти нерӯи барқ суҳбат кунанд.

Ин тасмим дар шабу рӯзест, ки интиқоли нерӯи барқ ба хонаи сокинон бо маҳдудият дастрас мешавад. Иловар бар ин, омадани корманди додситонӣ ба хонаи сокинон метавонад маънои таҳдидомез ҳам дошта бошад ва на ҳама хуш дорад.

Яке аз сокинони шаҳри Душанбе, ки дар ин мулоқот ширкат кардааст, рӯзи 12-уми ноябр гуфт, даъват ба истифодаи сарфакорона вақте мантиқ дорад, ки ба мардум пурра барқ дода шавад.

“Вақте барои чанд соат барқ медиҳанд, сокинон намедонанд, ки чӣ тавр хӯрок пазанд, об гарм кунанд ё хонаашонро гарм кунанд,” – афзуд ӯ.

Додситонӣ як ниҳоде дар Тоҷикистон аст, ки иҷрои дурусти қонунҳоро назорат мекунад.

Моҳи апрели имсол дар Тоҷикистон дуздӣ ё истифодаи ғайриқонунии барқ ҷиноят эълон шуд. Барои дуздӣ ё истифодаи нодурусти барқ аз 27 то 90 ҳазор сомонӣ ё аз 6 то 10 сол зиндон пешбинӣ шудааст.

Даҳҳо зан дар Қазоқистон, ки писарони сарбозашон ҳангоми адои хидмати ҳарбӣ маъюб ё кушта шудаанд, бо нишони эътироз дар назди маркази қабули шикояти шаҳрвандон дар шаҳри Остона ҷамъ омаданд.

Ин гурӯҳи модаронро қабл аз расиданашон ба Остона кормандони пулис бо ҳар баҳона мехостанд, боздошт кунанд. Баъзеҳоро ба ҷиноятҳои ночиз, ки гуё пештар содир кардаанд, муттаҳам намуданд. Ба дигарон гуфтаанд, ки дар ҷустуҷӯ ҳастанд ва бояд ба шуъбаи пулис ҳозир шаванд.

Ба иддаи ин модарон, мақомоти Қазоқистон намехоҳанд, ки ҳодисаҳои фоҷиабор дар артиш расонаӣ шавад. Сауле Тлеубергенова, модари як сарбози фавтида, гуфт, "писари маро куштанд. Ба манаҳаш ду тир задаанд. Ман хоҳиш не, балки талаб дорам. На барои худам, балки аз номи ҳамаи модарон. Бояд тафтиш одилона сурат бигирад. Қотилон бояд зиндонӣ карда шаванд.”

Кормандони пулис хеле зуд ба маҳалли гирдиҳамоии занон ҳозир шуда, ба модарон гуфтаанд, ки онҳо қонунро вайрон мекунанд. Бо вуҷуди ҳушдорҳо, ин занон барои мулоқот бо вазири мудофиа пойфишорӣ карданд. Онҳо талаби худро дар бораи гузарондани ислоҳоти куллӣ дар артиш ва ба таври ошкоро таҳқиқ кардани мавридҳои кушта ва ё маъюб шудани сарбозон дар миён гузоштанд.

Гулмира Мукаҷонова, модари як сарбози захмӣ, гуфт, "то ба кай мо ин хел хору зор мешавем? То ба кай моро беҳуқуқ мекунанд? Ин ҳукумат мардумро хаста мекунад. Пас, моро бикушед. Чаро мо ин ҳамаро тоқат мекунем?! Чаро ҳуқуқи мо, модарон, ҳифз карда намешавад? Чаро фарзандони мо, ки ба артиш фиристода шудаанд, дар вақти хидмат хору зор мешаванд? Бигӯед, ба ин кӣ хотима медиҳад?”

Дар соати дуюми гирдиҳамоӣ намояндагони Вазорати мудофиаи Қазоқистон ба назди эътирозгарон баромаданд. Онҳо ба суолҳо ҷавоб надода, аз эътирозгарон хостанд, ки ба қабулгоҳи вазорат дароянд. Аммо дар дохил аз занон талаб шудааст, ки суҳбат бояд бе иштироки рузноманигорон гузарад. Дархосте, ки норозигии занонро ба миён овард.

Пас аз гуфтушуниди тӯлонӣ, билохира ба рӯзноманигорон иҷозати иштирок дар суҳбатро доданд. Яке аз хабарнигорон аз муовини вазири мудофиа фаҳмидааст, ки гуё дар Қазоқистон Кумитаи модарони сарбозон амал мекардааст ва бо вазорат ҳамкории наздик доштааст.

Рӯзноманигор Луқмон Аҳмадёров гуфт, “ҳеч яке аз волидоне, ки фарзандашон хидмат кардааст ё дар артиш фавтидааст, ягон намояндаи Кумитаи модарони сарбозонро надидааст. Гузашта аз ин, кумитаи мазкур ба ҳодисаҳои даҳшатборе, чун маргу захмӣ шудани сарбозон ҳеч вокуниш нишон надодааст.”

Ҳарчанд мулоқоти модарон бо масъулон дар шаҳри Остона бенатиҷа анҷом ёфт, аммо он идома пайдо кард. Шоми ҳамон рӯз шаш иштирокдори гирдиҳамоӣ боздошт ва ба идораи пулис бурда шуданд. Нисбат ба онҳо санад тартиб додаву ҷарима бастаанд.

Дертар котиби матбуотии президенти Қазоқистон Руслан Ҷелдибой хабар дод, ки Қосимҷомарт Тоқаев ба додситони кул дастур додааст, муроҷиати модарони србозони фавтидаро баррасӣ ва риояи қонунро дар ҷараёни таҳқиқи ҳодисаҳои фоҷиабор дар артиш арзёбӣ кунад.

Дар пайи занозании гурӯҳе аз мактабхонҳо дар ноҳияи Фирдавсии шаҳри Душанбе як кас ҷон бохта, як тани дигар захмӣ шудааст.

Раёсати корҳои дохилии шаҳри Душанбе хабар дод, ки ҳодиса рӯзи 9 уми ноябр рух дода, наврасон ҳангоми муноқиша аз корд истифода бурдаанд.

Ба иттилои пулис, ҳодиса бинобар "баҳси лафзӣ" дар шабакаҳои иҷтимоӣ миёни ду нафар бо номҳои Р. Н. ва Р. А. сар зада, сипас ҳарду муноқишаи гурӯҳӣ ташкил кардаанд.

Дар натиҷа Р. H. бо корд ба Р. A. зарба зада, ӯро ба ҳалокат расондааст. Як нафар ноболиғи дигар бо номи Ш.Ш. ҳоло бо ҷароҳатҳои вазнин дар бемористон бистарист.

Сомонаи хабарии your.tj қаблан навишта шуд, ки ҳодиса дар маҳаллаи маъруф ба 65, дар наздикии мактабҳои рақами 77 ва 78 рух додааст. Ба нақли манбаъ дар муноқиша хонандагони чанд мактаб ширкат доштаанд. Ин сомонаи хабарӣ дар шарҳи ҳодиса навишт, як наврасро ронандаи таксӣ дар ҳолати вазнин пайдо карда, ба беморхона бурдааст.

Вазорати корҳои дохилии Тоҷикистон мегӯяд, ки айни замон гумонбар Раҳматшозода Н. дар ҳабси пешакӣ қарор дорад ва нисбат ба ӯ парвандаи ҷиноӣ боз шудааст.

Занозанӣ миёни наврасон дар ин авохир бештар аз баҳсҳо дар интернет, ба вижа шабакаҳои иҷтимоӣ оғоз шуда, ба кордзанӣ ва фоҷеа табдил меёбад. Ин муноқишаҳо солҳои охир боис ба куштаву захмӣ шудани чанд хонандаи мактаб шудааст. Дар чунин муноқишаҳо ҷавонон гоҳе аз корду силоҳҳои дигар истифода мекунанд.

Мақомоти ҳифзи ҳуқуқ гуфта буданд, ки барои пешгирӣ аз ин ҳодисаҳо маъракаи ҷустуҷӯ ва дарёфти корд аз хонандагонро ба роҳ монда, дар мактабҳо муҳофиз гузоштаанд.

Мақомоти тоҷик мегӯянд, баъд аз ҷорӣ шудани ҷазои ҷиноӣ барои истифодаи ғайриқонунии барқ талафоти нерӯи барқ кам шудааст.

Барои дуздӣ ё истифодаи ғайриқонунии нерӯи барқ имсол дар Тоҷикистон аз 27 ҳазор сомонӣ ҷарима то 10 сол зиндонро пешбинӣ карданд.

Бино ба иттилои ниҳоди навтаъсиси Оҷонси назорати давлатии энергетикӣ, дар 9 моҳи соли равон сарфаи беҳуди нерӯи барқ қариб се дарсад коҳиш ёфтааст.

Кормандони ин ниҳод якҷоя бо Додситонии шаҳри Душанбе рӯзи 11-уми ноябр дар хиёбонҳои шаҳр ҳамчунин ба сокинон тарзи истифодаи сарфакоронаи нерӯи барқро фаҳмонда, аз онҳо даъват кардаанд, ки барқро беҳуда истифода набаранд.

Ин даъват дар шабу рӯзе сурат мегирад, ки сокинони чанд гӯшаи пойтахт аз он шикоят доранд, ки соатҳо барқ надоранд.

Баъзе аз сокинон, аз ҷумла дар ноҳияи Сино, мегӯянд, зоҳиран дар хонаҳои онҳо ҳам лимити барқ ҷорӣ шудааст ва чанд рӯз боз аз соати 9-и субҳ то 5-6-и бегоҳ бе барқ мемонанд.

Мақомот камбуди барқро дар пойтахти кишвар шарҳ надодаанд.