Мақомҳои Толибон ва сокинони вилоятҳои Хуст ва Нангарҳор мегӯянд, ки дар натиҷаи ҳамлаҳои ҳавоии шаби чаҳоршанбе ба панҷшанбе дар ин вилоятҳо, се кӯдак кушта ва 10 тан захмӣ шудаанд.
Вазорати корҳои хориҷии Толибон рӯзи 28 август бо нашри як хабар дар сафҳаи Х эълон кард, ки ин ҳамла аз сӯи артиши Покистон сурат гирифтааст ва дар вокуниш ба он, Абдураҳмон Низомӣ, сафири Покистон дар Кобул, ба ин вазорат даъват шудааст.
Вазорати корҳои хориҷии ҳукумати Толибон афзудааст, ки эътирозномаи худро ба сафири Покистон дар Кобул супурдаанд.
Покистон ҳанӯз ба таври расмӣ дар ин бора чизе нагуфтааст.
Кӯдакони кушташуда дар вилояти Хуст зери даҳсола будаанд. Як сокини вилояти Хуст ва аз ҳамсоягони кӯдакони кушташуда, ки бинобар ҳассосияти мавзӯъ нахост номаш бурда шавад, рӯзи панҷшанбе аз маҳали ҳодиса ба Радиои Озодӣ гуфт:
"Шаби гузашта замоне, ки ҳавопаймоҳои бесарнишини Покистон ба як хонавода дар Хуст ҳамла ва болои онҳо мушак андохтанд, се кӯдак, ки ҳар се аз як хонавода буданд, кушта ва чаҳор тан захмӣ шуданд. Захмиҳо ба бемористони шаҳр фиристода шуданд. Табибон мегӯянд, ки вазъияташон хуб аст".
Ин сокини Хуст гуфт, ки ҳавопаймоҳҳои покистонӣ он шаб дар фазои ин шаҳр гашт мезаданд ва мардум ба таҳлука афтода буданд. Ба гуфтаи сокинон, мардум аз хонаҳояшон берун баромада буданд ва танҳо субҳ ба хонаҳояшон баргаштанд.
Мақомҳои Толибон дар Хуст мегӯянд, ки ин ҳамлаҳои ҳавоӣ аз сӯи артиши Покистон анҷом шудааст.
Сухангӯи ҳукумати Толибон дар ин вилоят дар баёнияе, ки ба Радиои Озодӣ фиристод, гуфт, "дервақти шаби гузашта тақрибан соати 10:30, дар минтақаи Суркоҳи вилояти Хуст дар наздики марз бо Покистон, хонаи як шахси маҳаллӣ бо номи Ҳоҷӣ Наъим Гул аз сӯи ҳавопаймоҳои бесарнишини покистонӣ бомбаборон шудааст. Дар натиҷаи ин ҳамла, се кӯдак аз ин хонавода ҷон бохтанд ва панҷ тани дигар ба шумули занон ва кӯдакон, захмӣ шудаанд".
Бар асоси ин эъломия, фарде, ки ба хонаи ӯ ҳамла шудааст, як тоҷири маҳаллӣ ва ғайринизомӣ буда, ба ҳеч гурӯҳе вобаста набудааст.
Сокинони маҳаллӣ наворҳои видеоӣ ва аксҳоро аз маҳалли ҳодиса ва қурбониён ба Радиои Озодӣ фиристоданд. Аммо Радиои Озодӣ наметавонад ба таври мустақил замон, макон ва ҷузъиёти ин ҳодисаро тайид кунад.
Дар ҳамин ҳол, шаби чаҳоршанбе ба панҷшанбе гузоришҳое аз ҳамлаҳои ҳавоӣ ба вулусволӣ ё ноҳияи Шинвор дар вилояти Нангарҳор нашр шуд. Ба гуфтаи сокинони маҳал ва мақомоти Толибон, дар ин ҳамлаҳо шаш тан захмӣ шудаанд.
Вазорати корҳои хориҷи Толибон дар эъломияе гуфт. ки нақзи ҳарими ҳавоии Афғонистон аз сӯи Покистон ва бомбаборони ғайринизомиён дар наздикии хатти марзро ба шиддат маҳкум мекунад ва онро нақзи ошкори тамомияти марзии Афғонистон ва як иқдоми таҳрикомез медонад.
Дар эъломия гуфта шудааст, ки "барои ҷониби Покистон возеҳ сохта шудааст, ки ҳифозат аз ҳарими ҳавоии Афғонистон хатти сурх барои Иморати Исломии Афғонистон (Толибон ҳукумати худро чунин меноманд РО) аст ва чунин иқдомоти ғайримасъулона паёмаде хоҳад дошт".
Пеш аз ин низ Покистон борҳо бахшҳое аз хоки Афғонистонро ҳадафи ҳамлаҳои ҳавоӣ қарор дода ва гуфта буд, ки паноҳгоҳҳои Таҳрики Толибони Покистонро ҳадаф қарор додааст.
Гуфтугӯ