Дар чанд ҷумла
Ҳабси як мутахассиси IT аз Тоҷикистон бо гуноҳи "хиёнат ба давлат" дар Русия
Додгоҳи шаҳри Маскав рӯзи 29-уми октябр як зодаи Тоҷикистонро бо гуноҳи хиёнат ба давлат ба сездаҳуним сол зиндон маҳкум кард.
Фирӯз Дадобоев мутахассиси соҳаи фанновариҳои нав (IT) будааст.
Расонаҳои давлатии Русия аз қавли намояндагони Хадамоти федеролии амният (ФСБ) навиштанд, ки ӯ 47-сола аст ва соҳиби душаҳрвандӣ.
Дадобоевро моҳи октябри соли 2022 дар пойтахти Русия дастгир карданд.
Ӯро ба он гунаҳкор медонанд, ки гуё кӯшиш дошт маълумоти сирриро ба намояндаи CIA, созмони истихбороти марказии Амрико, бирасонад.
Ба гуфтаи масъулони ФСБ, Дадобоев ба гуноҳ иқрор шудааст, вале маълум нест таҳти чӣ шароит. Мавқеи наздикон ё вакили мудофеаш низ дастрас нест.
Додгоҳи шаҳри Маскав ин зодаи Тоҷикистонро ҳамчунин вазифадор кардааст, ки 300 ҳазор рубл (беш аз 3 ҳазор доллар) ҷарима пардозад.
Баъд аз ҳамлаи Маскав ба хоки Украина дар моҳи феврали соли 2022, теъдоди парвандаҳои хиёнат ба ватан дар Русия афзудааст.
Нашрияи "Важние истории" рӯзи 18-уми октябр навишт, ки танҳо дар шаш моҳи соли 2024 дар Русия 52 нафарро бо гуноҳи хиёнат ба давлат ба зиндон маҳкум кардаанд.
Ба иттилои манбаъ, шумори касоне, ки дар Русия ба ҷосусӣ маҳкум шудаанд, низ бештар шудааст. Дар шаш моҳи соли 2024-ум 18 нафарро бо ин гуноҳ маҳкум карданд.
Ҳамаи хабарҳои имрӯзро дар инҷо бихонед
Модари Далерҷон Мирзоев: "Бо задану кӯфтан гуноҳро ба сараш бор карданд"
Модари яке аз гумонбарони асосии ҳамла ба "Крокус Сити Ҳолл" дар Русия, ки ба ҳабси абад маҳкум шуд, ҳукми додгоҳи низомии Маскавро беасос хонд.
Гулракат Мирзоева, модари Далерҷон Мирзоев, рӯзи 12-уми март дар суҳбат бо Радиои Озодӣ гуфт, нисбат ба писараш "туҳмат шудааст".
"Бо шиканҷа ва задану кӯфтан гуноҳро ба сараш бор карданд. Ҳамааш дурӯғ аст. Ягон бор моро даъват накарданд, напурсиданд. Дар ҳаққи бачаам туҳмат аст. Вай ин корҳоро намекард. Худоё, акнун ман ба куҷо муроҷиат кунам, кӣ пушти моро мегирад?" – афзуд ӯ.
Далерҷон Мирзоев ва 14 нафари дигар рӯзи 12-уми март бо айбномаи тарҳрезӣ ва ҳамла ба толори "Крокус Сити Ҳолл" дар Маскав ба ҳабси якумрӣ маҳкум ва чаҳор тани дигар аз 19 то 22 сол зиндонӣ шуданд.
Як нафари онҳо аз Қирғизистон, ду тан аз Ингушистон ва боқимонда аз Тоҷикистон ҳастанд.
Мавқеи маҳкумшудаҳо ба хулосаи додгоҳ ҳанӯз маълум нест, вале пештар баъзе аз онҳо дар нома ва дархостҳои ҷудогона худро бегуноҳ дониста ё хоҳони дигар кардани парванда шуда буданд. Бархе ҳам, ба қавли вакилони мудофеъ, "ба гуноҳ иқрор карданд", вале маълум нест таҳти чӣ шароите.
Мақомоти Тоҷикистон ҳанӯз дар ин бора вокуниш накардаанд.
Ҳамла ба толори консертии "Крокус" рӯзи 22-юми марти соли 2024 рӯй дод ва дар натиҷа 149 нафар куштаву садҳо тан захмӣ шуданд.
Ҳодисаи “Крокус”, ки муҳоҷирони тоҷик дар марказаш қарор гирифтанд, ба кору зиндагӣ ва нақшаву нияти даҳҳо ҳазор кас дар Тоҷикистон ва Русия таъсир гузошт. Ҳарчанд муносибати дағал, санҷишҳои пайиҳам, маъракаи зидди муҳоҷирон дар Русия ва боздошту ихроҷи онҳо то моҳи марти соли 2024 низ ҷой дошт, баъди он бештар шуд.
Эълони ҳукми гумонбарони ҳамла ба "Крокус Сити Ҳол"
Додгоҳи ҳарбии Русия рӯзи 12-уми март чор гумонбари ҳамла ба толори консертии "Крокус Сити Ҳол"-ро дар соли 2024 ба ҳабси абад маҳкум кард.
Хабаргузории расмии ТАСС аз толори додгоҳ навишт, инҳо Фаридуни Шамсиддин, Далерҷон Мирзоев, Муҳаммадсобир Файзов ва Саидакрам Раҷабализода мебошанд.
Дар курсии айбдорӣ 19 нафар нишастаанд, ки аксарашон зодагони Тоҷикистон ҳастанд. Онҳо ба тарҳрезиву мусоидат ва анҷоми ҳамлаи террористӣ муттаҳам мешаванд.
Муҳокимаи гумонбарон аз моҳи августи 2025 дар Додгоҳи дуюми ҳавзаи ғарбии низомӣ дар Маскав ҷараён дошт. Баъзе аз расонаҳои Русия навишта буданд, ки гумонбарон хоҳони сабук кардани ҷазо ҳастанд.
Дар ҳамлаи террористӣ ба "Крокус" дар канори Маскав дар рӯзи 22-юми марти соли 2024-ум 150 нафар нафар кушта ва 609 кас маҷруҳ шуданд.
Нерӯҳои қудратии Русия ҳангоми боздошти гумонбарон даст ба азияту шиканҷаи бераҳмонаи онҳо заданд ва созмонҳои ҳомии ҳуқуқ ба мисли Human Rights Watch гуфтанд, ки ба эътирофи гумонбарон бовар кардан душвор аст.
Швейтсария сафораташро дар Эрон муваққатан баст
Вазорати корҳои хориҷии Швейтсария рӯзи 11-уми март эълон кард, ки бинобар идомаи ҷанг дар Ховари Миёна ва афзоиши хатарҳои амниятӣ, сафорати худро дар Теҳрон муваққатан мебандад.
Ба гузориши "Рейтерс", дар эъломияи ин вазорат гуфта шудааст, ки Швейтсария бо машварати ду кишвар ба ҳифзи хати иртиботи боз байни Амрико ва Эрон идома хоҳад дод.
Ҳукумати Олмон ҳам ба далели таҳдидҳои амниятӣ аз даргириҳои низомӣ дар Ховари Миёна, кормандони шуморе аз намояндагиҳои дипломатии худро дар минтақа, аз ҷумла, Эрон ва Ироқ кам кардааст.
Як сухангӯйи Вазорати корҳои хориҷии Олмон рӯзи 11-уми март ба хабарнигорон гуфт, "кормандони намояндагиҳои Олмон бинобар вазъияти таҳдидомези феълӣ, муваққатан коҳиш дода шуданд", аммо ӯ нагуфт, ки ин афрод ба куҷо ва ё кадом кишвари дигар бурда шуданд.
Ҳамлаи Амрико ва Исроил ба Эрон рӯзи 28-уми феврал оғоз шуд ва ҳанӯз идома дорад. Ҷумҳурии Исломӣ дар посух бо мушаку паҳпод шуморе аз кишварҳоро дар Ховари Миёна ҳадаф қарор додааст.
Ихроҷи 65 шаҳрванди Узбекистон аз Амрико
Сафорати Амрико дар Узбекистон хабар дод, ки рӯзи 11-уми март як гурӯҳи иборат аз 65 муҳоҷири узбекистонӣ аз Иёлотти Муттаҳида ба ватанашон баргардонда шуданд.
Мақомоти Амрико дар шарҳи сабаби ронда шудани ин муҳоҷирон гуфтаанд, онҳо иҷозаи қонунии иқоматро надоштанд.
Ба навиштаи сафорат, аз моҳи январи соли 2025 то кунун беш аз 1000 шаҳрванди Узбекистон аз ин кишвар ронда шудаанд.
Мақомоти ИМА гуфтаанд, ин иқдом дар доираи барномаи мубориза бо муҳоҷирати ғайриқонунӣ ва ҳифзи марзҳо гирифта шуд.
Онҳо ҳушдор додаанд, ки ҳар касе ғайриқонунӣ барои ворид шудан ба ин кишвар талош мекунад, зиндонӣ ё иҷборан ихроҷ карда мешавад.
Вашингтон аз ҳукумати Узбекистон барои ҳамкорӣ дар бозгардондани шаҳрвандони ин кишвар изҳори миннатдорӣ кардааст.
Боздошт ва берун кардани муҳоҷирони ғайриқонунӣ аз қаламрави ИМА аз сиёсатҳои президент Доналд Трамп аст.
Аз замони ба сари қудрат омадани ӯ даҳҳо тоҷикистонӣ ҳам аз ин кишвар ронда шудаанд.
Оё Амрико мехоҳад ҷазираи Хорги Эронро тасарруф кунад?
Бахши марказии Радиои Озодӣ рӯзи 11-уми март аз қавли коршиносон навишт, ки ҷазираи Хорг, нуқтаи асосии содироти нафти Эрон, метавонад як ҳадафи Иёлоти Муттаҳида бошад. Ин иқдом сарчашмаи даромадеро хоҳад баст, ки иқтисоди аз таҳримҳо осебдидаи Теҳронро побарҷо нигоҳ медорад.
Тасарруфи эҳтимолии ҷазираи хурд дар Халиҷи Форс, ки қариб 90 дарсади нафти содиротии Эрон аз онҷо ба берун бурда мешавад, баёнгари шиддат гирифтани ҷанги Амрикову Исроил ба зидди Ҷумҳурии Исломӣ хоҳад буд. Аммо ба гуфтаи коршиносоне, ки Радиои Аврупои Озод/Радиои Озодӣ бо онҳо ҳамсуҳбат шуд, ин иқдом шояд зарбаи ҷонкоҳе ба иқтисоди Эрон назанад.
Пойгоҳи "Axios" рӯзи 7-уми март хабар дод, ки ҳукумати Амрико масъалаи зери назорат гирифтани ҷазираи Хоргро баррасӣ кардааст. Эрон аз соли 1960 барои содироти нафти худ аз он истифода мекунад. Лангаргоҳҳои Хорг имкон медиҳанд, ки киштиҳои азими нафткашон дар он ҷо бор бигиранд.
Як манбаи наздик ба ҳукумати Амрико ба нашрияи "The New York Post" гуфтааст, тасарруфи ҷазираи Хорг "бо таваҷҷуҳ ба моҳияти ҳаётии он барои натиҷаи ҷанг", бештар масъалаи "вақт" аст.
Маъмурияти Доналд Трамп дар ин бора ошкоро ҳарфе нагуфтааст.
Грегори Брю, таҳлилгари аршади ширкати Eurasia Group, ба Радиои Озодӣ гуфт: "Эрон панҷ истгоҳи дигари содироти нафт дорад. Аз ҷумла, истгоҳи нави Ҷоск дар шарқи гулӯгоҳи Ҳурмуз, ки ба воситаи лӯлаи тақрибан 1000-километрӣ ба майдонҳои асосии нафти Эрон пайваст аст."
Агар Иёлоти Муттаҳида талош кунад назорати Хоргро ба даст гирад, Эрон метавонад истгоҳҳои нафтро дар ин ҷазира нобуд кунад. Коршинос Брю гуфт, мумкин аст, мақомоти Эрон беҳтар шуморанд, ки зерсохтҳои ҷазираи Хоргро худашон аз байн баранд, то ин ки ба дасти дигарон биуфтад.
Брю ҳамчунин гуфт, ҳар гуна нерӯи низомии амрикоӣ дар ҷазираи Хорг дар баробари ҳамлаҳои ҷавобии Эрон осебпазир хоҳад буд. Чун, ба гуфтаи ӯ, ин ҷазира аз ҳамлаҳои мушакӣ ё паҳподӣ ҳеч гуна муҳофизати ҷиддӣ надорад.
Тасарруфи ҷазираи Хорг аз сӯйи Иёлоти Муттаҳида мумкин аст барои раҳбари нави олии Эрон, оятуллоҳ Муҷтабо Хоманаӣ, низ як баҳонаи бузурги таблиғотӣ фароҳам кунад.
“Ин метавонад ба режими Эрон имкон диҳад, ки ҳадафи ҷангро аз ҳимояти худ дар баробари ҳамлаи Амрикову Исроил ба ҳифзи тамомияти арзии кишвар дигар кунад,” – гуфт Грегори Брю.
Маҷлиси Хубрагон рӯзи 8-уми март Муҷтабо Хоманаиро ба ҷойи падараш Алии Хоманаӣ раҳбари олии Эрон интихоб кард. Алии Хоманаӣ, ки 37 сол раҳбари Ҷумҳурии Исломӣ буд, рӯзи 28-уми феврал дар ҳамлаҳои Амрикову Исроил кушта шуд.
Амрико ҳукумати Толибонро "ҳомии боздоштҳои ноҳақ" номид
Иёлоти Муттаҳида Афғонистонро "ҳомии боздоштҳои ғайриқонунӣ" номид ва ҳукумати эътирофнашудаи "Толибон"-ро ба нигоҳ доштани шаҳрвандони Амрико ҳамчун абзори фишор айбдор кард.
Марко Рубио, вазири корҳои хориҷии Амрико, рӯзи 9-уми март гуфт, ҳукумати "Толибон" барои ба даст овардани имтиёзҳои сиёсӣ аз "усулҳои террористӣ" истифода мекунад.
"Онҳо мардумро мерабоянд, то дар иваз боҷ бигиранд ё имтиёз ба даст биоваранд. Истифода аз ин равишҳои нописанд бояд поён ёбад," – афзуд ӯ.
Деннис Койл, пажӯҳишгари 64-солаи амрикоӣ, моҳи январи соли 2025 аз ҷониби "Толибон" дастгир шуд.
Маҳмуд Ҳабибӣ, шаҳрванди дигари Амрико, аз моҳи августи соли 2022 дар Афғонистон дар боздошт аст. Вай дар ҳукумати пешинаи Афғонистон, ки аз пуштибонии Иёлоти Муттаҳида баҳравар буд, раёсати Идораи ҳавонавардиро ба уҳда дошт.
Бо ин ҳол, ҳукумати Амрико нагуфтааст, ки пас аз шомил шудани Афғонистон ба рӯйхати "ҳомии боздоштҳои ғайриқонунӣ" чӣ чора хоҳад дид.
Вазорати корҳои хориҷии "Толибон" рӯзи 10-уми март рад кард, ки шаҳрвандони амрикоиро барои гирифтани имтиёз нигоҳ медорад.
"Бо мардум дағалӣ накунед." Талаби як мансабдори ВКД аз милисаҳо
Як мансабдори баландпояи Вазорати корҳои дохилӣ аз маъмурони милиса ва нозирони роҳ дар шаҳри Панҷакент хостааст, бо мардум хушмуомилаву нарм бошанд ва дағаливу бадрафторӣ накунанд.
Вазорати корҳои дохилӣ рӯзи 10-уми март бо нашри баёнияи расмӣ гуфт, генерал Маҳмадсафар Пирзода аз афсарону маъмурони милисаи шаҳри Панҷакент хостааст, ҳангоми иҷрои вазифа манфиати давлату ҷомеаро дар мадди аввал гузоранд ва аз ҳадди ваколати хидматӣ нагузаранд.
Дар баёния ҳамчунин омадааст, Маҳмадсафар Пирзода аз ҳайати кормандон талаб кардааст, ки “зимни иҷрои вазифа бо мардум хушмуомила бошанд.”
Пирзода сардори Раёсати корҳои дохилӣ дар вилояти Суғд аст.
Ҷаласа бо маъмурони милиса дар шаҳри Панҷакент баъди ҷанҷолу кашмакаши нозирони роҳ бо ронандагон дар ноҳияи Мастчоҳ сурат гирифт.
Баъди нашри видеои ин моҷарои ҳиҷолатовар барои мақомоти интизомии Тоҷикистон, раисҷумҳур Эмомалӣ Раҳмон рӯзи 6-уми март раҳбарони додгоҳ, додситонӣ ва пулиси ноҳияи Мастчоҳро аз мақомҳояшон барканор кард.
Дар ин видео, ки рӯзи 3-юми март корбарон ба Радиои Озодӣ фиристоданд, дида мешавад, ки чанд нозири роҳ бо ронандагон даъвову кашмакаш доранд ва ҳамдигарро дашномҳои зишту қабеҳ медиҳанд.
Шикоят аз бадрафтории маъмурони милиса ва тамаъҷӯии нозирони роҳ дар Тоҷикистон ҳамеша вуҷуд дорад, агарчӣ Вазорати умури дохилӣ мегӯяд, ҳар касе, ки аз салоҳиятҳои хидматии худ фаротар меравад, ҷазо мегирад.
Ҳудуди 140 сарбози амрикоӣ дар ҷанг бо Эрон захмӣ шудаанд
Сухангӯйи Вазорати дифоъ ё ҷанги Амрико рӯзи 10-уми март эълон кард, ки аз оғози ҷанг алайҳи Эрон, ҳудуди 140 нерӯи низомии Иёлоти Муттаҳида дар ҳамлаҳои мухталиф захмӣ шудаанд.
Дар баёнияи Пентагон омадааст, аксарияти онҳо ҷароҳатҳои сабук бардошта, то кунун 108 нафари онҳо ба хидмат бозгаштаанд.
Ба гуфтаи сухангӯи Вазорати дифоъ ё ҷанги Амрико, ҳашт нафар аз нерӯҳои низомӣ ҳамчунон дар феҳристи захмиёни вазнин қарор доранд ва ҳоло муолиҷа мегиранд.
Пентагон пештар гузориш дода буд, ки ҳафт сарбози амрикоӣ дар ҷараёни ҷанг бо Эрон ҷони худро аз даст додаанд.
Узбекистон 25 ҳазор шаҳрвандашро аз Ховари Миёна берун овард
Мақомоти Узбекистон эълон карданд, ки то 10-уми март беш аз 25 ҳазор шаҳрванди ин кишварро аз Ховари Миёна баргардонидаанд.
Вазорати корҳои хориҷии Узбекистон гуфтааст, зиёда аз 21 ҳазор нафар аз Арабистони Саудӣ, беш аз 3 ҳазор кас аз Имороти Муттаҳидаи Арабӣ, 47 нафар аз Эрон ва 344 кас аз Қатару 28 нафар аз Баҳрайну Умон берун оварда шуданд.
Бозгардонидани шаҳрвандони Узбекистон тариқи кишварҳое сурат гирифтаст, ки ҳарими ҳавоияшон боз буд.
Аз оғози ҳамлаҳои Амрикову Исроил ба Эрон дар рӯзи 28-уми феврал ва зарбаҳои ҷавобии Теҳрон, парвозҳои мунтазам ба Баҳрайну Кувайт, Сурияву Ироқ ва Эрону Қатару Исроил номумкин шуд. Барои овардани шаҳрвандони бандмонда, кишварҳои Осиёи Марказӣ парвозҳои махсус ё чартерӣ ба роҳ монданд.
Дар ин муддат садҳо шаҳрванди Тоҷикистон ҳам аз Эрону кишварҳои арабӣ ба ватан оварда шуданд.
Мақомоти Узбекистон эълон карданд, ки аз 10-уми март парвозҳои рафту бозгашт ба Арабистони Саудӣ ва Имороти Муттаҳидаи Араб имконпазир шудааст ва ҳавопаймоҳо метавонанд бо риояи талаботи бехатарӣ парвоз анҷом диҳанд.
Вазири дифои Амрико гуфт, ҳамла ба Эрон сахттар хоҳад шуд
Пит Ҳегсет, вазири дифоъ ё ҷанги Иёлоти Муттаҳида, гуфт, рӯзи 10-уми март ҳамла ба Эрон сахттар ва бештар хоҳад шуд.
Ӯ дар як нишасти хабарӣ дар Пентагон гуфт: "Имрӯз дубора шадидтарин рӯзи ҳамлаҳои мо дар дохили Эрон хоҳад буд."
Ба қавли Ҳегсет, Эрон танҳо монда ва дар ҳоли таҳаммули шикаст аст.
Вазири дифои Амрико дар айни замон Ҷумҳурии Исломиро муттаҳам кард, ки мушакандозҳои худро дар канори хонаҳои мардум ва наздики мактабу бемористонҳо ҷойгир кардааст, "то тавоноии моро дар задани онҳо коҳиш диҳад".
Амрико ва Исроил рӯзи 28-уми феврали имсол ба Эрон ҳамла карданд, ки бар асари он раҳбари олии ин кишвар Оятуллоҳ Алии Хоманаӣ ва шуморе аз фармондеҳони баландпояи низомӣ кушта шуданд.
Эрон дар вокуниш ба ҳамлаҳои Амрико ва Исроил, ба Исроил ва чанд кишвари арабии ҳавзаи Халиҷи Форс, ки мизбони пойгоҳҳои низомии ИМА ҳастанд, ҳамлаҳои густурда анҷом дод.
Зарбаҳои ду тараф ба ҳамдигар бо мушаку ҳавопаймо идома дорад.
Гуфтугӯи Трампу Путин дар бораи ҷанги Эрон ва сулҳ дар Украина
Доналд Трамп, президенти Амрико ва ҳамтои руси ӯ Владимир Путин дар як гуфтугӯи телефонӣ ҷанги Эрон ва дурнамои сулҳ дар Украинаро баррасӣ карданд.
Ин гуфтугӯ чанд соат пас аз ҳушдори раисҷумҳури Русия дар бораи хатари буҳрони энержӣ барои иқтисоди ҷаҳон сурат гирифт.
Ҳамлаи Амрико ва Исроил ба Эрон боиси болоравии шадиди нархи нафт дар бозорҳои ҷаҳонӣ шуд, ки чунин ҷаҳиш баъд аз оғози ҷанги Русия дар Украина дар соли 2022 собиқа надошт.
Дар пайи баста шудани гулӯгоҳи Ҳурмуз, тавлидкунандагони нафт дар Халиҷ истихроҷро коҳиш додаанд.
Ба гуфтаи ҷониби Русия, раҳбарон пешниҳодҳои Маскавро барои хотимаи зуди низоъ дар Эрон, вазъ дар Украина ва бозори ҷаҳонии нафт баррасӣ кардаанд.
Қатъи кори 9 бемористон бар асари ҳамлаҳо дар Эрон
Як узви Кумисюни тандурустии Маҷлиси Эрон рӯзи 10-уми март ба хабаргузории "Илна" гуфтааст, бар асари ҳамлаҳои Амрикову Исроил ба Ҷумҳурии Исломӣ 9 бемористон аз кор монд.
Муҳаммад Ҷамолиён ба таври мушаххас нагуфтааст, ки ин бемористонҳо дар кадом шаҳр ва минтақаҳои Эрон қарор доранд.
Ба иттилои вай, аз оғози ҳамлаҳои муштарак 25 маркази тиббӣ дар Эрон зарар дида, ба ҷуз 9 бемористон, боқимонда камобеш фаъолият доранд.
18 шуъба ва 14 мошини “Ёрии таъҷилӣ” дар Ҷумҳурии Исломӣ низ вайрон гаштааст.
Амрико ва Исроил рӯзи 28-уми феврали имсол ба Эрон ҳамла карданд, ки бар асари он раҳбари олии ин кишвар Оятуллоҳ Алии Хоманаӣ ва шуморе аз фармондеҳони баландпояи низомӣ кушта шуданд.
Эрон дар вокуниш ба ҳамлаҳои Амрико ва Исроил, ба Исроил ва чанд кишвари арабии ҳавзаи Халиҷи Форс, ки мизбони пойгоҳҳои низомии ИМА ҳастанд, ҳамлаҳои густурда анҷом дод.
Зарбаҳои ду тараф ба ҳамдигар бо мушаку ҳавопаймо идома дорад.
Чин дар Тоҷикистон даҳҳо дидбонгоҳи нави марзӣ месозад
Қарор аст, дар ояндаи наздик бо сармояи Чин дар марзҳои гоҳо ноороми Тоҷикистон дидбонгоҳу қароргоҳҳои нав сохта шавад.
Маҷлиси намояндагон ҳафтаи гузашта бо тасдиқи “Номаҳои табодулӣ байни Тоҷикистон ва Чин” роҳро барои иҷрои ин тарҳ ҳамвор кард.
Муродалӣ Раҷабзода, муовини аввали раиси Кумитаи давлатии амнияти миллӣ, дар ҳузури вакилон гуфтааст, ҳадаф аз ин кор “боз ҳам амиқтар гардонидани шарикии стратегӣ байни Тоҷикистон ва Чин” ва посбонии муносиби марзҳои кишвар аст.
Ба гуфтаи вай, баъд аз иҷрои ин расмиёт, Чин дар марзҳои Тоҷикистон бо арзиши тақрибан 425 миллион юан ё 61 миллион доллар иншооти сарҳадӣ месозад.
Ӯ мушаххас нагуфтааст, ки ин чӣ гуна иншоот хоҳад буд, аммо дар гузашта Чин дар марз бо Афғонистон барои афсарони тоҷик чанд дидбонгоҳ ва қароргоҳ бунёд кардааст.
Ба гуфтаи Муродалӣ Раҷабзода, Чин дар солҳои 2017-2018 ба таври ройгон дар марзи ноороми Тоҷикистон бо Афғонистон барои посбонии марз 12 иншооти махсус сохтаву ба истифода дод.
Дар гузашта гузоришҳое ҳам буданд, ки Чин дар қаламрави Тоҷикистон барои худ пойгоҳи низомӣ сохтааст, вале мақомот соли 2024 онро рад карданд.
Чин дар ҳоли ҳозир аз сармоягузорони аслӣ ба иқтисоди Тоҷикистон ба шумор меравад ва қарзи Душанбе аз Пекин бештар аз 800 миллион долларро ташкил медиҳад.
Тоҷикистон бо Чин, бо дувумин иқтисоди бузурги ҷаҳон, тақрибан 500 километр марзи муштарак дорад. Пойбандии кишвар ба Чин сол ба сол бештар мешавад ва ин нигаронӣ вуҷуд дорад, ки Тоҷикистон дар оянда пойбанди амру иродаи сиёсии Чин хоҳад гашт.
Нархи як бушка нафт то 120 доллар расидааст
Нархи нафти навъи Brent дар бозорҳои минтақаи Осиё рӯзи 9-уми март якбора боло рафта, нархи як бушкаи он ба қариб 120 доллар баробар шудааст.
Аз тобистони соли 2022 то ин вақт ин бори аввал аст, ки нархи нафти навъи Brent ба ин сатҳ мерасад.
Бино ба нишондодҳои бозори бурси биржаи ICE дар Лондон, қиммати нафти Brent тақрибан 29 дарсад боло рафтааст.
Субҳ ба вақти Маскав арзиши ҳар бушка нафт 116 долларро ташкил медод, вале дертар он то ба 107 доллар поин оварда шуд.
Болоравии якбораи нархи маводи сӯхт ба ҷанг дар Ховари Миёна ва ҳамлаи Амрико ва Исроил алайҳи Эрон рабт дода мешавад.
Ҳамлаҳои низомӣ ва баста шудани оброҳа ё гузаргоҳи Ҳурмуз сабаби асосии афзоиши қимати нафт гуфта мешавад. Беш аз 20 дарсад аз нафти ҷаҳон аз тариқи ин оброҳа кашонда мешавад.
Президенти ИМА Доналд Трамп изҳор дошт, ки болоравии нархҳо "баҳои хеле ночиз барои амният ва сулҳи Амрикову тамоми ҷаҳон аст".
Ба гуфтаи Трамп, вақте таҳдиди барномаи ҳастаии Эрон аз байн бурда мешавад, нархҳо зуд поин мераванд.
"Сомон Эйр" аз оғози парвозҳо ба Дубай хабар дод
Ширкати ҳавопаймоии "Сомон Эйр" аз оғози парвозҳо ба Дубай хабар дод. Ин ширкат рӯзи 9 март бо нашри як эълон гуфт, рӯзҳои 11, 13 ва 15 март дар хатсайри Душанбе-Дубай-Душанбе парвозҳо анҷом хоҳад дод.
Парвозҳо бо нишасту парвоз дар фурудгоҳи байналмиллалии Al Maktoum International Airport ба нақша гирифта шудаанд.
"Сомон Эйр" 3-юми март эълон карда буд, ки "ба сабаби ҷорӣ шудани маҳдудият дар истифодаи ҳаримӣ ҳавоӣ", парвозҳо аз Душанбе ба Теҳрон ва Дубай муваққатан манъ карда мешавад.
Дар пайи он, мақомот аз роҳандозии парвозҳои чартерӣ барои овардани тоҷикистониҳое, ки дар кишварҳои арабӣ банд мондаанд, хабар дода буданд.
Ширкати “Сомон Эйр” вазифадор шуд, ки бо анҷоми парвозҳои махсус шаҳрвандони бандмондаи Тоҷикистонро аз Имороти муттаҳидаи араб ба кишвар биёрад.
Рӯзи 8-уми март ширкат 178 нафар шаҳрвандони Тоҷикистонро бо чунин як парвоз аз Дубай ба Душанбе овард.