Дар чанд ҷумла
"Маконҳои зебо дорем, вале..." Намоишгоҳи сайёҳӣ дар Душанбе
Як намоишгоҳ дар Душанбе соҳибкорону сармоягузорон ва намояндагони бахши ҷаҳонгардиро аз Тоҷикистон ва кишварҳои хориҷӣ гирди ҳам овард. Онҳо рӯзи 26-уми сентябр роҳҳои ҷалби сайёҳон ва шеваи хидматрасониро муаррифӣ карданд. “Намоишгоҳи байнулмиллалии сайёҳии Душанбе - 2024” бори аввал баргузор шуд.
Дмитрий Илюшев, намоянда аз Сурхондарёи Узбекистон, гуфт, “моро даъват карданд ва имкон доданд, ки фарҳангу таърих ва ҷойҳои динни минтақаи худро муаррифӣ кунем. Умедворем, ки ин ҳамоиш барои Тоҷикистону Узбекистон натиҷа медиҳад.”
Намояндагони Эрон аз лағви раводид миёни Тоҷикистону Ҷумҳурии Исломӣ истиқбол карда, аммо онро барои равуои сайёҳон кофӣ надонистанд. Амир Аслонзода гуфт, “интизор дорем, теъдоди парвози ҳавопаймоҳо бештар шавад. Ширкатҳо бештар шаванд. Бояд коркунон омӯзиш бигиранд, рӯйи хуш нишон диҳанд.”
Баъзе аз ширкатдорон ҳунарҳои дастии кишварашонро муаррифӣ карданд.
Тоҷикистон ҷаҳонгардиро яке аз ҳадафҳои муҳими рушди худ то соли 2030 эълон карда, умед дорад, бо ҷалби сайёҳон тиҷорати хурду миёнаро рвиоҷ хоҳад дод. Баъзе аз коршиносон мегӯянд, зарфияти сайёҳии Тоҷикистон ҳанӯз пурра ошкор ва муаррифӣ нашудааст.
Амир Исаев, мудири ширкати “Амир Тур” мегӯяд, “мо ҷойҳои бисёр зебо дорем, ки сайёҳони кишварҳои дигар ҳатто дар бораашон маълумот надоранд. Роҳнамоҳо ва роҳбаладҳои таҳсилдида намерасанд. Ҳамчунин, маконҳои гардишгарӣ хуб муаррифӣ нашудаанд. Кӯҳҳо, кӯлҳо, шаршараҳо ва ҷойҳои зебои дигар ин фарҳанги мо ҳастанд. Ин худ метавонад таваҷҷуҳи зиёдеро ҷалб кунад."
Кумитаи рушди сайёҳии Тоҷикистон мегӯяд, дар ним соли гузашта тақрибан 750 ҳазор хориҷӣ ба кишвар омадаанд, ки ҳадафи 580 ҳазор нафар саёҳӣ будааст. Ба гуфтаи мақомот, шумораи сайёҳон нисбат ба ҳамин давраи соли гузашта 19 дарсад афзудааст.
Ҳамаи хабарҳои имрӯзро дар инҷо бихонед
Рӯи фарши сарду холӣ. Азоби мусофирон дар як фурудгоҳи Русия
Мусофирони фурудгоҳи “Пулково” дар шаҳри Санкт-Петербург рӯзҳои 22 ва 23-юми март маҷбур шудаанд, ки дар рӯйи фарши сарду холӣ бихобанд. Дар ду рӯз беш аз 100 парвози ҳавопаймо дар ин фурудгоҳи Русия боздошта шуд.
Мақомот гуфтанд, сабаби таъхир дар парвозҳо таҳдиди паҳпод ё ҳавопаймоҳои бесарнишини украинӣ ба фурудгоҳ будааст.
Александр Дрозденко, волии Ленинград, гуфт, низоми дифои ҳавоӣ ва воҳидҳои муборизаи радиоэлектронӣ беш аз 70 дронро нобуд карданд. Дар бораи талафоти эҳтимолӣ хабаре нашр нашудааст.
Дрозденко гуфт, дар шаҳри соҳилии Приморск баъди ба зарфи сӯзишворӣ расидани паҳподе оташнишонҳо дар ҷои ҳодиса кор мекунанд. Дар ноҳияи Виборги вилояти Ленинград як сутуни барқ осеб дидааст.
Приморск ва Уст-Луга дар соҳили баҳри Балтика ҷойгир буда, нуқтаи муҳими содироти маводи сӯхт дониста мешаванд. Рӯзи яшканбе дар паи ҳамлаи паҳподҳо содироти нафти хом ва дигар сӯзишворӣ аз ин ҷо боздошта шуд.
Навор дар инҷост:
7 хати интиқоли барқи Кувайт аз кор монд. Раҳгирии паҳподҳо дар Саудӣ
Кувайт рӯзи 24-уми март эълон кард, ки системаи дифои ҳавоии ин кишвар дар ҳоли муқобила бо "ҳамлаҳои мушакӣ ва паҳподӣ" ҳаст. Артиш аз шаҳрвандон хост, дастури мақомотро риоя кунанд.
Ҳамзамон, Вазорати барқи Кувайт хабар дод, ки дар пайи суқути боқимондаҳои мушакҳои раҳгиришуда ҳафт хати интиқоли барқ аз кор монд.
Арабистони Саудӣ низ субҳи 24-уми март эълон кард, ки падофанди ҳавоии ин кишвар тайи ду соат, дар чанд ҳамлаи ҷудогона, дар маҷмӯъ 19 паҳподро, ки вилояти Шарқияи ин кишварро ҳадаф қарор дода буданд, раҳгирӣ ва аз байн бурд. Ин хабарро Вазорати дифои Арабистони Саудӣ нашр кардааст.
Дар ҳамин ҳол, Бритониё эълон кардааст, ки барои муқобила бо мавҷи ҳамлаҳои Эрон ба кишварҳои Халиҷи Форс сомонаҳои дифои ҳавоии кӯтоҳбурд ба минтақа мефиристад.
Кейр Стармер, нахуствазири Бритониё гуфт, ин таҷҳизот ба Баҳрайн, Кувайт ва Арабистони Саудӣ фиристода мешавад. Ҳамчунин сомонаи зиддипаҳподии Rapid Sentry ба Кувайт мунтақил хоҳад шуд ва як нови ҷангии Бритониё низ дар шарқи Миёназамин ҷобаҷо шудааст.
Ба гузориши хабаргузории "Франс Пресс", мақомҳои бритониёӣ мегӯянд, ҳузури низомии ин кишвар дар минтақа ба болотарин сатҳ дар 15 соли гузашта расида, парвозҳои амалиётӣ барои ҳимоят аз чанд кишвари минтақа афзоиш ёфтааст.
Таҳдиди Эрон ба ҳамла алайҳи нерӯҳои исроилӣ дар марз бо Лубнону Ғазза
Эрон гуфтааст, дар сурати идомаи ҳамлаҳои Исроил ба Лубнон ва Фаластин, "маҳалли таҷаммуъ"-и нерӯҳои Исроилро дар шимоли ин кишвар ва Навори Ғазза ҳадафи ҳамлаҳои мушакӣ ва паҳподӣ қарор хоҳад дод.
Ин таҳдид аз сӯи Сипоҳи посдорони Эрон дар ҳоле содир шуд, ки артиши Исроил рӯзи 23-юми март хабар дод, ки ду мушаки партобшуда аз Эрон ба тарафи Исроил дар ҷануби Лубнон фуруд омад.
Сипоҳи посдорони Эрон дар баёнияаш тавзеҳи бештаре дар ин бора надодааст.
Исроил аз оғози ҷанг бо Эрон ва ба дунболи он ҳамлаҳои "Ҳизбуллоҳ" ба Исроил, амалиёти густардаеро ба таври ҳамзамон алайҳи ин гурӯҳ дар ҷануби Лубнон оғоз кардааст.
Исроил ва Амрико гурӯҳи "Ҳизбуллоҳ"-и Лубнонро созмони террористӣ медонанд. Ин гурӯҳ дар порлумони Лубнон чанд намоянда дорад.
Дар тозатарин таҳаввулот, мақомҳои Лубнон эълон карданд, ки дар ҳамлаи ҳавоии Исроил ба минтақае хориҷ аз Бейрут, ду нафар кушта ва панҷ нафар захмӣ шуданд. Ин ҳамла пас аз чандин ҳамлаи шабона ба ҷануби Бейрут рух дод.
Ҳамзамон хабаргузории расмии Лубнон аз идомаи ҳамлаҳои Исроил ба минтақаҳои мухталифи ҷануб ва шимол-шарқи ин кишвар ва ҳамчунин вуруди нерӯҳои исроилӣ ба як шаҳри марзӣ ва даргирӣ бо сокинон хабар додааст.
"Ҳизбуллоҳ" низ эълон кардааст, ки ҳамлаҳое алайҳи нерӯҳои исроилӣ дар ҷануб ва шимоли Исроил анҷом додааст.
Ин даргириҳо, ки барои ҳафтаи чаҳорум боз идома дорад, боис ба кушта шудани беш аз ҳазор нафар ва овора шудани наздик ба ним миллион нафар дар Лубнон гаштааст.
Боздошти як шаҳрванди дигари Тоҷикистон дар Арманистон
Нерӯҳои марзбонии Арманистон як шаҳрванди 46-солаи Тоҷикистонро дастгир кардаанд.
Ба иттилои дарёфтии Радиои Озодӣ, Асомуддин Раҷабови 46-сола аз Гурҷистон ба Арманистон мегузашт.
Вакили мудофеъ Ани Чатинян аз Helsinki Citizens' Assembly–Vanadzor рӯзи 23-юми март ба Радиои Озодӣ гуфт, шахси зери ҳимояташ бо дархости мақомоти Тоҷикистон ва бо иттиҳоми "ифротгароӣ" дастгир шудааст.
"Дар ҳоли ҳозир додситонӣ қазияи ӯро баррасӣ дорад. Умед дорем, ки ба Тоҷикистон таслим нахоҳад кард," – гуфт хонум Чатинян.
Шарҳи ҷониби Тоҷикистон дастрас нест.
Ҷустуҷӯйи Радиои Озодӣ нишон дод, ки Асомуддин Раҷабов дар шабакаи иҷтимоии Фейсбук бо имзои мустаор матлабҳои танқидӣ нашр кардааст.
Яке аз дӯстонаш гуфт, ӯ як соли охир дар Гурҷистон мезист, вале пулис огоҳӣ додааст, ки муҳлати будубошаш ба поён расиду бояд ин кишварро тарк кунад.
"Муҳлати шиносномаи Асомуддин ҳам ба охир мерасид ва ӯ ягона шонсро дар он дид, ки ҳарчи зуд ба Арманистон гузарад, аммо дар марз дастгир шуд," -- афзуд ӯ.
Ба нақли ин ҳамсуҳбати Радиои Озодӣ, ки номаш ба далели амниятӣ навишта намешавад, Асомуддин Раҷабов аз соли 2009 то соли 2012 дар дастаи зудамали таъйиноти махсус ё ОМОН-и Вазорати корҳои дохилии Тоҷикистон хидмат кардааст.
"Вай дар амалиёти нерӯҳои давлатӣ дар Бадахшон ҳам ширкат дошта, баъди дидани баъзе саҳнаҳои ваҳшатнок ихтиёрӣ аз дастаи ОМОН берун шуд ва барои идомаи зиндагӣ ба Русия рафт. Сипас ба Туркия ва аз онҷо ба Гурҷистон гузашт," – гуфт ӯ.
Асомуддин Раҷабов соҳиби ду фарзанд аст.
Ҳафтаи гузашта пайвандони ду шаҳрванди боздоштшудаи Тоҷикистон дар Арманистон гуфта буданд, ки чанд рӯз боз аз онҳо дарак надоранд.
Онҳо низ бо дархости Тоҷикистон ва бо иттиҳоми "зархаридӣ", "ташкили иттиҳоди ҷиноӣ" ва "қочоқи маводи мухаддир" дастгир шуда, дар Боздоштгоҳи муваққатии шаҳри Ванадзор, дар шимоли Арманистон ҳастанд. Наздикони онҳо, баръакс иддао доранд, ки қазия сиёсист.
Озодии як рӯзноманигори таҳқиқотгари қирғиз аз зиндон
Додгоҳе дар Қирғизистон як рӯзноманигори таҳқиқотгарро аз зиндон озод кард.
Бар асоси қарори додгоҳ, Муҳаббат Тоҷибек, роҳбари гурӯҳи тарҳҳои Temirov LIVE ва "Айт, айт десе" баъди зиёда аз ду сол аз зиндон раҳо мешавад, аммо ҳаққи тарки ҷойи зисташро надорад.
Вакили дифоъ, ки дар мурофиаи додгоҳӣ ба тарзи онлайнӣ ширкат дошт, гуфт, Муҳаббат Тоҷибек 23-юми март озод шуд. Додситон ё айбдоркунандаи давлатӣ ҳам ба озод шудани ӯ розӣ шудааст.
Муҳаббат Тоҷибек моҳи январи соли 2024 ҳамроҳи дигар кормандони тарҳҳои таҳқиқотии Temirov LIVE ва “Айт.айт десе” боздошт шуда буд.
Моҳи октябри он сол додгоҳ Муҳаббат Тоҷибекро бо гуноҳи "даъват ба беназмиҳои оммавӣ" ба 6 сол зиндон маҳкум кард.
Худи ӯ ва ҳомиёни ҳуқуқ иттиҳомро беасос гуфтанд.
Путин созишномаро дар бораи ташхиси муҳоҷирони тоҷик имзо кард
Владимир Путин, президенти Русия, созишномаро бо Тоҷикистон дар бораи ташхиси муҳоҷирон қабл аз сафар имзо кард.
Ба гузориши хабаргузории расмии "ТАСС", бо имзои Путин раванди тасдиқ ё ратификатсияи созишнома дар Русия ба анҷом расид ва ин санад иҷроӣ мешавад.
Шӯрои Федератсия, палатаи болоии порлумони Русия, рӯзи 17-уми март ин созишномаро тасдиқ карда буд. Бар пояи ин санад, акнун муҳоҷирони тоҷик метавонанд пеш аз сафар ба Русия дар Тоҷикистон аз муоинаи тиббӣ гузаранд.
Натиҷаи ташхис барои гирифтани иҷозаи кор ё патент дар Русия зарур аст. Дар назар аст дар як ё чанд дармонгоҳи шаҳри Душанбе нуқтаҳои муоинаи тиббӣ боз шаванд, ки ба ташхиси муҳоҷирони меҳнатӣ қабл аз сафари онҳо ба Русия машғул хоҳанд шуд.
Нархи ташхис ба гуфтаи Саломиддин Юсуфӣ, муовини вазири тандурустии Тоҷикистон, 240 сомонӣ ё 25 доллар арзиш дорад.
Муҳоҷирони тоҷик борҳо аз мушкил будани гирифтани санади тиббӣ дар Русия шикоят кардаанд.
Абхозистон як шаҳрванди Тоҷикистонро ба Русия супурдааст
Мақомоти ҷумҳурии худхондаи Абхозистон як шаҳрванди Тоҷикистонро, ки бо иттиҳоми ифротгароии динӣ дар ҷустуҷӯ қарор дошт, боздошт ва ба Русия истирдод кардаанд.
Хадамоти амнияти давлатии Абхозистон дар иттилоияе гуфт, истирдоди шаҳрванди Тоҷикистон Каримхон Саидови 43-сола дар поёни ҳафтаи гузашта сурат гирифт.
Назари Саидов ба қазия ва қарори истирдодаш маълум нест.
Инчунин рӯшан нест, ки ӯро бо дархости Русия боздошт кардаанд ё Тоҷикистон. Мақомот дар Душанбе дар ин бора ҳанӯз изҳори назар накардаанд.
Дар хабари мақомоти Абхозистон, аз ҷумла гуфта шудааст, ки гуё Саидов “дар саҳифаҳои ҳомии гурӯҳҳои ифротӣ дар Сурия маводе паҳн мекард, ки барои сафед кардани ифротгароӣ ва барангехтани адовати динӣ равона шуда буд”.
Хадамоти амнияти давлатии Абхозистон гуфт, муҳлати санадҳои муҳоҷирати Саидов дар Абхозистон ҳам гузашта буд ва ӯ рӯзи 20-уми март ба Русия истирдод шуд.
Феълан маълум нест, ки ӯ дар куҷо аст ва дар Русия ба ӯ айбе эълон шудааст ё на.
Тоҷикистон Абхозистони рӯ ба Русияро чун давлати мустақил ба расмият намешиносад, аз ин рӯ, бисёр муносибатҳои ҳуқуқии вобаста ба шаҳрвандони Тоҷикистон дар ин ҷумҳурӣ тавассути сохторҳои Русия ҳаллу фасл мешаванд.
Трамп гуфт, ҳамла ба нерӯгоҳҳои Эронро 5 рӯз ба таъхир гузошт
Раисҷумҳури Амрико гуфт, баъди як суҳбати "бисёр хуб" ҳама гуна ҳамларо ба нерӯгоҳҳои Эрон то панҷ рӯз ба таъхир гузошт. Вазорати корҳои хориҷии Эрон билофосила посух дод, ки байни Теҳрон ва Вашингтон "муколамае" вуҷуд надорад.
Доналд Трамп 23-юми март дар шабакаи Truth Social навишт, "бо назардошти хусусият ва лаҳни гуфтугӯҳо" ба Вазорати дифоъ супориш додааст, ки "ҳама гуна ҳамла алайҳи нерӯгоҳҳо ва зербунёдҳои энержии Эронро ба муддати панҷ рӯз боздорад".
Трамп афзуд, "ин гуфтугӯҳо дар тӯли ҳафта идома хоҳад дошт".
Дар ҳамин ҳол, "Тасним" ва "Форс", ду хабаргузории наздик ба Сипоҳи посдорони инқилоби исломии Эрон, бо такя ба манбаъҳои худ навиштанд, ки байни Теҳрон ва Вашингтон мустақим ё ғайримустақим "ягон музокирот" сурат нагирифтааст.
Изҳороти раисҷумҳури Амрико чанд соат пеш аз поёни зарбулаҷал ба Эрон барои бозкушоии гулӯгоҳи Ҳурмуз садо дод. Аз ин оброҳа 20 дарсад аз нафту гази ҷаҳон мегузарад.
Доналд Трамп шоми 21-уми март ба Эрон ҳушдор дода буд, ки "агар дар зарфи 48 соати оянда гулӯгоҳи Ҳурмузро пурра ва бе таҳдид боз накунад, Амрико нерӯгоҳҳои ин кишварро нобуд хоҳад кард."
Тибқи гузоришҳои расида, Иёлоти Муттаҳида ҳазорҳо афсару сарбози нерӯҳои заминиро ба Ховари Миёна мефиристад. Дар вокуниш нерӯҳои мусаллаҳи Ҷумҳурии Исломӣ таҳдид кардаанд, ки Эрон даст ба иқдоми мутақобил зада, зерсохторҳои минтақаро нобуд хоҳад кард.
Ҷудо аз он, раиси порлумони Эрон Муҳаммадбоқир Қолибоф навишт, "ҳамзамон бо ҳамла ба нерӯгоҳҳо ва зерсохтори эронӣ тамоми зербунёд ва коргоҳҳои энергетикии марбут бо Амрико дар минтақа нобуд карда мешаванд."
Чунин ҳамла ба кишварҳои Халиҷи Форс, ки муштарии бузурги нерӯ ва вобаста аз коргоҳҳои обсофкун мебошанд, таъсири фавқулода хоҳад дошт.
Сипоҳи посдорони инқилоби исломии Эрон ваъда додааст, ки дар ҳоли зарурат гулӯгоҳи Ҳурмузро комилан баста, онро замоне боз хоҳад кард, ки тамоми зерсохторҳои маҳвшуда барқарор шаванд.
Маҳдудшавии равуои киштиҳо дар Ҳурмуз боис ба афзоиши нархи маводи сӯхт ва ҳамзамон бо он болоравии қимати маводи ниёзи аввалия гардидааст.
Гузориши видеоӣ дар инҷост:
Чор мошини як ширкати яҳудиро дар Лондон оташ задаанд
Шахсони ношинос дар шаҳри Лондон чор мошини Ёрии таъҷилии марбут ба як ширкати яҳудиро оташ задаанд. Ширкати ғайритиҷоратии "Хатсала" ба расондани ёрии пизишкии бепул машғул буд.
Ба гузориши Би-би-сӣ, ҳодиса дар ноҳияи Голдерс Грин рух додааст.
Баъди оташ задан дар дохили мошинҳо чанд баллони газ таркидааст, ки дар натиҷа хонаҳои истиқоматии атроф осеб дидаанд.
Сара Ҷексон, сардори пулиси ноҳия гуфтааст, аз рӯи навори дурбинҳои назоратӣ ҳодисаро таҳқиқ доранд.
Се нафар гумонбар ҳастанд.
Пулиси Лондон мегӯяд, ҳодисаро ҳамчун "ҷиноят бар асоси яҳудибадбинӣ" таҳқиқ дорад.
Шимон Райд, як сокини маҳаллӣ гуфтааст, мошинҳои Ёрии таъҷилӣ дар канори ибодатгоҳи яҳудиён (синагога) қарор дошт.
Кир Стармер, нахуствазири Бритониё ин ҳодисаро маҳкум карда, онро амали "яҳудситезона" хонд.
Аз зиндон озод шудани як хабарнигор дар Қирғизистон
Додгоҳе дар Қирғизистон як рӯзноманигори таҳқиқотгарро аз зиндон озод кард.
Бар асоси қарори додгоҳ, Муҳаббат Тоҷибек, роҳбари гурӯҳи тарҳҳои Temirov LIVE ва "Айт, айт десе" баъди зиёда аз ду сол аз зиндон раҳо мешавад, аммо ҳаққи тарки ҷойи зисташро надорад.
Вакили дифоъ, ки дар мурофиаи додгоҳӣ ба тарзи бархат (онлайнӣ) ширкат дошт, гуфт, Муҳаббат Тоҷибек 23-юми март озод мешавад. Додситон ё айбдоркунандаи давлатӣ ҳам ба озод шудани ӯ розӣ шудааст.
Муҳаббат Тоҷибек моҳи январи соли 2024 ҳамроҳи дигар кормандони тарҳҳои таҳқиқотии Temirov LIVE ва “Айт.айт десе” боздошт шуда буд.
Моҳи октябри он сол додгоҳ Муҳаббат Тоҷибекро бо гуноҳи “даъват ба бетартибиҳои оммавӣ” ба 6 сол зиндон маҳкум кард. Худи ӯ ва ҳомиёни ҳуқуқ иттиҳомро беасос гуфтанд.
Ба як қирғизистонӣ дар Амрико то 28 сол зиндон таҳдид мекунад
Як шаҳрванди Қирғизистон, ки баъди садамаи нақлиётӣ дар Иёлоти Муттаҳида боздошт шуда буд, метавонад то 28,5 сол зиндонӣ шавад. Дар ин садама, ки моҳи феврал дар аёлати Индиана рух дод, чор нафар ба ҳалокат расидааст.
Додситони минтақаи Ҷей дар аёлати Индиана хабар додааст, ки Бекжан Бейшекеев якбора ба чор иттиҳом, аз ҷумла беэҳтиётӣ, ки боиси марг шудааст, муттаҳам мешавад.
Дар гузориши додситонӣ омадааст, шаҳрванди 30-солаи Қирғизистон мошини боркашонро идора мекард ва дар шоҳроҳ муқобили самти ҳаракат баромада, бо мошини сабукрав бархӯрдааст. Дар ин ҳодиса чор шаҳрванди ИМА ҳалок шуданд, ки аз 19 то 50 сол син доштанд.
Маҷлиси намояндагон лоиҳаи ду қонунро рад кардааст
Маҷлиси намояндагон, палатаи поёнии порлумони Тоҷикистон ҳафтаи гузашта дар як иқдоми камсобиқа лоиҳаи ду қонунро баргардондааст.
Ба гузориши нашрияи порлумонии "Садои мардум", Шӯрои Маҷлиси намояндагон 13-уми март қарор кард, ки лоиҳаи тағйиру иловаҳо ба қонун "Дар бораи сармоя ва ҳавасмандгардонии фаъолияти сармоягузорӣ" баргардонда шавад.
Дар хабари расмӣ ҷузъиёт дода нашудааст. Дар бораи лоиҳаи ин қонун ва сабабҳои баргардондани он дар манобеи боз низ маълумоте нест.
Ба иттилои расмӣ, Шӯрои Маҷлиси намояндагон рӯзи 16-уми март ҳамчунин лоиҳаи қонун "Дар бораи идоракунии рақамӣ"-ро бозпас гардондааст.
Дар бораи сабабҳои баргарондани ин лоиҳаи қонун низ шарҳе дода нашудааст. Лоиҳаи қонун дар бораи "Дар бораи идоракунии рақамӣ" моҳи ноябри соли 2025 расонаӣ шуда буд. Он вақт Маҷлиси намояндагон лоиҳаи ин қонунро барои додани хулоса ба кумитаҳои порлумон фиристода буд.
Порлумони Тоҷикистонро барои бидуни баҳс қабул кардани қонунҳо танқид мекунанд. Худи вакилон ин интиқодро қабул надоранд ва мегӯянд, лоиҳаи қонунҳо то расидан ба ҷаласаи Маҷлиси намояндагон баррасӣ ва такмил мешаванд.
Палатаи поёнии порлумони Тоҷикистон аз 63 вакил иборат аст, ки аксари онҳо аъзои Ҳизби ҳокими халқии демократӣ ва аҳзоби тарафдори ҳукумат ҳастанд. Ҳизби сотсиал-демократи Тоҷикистон, ки ягона ҳизби мухолифи расмӣ дар кишвар гуфта мешавад, дар порлумон намоянда надорад.
234 сомонӣ ҷаримаи як мард барои беэҳтиромӣ ба ҳамсараш
Додгоҳи шаҳри Хуҷанд як мардро барои баҳсу муноқиша бо ҳамсараш 234 сомонӣ ҷарима кардааст.
Ба иттилои додгоҳ, ин мард нимашаби 5-уми феврал "бо ҳамсараш баҳсу муноқишаи оилавиро ба миён оварда, нисбаташ беҳурматӣ зоҳир намуда, суханҳои қабеҳ гуфта, нисбаташ зӯровариро раво дидааст".
Назари ин мард ба қазия маълум нест. Сомонаи Додгоҳи Хуҷанд навиштааст, мард "ба гуноҳаш пурра иқрор гардида, аз кирдори содирнамудааш софдилона пушаймонӣ изҳор намуд".
Ба гузориши сомонаи Додгоҳи Хуҷанд, алайҳи ин мард бар асоси моддаи 93 иловаи 1-и Кодекси ҳуқуқвайронкунии маъмурӣ ҷазо таъйин шудааст. Ин банди қонун риоя накардани талаботи қонунгузорӣ дар бораи пешгирии зӯроварӣ дар оиларо пешбинӣ мекунад.
Хушунати хонаводагӣ аз масъалаҳои нигаронкунанда дар Тоҷикистон гуфта мешавад. Ба иттилои расмӣ, соли 2025 беш аз 3600 шикоят аз хушунат дар хонаводаҳо сабт гаштааст. Ин 403 маврид зиёдтар назар ба соли 2024 мебошад.
Хушунати хонаводагӣ дар ҳоли ҳозир дар Тоҷикистон ҷурми ҷиноӣ нест. Мақомот солҳо боз ният доранд, ки онро ҷурми ҷиноӣ бишносанд, вале ин кор то кунун сурат нагирифтааст.
Оғози даври нави музокирот барои поёни ҷанг дар Украина
Даври нави музокироти Амрико ва Украина дар шаҳри Майамии аёлати Флорида оғоз шуд. Музокирот шанбеи 21-уми март шуруъ шуда, қарор аст рӯзи якшанбе ҳам идома кунад. Дар ин бора президенти Украина Владимир Зеленский хабар додааст.
Амрикоро дар ин нишаст Стив Виткофф, фиристодаи вижаи перезидент ва Ҷеред Кушнер, мушовиру домоди раисҷумҳур Доналд Трамп намояндагӣ мекунанд. Аз тарафи Украина Рустам Умаров, котиби Шӯрои амният ва Кирилл Буданов, раиси дафтари президент дар ин гуфтугуҳо ширкат доранд.
Ҳафтаи гузашта ҳайати амрикоӣ бо намояндагони Русия бар сари хатми ҷанг дар Украина гуфтугӯ карда буданд.
Нашрияи Politico менависад, Кирилл Дмитриев, намояндаи президенти Русия дар вохӯрӣ бо намояндагони Амрико эътироф кардааст, ки Маскав дар ҷанги ахир бо додани маълумотҳои истихборотӣ ба Эрон кумак мекунад.
Ба навиштаи ин нашрия, намояндаи Русия гуфтааст, додани маълумот ба Эронро бас мекунанд, агар ИМА ирсоли маълумотҳои истихборотиро ба Украина қатъ кунад. Politico менависад, пешниҳоди намояндаи Русия рад шудааст. Худи Дмитриев ин хабарро рад кард.
Рӯзи 19-уми март Дмитрий Песков, сухангӯи Кремл гуфт, музокироти Маскав, Киев ва Вашингтон барои поёни ҷанг дар Украина ба хотири ҷанг дар Эрон "боздошта шудааст".
Тоҷикистон дар радаи 88-уми феҳристи кишварҳои шод дар ҷаҳон
Дар тозатарин радабандии ҷаҳонӣ, Тоҷикистон аз рӯйи шохиси шодӣ ё хушҳолӣ дар байни 147 кишвар, дар мақоми 88-уми қарор гирифтааст.
Дар гузориши нави World Happiness Report 2026, ки рӯзи 19 март нашр шуд, 147 кишвари ҷаҳон аз ҷанбаҳои мухталиф, монанди ҳимояти иҷтимоӣ, умед ба оянда, вазъияти тандурустӣ, эҳсосоти мусбат ва манфӣ ва дигар шохисҳо, арзёбӣ шудаанд.
Илова бар ин, муаллифон омилҳое аз қабили даромади аҳолӣ, сатҳи озодӣ, дарки фасод ва дарозумриро низ дар назар гирифтаанд.
Ин мутолеа бар асоси посухҳои наздик ба 100 ҳазор нафар дар 147 кишвар ва минтақа анҷом шудааст. Гузориши нав бар таъсири расонаҳои иҷтимоӣ ва фановариҳои рақамӣ ба некӯаҳволӣ, ба хусус байни ҷавон, тамаркуз мекунад.
Гузориши солонаи ҷаҳонии хушҳолӣ ҳар сол бо ҳамкории ниҳодҳои гуногуни Созмони Милали Муттаҳид ва Донишгоҳи Оксфорд таҳия мешавад ва ҳадафи он, арзёбии вазъияти зиндагии мардум дар кишварҳои мухталиф ва ироаи он ба ниҳодҳои зирабт барои эҷоди тағйироти мусбат гуфта мешавад.
Қазоқистон танҳо кишвари ИДМ аст, ки дар радабандӣ дар миёни панҷоҳ кишвари бартар қарор гирифт. Ин кишвар бо 10 рутба боло рафтан назар ба соли гузашта, дар ҷойи 33-юм қарор дорад.
Узбекистон дар Гузориши ҷаҳонии хушҳолӣ, аз байни 147 кишвари шод, дар рутбаи 53-юм боқӣ монд. Қирғизистон рутбаи 66, Молдова рутбаи 77 ва Русия рутбаи 79-ро касб карданд.
Арманистон рутбаи 89 ва Озарбойҷон рутбаи 102-ро ба худ ихтисос доданд. Туркманистон ба далели нокифоя будани маълумот, ба ин рейтинг шомил нашуд.
Финландия барои нӯҳумин бор шодтарин кишвари ҷаҳон шинохта шуд. Пас аз он Исландия дар ҷойи (дувум), Дания (севум), Коста Рика (чаҳорум), Швейтсия (панҷум), Норвегия (шашум), Ҳоланд (ҳафтум), Исроил (ҳаштум), Люксембург (нӯҳум) Швейсария (даҳум), қарор гирифтаанд.
Афғонистон ҳамчунон ғамгинтарин кишвари ҷаҳон (147) аст. Ботсвана (143), Зимбабве (144), Малави (145) ва Серра-Леоне (146) низ дар рутбаҳои охир қарор доранд.