Наим Қосим, раҳбари "Ҳизбуллоҳ", ки аз ҷониби Эрон пуштибонӣ мешавад, дар суханронии аввалинаш пас аз эълони оташбас дар 27-уми ноябр аз "пирӯзӣ" суҳбат кард.

Ӯ гуфт, ки мо ба душман иҷоза надодем, ки гурӯҳи "муқовимати лубнониро шикаст диҳад."

"Ҳизбуллоҳ", ки ҷануби Лубнонро дар даст дорад, шохаи сиёсӣ ва низомӣ дорад. Шохаи сиёсиаш дар порлумони Лубнон соҳиби курсӣ аст. Шохаи низомиашро ИМА ва Иттиҳоди Аврупо террористӣ медонанд.

Оташбас ба ҷанги беш аз яксола миёни "Ҳизбуллоҳ" ва Исроил поён дод. Исроил аз осмону замин ба "Ҳизбуллоҳ" вориди ҷанг шуда буд ва аксари фармондеҳону раҳбарони ин гурӯҳро кушт.

Бар асоси оташбас "Ҳизбуллоҳ" бояд 30 километр аз марзҳои Исроил дур шавад. Исроил ҳам давоми 60 рӯзи оянда бояд артишашро аз хоки Лубнон берун кунад.

Исроил таҳдид кардааст, ки агар дубора бинад, "Ҳизбуллоҳ" фаъол мешавад, ба ин гурӯҳ ҳамла хоҳад кард.

Пас аз онки Исроил дар моҳи октябри соли гузашта ба Ғазза дар посух ба кушторҳои ҲАМОС ҳамла кард, "Ҳизбуллоҳ" эълон кард, ки аз фаластиниён пуштибонӣ мекунад.

Ин гурӯҳ гуфта буд, ки то Исроил ҷангашро дар Ғазза бас накунад, ба ҳамлаҳои худ идома хоҳад дод.

Дар пайи як таркиш дар минтақаи Бану дар аёлати Хайбар-Пахтунхоҳи Покистон дастикам ҳафт нафар ҷон бохтаанд.

Ба гузориши хабаргузории Олмон, мақомҳо гуфтаанд, ки ин афрод субҳи 20 июн дар натиҷаи як таркише кушта шуданд, ки мошиши шахсии ҳомили мусофиронро бо истифода аз як бамби дастсоз ҳадаф қарор дод.

Яке аз мақомҳои маҳаллии пулис гуфтааст, се нафари дигар низ ба шиддат захмӣ ҳастанд.

Ӯ афзуд, ки нерӯҳои амниятӣ минтақаро муҳосира кардаанд ва таҳқиқот дар бораи ин ҳодиса оғоз шудааст.

Шаҳбоз Шариф, нахуствазири Покистон ин ҳамларо маҳкум карда, бори дигар бар ӯҳдадории ҳукуматаш барои мубориза бо терроризм, таъкид кардааст.

То кунун ҳеч гурӯҳе масъулияти ин ҳамларо ба ӯҳда нагирифтааст.

Нахустин мурофиаи додгоҳии куштори Саломатшо Ғалчаев, сокини 34-солаи ноҳияи Ванҷ, рӯзи 19 июн дар Додгоҳи ҳарбии Хоруғ оғоз шуд.

Ба нақли шоҳидон, дар ин мурофиа айбдоршаванда Ивазмад Қодиров, афсари Вазорати корҳои дохилӣ ва наздикони Саломатшо Ғалчаев ҳузур доштанд.

Неъмат Ғалчаев, бародари Саломатшо Ғалчаев рӯзи 19 июн ба Радиои Озодӣ гуфт, яке аз шоҳидон, ки дар вақти муноқишаву куштор ҳамроҳи афсари милиса Ивазмад Қодиров дар ҷои ҳодиса будааст, ба мурофиа ҳозир нашуд ва бинобар ҳамин, муҳокима ба вақти дигар гузошта шуд.

"Ин мурофиа ошноӣ бо парванда буд ва шарҳ дода шуд, ки дар вақти рух додани муноқиша ҳамроҳи афсари милиса ду нафари дигар низ буданд ва яке аз онҳо дар ҳамон рӯзи ҳодиса билети ҳавопаймо дошта, ба Маскав парвоз кардаааст. Мақомоти додгоҳӣ барои ширкати ӯ даъватнома фиристода, рӯзи мурофиаро ба сешанбеи ҳафтаи дигар гузошт",-афзуд бародари Саломатшо Ғалчаев.

Дар ин парванда Ивазмад Қодиров, афсари Вазорати корҳои дохилии Тоҷикистон тибқи моддаи 104, қисми яки Кодекси ҷиноӣ ба иттиҳоми "одамкушӣ", муҳокима мешавад. Ин моддаи Кодекси ҷиноӣ барои айбдоршаванда аз 8 то 15 сол зиндон пешбинӣ мекунад.

Дар ҳоли ҳозир мавқеи фарди муттаҳам ва наздиконаш ба қазия маълум нест. Додгоҳи ҳарбии Хоруғ дар робита ба ин қазия ба зангҳои мо посух надод.

Дар ҳоли ҳозир Ивазмад Қодиров, афсари Вазорати корҳои дохилии Тоҷикистон дар Боздоштгоҳи шаҳри Хоруғ қарор дорад.

Ҳодиса шаби 17-уми март дар деҳаи Рохарви ноҳияи Ванҷ рӯй дод. Дар ҳоле ки мақомот тафсилот намедиҳанд, як манбаи боварбахши Радиои Озодӣ гуфт, моҷаро гуё бар сари робитаи афсари Вазорати корҳои дохилӣ бо як духтари мактабхон, ки хеши ҷавони кушташуда аст, сар задааст.

Неъматҷон Ашӯрматов моҳи марти соли ҷорӣ бо талаби дарёфти 280 ҳазор сомонӣ ҷуброни зарари маънавӣ ба додгоҳ шикоят бурда буд.

Ӯ ҳудуди дувуним сол пеш бо гумони қочоқи маводи мухаддир аз сӯи маъмурони пулис дар Хуҷанд боздошт ва ба гуфтааш, аз сӯи онҳо мавриди шиканҷа ва бадрафторӣ қарор гирифта буд.

Эътилофи зидди шиканҷа дар Тоҷикистон, ки аз ҳуқуқи Неъматҷон Ашӯрматов ҳимоят мекунад, рӯзи 19-уми июн хабар дод, ки Додгоҳи ноҳияи Исмоили Сомонӣ рӯзи 18-уми июн даъвои ӯро "қисман қонеъ кардааст".

Дар хабар гуфта нашудааст, ки додрас ВКД-ро ба пардохти чӣ миқдор ҷуброни зиён ба Неъматҷон Ашӯрматов вазифадор кардааст.

Вале вакилони дифои Неъматҷон Ашӯрматов мегӯянд, ки ният дорад бо дарёфти қарори додгоҳ онро баррасӣ карда, ба Додгоҳи шаҳри Душанбе шикояти кассатсионӣ баранд.

Вазорати корҳои дохилии Тоҷикистон то кунун дар ин бора ибрози назар накардааст. Додгоҳи ноҳияи Исмоили Сомонӣ ҳам мавзӯъро шарҳ надодааст.

Неъматҷон Ашӯрматов 22-юми феврали соли 2024 аз сӯи кормандони Шӯъбаи корҳои дохилӣ дар Хуҷанд ба гумони даст доштан дар муомилоти ғайриқонунии маводи мухаддир боздошт мешавад ва ба гуфтааш, ҳангоми дар бинои шӯъба қарор доштан, аз сӯи маъмурони пулис мавриди шиканҷа ва бадрафторӣ қарор мегирад.

Дар пайи ин ҳодиса, 29-уми апрели соли 2024 Додситонии вилояти Суғд алайҳи 4 корманди Шӯъбаи корҳои дохилии шаҳри Хуҷанд барои "сӯистифода аз ваколат" парвандаи ҷиноӣ боз кард. Ду корманд ба ҳабс гирифта шуда, ду нафари дигар дар пайгард қарор гирифтанд.

Баъдан бо дархости вакилони дифои Неъматҷон Ашӯрматов, амали кормандони милиса аз рӯи моддаи "шиканҷа" тафтиш шуд.

Ба иттилои вакилони дифои Неъматҷон Ашӯрматов, соли 2025 яке аз ин кормандони пулис Дилшод Нарзуллозода, бо чанд моддаи Кодекси ҷиноӣ ба 21 сол зиндон, 10 соли маҳрумият аз ишғоли мансабҳои муайян ва адои ҷазо дар колонияи ислоҳии низомаш шадид маҳкум шуд.

Корманди дигари пулис Абдуқодир Каримов ба 19 сол зиндон бо маҳрум сохтан аз ишғоли мансаб ба мӯҳлати 10 сол маҳкум шуд.

Истифода аз шиканҷа барои ҳосил кардани эътирофи "гуноҳ" дар Тоҷикистон яке аз мушкилоти ҷиддӣ дар мақомоти интизомӣ дониста мешавад.

Кумитаи маҳви шиканҷаи Созмони Милал аввали моҳи майи имсол аз "гузоришҳои пайваста дар бораи бадрафторӣ ва шиканҷа, бахусус аз тарафи афсарони милиса ва афсарони идораҳои амниятӣ дар боздоштгоҳ ва зимни бозпурсиҳо" изҳори нигаронӣ кард.

Кумитаи Созмони Милал барои маҳви шиканҷа гуфт, ҳарчанд дар қонунҳои Тоҷикистон барои бадрафториву шиканҷа ҷазои сахт таъйин шудааст, иҷрои он камтар ба назар мерасад ва теъдоди онҳое, ки барои шиканҷаи зиндонӣ ё боздоштшудае ҷазо гирифтаанд, бисёр кам аст.

Ба гуфтаи Вазорати адлияи Тоҷикистон, аз соли 2018 то соли 2025 танҳо 13 нафар барои шиканҷа ҷазо гирифтаанд, агарчӣ шикоятҳои расмӣ аз рафтори тарафи маъмурони амниятиву интизомӣ аз 100 адад ҳам зиёдтар будааст.

Нашри изҳороти Доналд Трамп, раисҷумҳури Амрико дар бораи Ҷорҷиа Мелони, нахуствазири Италия дар рузи 19 июн, боиси таниш дар робита миёни ин ду муттаҳид шуд ва Антонио Таяни, вазири корҳои хориҷии Италия сафари барномарезишудааш ба Вашингтонро бекор кард.

Бар асоси гуфтугӯе, ки шабакаи италиявии «La7» аз Доналд Трамп нашр кард, президенти Амрико гуфтааст, ки Ҷорҷиа Мелони дар нишасти ахири раҳбарони Гурӯҳи 7 дар Фаронса ба Трамп "илтимос кардааст", ки бо ӯ акс бигирад. Трамп гуфтааст, фақат ба ин далел, ки "дилаш барояш мезӯзад", бо ин дархост мувофиқат кардааст.

Раисҷумҳури Амрико ҳамчунин гуфтааст, ки Ҷорҷиа Мелони "эҳтимолан хушҳол будааст, ки бо ӯ сӯҳбат кардаам, маҷбур набудам бо ӯ сӯҳбат кунам".

Нашри ин изҳорот бо вокунишҳои густурдае дар Италия рӯбарӯ шуд ва Ҷорҷиа Мелони бо нашри видеое дар шабакаҳои иҷтимоӣ, сӯҳбатҳои Трампро сохтагӣ хонд ва гуфт, на ӯ ва на Италия "ҳаргиз илтимос намекунем".

Ӯ боз изҳори ҳайрат аз суҳбатҳои Доналд Трамп дар шабакаҳои иҷтимоии Х гуфт, "намедонам чаро раисҷумҳури Амрико бо муттаҳидони худаш ингуна рафтор мекунад".

Хонум Мелони афзуд, "фақат метавонам бигӯям, ҳайф аст, ки ӯ бо душманони Ғарб, душманони ИМА ва раҳбароне, ки дар иваз бо онҳо бисёр созишпазиртар аст, ҳамин қотеиятро нишон намедиҳад".

Дар вокуниши дигар, Антонио Таяни, вазири корҳои хориҷии Италия, суханони Трампро "сахт ва тавҳиномез" хонд ва илова кард, ки сафари барномарезишудааш ба Амрикоро лағв мекунад. Ин сафар қарор буд, рӯзҳои 21 ва 22 июн баргузор шавад.

Пештар Ҷорҷиа Мелони дар поёни нишасти Гурӯҳи 7 дар Фаронса аз "фазои бисёр мусбат" ва "бе бархӯрд" байни Трамп ва дигар раҳбарони ҳозир дар ин ҷаласа сӯҳбат карда буд. Ӯ чандин бор дар ин ҷаласа ҳам бо раисҷумҳури Амрико дида шуд.

Ҷорҷиа Мелони то пеш аз ҷанги ахири Амрико ва Исроил бо Эрон бо доштани робитаҳои гарм бо Доналд Трамп машҳур буд, аммо ин робитаҳо пас аз онки, Мелони аз изҳороти Попи Рум алайҳи ҷанг ҳимоят кард, ба сардӣ гароид.

Дар ним соли гузашта дар шаҳри Душанбе 5 мавриди ба шавҳар додани духтарони ноболиғро сабт ва ба зидди волидони онҳо парвандаи ҷиноӣ боз кардаанд.

Раёсати корҳои дохилии Душанбе рӯзи 19-уми июн дар баёнияе дар Телеграм навишт, бо вуҷуди манъ будани издивоҷи духтарони то 18-сола “баъзе аз падарону модарон дидаву дониста духтари ба синни никоҳ нарасидаи худро ба шавҳар медиҳанд.”

Издивоҷи ноболиғон дар Тоҷикистон ҷиноят аст ва барои кор ҷаримаҳои бузург ва аз 2 то 5 сол зиндон ҷазо таъйин шудааст.

Дар Тоҷикистон фақат дар ҳолатҳои истисноӣ ва бо қарори додгоҳ, ба духтарони ноболиғ ё зери синни 18 сол иҷозаи издивоҷ медиҳанд.

Бино ба омори Додгоҳи олӣ, соли 2025 дар Тоҷикистон бештар аз 3300 духтари ноболиғ издивоҷ кардаанд ва ин никоҳи бармаҳал ва хатарнок барои ояндаи худи духтар ба ҳисоб меравад.

Омбудсмен ё Ваколатдори ҳуқуқи инсон гуфтааст, соли гузашта 20 мавриди беиҷоза ба шавҳар додани духтарони ноболиғ ва 27 мавриди ақди никоҳ бо фарди ҳанӯз ба синни 18 нарасида сабт шудааст.

Мақомоти Украина мегӯянд, яке дигар аз шаҳрвандони Тоҷикистон, ки Русия ба ҷанг фиристодааст, довталабона ба нерӯҳои он кишвар таслим шудааст.

Вазорати дифои Украина рӯзи 19-уми июн дар як баёнияи расмӣ гуфт, ҷавони тоҷик ба тарҳи давлатии “Зистан мехоҳам” муроҷиат кард ва нерӯҳои украинӣ ӯро аз ҷабҳаи ҷанг гуруснаву ташна, вале солим берун оварданд.

Дар ин баёния омадааст, муҳоҷири корӣ аз Тоҷикистон, ки солҳои зиёд дар Русия буд, пас аз боздошт ва таҳдиди ихроҷ шудан бо артиши Русия қарордод баста, ба ҷанги Украина рафтааст.

Тарҳи давлатии “Зистан мехоҳам” дар Украина рӯзи 19-уми июн видеои мусоҳиба бо асири тоҷикро нашр кардааст, ки дар он мегӯяд, баъди рафтан ба ҷанг аз ин кораш сахт пушаймон шуд.

Ному насаби ин шаҳрванди Тоҷикистонро наовардаанд.

Ӯ дар суҳбат гуфтааст, баъди онки дар Маскав боздошт шуд ва қарори ихроҷашро дар дасташ доданд, барои рафтан ба ҷанг розӣ шуд.

Тарҳи давлатии “Зистан мехоҳам” дар Украина моҳи апрели имсол гуфта буд, ки қариб 13 ҳазор нафар аз Осиёи Марказӣ аз тарафи Русия дар Украина меҷанганд. Ин пойгоҳ он замон шумораи тоҷикистониҳоро дар ҷанг беш аз 3 ҳазору 400 кас ҳисоб карда буд.

Омори расмии тоҷикон дар ҷанги Русия алайҳи Украина маълум нест. Мақомот дар ин бора ҳеч иттилоъ намедиҳанд, вале дар бештар аз чаҳор соли ҷанг хабари кушта ва нопадид шудани даҳҳо шаҳрванд ва зодаи Тоҷикистон расонаӣ шуд.

Тарҳи давлатии “Зистан мехоҳам” дар Украина дар як соли охир номи зиёда аз се ҳазор зодаи Тоҷикистонро нашр кардааст, ки дар ҷанги Русия бар зидди Украина ширкат карда, бархе кушта ё нопадид шудаанд.

Ҷустуҷӯйи ҷасади Алишер Мирзонабот, раиси Вилояти Мухтори Кӯҳистони Бадахшон, ҳамсараш Амина Амонуллоева, духтари дусолааш Орифа, ёвараш Садоншо Ҷанобалишо ва ронандааш Сино Муборакшоев идома доштааст.

Як намояндаи Кумитаи ҳолатҳои фавқулода рӯзи 19-уми июн дар суҳбат бо Радиои Озодӣ гуфт, "ҳоло кофтукоб давом дорад. 30 наҷотдиҳанда дар дарёи Панҷ, дар ҳудуди ноҳияи Шамсуддин Шоҳин, кофта истодаанд."

Embed ба дигарон фиристед

Ҷасади Алишер Мирзонаботро то ҳол наёфтаанд

Аз ҷониби Радиои Озодӣ

Embed ба дигарон фиристед

Нусхабардорӣ шуд

---

бар px баландӣ px

---

URL нусхабардорӣ шуд

Феълан кор намекунад

0:00 0:01:30 0:00

Мошини хидматии Алишер Мирзонабот рӯзи 17-уми июн дар ҳудуди ноҳияи Дарвоз ба дарёи Панҷ афтодааст. Ӯ ва ҳамроҳонаш аз Душанбе ба Хоруғ мерафтанд.

Вазорати корҳои дохилии Тоҷикистон сабаби ҳодисаро "суръати баланд" ва "аз ӯҳдаи идораи мошин набаромадани ронанда" номид.

Дар ҳамин ҳол, ба иттилои як манбаи Радиои Озодӣ, мақомоти Тоҷикистон гуё аз масъулони ноҳияҳои ҳаммарзи Афғонистон барои ёфтани ҷасадҳо ёрӣ хостаанд. Мақомот ҳанӯз дар ин бора хабар надодаанд.

Додгоҳе дар Русия ду шаҳрванди Тоҷикистон – зани 65-сола ва марди 42-соларо бо иттиҳоми ғайриқонунӣ гузаштан аз сарҳад ба ҳабс маҳкум кардааст.

Ёвари додситони шаҳри Новотроитск ба расонаҳои маҳаллӣ гуфтааст, ин ду шаҳрванди Тоҷикистон аз ҳаққи даромадан ба хоки Русия маҳрум буданд, аммо ғайриқонунӣ сарҳадро гузаштанд.

Додгоҳ онҳоро ба 1 солу 3 моҳ ҳабси сукунатӣ маҳкум кардааст.

Анастасия Соботович, ёвари додситони шаҳри Новотроитск, ба расонаҳо гуфтааст, шаҳрвандони Тоҷикистон дар додгоҳ ба гуноҳи худ иқрор шудаанд. Радиои Озодӣ мустақилона онро тасдиқ карда наметавонад.

Русия макони асосии кору муҳоҷирати шаҳрвандони Тоҷикистон, аммо дар ду соли гузашта Русия муқаррароти вурудро ба ин кишвар бисёр сахт кард ва қоидаҳои ҷазодиҳандаи зиёде ҷорӣ намуд.

Дар сӯхтори бозори "Садовод"-и шаҳри Маскав чанд тоҷири тоҷик зарар дидаанд.

Бозори "Садовод" дар пойтахти Русия, ки муҳоҷирони тоҷик ҳам он ҷо кор мекунанд, рӯзи 18-уми июн дар ҳамлаи бесарнишинҳои Украина осеб дид. Ба гуфтаи мақомоти Русия, яке аз паҳподҳо ба корхонаи нафт бархӯрда, пораҳои як бесарнишини дар ҳаво сарнагуншуда ба ҳудуди бозори "Садовод" афтиданд.

Як соҳибкори тоҷик, ки дар ин бозор савдо мекунад ва нахост номаш бурда шавад, гуфт, нуқтаи фурӯши атриёташ, ки ба миллионҳо рубл маҳсулот дошт, ба коми оташ рафт.

Ба гуфтаи ин тоҷир, дар бозори "Садовод" тоҷикони зиёд ба савдо машғуланд ва соҳибкорони зарардида асосан онҳое ҳастанд, ки дар қисмати берунии бозор савдо мекунанд.

Мусоҳиби мо афзуд, "бинобар онки ҳамла соати 5-и субҳ сурат гирифтааст, аксари соҳибкорон дар бозор набуданд."

Мақомоти Украина эълон карданд, ки ҳадафи ҳамла корхонаҳои коркарду истеҳсоли нафт буд, ки аз фоидаи фурӯши он Русия зидди Украина меҷангад.

Владимир Зеленский, президенти Украина гуфт, ин посухи одилона ба ҳамлаҳои Русия ҳаст, ки панҷ сол боз ин кишварро ба хоку хун кашидааст.

Ӯ афзуд: “Мо ҷанг намехоҳем ва ҳеч гоҳ онро нахоста будем. Ҳама, аз ҷумла шарикони мо, медонанд, мо ба ҳеч ваҷҳ намехоҳем, ки Украина аз ҳамлаҳои душман бисӯзад. Аммо вақте Украина месӯзад, пас, Маскави шумо ҳам хоҳад сӯхт. Инҷо бори дигар таъкид мекунам, ки замони поён додан ба таҷовуз ва ҷанг фаро расидааст.”

Украина дар чанд моҳи ахир ҳамлаҳои паҳподиро ба дохили хоки Русия ва дуртарин минтақаҳои ин кишвар афзоиш додааст. Поёни ҷанги бедалели Русия алайҳи Украина, ки беш аз панҷ сол боз давом дорад, маълум нест.

"Ҳизбуллоҳ"-и Лубнон рӯзи 18 июн эълон кард, ки нерӯҳояш дар ҷануби ин кишвар бо артиши Исроил даргир шудаанд. Чанд соат пеш аз ин, расонаҳои расмии Лубнон аз кушта шудани се нафар дар ҳамлаҳои паҳбодии Исроил хабар дода буданд. Дар ҳамлаи дигар, як нафар дар яке аз минтақаҳои марзӣ кушта шудааст.

"Ҳизбуллоҳ" эълон кард, нерӯҳояш бо артиши Исроил дар наздикии шаҳри Набатия, ки пешравӣ карда буданд, даргир шудаанд ва ин даргириҳо ҳамчунон идома дорад.

Ин ҳодиса як рӯз пас аз имзои созиш миёни Эрон ва Амрико барои поён додан ба ҷанг дар ҳама ҷабҳаҳои минтақа, аз ҷумла Лубнон, рух медиҳад.

Артиши Исроил низ аз кушта шудани як низомии худ ва захмӣ шудани ҳафт нафари дигар дар ҷануби Лубнон хабар дод.

Ҳамзамон, сухангӯи дабири кулли СММ эълон кард, ки нерӯҳои сулҳбони ин созмон дар Лубнон даргириҳо миёни "Ҳизбуллоҳ" ва Исроилро сабт кардаанд.

Ба гуфтаи ӯ, танҳо дар рӯзи панҷшанбе 143 партоб сурат гирифтааст, ки 119 мавриди он ба артиши Исроил ва боқимонда ба "Ҳизбуллоҳ" нисбат дода шудааст.

Владимир Зеленский, президенти Украина, рӯзи 18-уми июн гуфт, шаҳрвандони Русия бояд фишорро ба раисҷумҳур Владимир Путин бештар кунанд, то ӯ ҷанги зидди ин кишварро бас кунад.

Зеленский ин ҳарфро дар шарҳи ҳамлаҳои шаби гузаштаи Украина ба Русия гуфт, ки боис ба сӯхтор дар чанд корхонаи истеҳсоли нафт шуда, роҳҳо ва фурудгоҳҳоро дар чанд минтақаи Русия баст.

Ӯ гуфт, дар ниҳоят бояд мардуми Русия дарк кунанд, ки “танҳо як одам, Путин, президенти Русия ҷанг кардан мехоҳад, аммо баҳояшро тамоми мардуми ин кишвар мепардозанд.”

Пештар Зеленский гуфта буд, ки тибқи иттилои ӯ, ҳоло 60 дарсади аҳолии Русия муқобили ҷанг ҳастанд, аммо дар атрофи Путин одамоне ҳастанд, ки аз идомаи ҷанг пуштибонӣ мекунанд.

Дар се рӯзи охир бори дуюм аст, ки паҳподҳои Украина ба як корхонаи бузурги коркарди нафт дар вилояти Маскав зарба мезананд. Ин ҳамлаҳо муваққатан боис ба баста шудани роҳ ва қатъи парвозҳо дар аксар фурудгоҳҳои Русия мешаванд.

Дар охирин ҳамла бозори бузурги "Садовод" ва як баландошёна дар Маскав осеб дидааст. Мақомоти Русия хабар додаанд, ки дар ҳамлаҳои 18-уми июн 17 нафар захмӣ шуданд.

Зеленский ҳамлаҳоро дар посух ба таҷовузи Русия "комилан одилона" номид.

Ӯ гуфт, ҷаҳон шоҳид аст, ки Русия бо Украина чӣ кор мекунад ва ҳоло посухи ин кишварро мебинанд. Зеленский гуфт, агар Путин нахоҳад, ки ҷанг поён ёбад, онҳо ором намешинанд.

Украина чанд вақти охир ҳамлаҳои паҳподиро ба дуртарин минтақаҳои Русия ва аслан корхонаҳои коркарду истеҳсоли нафт афзоиш додааст.

Дар ҳамлаҳои паҳподии Украина ба Русия бозори "Садовод" дар Маскав, ки макони кори садҳо муҳоҷири тоҷик низ ҳаст, оташ гирифтааст. Дар наворҳое, ки рӯзи 18-уми июн дар Телеграм нашр шуд, ин бозорро дуду оташ фаро гирифтааст. Ҳанӯз маълум нест, ки дар ин ҳамла муҳоҷирони тоҷик зиён дидаанд ё на.

Украина дар посух ба таҷовузи Русия ба хоки ин кишвар ҳамлаҳои паҳподиро бештар кардааст. Мақомоти ин кишвар мегӯянд, ҳадафашон ҳамла ба корхонаҳои истеҳсоли нафт аст, ки Русия аз фурӯши маҳсулоти онҳо дар ҷанги зидди Украина истифода мекунад.

Дар вилояти Маскав дар пайи ҳамлаҳои паҳподҳои Украина чанд корхонаи истеҳсоли нафт низ оташ гирифтааст.

Сергей Собянин, шаҳрдори Маскав гуфтааст, ки ба вилояти Маскав бо 200 паҳпод ҳамла шудааст. Ӯ сӯхтор дар корхонаҳои истеҳсоли нафт ва бозори "Садовод"-ро тасдиқ кардааст.

Дар наворҳои нашршуда дар шабакаҳои иҷтимоӣ дида мешавад, ки дар ҳамлаҳои субҳи 18-уми июн дар панҷ минтақаи атрофи Маскав корхонаҳои истеҳсоли нафт оташ гирифтаанд.

Тамоми фурудгоҳҳо барои чанд соат парвози ҳавопаймоҳоро қатъ кардаанд ва чанд шоҳроҳ низ барои ҳаракати мошинҳо баста шуд.

Владимир Зеленский, раисҷумҳури Украина, дар як навор гуфт, ин посухи одилона ба ҳамлаҳои Русия аст, ки ҳар рӯз Украинаро хароб мекунанд.

Русия панҷ сол боз зидди Украина меҷангад ва қисме аз хоки ин кишварро ишғол кардааст. Дар посух Украина низ ба иншооти низомӣ ва нафтии Русия зарба мезанад.

Эмомалӣ Раҳмон, раисҷумҳури Тоҷикистон, имзои эъломияи тафоҳумномаи сулҳ байни Амрико ва Эронро, ки мумкин аст, ба муноқиша байни ду кишвар поён диҳад, табрик гуфтааст.

Дафтари матбуоти раёсати ҷумҳурӣ рӯзи 18-уми июн барқияҳои алоҳидаи Эмомалӣ Раҳмонро ба Доналд Трамп ва Масъуди Пизишкиён нашр кард, ки дар онҳо аз имзои тафоҳумнома истиқбол ва гуфта шудааст, ки имзои ин санад ба амният дар тамоми ҷаҳон мусоидат мекунад.

Дар барқия ба номи Доналд Трамп омадааст: "Ин рӯйдоди воқеан ҳам муҳим, ки маҳсули иродаи матин ва заҳматҳои пайвастаи Шумо мебошад, барои истиқрори сулҳу суботи фарогир дар минтақаи Ховари Миёна, ҳамчунин, таҳкими низоми амнияти ҷаҳонӣ аҳаммияти калидӣ дошта, ҷиҳати роҳандозии иқдомҳои нави сулҳомез дар ин ҷода заминаҳои мусоиди устуворро фароҳам меорад."

Айни замон Эмомалӣ Раҳмон ба Масъуд Пизишкиён, раисҷумҳури Эрон гуфтааст: "Мо медонем, ки дастрасӣ ба ин созиши муҳим барои миллати Эрон осон набуд ва маҳсули талошҳои зиёду иродаи қавии он мебошад. Бовар дорам, ки мувофиқаҳои дар ин зимн ҳосилшуда барои таъмини сулҳи устувор ва фарогир дар Ховари Миёна, таҳкими низоми амнияти байналмилалӣ ва фароҳам овардани заминаҳои мусоид ҷиҳати рушди иқтисодиву иҷтимоии пойдор аҳаммияти калидӣ доранд."

Раисҷумҳури Тоҷикистон ҳамчунин ба номи Шаҳбоз Шариф, нахуствазири Покистон, ки миёнҷигари асосӣ байни Амрикову Эрон буд, барқияи табрикӣ фиристода ва нақши ӯро дар расидан ба тавофуқ байни ду тараф муассир номидааст.

Раҳбарони Амрикову Эрон пас аз музокироти дарозу печидае рӯзи 18-уми июн ба эъломияи тафоҳумномаи сулҳ байни ду кишвар имзо гузоштанд, ки хатми тамоми даргириҳоро дар Халиҷи Форс дар назар дорад.

Ҷанг байни Амрикову Эрон ва Исроил моҳи феврали имсол ва баъд аз ҳамлаҳои Амрико ба иншооти атомии Эрон оғоз шуд.

Бо идомаи даргириҳо, Эрон тангии Ҳурмуз, яке аз оброҳаҳои муҳими ҷаҳониро баст, ки 20 дарсади нафту гази моеи ҷаҳон аз он мегузарад. Қатъи ҳаракати киштиҳо аз Ҳурмуз, боис ба болоравии нархи нафту газ дар ҷаҳон, аз ҷумла дар худи Амрико шуд ва иқтисоди ҷаҳониро ҳам ба мушкилот гирифтор кард.

Як сокини 37-солаи ноҳияи Шамсиддини Шоҳин дар ҳавзи заршӯӣ ғарқ шуда, ҷон бохтааст.

Як манбаъ дар ҳукумати ноҳия рӯзи 18-уми июн ба Радиои Озодӣ гуфт, Раҷабалӣ Шарифов барои кор ба Дараи Зарбуз рафта, ҳангоми оббозӣ дар ҳавз ғарқ шудааст. Ҳодиса рӯзи 16-уми июн рӯй дод. Манбаъ гуфт, ҷасадро баъди ду рӯз ёфта, ба пайвандонаш доданд.

"Ҳоло дар Дараи Зарбуз баъди рафтани чиниҳо, тоҷикҳо ва аслан мардуми таҳҷоии ноҳияи Шамсиддини Шоҳин кор мекунанд", - афзуд мусоҳиби Радиои Озодӣ.

Дараи Зарбуз дар лаби дарёи Панҷ ва дар сарҳад бо Афғонистон ҷойгир аст. Ҳоло дар ин минтақа ду ширкат ба заршӯӣ машғуланд.

Давоми моҳҳои май ва июни имсол чанд мавриди ҳалокати шаҳрвандон дар конҳои заршӯии минтақаи Кӯлоб сабт шудааст.

Рӯзи 8-уми июн дар кони тилои Шугнов дар ноҳияи Ховалинг, Рӯҳулло Кабирови 30-сола зери экскватор монд ва ба ҳалокат расид.

Кумитаи ҳолатҳои фавқулода пештар дар бораи ҷон бохтани Меҳроҷиддин Давлатзодаи 19-сола дар ҳамин кони тило гузориш дода буд. Ӯ бо мошини хокбардори худ рӯзи 9-уми июн ба ҳавз афтод.

Охири моҳи майи имсол ба болои коргарон дар Шугнов як кӯҳпора чаппа шуда, чаҳор тан ҷони худро аз даст доданд. Мақомот сабаби ин ҳодисаро риоя накардани қоидаҳои бехатарӣ номиданд.

Вазорати корҳои дохилии Тоҷикистон тасдиқ кард, ки мошини ҳомили Алишер Мирзонабот, раиси Вилояти Мухтори Куҳистони Бадахшон ба садама дучор шуда, ба дарёи Панҷ афтодааст. Ин хабарро Радиои Озодӣ пештар дар такя бо манобеаш нашр карда буд.

Дар гузориши дафтари матбуоти ВКД омадааст, дар дохили мошин Алишер Мирзонабот, ҳамсару фарзанди хурдсолаш, ёвари раиси ВМКБ Садоншо Ҷанобилшоев ва ронанда Сино Муборакшоев қарор доштанд.

Мақомот мегӯянд, ҳодиса соати 10:40-и 17-уми июн дар байни деҳаҳои Яхчисор ва Зиғари ноҳияи Дарвоз рух дод. Сабаби садама “суръати баланд” ва “аз уҳдаи идораи воситаи нақлиёт набаромадани” ронанда гуфта шудааст.

“Бинобар суръати баланд воситаи нақлиёт ба иншооти муҳандисӣ-сарҳадӣ бархӯрда, ду сутунпоя ва симхорро зер карда, ба дарёи Панҷ сарозер мешавад. Аз ҷойи ҳодиса рақами қайди давлатии 287 ТҶ ва қисмҳои алоҳидаи воситаи нақлиёт пайдо карда шуд”, - омадааст дар хабари расмии ВКД.

Мақомот мегӯянд, раиси ҷумҳур Эмомалӣ Раҳмон қазияро пайгирӣ дорад ва бо дастури ӯ вазири корҳои дохилӣ, раиси Кумитаи давлатии амнияти миллӣ ва роҳбари Кумитаи ҳолатҳои фавқулода ба ҷойи ҳодиса рафтаанд.

Алишер Мирзонабот, раиси ВМКБ ва ҳамзамон муовини раиси Маҷлиси Миллӣ аст ва рӯзи 16-уми июн дар ҷаласаи палатаи болоии порлумон дар Душанбе ширкат дошт.

ИНЧУНИН, БИХОНЕД:

Манбаъ: Мошини Алишер Мирзонабот, раиси ВМКБ ба дарёи Панҷ афтодааст

Алишер Мирзонабот 46-сола аст ва аз соли 2021 раиси Вилояти Мухтори Кӯҳистони Бадахшон мебошад. Пеш аз он раиси шаҳри Хоруғ ва то соли 2018 муовини раиси Кумитаи давлатии амнияти миллии Тоҷикистон буд.

Ӯро дар ҳукумати Тоҷикистон барои ба истилоҳ “ҷорӣ кардани тартибот дар вилояти Бадахшон” тавсиф мекунанд, аммо баъзе аз сокинон ӯро ба саркӯби даҳҳо озодандеш муттаҳам медонанд.

Дар давраи роҳбарии Алишер Мирзонабот соли 2022 Вилояти Мухтори Кӯҳистони Бадахшон шоҳиди саркӯби эътирози сокинон шуд.