Владимир Зеленский, раисҷумҳури Украина, ки кишвараш аз як сӯ бо моҷарои фасоди молӣ ва аз тарафи дигар бо ҳамлаҳои сахти ҳавоии Русия дучор шудааст, талошҳои ҷаҳониро барои расидан ба созиши сулҳ бештар кардааст. Вай як гурӯҳро ба Иёлоти Муттаҳида фиристод ва худ дар ҳоли барномарезии сафаре ба Порис (Париж), маркази Фаронса, мебошад.
Зеленский рӯзи 29-уми ноябр гуфт, як дастаи музокиракунандаро ба унвони бахше аз талошҳо барои расидан ба "сулҳи обрӯмандона" ва поён додан ба ҷанги Русия дар Украина ба Иёлоти Муттаҳида фиристод. Русия ин ҷангро дар моҳи феврали соли 2022 оғоз кард.
Ӯ гуфт, ин ҳайат аз тарафи Рустам Умаров, вазири дифои собиқ, ки акнун дабири Шӯрои амният ва дифои миллии Украина аст, раҳбарӣ хоҳад шуд.
Як мансабдори баландпояи Украина ба хабаргузориҳо гуфтааст, Марко Рубио, вазири умури хориҷӣ; Стив Виткофф, фиристодаи вижа ва Ҷаред Кушнер, домоди Доналд Трамп, раисҷумҳури Амрико барои дидор бо ҳайати украинӣ рӯзи 30-юми ноябр ба Флорида хоҳанд рафт. Пас аз ҷаласаи Флорида, Виткофф, қарор аст, ҳафтаи оянда ба Маскав сафар кунад.
Дар ҳамин ҳол, мақомоти Фаронса эълон карданд, ки президент Эммануэл Макрон дар аввали моҳи декабр мизбони Владимир Зеленский хоҳад буд, то дар мавриди шароити сулҳи одилона ва пойдор гуфтугӯ кунанд.
Киев ва ҳампаймонҳои аврупоии он ба раҳбарии Фаронса, Бритониё ва Олмон пас аз тарҳи пешниҳодии Трамп, ки мунтақидон иддао мекунанд беш аз ҳад ба нафъи Русия аст, дар талош барои тадвини як тарҳи сулҳи ислоҳшуда ҳастанд.
Зеленский дар мавриди сафари худ ба Порис изҳори назаре накард, аммо Макрон яке аз қавитарин пуштибонҳои Киев дар мубориза бо ҳуҷуми Русия будааст. Раисҷумҳури Украина рӯзи 18-уми ноябр ҳам дар Фаронса буд.
Тибқи нусхаи ибтидоии тарҳи 28-бандӣ, Украина бояд аз баҳри қисмате аз қаламраваш мегузашт, артиши хурдтаре медошт ва орзуи пайвастан ба НАТО-ро фаромӯш мекард. Барои бисёре аз украиниҳо, чунин шартҳо пас аз тақрибан чаҳор соли мубориза бо Русия ба таслим шудан баробар хоҳад буд.
Ин нусха мақомоти Украинаро ҳам нигарон кард ва тибқи гузоришҳо, Зеленскийро хашмгин намуд, ки баъдан бо мақомоти амрикоӣ музокироти дуҷониба анҷом доданд. Тарҳи “ислоҳшуда” акнун аз 19 банд иборат аст, аммо то ҳол чанд масъалаи калидӣ, аз ҷумла сарнавишти бахше аз вилояти Донетски Украинаро дар бар мегирад.
Душвории дигар исрори Кремлин дар мавриди ҳамроҳ нашудани Украина ба паймони низомии НАТО ва эҳтимоли маҳдуд кардани артиши Киев будааст.
